板長壽司 @ 九龍灣 + 流浪影子卜聚 ( 30-APR-2011 )

三文魚醬油漬壽司 / 蒲燒宮城秋刀魚壽司 / 帆立貝 / 三文魚壽司 / 黃旗吞拿魚壽司 / 珍味廣島蠔壽司 / 火灸墨魚鬚壽司

( 30-APR-2011  SAT )

今朝好開心呀   又同媽咪  家姐去鴻星飲茶   之後家姐就車埋我番菇場   爽到不得了呢 ~

蛋煎糯米雞 - 家姐想食   所以叫喇   不過唔好食囉
回味銀針粉 - 媽咪話好味   咁又叫啦   唔怪之叫回味銀針粉  哈哈

牛肉飯 - 家姐好鍾意食   所以又叫喇

臘味芋頭糕 - 媽咪話想試   不過味道好一般囉

麻沙糍 - 唔記得個名   家姐上次已經想食   但無人理佢   今次又講咗幾次唔知呢個係咩   我同媽咪都覺得佢真係非常之想食   所以就叫喇   味道好似擂沙湯丸咁   無特別

估唔到星期六都咁多嘢做喎   不過又幾好嘅   時間過得真係好快囉   同埋番半日嘅心情真係好好   有嘢做都唔覺得好煩 ~ 

放工去牛頭角睇中醫喇   之後收到大馬老友 流浪影子 電話   話一齊去飲茶   仲就埋我哋去九龍灣添   咁就即叫里奧大人去翠園攞位   咁就唔駛到時無位啦 ~

好感恩好快有位   因為原來翠園係無下午茶時段嘅   唔怪之得無人等位啦 ~  

諗住喺酒樓附近等佢哋   點知里奧大人打嚟話佢哋入咗去   我仲以為呃我添   原來係真嘅 ~

見番老友真係好振奮呀   唔會好似第一次見咁   要諗定傾啲咩   有咩係共同話題咁囉   同埋最緊要唔係得我同影子兩個講   小寶 同里奧大人都有傾偈   咁先係嘛   我哋個口唔駛咁攰   又可以了解大家多啲   哈哈 ~

因為我哋差唔多 2 點 45 分先開始點點心   所以啲點心差唔多一次嚟哂咁   我哋 4 個又一齊影下相   真係又影又食又傾   真係唔知做得邊樣好呀 ~ 

蝦球焗麵 - 里奧大人以為係好大碟  所以諗住 Share  點知原來好細碟咋   不過我哋都 Share 咗   分甘同味咁樣會好食啲   但呢個蝦球焗麵真係好味喎

蜆蚧鯪魚球 - 小寶點㗎   難得呢   影子話小寶好鍾意食蜆蚧醬㗎

帶子腸粉 - 腸粉有面都好多菜   都唔錯  不過皮薄啲更好呢

龍鬚蛋散 - 次次食都好好味   好鬆化   又有棉花糖  賣相好靚   係我影得衰啫 

椒鹽九肚魚 - 外脆內軟   椒鹽勁正   不過我唔鍾意食九肚魚囉

燒賣 - 有隻蝦仁喺面   好爽口   我唔鍾意食燒賣都覺得好食呀

鬼唔搭八春卷 - 新鮮炸起好正呀   同埋成條都係蝦肉   唔錯唔錯
金沙南瓜 - 無乜點心想食   所以叫呢個喇

煙三文魚蝦仁蛋白炒飯 - 里奧大人驚大家唔飽   所以又炒飯   呢個炒飯無肉   最啱大家食呢

馬拉糕 - 我無食呀   不過里奧大人話好食喎

差唔多 4 點幾先走   所以酒樓得番我哋一枱咋   其他位置都熄咗燈添呀   不過佢地熄咗冷氣   有啲焗   所以都係時候走 lu ~

影子同小寶就喺德福行街   我同里奧大人就番屋企   因為家姐話嚟我屋企坐   同埋同我哋食飯呀 ~

估唔到影子喺金滿堂食糖水   咁我咁多嘢講   都唔理佢 Like 唔 Like   自己走咗落去同佢哋一齊傾囉 ~ 

之後家姐嚟咗   我都要走喇   咁家姐又話好想見影子   咁就帶佢見下啦   真係好彩佢地仲喺附近   如果唔係就緣慳一面 lu ~   

我覺得今日真係食食食咁   所以我真係好飽   食咗 3 碟壽司就算喇 ~

家姐同埋我哋一齊番屋企   差唔多 9 點半先走   我送佢去巴士站坐車   等埋佢上車就走 lu   途經商場   見到教友兩家人   咁我又湊熱鬧走埋去   之後又再見到另一個教友    無啦啦咁就見到 8 個教友   喺教會都未必會咁齊人   邪呀 ~ 

瑞士香草汁雞翼 + 生菜螺片 ( 29-APR-2011 )

( 29-APR-2011  FRI )

Happy Friday 喇   我非常之感受到啲人聽日 Off 嘅心情   不過我無得 Off 喎 ~

今日嘅天氣濕濕立立   又落雨   最唔鍾意呢 ~

早餐又食芝士腸仔包   真係好好味囉   我鍾意食腸仔嘛 ~

菇場又有啲嘢做   做下停下咁囉   太辛苦唔得㗎 ~

今日決定唔食麥皮喇   所以去買咗黑椒腸仔蛋飯   因為實在太想食啲惹味汁呀 ~

里奧大人上咗大陸   我可以多啲時間煮飯   不過有啲攰   所以簡簡單單就算 lu

是日懶餐 - 瑞士香草汁雞翼 + 生菜螺片

瑞士香草汁雞翼 - 甜甜哋好好食   不過就唔想食太多雞翼囉 ~

生菜螺片 - 罐鮑汁螺片係家姐比㗎   我其實成日想買   不過唔知好唔好食   咁依家有人比就更要啦   估唔到味道都唔錯   下次再買嚟食先 ~

住家飯 @ 媽咪屋企 ( 28-APR-2011 )

臘腸炒芥蘭 / 豆豉燜苦瓜 / 蒸海魚 / 蒸海蝦 / 紅菜頭湯 (粟米 / 紅蘿蔔 / 粟子 / 腰果 / 紅腰豆/ 眉豆) / 豬腳薑 (媽咪朋友整嘅)

( 28-APR-2011  THU )

今朝 7 點 20 分有電話響   咁里奧大人出廳接電話   之後拎比我聽   我心跳即加速呀   原來媽咪打嚟約我 8 點去鴻星飲早茶   因為本來家姐佢哋尋晚已經約咗去將軍澳飲茶   但後尾姐夫又話想去鴻星   但家姐又好想約埋我   但又驚嘈醒我   所以無打嚟   估唔到媽咪打嚟   可能實在太想見我啦 ~

飲完茶家姐就車我番菇場喇   一番到菇場就似打仗   無啦啦有九萬幾樣嘢要做   好在我都鍾意有嘢做啫 ~

晏晝又食麥皮   其實有啲反胃   不過話咗要食就要食囉   反正我又唔想落街買嘢食 ~

今晚本來同埋里奧大人一齊番媽咪屋企食飯   點知原來佢約咗舊同事食飯都唔記得   不過又好彩喎   我都係諗住今晚即興番媽咪屋企食飯   咁啱里奧大人又約咗同事   咁就最好啦   我有飯食之餘又可以陪下媽咪 ~

金豪粉麵茶餐廳 @ 九龍城 ( 27-APR-2011 )

( 27-APR-2011  WED )

星期三喇   今朝好想食濕嘢   所以食芝士腸五香肉丁米   再加埋杯熱檸茶   之後出事啦   熱到爆炸   仲出汗添呀 ~

今日細老闆唔喺度   打正旗號上網啦   不過我都唔會 Full Screen 睇嘅   我好自律㗎 ~

晏晝有 Lunch Box   因為里奧大人尋晚食唔哂   人哋想食麥皮家嘛 ~

今晚要番學   所以又同大食表妹食飯   佢當然又講鋼琴老師啲嘢啦   我又借啲易問佢   妳同攝影表弟 Frd 唔 Frd   佢話唔 Frd   之後我就話點解唔 Frd 呢   就係因為妳講嘢超級悶   來來去去都係嗰啲   真係好悶好悶   妳應該擴闊妳嘅話題   出去走走睇多啲嘢   未必個個人都同妳志同道合家嘛   好老實講   我喺妳表姐都好唔想聽妳電話同埋一齊食飯囉   講嘢重覆又重覆   妳自己都覺得悶啦   不過妳應該唔覺   我講完之後   佢嘅反應都係哦哦哦   之後無耐又講鋼琴老師   我話唔想聽   佢都醒水轉話題   但過馬路又講番   我真係無佢咁好氣   唔鬼理佢 lu ~  

蒜頭豆豉蒜排骨 + 菜心苗 ( 26-APR-2011 )

( 26-APR-2011  TUE )

假期後第一日番工   都無想像中咁眼瞓咁辛苦   都算唔錯喇 ~ 

番到菇場忙到爆   忙咗一朝   所以覺得好快 Lunch   今日食麥皮呀   想清清腸胃 ~

今晚去教會讀牧養課程   但 8 點先開始   所以我都係煮飯   唔想里奧大人成日出街食   好似好慘咁   又無益 ~

是日懶餐 - 蒜頭豆豉蒸排骨 + 菜心苗

蒜頭豆豉蒸排骨 - 最簡單方便嘅餸   不過我都堅持炒香啲蒜頭豆豉先去蒸排骨   真係好食好多 ~

菜心苗 - 唔知買乜菜好   所以又食菜心苗喇   今次就咁灼熟算   好怕炒到成身油煙味呀   又唔夠時間沖涼   我會覺得周身唔舒服咁 ~

里奧大人上咗大陸   所以今次我真係要自己食飯先喇   啲感覺好怪咁 ~

今晚有個壓力測試   最高係 30 分 (要即時搵專業人員處理壓力問題)   而我就係 17 分   都係處於高壓狀態   其實我又唔覺得自己有咩壓力   但我好肯定自己有強迫症   即係重覆又重覆做一件事   好似啲人係咁洗手   覺得點洗都唔乾淨   而我呢   就係明明已經鎖好門   都要再開番門   睇下自己關好水制未   因為之前屋企曾爆過喉   仲要係咸水   雪櫃門有無關實   如果我鎖門   我又會托下個門鎖   睇下自己有無鎖好   但里奧大人話拎得出條鎖匙出嚟就等於已鎖好喎   叫我唔駛咁緊張   所以我最鍾意同里奧大人出門口   咁佢係最後一個關水制   佢又負責鎖門   我個人真係無咁緊張㗎 ~ 

漁米之鄉 @ 九龍灣 ( 25-APR-2011 )

金粟石班塊一品海皇豆腐煲魚湯魚腐浸菜苗菠蘿咕嚕肉

( 25-APR-2011  MON )

今朝差唔多醒嘅時候有電話響   原來大眼妹打嚟話唔食 Lunch 改為食晚飯   仲以為邊個咁早打嚟添 ~

諗住晏晝會一齊飲茶   所以買定麵包做早餐   因為出街食早餐實會好飽 ~

之前做哂家務   今日又係最後一日假期   所以盡情 Hea 喇 ~

家姐今日又同我哋一齊食 Lunch   不過講到明唔飲茶   話上次同我哋飲到驚咗喎 ~

大家又未餓   差唔多 2 點先去買車仔麵同煎釀三寶番屋企食   嘆住冷氣慢慢食真係好鬼爽呀 ~

家姐差唔多 4 點就走 lu   我就繼續 Hea 喇   6 點半就出街食飯 ~ 

今次同大眼妹一家大細去漁米之鄉食晚飯   其實我未試過㗎   但我教友話抵食又唔錯   所以咪試下囉   因為我唔想又去番上海婆婆度食呀 ~

上海婆婆 @ 九龍灣 ( 24-APR-2011 )

鍋貼 / 生煎包 / 雞絲粉皮 / 麻油海蜇 / 湯浸上海雲吞 / 干煸四季豆 / 婆婆炒粗

( 24-APR-2011  SUN )

今朝 10 點起身食早餐然後番教會   因為實在太耐無番喇   真係唔係咁好呢 ~

崇拜完畢就同教友一行十五人去飲茶   食到飽飽無乜細藝   番屋企 Hea 囉 ~

今晚同媽咪去上海婆婆食飯   所以都係喺屋企 Hea 喇 ~

假期呢幾日真係只係食食食咁   但又唔想郁喎   其實又好想煲湯   但又懶得買材料喎   瞓下好過 ~

同媽咪 6 點半就到上海婆婆度喇   依間食店逢五六日 & 公眾假期都係限時一個半小時   所以啲食物都好快上枱呢   不過我覺得越食越細碟咁囉 ~

送埋媽咪搭車我就番屋企 lu   里奧大人約咗朋友傾偈   我就特登留番 3 機衫今晚熨   做嘢打發時間好過食嘢打發時間呢 ~ 

水雲間 @ 皇崗 + 標記樂園潮州粉麵菜館 @ 旺角 ( 23-APR-2011 )

滷水拚盤 (例) / 滷水鵝片 (例) / 滷水鵝掌翼 / 蠔仔粥 (碗)

( 23-APR-2011  SAT )

今朝食完早餐就諗住北上按摩   但唔知點解我無啦啦好頭暈   所以里奧大人話要喺屋企抖陣   如果唔暈先去   暈就要喺屋企休息 ~

不過抖咗陣都好啲   同埋今日天氣涼涼哋好舒服   好想出去呀   所以照原定計劃去按摩喇 ~

依家屋企附近有直通巴去皇崗   超方便呀   不過可能會無位   要等下一班   真係好感恩   我同里奧大人係最後嗰兩位呀 ~

去到差唔多 1 點   首先又係按腳加 Lunch   之後再按全身兩個鐘   今次個技師好好喎   按完即時感覺到鬆哂   真係人都開心啲 呀 ~

今晚好想食越南菜同潮州打冷   里奧大人話想打冷   咁就打冷啦 ~  

又係坐直通巴番香港   今次試下去旺角   諗住去太子搵朋友   點知佢哋又唔喺度   見到有間食炸芝士都幾出名嘅店仔   所以入去試下   之後再行去打冷 lu ~

住家飯 @ 媽咪屋企 ( 22-APR-2011 )

菠蘿生炒骨 (外賣) / 乳豬半斤 (外賣) / 蒸魚 / 炒小棠菜 / 冬瓜雪耳淮山紅蘿蔔豬展湯 / 榴槤

( 22-APR-2011  FRI )

連放 4 日假期   心情真係超級開心呢 ~

今朝當然瞓到自己醒啦   不過都係瞓到 10 點半左右   瞓得太多會頭痛 ~

早餐去太興   因為坐得舒服好多   不過今次搭大圓枱   同 3 對唔識嘅人一齊坐   三唔識七   勁有去飲 Feel 呀 ~

今日好焗   都係想喺屋企 Hea 呀   Hea 完就去食 Tea   再番屋企 Hea ~

Hea 到 6 點就去媽咪屋企食飯喇    家姐又去咗澳門   所以我哋就陪媽咪食飯   因為超勁想飲湯呀 ~

茄汁洋蔥豬扒 + 西生菜 ( 21-APR-2011 )

( 21-APR-2011  THU )

番埋今日就放 4 日假   心情點會唔超級振奮喎 ~

今朝好餓呀   所以快快趣趣去麥記食早餐喇 ~

雖然無嘢做   但朝早啲時間過得快啲   晏晝就比較難過啲咁呢 ~

好快到 Lunch Time 喇   帶番尋日食剩嘅蝦醬炒飯   好在今次嘅蝦醬唔大陣味咋   唔係就慘   係人都知妳食蝦醬炒飯 ~

無啦啦又忙喎   不過算啦   好過唔知做咩好嘅 ~

今晚 Mood 到   好想煮飯呀 ~ 

是日懶餐 - 茄汁洋蔥豬扒 + 西生菜

茄汁洋蔥豬扒 - 今次整過汁整得非常之好味   酸酸甜甜   個汁唔太杰又唔太稀   最鍾意咁呢 ~

西生菜 - 唔想炒菜   就咁灼熟就算喇   加埋腐乳一齊食就好好味 ~ 

泰好味 & 佳記 B 仔涼粉 @ 元朗 ( 20-APR-2011 )

泰式三味魚 ($75) - 侍應話係甜酸辣三種味   炸咗嘅鰂魚   不過條魚都唔似炸過嘅  同埋我都係仲未接受到太多香草嘅味道   但啲汁都 OK 嘅 

泰式拚盤 ($48) - 我超鍾意食拚盤   好似好多選擇咁呢

馬拉盞炒通菜 ($38) - 都幾大碟   同埋都幾惹味
泰式蝦醬炒飯 ($42) - 我無食呀   飲完個湯都飽  
泰式冬蔭功湯 - 細 ($42) - 都幾酸   但唔辣   不過里奧大人唔飲   自己飲就無乜癮喇   哈哈

室外都有得坐   不過有人食煙   唔想坐囉   所以就坐室內   最離奇就係有兩枱人坐咗一陣就話有陣味   要出去坐   但我哋真係聞唔到喎   唔通係我哋兩個嘅味   哈哈

佳記 B 仔涼粉 ($63) - 今次完全覺得啲 生果係用糖水浸呀  樣樣都好似一樣味咁   所以我同里奧大人食咗兩碗仔就要打包番屋企喇   太甜好辛苦呀

( 20-APR-2011  WED )

今朝早餐轉飲熱檸茶   因為覺得飲咖啡都唔係話超級精神   咁不如飲檸茶算喇   無咁肥同埋無咁傷身呀 ~

番到菇場都勁有 Holiday Mood 呀   真係唔願做嘢呀 ~

今日都涼涼哋   所以晏晝自己出去食水餃米粉   本來想食粥   但都係驚食完太熱   都係唔好喇 ~

里奧大人上咗大陸   但佢有車到元朗   所以我同佢去元朗食嘢喇   好耐無坐長程車咁   有啲唔慣添 ~

我認路係最弱嘅   但今次又比我搵到喎   真係好感恩呢   坐咗一陣里奧大人就到喇   時間啱啱好 ~

一心諗住嚟元朗係食泰菜 & B 仔涼粉   所以我都留肚食 B 仔   但最終都係食唔哂   要打包番屋企囉 ~ 

9 點 05 分上車   9 點 45 分到九龍灣   都算快架喇   諗住沖完涼再食埋 B 仔   點知真係食唔落   要留番聽晚食呢 ~ 

The Spaghetti House @ 旺角 ( 19-APR-2011 )

意大利菜湯 / 粟米雞忌廉湯 / 挪威煙三文魚凱撒沙律配蒜蓉多士 / 巴馬火腿.珍寶什錦薄餅 (意大利腸肉碎 / 牛肉 / 加拿大煙肉 / 辣肉腸 / 莎樂美腸 / 蘑菇 / 洋蔥 / 菠蘿) / 烤帶子芝士焗卡邦拿意大利粉

( 19-APR-2011  TUE )

今朝有啲陽光   又好乾爽   超舒服呀 ~

早餐食熱香餅   但今次落得太多蜜糖   所以啲餅好快腍 嘅   最唔鍾意呢啲口感   依家有啲驚咗佢添 ~

住大埔嘅時候   喺藥房買咗隻洗頭水 TRESemme   覺得幾好用又幾抵   所以上次入大埔嘅時候   再去藥房買多支   點知今次我就覺得唔對路咁囉   用完個頭皮有時會痕   之前唔會咁㗎   同埋我好少頭皮痕   咁同里奧大人講啦   諗住比佢用埋去嘛   點知佢話佢都覺支洗頭水有問題   覺得好似沐浴露咁   所以佢無用   佢仲以為我將沐浴露裝入洗頭水樽度添   真係呢   我咪話佢囉   我點會咁㗎   就算係都裝番洗頭水樽度啦   黐線嘅   仲有明知支洗頭水有問題又唔出聲   自己停用就算   點得咁㗎   所以我哋最後都掉咗算喇   同埋唔再去藥房買洗頭水囉   平幾蚊點知最後成支無乜點用就掉埋   仲蝕呀 ~

菇場又係無乜搞作   真係超級令我想瞓覺呀   幾難先等到 Lunch Time 呀   食埋 Lunch Box 抖陣   又要等放工喇 ~

里奧大人又上咗大陸   所以一早約定朋友 CC 去旺角買衫   估唔到放工嘅時候係涼涼哋   因為之前好熱家嘛 ~

CC 差唔多 7 點先到   我就自己行下先啦   今晚好開心喇   好多收穫呀  因為格言係有殺錯   無放過 ~

行到 9 點先開餐   所以求其去旺角中心嘅 The Spaghetti House 算喇   因為大家都好餓呀 ~

叫咗個二人餐   都諗住食唔哂   好在兔兔又嚟埋   佢食咗少少咋   都叫幫輕下   不過我都食到超飽囉   今餐係我嘅生日飯   所以 CC 請   真係好喇   買完嘢又有免費餐   哈哈 ~

焗叉燒 + 瑤柱蒸節瓜 + 蒜粒炒飯 ( 18-APR-2011 )

( 18-APR-2011  MON )

又星期一喇   不過諗起今個星期連放 4 日假就好開心呢   雖然都係攰 ~

早餐食芝士腸仔包   呢排都好鍾意食呢啲包   因為佢地整得好軟糯呀 ~

菇場靜到不能再靜   又再出現耳鳴嘅感覺喇 ~

晏晝有 Lunch Box   本來想食完出去行   但又好似好焗咁   都喺上網睇報紙算喇 ~

尋日買埋今晚嘅餸   所以今晚放工唔駛咁趕   真係好鍾意咁呢 ~ 

是日晚餐 - 焗叉燒 + 瑤柱蒸節瓜 + 蒜粒炒飯

焗叉燒 - 今次買咗 $30 五花腩   不過我都係覺得枚頭好味啲同無咁肥   下次都係買番梅頭算喇   唔記得屋企無 BBQ 麥糖   所以用咗麥芽糖   但覺得有無麥芽糖都無乜分別   可能我落得少呀 ~

瑤柱蒸節瓜 - 見到節瓜回落 $6 斤先買咋   $16 斤我唔會買囉   呢個餸係我第一次整咋   我覺得好好食呀   其實我唔鍾意食節瓜整嘅餸   但節瓜湯嘅節瓜又會食㗎喎   不過今次我真係覺得好好食   所以會再整   話哂健康餸嘛 ~

蒜粒炒飯 - 好耐無炒飯   仲諗住用絲苗米會炒到粒粒分明   但都唔得嘅 ~

釀青椒 + 灼菠菜 + 花旗參雪耳瘦肉湯 ( 17-APR-2011 )

( 17-APR-2011  SUN )

今朝瞓到 11 點先起身呀   所以又番唔到教會   同里奧大人食完早餐   我就去街市買餸喇 ~ 

番到屋企就熨衫   拖地   煲湯   話咁快就 1 點半   沖個涼 Hea 下等食 Tea ~

里奧大人好想食餃子   所以 3 點先出發   因為呢間餃子店係 3 點先做下午茶呢 ~ 

無啦啦超大雨   個天又突然黑哂   不過落咗雨都好   無咁焗呀 ~

太晏先食 Tea   所以 8 點先開飯   平時又唔覺好晏   但覺得假期 8 點開飯又好晏咁喎 ~ 

是日晚餐 - 釀青椒 + 灼菠菜 + 花旗參雪耳瘦肉湯

釀青椒 - 跟 小菲菲俠 學㗎   咁啱喺街市見到呢啲青椒   所以買嚟整   我覺得細細隻好易釀呀 ~

灼菠菜 - 攰呀   唔想再炒   就咁淥就算 ~

花旗參雪耳瘦肉湯 - 第一次煲呢個湯   因為醫師叫我煲   好似話面色會好啲 ~  

源發潮州粉麵 @ 九龍灣 ( 16-APR-2011 )

蠔仔肉碎粥 / 紫菜四寶 / 韭菜豬紅豬腸

( 16-APR-2011  SAT )

今朝食早餐   見個張香煙價錢表   有隻中華香煙   一包 $58   我以為自己睇錯呀   $58一包煙   真係仲貴過我一星期嘅車錢呀 ~

番到菇場仲諗住做下功課   點知無啦啦多嘢做   真係人算不如天算咯 ~ 

放工去睇中醫   之後同里奧大人去飲茶 ~

海蜇 / 叉燒包 / 羅漢齋腸粉 / 紅油抄手 / 燒鴨湯檬

番到屋企煲藥   執下屋   呢日好焗呀   終於要開冷氣   唔係暈都似 ~

今晚 5 點 35 分去影藝睇 "趙氏孤兒"   初初諗住好悶   估唔到好好睇喎   兩個鐘頭好快就過   同埋大陸演員真係做得好好好好   特別係啲內心戲   真係令到妳好投入去睇   正呀 ~

次次飲完茶都無咁快餓   所以同里奧大人番屋企 Hea 陣   再出去食飯   諗住食小菜   點知要排隊   所以即轉場 lu ~

鴻星海鮮酒家 @ 九龍灣 ( 15-APR-2011 )

北京黃金鴨 (二食) - 片黃金鴨 /豉味燜鴨架 / 上湯焗波士頓龍蝦 (伊麵底) / 蝦子柚皮 / 綠豆沙



( 15-APR-2011  FRI )

今朝去完大快活食早餐   隔離班師奶又喺度大大聲傾偈   七咀八舌   仲諗住慢慢嘆份早餐添 ~

食完就去 Shopping 喇   幫菇場入貨真係好鬼開心   因為我真係唔睇錢買嘢   最緊要係買到要買嘅嘢就得啦 ~

不過今朝好鬼焗咁呀   真係行到出汗   好在無乜太陽   唔係就慘   因為行番去菇場係無瓦遮頭嘛 ~ 

晏晝有 Lunch Box   諗住食完瞓一陣   但又係瞓唔到 ~

今晚家姐請去鴻星食飯呀   所以同埋媽咪 工人 里奧大人一齊去喇   不過鴻星啲服務態度真係超級十分無敵勁衰囉   無啲禮貌   唔會再幫襯佢呀 ~

送埋媽咪坐車就陪家姐買衫   再送埋佢坐車   我就番屋企喇 ~ 

泡菜炒豬肉 + 炒菜心苗 + 粟米素翅蛋花湯 ( 14-APR-2011 )

( 14-APR-2011  THU )

今朝食早餐嘅時候   我同事突然間過嚟   同我一齊食早餐   好開心呀   因為我覺得同同事一齊食早餐食好開心呢 ~

同同事一齊入菇場   我同事負責按密碼   我就開門   但我一開門見菇場好暗   原來係大廈無電   好在我同同事早一步番到咋   唔係可能會困 Lift   好在菇場有冷氣   唔係焗暈都似   差唔多 10 點 20 分就恢復電力喇   感恩 ~

晏晝買 Big Mac   其實我唔想食面頭塊包㗎   唔食又好浪費咁   但食完又好鬼滯喎   同埋啲洋蔥呢   食完個口一陣洋蔥味咁   要食幾粒香口膠先無味咋 ~

今晚煮飯喇   差唔多10 日無煮   唔想比自己咁懶呀 ~

是日晚餐 - 泡菜炒豬肉 + 炒菜心苗 + 粟米素翅蛋花湯

泡菜炒豬肉 - 之前喺 Piago 買   細細盒唔錯   但里奧大人話好辣   無鬼用   仲有盒都唔知點整好添 ~

炒菜心苗 - 本來想買小棠菜   但又無喎   所以買 2 Pack 菜心苗算喇 ~

粟米素翅蛋花湯 - 上次飲完蘑菇素翅湯之後   覺得加咗素翅都幾好味   多份口感嘛   所以今次喺惠康買咗 Pack 台灣素翅 ($39.9)  有排食呀 ~

之前我買咗雪糕筒   所以今晚又引到家姐嚟食雪糕   其實我鍾意食雪糕筒   不過里奧大人唔鍾意   我一個人又食唔得咁多   依家就好喇   可以同家姐一齊食   唔駛又食嘢食到驚呢 ~

大家樂 @ 九龍城 ( 13-APR-2011 )

( 13-APR-2011  WED )

今朝食粟米包   呢刻真係覺得幾好味呢 ~

天氣一熱呢   菇場就會特別凍咁   飲好多熱水都覺得好凍 ~

晏晝有 Lunch Box   食完其實想瞓   但又瞓唔到喎 ~

無嘢做就等放工啦   今晚另一位同學要 OT   所以我哋食飯要快呀   所以大食表妹話去大家樂喎   因為快啲食完快啲番學校霸位呢 ~

其實之前諗住同大食表妹一齊番學嘅原因   係如果邊個無番學   咁對方都可以 Take Notes   但依家我又覺得原來唔係咁需要   同埋我真係覺得佢好鬼煩   成日來來去去講嗰啲   所以我一諗番學第一件事就係要同佢食飯就好慘   但佢又話知我一個人食   所以嚟陪我喎   咁直接話唔同佢食   又好似好衰咁 ~

海景粥店 @ 九龍灣 ( 12-APR-2011 )

炒麵併炒米粉 / 皮蛋艇仔粥 / 肉丁火腿蝦仁炒飯

( 12-APR-2011  TUE )

里奧大人前日話條腰好緊   諗住扭下腰   扭鬆啲筋   點知呢   應該扭傷咗啦   尋日痛到要慢慢行   又要貼撒隆巴斯   我又幫佢輕輕按下腰   好啲咁囉   所以今日都唔敢上大陸喇   因為啲路好 "鄧" 呀 ~

今朝好鬼大風呀   簡直有啲凍呀   我又懶得着褸   所以去食麥記食早餐   飲咗杯熱咖啡   個人暖啲嘛 ~

我發覺次次食親早餐就會諗   不如下次自己整   但次次到最後都無咗件事呢   因為諗諗下都唔想次次假期朝早就做嘢呀 ~ 

菇場有啲嘢做咁啦   又執下 Tray   但其實真係無嘢好執   因為我不嬲都會將啲文件放得整整齊齊   我好難接受到啲同事枱面好似打風咁   不過我以前公司老闆講過   話所有同事放工前   一定要枱面嘅文件整整齊齊   咁人哋嚟到都好睇啲喎   咁又係嘅   自己搵嘢都方便啲啦 ~

晏晝有 Lunch Box 喇   就係尋晚食剩嘅黑椒雞飯   超好味呀 ~

食完飯覺得非常之唔舒服呀   係咪流鼻水   應該作感冒   即刻飲杯 Hot Lemon   之後再食兩粒傷風丸   叫做好啲咁啦 ~

本來想煮飯   但都係唔喇   休息下好過 ~

今晚清清哋   所以同里奧大人去食粥   佢就食飯囉   佢知我感冒   所以買咗兩個木瓜比我食   話食木瓜會快啲好   咁又係   有次過年又感冒   食咗一大個木瓜就好番   真係有料到 ~

ME.N.U @ 九龍灣 ( 11-APR-2011 )

金素翅蘑菇忌廉湯 - 好濃蘑菇味呀   加咗啲素翅又唔錯喎   里奧大人唔鍾意飲都飲哂

繽紛嘉年華薄餅 - 里奧大人一見到啲沙律醬就話好漏好漏   非常之煩呀   唔好食都唔好成日講嘛   影響人哋

黑椒汁雞扒石鍋飯 - 我好飽呀   所以無食   里奧大人就食咗少少   咁我唯有做 Lunch Box 啦
燒雞全翼 - 無咩特別   但里奧大人話好食   食肉獸真係食肉獸

( 11-APR-2011  MON )

今朝超攰呀   如果每逢星期一番 11 點就好喇 ~ 

早餐食腿蛋治   好耐無食喇   突然覺得好大件咁 ~

星期一嘅菇場特別寧靜   意志力唔夠真係會瞓着架 ~

晏晝同 8 卦出去食   傾下偈無咁悶   不過佢食嘢真係好快   搞到我又要食得好快 ~

今晚都係唔煮喇   比自己再抖多晚   所以同里奧大人去 ME.N.U 食 Pizza 算喇 ~

板長壽司 @ 九龍灣 ( 10-APR-2011 )

( 10-APR-2011  SUN )

今朝同里奧大人一齊 10 點起咗身   食完早餐就去 Piago 買廁紙呀   因為要喺 1 點前買先有特價 ~

今次戰利品就係 4 條皇冠 (12卷) 廁紙   每條都係 $33.9 咋   藥房都要 $39 啦   里奧大人問駛唔駛買多兩條   其實好想㗎   不過諗諗下都係唔好   要忍手   我以前買廁紙係一買就買 10 條㗎   之後就 6 條   到依家嘅 4 條   我覺得自己進步咗好多喇   所以好多人成日問我係咪住村屋   定係屋企附近無超市咁囉 ~

放下心頭大石喇   不過個人其實唔多舒服   番到屋企有啲虛脫咁呀   所以無番教會喇 ~

沖完靚涼就舒服好多喇   之後家姐打嚟約食 Tea   順便上嚟屋企坐下   打下機   食下雪糕 ~

我都無咩胃口   同家姐 Share 一個 Tea Set 算喇   最後家姐番屋企拎嘢   夜晚再嚟同我哋食晚飯 ~

家姐鍾意食壽司   所以同佢食板長啦   反正依家板長又唔駛等位   又近   都唔錯呢 ~

板長壽司 @ 九龍灣 ( 7-APR-2011 ) + ( 8-APR-2011 ) + ( 9-APR-2011 )

黃旗吞拿魚 ($8/件) / 帆立貝壽司 ($12/件) / 安康魚肝壽司 ($8/件) / 蔥粒吞拿魚腩軍艦 ($10/件) / 三文魚醬油漬壽司 ($6/件) / 稻燒宮城海鰻 ($8/件) / 三文魚壽司 ($6/件) / 九洲雞窩壽司定食 ($55)

( 7-APR-2011  THU )

星期四喇   今朝心情都好好呀   食乜都好開心咁呢 ~

菇場靜啦   不過都無乜所謂 lu   反正都慣哂   如果太嘈覺得唔慣添呀 ~

晏晝食兩餸飯   依家無啦啦又鍾意食煙鴨胸   覺得無食豬肉咁滯咁囉 ~

今晚送床褥呀   所以想煮又唔想煮   但里奧大人話 Lunch 食剩大半盒炒飯   就咁食炒飯算喎   但後尾佢打嚟話好想食壽司   所以叫我都唔駛煮   不過我覺得佢其實係唔想我煮多啲呢   哈哈 ~

今晚估到會每月一到   所以睇定醫生   攞定醫生紙   就算無唔舒服   啲藥都可以留番嘛 ~

( 8-APR-2011  FRI )

呵呵   每月一到喇   今朝只係有啲想嘔   但無痛喎   不過驚晏啲會肚痛   所以都喺請病假喺屋企休息 ~

晏晝真係開始痛喎   不過真係無上個月痛得咁犀利   我覺得中藥真係有啲效囉 ~

呢日又係無胃口食嘢   超攰呀   瞓咗成日腰骨都痛埋 ~   

( 9-APR-2011  SAT )

尋晚個肚係咁打鼓   諗住今朝有胃口食早餐添   不過都係唔想食嘢   買兩杯熱菜蜜番菇場做早餐算喇 ~ 

個肚有少少唔舒服   不過好感恩係老闆 Off   所以我就瞓喇   真係差唔多瞓到 12 點先醒呢 ~

放工即番屋企喇   里奧大人就約咗朋友出去飲茶傾偈   仲會食埋晚飯先番屋企   我就喺屋企休息算喇   瞓咗兩個鐘晏覺   超舒服呀 ~

頭先發夢里奧大人話番屋企陪我食晚飯   醒嘅時候見書房燈開咗   仲以為里奧大人真係番嚟添   原來唔係嘅 ~

終於有胃口喇   焗米粉食算喇   懶得開爐 ~

睇下電視又瞓下   7 點幾又開始餓喇   食個辛辣麵   唔想食咁辣  所以落咗好少辣椒粉   唔辣真係唔好食囉   之後里奧大人打嚟問我食咩生果   然後話番嚟同我食飯   咁咪夢想成真   不過太遲啦   我已經食飽   我叫佢自己買嘢番屋企食算喇 ~ 

滇品．米線 @ 九龍城 ( 6-APR-2011 )

( 6-APR-2011  WED ) ~

攰到爆炸呀   過咗時間瞓就好難瞓到   慘呀 ~  

胃口都無乜呀   個菠蘿包都食唔哂   不過真係唔想夾硬食囉 ~

番到菇場仲慘   靜到呢   我好想瞓呀 ~

晏晝有 Farewell Lunch 呀   但我星期一又收唔到 Email   所以帶咗 Lunch Box   不過唔理 lu   梗係食 Free Llunch 啦   食到 2 點先走   爽呀 ~ 

真係超級攰呀   但今晚又要番學   都唔想諗食咩   所以同大食表妹又去番食米線算喇 ~

海港酒家 @ 將軍澳 ( 5-APR-2011 )

泰醬脆蝦球 (唔記得咩名) / 口水雞 / 醬汁骨 (唔記得咩名) / 窩蛋牛肉飯 / 響鈴 / 水餃 / 炸魚皮 / 炸魚腐 / 鮮腐竹 / 鮮冬菇 / 秀珍菇 / 雜菜 / 豬骨湯底

( 5-APR-2011  TUE )

今朝同里奧大人瞓到 10 點半先醒   咁我話喺屋企煮丁丁   唔想又去大快活呀 ~

食完早餐就執屋   里奧大人就主動熨衫   之後佢去剪髮   我就拖地喇 ~

晏晝同埋家姐一齊去海寶漁港飲茶   點知佢哋 Skip 咗我張飛   不過錯有錯着   我咃唔駛同人搭枱   哈哈 ~

叉燒酥 / 紅油抄手 / 蔥花炸兩 / 山竹牛肉球 / 帶子炸雲吞 / 瑤柱素餃 / 黑椒蒸鳳爪 / 鳳爪排骨飯 / 京蔥炸大腸

食完家姐話不如去里奧大人姐夫屋企打牌   估唔到佢姐夫咁啱得閒喎   平時佢假期都番工嘛   難得即興約到   我哋飲完茶就去打牌 lu ~

因為晴晴要測驗   所以我哋租 Club House 麻將房   $25/Hour   我哋 4 點打到 9 點   之後去海港食晚飯   打邊爐同埋食小菜   我哋個個都覺得今晚勁似星期六咁   聽日唔駛番工咁呀   因為平日好少會咁夜一齊食飯呢 ~
 
番到屋企 11 點半   沖埋涼   差唔多 12 點幾先瞓   如果聽日真係唔駛番工就好啦 ~  

住家飯 @ 姑奶屋企 (官塘) ( 4-APR-2011 )

( 4-ARP-2011  MON )

今日雖然係星期一   但聽日有假放   所以勁有 Holiday Mood 呀 ~ 

早餐食早餐嘅時候   坐我對面位阿叔見我影相   當我差唔多走時   佢無啦啦同我講話用單鏡反光先影得靚   又咁又咁   我話我純粹係玩啫   無理由日日為咗影份早餐已揹大機囉   傾多兩句我都走喇   佢又話單鏡反光先影得好   我同佢講   我鍾意傻瓜機夠方便呀 ~

番到菇場就更加有 Holiday Mood 添呀   又無嘢做喎   等到 Lunch Time 即開飯 lu   一叮個 Lunch Box   好香蒜蓉味呀 ~  

放工去旺角睇中醫   今次好多人睇   約咗 6 點   點知 6 點 45 分先有得睇 ~

睇完就同里奧大人一齊去姑奶屋企食飯   差唔多 9 點就走喇   趕住番屋企煲中藥呀 ~ 

里奧大人好主動話幫我煲中藥   咁當然好啦   但佢整到鋅盤塞咗   點解咁㗎   我真係唔想再比佢入廚房整嘢呀   次次都整樣嘢我嘆嘅 ~ 

蒜泥白肉 + 炒菜心 + 淮山圓肉杞子瘦肉湯 ( 3-APR-2011 )

( 3-APR-2011  SUN )

超好瞓呀   所以晏咗起身無到番教會呢   又去大快活食早餐   無計啦   佢到 11 點半都仲有早餐食嘛 ~

3 年前覺得床褥太硬   瞓到腰骨痛   要里奧大人換張比較 "林" 身嘅   依家又覺得張床褥好似好 "林"   瞓到腰骨痛   所以又要里奧大人買番張硬嘅   好在佢肯買咋   今次買嘅係五段式床褥   希望舒服啦 ~

番到屋企就煲雪梨茶   之後就熨衫   洗衫   做家務   執屋   無停過呀   屋企乾淨整齊就最舒服   不過唔知點解執極都唔完咁   實在太多嘢啦 ~

差唔多 3 點就出發食 Tea 喇   今次我想食餃子   真係非常感恩喇   因為下午茶原來係 3 點先開始呢 ~

有個小朋友唔小心倒瀉杯水   個大人叫個待應比塊布   佢就即刻幫個小朋友抹呀抹   我覺得超嘔心囉   塊千年抹枱布嚟㗎   真係抹完仲污糟過唔抹呢 ~

買完茶包再去買相機電池   首先去百老滙睇   原裝電池 $300  備用電 $100   中原話呢個電池唔會再出   通行都無   豐澤話得備用電 $180   最後去番百老滙買原裝電池啦   都係百老滙穩陣啲  其實我最憎豐澤   因為之前里奧大人趕住買 Laptop   咁得佢地有   所以買啦   又話送電腦袋   點知拎完部 Laptop   之後又話電腦袋未有貨   話一星期後有   之後又無   差唔多個幾月先有   對佢無哂誠信啦 ~

買完嘢就去超市買餸   撞正 95 折   又買咗 6 罐粟米番屋企   之後乜都買啲咁   重到呢   個 Cashier 都話好重   叫我小心啲 ~

抖多陣就要 Ready 煮飯喇   呢排對煮飯好有興趣呢   哈哈 ~

是日懶餐 - 蒜泥白肉 + 炒菜心 + 淮山圓肉杞子瘦肉湯

蒜泥白肉 - 問里奧大人想食清淡嘅梅菜蒸鯇魚定係惹味嘅蒜泥白肉   佢話要惹味喎   咁就整啦   唔係一陣又話我又比佢揀   但最後都係無得揀 ~

炒菜心 - 本來想買唐生菜架   不過唔靚   所以唔買 lu ~

淮山圓肉杞子瘦肉湯 - 醫師叫我滾呢個湯   咁面色都會好啲呢  希望如此 ~

鐵匠 + 金滿堂甜品 @ 九龍灣 ( 2-APR-2011 )

鐵匠卷 / 咖哩豬扒定食 (中華沙律 + 麵豉湯) / 秘制醬汁豚肉麻辣手打烏冬
黑馬王子 / 椰汁香芒清心丸 / 芒果黑糯米

( 2-APR-2011  SAT )

今朝要番工   諗住 2 點先食 Lunch   所以食豐富啲   不過唔知點解又無咩胃口   都食唔哂個早餐   仲覺得食完好滯添 ~ 

番到菇場同 8 啩 M 下咁囉   又無乜嘢做   真係好羨慕啲人星期六唔駛番工呢 ~

終於放工喇   里奧大人約咗朋友傾嘢   所以我就約媽咪 家姐食 Lunch   今次去新都城嘅 Saizeriya   慢慢食慢慢傾   坐到差唔多 3 點就走喇 ~

家姐車咗媽咪番屋企   我就去家姐屋企 Hea 下   同埋要教佢工人煲雪梨茶   之後我又按摩   玩下狗仔   影下相   傾下偈   食下嘢    話咁快就 6 點   又去接媽咪去食晚飯 lu ~

里奧大人都 Join 埋一齊食晚飯   食飯嘅時候傾開細個啲嘢   我對家姐真係好好呢   細細個成日請佢食嘢㗎   所以無錢剩   家姐就會儲埋啲錢   咁當佢儲到咁上下   我就會話一齊儲   之後就 Share 番啲錢   佢話我試過兩次係咁喎   其實好唔想同我一齊儲   不過最後都應承   佢又會咁傻嘅 ~

其實細過真係成日蝦家姐㗎   最印象深刻係佢喺幼稚園幫我排隊玩單車   之後佢想玩   我一句唔得   佢個樣好慘咁行開   到依家我都仲記得啊   真係好鬼衰呢   家姐又係嘅   同我爭嘛   唔駛我細細過就咁霸道嘛   哈哈哈哈 ~ 

食完再食甜品   好開心好滿足呀   最鍾意 4 個人一齊食嘢傾偈呢 ~

食完就同里奧大人去 Market Place   因為之前買咗隻茶包好飲   咁行咗幾間超市都無   所以去 MP 睇下   估唔到真係喺 MP 買嘅呢   之後經過戲院睇下有乜戲好睇   見到張 Poster 隻狗超樣衰   但我覺得佢啲牙仔好得意   同埋依家玩緊 Angry Bird   覺得佢哋啲公仔好得意呀 ~

嘉華大酒樓 @ 官塘 ( 1-APR-2011 )

菠蘿生炒骨 (另外加) - 估唔到個賣相唔錯之餘   仲好好味喎   排骨唔係肥豬肉   炸粉又唔厚   真係有驚喜喇 

(餐) 例牌乳豬 (唔要燒味雙拚   改為加 $40 轉乳豬) - 新鮮出爐超好味   我真係可以食好多皮㗎   肉就唔多 Like   比哂里奧大人食   佢鍾意食肉嘛

(餐) 清蒸海上鮮 (紅鮋) - 我鍾意出街食蒸魚   因為好鍾意啲豉油同蔥花呀

(餐) 椒絲腐乳炒通菜- 我覺得份量好多呀   同埋啲醬汁都好多   有啲好少醬汁咋   好似就咁炒通菜咁

(餐) 魚香茄子煲- 好惹味   不過好油囉 
(餐) 老火湯 (西洋菜陳腎生魚豬骨湯 ) - 好飲呀   最怕飲啲味道淡如水嘅湯呢

藍妹啤酒  - 食中菜飲啤酒   勁有麻甩佬 Feel 呀  哈哈哈哈

( 1-APR-2011  FRI )

終於 Happy Friday 喇   今日心情超振奮呀 ~

今朝食粟米蟹柳包   好 Colorful 呀   睇見都好開心呢 ~

做咗少少嘢就無嘢做 lu   等到 Lunch Time   今日有 Lunch Box   我鍾意食肉醬意粉嘅時候   加黑椒同 Tabasco   咁樣超好味 ~

等呀等   又終於等到放工 lu   今晚好開心   因為同媽咪 里奧大人一齊食晚飯   因為我覺得個餐好抵囉   1 湯 4 餸都係 $218   可惜家姐約咗朋友去街   唔係一齊食仲開心呢 ~