叉燒炒麵 + 尖椒皮蛋 + 蒜泥唐生菜 ( 31-JAN-2011 )

( 31-JAN-2011  MON )

星期一 lu   但諗到番多四日就放假   就真係番工都番得開心過人咁喇 ~

今朝唔係太餓   所以食腿蛋包   間唔中都幾想食呢啲包   由細食到大嘛   兒時回憶呀 ~

今日見到太陽   仲以為會熱   所以無着外套就出去買嘢食   點知凍到震呀   走咗去食粥呀 ~

無驚無險又放工喇   今晚要煮喇   去到街市都有幾檔收爐   好在我想買嘢嘅檔口無收爐   如果唔係我唔煮架喇 ~

是日晚餐 - 叉燒炒麵 + 尖椒皮蛋 + 蒜泥唐生菜

叉燒炒麵 - 唔知整咩好嘛   所以又叉燒炒麵   里奧大人真係超級無敵勁鍾意食   因為我整咗一大盤   剩番一碗仔   我諗住自己格硬食埋去   估唔到里奧大人會食埋   如果係菜呀   佢就會話每人食一條   每人半條咁㗎   所以我次次都會發哂火話   叫你食菜好似叫你食屎咁   好煩呀 ~  

尖椒皮蛋 - 好想食   但無心機整   所以樣樣都求其切   切到大大粒   形狀又不一   真係唔似我風格呀 ~

蒜泥唐生菜 - 無心機呢   連蒜頭都切得大粒   最緊要快嘛 ~

我覺得煮完餐飯   再洗埋碗   個人好似散哂咁呀 ~

蒸大眼雞 + 自家制蘿蔔糕 + 油麥菜 ( 30-JAN-2011 )

( 30-JAN-2011  SUN )

今朝無番教會   我又唔想好趕咁出去食早餐   所以我就煮丁丁喇 ~ 

食完 Hea 陣就出發去旺角數碼通喇   因為我部手機無哂電話簿號碼   唔整唔得囉   好在去到無人   等咗 3 分鐘就輪到我   感恩感恩 ~

之後我哋去咗食傷心酸辣粉   我叫咗小辣   但比里奧大人試下先   佢話好辣   要 BB 辣就算   但係 BB 辣係一啲都唔辣   口水雞就好麻辣   食緊嘅時候   覺得個頭好痺呀   同埋流鼻涕   不過我都係唔鍾意食四川麻辣呢啲酸辣囉 ~ 

食完就去花墟   幫襯里奧大人朋友買嘢呀   旺角真係超多人又焗   行完有啲頭痛   同埋焗到個人好眼瞓呀 ~    

坐亡命小巴番屋企   諗起同以前住大埔   下下坐車都要最少 40 分鐘先番到屋企就慘   依家唔駛 10 分鐘就番到屋企   超爽呀 ~

無啦啦超想飲珍珠奶茶呀   買番屋企慢慢嘆 ~

6 點幾家姐話嚟我屋企   拎糖順便過數比我   話唔好 "擇" 過年喎   順便同佢 Share 樂家杏仁糖   雖然見面時間係半個鐘左右   但都好開心呀 ~

今晚唔出去食 lu   我發覺真係好似好耐好耐無煮飯咁呀   真係唔煮唔得咯 ~ 

是日懶餐 -蒸大眼雞 + 自家制蘿蔔糕 + 油麥菜

蒸大眼雞 - 媽咪買比我㗎   超大條   個鑊蓋都藍唔到呀   今次拆肉   加豉油胡椒粉一齊撈埋   咁樣食好似方便啲 ~

自家制蘿蔔糕 - 里奧大人家姐整㗎   估唔到好好味呀   真材實料   正呀 ~

油麥菜 - 去到百佳   得番一 Pack Pack 嘅菜   咁就買油麥菜啦 ~

食完飯同里奧大人去德福廣場抽獎   係即抽折獎   所以一定要去囉   呢排勁想食麥記朱古力新地   所以忍唔住買咗嚟食呀   真係超級好味呢 ~

上海婆婆 @ 九龍灣 ( 29-JAN-2011 )

松子黃魚 / 野生椒牛肉 / 干煸四季豆 / 婆婆粗炒 / 宮保雞丁 / 雞絲海蜇 / 蒜蓉拍青瓜 / 生煎包 / 
梅菜扣肉包 / 酒釀丸子 / 高力香蕉豆沙 / 豆沙鍋餅

( 29-JAN-2011  SAT )

尋晚夜瞓   諗住今朝 8 點先超身   點知我一郁呢   里奧大人就話陪我食早餐   我話唔駛啦   唔駛特登陪我    佢話 7 點已經醒咗   咁好啦   提起精神一齊食早餐啦 ~

番到菇場未停過手   忙到 12 點幾呀 ~

家姐打嚟話想一齊行街買衫   但我要同里奧大人一齊去旅行社 Book 位   所以要食埋 Lunch 先 Join 佢哋呢 ~

家姐同媽咪去咗東港城畔溪飲下午茶   不過我超飽   唔食嘢喇   但家姐話見我鍾意食炸雲吞   所以叫碟一齊食喎   咁有我心   唔食都唔得啦 ~

諗住只係陪家姐去 Dr. Kong 買鞋   忍唔住自己都買咗對   佢地個鞋墊真係好舒服   就算有吋半踭嘅鞋都着得好舒服   有驚喜呀 ~

買完鞋就陪埋家姐去買衫   不過呢間舖頭啲 Sales 真係好唔掂   我明明件衫已經爆哂   仲扣唔到拉鍊   但佢都話啱   仲叫我着薄衫   真係黐線   依家買梗係依家着啦   咁凍叫我着薄衫   真係愛靚唔愛命咩   好在家姐都買咗幾件心頭好   唔係佢會覺得無收穫咁   之後去埋家姐屋企拎喼   送埋媽咪就番屋企 lu ~

今晚同妯姑奶們食飯   Book 咗稻香   但等半個鐘仲係等   都唔知要人 Book 位嚟做乜   其他客人都等到好火滾   所以我好憎接近大時大節嘅時候食中菜   實係超級無敵勁多人   簡直浪費時間呀 ~ 

咁等唔係辦法   所以里奧大人行去睇邊間食肆無咁多人   鴻星又係爆   好在上海婆婆有位   所以即轉場喇 ~

今日好多嘢都好突然呀   無啦啦里奧大人陪我食早餐   無啦啦晏晝陪家姐買衫   無啦啦又話同里奧大人屋企人做節   攰到我呢 ~

雲貴軒風味過橋米線 @ 荃灣 ( 28-JAN-2011 )

( 28-JAN-2011  FRI )

Happy friday 喇   今朝去 KFC 食早餐   因為 $14 可以食到好飽   好開心呀 ~

菇場靜到呢   我打噴嚏   8 啩話嚇佢一跳喎 ~

今日同 8 卦出去食麥記   我好少喺其他人面前食 Big Mac   因為要張開好大個口先食到   但我今次好想食囉   唔理咁多   我用個紙盒遮住   咁佢就睇唔到我個口幾大喇 ~

菇場有人唔做喇   所以有 Tea 食   我都食咗奶油多 + 熱檸蜜   我覺得今日個口無停咁食呀   仲係樣樣都好飽肚下   不過呢個 Tea 成 5 點先嚟到   咁都好嘅   一陣電髮唔會餓囉 ~

今晚放工同家姐一齊搭地鐵去表妹度剪髮   咁啱攝影表弟又嚟埋   真係好開心呀 ~

由於太多人關係   我哋要坐喺出門等   一路傾一路食燒賣魚蛋一路等   差唔多 8 點先開始   10 點半先搞掂   之後阿姨同姨丈又嚟接表妹放工   所以就同我哋一齊食嘢喇 ~

我哋話想食米線   所以佢哋帶我哋去雲桂軒   其實我應該係想食雲桂米    但唔緊要啦   試下新嘢   不過我唔多鍾意麻辣   我已經小辣   但食咗幾啖已經 Feel 到個咀唇有啲麻   同埋唔鍾意啲花椒味   唔知點咁 ~

差唔多 11 點 20 分走   去到亡命小巴站係 11 點 半    我陪埋家姐等巴士番屋企   我就 12 點番到屋企   亡命小巴真係好快呀 ~

里奧大人明明打嚟話瞓覺先   點知佢開門比我   然後話都係心掛掛瞓唔着   等埋我喎   算佢對我都掛心啦 ~

Food Court @ Piago (九龍灣) ( 27-JAN-2011 )

( 27-JAN-2011  THU )

依家又鍾意食番扒芝腿治  唔知係咪天氣凍  想食飽啲呢 ~

晏晝喇喎   好想食湯粉   所以走去食魚蛋河   不過唔好味囉 ~

放工喇   今晚要去媽咪屋企比新銀紙佢包利是呀   我坐到 7 點就走人   同里奧大人去 Piago 嘅 Food Court 食嘢 ~

諗住去旅行社睇資料   點知 Closed   8 點 15 分咋喎   咁快 Closed 嘅   咁唯有番屋企啦   食埋媽咪之前比我嘅紅豆黑燸米   超飽呀   雖然 10 點我真係唔想熨衫   但實在唔郁唔得   點知熨到 10 點半   覺得超攰呀   同埋好快又要瞓覺   無哂私人時間咁   下次都係唔好喇 ~

Canteen @ 伯特利神學院 ( 26-JAN-2011 )

( 26-JAN-2011  WED )

星期三 lu   時間真係過得好快   眨下眼已經星期中   眨多兩眨就過新曆年  好開心呀 ~

早餐食沙爹牛肉 + 榨菜肉絲米粉   加咗胡椒粉又幾好味噃   依家好想唔食咁多辣嘢呀   不過都應該幾難   因為我真係好鍾意食辣嘢囉 ~ 

菇場好靜呀   人哋唔知真係以為我哋係啞㗎 ~

尋晚去媽咪屋企食飯   所以我都唔客氣要帶埋 Lunch Box 喇   今日食都覺得好好味   但唔知點解   食自己整嘅 Lunch Box 又會覺得悶喎 ~

之前兌換咗新銀紙   Admin 話會今日派   等到 5 點 45 分先有   所以 6 點先走得   撞正今晚要番學   我又訂咗飯   食飯時間係 6:00 - 6:45pm   好趕呀 ~

坐的士又塞車   個司機又去錯地方   已經無乜時間啦   我當時好火   好想開口鬧佢唔識路出聲嘛   不過見佢係應該 6x 嘅阿伯   我忍唔住 "摺" 咗一聲就算   但其實我都仲係好激氣囉 ~

去到 6 點 25 分喇   個個人都食完   大食表妹又食完   得我一個食飯咋   好彩牧師都未食   咁多一個人食   我無咁尷尬嘛 ~

9 點 35 分放學   有啲餓呀   真係勁想去麥記買朱古力新地   不過又唔係咁想食凍嘢   咁啱見到有炒栗子   所以買 $10   買番屋企慢慢嘆 ~

住家飯 @ 媽咪屋企 ( 25-JAN-2011 )

蝦碌 / 荷蘭豆炒雞什 / 炒菠菜 / 冬菇蠔豉燜豬手 / 家維雞 / 紅豆黑糯米糖水

( 25-JAN-2011  TUE )

呢朝去 KFC 食早餐   食完再行去搭地鐵   感覺上無咁肥咁呀 ~

我成日覺得搭地鐵好焗好迫同好 Chok  但就可以掌握到時間囉   次次都見到好多人喺電話度睇嘢   一係就打機   其實我覺得好辛苦   因為我覺得好傷神囉 ~

今朝要同 Partner 執嘢   佢件衫一陣味咁㗎   之前 8 卦都咁講   話次次經過佢個位都一陣味咁   估唔到係真   我覺得男人都算   但女人點可以咁㗎  同埋我今朝同佢一齊搭 Lift   見到佢件褸嘅衫袖口位   有好黃嘅漬呀   超級污糟囉   真係好好奇佢老公係乜人   點接受到㗎   但 8 卦話佢老公可能仲污糟過佢 ~

尋晚樣樣食剩少少   所以我就帶 Lunch Box 啦   又唔浪費   又可以幫我慳番筆   加埋車厘茄就夠哂飽啦 ~

里奧大人上咗大陸   我又去媽咪屋企開餐喇   食完飯再去稻香拎糕 ~

番到屋企本來好想 Hea 呀   但又忍唔住熨機衫   覺得唔駛煮飯就做下家務啦   咁樣唔駛又一下子推哂一齊做   但又覺得難得唔駛煮飯咁嘆  不如比自己休息下唔做家務   真係好矛盾呢 ~

團年飯 @ Ruby Tuesday (九龍灣) ( 24-JAN-2011 )

Salad / Triple Play / Clam Linguini / Seafood Lasagna / Mini Cheddar Fries / Smoothie / Ruby T / Cream Blast / Hawaiian Sunrise

( 24-JAN-2011  MON )

星期一喇   又無想像中咁眼瞓噃   感恩感恩 ~ 

今朝里奧大人感冒   所以唔番工   搞到我都想唔番工呢   不過我又唔會嘅   又唔係真病   咁樣打電話番公司請假好驚㗎   同埋我阿 Head 實叫我休息   我覺得好內疚咁囉   人哋咁好   我就呃佢   個心好唔舒服囉 ~

勁想食芝士呀   所以去麥記食芝士火腿扒包   以前我超唔鍾意食   依家又覺得幾好味喎   可能新鮮整呀 ~

菇場呀   Hea 到 Lunch Time 就即開餐喇   好鬼餓呀   食咗出前一丁杯麵   仲要加多個太陽餅先夠飽呀   勁有食力   勁呀 ~

放工番屋企先   同埋里奧大人去 Ruby Tuesday   今晚同埋媽咪 家姐 工人一齊預早食團年飯   好開心呀 ~

里奧大人送媽咪坐車   我就陪家姐買褲   陪埋佢等車   我差唔多 10 點先番到屋企   好攰呀 ~

鐵匠 @ 九龍灣 ( 23-JAN-2011 )

天婦羅拉麵 / 三文魚手卷 / 黃金魷魚手卷 / 黃蘿蔔手卷 / 什錦魚生飯



( 23-JAN-2011  SUN )

又到星期日 lu   教定鬧鐘起身   食完早餐就番教會 lu ~

住得近   反而仲會遲到   以前成日都聽人咁講㗎喇   不過就唔信囉   估唔到係真嘅 ~

崇拜完畢就去睇年貨   度度都咁多人   真係好鬼驚 ~

里奧大人依家拚老命做埋份功課   希望今個月搞掂   咁我就可以去街有望喇 ~

今日去海皇食 Tea   間唔中都會想食粥   不過海皇啲粥真係越嚟越唔好味   特別係啲油炸鬼同炸兩   唔熱又唔脆   咬到牙都軟呀   但我又唔鍾意浸落粥度一齊食喎 ~

食完我自己去買年貨   男人唔會細心咁計數   仲會催催共添   所以我自己一個人慢慢行   再叫家姐幫我計下數   咁仲好過叫里奧大人陪我買呀 ~

今晚要比嘢家姐同媽咪   而媽咪今日又煲咗湯   所以家姐車我去拎湯   之後就同家姐 里奧大人去鐵匠開餐 lu ~

食飽喇   再飲埋碗湯   係時候郁下喇   熨咗兩機衫   雖然超過攰   但就當做運動囉   咁樣諗會開心啲呀 ~

大家樂 @ 九龍灣 ( 22-JAN-2011 )

烏冬 / 芋絲 / 魚腐 / 生菜 / 冬瓜片 / 粟米 / 冬菇 / 肥牛
什扒 (黑椒汁) / 酥皮湯
炸蕃薯條

( 22-JAN-2011  SAT )

雖然今日係 Off   里奧大人 9 點就醒咗   幫我喺電腦度 Download 啲嘢去我手機度   我都醒醒哋   但仲想瞓   懶床 15 分鐘都瞓唔着   所以我都起身梳洗喇 ~

10 點先出門口食早餐   今朝好想去太興食早餐呀   感覺寧靜啲   同埋唔駛咁趕 ~

食完早餐我就去睇中醫喇   約咗 12 點   但差唔多 1 點先睇完   之後再去尖沙咀拎藥   依家要幫 Pantry 買嘢   今期煩啦   要買紅色膠碟   我去 Jusco   Piago   百佳廣場   惠康廣場通通都無   咁我難得今日去開尖沙咀   所以就去 Citysuper 睇下   點知一樣無喎   煩到暈呀 ~

3 點喇   我唔搵喇   但超肚餓   真係見到乜想食乜咁呀   今次好想去食熱狗   所以去 Hot Dog Formula   上次食唔好味㗎喎   今次覺得都幾好味   應該餓得滯定啦 ~ 

食完又要再去拎中藥   好在飽咋   當做運動囉   順便去價真棧買埋 Nuts ~

今日清潔廚房   所以唔煮啦   同埋滕咗成日   真係有啲虛脫   我由 6 點鐘瞓到 6 點半   瞓一瞓精神都好啲呢 ~

好想打邊爐呀   不過里奧大人又唔想   咁去大家樂最好啦   可以各自食嘛 ~  

本來頭先順便去埋 Piago 買紅色膠碟   不過里奧大人叫我唔好咁辛苦   食完飯再陪我去喎   算佢啦   知我辛苦 ~

又係無得買膠碟   無計啦   真係要家姐幫手先得咯 ~  

上海一品香 @ 官塘 ( 21-JAN-2011 )

回鍋肉 - 都好濃味   我鍾意食濃味嘢呢
小籠包 - 如果多啲肉汁更好啦   我會撈好多醋一齊食㗎

上海粗炒 - 我其實真係食到厭   不過里奧大人鍾意食就無計啦

( 21-JAN-2011  FRI )

Happy Friday 再加上聽日係每月一度嘅 Off   心情勁好呀 ~ 

今朝食芝士腸 + 五香肉丁米粉   唔夠辣油呀   但又唔想自己加辣椒油喎   健康啲嘛 ~

菇場氣氛一如以往咁靜英英   我講電話都要好細聲   啲人成日話聽唔到   要我大聲啲   妳估我唔想大聲咩   鬼鬼祟祟咁講電話   我都唔想呀 ~

晏晝出去買嘢食   見到有白汁吞拿魚意粉   突然好想食   所以買喇   估唔到仲送湯   不過係忌廉湯囉   白汁已經好漏   再加埋忌廉湯   我頂唔順囉   所以無飲呀 ~

無驚無險又放工喇   今晚去官塘廣場睇嘢   再同埋里奧大人去上海一品香食晚飯喇 ~

依排里奧大人好好喎   我想買乜就買乜   之前已經想買件夾棉褸   不過無時間   所以今次再去買番   之後再去淘大買袋   個 Sales 話我同里奧大人有夫妻相   又話我靚   又得意   我好怕啲人咁講嘢囉   如果真係靚就話啫   同埋我會覺得幫襯妳買嘢   妳先會咁講囉   假到呢 ~

唔知點解呢晚個人好燥熱咁   所以去許留山食龜苓膏   但我又覺得好飽   只係想飲嘢   所以我飲火麻仁算喇   唔知依家係咪無哂熱嘅涼茶   定係得呢間無呢   我想飲熱嘅涼茶多啲   我覺得凍嘅好似無乜效咁   係咪呢 ~

住家飯 @ 媽咪屋企 ( 20-JAN-2011 )

蒜蓉蒸鮑魚仔 / 蒸斑仔 / 炒菠菜 / 鵝翼 + 豬頭肉 (外賣) / 合掌瓜圓肉杞子豬骨湯

( 20-JAN-2011  THU )

尋晚差唔差唔多 12 點先瞓   里奧大人又早起身上大陸   我都係瞓下醒下咁   好攰呀 ~

今朝勁想食炒米粉呀   不過超唔好味   應該係無味   下次唔會再去食架喇 ~

菇場忙咗陣   Hea 多陣又到 Lunch   唔想落街呀   食杯麵真方便   好壓韻呀   哈哈 ~

差唔多放工先嚟多嘢做   所以要快手快腳做完   因為想快啲去媽咪屋企呀 ~ 

家姐買咗杏仁片比媽咪食   叫我又食   不過我食咗少少咋   因為我麻麻哋鍾意食呢啲杏仁餅   但杏仁糖我又鍾意食喎 ~

家姐公司間唔中會訂日本嘢   上次叫佢幫我訂包 1 Kg 嘅麵包糠終於到手   估唔到咁大包囉   我遠睇以為佢買包日本米比媽咪食添呀 ~

德昌魚蛋粉 @ 九龍城 ( 19-JAN-2011 )

( 19-JAN-2011  WED )

星期三喇   今朝食午餐肉 + 榨菜肉絲公仔麵   我始終都係覺得榨菜肉絲同米粉夾啲 ~

菇場一般忙啦   啲嘢唔急   可以慢慢做 ~

晏晝有 Lunch Box   我真係幾鍾意食瑞士汁   甜甜哋幾好味   所以今次食得好開心呀 ~ 

今晚開始番學喇   放工行去九龍城   約埋大食表妹一齊食嘢再番學   之後家姐打電話比我   話陪我食飯   里奧大人又話想接我放學   我覺得好搞笑囉   好似驚我好悶咁   我一個人都唔係問題啦   最唔想人地撲嚟撲去   早啲番屋企休息好過啦   係咪先 ~ 

上堂時間係 7:00 - 9:30   我到 8 點半開始有啲眼瞓   不過好在 Break 一 Break 就精神啲   好快就到 9:30   家姐又打嚟   話佢咁啱喺九龍城食嘢   想陪我搭車   但嗰時我仲未放學   同埋家姐又唔識嚟   我喺喺學校隔離條街又有巴士番到屋企   所以叫家姐唔好等我喇   天氣凍   早啲番屋企沖涼瞓覺好過啦 ~

番到屋企問里奧大人晚餐食乜   佢居然自己煮辛辣麵   再加外賣煎釀三寶   平時叫佢開爐滾番啲湯就話唔識唔曉咁   但自己想食就點攰都煮喎   真係衰呢 ~

香草瑞士汁雞翼 + 粟米湯 ( 18-JAN-2011 )

( 18-JAN-2011  TUE )

今朝食扒鹹牛肉芝士治   第一次食咋   鹹到呢   同埋覺得超級無敵勁肥呀 ~

忙咗成朝呀   晏晝同 8 卦出去食飯   佢食飯真係超級快   佢碟飯就好快有   所以叫佢食先   之後我碟飯到喇   佢已經差唔多食剩 1/3   我又影下相   之後我見佢已經食哂   好在佢仲有杯嘢未飲   唔係望住我食   我會好唔自然囉 ~ 

里奧大人上咗大陸   所以要 8 點先番到屋企   我可以多啲時間行下買下嘢   今次買咗啲雞仔餅   蛋糕仔同冬瓜蓉麼囉酥   十蚊四件   每樣要啲都幾好   無咁悶嘛 ~

本來想去超市買菜   但 $10/2 包嗰啲實在太少喇   但買 $20 又覺得好唔抵   所以最後決定唔買   開粟米湯算數 ~

今晚里奧大人陪我拎電話 所以我就煮定晚餐   咁佢一打電話嚟   我就可以出門口   咁樣慳番好多時間   我又唔想出街食   搞掂哂都差唔多 9 點先開餐   我覺得好夜呀   又餓喎 ~

是日懶餐 - 香草瑞士汁雞翼 + 粟米湯

香草瑞士汁雞翼 - 今次用片糖   估唔到好快就好深色   我超開心呀   因為我次次要整好耐先好深色架   唔知係咪今次同片糖有關呢 ~

粟米湯 - 一罐粟米湯 + 一罐粟米蓉   感覺多啲蔬菜咁 ~

依家我好下定決心做運動呀   因為我想血氣好啲   咁個人都應該會瞓得好啲   個人都應該精神啲囉   條命都應該長啲呀   哈哈 ~

敍苑粉麵茶餐廳 @ 九龍灣 ( 17-JAN-2011 )

鳳爪排骨煲仔飯 / 臘腸滑蛋牛肉煲仔飯 / 蠔油菜心 / 養和堂買嘅竹蔗茅根水

( 17-JAN-2011  MON )

今朝 Off   所以瞓到 8 點 45 分就起身食早餐喇   去麥記食煙肉蛋漢堡   熱辣辣好好味呀 ~

食完番屋企梳洗就出發去 Body Check 喇   10 點半到咗   等呀等   等到 11 點先到我   其實都算快喇   Check 完就同里奧大人喺佢公司附近食 Lunch   好開心呀 ~

生炒糯米飯 / 回鍋肉飯

番到菇場都一般忙啦   做下 M 下好快就放工 lu ~

今晚去咗價真棧買咗兩罐大罐裝樂家杏仁糖   真係好抵喎   $88/992g   一罐比媽咪   一罐同家姐 Share   咁就唔駛一次過食咁多   好肥㗎 ~

本來想煎雞翼   已經朝早解凍喇   但都仲係冰咁嘅   所以唔煮喇   反正里奧大人成日叫我休息一個星期   等隻手好番哂先煮   我依家手指公同手指尾嘅接位成日爆烈   啲手指唔可以彎曲   因為一彎就爆   好鬼痛囉 ~  

里奧大人話食煲仔飯   無問題啦   天氣咁凍   我今次都食煲仔飯   飯嘅份量等如我三餐晚飯嘅飯呀   所以超級飽   好在我決定今晚做運動咋   就算喺屋企都要迫自己做半個鐘頭運動呀   希望身體好啲呢 ~

食飽行陣商場   原本諗住買好多嘢食   但實在太飽   見到啲嘢食有啲驚   不過都買咗啲糖   過年應節嘛 ~

Cheese Pizza (外賣) ( 16-JAN-2011 )

香蒜肉絲意粉 / 焗香草咖哩雞飯 / 環遊世界 (薄批) / 蒜蓉包

( 16-JAN-2011  SUN )

今朝好唔想起身   想瞓晏吋   所以無番教會   差唔多 10 點 45 分先起身   就咁喺屋企蒸魚肉燒賣食算喇    家姐話要點煲仔飯豉油先好味   估唔到又堅好味喎 ~

今日家姐 & 里奧大人姐夫嚟我屋企打牌   所以我 Hea 多陣就出發買車仔麵同煎釀三寶番屋企   同埋家姐一齊開餐呀   一路食一路傾真係好開心呀 ~

魚蛋 / 豆腐 / 茄子 / 芋頭 / 尖椒

螺肉 / 生菜 / 粗麵幼麵

牛柏葉 / 蘿蔔 / 韭菜 / 豬腸 

我哋 1 點 45 分開始開枱   打到 8 點就開餐喇   又係外賣 Cheese Pizza   一星期食兩次   有啲驚呀 ~

食完就同家姐行惠康買嘢   買滿 $500 可以送貨   我記得以前只係 $250 就送貨   之後 $400   依家就 $500   好在家姐主打買米同罐頭   所以都好快買夠 $500   唔係又要夾硬搵買嘢咁   好煩囉 ~  

鴛鴦腸排骨 + 魚湯鴛鴦菜 ( 15-JAN-2011 )

( 15-JAN-2011  SAT )

呢朝要番工   早餐去 KFC   因為突然間好想食蕃茄湯貝殼粉呀 ~

番到菇場就等放工   約咗里奧大人去睇手機   今次訂咗 Iphone 4   不過我就用里奧大人嘅 Iphone 3   佢就用新機啦   同埋佢話佢話如果我用 Iphone 3   佢就比月費   Iphone 4 就我自己比   我更係要 Iphone 3 啦   我真係唔想比錢㗎 ~  

訂完電話就去 piago 買嘢   5 包辛辣麵都係 $29.9 咋   同埋我有 5% Discount   所以真係好抵   但 Expiry Date 係 04/11   唔怪之咁平啦 ~

買完嘢番屋企附近大快活食 Tea   食完我就去街市買餸 lu ~

是日懶餐 - 鴛鴦腸排骨 + 魚湯鴛鴦菜

鴛鴦腸排骨 - 就咁蒜頭豆豉蒸排骨真係煮到悶   但其實加埋鴛鴦腸都煮到悶   不過里奧大人鍾意食臘腸   加咗佢就唔覺食排骨悶㗎喇 ~ 

魚湯鴛鴦菜 - 啲魚湯係用 3 條大眼雞滾   不過都無奶白色嘅   好唔開心囉 ~  

住家菜 @ 尖沙咀 ( 14-JAN-2011 )

雞腳眉豆豬骨湯 - 好多材料   好鮮甜   真係好好飲

鐵板鳳陽豆腐 - 個汁 OK   豆腐都滑   配菜又爽口   唔錯唔錯   不過我麻麻哋鍾意食豬肉同豆腐囉

沙拉骨 - OK 啦   無咩特別   不過家姐就好鍾意食   佢又係好鍾意食醬㗎

鮮果咕嚕肉 - 啲生果好鮮下喎   一啲都唔酸   個咕嚕肉都 OK   細細粒容易食呀

金銀蛋菜心 - 呢個無特別啦   同埋鹹蛋同皮蛋太大舊   我鍾意細細粒多啲 

鮑魚雞粒筒飯 - 我覺得鹹囉   但佢哋話好味   話啲飯粒粒分明同好煙韌   但我唔覺煙韌喎 

陳皮紅豆沙 - 應該用啲幾靚嘅陳皮煲嘅   陳皮好食   但呢個甜品一啲甜味都無囉

( 14-JAN-2011  FRI )

Hhappy Friday 喇   今日無咁凍   又有太陽   心情真係勁好呀 ~

今朝同里奧大人食早餐   之後就幫菇場掃貨   10 點番到菇場   話咁快就 Lunch Time 喇 ~

早餐食得太 Heavy   所以呢   晏晝食兩餸飯   蕃茄炒蛋 + 南瓜   清清哋唔錯   我好鍾意食呢間整南瓜啲汁   自己唔識煮就好 lu ~ 

今晚約咗家姐 & 糟糟兩姐妹一齊去住家菜食飯   我同糟糟家姐都係 2 月生日   佢早我 3 日   所以家姐 & 糟糟話請我哋食生日飯喎   呢間標榜無味精   不過我覺得好鹹囉   但應該真係無味精嘅   因為食完都唔口渴   但只限食 1.5 Hrs   所以都好趕   同埋好快上菜   我好唔鍾意咁囉   一嚟就嚟哂   啲嘢好快凍家嘛   同埋比我感覺好似迫人走咁囉 ~

 
家姐要去永安買嘢   咁啱佢哋又要去買喼   所以一齊行去買   之後就車埋我哋番屋企   爽呀 ~  

Cheese Pizza (外賣) @ 媽咪屋企 ( 13-JAN-2011 )

海鮮闊條麵 - 都好多料   同埋都夠汁   唔會好乾   唔錯喎
環遊世界薄餅 (薄批) - 凍咗啲唔係仲好食   薄批無咁飽   我鍾意食㗎
炸雞 - 都幾 Juicy 喎   不過啲皮就無 KFC 咁多香料   如果唔係就更好食呢

蒜蓉包 - 無咩特別

呢排凍嘛   媽咪一開暖爐   寶寶就會坐喺媽咪隔離㗎   好得意呀   如果平時我哋喺度   佢唔會咁大膽出嚟   唔通佢真係好怕凍 ?!

( 13-JAN-2011  THU )

好快又到星期四咁呀   咁就差唔多過咗半個月   啲時間真係過得好快好快呀 ~

今朝好似無咁凍   可能適應咗啦   我又早咗出門口   所以去搭地鐵   行多啲好啲嘅   天氣唔熱嘅話 ~

行到去餐廳都有啲熱   但又好想食湯米粉喎   所以熱上加熱呀 ~

菇場都一般忙   10 點幾就收到媽咪電話   話今日可以出院   但佢就想我放工接佢出院   咁當然無問題啦 ~

知道媽咪出院   心情即刻好番哂   因為次次媽咪入院   我覺得自己好似遊魂咁   無心機做嘢   同埋好多嘢都唔記得咁   淨係好擔心媽咪 ~

晏晝出去行一陣   之後再買 Big Mac 番菇場慢慢食   $20 好抵呀   因為超飽呀   唔知點解   我食嘢嘅時候唔多鍾意飲嘢   多數食完先飲幾啖嘢 ~

差唔多 3 點幾媽咪打嚟話叫 Fat Fat 陪佢出院   話難得好好太陽   想番屋企沖個涼喎   咁都好   我夜晚拎完中藥就可以直接番媽咪屋企   又唔知點解   次次一去到媽咪屋企就好鬼餓   我其實麻麻哋鍾意食曲奇   但去到媽咪屋企見到曲奇又好想食喎 ~ 

今晚叫 Cheese Pizza 外賣   佢哋又話要 40 分鐘先送到   點知 20 分鐘就已經送到嚟   快唔係唔好   不過家姐未番嘛   如果 40 分鐘先送嚟   家姐就啱啱番到屋企   咁就可以食新鮮熱辣嘅 Pizza 嘛   好在家姐番到嚟嘅時候   個 Pizza 底仲脆咋    家姐拎咗糖水番嚟   佢好鍾意乜都同我 Share 一齊食㗎   同埋佢覺得特別好味嘅嘢   點都會留比我食   係都要我食到為止   我媽咪成日話佢黐線呢 ~

打邊爐 @ 稻香 (九龍灣) ( 12-JAN-2011 )

沙爹湯底 - 又係佢呀  一樣咁好味   加兩次水都一樣咁濃   正呀
蟹籽魚麵 - 之前無食有蟹籽嘅魚麵   有蟹籽啲口感好得意  好味呀

雪花丁方 - 上次叫肥牛真係好肥下   所以今次叫呢個   唔錯呀   有啲筋   我最鍾意食呢 

水餃 / 雲吞 / 魚皮餃 - 我同家姐都想試呢個呀   不過當時大家都無講   之後我話想叫多樣嘢   佢就話想呢樣囉   真係啱喇 

炸魚皮 - 我喺茶餐廳買㗎  $13 咋   新鮮熱辣脆卜卜   如果喺稻香食   要 $28 㗎   我覺得唔抵呀   但我又好想食喎   所以自己買   我放喺環保袋入面   叫家姐如果無 Waiter 喺度   就逐啲逐啲拎出嚟派比佢哋食   最緊要唔好咁揚呀   哈哈

綠色一藍子 - 今次有西洋菜   都幾好味喎   不過媽咪話有好多 "其乸"   所以我唔敢買嚟食煮  

美國黑豚肉 - 家姐好少用豚肉打邊爐   所以叫比佢試下喇

( 12-JAN-2011  WED )

今朝真係好凍呀   又落毛毛雨   又濕又寒   我都要着腳指襪保暖呀   不過話時話   着咗腳指襪真係暖好多   我覺得對腳唔凍   咁成身都無咁凍咁 ~

依家天氣凍   我都會同里奧大人一齊行去搭地鐵   但一入到車廂又好焗喎   又凍又焗又凍咁   都幾麻煩   咁好易病囉 ~

無啦啦超想食扒芝腿治呀   等咗差唔多 10 分鐘呀   對面個女仔都同我講話等咁耐   佢見無人理我   仲幫我叫人嚟添呀   之後同佢傾咗幾句   如果菇場啲同事係咁主動就好啦 ~

忙呀忙   煩呀煩   終於到 Lunch Time 喇   今日有 Lunch Box   因為星期一煮得太多叉燒炒麵   所以可以食多餐喇 ~

今晚要出旺角睇中醫   所以探唔到媽咪喇   里奧大人做代表   其實我無叫佢去㗎   佢自己話去   我都好感動   因為佢咁忙都記得媽咪入院   要探媽咪   好好㗎喇 ~

約咗中醫 6 點   佢一見我就話我臉色唔好   打脈又叫我唔好咁緊張   我話我乜都會緊張一餐   佢話我太依賴人   講仲哂噃   我真係好依賴人㗎   未嫁依賴屋企人   嫁咗依賴里奧大人   不過我覺得依家好啲喇   無咁依賴   希望以後更加獨立啲就更好啦 ~

同個醫師傾下偈   都差唔多 7 點先走   今次又坐亡命小巴去淘大   8 分鐘咋   仲要今次係阿叔揸車   如果唔係肯定仲快呀   8 蚊真係抵比啦   1 蚊一分鐘   又安全又快   哈哈 ~

今晚咁凍   里奧大人晏晝打嚟話想打邊爐   難得佢話打   我即 Book 枱啦   家姐又一齊嚟打   好開心呀 ~  

煎釀三寶 + 文記車仔麵 (外賣) ( 11-JAN-2011 )

魚蛋 / 尖椒 / 豆腐 / 茄子

豬腸 / 蘿蔔 / 螺肉米粉 (兩大匙辣汁)

豬紅 / 水魷魚 / 豬腸幼麵 (兩大匙辣汁)

咖哩魚蛋 / 水餃 / 螺肉 / 粗麵 + 幼麵 (小辣汁) 

生菜

( 11-JAN-2011  TUE )

今朝里奧大人要上大陸   所以要 7 點起身   佢啱啱去沖涼嘅時候   屋企電話響   我諗唔方好嘢   但又希望係里奧大人啲同事打嚟話唔駛上大陸   不過   一睇電話號碼都知應該唔會係佢同事囉   原來係平安鐘打電話嚟通知話媽咪啱啱因為氣促   所以按平安鐘   10-15 分鐘救護車就會到屋企 ~

我爭扎去唔去媽咪屋企   不過最後都係決定去喇   咁近   唔去好衰囉   同埋有屋企人陪住實會安心啲呢 ~

拿拿聲刷牙洗臉就出門口喇   去到媽咪屋企樓下已經見到救護車   所以我就喺大堂等媽咪   我叫咗一聲媽咪   媽咪好驚訝   估唔到我會咁快上到嚟 ~

上到車就 Check 哂所有嘢   再等媽咪舒服啲   無咁氣促就開車喇   救護車人員好細心呀   感恩 ~

去到就即入 A & E   媽咪聞咗 "貓鬚" 就舒服好多   我都安心啲   媽咪又未上得病房    加上佢好攰   喺度瞓覺   我就拿拿聲去 Canteen 食早餐喇   咁食完又拿拿聲番 A & E   差唔多 9 點 15 分左右收到平安鐘電話   話媽咪嘅住院嘅樓層   我親身喺 A & E 都未知呀   平安鐘服務真係超級有效率呀   差唔多 9 點 45分就上得病房 lu ~

我喺 A & E 等嘅時候   見到好多老人家都係氣促入急症呀   總之入親嚟都係阿公阿婆   真係睇見都慘呀 ~

同埋媽咪上病房都差唔多 10 點喇   我又要拿拿聲番屋企沖涼換衫番工喇   超無敵勁攰囉 ~

差唔多 10 點 35 分番到菇場   做做做   好快到 Lunch Time   今次好在有 Lunch Box   因為我真係唔想落街買嘢食呀 ~

放工即走去牛頭角睇中醫   點知原來無得睇   要去旺角先有得睇呀   整鬼佢   我 Book 嘅時候又無講   但佢又話有喎   算啦  無心機講嘢呀   即刻坐車探媽咪算喇 ~

見到媽咪都係攰   但精神好過今朝囉   我又無啦啦喉嚨超痛喎   唔知係咪頭先食得太多花占餅呢 ~ 

家姐 7 點 10 分到喇   不過媽咪瞓覺   所以我哋坐到 7 點 35 分就走 lu   本來家姐話唔同我哋食   但我話聽日探唔到媽咪   所以佢就同我食喇   搞笑 ~

里奧大人又差唔多番到香港   家姐又想食煎釀三寶同車仔麵   所以我哋就買番屋企食喇    喺屋企食舒服好多呀   因為文記實在太迫喇 ~

其實我尋晚已經買埋今晚嘅餸㗎喇   不過估唔到媽咪入院   我已經頭痕啲免治豬肉點好   講真   番到屋企咁攰我唔會煮   應該就係掉嘅多囉   但最感恩係咁啱姐夫要帶 Lunch Box   家姐佢又唔識教工人整餸   所以我就順理成章   整咗鹹蛋肉餅比姐夫喇   太好啦   我又唔駛浪費   姐夫又可以帶飯   感恩呀 ~

我送家姐去搭車   過馬路時有個賤人想博我懵呀   因為條路根本無人行   佢係咁撞埋嚟   好在我當時翹住手行咋   之後我大聲話賤格   佢望都無望呀   如果佢真係唔小心撞到我   佢應該會講唔好意思   咁即係證明佢係特登撞埋嚟啦   死賤人 ~

番到屋企又唔係好攰喎   仲洗埋衫同熨衫   原來已經 12 點   唔瞓唔得喇 ~  

叉燒炒麵 + 菠菜 ( 10-JAN-2011 )

( 10-JAN-2011  MON )

雖然係星期一   有啲攰   但心情好好喎   唔知係咪食得飽呢 ~

番到菇場超忙   但我好有衝勁咁做嘢喎   估唔到估唔到 ~ 

好快就到 Lunch Time   有 Lunch Box 就唔駛煩食咩啦 ~

又係忙忙忙   所以好似好快放工咁呀   行緊去搭地鐵嘅時候   有個男人細細聲講 "行快啲啦   媽咪等緊"   好似同我講咁   我嗰下好驚呀   好似叫我咁   因為我行緊嘅時候唔見有細路仔嘛   我驚佢係傻呀   好在   佢真係同行緊佢後面嘅仔仔講嘢咋 ~

呢晚好攰   但又想煮喎   已經諗好哂買咗乜嘢先   第一樣買叉燒   點知無喎   唔理啦   其實嘢先   到最後行去遠少少嘅燒臘檔買叉燒   但個樣又衰到不得了喎   所以無買   諗住去惠康   但係惠康係 Pack 好哂   一盒細細嘅都差唔多接近 $20   又覺唔係好抵   所以最後去明星酒樓買半斤叉燒就番屋企 lu ~

去到買叉燒嘅時候   見到好多男人阿叔買兩餸飯盒   我覺得佢哋係無住家飯食咁   希望里奧大人唔會成為佢哋嘅一份子啦 ~

是日懶餐 - 叉燒炒麵 + 菠菜

叉燒炒麵 - 半斤只係 $28   食落都唔錯   第時可以多個地方買叉燒喇 ~ 

菠菜 - 想食油麥菜架   但街市又無喎   所以菠菜囉 ~ 

咕嚕雞球 + 青紅蘿蔔粟米唐排湯 ( 9-JAN-2011 )

( 9-JAN-2011  SUN )

今朝同媽咪 家姐去陶源飲茶   點心就麻麻哋好食   不過最抵係有 Free Parking   因為好少咁早會有呢 ~

炸芋盒 / 煎蘿蔔糕 / 煎腸粉 / 豆苗蝦餃 / 醬汁蒸鳳爪 / 北菇棉花雞

差唔多番到屋企嘅時候   里奧大人就啱啱起身   所以我就買埋麥當勞全餐佢食   唔駛佢咁凍落街食早餐喇 ~

抖多陣就番教會 lu   之後就去睇手機   我部手機間唔中自動開機熄機   咁好唔掂囉   我有好多 Reminder 嘛   一陣無哂就煩   真係唔記得有咩事要做   其實都唔知有 Reminder 係好定唔好   好嘅就一定記得   唔好嘅就係成日依賴佢   不過其實我自己都會盡量記住要做嘅事嘅   但有 Reminder 就穩陣好多囉 ~

睇完手機都差唔多 2 點幾   我都有啲餓   同埋勁想食鱆魚燒呀   所以去 Piago 開餐   之後去埋 Mos Burger   再食埋龜苓膏就番屋企喇 ~

鱆魚燒 + 炒麵 / 烤牛肉珍珠堡 / Mos 炸雞

番到屋企就 Ready 煲湯   再煲埋夏枯草比里奧大人清清熱氣   熨埋一機衫   埋頭苦幹係咁做   啲時間過得真係好快呀 ~

是日晚餐 - 咕嚕雞球 + 青紅蘿蔔粟米唐排湯

咕嚕雞球 - 清埋冰箱啲雞柳   所以就整咕嚕雞球喇   今次獻汁加咗一筒山揸餅   但我覺得味道同無加嘅又無咩分別咁喎   里奧大人應該幾鍾意食咕嚕汁嘅餸   因為佢食得好滋味   同食菜嘅樣簡直係天淵之別呀 ~

青紅蘿蔔粟米唐排湯 - 好耐無煲呢個湯   今晚我特登唔食飯架   食哂啲湯渣   咁樣無咁浪費嘛   同埋唐排又無乜肉   蘸辣椒豉油好好味   我好鍾意呢 ~

黑椒扎肉銀絲米粉 + 唐生菜 + 蕃茄薯仔魚湯 ( 8-JAN-2011 )

( 8-JAN-2011  SAT )

呢朝超餓呀   所以食個通粉再加杯熱檸茶   超滿足呀 ~

番到菇場好忙呀   差唔多放工先做完   好充實呀 ~

里奧大人呢日要番工   所以尋晚約好今日去飲茶   我要買洗衣球   里奧大人就去攞位先   我差唔多 1 點 35 分去到酒樓   今次有策略咁叫點心   叫咗兩樣飽飽哋肚嘅點心食住先   之後再等到 2 點鐘下午茶時間就叫啲大點嘅點心   因為下午茶時間嘅大中小點都係 $9.8 咋   所以叫大點就抵啲喇 ~

蔥花炸兩 - 里奧大人餓呀  所以叫咗碟飽飽地肚嘅炸兩食住先囉  都 OK 好食
蒸蘿蔔糕 - 好耐無食   覺得都幾好味
榨菜牛肉腸 - 第一次食   啲榨菜幾爽口   唔錯
鹹水角 - 新鮮滾熱辣   正呀

鴛鴦臘腸卷 - 啲潤腸好肥呀   唔掂   同埋里奧大人唔食呀   我一個人食哂   飽到反眼
古法馬拉糕 - 我太飽   所以食唔落   不過里奧大人話唔好食   好硬喎  
一口椒鹽茄子 - 又話一口   但粒粒大到呢   我最唔鍾意就係咁   唔用心去整   最後都食剩一半   實在太飽喇   

冰鎮鵝掌翼 - 我為咗呢碟先嚟飲茶咋   超好味   每食一啖都點一下酸醋   當堂無咁滯呀   不過好多翼尖囉   有啲搵笨   下次唔食 lu

食到好飽好飽好飽呀   本來我想抖多日唔煮飯   但真係好飽   所以都係行去街市買餸當做下運動   真係唔郁唔掂呀 ~

是日懶餐 - 黑椒扎肉銀絲米粉 + 唐生菜 + 蕃茄仔魚湯

黑椒扎肉銀絲米粉 - 懶呀   同埋好飽   食唔落飯   所以煮米粉 ~ 

唐生菜 - 懶呀   炒都唔炒 lu   加片薑就咁灼熟就算喇 ~

蕃茄薯仔魚湯 - 好想飲呢個湯   雖然今次買咗 3 個大蕃茄   但唔係咁甜囉   又可能我加多咗水都未定呀 ~ 

爭鮮迴轉壽司 @ 九龍灣 ( 7-JAN-2011 )

( 7-JAN-2011  FRI )

Happy Friday 喇   今個星期過得好快咁呀 ~

 
好攰呀   又凍又無咩胃口   又想食甜嘢   所以又去麥當勞食熱香餅喇   之後坐的士番菇場    真係好唔想行呀 ~

番到菇場都忙呀   因為尋日啲嘢無做到   今日一定要做番   唔係比人殺呀 ~

本來想出去買嘢食   但又好鬼凍   唔想出呀   食杯麵算喇   我同事一見到我就問係咪食出前一丁   杯麵真係好大陣味   所以次次都要好快手咁食呢 ~

個人仲係無乜力咁   行路似龜速   慢到呢   我一路行啲人就會好好奇咁望一望我   因為我實在行得太慢   啲人可能以為我病得好嚴重呀 ~

今晚真係好凍   想去麥當勞買杯熱朱古力暖暖身   但原來都要 $16   我覺得好貴   所以我情願去 Happy Lemon 買杯杏仁花生朱古力 + 珍珠   都係 $16   不過呢   我唔會再去呢間 Happy Lemon 買珍珠奶茶以外嘅飲品   因為實在太難飲喇   上次杯特濃朱古力   仲淡過茶餐廳嘅華田   今次仲慘   飲到我好想反胃呀 ~

里奧大人今晚 7 點半先放工   餓到我呢   屋企又越坐越凍   但越凍又越唔想郁喎   又凍又餓真係好慘呀 ~

今晚好想食壽司   所以又去爭鮮   依家多咗好多款壽司   不過我都係來來去去食嗰啲呢 ~

食到好飽   去商場行一陣   點知里奧大人無啦啦話暈一暈   嚇到我呢   話即刻番屋企喇   佢番到屋企就精神喎   仲 On Line 打機   我之後就係咁問佢仲有無暈   佢話無暈   係比我煩到暈呀   哈哈 ~

敍苑粉麵茶餐廳 @ 九龍灣 ( 6-JAN-2011 )

臘味盅頭飯 / 窩蛋牛肉煲仔飯


( 6-JAN-2011  THU )

要番工喇   不過都係不在狀態中   做下瞓下咁囉 ~

終於到 Lunch Time   正正經經咁瞓咗一個鐘頭   精神好多呢 ~

等呀等   終於等到放工   去里奧大人公司附近茶餐廳食啲嘢   等埋佢放工就一齊去大酒店   向大眼妹嘅嫲嫲鞠躬   坐咗陣就走喇 ~ 

呢兩日無咩食嘢   所以口淡淡   只想食濃味嘢   之前都成日去呢間茶餐廳 Lunch   都幾好食嘅   咁啱又有煲仔飯   叫里奧大人試下   我就食盅頭飯   因為唔想咁飽呀 ~ 

大快活 @ 九龍灣 ( 4-JAN-2011 ) + ( 5-JAN-2011 )

沙薑雞飯
臘腸銀魚肉餅煲仔飯

( 4-JAN-2011  TUE )

呢朝食腿蛋包   好耐無食過喇   不過如果再熱啲就更加好味啦 ~ 

番到菇場無停過手   做完又有   做完又有咁   好攰呀 ~ 

晏晝呢   食杯麵   仲有 2 個就清哂所有杯麵   好開心呀 ~

呢晚每月一到   所以都係睇醫生   攞定病假紙   如果真係痛   都可以無後顧之憂咁瞓   唔駛又要特登凍冰冰出去睇醫生嘛 ~

感恩感恩   估唔到又有胃口喎   仲好想食飯添   所以近近哋去大快活算喇   食完就快快趣番屋企沖涼休息喇 ~ 

( 5-JAN-2011  WED )

今朝都係請病假喇   個肚都係痛   但就唔係好勁痛果隻   不過就好攰   希望啲中藥有效啦 ~