仿膳飯莊 @ 九龍灣 ( 31-OCT-2010 )

( 31-OCT-2010  SUN )

今朝約咗媚媚一齊番教會   所以都要早啲起身食早餐   費事遲到嘛 ~

崇拜完畢都 12 點幾   大家都唔餓   最後都係各自歸家   不過我睇埋中醫先番屋企   今次試下同仁堂   等咗半個鐘先有得睇   結論又係血氣唔夠   真係要做多啲運動先 ~

睇完都兩點喇   順便食埋 Tea 先番屋企   星期日真係無乜電視好睇   所以我又熨衫   之後再煲埋紅豆沙   記得之前第一次煲到燶哂   今次我好有心機煲   因為我無瓦匙更   成日出出入入廚房都好攰   但皇天不負有心豬   終於比我煲到我認為好好味   但比較甜咗啲嘅紅豆沙 ~

煲完都差唔多要出發食飯喇   今次係同埋姑奶 & 2 個兒甥女一齊食呢   之後里奧大人就話買衫比佢哋   買完就番屋企 lu ~ 

番到屋企就食紅豆沙   里奧大人都話好味   不過甜咗啲   我話天氣乾燥   甜少少對皮膚係好啲㗎架   我無呃佢   真係咁架喎 ~

芝士腸什豆出前一丁 ( 30-OCT-2010 )

( 30-oct-2010 sat )

今日係 Off   因為要清埋果半日 A/L 呀   咁請星期六就最好啦    同里奧大人10 點起身食早餐   之後就同埋姑奶佢哋去掃墓喇~

今日本來 Plan 好晏晝去針灸   晏晝就同家姐食 Lunch   點知家姐打嚟話唔同我哋食   但最驚喜係 流浪影子 今日晏晝得閒   所以就約我喇   難得佢嚟香港   我都唔去針灸 lu ~

出到去差唔多 2 點半   我哋約咗旺角某餐廳等   不過我同里奧大人都搵唔到   所以最後要影子同小寶接我哋呀   真係唔好意思啦   最搞笑係居然要來自馬來西亞嘅朋友接一對土生土長喺香港嘅朋友   哈哈 ~

不過咁又幾好喎   錯有錯着   因為我覺得旺角真係無乜好食   咁啱我等嘅地方就喺沙爹王樓下   咁我哋一致都認為 OK   因為可以坐耐啲無人趕嘛 ~

今次再見番影子同小寶   真係好有老朋友 Feel 呀   同第一次怕怕羞羞咁相認嘅感覺差好遠呀   之前點都要扮下斯文唔好嚇親人嘛   因為我唔想影響佢哋對香港人嘅印象   哈哈 ~

坐低第一件事就係影子比手信我呀   就係佢哋嘅地道江魚仔   即場試咗兩條   口感同泰國嗰啲差好遠呢 ~

里奧大人負責發板   好在只有其中一樣有肉類咋   佢唔記得影子唔食肉呀   今次嘅食物水準都唔錯   但就一樣係好快嚟哂囉   好似影完一碟之後   又要影第二碟   第二碟未影完就三四五碟咁拎嚟   又係一枱食物   今次我唔客氣喇   餓嘛   再加上今次唔理儀態用手食嘢   又一路食一路講   真係好開心呀   加上小寶同里奧大人今次都好多嘢講   仲多過我同影子   我覺得氣氛好好呀   哈哈 ~

   

之後我哋陪影子買 SD Card   最緊要係話佢哋知越入越平   我哋 4 個人   每人記一間價錢都唔難   不過最慘係間間差唔多樣咁   好在真係最尾嗰間係最平   如果係中間其中一間就難記啲喇 ~ 

好似差唔多 6 點就走人喇   我哋喺地鐵站道別   雖然之後應該會再見   但我都有啲唔捨得    同埋見到佢地迫入地鐵車廂   我都覺得佢哋應該好唔慣咁迫   不過唔緊要啦   體驗下香港人嘅生活嘛   哈哈 ~

番到屋企有啲攰   里奧大人就瞓咗半個鐘   我就唔瞓喇   驚一陣瞓咗夜晚瞓唔着仲慘呀   本來想出街食   不過我又唔願出   最後都係煮出前一丁喇 ~ 

是日懶餐 - 芝士腸什豆出前一丁

芝士腸什豆出前一丁- 今次食 Johnsonvill 嘅 Beddar Cheddar   第一次食咋   估唔到真係好好味   不過煎嘅時間比較耐   下次都係焗好啲   最怕啲油彈到周圍都係呀 ~

夜晚咁 Heavy 喎   當然要燃燒啲脂肪啦   做家務就最好啦   拖地熨衫呢兩樣嘢真係同做跑步機無乜分別 ~ 

臘腸蒸排骨 + 菜心苗 ( 29-OCT-2010 )

( 29-OCT-2010  FRI )

星期五喇   非常之開心   今朝係喺屋企食 K 做早餐   因為尋晚太飽喇 ~

菇場又忙   真係無乜時間上網   所以晏晝買廈門炒米番菇場食   一路食一路上網   把握時間呀 ~

忙咗成個星期   聽日又 Off   其實真係無乜 Mood 煮飯   但唔煮又好似好衰咁   所以求其蒸排骨算喇   話哂住家飯嘛   只不過普通啲咁啫 ~

是日懶餐 - 臘腸蒸排骨 + 菜心苗

臘腸蒸排骨 - 今次將啲蒜頭豆豉爆香   再放上排骨面蒸   真係出味好多呢   真係唔懶得呀 ~

菜心苗 - $10/2 包   份量唔少   食得都好滿足咁呢 ~  

住家飯 @ 媽咪屋企 ( 28-OCT-2010 )

( 28-OCT-2010  THU )

今朝開始覺得有啲涼   但唔係凍   沖完涼出門口簡直唔覺涼添呀   不過好大風   所以等車都要着番件風褸囉 ~

諗住晏晝食麥皮   所以早餐就豐富啲喇   同埋實食唔哂個餐包   留番 Lunch 食   又慳錢又唔浪費   真係好 Good 呀 ~

菇場超過忙呀   未停過手   做到 Lunch Time   喺菇場沖麥片 + 個包   夠哂飽呀 ~

今日真係忙足成日   好在今晚番媽咪屋企食飯   可以抖下呢 ~

水餃河粉 / 出前一丁 + 粟米蛋花湯 ( 27-OCT-2010 )

( 27-OCT-2010  WED )

早餐食 K   好在到依家都未厭   仲有一盒就清哂 lu ~

今朝仲以為自己眼濛睇錯嘢   離遠見到個女人對眼敷咗 Eye Mask   但原來佢真係有對 Eye Mask 架   點解會咁嘅 ~

晏晝有 Lunch Box   本來好想出街行   但見咁猛太陽又唔想喎   唔想行到熱辣辣番菇場呀 ~

放工搭地鐵   無無聊聊周圍望   見到個男人對黑眼圈真係好勁   真係黑色㗎   好恐怖呀   咁黑嘅 ~ 

 
是日懶餐 - 水餃河粉 / 出前一丁 + 粟米蛋花湯

水餃河粉 / 出前一丁- 唔想煮   但又唔想出街食   煮麵就最好喇   最緊要方便  一鑊搞掂哂 ~  

粟米蛋花湯 - 無菜嘛   所以就滾粟米湯喇 ~ 

隔離屋裝修   整到屋企鐵閘非常之污糟   所以我就忍唔住去抹鐵閘   佢哋仲有個幾月先搞掂   都唔知要抹到幾時   尋晚試下開對流窗   所以超大風   吹到對房門關埋   我諗住推開   點知推唔切   我隻手指仲更加縮唔切   痛鬼到我呢   彎一彎都痛呀 ~

叉燒炒麵 + 皮蛋酸薑 ( 26-OCT-2010 )

( 26-OCT-2010  TUE )

今日涼咗啲啲啦   天氣一涼   個人好似特別餓咁㗎 ~

菇場又忙啦   11 點幾仲開始餓添   所以 Lunch Time 一到即開餐喇 ~  

里奧大人上咗大陸   我就唔駛咁急煮飯喇 ~

是日懶餐 - 叉燒炒麵 + 皮蛋酸薑

叉燒炒麵 - 因為里奧大人鍾意食   所以就炒比佢食   我會將佢所講嘅嘢放喺第一位架   如果佢果日對我好嘅話 ~  

皮蛋酸薑 - 無啦啦想食   好在夠簡單   自己隨時都可以整 ~

實在忍唔住喇   超想食糖不甩   所以走去許留山買喇   順便買龜苓膏比里奧大人   咁顯得我無咁為食呢 ~

豉油王雞絲炒意粉 + 菜心 + 花生眉豆雞腳湯 ( 25-OCT-2010 )

( 25-OCT-2010  MON )

尋晚小丸子有心事   瞓得勁唔好呀   好似無瞓過咁   仲要今日係星期一添 ~

無 Mood 呀   所以喺屋企食 K   喺屋企食嘢會開心啲 ~

番到菇場又忙喎   不過都好彩忙   唔係啲時間仲難過   話咁快 Lunch Time   今次只係帶餸唔帶飯   但好似唔係咁飽囉 ~ 

雖然忙   但我都會抽空諗下今晚煮乜餸嘅 ~ 

是日懶餐 - 豉油王雞絲炒意粉 + 菜心 + 花生眉豆雞腳湯

豉油王雞絲炒意粉 - 用咗 1 大個洋蔥   又爽口又甜   Very Good 呀 ~ 

菜心 - 呢排菜心又唔多靚咁噃   有渣嘅   咁就 No Good 喇 ~ 

花生眉豆雞腳湯 - 媽咪煲㗎   間唔中飲雞腳湯都唔錯   有骨膠原嘛   又係 Very Good 呢 ~ 

今晚實在太攰喇   無出去做運動   不過仲慘   因為心有食念   雖然爆大瘡   但都忍唔住食媽咪麵   包裝寫到營養食品咁㗎   呃細路咩 ~

蒜蓉豆豉蒸鯇魚 + 鴛鴦菜 + 咖哩魚蛋 ( 24-OCT-2010 )

( 24-OCT-2010  SUN )

今朝 10 點起身   喺屋企整醬占多   慢慢食唔駛同人迫   超唔錯呀 ~

執下屋   沖埋涼就番教會喇   Lunch Time 同教友一齊食   之後就各自歸家 lu ~

同里奧大人差唔多 4 點就去做運動   再行下街   番到屋企都差唔多 6 點   要預備晚餐喇 ~ 

是日晚餐 - 蒜蓉豆豉蒸鯇魚 + 鴛鴦菜 + 咖哩魚蛋

蒜蓉豆豉蒸鯇魚 - 今晚再整魚   因為覺得好小煮魚比里奧大人食呢   加埋啲秀珍菇墊底   魚就唔帶得飯   但啲菇可以帶飯嘛   幾咁醒呢 ~ 

鴛鴦菜 - 菜心苗 + 菠菜呢   因為 $10/2 包   咁就可以買多啲唔同蔬菜食   唔錯唔錯 ~  

咖哩魚蛋 - 算唔算就地取材呢   因為好想整埋啲魚蛋   咁整咖哩魚蛋就最好不過喇   四洲魚蛋都幾彈牙爽口㗎喎 ~

家姐今晚拎湯比我   所以我特登買件 Cheese Cake 一齊食呢   一個人食好肥家嘛   一齊 Share 就最好啦 ~

煎比目魚 + 臘腸 + 菠菜 ( 23-OCT-2010 )

( 23-OCT-2010  SAT )

諗住打風唔成 3 日雨   所以唔約媽咪飲茶   點知一起身望出去   都不知幾咁好天   不過咁都好   我又可以瞓多 1 個鐘頭   再他他條條去大家樂食埋早餐先番工   都唔錯架 ~

又係 Hea 下 Tea 下等放工   去埋超市買嘢先同里奧大人食 Tea ~

食完抖陣就去做運動喇   太耐無做   都係做半個鐘頭算喇 ~   

是日懶餐 - 煎比目魚 + 菠菜

煎比目魚 - 我好鬼有心機咁煎㗎   一諗到煎出嚟係金黃色呢   就好鬼開心   但太耐無煎魚   無落生粉   一上碟已經散哂咁   都唔緊要   賣相唔好   但好食咪得囉   食嘅時候又唔覺話好熱   我以為係因為擺耐咗   點知食食下見到個碟有水   我覺得好奇   咁應該係條魚未熟呀   嚇到我叫里奧大人 Stop   千其唔好食呀   應該未熟   好在食剩唔多啫   唔係就嘥哂啲嘢咯 ~ 

菠菜 - 原本諗住整金銀蛋菠菜   不過都係唔想又特登烚隻鹹蛋   所以就咁灼熟啲菠菜就算    都幾好味吖   清清哋 ~ 

臘腸 - 好耐無食咁   覺得好好味呀   肥就肥啦 ~ 

今晚食完飯   晴晴嚟探我哋呀   真係好乖啦   仲坐咗個幾鐘先走   最開心佢話我間屋整齊嘛   哈哈 ~

水餃拚韭菜餃出前一丁 + 脆肉瓜 ( 22-OCT-2010 )

( 22-OCT-2010  FRI )

Happy Friday 喇   今朝去 KFC 食早餐   因為好想食魚柳包   之前其實鍾意食 KFC 魚柳包多過麥記魚柳包   不過依家無咁好味 lu ~

番到菇場忙到震   忙到 Lunch Time   呢排無 Lunch Box   真係諗食咩都好煩   今日超勁想食星洲炒米   好在樓下餐廳有 Set Lunch 係星洲炒米   咁我又唔駛行咁遠   因為條街好鬼凍呀 ~

今晚去街市買水餃加韭菜餃同埋粗麵   諗住整個撈粗   點知番到屋企即刻整   我將啲麵放落煲差唔多 1 分鐘   我夾一條試食   係腍㗎   同埋超超超超大陣梘水味   煮到無耐啲水又好糊    咁即改細火煲啦   不過上碟嘅時候   我再試下啲麵都一樣係腍   仲腍過豆腐呀   就咁吞都得   但我唔忿氣點解會咁   所以煮完之後就上色   加老抽生抽麻油   希望收哂水會爽啲   一路話會好食嘅會好食嘅   不過到最後再試食   我真係頂唔順個口感囉   最終都係掉咗   嘥鬼哂我啲心機 ~

是日懶餐 - 水餃拚韭菜餃出前一丁 + 脆肉瓜

水餃拚韭菜餃出前一丁 - 撈粗就無喇   唯有煮丁啦   里奧大人就慘啲   早餐又丁   夜晚又丁    仲話食到驚   晨早話叫佢出街唔好食丁   我 Off 或者星期日會煮丁丁家嘛   依家講到兩餐食丁好慘咁   真係呢 ~

脆肉瓜 - 用雞湯煮脆肉瓜   不過都一樣無味嘅   哈哈 ~

住家飯 @ 媽咪屋企 ( 21-OCT-2010 )

( 21-OCT-2010  THU )

見天氣唔錯   所以同里奧大人食早餐   點知食早餐嘅時候   比我睇到電視   講話地鐵去尖沙咀方向有問題   咁即係我都會受影響啦   之後途經地鐵站聽到廣播   都唔方好嘢   再睇埋個顯示   6 分鐘一班車   有車係好   但唔知比唔比我上到呢   到時迫唔到   都唔知等到幾時   所以我即改搭巴士啦   唔想遲大到呀 ~

忙咗陣就 Hea 到 Lunch Time 喇   朝早太 Heavy   所以晏晝就食麥片喇 ~

今晚番媽咪屋企食飯呀   爽呀 ~

ME.N.U @ 九龍灣 ( 20-OCT-2010 )

( 20-OCT-2010  WED )

星期三喇   不過尋晚又夜瞓   今朝都無乜精神呢 ~

早餐又食菠蘿油   但見對面食麵   又搞到自己突然間好想食麵喎 ~

到 Lunch Time 喇   突然好想食飯   走去買兩餸飯   食完真係好鬼飽囉 ~

今晚去針灸呀   今次又係好痛   血氣唔通呀   真係要郁多啲先得喇 ~

番到屋企 8 點左右   實在太好喇   今次去試一間新嘢 ME.N.U.   不過應該唔會再去   唔好味嘅   里奧大人仲話難食添呀   梗係啦   我都話我煮肉醬最好味㗎啦   哈哈 ~ 

裕和日本料理 @ 九龍灣 ( 19-OCT-2010 )

豬軟骨拉麵 / 日本長餃子拉麵 / 螺肉壽司 / 芝麻八爪魚壽司

( 19-OCT-2010  TUE )

尋晚又夜瞓   今朝真係好唔願起身呀   所以都係喺屋企食 K 算喇 ~

番到菇場仲大鑊   簡直係走肉行屍咁款呀   好似等咗好耐先 Lunch Time 咁 ~

今日好餓呀   所以食炒麵 + 燒賣粉果   啲辣油真係好鬼好味呀   辣到呢 ~

終於放工喇   個人好攰   又喉嚨又唔舒服咁喎   真係唔想煮呀 ~

里奧大人喺大陸番到嚟都差唔多 7 點半   係最理想嘅開餐時間呀   今晚想食濕濕哋嘅嘢   所以食拉麵喇   呢間食店幾年前都去過   味道就普普通通   但今次食又唔錯喎   唔知係咪轉咗師傅呢 ~

表妹結婚 @ 德藝會 (九龍灣) ( 18-OCT-2010 )

( 18-OCT-2010  MON )

星期一喇   要出街食早餐呀   去咗 KFC 食烤腸蕃茄湯貝殼粉   貪佢細細碗呀   依家真係無以前咁大食   真係好呢 ~

眼瞓到無倫呀   好艱難先等到 Lunch Time 呀   又係食 Lunch Box 啦   我同事都話點解成日食炒飯   無計啦   我夜晚唔多食飯   所以咪煲定多啲做炒飯囉 ~   

里奧大人今日內感   所以無番工呀   喺屋企等埋我先去婚宴   又唔係打牌   所以同里奧大人行街買嘢先去會場 ~

9 點先開席   好在同表妹表弟一齊坐   食下傾下好鬼開心呀   差唔多 11 點半散席   好眼瞓呀   好在住得近咋 ~

叉燒炒燕麥飯 + 合掌手粟米紅蘿蔔豬骨湯 ( 17-OCT-2010 )

( 17-OCT-2010  SUN )

呢排里奧大人都好攰   所以無番教會   比佢瞓到自然醒   都瞓到差唔多 11 點   我就起身煮早餐喇 ~ 

之後去買煲湯材料   又去超市買豬骨   滕嚟滕去   番到屋企熨埋衫   原來已經 2 點幾   又係時候出發去食 Tea 喇 ~

食完 Tea 再去 Pacific Coffee 飲咖啡   因為買一送一   但我覺得佢哋啲咖啡無咁濃   同埋今次最無癮一樣嘢   就係隔離枱個女人喺度教小朋友   個小朋友大約 5-6 歲   食嘢又話   抹眼又話   總之我坐咁耐就聽佢把聲咁耐   好在唔係刺耳果隻   但人哋一心諗住 Relax   點知比佢嚴重破壞哂過氣氛   里奧大人仲話可能我都係咁   咁我都會話小朋友   但唔會連續半個鐘喺咁轟炸佢囉   同埋睇場合家嘛   坐得嚟飲咖啡嘅多數都係想 Relax   應該要靜少少囉 ~

飲完去做運動   番到屋企 6 點 15 分喇   要快快手手煲湯喇   感恩可以喺 8 點準時開飯   我真係唔鍾意太夜食飯囉   無時間消化好易肥㗎 ~

是日晚餐 - 叉燒炒燕麥飯 + 合掌手粟米紅蘿蔔豬骨湯

叉燒炒燕麥飯 - 加埋粟米一齊炒   變得好健康咁呀 ~

合掌手粟米紅蘿蔔豬骨湯 - 呢排超乾燥咁呀   真係要潤一潤呢 ~ 

板長壽司 @ 九龍灣 ( 16-OCT-2010 )

( 16-OCT-2010  SAT )

雖然今日係重陽節假期   但里奧大人要番工   咁我都瞓到 9 點就起身   執下屋   拖埋地   沖埋涼就等出街 lu ~

今日同家姐 媽咪 糟糟楂車入去筲箕灣食安利魚蛋粉   去到 12 點咋   門口已經十幾人排隊    成條街大部份泊嘅車啲人   都應該係去安利   點解咁講呢   因為食到一半有人話 "抄牌"   見好多人都彈起身   之後我同糟糟入停車場時都見好多車駛入嚟   出番嚟見到條街都無乜車咁    仲唔係安利啲食客咩   真係估唔到魚蛋粉都咁多人食囉 ~

食完就入大埔買褲   再入藥房買嘢   佢哋一袋二袋企喺藥房門口等我   我覺得勁似自由行特登落嚟買奶粉咁呀   之後我哋再殺入街市買嘢   裝到成個車尾箱都係嘢   好有滿足感呀 ~

糟糟約咗人   所以送佢番屋企再送埋媽咪番屋企   我就去家姐屋企 Hea 到里奧大人放工先番屋企   因為家姐要去我屋企 Download 相落電話度呀 ~

佢哋整嘢   我就落街買嘢   之後再去板長壽司等位   估唔到又唔係等好耐喎   感恩感恩 ~

蒜蓉豆豉蒸芋絲雞肶菇排骨 + 菜心 ( 15-OCT-2010 )

( 15-OCT-2010  FRI )

尋晚飽得滯呀   早餐都係喺屋企食 K 算喇 ~

菇場都係一般忙啦   行下 Hea 下又到 Lunch Time   今日 Lunch Box 係食番尋晚剩嗰啲囉 ~

呢晚煮下飯喇   簡簡單單都唔錯 ~

是日懶餐 - 蒜蓉豆豉蒸芋絲雞肶菇排骨 + 菜心

蒜蓉豆豉蒸芋絲雞肶菇排骨 - 將雞肶菇同芋絲墊底   索哂啲汁都幾好味   但覺得一樽嘅蒜蓉豆豉醬無自己切粒粒嘅咁好味囉 ~  

菜心 - 超市買  $10/2 包   任何配搭都得   總之係 $10/2 包嘅 Label 就可以   咁都幾好   多樣選擇咁   唔錯唔錯 ~

Ruby Tuesday @ 九龍灣 ( 14-OCT-2010 )

( 14-OCT-2010  THU )

今朝又食健康早餐   再加多半杯暖水   真係超級飽肚咯 ~

呢排成日 11 點幾先瞓   對我嚟講真係好夜㗎喇   所以呢幾日都好攰咁   成日番工想瞓覺 ~

唔想出去食呀   所以晏晝買嘢番菇場食    呢個野菌鮮牛魚湯米線都唔錯   不過好唔鍾意啲蕃茄囉 ~

今日係家姐生日   所以同佢慶祝   又係 Ruby Tuesday 半價嘛   真係抵好多   同埋又近大家喎   真係唔錯嘅選擇呢 ~

一早諗咗送手機比家姐   但就唔知家姐鍾唔鍾意   咁食完飯之後   里奧大人就無啦啦同家姐講話同佢去睇嘢   其實都好感動里奧大人記得我想送電話比家姐   因為我家姐超鍾意紫色   部手機又係紫色   我呃佢話我想換電話   借啲易問佢鍾唔鍾意   佢話佢又想一齊買喎   難得做 Promo 喎   嚇得我吖   我即刻話我試咗先   好先再買   我同里奧大人成日問佢啱唔啱先   啱就買   好在家姐無察覺我哋想買比佢咋   唔係就無 Superise 啦 ~

之後一齊去巴士站   我哋就比部電話比佢   佢以為我哋玩   又話唔識又話唔要   咁當然最後都要啦   事實真係買比佢㗎喎   睇佢樣真係好鬼開心囉   我都好開心呢   因為家姐對我真係好好好好呢 ~

里奧大人今次都好好   主動話幫家姐睇下部手機點用   有乜 Function   又幫佢 Download 歌   又即刻去買 SIM Card   仲比埋錢添   番到屋企又即刻做嘢啦   佢明明話好攰要早啲瞓    但都搞到 11 點幾先瞓   呢下真係好感動呢 ~

爭鮮迴轉壽司 @ 九龍灣 ( 13-OCT-2010 )

( 13-OCT-2010  WED )

今朝想食碎蛋沙律治   又想食吞拿魚治   最後都係食吞拿魚治   感覺無咁肥咁   好耐無食   點知呢   生菜就多喇   吞拿魚份量應該得半湯匙度啦   離鬼譜   下次唔食佢喇 ~

番到菇場忙到震呀   好快就到 Lunch Time 咁   快快食 Lunch Box 就去銀行搞嘢   同埋幫家姐買嘢   真係唔熱嗰日都唔出街咁呢 ~ 

放工去針灸   聽到隔離話做楊千嬅嗰隻減肥針灸   要聯線㗎   仲聽到醫師話已經 "吉" 哂入去   又點點點   聽到我好寒   好鬼凍呀 ~ 

無啦啦個胃超級痛呀   都唔知係咪比佢哋嚇親   好在個袋有胃藥咋   食完唔駛 3 分鐘就唔痛   啲藥都好堅下噃   但唔知有咩副作用呢   哈哈 ~

差唔多 9 點先番到屋企附近   本來想食米線   點知里奧大人話想食壽司   所以又去爭鮮喇 ~  

栗子芋絲燜雞翼 + 粟米粒炒燕麥飯 + 紫蕃薯湯丸 ( 12-OCT-2010 )

( 12-OCT-2010  TUE )

今朝食健康早餐   一路睇報紙一路慢慢食   里奧大人都話我好嘆咁   之後沖涼換衫好似打仗你唔知啫 ~

呢兩日都好攰咁   真係合埋眼可以瞓到呀 ~ 

終於到 Lunch Time   我拎哂尋晚啲尖椒   點知辣到呢   不過就好鬼正囉 ~

3 點幾勁想瞓呀   即去沖杯咖啡   點知飲完咖啡仲眼瞓   唔通自己沖得唔夠濃   之得唔飲啦   唔提神嘅 ~

放工即走喇   去凍肉店買雞翼   真係好唔想去街市囉 ~

是日懶餐 - 栗子芋絲燜雞翼 + 粟米粒炒燕麥飯 + 紫蕃薯湯丸

栗子芋絲燜雞翼 - 栗子係星期六買㗎   我又成日唔記得擺落雪櫃   所以用黎燜雞翼算喇   最緊要唔好浪費嘛 ~ 

粟米粒炒燕麥飯 - 唔知點解覺得食燕麥飯係好飽咁㗎喎 ~ 

 
紫蕃薯湯丸 - 我自己搓㗎   但無蕃薯味   得糯米粉味   口感似食魚蛋   個糖水又唔甜   我同里奧大人講話唔好食   佢話見我煮得咁辛苦   點都會比面食   食咗 4 粒好好喇   我食咗 3 粒咋   不過其實未煮嗰啲我放喺冰格   希望冰一冰會煙韌啲啦   再唔係就整碗芝麻糊加湯丸   咁就顯得芝麻糊無咁甜嘛 ~  

回鍋肉 + 菜心 ( 11-OCT-2010 )

( 11-OCT-2010  MON )

星期一 lu   今朝落毛毛雨   又天陰陰   勁想瞓多陣呀   不過陪里奧大人食早餐就唔想咁遲先出門口囉 ~

番到菇場都好似無咩精神咁   但又唔係話好攰囉   但真係勁唔想番工嗰隻喎 ~

吽下吽下   吽到 Lunch Time   本來想出去食   但落雨濕濕真係唔想周街去囉   又無咩胃口   所以買車仔麵番菇場食算喇 ~

終於等到放工喇   去完街市買菜就番屋企 Ready 喇   里奧大人打嚟問今晚係咪食番尋晚嗰碟上海粗炒   好似好緊張碟麵咁樣   梗係啦   唔想食飯嘛   如果尋晚嗰碟係三色椒炒粟米   佢應該唔會問   扮唔記得   鍾意食嘅嘢就記得   唔鍾意嘅嘢就唔提   又唔知諗煮咩係幾咁辛苦喎   大佬   要體諒下我識煮嘅唔多嘛   真係吖 ~

是日懶餐 - 回鍋肉 + 菜心

回鍋肉 - 今次就咁用海鮮醬 + 豆辦醬做汁   但好鬼辣   我估係因為嗰 4 條青尖椒   不過真係好好味囉   好似出面食嗰啲咁呀   但里奧大人話太辣   無咁辣就更好囉 ~

菜心 - $7/斤   難得咁平   即買啦   食多啲菜好啲嘅 ~

今晚唔做運動喇   好攰咁   同埋要熨 2 機衫   真係同做運動無咩分別 ~ 

上海粗炒 + 青紅蘿蔔粟米豬骨湯 ( 10-OCT-2010 )

( 10-OCT-2010  SUN )

今朝同里奧大人去 KFC 食早餐   慢到呢   真係間間 KFC 都好鬼慢   唔知點解   但佢哋個樣同動作好急咁㗎喎   問又問幾次咁   真係問到火呀 ~

食完早餐番教會喇   我抱住教友個 BB   大約 1 歲左右   我同里奧大人講   一陣啲人以為係我就搞笑   因為我成日比人話我似有 BB   里奧大人話誤會還誤會   最緊要啲人唔好話個 BB 似佢就得喇   哈哈哈哈   我 Choi ~

之後同自己小組一齊飲茶   好耐無一齊傾計食飯喇   傾到 3 點幾就各自歸家 lu   我就去買餸先買屋企   幾咁賢妻呀 ~ 

番到屋企預備好煲湯   就同里奧大人出發去做運動喇 ~

是日晚餐 - 上海粗炒 + 青紅蘿蔔粟米豬骨湯

上海粗炒 - 諗住煮新嘢啦   求其立一立食譜就跟住做  出水之後好糊咁   已經心知不妙   但唔知乜嘢不妙   炒嘅時候又好糊   真係知不妙喇   唔方好食啦   但唔好食都算   里奧大人話係生㗎   個麵心係白色嘅   之後再炒   都係仲有少少白色   激鬼氣呀   無理由成碟掉哂家嘛    所以留番聽晚蒸熱食算喇   今晚無得食呀 ~

青紅蘿蔔粟米豬骨湯 - 好在煲湯料夠多咋   就咁食湯料都夠飽   有瓜又有肉   唔係真係要煮丁丁架喇 ~  

叉燒炒麵 + 節瓜魚湯 ( 9-OCT-2010 )

( 9-OCT-2010  SAT )

今朝去麥記食早餐   我覺得好 Relax 咁呀 ~

番到菇場喇喎   咪又上網等放工囉   有嘢都唔想做咁㗎 ~

今日要去針灸   里奧大人就陪我去   一齊食完嘢   諗住仲有好多時間 Hea 下   感恩感恩   食完嘢收到診所打嚟問我早啲嚟得唔得   咁梗係得啦   最好不過添呀   因為唔想周圍行囉 ~

四寶丸米線 (墨魚丸 / 魚蛋 / 魚皮餃 / 魚腐) - 啲魚蛋有細骨嘅   個湯底又無味喎

招牌四寶飯 (叉燒 / 燒肉 / 切雞 / 紅腸 / 鹹蛋) - 五樣嘢噃   咩唔係五寶咩   不過都唔好食嘅   我整叉燒真係好味過佢㗎   啲燒肉皮又腍嘅

針完去永安行陣    之後坐車番屋企喇 ~ 

是日晚餐 - 叉燒炒麵 + 節瓜魚湯

叉燒炒麵 - 好攰呀   無咩胃口   咁煮啲里奧大人鍾意食嘅嘢啦 ~ 

節瓜魚湯 - 今次用大眼雞   煲到超正呀   啲湯係白色㗎   里奧大人仲問點煲   我都唔知點解咁白   因為我次次都同一樣煲法呢 ~  

食完抖一個鐘就一齊去做運動喇   做跑步機好好   因為成日都會有好多胃氣出嚟   人都輕啲咁㗎   哈哈 ~

味千拉麵 @ 九龍灣 ( 8-OCT-2010 )

手造餃子 / 日式炸豆腐 / 有營雜菜拉麵 / 蕃茄雞絲拉麵

( 8-OCT-2010  FRI )

Happy Friday 喇   要出街食份豐富啲嘅早餐   咁先配合到 Happy Friday 嘅心情呀 ~

菇場都幾忙   不過都幾好   所以覺得今個星期啲時間過得好快 ~

晏晝有 Lunch Box 啦   原來我同事好鍾意睇我整咩   話我整得好靚喎   可能佢哋好少煮炒飯意粉之類嘅嘢   所以先吸引到佢哋   話時話   真係未見過同事帶意粉㗎 ~ 

里奧大人晏晝上咗大陸開會   咁無咁早番香港   所以我放工去睇媽咪   佢好似有啲氣促   所以睇下佢   有乜事就陪佢入院   但佢話只係好攰   話唔駛   咁算啦   最緊要佢自己覺得無問題就得喇 ~

好小見到寶寶瞓覺    所以 Zoom 嚟影佢   後尾知我喺度   所以半醒   之後醒哂   哈哈 ~

同里奧大人去食味千拉麵   不過呢間唔會再去食   個湯底係無味嘅   聽親好多人都話味千拉麵好多味精好鹹咁   咁呢間應該無啦   無喱味道   服務態度又唔好   有個 Waitress 唔知講咗句日文定真係講廣東話   我聽到佢話 "妳去屙尿"   但又唔見有同事行開喎   咁應該講日文啩 ~

之後隔離枱坐咗兩個十幾歲嘅細路   一坐得無啦啦講巨強   又話屋企放咗巨強屋   佢話有個殺強方法好有效   就係用藍威寶 + 漂白水 + 滴露 + 番梘   佢講咗 6-7 樣嘢   但我唔記得   總之全部都係清潔劑  佢個朋友都話咁多嘢倒出嚟實死啦   我聽到真係好想笑囉   仲以為乜方法咁勁   倒咁多樣   開蓋都有排開啦   同埋有啲清潔劑係唔可以兩溝嘛   之後又講經痛喎   又話 7 日都好痛   又咁咁咁   仲伸過頭去對面個朋友度細細聲講   好心啦   話哂公眾地方   呢啲咪傾咁大聲啦   同埋話哂有個男人坐妳隔離   妳都咪講啦   里奧大人話我 8 喎   係佢哋講得大聲咋   妳知時下啲年青人啦   講嘢又大大聲要吸引人    講埋啲嘢又懶自豪咁 ~

番到屋企抖番一個鐘   之後就一齊出去做運動 lu ~  

蕃茄芝士肉醬焗長通粉 + 蒜蓉包 ( 7-OCT-2010 )

( 7-OCT-2010  THU )

尋晚食得太飽   今朝都係食 Special K 好啲   諗諗下都係隔日食   唔好星期二三四食   唔想咁快食到厭呀 ~

今日以為涼涼哋就坐地鐵啦   點知番到菇場都有啲汗   唔知幾時冬天呢   好期待呀   我覺得冬天啲人嘅面孔係會詳和啲咁囉 ~

又係忙呀忙   好快就 Lunch Time 喇   尋晚又食又拎   所以今日有 Lunch Box   唔錯唔錯   本來食完想出去行   不過好似好熱咁   上網睇嘢算喇 ~ 

今晚要去買餸喇   依家街市啲嘢好似貴哂咁嘅   洋蔥要 $8/斤   蕃茄要 $10/斤   菠菜 $12/斤   定係大埔特別平呢 ~

是日晚餐 - 蕃茄芝士肉醬焗長通粉 + 蒜蓉包

蕃茄芝士肉醬焗長通粉 - 超想食呀   所以整喇 ~ 

 
蒜蓉包 - 今次焗得超好味呀   我用現成啲蒜蓉   真係非常超級極之方便呀   又香蒜蓉味喎    真係一平就要入定貨先得喇 ~

里奧大人話攰    所以我一個人去做運動   唔做呢   呢個月就蝕水呀 ~

住家飯 @ 媽咪屋企 ( 6-OCT2010 )

( 6-OCT-2010  WED )

呢兩日好忙   好似好快就星期三咁   話咁快過咗半個星期真係好開心呢 ~ 

今朝勁想食鹹鹹甜甜嘅早餐   所以食菠蘿油喇   其實我食好少牛油咋   我接受唔到成塊牛油擺入口呀   但我家姐同里奧大人就話咁食先過癮   食咁少牛油不如唔叫菠蘿油喎 ~   

忙呀忙   忙到 Lunch Time 喇   今日好開心   因為同事話我整個炒飯好靚仔呀   比人讚真係好開心呀 ~

今晚番媽咪屋企食飯   但原來里奧大人唔駛上大陸喎   不過佢都好夜先放工   所以同番大陸無分別呢 ~ 

坐巴士等綠燈嘅時候   咁啱有個女人手機響   鈴聲係一班細路叫加油加油   我心諗   呢啲鈴聲真係令人精神緊張   但聽聽下又覺得把聲唔似鈴聲   周圍望下   原來係企度等過馬路班小學生喺度叫   啲時間真係教得好啱喎   哈哈 ~

次次番媽咪屋企第一時間係飲一碗湯先   我同屋企人就習慣哂   但里奧大人就會話飲完湯食唔到飯囉 ~

什錦炒飯 + 油麥菜 + 豬腳薑 ( 5-OCT-2010 )

( 5-OCT-2010  TUE )

今朝早餐食 Special K + 朱古力奶   再加多半杯熱茶   間唔中喺屋企食早餐好似幾他條咁 ~

天氣又係好清涼呀   但耐何秋天時間實在太短呢 ~

番到菇場忙到爆炸   好快好快就到 Lunch Time   唔知食咩好   周圍行下睇有乜好食   突然諗起 7-11 咖哩烏冬   所以就買番菇場食喇   估唔到今次啲咖哩勁好味   烏冬又唔太腍   上次食嘅咖哩烏冬唔好食   不過唔知下次又會點呢 ~ 

食完就準時開工啦   忙到差唔多 5 點先搞掂 8899   留番啲聽日做   咁樣聽日啲時間易過啲 ~

放工落毛毛雨   所以都唔去街市 lu   本來諗住整粟米湯   但里奧大人又話個胃有啲唔舒服    咁就無謂整啦   走去超市買菜   買下買下又用百幾蚊   好在有 Coupon   次次都係咁㗎   有嘢買嘅時候想買夠一百蚊都好難   反而無目的去買嘢呢   就會用成一百蚊   我估係因為實在有時間慢慢行   買啲買啲咁囉 ~

依家里奧大人番屋企都好快   所以都唔會刻意打比佢   問佢幾時夜工   唔想催佢咁   我以前唔係架   打電話催佢   如果佢話未放工   我會 "Cup" 佢線㗎   之後我 CC 友話我衰喎   做嘢又唔係玩   自此之後我都無 "Cup" 佢線   但會問佢幾點放工   但依家就等佢打比我   佢未番我就做家務   咁樣唔駛浪費啲時間嘛 ~

是日懶餐 - 什錦炒飯 + 油麥菜 + 豬腳薑

什錦炒飯 - 用哂冰格嘅食物做材料   有鳴門卷 + 蝦仁 + 腸仔 + 雜豆   再加埋蒜頭同薑粒   再用擔擔醬一齊炒呀炒   炒到一大碟   要出動大焗盤先得呀   勁有 Party Feel ~

油麥菜 - 超市 $10/2 包   咁樣都幾抵喎   因為依家街市買菜都唔平呢 ~  

豬腳薑 - 係時候要補補身   同埋快啲食完可以清下雪櫃啲位呀 ~

金加利餐廳 @ 九龍灣 ( 4-OCT-2010 )

羅宋湯 / 牛油厚多士 / 厚切肉眼牛扒配薯菜 / 巴辣牛腩意粉 (小辣)

( 4-OCT-2010  MON )

星期一 lu   要令自己開心啲精神啲   所以就陪里奧大人食早餐喇 ~

晏晝叮番尋晚食剩嘅 Pizza   覺得好豐富咁呀   食完真係要郁下先得咯 ~

放工搭地鐵去尖東   見到個鬼仔好靚呀   有啲似無雀斑嘅費托   可惜我好快就要落車   唔係望多幾眼都好呢 ~

今次針灸好痛呀   總知醫師每吉一次我都話痛   之後我再望自己掌心   出哂汗呀   不過我會一路話身體好嘅身體好嘅   咁樣黎安慰自己無咁痛囉 ~

  
番到屋企已經 9 點喇   真係要快啲搵食   勁想食牛扒    所以去金加利試下喇 ~

Cheese Pizza (芝脆雞) @ 屋企 ( 3-OCT-2010 )

( 3-OCT-2010  SUN )

呢朝同里奧大人食完早餐就番教會喇   臨出門口前家姐打嚟話晏啲同媽咪買衫食嘢   里奧大人又話無所謂    所以崇拜完畢之後家姐就車我哋入新都城買嘢食嘢喇 ~

同媽咪買衫   里奧大人就爭住比錢   算佢啦   之後就去客家好棧飲茶   原來係稻香集團嚟嘅    唔怪之得張點心紙咁熟面口啦 ~

海蜇 / 拍青瓜黑木耳 / 薄撐 / 炸鯪魚球 / 鹽燒秋刀魚 / 肉絲炒麵 / 擂沙湯丸 /芝麻糊

食完唔知去邊好   所以就話去我屋企打牌叫外賣喇 ~

今日真係好開心呀   估唔到會同到屋企人食飯打牌   無計劃反而有驚喜呀 ~ 

蒜蓉豆豉蒸排骨 + 菜心 + 清補涼豬骨湯 ( 2-OCT-2010 )

( 2-OCT-2010  SAT )

呢日 Off 呀   不過照樣同媽咪 家姐飲茶   之後家姐車埋我去舖頭拎嘢   超爽呀 ~ 

番到屋企里奧大人啱啱起身   所以我就煮腸仔米粉佢食喇   我自己食係唔會煎腸仔   淥熟就算   但里奧大人話唔鍾意咁喎   唔好味喎   又要特登煎比佢   要洗多樣嘢家嘛   真係吖 ~

喺屋企又執好啲個廚房   再熨埋衫   做哂我計畫之內嘅家務   唔係又成日心掛掛咁 ~ 

抖到 2 點就同里奧大人食 Tea 喇   食完再去超市買嘢   雖然好悶咁   但我非常之鍾意咁嘅生活呢   應該咁講   總之同里奧大人一齊   去邊都無所謂   我真係好鬼好呀   哈哈 ~ 

炸雞肶沙律 / 巴辣咖哩牛腩飯

番到屋企煲湯   差唔多 6 點幾就入廚房準備晚餐 lu ~

是日懶餐 - 蒜蓉豆豉蒸排骨 + 菜心 + 清補涼豬骨湯

蒜蓉頭豆豉蒸排骨 - 唔知整咩好   但最緊要簡單   所以蒸排骨就最好喇 ~

菜心 - 又係百佳買   真係好鬼甜   街市嗰啲無咁甜㗎 ~  

清補涼豬骨湯 - 媽咪買哂清補涼嘅湯料比我   所以我記得就會煲   唔係又會擺到唔知幾時咯 ~

長洲一日遊 + 南記粉麵 @ 銅鑼灣 ( 1-OCT-2010 )

春卷豬腩肉小鍋米線 (小辣) / 菜心

( 1-OCT-2010  FRI )

今日國慶放假一天   天氣仲非常非常之好   所以同里奧大人食完早餐就出發去長洲 lu ~

吉列魚柳炒蛋配厚多士 / 牛扒炒蛋配蘿蔔糕

我真係好鍾意喺市區嘅感覺   因為覺得去邊度都有車咁   時間真係慳唔少 ~ 

好感恩   去到碼頭仲有 8 分鐘就開船   咁唔駛待咁耐嘛   但快速船都好貴   要 $3x   但半個鐘就去到   不過其實應該咁講   見有咩船就坐咩船   好過喺碼頭等咁囉 ~

 
話咁快入到長洲   比我想像中少人   可能連放 3 日 個個去旅行都未定呀 ~

第一件事去醫肚   今次去另一間食海鮮   但唔好味囉   已經無期望㗎喇   但無理由次次都去同一間家嘛   係咪先 ~

椒鹽魷魚 - 新鮮熱辣   個粉又唔厚   點埋喼汁一齊食真係好好味呀

蒜蓉粉絲蒸扇貝 - 好細隻囉   同埋啲粉絲好似最後先放咁   賣相唔多好

豉椒炒蜆 - 個汁絕對失望呢   好鬼鹹呀   之得叫佢加啲指天椒一齊炒啦

豉椒炒蟶子 - 同一個汁   都係好鹹   啲蟶子口感好似土魷咁呀   唔係爽嘅   不過其實我唔知蟶子口感係點囉 

食完行下影相又再食   之後食完又去沙灘影相   見到啲人玩水   我都好想玩埋一份呀   因為實在太熱喇 ~

雞屎滕  - 煙煙韌韌最啱我呀
芝麻糕 - 好香芝麻味   食一件都夠飽   里奧大人仲買咗兩件番屋企食   不過係留番第晚食呢 ~  

3 隻出世無耐嘅貓仔   見無人   所以我手快快咁影   點知無啦啦行緊嘅人又嚟影   最恐怖係個檔主出埋嚟呀   我幾驚比人鬧呀   原來佢出嚟同我傾偈   嚇得我吖 ~

好似笑緊嘅狗仔   我鍾意呀   陌生人摸佢都無反應咁   不過我唔敢摸呀   一陣無啦啦吠就嚇瓜我啦 ~

我哋臨出門口嘅時候   里奧大人問我有無帶多件衫   驚一陣凍   因為我帶細袋唔想拎   所以呃佢話有   佢當然唔信啦   之後佢原本帶細袋   都揹番個背囊   睇見佢都辛苦   因為真係好鬼熱嘛   佢又幾鬼好嘅   唔激我嘅時候 ~

實在太熱喇   所以去食雪花冰   $22 杯咋   我仲同里奧大人講 $22 咁平都未必好味   不過太熱   真係要嘆下冷氣食啖冰嘅必要囉   估唔到個冰超有驚喜   啲味道好濃   唔知下次食仲係咪咁平而又 Keep 到呢個水準呢 ~

石榴味雪花冰配士多啤梨醬 - 超好味   好香石榴味呀  
藍莓味雪花冰配士多啤梨醬 - 一樣係好有藍莓味呀 

長洲出名嘅食店真係好多人排隊   我哋行咗陣見好多人買魚蛋   又買嚟試下   之後再食埋芒果腸粉就走喇 ~ 

咖哩魚蛋 ($10) - 都幾貴   不過又幾好味嘅  
芒果鴛鴦腸粉 ($18) - 特登去食   點知極度超級嚴重失望呀   啲芒果酸到呢   又無哂芒果糯米糍喎   不過里奧大人話無都無所謂   因為啲芒果實在太酸好難頂呀

走咗班船   但聽到有加班船   所以即搭喇   不過係普通船同無冷氣 ($16.8)   但上船又唔熱喎   啲海風吹埋黎好舒服添呀 ~

橫掂出開嚟   所以去埋南記食晚餐   里奧大人真係好鍾意南記   次次食都好開心   食完再行下 Sogo 就番屋企 lu   今日真係好 Relax 好開心呀 ~