酸梅麵豉蒸排骨 + 菜心 ( 11-MAY-2010 )

( 11-MAY-2010  TUE )

呢朝一起身有啲頭痛   好在拎唔到免費報紙   咁樣我可以盡情瞓下   唔係會忍唔住睇報紙呢 ~

今朝好想食出前一丁   不過口感就唔似自己煮嘅丁囉   我都係煮普通嘅丁嘅啫   點解會咁嘅   有包出前一丁味粉比我㗎喎   唔會係公仔麵啩 ~

番到菇場真係無乜心機   個頭隱隱作痛   仲 Feel 到係有排痛嗰隻   但我唔想食藥囉 ~

Lunch Time 去對面買星洲炒米番菇場食   諗住食完瞓陣   但瞓唔到呀 ~

本來諗住探媽咪   但最後決定唔去喇   想早啲番屋企休息 ~

雖然頭痛   但都想煮飯   好似成個星期無食住家飯咁喇   最多煮簡單啲囉   不過難嘅餸   我都唔識煮啦   哈哈 ~ 

是日懶餐 - 酸梅麵豉蒸排骨 + 菜心

酸梅麵豉蒸排骨 - 整呢個餸   其一懶   其二想食酸酸辣辣嘅嘢   其三可以帶飯   幾咁好呀   我次次整親排骨都覺得自己好懶咁   所以同里奧大人講聲唔好意思   要煮咁簡單嘅排骨   點知佢嚟料   笑哂口串爆話 "算啦   妳舒唔舒服都煮排骨㗎啦"   事緣係好耐之前   我影咗好多食譜   寫哂號碼   叫佢抽兩張   點知佢抽完我話呢個難煮果個又煩   再嚟過又話呢個只可以假期先整   就係咁樣   佢以後唔會再抽食譜   話抽完又唔係整   嘥鬼氣喎   呵呵   鬼叫一家之煮係我咩   咁叻你煮囉   呵呵 ~

菜心 - $8/斤   買嘅時候無留意   番到屋企浸菜時先知好多條都係有黑色咁   應該係擺得耐   又唔靚啩   唔識形容   搞到要掉咗 1/3  同埋要拻啲衣   煩到呢 ~

我買咗紅豆沙   諗住食完先煮飯   點知拻咗好耐   里奧大人又上咗車   所以碗紅豆沙最後變咗做飯後甜品 ~

我個頭仲有少少痛   所以里奧大人自己去跑步算喇   我都想郁下   所以熨衫   當做運動真係唔錯㗎   熨得靚靚又開心   哈哈 ~