咖哩薯仔雞扒 + 洋蔥炒意粉 ( 10-SEP-2012 )

( 10-SEP-2012  MON )

唔知係咪紅蘿蔔湯太利尿   起身去咗 2 次廁所   之後瞓得唔係咁好喇 ~

星期一真係中下中下咁番工   短短車程都好想瞓 ~

早餐食奶醬多   因為好攰   唔想咬咁耐 ~

今朝真係超眼瞓   即使飲咗咖啡都好想瞓   加上菇場咁嘅氣氛   如果比我即瞓   我肯定即刻瞓得着 ~

終於 Lunch Time   拿拿聲趣食埋個 Lunch Box    洗埋再上陣網   試下合埋眼瞓   真係瞓到呀   瞓咗 20 分鐘   真係精神好多喎 ~

放工去超市買洋蔥   今次又比我買到個批咗皮嘅洋蔥   之前買嘅時候預咗無咩洋蔥味喇   點知原來都好新鮮   一路切一路喊   所以今次又再買   又係好新鮮   感恩感恩 ~

行到出去聽到好嘈   原來有個女人喊哂口好大聲講嘢   因為係鄉音   唔知佢講咩   但見有啲人堆埋一齊   之後聽到話佢唔見咗個仔   無幾耐察人到咗   佢又好鬼激動大聲講   察人示意佢唔好咁大聲   佢正想講話唔見咗個仔嘅時候   佢個仔就跟咗位叔叔出嚟   應該係叔叔叫佢番媽咪度   咁個女人想鬧個仔嘅時候   察人又示意個女人唔好出聲   佢就搭住小朋友嘅膊頭講嘢   我唔知佢講咩   我離遠見到佢咁嘅動作 ~  

我其實好憎啲父母咁樣   明知細路仔係頑皮會周圍走   妳就拖實佢啦   到有事就呼天搶地   無事就鬧個細路點點點    又唔好好諗下係咪自己教得唔好喎 ~

番到屋企 6 點半   灼好意粉就 Hea 下   7 點半里奧大人打嚟話收工   之後到有線打嚟話上嚟整嘢   我諗住今晚會好他條煮嘢   不過有人整嘢   我無理由喺廚房炒嘢家嘛   但我都入咗去切洋蔥   佢差唔多 8 點先整完    我又要清潔   所以里奧大人番到嚟屋企仲未食得 ~ 

是日懶餐 - 咖哩薯仔雞扒 + 洋蔥炒意粉

咖哩薯仔雞扒 - 用 "田師傅" 咖哩醬   再加 3 條指天椒   1 塊雞扒 + 1 條司華力腸   隔咗一晚夜   薯仔雞扒入哂味   超勁正呀 ~ 

洋蔥炒意粉 - 其實我諗住將洋蔥切到超細粒   咁用嚟炒意粉係好正   不過頭先計錯時間   所以無心機切到咁細粒囉 ~

洗埋碗就抹書房抹櫃   出咗一身汗   沖個涼再出嚟嘆冷氣真係好鬼正呀 ~