梅菜蒸鯇魚 + 沙爹醬炒唐生菜 ( 31-OCT-2011 )

( 31-OCT-2011  MON )

星期一喇又   又係美好開始   今日天氣非常之好   有風有太陽又唔乾燥   真係好想行山呀 ~

早餐食芝腿治烘底   今次烘得好靚呀   平時好似求其烘咁呢 ~

依家多數 9 點前番菇場   真係唔想成日遲到   咁樣準時走都無咁異相嘛 ~

晏晝食 Special K + 高鈣脫脂奶   估唔到都夠飽   都唔錯   唔想自己咁大食呀 ~

放工去超市買餸   因為要清咗包 Oreo 餅底   所以整  New York Cheese Cake   惠康得酸忌廉   但又無 Cream Cheese   所以我又要去百佳買   計落條數買材料嘅錢仲費過我上次喺太子酒店買嘅 Blueberry Cheese Cake   好記 3 年前先開始對煮嘢食有興趣   買嘅價錢同今時今日嘅價錢係貴咗一陪   有啲唔止添呢   我買 Unsalt Butter 係 $19.9   之後睇住佢加   加到依家好似接近 $40   所以我次次焗嘢失敗就會好心痛囉 ~ 

是日懶餐 - 梅菜蒸鯇魚 + 沙爹醬炒唐生菜

梅菜蒸鯇魚 - 我想里奧大人食多啲魚   所以又整呢個餸喇   希望之後自己可以蒸冰鮮魚啦   唔駛咁悶嘛   但一諗到要全接觸條魚   我就好唔想買   好唔想食囉 ~ 

沙爹醬炒唐生菜 - 蘸印尼沙爹醬食唔錯   其實我想用蒜蓉炒   不過唔夠時間切蒜蓉呢 ~

食完飯就即浪衫   里奧大人話日日見我開機洗嘢咁喎   不過真係唔知點解我都覺好多嘢洗咁   搞到我又要密密熨   同埋里奧大人成日拎完啲衫出嚟又唔着   之後又唔擺番入去   再之後又唔知自己有無着到   所以又要洗   我咪話要有手尾先得架   熨一件衫唔少時間嘛   真係吖 ~

洗好哂碗就專心焗蛋糕喇   今次將所有材料放哂喺碗度   逐步遂步咁跟食譜   因為我次次焗嘢都係邊睇邊拎邊磅   所以啲 Step 會亂咗   今次整比家姐食   所以想做好啲   一路焗仲一路睇住   焗第 2 次嘅時候   我就去沖涼   一路沖涼一路聞到好香嘅蛋糕味呀 ~

今次焗蛋糕連埋預備同洗嘢   好似用咗個半鐘   都算快架喇   焗完出嚟都幾靚仔   放涼後放入雪櫃   留番聽晚食   希望好食啦 ~   

電視又無嘢睇   所以我又抹梳化   里奧大人笑笑話尋晚見妳抹完今日又抹嘅   我話無鐘點嘅日子   我都要保持屋企乾乾淨淨呢 ~  

自家製 New York Cheese Cake ( 31-OCT-2011 )

( 31-OCT-2011 MON )

因為要清咗包 Oreo 餅底   所以想整 Cheese Cake 喇   其實想掉咗去算   因為都係 $20   同埋依家買料都唔平   Cream Cheese $33.9   Sour Cream $14.9   一陣失敗會發顛囉   但包餅底又未開過   就咁掉好似好折墮咁 ~

今次真係好有決心整㗎   去完惠康又去百佳買材料   點知番到屋企先知無哂沙糖   因為我依家係用黃糖煮嘢   所以我又要再落去惠康買過 ~

我平時好少用打蛋器   因為要洗多樣嘢   同埋啲d Cream 成日打到飛哂出嚟   可能用嘅器皿唔啱   今次用 Ikea 買嘅 Stainless Steel 煲嚟整   無飛出嚟呀   所以好開心   咁我第時都會用打蛋器   因為打得軟滑啲嘛   同埋真係無咁攰囉 ~

今次按哂 Step 咁做   同埋一路焗一路睇住個火   因為真係好驚燶浪費心機嘛   同埋今次整比家姐同佢啲同事食   所以責任比較大 ~

焗完出嚟再查 Cream Cheese   不過查得好樣衰囉 ~ 

放涼就擺入雪櫃焗一晚   任務完成   好開心同好期待呀 ~

大快活 @ 九龍灣 ( 30-OCT-2011 )

( 30-OCT-2011  SUN )

我次次如果一覺瞓到 7-8 個鐘   中途無醒嘅話   咁樣之後起身再瞓番   就好難瞓得着   就係因為咁   今朝 7 點 45 分已經醒咗喇   但又喺度諗   難得星期日可以瞓晏啲   不如瞓多陣啦   不過瞓極都瞓唔到   終於 8 點 15 分 起身喇   費事郁嚟郁去整到里奧大人無覺好瞓 ~

依家鐘點唔嚟   所以我就諗定點樣執屋   因為唔想一次過咁辛苦做哂   但做開又想即刻樣樣都做哂架喎 ~ 

早餐又未食   唔可以做啲太粗重嘅嘢呢   所以就抹鞋櫃喇   里奧大人好煩㗎   次次我一買鞋就話呢對唔見我着   呢對又無着過咁   所以襯佢瞓覺就順便掉咗唔想要嘅鞋喇 ~

佢 10 就起身喇   一齊去太興食早餐   諗住影相嘅時候   相機個屏幕無畫面   但有啲模式又影到   但我用開嘅模式又影唔到喎   雖然我部機都用咗差唔多 3 年   已我都好想換機   不過一諗到部機無壞   又唔想買新囉   但我慣咗影相   所以同里奧大人講話要即刻買機呀   買 G12 算   平平哋玩下   但佢又話 S95 好啲   因為 Configure 好啲喎   但我鍾意 G12 機款   因為 S95 同我部差唔多款   買得新機更想轉下款家嘛   不過依家 S95 應該好平   咁又幾抵玩嘅 ~

食完就番教會喇   之後去德福行一陣   行下行下都差唔多 2 點 lu   所以就去大快活食 Tea 喇 ~

里奧大人番到屋企又做公司嘢   我就幫佢煲中藥   之後開機洗窗簾   難得有陽光   之後就抹睡房   熨衫   超攰呀 ~  

今晚又會去大快活   因為我想打邊爐呀   里奧大人又唔打   所以去大快活就最好   你食你嘅嘢   我食我嘅嘢 ~ 

食完去買鞋   因為見里奧大人着對 Cross 好舒服咁   所以我又買對喇   之後佢就話咩都跟佢   咁又係喎   佢買咩我又想買㗎喎 ~

番到屋企抖陣   里奧大人就話出去徑步   我唔去啦   因為之前睇過環境   附近有條渠好鬼臭囉   我話你再聞下臭唔臭先   唔臭我都會去跑呢   佢跑咗 20 分鐘就番嚟   話落雨   同埋話條渠唔臭喎   下次一齊跑呢 ~    

豉汁排骨雙腸煲仔飯 + ABC 雜菜湯 + 雪梨茶 ( 29-OCT-2011 )

( 29-OCT-2011  SAT )

今朝要拎中藥比家姐   家姐咁啱又要覆診   所以一齊食埋早餐喇   我食牛扒好鍾意食牛筋   家姐話同媽咪食牛扒見到牛筋嘅時候   就會第一時間諗起我呢 ~

番到菇場當然無 Mood 做嘢啦   明明諗住上網睇報紙   點知突然有嘢做喎 ~

家姐覆完診就去我屋企坐陣   等埋我放工食 Tea   但我要陪里奧大人睇中醫   估唔到佢又陪埋里奧大人一齊過嚟   咁仲好   唔駛再約嚟約去 ~ 

經過美心就入去睇下有咩食   好耐無去美心食 Tea   見到啲 Tea 都幾吸引   所以食埋先番屋企   不過 Tea 嘅份量係好細   但張相嘅份量係好大囉   呃人嘅 ~

食完同家姐去惠康買嘢   次次同佢去超市都一袋二袋   佢話如果住附近   成日一齊買嘢就慘喇   我話如果住附近嘅話   樣樣買一份 Share 就搞掂啦   唔駛樣樣買兩份   同埋佢依家好鍾意買嘢食放喺我屋企   之後上嚟一齊食囉 ~

家姐差唔多 4 點幾就走喇   我就幫里奧大人煲中藥   又煲雪梨茶   又熨衫拖地   超充實呀 ~  
   
是日懶餐 - 豉汁排骨雙腸煲仔飯 + ABC 雜菜湯 + 雪梨茶

豉汁排骨雙腸煲仔飯 - 唔知煮咩好   唯有煮我認為完全無難度嘅蒸排骨啦   今次又扮煲仔飯   不過其實係假煲   因為我只用將煲好嘅飯放喺煲仔度   再將蒸好嘅豆樣排骨同雙腸放喺飯面   里奧大人笑住話 A 貨   問我點解唔整真正嘅煲仔飯   我話我只識 A 貨咋   同埋 A 貨製作唔簡單㗎   又要預備多個煲仔   又要擺啲餸上去   用唔少時間㗎 ~

ABC 雜菜湯 - 本來想整粟米湯   不過驚太飽肚   同埋豉汁比較鹹   所以都係想飲啲酸酸哋嘅湯呀 ~   

雪梨茶 - 天氣乾燥   超市買鴨梨又平   $8.8/5 個咋   所以買嚟煲雪梨茶呢 ~

脆肉瓜什錦鍋 ( 28-OCT-2011 )

( 28-OCT-2011  FRI )

Happy Friday 喇   早餐食豐富啲   因為依家開始減肥   咁晏晝同夜晚就食少同清啲咁呢 ~

番到菇場有少少嘢做咁啦   話咁快就搞掂   又係時候等 Lunch Time 喇 ~

晏晝食 Special K + 高鈣脫脂奶   其實我超唔鍾意飲鮮奶   好羶咁   同埋之前飲十字牌盒裝鮮奶   飲咗 2 啖皮膚即刻起紅點敏感呀   好鬼驚囉   今次飲高鈣脫脂奶仲難飲   同鮮奶味道唔同   又無咁滑   都係買番正常嘅高鈣低脂奶算喇 ~

放工去拎藥   之後再去街市買餸   再去惠康買生果就番屋企喇 ~

番到屋企飲咗碗中藥   所以唔係咁餓   咁等埋里奧大人番嚟先一齊食   所以差唔多 10 點先開餐呢   好在今餐唔係啖啖肉   唔係肯定食唔落呀 ~

是日懶餐 - 脆肉瓜什錦鍋

脆肉瓜什錦鍋 - 材料有脆肉瓜 + 魚蛋 + 炸豆腐 + 灣仔碼頭韭菜豬肉水餃   我用紅衫魚湯煮哂所有嘢   之後再用沙爹王嘅 XO 沙爹醬嚟炒   又幾好味噃 ~  

住家飯 @ 媽咪屋企 ( 27-OCT-2011 )

陳皮蒸泥猛 - 我同家姐都鍾意食 "鞋" 身嘅魚   唔鍾意食滑嘟嘟嘅魚   今次呢啲大泥猛就好喇   因為唔係滑嘟嘟嘛   但媽咪就鍾意食滑嘟嘟嘅魚囉

栗子燜豬手 - 好入味呀   不過好驚食豬手囉


炒菜心 - 無特別   不過晚飯一定要有菜囉

燒鵝 / 叉燒 (外賣) - 媽咪話驚唔夠時間煮多樣餸   所以就買燒味喇 


蓮藕栗子豬展湯 - 好鮮甜呀   一飲就知道用足料嚟煲呢  

( 27-OCT-2011  THU )

今朝又忍唔住再打去九巴熱線投訴呀   之前架車係 805 到站   咁尋朝架車就 802 到咗   不過我要等過馬路   所以送車尾   咁今朝就 800 到   咁預早 5 分鐘就最穩陣啦   點知架車 812 到   咁即係點呀   啲時間咁唔穩定嘅   妳估係自己車鍾意幾時開就幾時開呀   番工時間嚟家嘛   離哂大譜   我話上次投訴咗都仲未有人覆我呀   佢話報告未番   我話都好耐喇噃   之後佢話幫我跟跟 ~

食早餐嘅時候   8 卦走嚟叫我   咁就一齊食啦   我咁啱又食唔哂塊麵包   比埋佢食   我就唔駛浪費啦 ~

菇場有啲忙   但就唔駛急住做囉 ~   

Lunch 食低糖拿破崙   我好少 Lunch 食呢啲甜嘢   不過里奧大人又唔想食咁   唯有自己食囉 ~

放工去拎藥   之後番媽咪屋企食飯   今晚唔知點解突然之間好攰   食完好想瞓覺   次次去媽咪屋企食飯都好飽   今晚飽到連生果都唔食喇 ~

8 點半就同家姐一齊走 lu   打比里奧大人   佢啱啱放工   喺深圳番到屋企到差唔多 10 點 ~

番到屋企即沖涼   之後熨衫   鐘點依家唔嚟㗎喇   所以好多嘢都會自己做番   好彩我都唔抗拒做家務   因為我鍾意屋企乾淨整齊嘛 ~

依家如果時間許可   我都會煮嘢比里奧大人食嘅   頭先買咗魚蛋   所以煮個出前一丁比佢食   等佢開心下   之後我會問佢開唔開心   再之後話無人會對你咁好   佢就會好感激咁講唔該哂㗎喇   係喎   我其實都好攰㗎   不過想里奧大人食得舒服啲   又唔駛一個人喺出面食咁慘   所以我先煮咋 ~

叙苑粉麵茶餐廳 @ 九龍灣 ( 26-OCT-2011 )

( 26-OCT-2011  THU )

今朝食通粉餐   已經走包同埋要少通粉   但都食唔哂添 ~ 

番到菇場就忙喇   因為尋日無乜點做嘢   今朝就要做番哂啦   做到 12 點先做完   咁樣啲時間過得好快   超充實呀 ~

Lunch Time 唔係好餓喎   所以 1 點幾先食 3 塊朱古力餅   已經覺得好飽喇 ~

晏晝又忙忙地咁   所以又好快放工咁喇 ~

里奧大人今日上大陸   所以我今晚同家姐一齊去睇中醫   7 點開始睇   我又係血氣唔夠   佢話煲北芪當參會好啲   我哋差唔多 8 點先走   因為又同個醫師傾下偈咁囉 ~

家姐想掃街   所以陪咗佢食咗橙色嗰啲生腸同腎   煎釀三寶同辣魚蛋   我食咗少少咋   因為我仲要陪里奧大人食飯呢 ~

同家姐一齊搭巴士   佢喺中途轉車番屋企   我就直接去九龍灣   里奧大人都差唔多 9 點幾到九龍灣   佢想食煲仔飯   所以去叙苑喇   不過無咁好食 lu   同埋啲材料少咗好多呢   無計啦   咩都貴哂嘛 ~

牛肉盅頭飯 + 魚片頭河 + 菜心 (外賣) ( 25-OCT-2011 )

( 25-OCT-2011  TUE )

今朝都 OK 啦   不過都係好攰   所以都係搭的士番工   咁樣可以瞓耐啲 ~

買咗醬占包同咖啡   再加一杯菜蜜番菇場   不過只係想飲咖啡   好在無胃痛咋 ~

菇場又忙   不過其實都無乜點做嘢   個肚有啲戚戚痛   其實唔辛苦嘅   不過就唔想郁咁囉 ~ 

晏晝上網睇咗陣報紙就瞓覺喇   瞓咗 40 分鐘   精神好多呢 ~

差唔多 5 點先有胃口食嘢   食埋今朝買嘅醬占包   太好喇   唔駛浪費嘢 ~

放工即走啦   番到屋企即沖涼   再等里奧大人放工買嘢比我食 ~

佢差唔多 8 點幾先走   好在我又唔餓   本來想食牛什米   但講講下又想食牛肉飯   因為我次次都覺得唔舒服食粉麵   啲湯特別鹹咁㗎   所以都係食飯好啲 ~

蕃茄意式肉丸青口意粉 ( 23-OCT-2011 ) + ( 24-OCT-2011 )

( 23-OCT-2011  SUN )

今朝同里奧大人去 Delifrance 食早餐   價錢同太興差唔多咋   想轉下環境   不過咖啡唔好飲呢 ~

食完就番屋企沖涼   之後就番教會喇 ~

家姐今日要喺惠康買米呀   因為我有 Enjoy 信用卡嘛   好在有里奧大人幫手枱米啫   買完就去大家樂食 Tea   我等咗位之後就叫里奧大人過嚟坐   之後我去揀嘢食   里奧大人同我講我隔離個男仔好有責任心   因為我行開去揀嘢食   里奧大人坐埋去   個男仔好緊張話張枱係個女仔   咁里奧大人就話我識得個女仔   我話個男仔係傻㗎   因為佢食完無啦啦好輕佻咁講 "咁多人走我又走先"   之後又拎起隻碟   食埋跌落餐紙嗰粒飯   仲津津有味咁   我話正常人走就走啦   點會無啦啦講我又走先㗎   好在佢真係走   唔係就慘喇 ~

食完就各自歸家   里奧大人要做公司嘢   所以我又做家務   整依樣整嗰樣   啲時間過得超快呀 ~ 

是日懶餐 - 蕃茄意式肉丸青口意粉

蕃茄意式肉丸青口意粉 - 我想清冰格啲嘢食   所以今晚就煮呢個意粉喇   今次加咗兩片車打芝士   我覺得同蕃茄味唔夾呀   搞到好滯咁   但問里奧大人食唔食得出有芝士味   佢話食唔出   只係覺得好漏   仲有成包車打芝士   都唔知點算好添 ~

( 24-OCT-2011  MON )

每月一到呀   好感恩其實真係唔太痛   不過就真係好攰囉   咁里奧大人又作唔舒服   請咗朝早半日休息   咁我都請病假喇 ~

打完比菇場就再瞓   瞓到 3 點起身睇醫生   番到屋企沖完涼再瞓 ~

差唔多瞓到 7 點   之後唔敢瞓喇   驚夜晚瞓唔着   見有啲胃口   食埋今朝里奧大人買比我嘅腸仔包當晚餐就算喇 ~

里奧大人成 8 點幾先放工   我真係再食唔落嘢   所以佢自己食埋嘢先番屋企呢 ~

Cafe Lagoon @ 九龍灣 ( 22-OCT-2011 )

龍蝦湯 - 無咩味道   不過都預咗架喇

牛油餐包 - 唔熱嘅
煙鴨胸沙律 - 無特別

澳洲肉眼牛扒 - 估唔到份量咁多囉   所以我食得好開心呀

龍蝦汁焗海鮮飯 - 我食咗好少咋   因為我唔想食飯呀

咖啡朱古力拖菲 - 原來咖啡加 Cream 好滑好好飲㗎   我真係第一次咁飲呢   因為我以前一見啲Cream 就會 "北" 開去唔食㗎
意大利咖啡芝士餅 - 無特別   同埋太飽   所以食咗一啖就比里奧大人食 lu

( 22-OCT-2011  SAT )

今朝同里奧大人瞓到 11 點   所以喺屋企煮早餐食喇 ~ 

本來想行山   但隻腳有啲痛   都係唔想行   所以里奧大人話近近哋行 Mega Box 喎   德福有免費 Shuttle Bus   不過我話搭小巴仲方便 ~

12 點幾去到係無咩人   所以好好行   首先去 H & M 睇衫   無咩人行   點試都得   逗留咗差唔多 1 個鐘   好開心大家都有收穫呀 ~

買完嘢里奧大人話餓喇喎   佢一到假期就會好快餓   不過我都好開心㗎   話哂有胃口食嘢嘛   今次又係去 Ikea 食嘢喇 ~ 

意式茄醬焗鱈魚柳 - 魚柳好厚肉  同埋又唔漏   又唔腥喎   好味道呢
素菜千層闊麵 - 呢個又好味呀   呢個闊麵本身無味   但配埋蕃茄醬就好好味囉   平時覺得 Ikea 嘅蕃茄醬係無味
脆炸黃金雞翼 - 我都估到里奧大人實會叫嚟食   男人始終覺得有啲肉食係飽啲咁嘅

食完有氣有力再行 Ikea   買咗 6 隻碗同 1 隻碟   又買咗張床單   幾條抹手巾   5 個膠盒   我覺得好有新居入伙 Feel 呀 ~

之後再去 Jusco 超市掃雪條同薯片   買滿 $300 又可以抽獎同用低價換購禮物   又幾好喎 ~

本來諗住搭免費 Shuttle Bus   但依家唔得啦   拎住 5 大袋嘢   同埋買咗雪條   所以又係搭的士番屋企呢 ~

番到屋企擺好哂啲嘢就熨衫洗衫   差唔多 7 點就同里奧大人去 Cafe Lagoon 食嘢喇   無期望真係有驚喜喎   又無咩人去食   最鍾意靜靜哋   味道又唔錯   份量又大喎   叫咗 2 人餐   有沙律   湯   主菜   飲品   甜品   真係好飽   3 個人食就差唔多   仲有 Coupon 送添   所以覺得抵上抵呀 ~

食完就去Ivy 屋企   佢整親隻脚   所以我哋就去佢屋企探佢喇   8 點幾傾到 11 點幾   好攰呀   好在住得近   唔係就唔可以咁暢快咁傾㗎喇 ~

星悅鮮廚 @ 官塘 ( 21-OCT-2011 )

石燒野菌安格斯牛柳粒 - 熱辣辣又惹味   我好鍾意食黑椒㗎   搵晚自己整下先

京蔥醬爆脆瓜海參 - 都幾好味   當齋咁食唔錯呢

古法枝竹豆腐燜黃立倉煲 - 我其實好怕古法做嘅餸菜   因為我真係好憎食肉絲囉

( 21-OCT-2011  FRI )

今日又係 Off 呀   瞓到 9 點   之後喺屋企食早餐   熨埋衫就出發同媽咪飲茶喇 ~

今次同媽咪去九龍灣嘅鍾菜飲茶   原來即係潮館   如果早市 12 點半前埋單就好抵   不過我哋飲到 1 點幾   所以用正價   睇完早市價再比較午市價就覺得貴好多咁喇 ~

雲南野菌腐皮卷 - 唔知點解   呢排好想鍾意食腐皮卷   炸又香脆   蒸又索哂啲汁   諗起都想食

水晶雲勝餃 - 我鍾意食餃類   素餃仲鍾意添呢   不過呢個麻麻哋好味

上湯芋絲浸雲吞 - 突然唔記得芋絲係咩   所以好期待芋絲   我仲以為係炸嘢   原來係食開嘅芋絲嚟嘅
山竹牛肉 - 唔好食嘅   我最鍾意係食干蒸牛肉   不過唔係間間酒樓都有囉

沙律脆蝦角 - 好少酒樓有蝦角 lu   不過我好怕食細細隻好爽口嘅蝦囉 

芙蓉蒸魚肚 - 無咩特別

豉汁蒸鳳爪 - 好惹味   不過媽咪話好鹹喎

杏仁茶 - 最搵笨係呢個甜品   又稀又無厘味道   同埋唔熱囉

間酒樓凍到呢   諗住 Full 哂無咁凍   但都一樣咁凍囉   臨走前仲打噴嚏   幾驚凍到病呀 ~

之後同埋媽咪一齊番屋企   唔知點解好攰咁呀   傾咗陣偈就瞓着咗喇   起身勁頭痛又想嘔   真係好驚病呀   假期唔想病   好在食番啲酸酸哋嘅糖就好好多呢 ~

里奧大人喺大陸見客   又唔知要唔要同客食飯   所以我都話同媽咪食飯先   反正佢番到香港都要 9 點嘛 ~

今晚又同埋媽咪 家姐去星悅   之後家姐就嚟我屋企食雪糕同零食   不過我無食   因為真係好飽   雖則我為食   都真係唔想食囉 ~

里奧大人 9 點幾番到屋企   我又特登買咗魚片   所以煮個魚片蝦子麵比佢食喇 ~

星悅鮮廚 @ 官塘 + Yanomi 卜聚 @ 意粉屋 (荃灣) ( 20-OCT-2011 )

石燒大千雞 - 都幾辣   不過好惹味   我好鍾意食呀
京都沙拉骨 - 其實我幾驚食沙拉骨   因為啲沙律醬好漏   但呢個又好好味喎   可能有京都汁關係呢

椒鹽鮮魷 - 媽咪想食好耐啦   不過得我同佢兩個人就唔想食囉   因為份量都幾多   兩個人食會覺得好熱氣同超高膽固醇咁呢

芥蘭炒臘味 - 估唔到咁大碟囉   同埋都唔少臘味   正呀 

沙爹金菇肥牛煲 - 呢個唔掂啦   無厘味道   同埋啲牛超 "鞋" 囉 

( 20-OCT-2011  THU )

今朝 7 點 45 分就醒咗   再懶床到 8 點就起身喇   食埋早餐就開機洗衫   再熨衫   之後就出發去表妹度剪髮喇 ~

約咗 11 點幾去到   好在無人   唔係我又要等㗎喇   差唔多 12 點半先剪完 ~ 

其實一早約咗 Mimi (Yamoni) 12 點 10 分樓下等   點知我望下個電話   原來已經 12 點 15 分喇   嚇得我吖   即刻打比阿 Mi 叫佢上嚟坐   真係唔好意思啦   特登嚟接我   我仲遲到   仲要第一次見面   自怪自己預時間唔好囉 ~  

第一次見 Yanomi 咋   我叫佢做 Mimi   叫慣叫熟嘛   見到佢真人嘅感覺好得意呀   明明無見過   但見到又好有親切感   可能成日傾偈啦 ~

佢帶我去食意粉屋   我對荃灣真係好唔熟   只係識得去我表妹度咋   所以今次由佢帶路   佢好有滿足感   仲陰陰咀笑問番我識唔識行番去表妹度添   我真係唔識囉   一路行一路傾   望佢仲多過望馬路   點記得喎 ~

原來 Mimi 好細心   知道呢間意粉屋好凍   所以帶埋披肩比我呀   好感動呢 ~

一坐低叫埋嘢食就開始傾啦   真係好多嘢傾   個口未停過咁呀   無啦啦又講鬼怪嘢   搞到個人超勁寒   不過我都好鍾意同 Mimi 傾偈   因為佢成日幫我分析嘢   所以我有時講少少佢已經明我講咩   好了解我呢   雖然佢成日話我依樣嗰樣   係咪都鬧   其實佢個人真係好細心呢   好留心人講啲咩   唔會話求其聽完   敷衍答妳就算   佢真係記得妳所講嘅嘢㗎   呢一點里奧大人真係要好好向佢學習呀 ~

龍蝦湯 - Mimi 嚟親意粉屋飲餐湯都多數轉龍蝦湯   佢覺得好飲   所以叫我轉埋   味道唔錯   我用苦嚟形容   佢話應該係甘呢   比我形容到錯哂添 ~

蒜蓉包 - 腍嘅   定係我哋掛住影相遲咗食呢   如果熱辣辣肯定好好味呀

龍蝦汁海鮮天使麵 - Mimi 叫㗎   食嘅時候又唔太熱喎   咁係咪真係我哋影得太耐呢   不過味道都唔錯   我都幾鍾意食   同埋天使麵好難整   都係出街食好啲

青香草醬蜆肉長通粉 - 我叫㗎   想試下香草醬嘛   Mimi 問我食唔食呢啲香草醬   我話乜都試下囉   都唔係難入口 ~

食呀食   傾呀傾   傾到 3 點幾就走人喇   佢帶我行下附近商場   要盡地主之誼喎   之後帶我去買印尼麵同零食呀   好開心呀   因為佢又記得我講過嘅嘢呀   同埋我覺得好似同佢去緊旅行買手信咁呀 ~   

佢送埋我去搭亡命小巴就好唔捨得咁走喇   話有始有終喎   呵呵   今次見面非常之開心呀   把口未停過   居然喺網絡搵到真心朋友   真係好感恩呢 ~

我對鞋爛咗呀   所以去到官塘要即買鞋   唔係一陣甩哂底就麻煩 ~

買完鞋就上媽咪屋企一陣   就出發去星悅喇 ~

里奧大人上咗大陸   所以今晚同媽咪 家姐 糟糟同籮籮一齊食飯   多人食真係開心啲 ~ 

食完佢哋話探寶寶喎   所以上咗去媽咪屋企坐陣   之後就車埋我番屋企   爽呀 ~

番到屋企又見到里奧大人食黑椒漢堡   話唔好味喎   留番啲啲比我試下係咪唔好食   對我真係好好呀 ~

草根食堂 @ 葵涌 ( 19-OCT-2011 )

( 19-OCT-2011  WED )

今朝又係食三文治啦   唔知食咩好 ~

晏晝食油雞飯   燒味當中我最鍾意就係乳豬 燻蹄 燒鵝同油雞   最唔鍾意就係叉燒同燒肉   我唔鍾意啖啖肉   我鍾意有啲骨嘅嘢 ~

無啦啦又忙喎   次次 Off 之前都會無啦啦好忙   邪呀 ~

里奧大人上咗大陸   所以我約 CC 去葵涌廣場買衫喇 ~

6 點 10 分到咗葵涌廣場喇   超快   同埋 CC 放 6 點 15 分   所以我食啲嘢先   因為起碼 9 點先食飯呀   之後去買夾糖比家姐   $3.3/100g 咋   買咗差唔多 800g   重到呢   不過真係好抵囉   唔買對唔住自已呀 ~

CC 差唔多 7 點幾到   咩都唔講就殺喇   同佢買衫最好   因為佢會好細心咁 Check   我係求求其其咋 ~

行到 9 點幾就食飯喇   CC 話經過呢間草根食堂   聞到好開出前一丁味道   所以好想食喎   其實呢餐係我請佢嘅生日飯   不過今餐咁平   搵日再同佢認真食彼餐生日飯先   佢 8 月頭生日   不過我之前要休養   之後又忙   所以搞到依家先食囉 ~

食完就一齊搭亡命小巴   真係好快到九龍灣囉   好似唔駛 20 分鐘   超快呀 ~

蒜芹魚片炒米粉 + 金銀蒜蒸節瓜 ( 18-OCT-2011 )

( 18-OCT-2011  TUE )

依家天氣涼涼哋真係好舒服呀   真係好想日日都係咁呢 ~

早餐食腿蛋治烘底   其實好想食魚肉燒賣同粉果   但呢頭好似無得食 ~

菇場都幾忙呀   會計部又有新同事番工   唔知係唔係做一日又唔做呢   之前請嗰個係咁   第一日番工見到自己部門同事喊喎   妳都咪話唔驚 ~

晏晝有 Lunch Box   真係食麵無咁滯喎   如果 Lunch 食飯真係有飽飽滯滯嘅感覺   但夜晚又唔會咁喎 ~

尋晚買埋今晚嘅餸   所以放工直接番屋企   不過番到屋企就即 Ready 喇   洗同切要用唔少時間呢 ~

今晚又係自己食先   食完就沖涼睇電視   里奧大人 9 點先番到屋企   我又早瞓   真係一日都見唔到佢 3 個鐘 ~

是日晚餐 - 蒜芹魚片炒米粉 + 金銀蒜蒸節瓜

蒜芹魚片炒米粉 - 我好鍾意食蒜芹同新竹米粉   但里奧大人就唔多鍾意   所以我好少整炒米囉 ~

金銀蒜蒸節瓜 - 煮呢個夠哂方便   又正氣又好味 ~

叉燒炒麵 + 腐竹糖水 ( 17-OCT-2011 )

( 17-OCT-2011  MON )

星期一喇   今日有啲攰添 ~

番到菇場好忙呀   時間過得超快   好似食完早餐無幾耐又要食 Lunch 咁呀 ~

尋晚特登淥多個烏冬做 Lunch Box   咖哩真係撈咩都咁好食呢 ~

又烏冬又薯仔   食完好滯咁   好在一早諗定今晚煮咩   唔係就唔想煮㗎喇   飽飽滯滯好難諗到食咩好嘛 ~ 

放工去街市買餸   買定 2 晚嘅   咁其實都唔錯架   只不過重啲咁囉   但我真係好憎日日去街市呀   又無冷氣又濕立立   一去到已經好鬼掹㗎喇 ~

里奧大人 8 點幾先放工   所以我 7 點半開始炒麵   自己食先   佢嗰啲就入暖壺   我唔想咁夜食 ~ 
  
是日懶餐 - 叉燒炒麵 + 腐竹糖水

叉燒炒麵 - 本來想整炒米粉   不過里奧大人話想食麵   咁整麵囉   聽晚先炒米粉 ~

腐竹糖水 - 呢個時間要潤一潤啦   煲腐竹糖水最好   方便又好飲 ~ 

涼拌青瓜木耳絲 + 咖哩薯仔雞翼 + 印度薄餅 ( 16-OCT-2011 )

( 16-OCT-2011  SUN )

今朝同里奧大人食完早餐就番教會喇   依家媚媚都間唔中一齊番教會   都幾好吖 ~   

崇拜完畢就各自歸家喇   不過都同里奧大人講晏晝唔同媚媚食喇   屋企好多嘢未做   想快啲做完抖抖囉 ~

今日又係超乾爽   所以洗埋窗簾   真係吹兩吹都乾喇 ~

差唔多 3 點先食 Tea   超勁想去茶餐廳食 Tea 呀   食完 Tea 就同里奧大人去超市買餸   好似好耐無同佢一齊買餸咁呀 ~

番到屋企整定啲咖哩   再熨衫   執下嘢   再飲碗隔夜湯就抖陣喇   之後里奧大人 6 點幾話未餓   所以想 8 點先食飯喎 ~

是日晚餐 - 涼拌青瓜木耳絲 + 咖哩薯仔雞翼 + 印度薄餅

涼拌青瓜木耳絲 - 木耳係血管清道夫   所以間唔中都要食下 ~

咖哩薯仔雞翼 - 用咗大半樽李錦記咖哩醬   都幾香咖哩味   不過唔辣   我又唔想加指天椒   依家如果自己整嘢食   無咩必要都唔想食咁辣嘅嘢 ~  

印度薄餅 - 里奧大人真係好鍾意食薄餅蘸咖哩   睇見佢食得好開心   同食飯嗰樣係唔同㗎 ~

青紅蘿蔔粟米豬展湯 ( 15-OCT-2011 )

( 15-OCT-2011  SAT )

今朝食麥皮餐啦   不過仲飽過食麵餐   哈哈 ~

菇場好忙呀   連 Blog 同報紙都無時間睇   真係好少有呢 ~

晏晝同媽咪 家姐去 APM 御泰坊食泰菜   因為本來里奧大人話今朝要見客   所以我就約媽咪食 Lunch   不過後尾又唔駛見客   佢叫我照約媽咪   佢都好多嘢做陪唔到我喎 ~

椒鹽軟殼蟹伴菠蘿芒果醬 ($76) / 泰式香辣燒魷魚伴辣椒汁 ($58) / 泰式青木瓜沙律配炭燒牛肉 ($68) / 越南生牛肉湯河粉 ($44 ) / 泰香蔥蒜蓉包 ($24)

食完泰菜   家姐又話食完辣要食番啲甜嘢   所以去 Food Court 嘅滿記食糖水喇   食完家姐就車我哋番屋企 ~

我去街市買湯料   同里奧大人講我好飽   今晚唔想食飯   一齊飲湯食湯渣算喇 ~

是日懶餐 - 青紅蘿蔔粟米豬展湯

青紅蘿蔔粟米豬展湯 - 呢次好慳呀   只係買咗 1 條大紅蘿蔔  1 條細青蘿蔔   1 條粟米   $23 豬展   今次仲失手落多咗水   里奧大人話個湯無咩味   下次都係買多啲料   因為我自己好驚飲無味嘅湯呢 ~

食完就抹哂廚房   連牆呀   櫃呀都抹埋   超乾淨呀   我真係覺得自己抹得乾淨過鐘點   同埋好怕啲廚房用具立黐黐   我用玻璃樽裝油同調味料   佢應該係嗰啲拎起手就嘅人   但妳隻手污糟   用完應該即時抹番乾淨   其實應該係洗乾淨隻手先拎個樽   咁自己就唔駛再抹多樣嘢囉   懶嗰一時   但之後有排抹囉   同埋佢估唔到我自己會抹廚房   因為我姑奶會等埋佢嚟先叫佢洗碗   我唔係㗎   佢有時唔嚟   我都自己抹嘢熨衫   依家我好番哂   仲可以做多啲嘢添呀 ~ 

家姐生日飯 @ Shatin 18, Hyatt Regency Hong Kong Shatin (沙田) ( 14-OCT-2011 )

辣蘿蔔 / 花生
傳統北京烤填鴨 (三食) ($468 全隻)
醬料 (沙糖 / 黃麵醬 / 新鮮蒜蓉 / 青瓜絲 / 蔥絲)
薄餅 - 總共有 4 籠   每籠 5 塊
片皮鴨三食之一食 (片胸皮) - 食之前有人教妳點食㗎   呢啲係點沙糖食   入口即溶   超正

片皮鴨三食之一食 (胸肉) - 包蒜蓉食   啲蒜蓉超新鮮   超辣呀
片皮鴨三食之一食 (鴨腿肉) - 皮連肉再包甜醬同青瓜絲 蔥絲一齊食   口感超正   真係好好味呀
片皮鴨三食之二食 (生菜片鴨崧) - 唔知係咪已經飽飽哋   所以覺得味道一般   無咩特別
片皮鴨三食之三食 (紹菜豆腐鴨骨湯) - 好羶囉   我要勁落胡椒粉先飲到
籠仔糯米蒸腩排 ($198) - 糯米口感唔似糯口   入面嘅腩排好腍   不過 $198 真係貴咗啲囉

生炒豬油渣菜心 ($ 115) -賣相同我炒嘅差唔多咁嘅   不過啲豬油渣又幾好味喎   食咗一件咁多啦   因為好肥嘛

瑤柱豉油皇炒麵 ($128) - 呢個麵真係無咩特別囉   個個都食到飽   所以家姐要打包呢個麵呢

五娘液雪糕 ($38) - 聞落好勁酒味   但食落就好濃朱古力味   正呀
青檸雪葩 ($38) - 超酸呀   食完咁肥膩嘅嘢   當堂無咁漏咁呀

( 14-OCT-2011  FRI )

Happy Friday 喇   今次去另一間食早餐   早餐未到   就見到隻超小強喺枱邊行   我即刻用裝調味料嘅碟壓住佢   仲諗住慢慢嘆   不過就一路食一路周圍望囉   好驚又再有小強嘛   食都食得唔安樂 ~

菇場一時時忙啦   但朝早啲時間就易過好多呢 ~

晏晝食脆麥片   因為今晚食片皮鴨太 Heavy   咁我早餐又食得飽   晏晝唔想食到咁飽囉 ~ 

會計部同事比阿 Head 鬧到喊   佢唔係第一個啦   有個間唔中都見佢喊   其實大家一場同事   唔需要鬧到人喊囉   但老闆鬧又唔同   因為去到老闆度嘅話   應該就係好大獲囉 ~

今晚我同媽咪  糟糟去慶祝家姐生日   糟糟接埋家姐放工   所以我放工都要即走喇   去媽咪屋企等阿糟糟車我哋去 Shatin 18 呀 ~

依間食片皮鴨好出名   其實之前想去㗎喇   不過要做手術   所以無去到囉   估唔到今次家姐生日   佢又 Book 到位   之前我 Book 星期六要等 1 個月   真係有 Mood 等到無 Mood 呢 ~

食到差唔多 9 點就走喇   今晚家姐請食飯喎   不過點比番佢   佢都唔會要   咁下次請佢食番幾餐好過 ~

番到屋企見到里奧大人啱啱食完 KFC   我次次唔同佢食飯   佢唔係 KFC 就係 M 記   話最緊要快喎 ~

別府 @ 九龍灣 ( 13-OCT-2011 )

火地獄拉麵 - 湯底係 2 級辣   我覺得幾辣   但里奧大人食食下話下次可以食 4 級辣   但我煮唔辣

嘅嘢就話好辣   想點先
千島有機菜沙律 - 無咩特別   唔覺得特別爽脆囉
一品 Pizza (茄汁) - 餅底係酥皮   所以比較漏

( 13-OCT-2011  THU )

媽咪今朝 7 點打嚟   里奧大人接電話   我個心離一離啦   里奧大人好緊張問媽咪咩事   原來媽咪話想約我飲茶   嚇得我呢 ~

同媽味去鴻星飲茶   飲到 8 點 50 分就搭的士番菇場   如果搭巴士就要 8 點半走   咁難得媽咪嚟飲茶   基本上我都係飲耐啲搭的士囉 ~

今朝早咗起身   所以有啲攰   同埋都幾飽   所以有啲眼瞓 ~

Luch Time 出咗去行下   行到 1 點先買嘢食番菇場食   明星啲燒味飯又抵喎   單/雙併都係 $20 一盒   同埋好多飯   我已經少飯   但都好多囉 ~

今日里奧大人行 Fair 同見客   可以 6 點半番到屋企   咁我都唔煮飯喇   出去食下輕鬆下嘛 ~

里奧大人話好漏喎   想食啲酸嘢   所以買咗杯藍梅乳酪   $27 超細杯呀   好記得幾年前去工展會食   $21 超大個㗎   掌頭咁大   不過依家咩都貴哂   算啦   下次唔食算喇 ~

番到屋企無無聊聊拎啲零食出嚟影   原來真係幾多   不過屋企無零食又唔得喎 ~

麵餐 ( 12-OCT-2011 )

( 12-OCT-2011  WED )

今朝里奧大人嘅鬧鐘響完之後   我就比雨撇醒咗   仲以為係自己發緊夢   因為關哂窗家嘛   點知原來係冷氣機窗台漏水   成塊布濕哂   我不嬲用大毛巾圍住冷氣機邊㗎   因為落雨嘅時候    啲雨水滴落冷氣機頂好嘈   包住就無咁嘈   但其實都仲係嘈   所以我同里奧大人有時會用廁紙塞住耳仔瞓呢 ~

因為咁   我同里奧大人都遲哂出門口   不過我都會食埋早餐先番菇場   坐近門口嘛   啲同事一出一入見到我食早餐就唔係咁好啦 ~

菇場一般忙咁啦   又唔係好悶喎   同埋唔眼瞓都已經好好架喇 ~

晏晝有 Lunch Box   超飽啦   所以 2 點之後勁想瞓   飯氣攻心 ~

明明今日約咗 CC Shopping   但個窗台滲水即搵業主啦   約咗 8 點到   咁里奧大人又可能要同客食飯   我自己食算喇 ~

番到屋企就煲中藥同熨衫   之後就煮麵食喇   食到一半里奧大人就打嚟   話今晚唔駛同客食飯   不過就要 9 點先番到屋企   咁我等佢番嚟再煮麵比佢食啦 ~

業主 8 點幾到   明明同老公一齊就一齊啦   又話係師傅   成 80 歲嘛   妳叫佢嚟整   我都驚佢手震震腳震震跌親呀 ~

之後我帶佢哋入房睇   佢問我可唔可以企張床度睇   黐佢條孖根啦  正常人都會問人有無櫈或者其他嘢比佢企   我第一次聽到話企喺人張床度囉   之後叫佢摸塊大毛巾   佢居然問我塊布係咪自己整濕   呢個問題簡直白痴低能兼無腦   又話冷氣機入水   我話我晚晚開都唔會咁啦   如果冷氣機入水仲更加要換冷氣機   佢其實最唔想冷氣機   所以搵種種藉口   但估唔到佢咁白痴話冷氣機入水   咁唔換唔得添啦   我話根本個窗台四邊都有滲水   之後佢又話部機唔嘈   佢屋企部好嘈佢都瞓到   梗係啦   眼濛耳又聾   後尾我關埋房門   業主都話嘈啦   所以我真係火都嚟   後尾我啲語氣都唔係咁好㗎喇   佢又話依家天氣涼   唔駛開冷氣   又話無加我哋租   幫幫手捱多兩個月   我話我依家都開緊冷氣   點會唔駛開呀   同埋依家落雨點開窗瞓呀   佢根本唔想換冷氣   好在業主都話冷氣好舊同好嘈   話依個時候買冷氣唔會太貴   所以就話買部新囉 ~

之後業主又話阿伯係大業主   咁頭先就咪話師傅啦   我都費事串佢   又話本來大業主話加我哋租㗎   不過就幫口話依家搵食艱難   同埋我哋準時交租   我笑咋   無講多謝囉   我心諗   妳加租我就唔租妳啦   最憎人咁樣講埋呢啲嘢 ~ 

里奧大人差唔多 9 點就番到屋企   我又要煮麵比佢食啦   再講番頭先換冷氣機單嘢   一聽已經話個阿伯根本唔想換   我話如果你同佢對話   佢講第 2 句你已經發火   因為有哂證據   佢都可以想唔換   唔發火就奇囉 ~

叉燒炒飯 + 齋兩味 (外賣) ( 11-OCT-2011 )

( 11-OCT-2011  TUE )

今日 Off   瞓到 10 點先醒   咁啱媽咪又抽完血   所以就早啲出去同媽咪飲茶喇 ~

飲完茶就出發去覆診   約咗 3 點半   4 點 10 分有得睇算快咯   好感恩一齊正常   之後再去睇中醫   睇完醫師就同我傾偈   傾到 6 點幾   之後有病人嚟睇就唔傾 lu   不過就算無人嚟我都唔再傾喇   要番屋企煮飯同煲藥嘛 ~

是日懶餐 - 叉燒炒飯 + 齋兩味 (外賣)

叉燒炒飯 - 尋晚特登煮定多啲飯   咁今晚就整里奧大人最鍾意食嘅叉燒炒飯   但其實想今晚唔整炒飯   不過又唔想啲冷飯擺咁耐   所以都係整咗算喇   依家米貴唔好浪費呀 ~ 

齋兩味 (外賣) - 喺旺角女人街附近嘅齋舖買㗎   $20/盒   原來熱㗎喎   同埋都幾好味喎   好味過自家素食   份量又多過佢   下次經過再買嚟食先 ~

今晚仲諗住可以同里奧大人一齊食飯   不過佢 8 點打嚟話仲未走得   咁我即刻炒飯食喇   洗埋嘢就沖涼   再舒舒服服咁食零食呢   我尋晚先想買呢兩款零食   估唔到家姐買咗比我   我無同佢講㗎   所以好開心呀 ~   

梅菜蒸鯇魚 + 菜心 ( 10-OCT-2011 )

( 10-OCT-2011  MON )

今朝早咗起身又早咗出門口   所以有半個鐘頭食早餐   同埋未到 9 點已經番到菇場   幾愛菇場咁呢 ~

又係好忙   但好有衝勁做嘢喎 ~

晏晝有 Lunch Box   里奧大人尋晚話擺得咁整齊   拎到番到菇場都會亂哂啦   我話唔會喎   可能我唔係放喺手袋   獨立放喺飯盒袋啦   我接受唔到個飯盒放喺手袋   一陣漏汁咪成袋都係   咪搞 ~

好快又放工喇   尋晚去超市買唔到鯇魚   唔忿氣   今晚再買   我明明行到去嘅時候得魚尾   之後我再睇其他嘢   再番去魚檔度睇   又見到有鯇魚腩買喎 ~

是日懶餐 - 梅菜蒸鯇魚 + 菜心

梅菜蒸鯇魚 - 用煎炸豆腐墊底   不過心急   一開個盒就即煎   彈到啲油周圍都係   同埋我無心機煎   因為好似煎極都係軟賴賴咁   求其算喇 ~

菜心 - 買咗一斤半   分兩晚食最好   唔駛又要特登去街市買菜   因為我真係好唔鍾意行我呢頭個街市呢 ~

擔擔麵醬蒸排骨 + 菜心 ( 9-OCT-2011 )

( 9-OCT-2011  SUN )

里奧大人尋晚做嘢做到 2 點   所以今朝都番唔到教會   佢仲同我講個 Blog 到 2 點仲係轉移中   所以最後都熄機   今朝再開嚟睇   仲話係轉移中   真係唔知仲轉緊啲咩嘢 ~ 

今朝喺屋企煮丁丁   再加杯咖啡   慢慢食好舒服呀 ~

食完就熨衫   執下嘢咁   都已經 2 點幾   拿拿聲食埋個 Tea 就出發去拜老爺奶奶 lu ~

坐完巴士又的士   係咁轉圈   有啲頭暈   食飽坐車真係幾辛苦 ~  

差唔多 6 點就番到屋企   叫里奧大人陪我買餸   我其實唔想煮   不過真係想里奧大人食多啲住家飯   同埋今餐係蒸同淥都好快手啫 ~ 

是日懶餐 - 擔擔麵醬蒸排骨 + 菜心

擔擔麵醬蒸排骨- 本來想整蒜頭豆豉   不過盒豆豉過咗期   見到有啲豆豉白雪雪   但又好香豆豉味喎   但都係驚驚哋   所以即轉用擔擔麵醬   辣辣哋幾好味 ~  

菜心 - 我覺得自己好耐無煮菜咁呀 ~ 

肉醬意粉 ( 8-OCT-2011 )

( 8-OCT-2011  SAT )

今朝要番工呀   食飽啲先 ~

阿 Head 今日 Off   我有嘢都唔做呀   真係上足半日網   寫 Blog 同 Load 相   居然覺得半日時間唔夠用添呀 ~

1 點即走   因為 Shuttle Bus 係 1305 開出   遲咗又要等 10 分鐘就慘喇 ~ 

搞完嘢都差唔多 2 點   即約里奧大人去德福食 Lunch 喇   再行陣就番屋企 lu ~

本來想去超市買鯇魚   但居然無喎   所以最後整肉醬意粉算喇 ~

番到屋企醃好啲肉   再煲埋菊花茶就即刻 Upgrade Blog   之後抹櫃同拖地   抹埋洗手間   成間屋好乾淨呀   依家煮飯做家務會好開心   因為代表身體已經復原嘛 ~ 

是日懶餐 - 肉醬意粉 

肉醬意粉 - 好似好耐無整肉醬意粉咁   其實想整吞拿魚意粉   不過里奧大人又鍾意肉醬意粉多啲   無計啦 ~

里奧大人下星期見客   所以又要做公司嘢   咁我又睇下電視   雜誌咁囉   差唔多 11 點幾就瞓   但個 Blog 仲係轉移中   但其實樣樣都轉移哂啦   不過佢話全部資料轉移哂嘅話   就唔會出現條 Bar   咁我又唔敢 Close   好在里奧大人話要做埋嘢好夜先瞓   咁唯有叫佢幫我睇住進度啦 ~    

住家飯 @ 媽咪屋企 ( 7-OCT-2011 )

豬肉薯仔餅

咖哩炒蟹

蒸多寶魚

炒菠菜

翡翠螺 

紅棗山斑豬展湯

( 7-OCT-2011  FRI )

Happy Friday 喇   尋晚 10 點 40 分就瞓喇   所以今日好精神呢 ~

早餐食腿蛋治 + 熱檸茶   見人飲咖啡真係好想飲呀   不過一諗到尋日痛成咁   就真係好驚唔會飲囉 ~

番到菇場超級忙添呀   因為尋日晏晝無做過嘢嘛   今日一定要做哂去呢 ~

尋晚食唔哂啲意粉   所以今日有 Lunch Box ~

今晚里奧大人又番大陸   我今晚又去媽咪屋企食飯喇   尋晚無去   今晚補數 ~

番到屋企就即煮嘢比里奧大人食啦   之後再熨衫   未停過手   又熱又攰呀 ~  

大快活 (外賣) ( 6-OCT-2011 )

( 6-OCT-2011  THU )

連放 5 日假   今朝起身仲諗緊係咪要番工添   可能連續幾日都有街去   所以好鬼攰   想再放假咁囉 ~

好似好耐無食港式早餐咁呀   所以食芝士吞拿魚治烘底 + 凍咖啡   覺得好好味咁呀 ~

好忙呀   不過真係好鍾意忙嘅感覺   但唔知點解差唔多 11 點嘅時候個胃就超級勁痛囉 ~

一早講好今日請 8 卦食生日飯   佢都幾好㗎   請佢食貴嘅又話唔好   最後又話想食粉麵   不過我都話想食粥囉   對個胃會好啲 ~

番到菇場個胃痛到呢   想即走呀   不過又頭暈又嘔   都係喺菇場度穩陣啲   我係咁瞓呀   醒咗又痛   又要瞓下   飲啖暖水都想嘔呀   呢啲感覺真係好辛苦   本來今晚去媽咪屋企食飯都去唔到喇   放工拿拿聲搭的士番屋企 ~

喺屋企瞓咗陣個胃就無再痛喇   再沖個熱水涼   個人就精神好多囉   諗諗下可能依家唔受得咖啡   之前食米線嘅時候又係飲凍咖啡   飲完又係勁想嘔   仲以為當時飽得滯添   唉   都係戒咖啡算喇   最多里奧大人飲嘅時候黐番啖飲   過下心癮嘛 ~

今晚叫里奧大人喺大陸快啲走   因為我唔舒服想快啲食嘢同休息囉 ~

勁想食肉醬意粉   好在有番啲胃口   最怕三更半夜餓醒呢 ~

榮記粉麵 @ 銅鑼灣 ( 5-OCT-2011 )

豬紅 / 豬腸 / 蘿蔔米粉)


(春卷 / 雞翼尖 / 牛丸河粉)

( 5-oct-2011  WED )

今日係重陽假期   又放假一天   不過今朝同里奧大人一齊要 8 點 45 分起身喇   因為約咗媽咪同家姐飲茶   家姐車我哋   所以要早啲出門口   我多數會早啲去等家姐   好過一陣佢哋停唔到車等人仲煩 ~

今日終於覺得人多好辦事喇   假期搵位飲茶最煩   好在我哋三個去唔同酒樓等位   邊度有位就去邊到   今次好感恩又去另一間試下呢 ~

好似 10 點 15 分有位   以假期等位都算快㗎喇   所以真係好感恩呢   今個星期第 3 次飲茶   不過同自己屋企人飲就開心好多   因為會同佢哋食啲新嘢   同埋好多嘢傾   個口特別攰   個肚特別飽咁㗎 ~

蜂巢芋角 / 薑蔥牛肉角 / 醬王蒸鳳爪 / 鳳爪排骨飯 / 蝦餃 / 香茜牛肉腸 / 生煎菜肉包 /
鮑魚燒賣皇 /上湯鮮竹卷 / 千層馬拉糕 / 紅豆桂花糕

食到 11 點 45 分就走喇   我同里奧大人就過銅鑼灣去佢舊同事屋企   佢舊同事屋企喺跑馬地比華利山   我第一次去呢啲豪宅咋 ~

去到又係食嘢   不過我每樣食少少啦   唔係唔知做咩好呢 ~

薯仔沙律 / 冷麵 / 香草焗金沙骨 / 鹽焗雞肶 / 冬菇豬肉雲吞 / 恆香皮蛋酥 / 恆香老婆餅 / 恆香蛋黃酥
大量果汁   其實仲有 Pie & Tart 嘅什果撻同曲奇 / 網紋哈密瓜 / 巨蜂提子 / 士多啤梨 / 金莎朱古力   不過費時無啦啦走去影啦   好怪咁

食完又傾下偈   4 點幾就走喇   落 Times Square 行陣   又係好多自由行   人都顛 ~

行到差唔多 6 點幾就去食車仔麵   家姐話好好食喎   係都要我地去試   又話排哂隊食   不過我哋咁早應該唔駛排隊囉   真係好感恩唔駛排隊   如果要排   里奧大人話會去南記   佢無耐性呀 ~

食完坐巴士番屋企   里奧大人居然話唔飽   不過我話好飽   唔會再陪佢食囉 ~

Blueberry Cheese Cake by 太子酒店 ( 4-OCT-2011 )

( 4-OCT-2011  TUE )

今朝里奧大人約埋姑奶一齊去鴻星飲星   人哋特登 Off 家嘛   仲諗住二人世界   下次 Off 之前要問清楚佢係咪二人世界先   唔係我留番啲假陪媽咪飲茶好過 ~

飲到差唔多 12 點幾就各自歸家   我番到屋企 Hea 到 2 點先出發去尖沙咀 ~

去尖沙咀多數想食牛丸河   一係會食星林居   咁諗諗下都想坐得舒服啲   所以又去星林居喇 ~

唔知飽得滯定飲咗杯凍咖啡   我勁想嘔呀   所以要休息一陣先走得   之後一出去就要搵鹹濕嘢食   但又唔可以太酸   咁樣會更加想嘔   唉   不過越想搵就搵唔到囉 ~

行陣買下嘢又好啲喎   所以里奧大人都話一買嘢就精神   但又真係講得好啱喎   個人一開心   乜病痛都無㗎啦   事實嚟㗎喎 ~

行 Harbour City 又係好多大陸人啦   都唔記得黃金週添   仲奇怪點解閒日都會咁多   無處不在 ~

行埋 City'super 就走喇   經過太子酒店   見到有 Blueberry Cheese Cake 做緊 Promotion Sale   $60 個咋   其實我鍾意食 Cheese Cake   但里奧大人就麻麻   所以我正諗緊食唔食得哂嘅時候   里奧大人已經比咗錢   今日佢會好識做   因為知我有啲唔開心嘛 ~

拎住個 Cake 搭地鐵真係好鬼驚   所以都係去油麻地轉車   有得坐嘛 ~

我講明話今晚唔會再食嘢   咁啱家姐今日係農曆生日   所以就叫佢嚟食 Cake   話買咗 Birthday Cake 同埋禮物比佢   今晚一定要到   哈哈 ~

肉絲炒麵 + 牛大力土伏苓豬骨湯 ( 3-OCT-2011 )

( 3-OCT-2011  MON )

今日 Off 呀   因為要清埋啲年假   咁啱 10 月 1 號係紅假   2 號星期日   5 號又紅假   所以請 3 號同 4 號就連放 5 日   好爽呀 ~

Off 喇喎   梗係同媽咪飲茶啦   呢兩日食到咁飽   唔食早餐都可以頂到 11 點先食嘢呀 ~

同媽咪去鱷魚裇中心嘅彩晶軒飲茶   上次同朋友嚟呢間食點心都唔錯   所以又試下   唔知係咪閒日關係   雖然張張枱都有人   但又唔係好嘈喎   飲得好舒服呢 ~

安格斯牛肉腸 / 三姐巧弄潮州蒸粉果 / 黑松露爽菜腐皮卷 / 十三摺水晶鮮蝦餃 / 生滾粥 (豬肉丸 / 豬潤 / 新鮮帶子)

12 點半前就係早市價錢   本來想坐多陣   諗住坐下食下到點幾先走   點知食完碗粥都飽哂   係無可能再食任何嘢囉   所以埋單走人喇 ~

媽咪隻腳行得耐會痛   但我又想同媽咪行下 Jusco   所以問下 Information Center 有無得借輪椅   好感恩呀   有得借喎   之後可以同媽咪行下 Jusco   買下嘢   好開心呀 ~

陪媽咪一齊去買餸   再番媽咪屋企坐到 4 點幾就走喇   今晚要煲湯煮飯嘛 ~

是日懶餐 - 肉絲炒麵 + 牛大力土伏苓豬骨湯

肉絲炒麵 - 頭先陪媽咪買煲湯豬肉同豬骨   買咗 $98   真係好貴   所以依家唔會浪費煲湯嘅豬肉   盡量煲湯就整肉絲炒麵咁囉 ~

牛大力土伏苓豬骨湯 - 湯包嚟㗎   材料有牛大力 + 土伏苓 + 大生地片 + 赤小豆 + 扁豆 + 蜜棗   自己再加件豬骨 + 豬展 + 粟米 + 紅蘿蔔   咁就超級好飲㗎喇 ~

咸亨酒店 @ 深圳國貿站 ( 2-OCT-2011 )

香干馬蘭頭 (RMB 18) - 我成日聽到呢個菜名   但未食過   所以叫嚟食   不過我覺得好大陣草青味囉
咸亨醬鴨 (RMB 28) - 里奧大人話食過幾好味   所以就叫喇   味道幾得意   好似臘鴨味道   但塊皮又甜甜哋   肉質都幾滑   好在細細碟   如果唔係就會覺得好鹹囉
江南酸辣拉皮 (RMB 38) - 呢個超驚喜啦   因為麵條好煙韌   同埋好辣   不過太大碟啦   我覺得佢用個碗裝就無咁嚇人
青島啤酒 - 本來叫青島純生   不過嚟錯咗青島   其實我唔知有咩分別   最離奇係個侍應開完先睇單   之後話呢枝唔係純生   咁嘅服務態度認真唔掂
飄香鐵觀音 - 我飲咗兩三啖咋   依家夜晚飲中國茶會瞓唔着㗎

( 2-OCT-2011  SUN )

今朝 7 點起身梳洗   食埋早餐就要去廣州探舅父呀 ~

雖然同佢哋相處咗一日咁短時間   但佢哋真係好熱情好熱情   成日叫我哋唔好走玩多幾日   我哋話唔得呀   佢哋個樣真係好失落   好唔捨得咁   不過無辦法啦   個個都要搵食嘛 ~

佢哋開車送我地去巴士站   佢表姐好唔捨得喺度喊   搞到我又喊喎   我都好唔捨得佢哋呢 ~

9 點去到巴士站   又要坐 2 個幾鐘頭到廣州喇   今次上車就瞓到喇   尋日頻頻樸樸   今朝又早起嘛   其實真係好怕坐長途車   第一悶   第二就係驚要去洗手間   忍下忍下會去唔到㗎 ~ 

之後搭地鐵到酒樓食飯   又係食呀   食到 2 點幾就到舅父屋企坐   4 點幾就走喇   坐地鐵再轉火車到羅湖   好感恩坐架火車都好新好舒服   話哂唔想第一次坐就有一個唔好嘅印象嘛 ~

咁又一日喇   差唔多 7 點幾到咗羅湖   咁里奧大人就話帶我去佢深圳嘅 Office 睇下   都好喎   反正嚟到羅湖 ~

經過 Shopping Mall   間間舖頭都係名店   大陸人清費能力真係好強囉 ~

因為假期   所以里奧大人嘅 Office 都無人   所以都無走上去睇   之後再落樓下間 Supermarket 睇下喇 ~

其實唔餓   但黎到又想食下嘢喎   所以里奧大人就帶我去一間樣樣都細細碟嘅食店食嘢喇   食到 9 點幾   係時候走人喇 ~

呢兩日係咁食   食完又坐   坐完又食   雖然都幾開心   不過真係好攰囉 ~

豐生農莊 @ 惠州 ( 1-OCT-2011 )

鐵板蠔油雞肶菇 / 蒸羔蟹 / 蒜蓉蒸蝦 / 薑蔥燜鯇魚 / 芥菜豬肉丸/  腰果西芹炒木耳 / 芋頭南瓜 / 

炒蕃薯葉 / 金銀蛋韭杞 / 砵仔飯 / 芋頭包 / 生熟地湯

( 1-OCT-2011  SAT )

今朝 6 點起身梳洗出發去惠州喇   雖然去大陸   但都有啲興奮   話哂都叫做小旅行嘛 ~

之後 Join 埋姑奶一齊去搭地鐵再轉火車   好多人呀   幾驚買唔到車飛上惠州   所以我都問點解佢哋咁怪雞會正正國慶當日番大陸   明知咁多人   又無得買定車飛   如果無車飛我會即番屋企囉 ~

之後喺羅湖再 Join 埋另外 2 同 4 姑奶兩公婆就出發去惠州喇   8 點 15 分由深圳坐大巴去惠州   有少少塞車   差唔多兩個幾鐘就到   我喺車度都無瞓到   佢哋就瞓哂   其實我沖完涼洗埋頭個人都醒嗮   好難瞓到囉 ~

差唔多 10 點半就到惠州   里奧大人嘅表姐同表哥就嚟接我哋去佢哋屋企   去一去惠州要坐 4 程車   真係腰骨都痛呀 ~

今次係住喺佢哋起嘅屋   好似香港嘅村屋咁   一層有 2 廳 4 套房   只係比親友住   唔會有外人入到嚟   所以都好放心 ~

安置好哂啲嘢就食飯喇   呢間農莊係佢哋開嘅   所以我都好放心食   因為我真係好驚喺大陸嘅飯店食嘢㗎 ~

蒜蓉蒸帶子 / 水晶雞 / 黃豆燜排骨 / 叉燒 / 燒鴨 / 客家釀豆腐 / 蒸魚 / 紅腰豆燜豬尾 / 木薯粉

食完就去另外兩個舅父屋企   之後就番去再傾偈   食下生果   瓜子   差唔多 7 點就要食飯   因為大陸好多人都早食早放工呢 ~

食呀食呀食呀   我個口真係無停過咁呀   食完就一齊出車去東江湖公園散步   影下相   有個表姐嘅女好乖呀   7 歲人仔   知我唔行得快   就會拖住我手慢慢行   咁佢其他啲表姐叫佢一齊跑   佢都唔跑而拖住我慢慢行呀   仲叫佢哋唔好跑   一齊慢慢行   令我好感動呀 ~

我哋差唔多 10 點幾就番去休息 lu   里奧大人啲表哥成日叫我哋唔好走   玩多日   佢哋以為我哋都連放 7 日假呀   不過我哋聽日又要去廣州探舅父   真係唔可能再留多日囉   唯有等下次啦 ~