海景粥店 @ 九龍灣 ( 12-APR-2011 )

炒麵併炒米粉 / 皮蛋艇仔粥 / 肉丁火腿蝦仁炒飯

( 12-APR-2011  TUE )

里奧大人前日話條腰好緊   諗住扭下腰   扭鬆啲筋   點知呢   應該扭傷咗啦   尋日痛到要慢慢行   又要貼撒隆巴斯   我又幫佢輕輕按下腰   好啲咁囉   所以今日都唔敢上大陸喇   因為啲路好 "鄧" 呀 ~

今朝好鬼大風呀   簡直有啲凍呀   我又懶得着褸   所以去食麥記食早餐   飲咗杯熱咖啡   個人暖啲嘛 ~

我發覺次次食親早餐就會諗   不如下次自己整   但次次到最後都無咗件事呢   因為諗諗下都唔想次次假期朝早就做嘢呀 ~ 

菇場有啲嘢做咁啦   又執下 Tray   但其實真係無嘢好執   因為我不嬲都會將啲文件放得整整齊齊   我好難接受到啲同事枱面好似打風咁   不過我以前公司老闆講過   話所有同事放工前   一定要枱面嘅文件整整齊齊   咁人哋嚟到都好睇啲喎   咁又係嘅   自己搵嘢都方便啲啦 ~

晏晝有 Lunch Box 喇   就係尋晚食剩嘅黑椒雞飯   超好味呀 ~

食完飯覺得非常之唔舒服呀   係咪流鼻水   應該作感冒   即刻飲杯 Hot Lemon   之後再食兩粒傷風丸   叫做好啲咁啦 ~

本來想煮飯   但都係唔喇   休息下好過 ~

今晚清清哋   所以同里奧大人去食粥   佢就食飯囉   佢知我感冒   所以買咗兩個木瓜比我食   話食木瓜會快啲好   咁又係   有次過年又感冒   食咗一大個木瓜就好番   真係有料到 ~