青紅蘿蔔粟米豬骨湯 + 隔夜炒飯 ( 30-SEP-2012 )

( 30-SEP-2012  SUN )

10 點起身   去 KFC 食早餐   之後同埋里奧大人同媚媚一齊番教會喇 ~

里奧大人同媚媚傾偈   所以我約媽咪飲茶   飲完一齊去買餸   之後就各自歸家 lu ~

煎堆 / 酥炸鯪魚球 / 薑蔥牛柏葉 / 潮州糯米卷 / 山竹牛肉球

番到屋企即煲湯   再抹房同書房   搞掂哂就沖涼   熨埋兩機衫就抖下喇 ~

6 點幾飲咗湯先   唔想太夜飲   差唔多 8 點開飯   咁樣都唔錯   不過如果早啲食飯更好   可以多啲時間用咁呢 ~  

是日懶餐 - 青紅蘿蔔粟米豬骨湯 + 隔夜炒飯

青紅蘿蔔粟米豬骨湯 - 2 條紅蘿蔔 + 1 條青蘿蔔 + 2 條粟米 + $40 豬骨   今次煲埋只得 3 碗   點解咁㗎   真係好難預計份量呀 ~  

隔夜炒飯 - 尋晚買咗 Pack LockLock 盒就最啱拎飯走啦   佢哋又唔食   我又唔想煮   所以我話拎走啲飯同豬扒   炒番熱就得 ~  

食完就同里奧大人一齊做體操   運動流汗嘅感覺真係好正   喺屋企做運動最好啦   唔駛帶銀包鎖匙   雖然唔係帶氧運動   不過對我嚟講無咩所謂   我最緊要係流一身汗嘅啫 ~   

中秋做節 @ 姑奶屋企 (大埔) ( 29-SEP-2012 )

厚批


薄批 / 花之戀 / 壽司拚盤 / 雞翼 / 萄國雞 / 椒鹽豬扒 / 炒飯 / 生菜 / 菜心

( 29-SEP-2012  SAT )

10 點半自然醒   去大快活食早餐   排隊拎早餐都要 15 分鐘 ~

食完番屋企沖涼   抖陣就去 Mega Box 行下   今次都係去咗 H & M 先   好在無收穫   之後就周圍行下喇   去咗玩具反斗城   好細間   不過都預咗   買咗個環保袋就走人 lu ~

經過肇順名匯河鮮專門店   見到大中細點心 5 折好抵咁   所以又入去試下喇   1 點半坐到 3 點   行去蘇寧再去 Ikea   真係超勁鍾意行 Ikea   次次去都好開心 ~  

見到熱狗餐 $10 好抵   所以又食啦   加多杯雪糕   $2 咋   睇個樣好實淨好味咁   不過係唔太凍囉 ~

食完行埋 Jusco 就坐 Shuttle Bus 去九龍灣搭巴士去大埔   行咗陣一田就搭的士去姑奶屋企食飯喇 ~

差唔多 10 點就走   同里奧大人 & 兒生仔一齊行落去搭車   感恩去到即有車   更感恩有孖位坐   好快就番到屋企   今晚成 12 點幾先瞓   假期真係唔願早瞓呢 ~

金姆指米線 @ 九龍灣 ( 28-SEP-2012 )

( 28-SEP-2012  FRI )

終於又 Happy Friday 喇   聽日又請咗半日假   自制 4 日假期   真係超級開心呀 ~

早餐想食鹹甜嘢   所以食菠蘿包餐喇 ~

菇場靜到烏蠅飛過到聽到   好在夠精神   唔係肯定瞓得着 ~

Lunch Time 到咗但唔餓   所以就出去行半個鐘   之後再買燒賣炒米粉番菇場慢慢嘆 ~

爽呀   阿 Head 3 點就走人   上下網又好快放工 lu ~

之前團購咗個足浴盤   今晚出旺角拎   去咗烘焙店買依士粉就去拎足浴盤   我好怕搭好景嘅 Lift   又慢又細   雖然今次有專用團購嘅 Lift   但都等咗 20 分鐘   最搞笑係到我嘅時候   係坐唔係團購專用嘅 Lift   咁我即係白等   同埋我估唔到原來團購有幾層咁多呢   仲以為一層添 ~

拎完再去旺中買 2 件外套就走人喇   今晚堅持搭巴士   第一架 Full 哂   感恩第 2 架有位坐呢 ~ 

差唔多 8 點番到屋企   里奧大人打嚟話 8 點 15 分走得   由深圳番嚟都要個半鐘   好在我又唔餓   等下仲好 ~

超勁想食麻辣米線   所以又金姆指喇   番到屋企都 10 點幾   沖埋涼又睇下雜誌   好快又已經 12 點幾 lu   要瞓喇 ~  

住家飯 @ 媽咪屋企 ( 27-SEP-2012 )

節瓜燜蠔豉魚肚

棉花雞

香茅黑胡椒蝦


蒸鯧魚

白切雞

馬蹄海蜇皮豬展筋湯

番鬼荔枝 / 金桃

( 27-SEP-2012  THU )

星期四喇   諗到連放 4 日假期就超級勁開心   加上天氣又清涼   心情真係十分之好呢 ~

早餐食多士   真係好多時間剩咁   實在太好喇 ~

無嘢做   上下網又 Lunch Time   今日有 Lunch Box   好似好耐無 Lunch Box 咁 ~  

放工即走喇   去媽咪屋企食飯   又係 8 點半同家姐一齊走   自從同媽咪講咗里奧大人鍾意食木瓜之後   呢兩個星期買咗木瓜比我   每次 4 個   加埋我自己個袋   重到我呢 ~  

里奧大人 8 點放工   喺埋大陸食嘢先番屋企   咁仲好啦   餓過龍仲慘   會變咗唔想食 ~

今晚 11 點幾就瞓   其實以前我 10 點半就瞓   不過就覺得好似早咗啲   煮完飯洗埋碗沖個涼   好似無哂私人時間咁   依家自己早煮早食   起碼有 3 個鐘頭私人時間   11 點瞓就最好   咁都有 8 個幾鐘瞓呢 ~

黑椒牛仔骨意粉 + 粟米蛋花湯 ( 26-SEP-2012 )

( 26-SEP-2012  WED )

尋朝同里奧大人出門口   所以趕唔切 8 點 20 分班車   咁今朝自己出門口先   之後我去到小巴站   里奧大人打嚟話見到我   我見到佢企喺對面條行人天橋企定定望過嚟   我話佢好似啲變態佬偷窺人哋咁   哈哈 ~ 

架小巴唔兜入村就最好   10 分鐘肯定可以落車   依家完全唔想搭 6D 喇 ~

早餐有半個鐘食   又可以睇埋報紙   真係好開心   因為我鍾意睇食譜同埋超市有咩減價嘢   哈哈 ~

菇場又忙噃   好快就到 Lunch Time   今日要去萬寧買嘢   所以順便出去食埋牛筋米   食完去買嘢   番到菇場就啱啱好開工 ~

放工諗住去超市買洋蔥同西蘭花   不過唔見有   之後又諗起媽咪之前比咗紅蔥頭比我   都唔駛再去另一度買洋蔥啦 ~

番到屋企預備好意粉就開機洗衫   再熨衫   差唔多 7 點半就煮喇   8 點家姐打嚟叫我落停車場交收洗地水   因為佢掃咗 10 支   所以又比 2 支我喇 ~

又唔知里奧大人幾點放工   咁我食先喇 ~

  
是日懶餐 -黑椒牛仔骨意粉 + 粟米蛋花湯

黑椒牛仔骨意粉 - 其實我好怕煮牛仔骨   啲牛仔骨成日唔熟咁嘅   所以我次次都 Over Cook 㗎   今次呢幾塊又估唔到咁厚肉   上哂碟剪開先知原來仲係有啲未熟   嚇到即刻再煮過   我情願食好 "鞋" 嘅牛肉   都唔食帶點血嘅牛肉㗎 ~ 

粟米蛋花湯 - 雞蛋過期   打咗 2 隻都無臭   所以一次過落哂噂湯度   但水嘅份量無加到   所以超級杰   衰里奧大人話係咪茨汁   特登大力啲將個碗放落枱   但碗粟米湯係無瀉出嚟   但啲湯直情係無郁到   杰過茨汁   所以佢話下次唔好再預佢粟米湯   呵呵 ~  

里奧大人 9 點 15 分終於放工   番到嚟都 10 點   食完又做下公司嘢   咁我又睇 Ipad 陪下佢囉   睇到入哂神   一望鐘已經 12 點 15 分   嚇到即刻熄機瞓覺呀 ~  

板長壽司 + 金滿堂甜品 @ 九龍灣 ( 25-SEP012 )

油甘魚壽司 (柚子 / 黑松露醬 / 海鹽) / 火灸醋鯖魚壽司 / 車海老蝦壽司 

一口帆立貝壽司 x 2

金三文魚壽司

珍珠廣島蠔壽司 / 三文魚籽軍艦

翡翠榴槤杯 @ 金滿堂甜品

芝麻糊 @ 金滿堂甜品

( 25-SEP-2012  TUE )

天陰陰   不過涼涼哋好舒服呀   最緊要最緊要係唔好落雨就得喇 ~

今朝搭遲一班小巴   加埋係阿伯楂車再兜入村   所以感覺好慢咁   但其實車程都係 15 分鐘 ~

食麵餐   超級勁飽 ~  

菇場忙呀   差唔多 11 點半先忙完   抖陣又 Lunch   不過未餓   1 點先食   食埋最後 4 塊排包   真係好驚   可能我真係唔太鍾意食包啦 ~

放工即走 lu   依家都係搭小巴番屋企   但依家同車有個男人同女人講嘢超勁大聲   我坐佢哋前兩行   都比佢哋嘈到頭都痛   下次都係坐佢哋後面好啲喇   都唔明點解啲人講嘢要咁鬼大聲   超級勁討厭 ~

今晚約埋家姐一齊去板長   咁我都番屋企等   家姐話 7 點 45 分左右到   所以我 7 點半就落樓   里奧大人就 8 點左右到   時間啱啱好 ~

家姐朋友焗嘅 Angry Bird 月餅 / 乳豬仔 / 迷利月餅

食完再去食甜品   之後家姐上嚟屋企坐陣   拎埋芝士同海鮮脆就走 lu ~  

里奧大人做公司嘢   我就用 Ipad 睇 Youtube   睇番以前嘅 Funny Videos   超勁好笑   所以睇到 12 點幾   之後里奧大人先沖涼   我都入房瞓喇   12 點幾對我嚟講係好夜喇 ~

叙苑粉麵茶餐廳 @ 九龍灣 ( 24-SEP-2012 )

( 24-SEP-2012  MON )

瞓到 8 點   搭小巴又差唔多 8 點 40 分先到   去到餐廳都已經差唔多 9 點   所以都係買早餐番菇場食算喇 ~

好在叫奶醬多   因為食唔哂   留番做 Lunch 都唔會太難食呢 ~

諗住 Lunch Time 瞓下覺   不過又瞓唔到   咁食埋件多士   之後又覺得餓   好在有蝦子麵   叮 3 分鐘就有得食   超勁方便呀 ~

4 點半先有嘢做   所以眨下眼就已經 5 點半 lu   即走 ~

去完明星買糖水   再去超市買下嘢就番屋企   里奧大人 7 點 10 分放工   問佢想食咩   一答就答話排骨炒麵   咁即係好想食囉 ~

無啦啦落好大雨   睇住黃雨   之後紅雨   又行雷閃電咁   最驚呢 ~

Pizza & Chicken (外賣) + ( 22-SEP-2012 ) + ( 23-SEP-2012 )

( 22-SEP-2012  SAT )

今朝 8 點起身   食埋早餐   番到菇場已經 9 點 10 分   好在老細未番 ~

真係無嘢做   所以成朝都係上網   又同 CC MSN   勁有網吧 Feel ~

話咁快就到 1 點   即走啦   約咗家姐同里奧大人去文記食嘢呀   之後再去買珍珠奶茶   再等埋媽咪買完蛋糕就上屋企開枱喇 ~

成日肚谷谷   原來真係每月一到   好感恩只有肚谷谷嘅唔舒服   無話作嘔作悶   最感恩仲要係食到嘢添呢 ~

打到 7 點就叫 Pizza   差唔多 8 點開餐   唔知係咪因為啲人出去倣節   平時星期六起碼要個半鐘   今次 45 分鐘搞掂 ~

食完差唔多 9 點   佢哋都走 lu   屋企又回復平靜呢 ~

( 23-SEP-2012  SUN )

今朝瞓到 10 點半   里奧大人都起咗身   不過我話唔番教會   佢又話瞓到 11 點買早餐比我食   講咗 2 次   我覺得佢肚餓啦   所以我都唔瞓   佢就即買早餐   大家樂同大快活都無咩早餐買   所以去美心買咗個包比我食 ~

食完沖涼又再瞓   無啦啦個肚痛   好在個幾鐘啫   之後瞓到 4 點幾又醒   其實今晚係教會懇親聚餐   不過我都係驚無啦啦肚痛   所以叫家姐代我去呀 ~

里奧大人 6 點 45 分出門口   我都醒 lu   起身食下包   睇下電視   話咁快 9 點   里奧大人話食完番緊屋企   都好快噃 ~ 

瑤柱節瓜 + 印尼撈麵 ( 21-SEP-2012 )

( 21-SEP-2012  FRI )

Happy Friday   我最鍾意星期五同星期六   星期日都 OK   不過諗到星期一番工就唔係咁想囉 ~

之前拎唔到免費報紙   所以食早餐好似好悶咁   依家有得拎報紙   我覺得睇完報紙真係精神啲咁架 ~

晏晝出去食牛丸米   之後又周圍行   行咗半個鐘先番菇場   爽呀 ~

里奧大人上咗大陸   所以我都唔駛咁急番屋企   放工去咗剪髮   再去三聯買簿   終於買到本心水記事簿   感恩感恩 ~

我其實諗住煮比自己食就算   點知 7 點半里奧大人打嚟話放工   咁我話煮咗節瓜咋   不過無餸   之後我話煮丁比佢食   加塊豬肉乾做餸   好過買嘢番嚟食呢   反正都係味精 ~

我食咗晚餐先   之後就抹嘢   差唔多 9 點里奧大人就番到嚟   我煮完麵比佢就熨衫   佢食完就幫手熨   我就沖涼喇 ~ 

是日懶餐 - 瑤柱節瓜 + 印尼撈麵

瑤柱節瓜 - 星期日買咗 4 個節瓜   諗住會整   點知想整嘅時候已經爛咗 2 個 lu ~ 

印尼撈麵 - 就過期啦   要快快食 ~

住家飯 @ 媽咪屋企 ( 20-SEP-2012 )

陳皮蒸鮑魚仔

茄汁花蝦

蒸黃花魚

煎鹹魚 (孟加拉)

豉油雞 (外賣)

炒小唐菜

炒芽菜

紅棗黑豆塘虱豬展湯

( 20-SEP-2012  THU )

今朝行去搭小巴   又撞到 Ivy   傾咗幾句就走人喇 ~  

如果唔兜入村載客   真係 10 分鐘肯定到餐廳   最驚喜係原來可以喺餐廳門口落車    一落車就即入餐廳   真係好過搭的士 ~

早到就食米粉餐   其實唔餓   所以食完太飽   有啲後悔叫米粉餐 ~

菇場靜   已經令人好想瞓   加上又好凍   所以更加令人想瞓   8 卦個位係對住窗口嘅   佢對面同事個位最正   背向窗口   真係做咩都無人知   所以 8 卦又見到佢瞓覺   我 Partner 最勁   老細會行過佢面前個位   佢都夠膽瞓   另一個嚟咗幾個月嘅同事   又係成日瞓   真係差唔多日日 2 點幾就瞓   係咁中   依家就托住個頭扮望屏幕   係 8 卦上次見到話我知   我自己唔舒服先咁中   但我真係有個唔舒服嘅衰樣比人知嘛   佢哋唔係喎   瞓前瞓後好精神   其實咁樣瞓真係唔係咁好啦   老闆可能見到   不過唔開口話妳咋   自己都要醒水啦   比老細開口話話就唔好嘛 ~ 

Lunch 食蝦子麵   之後再陪 8 卦去買零食   好在買完零食就番菇場   因為落雨呀 ~

里奧大人上大陸   之後會喺深圳見客   所以應該可以 7 點幾 8 點番到屋企   不過我應承咗番媽咪屋企食飯   所以忍痛唔陪佢啦   哈哈 ~

7 點半里奧大人話已經喺九龍灣   平時又無咁早   真係次次我唔番屋企佢就會早番咁嘅 ~   

同家姐差唔多 9 點就走喇   番到屋企里奧大人已經食完嘢做完公司嘢 lu   等我沖完涼   可以陪我睇電視   好開心呀 ~

KFC @ 九龍灣 ( 19-SEP-2012 )

( 19-SEP-2012  TUE )

天氣清涼   真係心情都好好呢 ~

食完早餐再嘆份報紙   真係好鬼正 ~ 

菇場靜   但其實我好精神   不過差唔多 12 點又作眼瞓   好在等多半個鐘就 Lunch Time   食完 Lunch Box 又好精神噃   可能頭先餓呀 ~

放工去針灸   7 點半走得   約埋里奧大人喺九龍塘地鐵站等   勁想食壽司   不過無帶 Coupon   所以唔食住   去 KFC 食   因為 2 人餐好抵   $55 食到飽上腦呀 ~   

泡菜雞柳 ( 18-SEP-2012 )

( 18-SEP-2012  TUE )

依家諗住搭小巴番工   個人真係無咁掹咁呀   因為知道大概幾時有車   同埋如果真係無車   可以轉另一架小巴仔番工   再唔係就搭番地鐵   不過   最開心係可以同里奧大人一齊行去地鐵站呀   咁樣又可以傾下偈嘛 ~

如果搭到 8 點 20 分班車   咁架小巴又唔入村嘅話   基本上 10 分鐘已經到餐廳   咁就可以慢慢嘆早餐喇 ~

做咗陣嘢又等 Lunch Time   今日出去食粉   再去銀行拎卡   之後再去萬寧買幾 Pack 高露潔牙刷   好感恩係出位價呀   我覺得萬寧出位價嘅嘢真係好平 ~

番到菇場去洗手間時   咁啱會計部新同事又一齊   佢話菇場靜得好恐怖   無聲嘅   又無人同佢食飯   不過佢只係做 Part Time   所以都無咩所謂   用 "恐怖" 嚟形容菇場氣氛真係好搞笑   不過真係妳唔現場感受過   又真係唔知菇場係幾咁靜呢 ~

放工即走   番到屋企抖陣就預備晚餐   之後拖地   熱熱地所以又開冷氣   依家天氣其實真係好舒服   如果我唔駛拖地煮飯   應該唔駛開冷氣架喇   自然風真係好鬼正 ~

感恩里奧大人 7 點 15 分就放工   咁 8 點就可以一齊食飯 lu ~

是日懶餐 - 泡菜雞柳

泡菜雞柳 - 1 塊雞柳 + 2 湯匙泡菜 + 2 湯匙韓式辣醬   估唔到出蹳嘅效果係微辣   正呀   我超愛辣   但可惜食完就火燒後爛   所以今次辣度係啱啱好   太辣里奧大人就頂唔順架喇 ~

搞掂哂沖完涼差唔多 9 點   依家多數用 Ipad 睇嘢   無理由買咗唔用嘛   哈哈   睇番之前啲類似 "笑笑小電影" 呢啲   整鬼人真係好好笑   佢哋啲樣真係好驚   之後知道係比人整鬼就喺度傻笑   我覺得外國人先會咁玩得囉 ~               

煎釀三寶 + 南瓜粟米栗子豬骨湯 ( 17-SEP-2012 )

( 17-SEP-2012  MON )

尋晚去咗 2 次廁所   瞓得麻麻哋   好在都精神 ~  

好有秋天嘅感覺呀   清清涼涼超勁正 ~

諗住搭小巴   點知送車尾   之後無啦啦搞肚痛   即去商場   之後去到小巴站再睇下時間   又係啱啱走咗一班車   差唔多 9 點先落車   快快食埋早餐就番菇場喇 ~

Lunch 叮蝦子麵再食隻大蕉   好似好健康咁 ~

媽咪工人朝早整爛咗廁所水箱   之後個工人好驚   因為又做錯嘢   咁放工番媽咪屋企   睇下發生咩事   家姐差唔多 7 點番到嚟   我同佢了解咗件事就各自歸家 lu ~

里奧大人叫我唔好煮飯   不過我又好驚出去食到太飽   又飲唔到湯   同埋番到屋企成 9 點幾   9 點幾飲太夜喇   所以話不如買煎釀三寶再煮出前一丁好過 ~   

番到屋企抖陣就整嘢喇   好感恩里奧大人 8 點半就番到屋企   因為真係想早啲飲湯呀   太夜飲又要成日去廁所好慘呢 ~

是日懶餐 - 煎釀三寶 + 南瓜粟米栗子豬骨湯

煎釀三寶 - 叫里奧大人番屋企前去文記買   新鮮熱辣好好味呀 ~  

南瓜粟米栗子豬骨湯 - 尋日煲㗎   煲湯多數分兩餐飲   今次煲得 Very Good 呀   因為之前兩次衰咗呀   所以今次無衰到   好開心呀 ~

泰北美食 @ 九龍城 ( 16-SEP-2012 )

碎肉生菜包 - 我成日覺得呢個餸無咩味咁   因為啲肉白雪雪   但其實可以係好辣嘅   同埋我唔鍾意碎肉   多數肥嘛   不過里奧大人好有興趣試   就試下啦   肉佢最愛   可惜呢次整得好鹹

我最愛嘅辣椒粉   以前真係一更更咁落   依家就落 1 更唔夠   無計啦   年紀大   再加埋做完手術   都係要錫身喇 

拚盤 (蝦餅 / 蝦卷 / 蝦片) - 我唔想食扎肉   老闆娘話要睇下廚房會轉啲嘢囉   不過都無轉到嘅   只係少咗扎肉   但里奧大人就話份量就多咗囉  

牛丸冬蔭功湯金邊粉 (大辣) - 今次咩事呀   失哂準呀

泰星加啤酒 (大)

( 16-SEP-2012  SUN )

10 點起身   食完早餐   番屋企沖涼   之後就番教會喇 ~

1 點完畢   我去街市買煲湯料   里奧大人就番屋企做公司嘢 ~

番到屋企即煲湯   差唔多 3 點就去大快活食 Tea   食完行陣就番屋企   因為唔知里奧大人做唔做得哂公司嘢   如果做得哂就出九龍城食泰菜   做唔哂就我煮飯呢 ~

佢做公司嘢   我就熨衫啦   好感恩佢做得哂呀   飲完碗湯抖陣仲可以瞓本個鐘添呢 ~ 

6 點 15 分出發   感恩去到有巴士   好快出到去呀 ~  

食到太飽喇   所以要散下步   再行埋九龍城廣場   因為我想去十蚊店呀   不過依家都無 $10 嘢好耐啦   所以都改埋名叫 Living Plaza   樣樣 $12   不過咁樣都係抵嘅   因為質數唔差   同埋有啲嘢平平地買嚟玩下都幾好呢 ~

之後再殺入去 Jusco 買 2 對拖鞋   咁我諗住拎定張 Aeon 卡出嚟先   點知緊張得滯搵唔到   要停喺度   Dup 低個頭好認真咁搵   衰里奧大人整鬼我呀   因為我頭 Dup Dup 搵嘛   唔知企咗喺邊   當我搵到時   佢手指指我右邊   我正想隊咗張卡去右邊時   以為真係 Cashier   望到原來係煮食爐 Promotion Counter 嚟㗎   好在我縮得切   唔係樣衰到爆   之後里奧大人一路行一路笑   真係丫 ~

都唔記得開咗間 Jusco   都幾闊落   同埋最正係無咩人   可能 9 點啩 ~ 

又係搭巴士番屋企   又係沖完涼再食尋晚買嘅凍芝麻糊   真係超級飽呢 ~

香港濕地公園 @ 天水圍 + 好到底麵家 @ 元朗 (PART 2/2) ( 15-SEP-2012 )

蝦子撈麵

雲吞麵 - 得豬肉嘅雲吞   叫多碟蠔油生菜

難得山長水遠入到天水圍   所以又搭番 264M 去埋元朗行下喇   由天水圍去元朗近嘛   如果由九龍灣去又覺得好遠咁呢 ~

一落車見到勝利牛丸   里奧大人話想食呀   不過我唔食   因為仲好飽 ~ 

食完周圍行   見到正隆行又買下嘢食   之後再去通利琴行幫媽咪買飛   買完就行去千色店   次次去千色店都買到嘢比家姐   感恩呀 ~

諗住去三聯買簿   之後里奧大人走嚟話第一次感覺到書局咁嘈   花市咁   話誠品都唔知係咪咁嘈   不過我睇啲專欄作者都話誠品好似街市咁   所以真係無咩興趣去   但如果啲書平就會去買囉   我唔會同錢作對嘛   哈哈   不過希望遲啲唔係咁啦   台灣誠品真係超級正   我呢啲唔睇書嘅人都覺得 2 個幾鐘都唔夠喉呀   今次去三聯   最開心係拎到工聯會課程呢 ~  

行行下又見到好到底麵家   家姐之前同我講話呢間嘅蝦子撈麵好正   仲諗住我哋都應該搵唔到   點知比我地見到   即入去試喇   如我所料   里奧大人就麻麻哋蝦子撈麵   佢都係鍾意食濕濕哋嘅嘢呢 ~ 

食完再去買大蕉同皇帝蕉   仲諗住好平   點知我覺得係貴添呀 ~ 

失策失策   無帶環保袋   買咗 4 袋嘢無手拎喇   所以買埋豬肉乾同芝麻糊就搭 268C 番屋企喇 ~ 

手攰腳又攰   估唔到巴士仲要 Full 哂   好在等咗 10 分鐘就有車   好感恩仲有孖位坐添呀   番到屋企即沖涼呀   之後再食芝麻糊   再睇 "造王者" 大結局   爽呀 ~ 

家姐一生最愛嘅八哥   總知係八哥嘅嘢就好鍾意 
小老闆紫菜 ($10/包) - 買咗 2 包冬蔭功味   1 包蕃茄味同 1 包原味
半磅幾原味夏威夷果仁 ($58) / 1 磅幾珍珠李 ($25)
1 磅幾紅燒魚柳 ($55) / 1 包龍眼肉 ($48)

7 隻大蕉 ($22) - 我平時買開係 $2 隻咋   仲要係超巨   不過見呢度有就買啦

7 隻皇帝蕉 ($18) - 我其實好少買皇帝蕉   因為次次見到都唔靚   所以里奧大人見到就想買   因為佢鍾意食   咁就買啦   一樣咁貴   
1 磅蜜汁豬肉乾 ($80) - 兩年幾時間   由 $6x 買到依家 $80 一磅  

香港濕地公園 @ 天水圍 + 好到底麵家 @ 元朗 (PART 1/2) ( 15-SEP-2012 )

( 15-SEP-2012  SAT )

每月最期待嘅 Off 終於來臨了   今朝同里奧大人自然醒   不過都係瞓到 10 點咋   咁都好   早啲起身   時間好用好多㗎 ~
  

我望住呢幾箱出前一丁   覺得有啲 唔同   但又諗唔到有咩唔同   之後終於諗到   平時喺超市嗰啲箱係無印住 "餐廳專用" 呢 4 個字   之前里奧大人都講過話佢同事開茶餐廳   出前一丁都分唔同級嘅呢

里奧大人一早諗定同我去濕地公園   所以食完早餐   番屋企沖涼   之後就出發喇 ~

搭 269C 再轉 264M 就直接到香港濕地公園   都幾方便 ~

去買飛嗰陣   有個女人問有咩嘢睇   係咪只係啱小朋友睇   我話我都係第一次嚟咋   其實我想講埋   都一場嚟到啦   $30 入場又唔係貴   總好過白白嚟一趟就咁走嘛 ~

售票處

影相時見到兩隻蜻蜓交配   可惜飛得太快   點都影唔到

入去喇 

我哋去到都差唔多 1 點 45 分   咁見到有餐廳就食埋嘢再參觀   仲以為係主題餐廳   原來只不過係大家樂 ~

感恩里奧大人搵到窗口位   對住咁嘅環境食嘢真係唔錯  


白鷺

雖然間間大家樂都係咁嘅格局   但覺得呢度好有環保 Feel 咁   哈哈

事實真係無人講嘢大聲   有好幾張枱都係一家大細   但啲小朋友都好乖   唔會亂走亂叫

完差唔多 2 點半喇   入濕地公園行喇    行下睇下   差唔多 4 點半就走喇 ~

"貝貝之家"   我完全睇唔到貝貝呀   後尾里奧大人指比我睇先知咋

合埋口嘅貝貝


我影完之後佢就開口   乖喇   之後佢好耐都無合埋個口   所以我覺得我相當好彩   可以影到佢合埋口   哈哈

入到濕地   原來係望到天水圍屋村   咁樣唔得大自然 Feel 喇

好曬呀   不過我又唔會開遮   嚟得呢啲地方就唔驚曬囉   同埋開遮好阻住人咁


唔記得咩花名   但我覺得佢個樣好肉酸同好恐怖   好似啲會食人嘅花咁

我超級鍾意色彩繽紛嘅花  之後睇番介紹   原來有毒性   不過里奧大人話係唔同嘅花喎

白色流星槌 (水團花)

當我中個頭埋去睇其他花嘅時候   里奧大人喺後面問我: 妳唔驚咩 ?!
我即刻 Tun 後   之後佢向上指   好大隻蜘蛛呀   個蜘蛛網仲好大個   超級恐怖   之後好多人途經都嘩然   我相信可能得我一個無為意   發雞盲唔通 ?!

原野漫遊徑   個名好勁咁 

 

魚呀


一片綠悠悠   舒服


後面帶帽姐姐同黑超哥哥係濕地嘅人員   介紹濕地所有嘅嘢   唔知係咪叫導賞員呢   我聽到話蜻蜓喺記錄入面係有 76 款唔同品種   聽完都唔會去查記錄   因為睇見蜻蜓都毛管動呀   哈哈


爆竹花 - 我第一次見咋  
 

蓮花池 ?!

 

水瀨的便便



蛇皮

再行入啲睇

喺觀鳥屋睇白鷺   有 2 層   地下果層係比啲人影相   樓上嗰層就有望遠鏡嘅   我初初以為支望遠鏡咁大支  又咁靚   原來係呢位哥哥仔嘅大炮嚟   真係就咁睇都覺得重   隔離幾位都係大炮   不過無佢咁勁咁靚   其實之前去餐廳   個個都拎住支大炮   一家大細影嘅又係咁   阿叔又係咁   


彈塗魚 & 招潮蟹  

里奧大人入咗去蝴蝶園   我就企喺條橋仔度享受涼風之際   聽到有位阿嬸話: "條魚大啲可以食㗎喇   咪即係街市見到啲泥鰍之嘛"   真係聽見都無癮   咁得意嘅魚仔   係都要拉埋落食嘢度嚟講嘅   嘔心


我講明唔入蝴蝶園   我好驚周圍飛嘅物體   不過里奧大人話個蝴蝶園無料到   得幾隻蝴蝶喺度飛咋   但蟻就好多好多好多好多囉   仲恐怖

浮橋 - 溫馨提示話BB車同輪椅不得進入   我仲以為條橋會郁嚟郁去添   因為我諗緊行唔行呀   我驚嘛   但其實條橋好穩陣嘅   可能窄   如果坐輪椅入   就會阻住後面嘅人向前行呢  


包到實一實嘅工作人員   包又熱唔包又曬 

4 點喇   係時候要走   其實因為無嘢想行  哈哈
  

太熱太口渴喇   所以再去大家樂飲杯嘢   嘆陣冷氣先走呢   叉完電真係舒服好多呀 ~

呢日未完㗎 ^^