住家飯 @ 媽咪屋企 ( 31-MAY-2010 )

( 31-MAY-2010  MON )

又到星期一 lu   一個好嘅開始 ~

番到菇場又靜英英啦   好在唔眼瞓   唔係肯定未到 10 點已經中下中下咁咯 ~ 

今日好似好快就到 Lunch Time 咁   可能太耐無飯落肚   依家一食飯就覺得好滯咁 ~ 

今晚好開心呀   因為同里奧大人番媽咪屋企食飯   順便睇下媽咪傷口   不過原來係包到實一實睇唔到呢   但聽媽咪洗傷口都會好痛   所以可能要植皮   希望唔駛啦 ~

蕃茄芝士魚柳焗飯 + 老黃瓜赤小豆扁豆豬骨湯 ( 30-MAY-2010 )

( 30-MAY-2010  SUN )

今朝瞓到 11 點 10 分   真係要即刻起身   超級快去梳洗   再跑去餐廳食早餐呢 ~

食完買餸   番到屋企要預備煲湯   利尿祛濕湯都係早煲早飲好啲 ~

2 點幾出去食 Tea   其實唔餓   但又唔想太夜食晚飯喎   所以同里奧大人去 KFC Share 一個餐   順便清哂啲 Cash Coupon ~

食完行陣番屋企就飲湯   再睇碟   睇完已經 6 點半喇   係時候煮飯呢 ~

是日晚餐 - 蕃茄芝士魚柳焗飯 + 老黃瓜赤小豆扁豆豬骨湯

蕃茄芝士魚柳焗飯 - 本來整豬扒   諗住里奧大人鍾意食   但其實我麻麻地   再問佢鍾意豬扒定魚柳   佢居然諗都唔諗就話魚   唔通知我鍾意食所以話食魚   不過都唔問佢點解喇   比個幻想空間自己好過啦   哈哈   諗住整焗飯會簡單啲   點知都整咗一個鐘喎 ~

老黃瓜赤小豆扁豆豬骨湯 - 1個老黃瓜 + $4 赤小豆扁豆 + $25 豬骨 + 陳皮 + 蜜棗   煲兩個鐘   所以超甜呀   食埋啲瓜   超飽呀 ~   

蒜蓉豆豉炒蝦仁 + 煎野生三文魚扒 + 金銀蛋菠菜 + 荔枝果凍 ( 29-MAY-2010 )

( 29-MAY-2010  SAT )

今日 Off   係因為補番 4 月初嘅紅假呢   但里奧大人呢日反而要番工   我 1 個月放 1 次   佢就 1 個月番 1 次   佢就好好多啦   不過我有得 Off 都好好㗎喇   但係 8 點鐘就醒咗   碌到 9 點先起身   唔駛番工無人嘈醒   但早起都覺得好精神咁喎 ~

早餐去 KFC   因為要清埋啲 Cash Coupon   好耐無食又覺得幾好味喎   不過杯奶茶就絕對唔掂呀 ~

食完去剪髮   短髮真係好爽呀   人都開心啲呀   所以走去買衫   比錢時個老闆話我好熟面口   話見過我   我話第一次嚟咋噃   之後佢問我係咪去過葵芳買衫   咁又係喎   但幾年前啦   佢真係好有記性呀   定係我個樣無老到呀 ~

番到屋企好有心機熨衫   之後抹櫃   又抹乾淨廚房   成間屋好乾淨咁呀 ~    

等埋里奧大人放工就去食 Tea   之後番屋企睇碟   話咁快就過咗大半日 lu ~

是日懶餐 - 蒜蓉豆豉炒蝦仁 + 煎野生三文魚扒 + 金銀蛋菠菜 + 荔枝果凍

蒜蓉豆豉炒蝦仁 - 覺得食魚唔夠飽   所以整呢碟餸   清哂所有蝦仁 lu ~      

煎野生三文魚扒 - 無心機煎到完整一塊呀   整散嚟炒就方便好多呢 ~ 

金銀蛋菠菜 - 成日遺忘咗菠菜呢樣嘢添   難得記起就煮喇 ~ 

荔枝果凍 - 魚膠片到期   一定要清咗去   一次過用咗 10 塊   但唔知點解覺得好腥咁囉   可能唔夠凍   定係心理作用呢   所以我最後都係食荔枝肉同椰果就算喇 ~ 

鹹魚干貝肉碎炒飯 + 節瓜鹹蛋肉碎湯 ( 28-MAY-2010 )

( 28-MAY-2010  FRI )

Happy Friday 喇   今日晏晝有 Lunch Box   所以朝早食奶醬多算 lu ~

今朝細老闆無番   所以 Free 爆呢   勁開心呀   好配合今日嘅 Happy Friday 呀 ~

太耐無食 Lunch Box   覺得好有新鮮感呢 ~

4 點幾無啦啦見到細老闆坐咗喺房喎   又要閃閃縮縮咯   不過唔緊要啦   之前都上夠咯   呵呵 ~

是日懶餐 - 鹹魚干貝肉碎炒飯 + 節瓜鹹蛋肉碎湯

鹹魚干貝肉碎炒飯 - 帶 Lunch Box 係唔可以帶鹹魚呀   蝦膏呀   因為陣味實在太勁   想食嘅話   最好就係星期五或者六整   所以今晚就整呢個飯   其實我只係用鹹魚干貝醬黎炒飯   味道都唔錯喎 ~

節瓜鹹蛋肉碎湯 - 有瓜有湯   一煲過就最好不過啦 ~ 

特辣 XO 醬炒西蘭花龍蝦丸 + 蕃茄薯仔排骨湯 ( 27-MAY-2010 )

( 27-MAY-2010  THU )

呢排個人比較攰   所以早餐食乜都覺得麻麻哋好味咁   定係食得太多厭咗呢 ~

今朝細老闆唔喺菇場   真係令所有人震奮啦   可以上網喎   幾大都上番夠本先得呀 ~ 

10 點幾媽咪打嚟話出得院   好感恩   不過下星期覆診可能要做植皮   因為傷口太大喎   但如果傷口埋得好就唔駛   求神保守媽咪唔駛再做手術   開開心心健健康康過每一日呢 ~ 

呢刻心情又喜又悲咁囉   不過都係無哂心機   但都唔諗咁多 lu   又唔係我決定嘅   隨遇而安啦 ~

無啦啦超想食飯   去附近買三餸飯   $18 咋   呢間食店成日都好多人排隊   早餐又係排哂隊咁   估

唔到味道又唔錯喎   樣樣都熱辣辣   食完又唔口渴   第時無 Lunch Box 可以多過選擇 lu ~

今晚買完餸就睇中醫   好耐無煮飯喇   煮簡單啲先   慢慢 Warm Up   好在里奧大人上咗大陸   要 8 點先番到屋企   我就有多啲時間預備呢 ~

是日懶餐 - 特辣 XO 醬炒西蘭花龍蝦丸 + 蕃茄薯仔排骨湯

特辣 XO 醬炒西蘭花龍蝦丸 - $10 有 3 個西蘭花   抵啦   一次過煮哂去   就咁食菜都飽呀 ~

蕃茄薯仔排骨湯 - 好耐無飲呢個湯   所以即滾呀   超正呀 ~

龍鳳茶樓鳳爪排骨飯 (外賣) ( 26-MAY-2010 )

( 26-MAY-2010  WED )

呢排好攰呀   話咁快就星期三   即係等如就黎有得放假   咁諗都唔錯呢 ~

依家菇場唔可以任意上網   其實唔係唔比   只不過唔想比人話啫   老闆唔喺度個個都一樣上網   上網已經成為工作嘅一部分嘛   點可能唔上喎 ~ 

一早諗好晏畫食豉椒排骨炒麵   超正呀   但超多油   食咗好小麵咋 ~

里奧大人頭痛   所以我自己去探媽咪   感謝神   媽咪聽日可以出院   感恩感恩 ~ 

終於可以鬆一口氣喇   雖然唔係大件事   但總會擔心   心情難免受影響家嘛 ~

我麻麻哋鍾意食排骨㗎   但呢晚無啦啦又超勁想食鳳爪排骨飯   所以去 7-11 買   叮埋先番屋企食   嘩   果刻覺得自己好慘咁呀   好似啲單身漢咁   夜晚要食叮叮飯   我影相嘅時候都覺碗飯好孤單寂寞咁呀   嘻嘻 ~

雲桂香米線專門店 @ 大埔 ( 25-MAY-2010 )

( 25-May-2010  TUE )

今日細老闆會長駐菇場   所以盡量唔好遲到   不過呢   妳越唔想遲   就硬係有啲阻滯   所以我今朝都遲咗 10 分鐘呢   雖然遲   但我堅持食埋早餐先番工㗎   大佬   成日坐喺菇場好悶啫 ~

個個同事真係無上網喎   所以仲更加更加更加靜   話哂上網都要郁下 Mouse 同打下 Keyboard 嘛   依家連 Keyboard 聲都少埋   晨早流流開始悶到眼瞓呀 ~

Lunch Time 即上網啦   求其食杯裝粉絲算喇   反正唔想出街行 ~

放工買完嘢食比媽咪就打的去醫院   時間啱啱好   咁媽咪就可以食到熱辣辣嘅嘢喇 ~ 

里奧大人上咗大陸嚟唔到   不過呢晚都唔探咁耐喇   因為要番媽咪屋企拎叉電器   我唔想太晏番屋企   同埋食咗消炎藥個人好攰咁呀 ~ 

同里奧大人食米線   食完番屋企沖涼   睇陣電視   乜都唔想做  10 點半上床瞓覺喇 ~ 

車仔麵 (外賣) ( 24-MAY-2010 )

( 24-MAY-2010  MON )

晚餐 : 探完媽咪   番到屋企已經 9 點幾   又唔想食咁多肉   但又驚唔飽   所以食咗通菜 + 榨菜 + 韭

菜河粉   加咗惹味嘅辣汁   真係一啲都唔覺得齋呢 ~

午餐 : 出去買完嘢比媽咪   突然超餓呀   所以買炒麵燒賣 + 1 隻粉果   食完飽到上眼呀 ~

早餐 : 呢朝早啲出門口   諗住多啲時間食早餐   點知茶餐廳整錯 Order   最後一樣係咁趕 ~

車仔餸 (外賣) ( 23-MAY-2010 )

( 23-MAY-2010  SUN )

呢朝瞓到 11 點   諗食乜早餐   但來來去去都係嗰啲都有啲悶   但又真係諗唔到食乜好喎 ~

尋晚 3 點幾起身去洗手間   對眼超痛   仲以為係攰   點知食完早餐仲痛   最後都係睇醫生   原來係生眼瘡   話對手唔乾淨摔眼   我成日摔眼㗎喎   依家唔敢喇 ~ 

里奧大人去跑步   我又熨衫   一個人喺屋企做家務感覺真係幾舒服呢 ~

今日突然好想食麥當勞   估唔到無位喎   不過唔緊要   買上屋企食   最緊要有得食薯條 ~

家姐喉嚨唔舒服   咁我又再煲羅漢果茶比家姐   之後里奧大人無啦啦話我冷酷無情   我話咩冷酷無情呀   佢話佢家姐咳又唔煲比佢家姐   我話你都曉講你家姐啦   係咪你煲呀   又話我有事就搵佢哋祈禱   都黐黐哋   我得今次叫佢哋為媽咪祈禱咋   白痴   真係唔知邊個教到佢個格咁衰   樣樣都要比   低能 ~

之後佢話要整電腦唔探媽咪   我心諗唔探仲好   都費事見到佢個衰格樣呀    所以我食完坐陣就出發去探媽咪   感謝神   媽咪 4 點開始做手術    5 點做完    我 6 點到就啱啱好喇    不過佢都攰    所以我就同家姐傾偈   媽咪就醒下聽下咁 坐到夠鐘就走人喇 ~

個巨無霸餐都好漏   所以我買車仔餸番屋企食算 lu ~

新之食 @ 官塘 ( 22-MAY-2010 )

( 22-MAY-2010  SAT )

呢朝請咗假   其實無乜特別嘢做   只係想連放 3 日咁啫   諗住出去行下   點知焗到暈   又落雨   無計啦   留喺屋企睇電視同雜誌都唔錯   平時唔會咁專心睇 ~

好似好快又食 Tea 咁   不過唔想出街   所以又叫外賣 ~

同里奧大人一齊去探媽咪   本來媽咪今日做手術   不過手術室突然有 Urgent Case 要做   所以要排聽日做   最怕等嘅感覺 ~

無耐家姐同姐夫又到   一齊傾下偈又睇下電視   話咁快就到 8 點要走人喇 ~ 

佢哋約咗朋友食飯   我同里奧大人就近近哋喺官塘食嘢算 lu ~

苑記粉麵茶餐廳 @ 大埔 ( 21-MAY-2010 )

( 21-MAY-2010  FRI )

呢朝瞓到 11 點   同里奧大人即刻起身食早餐喇   因為我好餓呀 ~

天氣又焗又熱   都係唔出街   係屋企 Hea 住咁過就最舒服呢   連 Tea 都唔想出街食   叫外賣呀   真係唔錯喎   感覺唔駛郁就有得食咁 ~

今晚同里奧大人要去 "大酒店" 鞠躬   之後同埋 2 姑奶一齊去屋企樓下求其食啲嘢就算 lu ~

番到屋企   家姐打嚟黎話媽咪入咗醫院   因為隻腳嘅瘀血有啲滲咗出嚟   所以同工人即刻入急症室   驚有細菌感染   醫生話一個星期仲未退哂啲瘀血   同埋啲皮膚有部分壞死咗   可能要做手術抽哂瘀血   聽完乜心機都無哂咯 ~ 

住家飯 @ 媽咪屋企 ( 18-MAY-2010 ) + ( 19-MAY-2020 ) + ( 20-MAY-2010 )

薑蔥炒蜆 / 蒸青根 / 蒜蓉蒸茄子 / 韭菜豬扒炒麵 / 雪耳魚唇唐排湯

( 18-MAY-2010  TUE )

早餐 : 奶醬多   多醬真係好味好多呢 ~

午餐 : 粉果 + 炒米粉   今次啲米粉好乾   食得好辛苦呀 ~

晚餐 : 媽咪住家飯   順便睇下媽咪對腳仲有無咁瘀   縮細咗一吋幾   不過睇情況   都應該要一個月先腿哂呢 ~

( 19-MAY-2010  WED )

呢朝每月一到   明明無嘢發生好舒服咁㗎噃   但一番到菇場個肚開始有啲唔舒適   頂到 11 點 45 分就番屋企 lu   今次安排唔好啦   諗住 Call 的番屋企   點先 Call 完仲等咗 20 分鐘先有喎   攰到我呢   落車即跑去睇醫生   之後番屋企沖涼大覺瞓   瞓到 3 點幾又比雷嚇醒   估唔到行雷又大雨   好在走得快啫   唔係放工坐的士實塞車呢 ~

( 20-MAY-2010  THU )

呢日番工啦   不過全日係咁中眼瞓   唔想食嘢   晏晝明明無事   仲諗夜晚食乜   點知番到屋企突然個肚唔舒服   都唔係問題   但個胃痛到爆   痛到真係好想入院嗰隻呀   後尾慢慢放鬆先好啲咋   之後就一覺瞓天光 lu ~ 

糖醋魚塊 + 腐乳炒唐生菜 ( 17-MAY-2010 )

( 17-MAY-2010  MON )

星期一了   迎接美好嘅開始   唔可以成日覺得星期一番工辛苦呢 ~

其實逢星期一朝早都幾充實嘅   因為比較多相要 Load   執下整下   時間都過得幾快咁嘅 ~ 

Lunch Time 又到喇   我鍾意 Lunch Box 係炒飯   好似特別入味啲咁 ~

喺開工期間大致上都諗咗今晚煮啲乜   不過多數上車再認真啲諗   諗清楚自己鍾意食啲乜先買   咁就最好 ~  

是日晚餐 - 糖醋魚塊 + 腐乳炒唐生菜

糖醋魚塊 - 材料得鯰魚柳 + 1 個洋蔥   醬汁就係 1.5 湯匙 HP 醬 + 2 湯匙茄汁 + 1 湯匙糖 + 生抽 + 老抽   今次唔跟食譜   求其啦   樣樣少少無試味添   但估唔到超好味呀   我第 1 次整到個汁咁杰㗎咋   超開心   里奧大人邊食邊讚   仲連洋蔥都食   勁少有啦   所以我絕對相信佢係真心覺得好食呢 ~

腐乳炒唐生菜 - 今次用炒嘅方法   但同淥無乜分別   嘥哂我啲心機添 ~  

今晚里奧大人要拎電腦去整   所以我去跑步先   跑開真係好想跑呢 ~

香煎鯰魚柳 + 什豆肉碎炒飯 + 南瓜粟米栗子紅蘿蔔豬展湯 ( 16-MAY-2010 )

( 16-MAY-2010  SUN )

今朝 9 點半同里奧大人一齊自然醒咗 lu   所以去食早餐   早啲食完去跑步仲好 ~

跑完步番屋企梳洗   再抖半個鐘就番教會   時間安排得非常之好呀 ~

里奧大人突然好想食炸兩   所以去熟食中心睇下   見到魚蛋麵居然未收檔   所以即去食啦   平時兩點已經賣哂㗎喇   感恩 ~

之前喺教會   里奧大人借我部電話查英文字   之後佢幫我袋住   點知到我要用電話嘅時候   發覺仲喺字典嘅版面   我同里奧大人話要 Close   如果唔係好易 Hang 機   佢話佢諗住一陣再用   我話到依家你都無用   乜一陣呀   之後佢發脾氣話都話一陣用咯   我咪話乜一陣呀   又唔見你用   你無 Close 就無 Close   唔好話一陣用   之後佢話我成日嘮嘮嘈嘈   我話唔係你成日用完無手尾   我駛咁呀   其實好想大聲鬧佢頂你個肺   自己無手尾仲話人   不知所謂   不過喺街嘛   費事做戲比人睇咁 ~

番到屋企各自為政   見到佢背影都憎呀   所以去廚房煲湯   大大力蓋煲蓋   睇煲蓋嘈定我嘈 ~

雖然我好掹   但佢個人格係咁無手尾   都幾難會改   倒不如我改啦   就係唔會再執佢手尾   佢鍾意開燈唔熄燈   開冷氣唔關門   飲完啲杯唔洗   啲嘢周圍放   我唔出聲話啦   電費比多啲   冷氣開大啲   大小強多啲   唔見嘢多啲   我無問題㗎架   我做嘢不嬲好有手尾   到時搵唔到嘢   千其千其咪搵我就得喇   心淡囉 ~

是日晚餐 - 什豆肉碎炒飯 + 南瓜粟米栗子紅蘿蔔豬展湯 + 香煎鯰魚柳

香煎鯰魚柳 - 用胡椒粉 & 蒜鹽醃咗一個鐘   味道唔錯   最緊要唔好腥就得喇 ~

什豆肉碎炒飯 - 個飯晏晝先煲咋   諗住自己帶什豆腸仔炒飯做 Lunch Box   不過突然諗起有豬展   所以即刻切絲黎整炒飯   好過浪費啲豬展   因為我唔食呢 ~

南瓜粟米栗子紅蘿蔔豬展湯 - 好想飲呢個湯   所以煲喇   超甜呀 ~

今日又買咗大樹菠蘿   但好淺色   不過都幾好味   同埋幾爽口   唔錯呢 ~

Cheese Pizza (芝脆雞) @ 大埔 ( 15-MAY-2010 )

6" 環遊世界 (薄批) 洋蔥 / 青椒 / 辣肉腸 / 火腿 / 蘑菇 / 菠蘿 / 牛肉 / 豬肉 - 呢個薄批有驚喜呀   多料   同埋芝士都幾多   個餅底都好脆   下次會再食 

百里香燒豬排骨 - 個樣好乾咁   但食落好 Juicy 㗎   真係豬不可以貌相呀

肉醬焗意粉 - 又係幾多料   我覺得好味過 Pizza Hut 囉   不過就鹹咗啲

( 15-MAY-2010  SAT )

星期六啦   要番半日工   半日啫   都好快過嘅   咁樣諗會開心好多呢 ~

老闆又 Off   個個同事唔係睇 Yahoo 就 Facebook   真係 Free 到爆   我 Partner 仲勁啦   早兩分鐘鬼鬼祟祟咁走   好心佢啦   都唔差嗰兩分鐘啦   Admin 坐喺門口㗎   人哋高層早走都話啫   妳係 Small Potato 都咁夠膽   真係好佩服佢呢   做人做到咁   下下計到咁盡   做人最緊要唔好蝕底應該係佢用人嘅左右銘   唔蝕底係對自己無好處嘅嘢喎   都唔明佢點教仔 ~

放工準時走啦 等巴士無無聊聊影下相   都幾大霧咁喎   不過我覺得好有仙境 Feel 好靚   但我都係鍾意有陽光多啲 ~

趕得切睇中醫   今次會打粉   兩個人飲   每日 1 次或者 2 次   材料有石斛 + 田七 + 花旗參 + 丹參 + 陳皮   醫師話要打兩個月   我話一個月夠喇   食得好就再打過囉   唔好咪浪費   之後執藥位仁兄問醫師得唔得   醫師話一個月就一個月啦   黐線嘅   唔得咪唔打囉   去另一度睇   到時你 $4,000 都無得賺呀   兩個計價嘅仁兄無啦啦講鄉下話添   比我感覺好有呃人 Feel 囉 ~

拎完藥就去食 Tea 喇   再去街市買生果就番屋企 lu   諗住番教會   但里奧大人要整電腦   所以聽日先番喇 ~

今日超無煮意   所以就睇報紙等食飯   今次去 Cheese Pizza   估唔到好味喎   我覺得好味過 Shakey's Pizza 同 Pizza Hut   不過唔知係咪今次新鮮感呢   下次再食多次先得 ~ 

同里奧大人去跑步   都跑咗差唔多 3 個星期   加埋飲中藥   我覺得臉色同身體都好咗咁呀   感恩 ~

特辣 XO 醬炒西蘭花龍蝦丸 + 腸仔 + 超力米粉 ( 14-MAY-2010 )

( 14-MAY-2010  FRI )

Happy Friday 喇   哈哈   每次星期五拎住本忽然一週就會好開心   因為代表 Happy Friday   行入菇場都特別開心㗎 ~

阿 Head 出 Trip 份外 Free   不過我都好檢點嘅   上網都係縮細 Screen 睇嘢呢 ~   

晏晝又係 Lunch Box   如果第時係蔬菜為主都係唔好帶 Lunch Box 會好啲   因為叮完腍哂   我超唔鍾意呢啲口感 ~  

臨放工前開個小會   就係話細老闆會長註香港 Office   所以我哋唔可以上網   因為大陸係封鎖上網喎   又話番工 & Lunch Hour   盡量唔好咁遲番   守時對我嚟講無問題   突然我覺得好有番工 Feel 呀   哈哈 ~  

是日懶餐 - 特辣 XO 醬炒西蘭花龍蝦丸 + 腸仔 + 超力米粉

特辣 XO 醬炒西蘭花龍蝦丸 - 好想食西蘭花   又唔想整帶子   所以改為龍蝦丸切片攪掂   方便到震呀 ~

腸仔 - 掙扎咗好幾年買唔買腸仔放雪櫃好   因為我唔想擺咁多無益嘢喺雪柜   但呢   喺屋企整常餐都要有腸仔家嘛   一做要做全套家嘛   咁腸仔 + 雞翼又有 BBQ Feel   唔駛真係熱辣辣出街燒   計落都買得過   所以即買喇 ~

超力米粉 - 勁想食南記辣椒醬同雜豆   所以一定要食米粉呀   辣到出汗   爽呀 ~

抖陣又同里奧大人跑步   去到體育會已經 9 點 20 分 ( 因為 9 點 30 分 Closed )   同里奧大人話不如跑公園算啦   我話比咗錢呀   10 分鐘就 10 分鐘啦   9 點 30 分見練話同其他人都走   我同里奧大人都諗住走   點知教練話等埋阿姐入嚟清潔   妳哋走都未遲   咁我哋就繼續跑囉   估唔到亞姐 9 點 45 分先入嚟清潔   跑多 15 分鐘喎   真係好感恩呢 ~

彩椒炒雞柳 + 芥蘭 + 芝麻糊湯丸 ( 13-MAY-2010 )

( 13-MAY-2010  THU )

是日晚餐 - 照燒汁彩椒炒雞柳  + 芥蘭  + 芝麻糊湯丸

照燒汁彩椒炒雞柳 - 難得記得有半支照燒汁   所以即刻用埋去   唔係好快又過期   點解架   買嘅時候覺得個 Expiry Date 好耐咁㗎喎 ~  

芥蘭 - 尋晚食完菜心   所以今晚食芥蘭喇 ~ 

芝麻糊湯丸 - 又係芝麻糊就過期   所以清埋去喇    湯丸無餡㗎   今次難得拎食譜   就咁憑感覺去搓   一路搓一路話要煙韌煙韌    食嘅時候真係好煙韌㗎   非常之開心呀 ~

是日午餐 - 艇仔粥   無啦啦勁想食艇仔粥   呢間粥真係好好味   又多料喎   食完又唔口渴   真係唔錯呢   襯依家無咁熱就食喇   唔係一陣大熱天時   食完熱辣辣   再一來一回半個鐘   好攞命呢 ~

是日早餐 - 扒芝腿治 + 奶茶   早餐來來去去都係食嗰啲   不過就算好多選擇都懶得諗   最緊要快就得喇 ~

住家飯 @ 媽咪屋企 ( 12-MAY-2010 )

( 12-MAY-2010  WED )

感恩感恩   今朝非常之感恩   非常之開心   因為接到媽咪電話話可以出院 心情真係勁好呀 ~

番到菇場心情都好好呀   攰都覺得開心呀   哈哈 ~

晏晝又係 Lunch Box   其實我麻麻哋鍾意食隔夜餸   好悶咁   但就更唔想成日出街食囉   一個人都唔知食乜好   又要同啲陌生人坐   等嘢食就好自然妳眼望我眼咁   好唔自在呀   所以帶 Lunch Box 都唔係唔好嘅   想幾時食都得 ~

放工去媽咪屋企 lu   咁啱可以同埋家姐一齊搭車   所以一齊買壽司同燒味   呢餐家姐又爭比錢   平

時做嘢唔見咁快   一到比錢就好鬼快手㗎   我唔同佢爭啦   下次請佢食飯算喇   我到依家出街食飯同買嘢   如果同媽咪  家姐或者里奧大人一齊嘅話   佢哋都會自動比錢   唔駛我比   我覺得自己好幸福咁呀   我咁大個人   我一去買嘢   佢哋就會拎銀包出嚟比錢我  再問我夠唔夠   不過我當然唔會要佢哋啦   里奧大人除外   佢哋嘅錢嘛   我要買就用自己錢啦   無咪唔買囉   係咪先 ~

同里奧大人番到屋企即換衫去公園散步   做完運動   再沖個熱水涼   真係好舒服到呢 ~  

酸梅麵豉蒸排骨 + 菜心 ( 11-MAY-2010 )

( 11-MAY-2010  TUE )

呢朝一起身有啲頭痛   好在拎唔到免費報紙   咁樣我可以盡情瞓下   唔係會忍唔住睇報紙呢 ~

今朝好想食出前一丁   不過口感就唔似自己煮嘅丁囉   我都係煮普通嘅丁嘅啫   點解會咁嘅   有包出前一丁味粉比我㗎喎   唔會係公仔麵啩 ~

番到菇場真係無乜心機   個頭隱隱作痛   仲 Feel 到係有排痛嗰隻   但我唔想食藥囉 ~

Lunch Time 去對面買星洲炒米番菇場食   諗住食完瞓陣   但瞓唔到呀 ~

本來諗住探媽咪   但最後決定唔去喇   想早啲番屋企休息 ~

雖然頭痛   但都想煮飯   好似成個星期無食住家飯咁喇   最多煮簡單啲囉   不過難嘅餸   我都唔識煮啦   哈哈 ~ 

是日懶餐 - 酸梅麵豉蒸排骨 + 菜心

酸梅麵豉蒸排骨 - 整呢個餸   其一懶   其二想食酸酸辣辣嘅嘢   其三可以帶飯   幾咁好呀   我次次整親排骨都覺得自己好懶咁   所以同里奧大人講聲唔好意思   要煮咁簡單嘅排骨   點知佢嚟料   笑哂口串爆話 "算啦   妳舒唔舒服都煮排骨㗎啦"   事緣係好耐之前   我影咗好多食譜   寫哂號碼   叫佢抽兩張   點知佢抽完我話呢個難煮果個又煩   再嚟過又話呢個只可以假期先整   就係咁樣   佢以後唔會再抽食譜   話抽完又唔係整   嘥鬼氣喎   呵呵   鬼叫一家之煮係我咩   咁叻你煮囉   呵呵 ~

菜心 - $8/斤   買嘅時候無留意   番到屋企浸菜時先知好多條都係有黑色咁   應該係擺得耐   又唔靚啩   唔識形容   搞到要掉咗 1/3  同埋要拻啲衣   煩到呢 ~

我買咗紅豆沙   諗住食完先煮飯   點知拻咗好耐   里奧大人又上咗車   所以碗紅豆沙最後變咗做飯後甜品 ~

我個頭仲有少少痛   所以里奧大人自己去跑步算喇   我都想郁下   所以熨衫   當做運動真係唔錯㗎   熨得靚靚又開心   哈哈 ~ 

雲桂香米線專門店 @ 大埔 ( 10-MAY-2010 )

( 10-MAY-2010  MON )

尋晚 12 點先瞓   我覺得真係好夜囉   今朝真係無哂精神   又落雨   媽咪又入咗院   仲更加無心機添 ~

不過當我情緒低落嘅時候   我會諗番啲會令自己開心會笑嘅嘢   咁樣就會舒服好多呢 ~

今朝食腸粉   但唔滑嘅   又少樣選擇 lu ~

Hea 下 M 下又到 Lunch Time   講出嚟好似好嘆咁   其實有時都幾悶   不過最邪係次次唔想做嘢就大把嘢做   同埋呢   有時我忙唔講出嚟㗎咋   唔係真係咁嘆呢 ~ 

落雨濕濕   去對面買嘢食就算喇   今次買煎蛋免治牛肉意粉   但我覺得係豬肉囉   因為有好多   但我都無食到   因為食哂啲意粉已經好飽   同埋啲肉醬喺哂意粉底   所以都唔記得係有肉醬 ~

放工又落雨   最慘覺得凍咗   我好攰呀   所以今次打的去醫院   去到啱啱 6 點 ~

見到媽咪都好精神   不過就包住咗隻腳   但就咁睇個瘀血範圍就應該細咗   感恩   但物理治療師就唔比媽咪落地   一定要瞓喺度   托高隻腳   知道媽咪悶   就比多條橡根帶   吊住喺床頭   悶嘅時候就 Fing   可以當做運動   又可以血氣運行   好好呀   我玩咗陣都覺得成身熱哂呀 ~

無幾耐里奧大人都嚟埋   一齊陪到媽咪 8 點就走 lu   費事比人趕呀 ~

因為要拎中藥   所以都係番到屋企附近先食嘢   一陣趕唔切仲煩   同埋真係唔想咁趕   好攰呀 ~ 

同里奧大人去食米線   我想食啲酸辣嘢呀   同埋我只想食齋米線   即係唔要餸   再加碟菜 ~

番屋企飲埋中藥   食埋生果   啱啱夠飽 ~

Food Court @ APM (官塘) ( 9-MAY-2010 )

( 9-MAY-2010  SUN )

呢朝大食表妹 9 點打嚟我屋企   問我媽咪點樣   真係嚇死人啦   咁早打嚟   不過見佢咁有心   費事話佢咋   下次搵機會講下先 ~

里奧大人同我醒咗都瞓唔番   不過佢就玩電腦   我就喺度碌嚟碌去   因為我都想瞓   但瞓唔到   所以出去食早餐 lu ~

同里奧大人食完早餐就去睇中醫   點知睇到 1 點幾   去唔到運動會跑步   我又要番屋企沖涼   又番唔到教會   所以番屋企執廚櫃同熨衫   Hea 陣又出去食 Tea 喇   再飲埋中藥就出去買 Hard Disk   買完探媽咪呢 ~

的士好 Chok 呀   有下 Chok 到里奧大人問係咪有人衝出嚟   所以急剎車   比佢咁 Chok   我腦海即刻浮現上次家姐同媽咪入 A & E   個司機又係勁 Chok   收錢係好無禮貌咁第隻手向後面   家姐比錢時就鬧佢   嫌少錢就咪楂啦   黐黐哋線   咁呢一刻我都知道佢嫌少錢定啦   我即刻同里奧大人講   哎呀   咁 Chok 好想嘔呀   個司機聽到   之後無 Chok 過   呢啲人真係好衰格囉   無職業操手   廿蚊唔係錢咩   同埋嗰時媽咪對腳係腫到大笨象腳咁樣   所以先坐的士   我真係好討厭呢啲的士司機呀 ~

媽咪隻腳嘅瘀血縮細咗 1 吋   感謝神   但醫生話要退哂先番得屋企   無問題啦   醫院安全嘛   係悶啲咁啫 ~

 
無耐家姐同姐夫都嚟埋   一齊陪到媽咪 8 點就走 lu ~ 

今日母親節呀   好多地方都要等食   我又太攰   無 Book 定位   不過今日 Book 乜都應該無㗎喇   最後去 Food Court 食嘢   我覺得 City'super 嘅 Food Court 都好好味   好味過我屋企附近啲餐廳添 ~

明記牛什粉麵家 @ 官塘 ( 8-MAY-2010 )

( 8-MAY-2010  SAT )

今朝要番工啦   但好似好攰咁   不過算啦   番半日好快過嘅啫 ~

晏晝同里奧大人去將軍澳搵水姑飲茶   之後再去拜爸爸 ~

5 點左右諗住買 Hard Disk   點知收到家姐電話   話媽咪比車撞到   嚇到我呢   即刻打 999 要登記好多資料   但我話唔知當時發生乜事   唔喺現場   而家姐只係講咗地點比我知   依家趕緊去   麻煩盡快叫救護車到現場 ~

原來媽咪係 "喺上旅遊車梯級時   隻腳無力   所以右腳嘅上 5 吋下 5 吋撞咗落樓梯"   坐喺車度已經痛痛哋   但估唔到番到屋企咁嚴重囉   隻腳瘀腫   手掌咁大嘅瘀血泡   救護員話應該撞爆條微絲血管   問題唔大   我就跟車   里奧大人就自己坐的士去急症室等我哋   因為媽咪血壓 & 心跳比較快   所以停留咗一陣再量過   確保正常先開車 ~

去到 A & E 就即幫媽咪登記   但我頭先嚇一嚇   肯定聽嘢聽到唔清唔楚   所以叫里奧大人喺 A & E 入面陪媽咪   感恩醫生話媽咪無問題   又唔想放血   因為可以自然咁等自己吸收   又話媽咪一個人喺屋企   痛到都係行唔到   留喺醫院觀察仲好啦   之後就陪媽咪上病房 lu ~ 

上到房之後   啲護士又係超級好人   我同里奧大人講唔該   佢話 "唔駛唔該   唔該妳"   之後另一個護士又超級好人   見我哋無坐椅   即刻拎張坐椅比我   真係好感動㗎   因為 QE 啲護士唔係咁囉   唔理妳呢 ~  

諗住都 7 點   應該等唔到醫生   因為唔係緊急病情   但好感謝神保守   兩位醫生 7 點 40 分到咗   都話媽咪隻腳無乜事   因為食咗薄血丸   所以先腫到咁   留院等到自己吸收哂啲血就可以出院㗎喇 ~

好感謝天父同里奧大人   因為今日如果唔係約里奧大人家姐飲茶再去拜爸爸   之後等咗 45 分鐘的士   再要去官塘廣場買嘢   根本我同里奧大人就唔會喺官塘   咁就陪唔到媽咪   家姐又要特登喺屋企出嚟   咁都需要 1 個鐘啦   同埋好在里奧大人喺我身邊   好冷靜咁幫我手    如果唔係真係連我都入埋去 A & E 喇 ~

本來今晚係同里奧大人屋企聚餐   但無計啦   我同里奧大人都好攰   去官塘食粉麵算喇 ~

番到屋企再問家姐點解妳話媽咪比車撞   原來家姐話媽咪上旅遊車唔小心撞到梯級   隻腳痛到行唔到   所以自己打唔到 999 喎   點解我會聽到比車撞㗎   真係個人緊張聽乜都唔知   得個驚字   自己嚇親自己添 ~

慶祝母親節 @ 家傳滬曉 @ APM (官塘) ( 7-MAY-2010 )

鴨松子併叉子燒餅 - 最鍾意食松子   同埋有 d 榨菜同馬蹄   好爽口呀   好味道   最緊要唔鹹呀

上海粗炒 - 食咗兩啖   又唔係好油喎   唔錯 
酸辣湯 - 太酸喇   我麻麻哋   不過都幾多材料
饅頭宮保雞丁- 媽咪話之前食嘅係腰果   覺得好惹味   依家變咗花生同埋唔夠惹味   但我鍾意食個炸饅頭   個皮脆卜卜好味呀
蔥油餅 - 熱辣辣   不過佢哋唔食   我要食哂一個  
家常餅 - 每人一片   不過無乜特別   味道同蔥油餅差唔多   睇食評又話煙韌嘅   所以我話要食   點知不外如是   害咗佢哋啦   哈哈
小籠包 - 簽 HK Bank 信用卡就送小籠包   好在問一問乜嘢信用卡有優惠   慳番幾十蚊呀 

高力芒果奶黃-  我覺得個皮勁有食鹹水角 Feel 囉   

( 7-MAY-2010  FRI )

尋晚瞓瞓下行雷   嚇到呢   瞓唔番   瞓着嘅時候又行雷   真係鬧鐘響都唔願起身呀   要懶床 5 分鐘先捨得醒呢 ~

一早又毛毛雨   天陰陰咁   好在 Happy Friday 嘅心情無受到影響啫 ~

早餐 : 五香肉丁榨菜肉絲米粉

 
同 8 卦出去食 Kunch   佢尋日約定我啦   我都唔好意思推咯   晏晝好焗呀   唔理咁多   去到邊到有位就入去食喇   呢間係小廚餐廳嚟嘅   估唔到有粥食   仲幾好味添喎   呢間餐廳又開冷氣又開風扇   一路食一路有凍嘅感覺添呀 ~ 

午餐 : 荔灣艇仔粥

今晚超開心啦   因為同媽咪食飯預祝母親節呀   一行六人   可惜係限時個半鐘頭啦   如果唔係更好呀 ~  

孜然雞翼 + 菜心 + 炒飯 ( 6-MAY-2010 )

( 6-MAY-2010  THU )

今日 Lunch Box 嘅份量唔少   所以食啲酸酸咪咪嘅早餐   唔係一陣滯到食唔到 Lunch 就慘咯 ~

忙咗陣又可以休息   又做下電腦 Filing   好快就到 Lunch Time 喇 ~

今晚唔駛去街市買餸   因為有師傅上屋企整梳化手制   所以 6 點半一定要番到屋企   點知佢 7 點先到   又約人 6 點半喎   真係吖 ~

里奧大人呢日上大陸開會   8 點幾先番到屋企   唔駛出去跑步 lu ~

是日懶餐 - 孜然雞翼 + 菜心 + 炒飯

孜然雞翼 - 焗爐萬歲   不過今次焗得太耐   好乾呀   我次次焗雞翼都係皮向下面   所以次次一翻轉焗啲皮就會黐住喺錫紙   但今次勁黐   隻隻雞翼變到無哂皮   里奧大人仲以為我咁細心拻哂啲皮添呀   雖然唔食皮啫   但影相隻隻甩皮好肉酸呀   好在有 1 隻係完整無缺咋   唔係我會反轉哂嚟影   好過影甩皮雞翼   好似好求其整咁   我煮每餐飯都好有心機㗎   哈哈 ~

菜心 - 雖然都幾甜   但有渣唔好食囉 ~ 

炒飯 - 又係炒到黐底   唔知係咪有燕麥米呢   已經多油   個鑊又熱   咁都黐底   真係人都顛呀   今次就咁用蒜粒 + 薑粒 + 魚露一齊炒   都好好味呢 ~  

今晚跑唔到步喇   喺屋企熨衫當做運動都唔錯   最緊要郁下啫 ~  

肉醬意粉 ( 5-MAY-2010 )

( 5-MAY-2010  WED )

我習慣每朝都會打比里奧大人   問佢食乜   如果知佢食丁丁就會話佢   無益嘛   今朝佢話食芝蛋治   搞到我明明想食奶醬多都突然間想食腿蛋治喎 ~

我 Partner 真係好頂癮   聽佢講嘢覺得佢唔經大腦   我有個女同事未結婚 (年紀唔少)   就成日講話妳又未結婚點點點   未結婚咁咁咁   搞到好尷尬   有次同另一層樓嘅阿叔一齊放工   阿叔問佢番幾點   佢話朝早 9 點   阿 Partner 就問番佢番幾點    阿叔話 7 點半   阿 Partner 就話做乜番咁早   我同另外兩個同事聽到佢咁問都 O 哂咀   妳眼望我眼呀   番 7 點半唔通為興趣咩   梗係公司要求啦   因為佢要開門比清潔阿姐   問埋啲咁問題 ~

晏晝有 Lunch Box   尋晚無乜點食榨菜肉碎   今日食好似新餸咁呀 ~     

今晚又係買完餸睇中醫   其實我好怕拎住啲餸周圍走   好鬼肉酸   但如果唔買餸先   又驚買唔到喎   肉酸就肉酸啦   為咗里奧大人有飯食   唯有犧牲色相啦 ~

是日晚餐 - 肉醬意粉

肉醬意粉 - 材料有 $10 肉碎 + 3 個蕃茄 + 1 大碗雜豆   仲有蒜蓉 + 乾蔥蓉 + 茄膏 + 茄汁 + 蠔油 + 老抽 + 糖   我覺得今次整得 Very Good 呀   啲汁唔太稀   最正係條條意粉都索哂啲汁呀   不過今次無加芝士同埋無焗   但我覺得仲好味呀 ~

呢晚送梳化呀   好感恩食完飯   梳化就到喇   咁就唔使影響我跑步時間啦   但梳化個手教位比師傅整鬆咗   唔用得住   要搵其他師傅整 ~

榨菜粒炒肉碎 + 菜心 ( 4-MAY-2010 )

( 4-MAY-2010  TUE )

瞓得好   心情都大好呀   日日係咁就好喇 ~    

早餐 : 扒芝腿治 + 奶茶

番到菇場好忙   唔錯吖   我多數做下停下   咁樣無咁緊張呢 ~     

里奧大人今日特登過嚟陪我食 lunch   超級開心呀   同佢去我平時去開食嘅茶餐廳   等佢了解下我嘅生活 ~ 

午餐 : 豬扒炒公仔麵 & 生炒牛肉飯

今晚買完餸就睇中醫   好在唔駛等   感恩 ~  

是日懶餐 - 榨菜粒炒肉碎 + 菜心

榨菜粒炒肉碎 - 記得 N 年前整榨菜蒸豬肉   點知無浸到啲榨菜   鹹到成碟食唔到   要掉哂   自此再無整過   今次再整就醒喇   問咗媽咪先   所以今次整得有信心啲喇   本來想買松子   咁樣口感正好多   但去到見到唔靚就唔買 lu   就咁整都應該惹味嘅   加埋用甜醬同辣豆辣醬一齊炒   真係好好味   下次再整 ~

菜心 - $8 斤   淥咗 10 條咋   因為我仲有兩條粟米   唔整咁多   留番聽晚食   咁樣唔駛再買菜 ~

今晚又同里奧大人一齊跑步   如果屋企有部跑步機就好啦   幾時跑都得   又唔駛特登換衫喎   幾咁好呀 ~

雲吞米粉 + 腐乳唐生菜 ( 3-MAY-2010 )

( 3-MAY-2010  MON )

星期一 lu    一個美好嘅開始 

早餐食奶醬多   食甜嘢會令人開心啲呢 ~

番到菇場就 Load 相   啲時間過得好快咁呀   好快就食 Lunch   但食完就覺得好滯   可能啲青椒同茄子多油呀   呆咗成日   所以晚餐煮米粉算喇 ~

是日懶餐 - 雲吞米粉 + 腐乳唐生菜

雲吞米粉 - 外賣雲吞 $12 有 6 粒   不過縮咗水 lu   以前大大隻蝦好吸引   我食米粉加咗南記辣椒醬   食到半路要開冷氣呀   食辣嘢流汗嘅感覺真係好正   不過只限喺屋企呢 ~  

腐乳唐生菜 - 唔知點解   我煮親米粉就好自然會煮生菜   懶人首選 ~

呢晚又同里奧大人一齊去跑步   呢排跑開都好想跑   希望 Keep 住咁跑啦 ~  

煎釀孖寶 + 姬松茸螺片豬展湯 ( 2-MAY-2010 )

( 2-MAY-2010  SUN )

今朝瞓到 10 點   自然醒嘅感覺真係好   再他他條條食早餐   放假嘅日子真係令人好開心呢 ~  

食完我就買餸   里奧大人就睇中醫   一齊番屋企抖陣就去跑步   雖然無乜點出汗   但跑完步嘅感覺好正   唔識形容呀 ~

今日係天后誕   屋企附近封路   我做跑步機時見到好多條龍呀   一路做一路睇真係好正呀   唔駛好似啲人企喺街度熱辣辣等龍到呀 ~

番到屋企做陣家務就沖涼   睇下報紙   超級爽呀 ~

同里奧大人去食 Tea   買埋生果就要番屋企準備煲湯 lu ~

是日晚餐 - 煎釀孖寶 + 姬松茸螺片豬展湯

煎釀孖寶 - 煎茄子真係好難熟   不過又無理由蒸完先煎咁煩   所以應該係唔多熟   不過我無理   照食   之後里奧大人又話啲青椒好似唔多熟   因為嗦嗦聲喎   但我強調青椒好似可以生食㗎喎   好在仲有啲汁好味   唔係呢   以後唔鬼煮呢樣餸喇   煎到成身油仲依樣嗰樣   乜 Mood 都無啦 ~

姬松茸螺片豬展湯 - 又係呢個湯包   加 1 條粟米 + 1 條紅蘿蔔 + $20 豬展   都好清甜   最緊要方便呀 ~

里奧大人家姐發生咗啲事   所以佢就出咗去佢家姐屋企傾嘢同祈禱   我無去呀   唔想特登出去囉   喺屋企休息下好過 ~ 

山頂一日遊 + 雲桂香 @ 大埔 ( 1-MAY-2010 )

( 1-MAY-2010  SAT )

期待已久嘅假期終於到啦   非常之開心呀   因為我超鍾意一起身就見到里奧大人㗎   又唔駛趕頭趕命咁食早餐   心情點會唔好喎 ~

一早諗好去山頂   感恩天氣唔錯   所以就如期出發 lu ~  

11 點 25 分上巴士   12 點去到中環   都算快喇   去到見到好多人等 Cable Car 呀   我哋都等咗 1 個鐘頭   好在唔太曬   唔係呢   應該可能會有少少發脾氣㗎喇   熱嘛 ~

其實我都好怕坐 Cable Car   因為好斜呀   驚到手心出汗 ~

好多年前去過山頂係無咁多舖頭   依家去到唔同哂 lu ~

里奧大人次次假期都好好胃口   10 點幾食完早餐   1 點幾已經話餓   所以第一時間醫肚啦   估唔到有 Burger King   我想食好耐喇   度度都好多人   等買嘢都差唔多半個鐘呢   不過都唔好食嘅   可能期望太大喇 ~

食完就去 "摩天台" 影相   感恩天氣唔錯   唔好大霧就得喇   唔係乜都影唔到呢 ~

唔知係咪朝早飲咗杯好濃咖啡   個人唔多舒服   所以影完相再行哂個 Shopping Mall 就坐番 Cable Car 走人 lu   坐倒後位仲驚   里奧大人都無我咁好氣咯   話乜都驚喎 ~ 

番到屋企 6 點幾   所以睇埋中醫就去食嘢   無乜胃口   去食酸辣米線算喇 ~

一年喇 ( 1-MAY-2010 )

親愛嘅朱仔 ~

妳好嗎 ?!   妳乖唔乖呀 ?! 

妳離開咗家姐一年喇   有無掛住我呀 ?!   但家姐每日都好掛住妳呀 ^^

不過我係掛住妳最曳最得意最肥嘅樣㗎   就算發夢見到妳都係肥肥白白㗎 ^^

我相信妳生活都好開心呢 ^^  

愛妳嘅家姐上

1-MAY-2010