潮樓 @ 旺角 ( 31-MAR-2013 )

滷水鵝片 (例牌) - 呢度 $80 一碟   同標記差唔多價錢   但環境服務味道就潮樓好好多啦   標記坐得唔舒服   但都要加一服務費

玉蘭菜甫炒飯 - 表弟都鍾意食炒飯   呢個炒飯好味呀   好乾身   我炒到咁好食嘅話   里奧大人必定開心到流眼淚呀
海皇冬瓜盅 - $68 咋   4 個人食都食唔哂

鮑魚肉碎粥 - 表弟婦食   我哋無食   佢要食清清哋呢  
鹹酸菜 - OK 呀   因為我哋其實未餓   食呢啲等自己開胃啲   哈哈

功夫茶 - 表弟婦每次飲茶   都會問係咩茶   好似好鍾意飲茶咁噃   呢度茶比較難解釋   哈哈

( 31-MAR-2013  SUN )

加拿大嘅表弟同表弟婦前晚到咗香港   所以今朝同埋姑姐姑丈一齊過黎媽咪屋企附近飲茶   約咗 10 點   所以我哋要 9 點鐘起身梳洗   家姐仲勁   9 點 20 分已經到咗酒樓 ~

姑姐佢哋差唔多 10 點先到   依家好好多喇   以前佢哋成日約 9 點到酒樓   難得假期   真係想瞓耐啲嘛 ~

好在里奧大人喺度咋   我都唔知原來表弟婦係智利人   表弟中文又唔得    不過識聽唔識講   都算勁喇 ~

全程由里奧大人做親善大使啦    見佢哋傾得十分之開心   未停過   咁都好   原來佢哋係 Honeymoon   首站係香港 1 星期   之後去越南 2 星期   最後去夏威夷 1 星期就番加拿大 lu ~

食完就上媽咪屋企坐喇   又文化交流下咁啦   我真係勁羨慕外國啲生活   唔係成日都做做做   星期日真係休息唔做嘢   咁之後傾到里奧大人大陸 Office 啲同事   佢話佢哋食完就會有半個鐘瞓覺   表弟婦問佢係點瞓   好難想像呀   咁里奧大人話全公司會燜哂燈   之後啲同事就會拎 Pillow 放喺枱就瞓㗎喇   表弟婦覺得好 Funny ~

差唔多 2 點幾   姑姐姑丈想帶佢哋去志蓮靜苑   之後再由大表哥帶佢哋上山頂   但落雨濕濕   去山頂真係無咩嘢睇到   咁本來里奧大人想約水姑嘅   但水姑又唔得閒   所以里奧大人就做表弟嘅 Tour Guide 喇 ~

坐的士去志蓮靜苑   行完之後   表弟話想去九龍城寨   不過我同里奧大人都唔識   但表弟話有 Map   到番轉頭我哋要跟佢去呀   呵呵   不過啲雨都開始大喇   所以去荷里活廣場食嘢先   再諗諗去邊 ~

去越棧食 Tea   再周圍行   帶佢哋去 Uniqlo 同 H & M   去到 H & M 排隊比錢嘅時候   有個女仔望住我   我又望住佢   佢同我笑   其實嗰下我好驚   因為心諗無啦啦做咩同我笑   但我又覺得佢好熟面口   以為係里奧大人個朋友   之後我再冷靜啲諗一諗   原來係我同事   佢唔化妝個樣   我完全認唔到呢   真係好邪   上次我放假喺九龍灣又見到佢   今次放假去鑽石山又見到佢 ~  

香茅豬扒越式湯濛 - 都幾多豬扒   碎上就最好啦   成塊咬好麻煩

意式紅豆奶茶 / 綠茶咖啡 - 個 Menu 影杯綠茶咖啡好靚   好有層次   原來真實係落色素

最後同佢哋去女人街   夠哂 Local 喇啩   不過來來去去都買嗰啲   佢哋無咩興趣   之後再去波鞋街   佢哋話美國仲平 ~  

本來諗住去九龍城食泰菜   但佢哋無車番屋企   所以最後決定去潮樓   因為有得 Book 位   如果無都唔知去邊食好   無理由帶佢咃食西餐嘛 ~

又係食   不過表弟婦腸胃唔係咁好   所以食好少嘢   同埋要食清啲嘅嘢   咁又係   旅行最驚水土不服   都係小心啲好呢 ~

差唔多 9 點就走喇   送佢哋到地鐵站   之後我地就坐小巴番屋企喇 ~  

今日好鬼攰呀   番到屋企即沖涼   好在可以休息埋聽日呢 ~   

Pizza Bird 脆意雞 (外賣) ( 30-MAR-2013 )

黑松露蒜香雞柳意粉

海鮮闊條麵

環遊世界 (薄批)

( 30-MAR-2013  SAT )

今朝約咗媽咪同家姐去稻香飲茶   所以我 9 點 10 分起身沖涼洗頭就落去稻香攞位   估唔到里奧大人都醒埋   因為我諗住佢瞓到好晏   打包點心比佢食算呢 ~

要搭枱呀   唔係唔知要等幾耐   都唔想嘥時間等囉 ~

媽咪同工人到咗先   之後就到里奧大人同家姐呢   飲到差唔多 12 點   里奧大人同媽咪上屋企先   我就同家姐去美心拎蛋糕喇 ~

鮮蝦腐皮卷 / 翡翠叉燒腸 / 鴛鴦雙潮 / 川汁抄手 / 鮮蝦炸雲吞 / 豉汁蒸鳳爪 / 鹹肉糭 / 黃金銀絲卷 / 香煎地瓜餅

抖陣就開始打牌喇   3 點食 Tea   咁我就煲埋中藥   之後再打 ~  

打到 8 點開餐   之前諗住同媽咪去鴻星   但估唔到媽咪話想食 Pizza   咁仲好   因為我真係麻麻哋中菜呢 ~

9 點幾佢哋都走喇   仲落緊毛毛雨   所以叫里奧大人幫手送媽咪佢哋搭的士   咁我就執嘢喇 ~

難得假期   里奧大人又 Relax 喇   咁都好   幾驚又話要做公司嘢呀 ~

太興 @ 九龍灣 ( 29-MAR-2013 )

魚香茄子肉鬆煲 - 好惹味呀   送飯一流

回味菠蘿咕嚕肉 - 我覺得好似豬頸肉咁呀

青檸柑梅冰 - 好甜

( 29-MAR-2013  FRI )

超勁開心呀   連續 4 日假期終於開始喇 ~

瞓到 10 點半   今朝去麻酸樂食早餐   坐得好舒服同埋好靜   唔知係咪因為好多人去哂旅行呢 ~

特級炸醬米線 - 見到 Menu 有隻辣椒   仲以為辣   原來係甜嘅   配米線好怪呀

腸仔煎蛋配牛角酥 - 凍冰冰嘅牛角包   唔係牛角酥

午餐肉椒醬粒粒公仔麵 - 無特別

咖啡 - 好飲

食完就番屋企抖陣   呢排個人真係好攰咁   完全無動力做家務呀 ~  

抖到 1 點半就去牛頭角睇中醫   睇完都 2 點半喇   之後 Join 埋里奧大人喺屋企樓下等   諗唔到食咩   又去金姆指 lu ~

里奧大人繼續做公司嘢   我就灘抖   家姐同事比咗太興 $40 Cash Coupon 比家姐   佢唔要就比我   所以今晚去太興食飯喇 ~

今晚里奧大人終於可以 Relax 喇   睇埋戲都成 12 點幾先瞓   假期真係好唔想咁早瞓呢 ~

住家飯 @ 媽咪屋企 ( 28-MAR-2013 )

鴨舌

冬菇蠔豉燜雞翼

龍躉仔

炒椰菜花

紅蘿蔔粟米栗子豬筒骨湯

炸腰果


幫家姐買嘅牙膏   買一送一抵呀

( 28-MAR-2013  THU )

番埋今日就連放 4 日假   心情真係超級特別好呀    如果唔係潮濕天氣就更加好添呀 ~

好餓呀   所以食麵餐   之後 8 卦打嚟   又一齊食喇 ~

菇場又無嘢做   即係唔駛郁   所以好鬼凍呀   隻手僵硬哂   真係打 Keyboard 都辛苦呢 ~

Lunch Time 未餓   但就唔買嘢食喇   食埋前日買嘅朱古力蛋糕就算喇   唔想嘥嘢 ~

里奧大人今日見客   見完之後就大把嘢要 Follow Up   都好遲番屋企   咁我都番媽咪屋企食飯 lu ~

放工先落大雨   去到巴士站即有車   但都差唔多半個鐘先去到牛頭角呀   拎完中藥就即刻去媽咪屋企喇 ~

家姐又係超勁塞車   差唔多 8 點先開飯   好在聽日唔駛番工啫   可以坐耐啲 ~  

9 點幾就喇   里奧大人就 10 點幾先番到屋企   食個杯麵當晚餐   真係慘 ~

香港仔魚蛋粉 @ 旺角 ( 27-MAR-2013 )

( 27-MAR-2013  WED )

呢兩晚唔知係咪夜晚飲咗葡萄適   瞓唔着呀   真係慘 ~

今朝好凍咁噃   着厚抓毛衫 + 毛毛靴   咁就啱啱好喇 ~

早餐食芝腿治烘底   食咗一半唔想食   不過又唔想拎走   所以食埋去啦   好鬼飽呀 ~  

菇場靜啦   但好在又唔眼瞓喎 ~  

1 點有啲餓   就咁叮個蝦子麵就算喇   懶得落去買嘢食 ~   

差唔多放工   Admin 同事叫所有同事去 Show Room   原來老闆同阿 Head 要同個仔番美國讀書   所以要離開公司呀   好唔捨得添 ~

今晚放工去旺角睇醫師   我話個肚仲有啲赤赤痛   佢即開杯茶比我飲   飲完真係舒服好多   同埋好肚餓呀 ~

諗住食餃子   附近又無   所以去香港仔魚蛋粉食牛什河   湯底好鬼鹹   鹹到有啲苦   驚驚呀 ~

食嘢之前見到架 Full 哂嘅 2A   所以諗住食完就坐 13D 番屋企   點知去到巴士站   離遠見到有架無咩人坐嘅 2A   即跑番去 2A 站呀   感恩感恩可以坐到呢 ~

番到屋企開機洗衫   之後就沖涼喇   體力仲未回復最佳狀態   所以都係抖下算喇 ~

里奧大人慘啦   8 點喺大陸幫同事拎辦番香港 Office   所以差唔多 10 點半先番到屋企   食埋個豬柳蛋漢堡   再預備埋聽日開會資料先沖涼   好在之後有幾日假期   佢可以好好休息   我又可以正正經經煮餐飯佢食喇 ~

杯麵 ( 23-MAR-2013 ) + ( 24-MAR-2013 ) + ( 25-MAR-2013 ) + ( 26-MAR-2013 )

( 23-MAR-2013  SAT )

今朝同 8 卦食早餐   不過我唔識去間茶餐廳   所以佢喺小巴站等我   再帶我去呢 ~

阿 Head 無番   後面同事又無番   超級勁 Free   不過我有嘢做啦   好在 11 點做完   有 2 個鐘頭抖下都唔錯 ~

唔怪得咁攰啦   終於每月一到   感恩都 OK   所以放工同里奧大人坐小巴去 Mega Box 飲茶喇 ~

原來好多酒樓都 5 折   咁都好多選擇   今次去試另一間 ~

前菜 - 有牛展粒

金脆帶子卷 - 一般   我覺得帶苦味

韭黃鮮蝦腸粉 - 都幾大隻蝦

甜酸炸雲吞 - OK 啦   我到目前為止   都係覺得鴻星好食啲

蛋黃千層糕 - 超級正呀   呢個千層糕真係兒時回憶   依家好少有酒樓做呢   所以見到即叫喇 

蜜汁叉燒包 - OK 呀   因為我突然間好想食包

食完又行一陣喇   之後坐 Shuttle Bus 番屋企 ~ 

6 點沖完涼   個肚開始嚟料   要瞓喇   之後 8 點幾醒咗   煲番熱啲紅豆黑糯米比里奧大人食   媽咪尋日煲㗎   我又唔食得   所以迫里奧大人一定要食呢   整完之後我又瞓番 lu ~ 

( 24-MAR-2013  SUN )

個肚都仲痛呀   所以就係咁瞓係咁瞓   瞓到 5 點幾先想起身呀 ~

出廳睇電視   8 點又入房瞓番 lu ~

( 25-MAR-2013  MON )

個肚仲痛   所以都係請病假   喺屋企瞓番夠本呀 ~

瞓到 5 點   起身去睇醫生   之後番屋企沖熱水涼再食藥   啲藥令到我超級眼瞓   但唔知係咪瞓得太多   又瞓唔到喎 ~

里奧大人 7 點半喺大陸走喇   所以差唔多 9 點番到屋企   叫佢買隻茶葉蛋比我食   飽肚又方便   再食多半個杯麵   食完抖陣又瞓 lu ~

Big Cup 合味道杯麵 - 超難食   無味道嘅   下次買番正常 Size 算喇

( 26-MAR-2013  TUE )

要番工喇   個肚都有啲唔舒服   但都 OK ~

無啦啦又好凍呀   我又攰   所以都係打的番菇場喇 ~

食埋早餐先番菇場   之後又忙   因為做番尋日應該做嘅嘢 ~

Lunch 食朱古力蛋糕咋   乾爭爭   不過真係無嘢想食   旨在有嘢落肚囉 ~

又忙喇   好在好快搞掂   可以抖下喇 ~

放工超大雨呀   去完海皇買皮蛋艇仔粥就番屋企   沖完熱水涼就食碗熱粥   成身暖哂呢 ~

里奧大人差唔多 8 點先喺大陸放工   咁我 9 點幾又好似有啲餓   所以又叫佢買隻茶葉蛋比我食   食完真係夠哂飽喇 ~

稻香 @ 九龍灣 ( 22-MAR-2013 )

美龍三寶之一 - 上湯波士頓龍蝦伊麵   估唔到都幾大隻喎   同埋啲伊麵唔係腍 Pat Pat   唔錯唔錯

美龍三寶之二 - 西蘭花雙螺片   賣相同味道真係麻麻哋囉

美龍三寶之三 - 沙薑雞 (半隻)   無咩特別 

筷樂孖寶之一 - 點頭老虎斑   好大條呀   $98 都抵食  

筷樂孖寶之二 - 加 $1 可享用桂花乳豬拼盤

乳豬 - 太細件啦   好似人哋斬剩咗咁

叉燒 / 豉油雞 / 燒鴨 - 都係麻麻地   稻香燒味真係麻麻哋

陳醋雲耳 ?! - 酸酸哋   又有啲麻辣

( 22-MAR-2013  FRI )

又到 Happy Friday 喇   尋晚瞓得都幾好   好開心呀   因為之前瞓得唔太好呢 ~

天氣唔凍又唔熱   不過我都係着長袖   如果菇場好鬼凍   一陣冷親就麻煩喇 ~

早餐食腿蛋治烘底   無咩味   蛋味都無㗎   不過食脆脆豬果間餐廳好焗   我入咗去就行番出嚟   唔想焗暈呀 ~

又有 Lunch Box 喇   食完就上網喇   呢啲天氣真係令到人唔想出街 ~   

里奧大人上咗大陸   所以我約媽咪同家姐去稻香食飯   落車經過大班麵包   問家姐買唔買   佢話買   我就買啦   $18/3 個真係好抵   因為我係 $7~$8 嗰啲包嘛   本來幫佢買 3 個   不過好多都新鮮出爐   都忍唔住買多 3 個   因為我好料少見到新鮮出爐嘅麵包呢 ~

同媽咪 工人 6 點就去到稻香   到 6 點 15 分已經無咩位   好在早到咋 ~

芝士條 - 新鮮出爐   香到呢

家姐要 7 點先到   媽咪又話餓   所以我地叫咗個 "筷樂孖寶" 食先   咁等埋家姐嚟再叫個 "美龍三寶"   食下傾下   8 點半就走喇 ~

陪完媽咪搭車   再陪埋家姐搭車就番屋企 lu ~

番到屋企開機洗衫之後沖涼   里奧大人 10 點 45 分先番到屋企   陪多佢一陣   我都瞓喇   比佢自己 Free Time ~

住家飯 @ 媽咪屋企 ( 21-MAR-2013 )

冬菇蠔豉燜豬手

叉燒 / 燒鴨 (外賣)
炒洋芹

榴蓮 - 都好濃味   正呀

( 21-MAR-2013  THU )

又星期四 lu   下過星期四仲開心   因為連放 4 日假呀   勁期待呢 ~

早餐食芝士吞拿魚治烘底   正想食嘅時候   8 卦打嚟話嚟食   同佢傾偈   又比我知道佢真係咩都計到盡一盡嘅心態   真係頂佢唔順 ~

尋晚 10 點 45 分瞓覺   真係唔同啲呀下   精神好多咁呢   感恩感恩 ~

又有 Lunch Box 喇   鍾意食嘅餸做 Lunch Box 會覺得好好食   不過我有時都唔想帶 Lunch Box   因為玻璃飯盒真係好重呀 ~

放工即走 lu   凍咗好多呀   上星期又係星期四無啦啦好凍   不過轉季都預咗時凍時熱   快啲到夏季啦   唔想又凍又熱咁呀 ~

里奧大人唔駛上大陸   不過我都會番媽咪屋企食飯   里奧大人仍都好鍾意我番媽咪屋企食飯   話次次我去街   佢會特別早放工咁喎 ~ 

媽咪 5 點幾覆完診   所以去到媽咪屋企附近打比媽咪   原來佢都已經喺屋企附近   佢叫我上屋企先   不過我話等埋佢一齊上屋企   佢係咁笑   好似好開心陪佢一齊上屋企咁   好搞笑 ~

家姐 6 點 45 分番到屋企   7 點開飯   食埋生果真係好飽喇   食完唔郁真係好鬼易飽   仲想瞓添呀 ~

里奧大人 8 點打嚟話放工   咁我同家姐 8 點 15 分走喇   咁我可以陪埋里奧大人食呢 ~

尋晚先話熱要開冷氣瞓   咁我同里奧大人講今晚凍   唔駛開冷氣瞓喇   佢話梗唔駛啦   叫我望下佢   佢着住件抓毛外套呀   真係誇張   駛唔駛呀 ~

豆豉鯪魚炒油麥菜 + 蜜糖焗墨魚丸拚紅腸 ( 20-MAR-2013 )

( 20-MAR-2013  WED )

尋晚開冷氣瞓真係舒服好多   真係好怕半夜熱醒嘅感覺 ~  

今朝去拎報紙時   聽到 730 阿姐話比阿婆打呀   咁有一個女人攬住 730 阿姐   係咁安慰佢   好堅呀   阿婆打人   阿姐仲話 1 份報紙秤起值幾多錢呀   駛唔駛打人   不過喺九龍灣拎報紙啲阿婆同呀伯真係顛囉   衰啲講係蠻人   係咁衝住嚟搶報紙㗎   我間唔中就聽到啲人話駛唔駛撞人呀   我就親眼見個一個阿伯   阿姐一解開報紙咋   都未開始派   佢已經碌大對眼   係咁好大力扯份報紙出嚟   阿姐都驚咗佢呀   比佢拎呀   真係好驚阿伯心臟病   拎咪拎囉   但要排隊嘛   同埋唔好來回拎幾十次啦   好多檔報紙阿姐都唔會再比佢哋   阿姐話比人睇啦   唔好咁貪心   之後阿婆就會大聲鬧番人轉頭   呢啲真係恃老賣老   超級黑人憎呀 ~

好餓呀   早餐食五香肉丁腸仔公仔麵   個麵有啲腍   口感唔得   食完好驚 ~

菇場好多人上咗大陸   所以超級靜   之後聽到同事話   會計部同事肺炎   菇場又中央冷氣   個個又咳   我喉嚨又唔多舒服   但番到屋企又無咩嘢㗎喎   所以我覺得菇場好多菌咁呀 ~

晏晝未餓   所以出去行   行到 1 點就買包番菇場食   因為天黑黑   想落雨咁呀 ~  

放工去街市買餸   買完即番屋企   諗住快啲煮快啲食   差唔多 7 點半想炒菜嘅時候   里奧大人打嚟話電腦壞咗   可以放工   咁我都等埋佢一齊食啦   無咩幾何咁早嘛 ~  

是日懶餐 - 豆豉鯪魚炒油麥菜 + 蜜糖焗墨魚丸拚紅腸

豆豉鯪魚炒油麥菜 - 好似好耐無煮   同埋想清哂啲罐頭   不過豆豉鯪魚係清得好慢   因為唔會成日煮   太 Heavy 喇   所以已經比咗啲媽咪同家姐   唔係有排食 ~

蜜糖焗墨魚丸拚紅腸 - 用光波爐焗㗎   紅腸真係要煎先好味   條邊要脆先好味嘛   但焗就唔脆囉   里奧大人問我係咪烚添呀   可想而知口感幾咁正呢   哈哈 ~

搞掂哂就沖涼   呢排真係好攰咁樣   10 點半眼皮已經跌落黎   所以今晚 10 點 45 分要即瞓喇 ~

滷水雞翼 + 菜心 + 白果腐竹薏米豬肚豬骨湯 ( 19-MAR-2013 )

( 19-MAR-2013  TUE )

真係好驚呢啲天氣   潮濕又無風   搞到個人瞓得唔好   無咩精神咁呀 ~

早餐食奶油多   離譜呀   1 個月之內加咗 $4   由 $14 加到 $18   唔怪得我入去時少咗咁多人啦   如果同區咁嘅價錢   可以有好多選擇嘛 ~

我初初以為佢比咗鮮油多呀   咁我即刻睇張單個價錢係 $18   之前係 $16 嘛   咁鮮油多比普通多士又貴啲   所以再睇埋餐牌   先知又加 $2

喉嚨有啲唔舒服又頭痛   即飲杯 Hot Lemon   如果可以沖埋熱水涼之後瞓覺   幾咁好呢 ~

今日有 Lunch Box   食完已經 1 點幾   無得落去行 lu ~

朋友 MSN 我話稍後有狂風雷暴大驟雨   3 點幾無啦啦行雷   之後個天黑哂同勁大雨呀   雖然我知呢個星期係會落雨   但無諗過會咁勁囉 ~

放工即走啦   約咗媽咪工人拎嘢呀   其實好感恩   今晚我真係好唔想煮   好想休息   點知媽咪煲咗湯   又順便幫我買埋餸   咁我都可以舒服啲   唔駛行去買餸   唔駛買有得食喎   幾咁嘆呀 ~

是日懶餐 - 滷水雞翼 + 菜心 + 白果腐竹薏米豬肚豬骨湯

滷水雞翼 - 媽咪喺酒樓買㗎   我之前食過覺得好好食   所以媽咪又買比我喇 ~

菜心 - 媽咪幫我切埋   我就咁浸下就得   我懶到就咁淥就算喇   薑都懶得拍 ~

白果腐竹薏米豬肚豬骨湯 - 呢期媽咪好鍾意用豬肚同粉腸煲湯   我開始飲到驚喇   最搞笑係里奧大人以為係白果腐竹糖水   又真係幾似嘅 ~

里奧大人 7 點 45 分放工   咁就好喇   咁我搞掂哂嘢   沖埋涼都未到 9 點   起碼有 2 個鐘頭私人時間   佢又唔駛做公司嘢   咁一齊睇下電視   不過里奧大人好衰   成日睇無線啲電視劇集就會駁三駁四   我話做戲係咁㗎啦   駛咩咁認真   最大問題係影響到我嘛   所以佢即刻睇用 Ipad 睇其他嘢 ~   

11 點即瞓喇   今晚要開冷氣   無風真係好難頂 ~

Green Monday 菜甫炒豆角 + 豉油王韭菜炒麵 ( 18-MAR-2013 )

( 18-MAR-2013  MON )

早餐食芝蛋治烘底   但依家開始食到有啲悶 lu ~

出面就潮潮濕濕又無風   菇場就凍到着厚褸   真係兩個世界囉 ~

雖然今日係 Green Monday   但都買咗粉果   最多唔食啲肉   齋口唔齋心咁囉   因為就咁炒米粉真係好悶   同埋又唔想食白粥炸兩   星期一已經夠悶   真係唔想連食嘢都咁悶   睇嚟遲啲都可能放棄 Green Monday   改為唔食咁多肉算喇   又或者食白肉同海鮮算喇 ~

放工去街市買菜   其實勁想食超甜粟   但一個人又好難食哂 3 條   但又唔想留   所以最後都唔買喇 ~

番到屋企即浸豆角   之後切切切   切到發脾氣呀   好似切咗成年都未切完咁 ~

煮完都已經 7 點半   但又未餓   所以沖完涼先食 ~  

是日晚餐 - 菜甫炒豆角 + 豉油王韭菜炒麵

菜甫炒豆角 - 用海鮮醬 + 辣豆辣醬嚟炒   最緊要惹味   咁就會吸引到里奧大人   我對素食又無咩研究   又唔鍾意素雞同豆腐呢啲   所以選擇更少呢   煮素對我真係有難度呢 ~

豉油王韭菜炒麵 - $4 一份韭菜超抵   平時買 $3 都係佢嘅 1/3 咋   $3 同 $4 嘅分別真係好大   今次用 4 個蝦子麵嚟炒   但硬係整唔到出面食嘅深啡色   下次都係用番印尼甜醬油   色水真係好緊要嘛 ~  

里奧大人 9 點幾先番到屋企   等佢食埋   幫佢洗埋碗都 10 點幾   睇埋電視   11 點即瞓   因為真係好鬼攰呀 ~

明輝茶餐廳 @ 九龍灣 ( 17-MAR-2013 )

( 17-MAR-2013  SUN )

今朝里奧大人話唔多舒服   唔起身食早餐   想瞓多陣喎   咁我又約咗鐘點   點都要起身   咁我就同鐘點去食早餐   聯絡下感情 ~

其實我無咩胃口   一個餐肯定食唔哂   咁尋日約咗家姐今朝 11 點前會車 2 條廁紙比我   無耐家姐打嚟約啦   佢知我會食早餐   問我有無多士 ?!   實在太感恩喇   我就係唔想食多士同火腿奄列   問佢要唔要埋奄列   佢又話要   實在太好啦   我真係食唔落   唔想嘥嘢嘛 ~

11 點同家姐喺停車場交收   之後我番屋企   里奧大人又啱啱瞓醒   都番唔切教會㗎喇   咁我陪佢食早餐啦   我去拎位先   去到已經 11:25 喇   叫埋嘢   隔多 2 分鐘就聽到話停早餐呢 ~

食完去日本城買嘢就番屋企   一個早上   番咗屋企 3 次 ~

無啦啦頭暈暈   又唔眼瞓   唔知想點咁   好在鐘點黎咗幫手   咁我可以休息下 ~

里奧大人做公司嘢   之後又瞓晏覺   咁我灘抖啦   差唔多 3 點半先出去食 Tea   不過今晚我都唔煮飯   因為頭暈暈唔想煮呀 ~

希望里奧大人唔會喺呢 10 年都食呢個餐啦   我唔食   但見到都開始有啲驚   哈哈

7 點 45 分出去食嘢   諗住去佢地自己所講嘅 "強勢回歸" 麻酸樂試下   但有成 10 個人排隊   我唔會等囉   呢間嘢之前執咗   依家又開番   不過我覺得呢間之前都唔好食嘅   但里奧大人話可能轉咗師傅會好食啲呢   咁我都希望係嘅   多個選擇嘛 ~

我只係想食濕嘢   但唔想又去金姆指   所以去明輝食麵喇 ~

食飽行陣商場就番屋企 lu   想早啲休息 ~

標記樂園潮州粉麵菜館 @ 旺角 ( 16-MAR-2013 )

蜆仔肉炒韭菜花 - 我鍾意食韭菜花   不過里奧大人就麻麻   但呢個餸都幾惹味   所以里奧大人都 OK 

家鄉炒麵線 - 我問阿姐麵線係咩   佢話似米粉   同埋話好多人食喎   一上碟   里奧大人已經呱呱嘈   碟嘢好似打風咁呀    餸一堆麵線一堆   同埋全碟嘢係無味   好在有碟豆板醬咋    

  
滷水鵝片 (例) - 上次食已經覺得麻麻   咁再比多次機會佢啦   不過都係唔好食囉  呢間應該唔會再食㗎喇

( 16-MAR-2013  SAT )

今朝同 8 卦食早餐   同佢食早餐有個好處   係好少會遲到番菇場呢 ~

靜靜靜   靜到呢   好在番半日   啲時間好快過 ~

放工即走喇   約咗里奧大人喺九龍城等   我由菇場行去九龍城   慢慢行去   差唔多 20 分鐘就到   諗住去泰北美食   居然未開   超勁想食炸蝦餅嘛 ~

里奧大人話唔可以試另一間咪仲好   咁又係嘅   喺福佬村道 Join 埋里奧大人   好感恩呀   同里奧大人去食串燒   因為呢間係我想帶里奧大人食好耐呢 ~

味道都 OK 啦   但服務就差啲   隔離位嘅女人 Order 完   等咗 5 分鐘都走咗 lu   里奧大人話佢走都好正常   啲人愛理不理唔想做咁   真係好唔明白   點解啲服務態度可以咁差   咁樣真係影衰香港囉 ~

酸辣湯牛河 - 冬蔭功係蝦   所以無蝦叫酸辣湯   終於記得   個湯底都 OK   

串燒 - 蝦餅 / 泰國腸 / 雞翼 - 新鮮熱辣最好味啦   我食完泰國腸   之後里奧大人食啦   食剩一半無食   我話係咪唔慣啲味道   佢話係酸喎   我食嗰條無酸嘛   咁我試啦   真係酸   佢係咪咁好彩呀   哈哈 

串燒 - 牛肉 / 雞肉 / 豬肉 - 辣汁同沙爹汁 - 我係汁狂   真係可以食一啖蘸一啖汁   不過呢 2 碟汁就真係好唔掂   辣汁好鹹   沙爹汁無味   係咪特登咁樣先 Balance 呢 ?!

食完就去九龍城浸信會聽 "緒處理公開講座"   3 點開始   我哋 2 點 45 分到   估唔到要排隊等   幾驚無位呀   感恩好快入到去呢 ~

3 點開始   3 點半就聽完   因為我哋無聽公開答問呀   聽完就去旺角   一出到去就有 2A   行完波鞋街   再去旅行社睇資料   原來已經 6 點幾 ~  

去完 Come Buy 買嘢飲就去標記打冷喇   坐入面   不過我覺得有陣噏味   但無計啦   又唔想坐出面大門口位置 ~ 

食到超級飽   再周圍行   去樓上舖買埋瑜珈毯就走喇   樓上舖同街舖相差 $40 呀 ~

諗住坐 2A 番屋企   但里奧大人話唔企喎   見到巴士無咩位   話坐小巴番屋企喎 ~  

大家樂 @ 官塘 ( 15-MAR-2013 )

楊州炒飯 - 媽咪話之前食呢個炒飯   係好多蝦舖喺飯面   唔係炒埋一齊呢  但估唔到又炒得好味喎   好乾身

菠蘿咕嚕肉 - 快餐店食小炒唔好抱任何期望   但又估唔到幾好味喎   因為無咩肥豬肉   我試過去酒樓食咕嚕肉   全部係肥豬肉   一咬落口成口油呀   恐怖

( 15-MAR-2013  FRI )

起身真係覺得凍呀   又要着番厚棉衫同毛毛靴   想帶埋大披肩㗎   不過好似好誇張咁 ~

今朝去九龍灣天橋拎報紙   排隊到我拎嘅時候   有個阿婆坐咗喺地下   有個女人幫佢報警   到我拎嘅時候   另一邊啲人無啦啦伸手搶呀   有個女人一手搶咗 4 份添呀   太貪心喇   之後聽見話呀婆跌斷咗隻腳   個婆都起碼 80歲   又瘦又細粒   有個男人話妳唔好拎嘛   啲人顛㗎   唔好睇佢哋係阿婆阿伯   個個惡死到不得了   又成日推人   又唔排隊   又係咁搶啲報紙   條帶都未切斷已經係咁搶呀   係咪顛吖 ~  

早餐食芝蛋治烘底   超級飽添 ~

菇場靜呀   我發覺最靜嘅時候係 9 點半   正常公司朝早又最多人傾偈   仲未眼瞓嘛   但菇場 9 點半開始已經死氣沉沉囉 ~

終於到 Lunch Time   今日又有 Lunch Box   啲同事見我有 Lunch Box 就會好好奇   第一句會話咁好煮飯嘅   講到我成日唔煮飯咁 ~

里奧大人上咗大陸   家姐又 Annual Dinner   咁我又同媽咪 工人去大家樂食飯喇   本來想同媽咪去稻香食飯   但媽咪要睇 "心路 GPS" 大結局   唔想出去咁遠喎 ~

食到 7 點幾   之後我自己去阿信屋買零食就去媽咪屋企   傾下偈  坐到 8 點 15 分走 lu ~  

番到屋企拖地   沖埋涼就睇電視   里奧大人差唔多 9 點半就番到屋企   實在太好喇 ~

住家飯 @ 媽咪屋企 ( 14-MAR-2013 )

豉椒炒花甲


咖哩雞 - 今次就辣喇

炒菜心

龍躉仔

青紅蘿蔔粟米豬橫脷湯

( 14-MAR-2013  THU )

今朝凍凍哋咁噃   好似今晚仲凍添呀 ~

早餐食雪菜肉絲炒蛋米   呢間茶餐廳喺過年之後就每樣嘢加 $2   原來附近好多茶餐廳都係咁   減價就無人跟啫   加價實大把人跟啦   餐牌改完又改都花哂 lu ~ 

菇場唔忙   又等 Lunch Time   今日有 Lunch Box   不過早餐未落格   要慢慢食   好在係食炒麵   唔餓仲要食飯   會好滯咁 ~

里奧大人下星期要見客   要做好多 Present   所以唔駛上大陸   但都會夜放工   咁我都去媽咪屋企食飯 lu ~

家姐今晚好早番到媽咪屋企呀   所以 6 點 45 分可以開飯   食完飯再食生果   飽到要捧住個肚呀 ~

同家姐 8 點半走喇   凍咗好多呀   完全覺得突然有冬天嘅感覺   因為我尋日着緊中袖衫呀 ~

上車就打比里奧大人   佢差唔多到九龍灣   咁我陪埋佢食啦   去大快活食算喇   最緊要近   因為媽咪買咗牛仔骨同豬扒比我   好鬼重   唔想行咁遠呢 ~

中式牛柳餐 - 得幾粒牛柳   同埋我覺得茄子同脆肉瓜配甜酸汁係好唔夾咁呀

番到屋企都即沖涼   唔熨衫喇   雖然今晚無煮飯   但都唔知點解都係攰   睇埋電視   11 點就瞓 lu ~

蒜泥手撕雞 + Sambal 炒豆角 + 炸菜肉片炒麵 ( 13-MAR-2013 )

( 13-MAR-2013  WED )

又嚟潮濕   熱完之後又潮濕   之後又話會涼   呢啲天氣真係要好好保重身體呢 ~

早餐又食奶油多   今朝改飲奶茶   好在都 OK   菇場附近無咩邊間奶茶好飲   有間飲完勁想反胃   所以我先改飲咖啡囉 ~

菇場好多人咳   聽啲聲係應該病緊添   不過又唔戴口罩   好在唔係坐佢哋附近咋   不過中央冷氣   都會好易中招 ~ 

終於有嘢做   仲忙到 11 點半   抖陣又 Lunch Time 喇   幾咁快又過咗半日呀 ~

無啦啦好餓   第一次咁想食 Lunch Box 呀   尋晚食啲尖椒唔辣   但里奧大人就話好辣好辣   原來佢食哂啲辣呀    我今日食得 1 隻辣咋   佢好幸運呀 ~

放工唔駛買餸   番到屋企就預備晚餐   飲埋尋晚啲湯   抖陣就煮嘢喇   之後里奧大人打嚟話 9 點先放工   又係我自己食先   所以我食芝士麵   我覺得麻麻哋好食呢 ~

是日晚餐 - 蒜泥手撕雞 + Sambal 炒豆角 + 炸菜肉片炒麵

蒜泥手撕雞 - 用雞扒代替五花腩   我硬係覺得五花腩好肥咁   如果多人食都無所謂   但得 2 個人食就唔好喇   今次跟足食譜整醬汁   之前又買咗枝魚露同花椒油   終於用得着喇   我 Whatsapp 比家姐睇   佢以為我買番嚟   里奧大人口話好食   又係以為我買番嚟   幾咁識講嘢呀   不過我真係覺得好食㗎   可能我鍾意食蒜啦   生蒜比較辣口   再加咗 2 隻指天椒   所以里奧大人話好辣呀   呢兩晚佢都食辣   佢話要買番啲清熱嘢飲呀   所以我即拎罐 100 plus 比佢清熱   幾有效率呀 ~

Sambal 炒豆角 - 好懷念喺馬來西亞食嘅 Sambal 炒豆角   不過人哋整得好食好多 ~

炸菜肉片炒麵 - 尋晚剩嘅滾湯梅頭   加埋半包炸菜   用 4 個蝦子麵嚟炒   清哂啲蝦子麵   超勁開心呀 ~  

今晚只係開機洗衫   咩家務都唔駛做   11 點就瞓   唔錯唔錯 ~

尖椒釀魚肉 + 蕃茄薯仔肉片湯 ( 12-MAR-2013 )

( 12-MAR-2013  TUE )

今朝又潮濕   真係唔好喇啩   濕重個人會好攰囉 ~

早餐食扒芝腿治   我好鍾意食芝士   鹹鹹香香好鬼正 ~

番到菇場第一件事拎 Lunch Box 出嚟   漏哂汁呀   膠袋同食物袋都有汁呀   第一次咁咋   好在唔係擺喺手袋   唔係咩都無㗎喇 ~

呆住等到 Lunch Time   食完 Lunch Box 又 Hea 過到放工 ~ 

今晚去街市買餸   買埋聽晚餸   雖然街市唔係遠   不過真係唔想晚晚做同一樣嘢呀 ~

番到屋企就即刻醃魚肉同浸蕃茄   抖陣又要預備晚餐喇   今晚里奧大人 8 點半先放工   又係我自己食先 lu ~

是日晚餐 - 尖椒釀魚肉 + 蕃茄薯仔肉片湯

尖椒釀魚肉 - 前日見到 2 Pack 尖椒 $12 好似好抵   因為好靚仔   單買 1 隻唔平   最後番轉頭買   尋晚用幾隻嚟做配菜都幾辣   所以今晚就釀尖椒   好想食辣嘅尖椒呀   今次用蒜頭豆豉加磨豉醬做茨汁   香好多呀   里奧大人食咗 1 啖就話好好食   好難得佢話青椒好食㗎   不過就話辣囉   要食埋雪糕解辣 ~

蕃茄薯仔肉片湯 - 前日買咗 10 隻細蕃茄 + 2 個大薯仔   咁今晚就買多 $20 梅頭用嚟滾湯   我買嘅時候叫埋豬肉佬斬細件   佢問我點食   我話用嚟滾湯之後再炒   佢聽完好愕然呀   個咀形係講滾湯之後再炒   咁又幾離奇嘅   因為滾完湯嘅肉已經好 "鞋"   再用嚟炒又真係無咩人會咁嘅   但我唔想嘥嘛   留黎聽晚炒麵   同埋最估唔到係落埋水加埋材料   成煲滿哂   要分 2 餐飲呢 ~

食完拖地   再等埋里奧大人番屋企就開機洗珊瑚絨毯同枕頭   枕頭重得滯呀   所以架機好嘈   後尾里奧大人話以為洗好輕嗰啲枕頭   希望部機無問題啦 ~ 

Green Monday 尖椒炒雞肶菇 + 菠菜 + 芫茜皮蛋湯 ( 11-MAR-2013 )

( 11-MAR-2013  MON )

今朝都幾涼   有霧又有啲潮濕咁   又要開抽濕機 lu ~

Green Monday 早餐食飽啲   食芝蛋治烘底   真係好飽架   星期一無咩 Mood 嘛   如果又唔飽   好似好淒慘咁 ~

菇場靜   加上無嘢做   真係好易中眼瞓   所以 Partner 11 點幾都中緊啦   頂佢唔順 ~

晏晝出去食白粥 + 炸兩   呢間係 8 卦介紹   真係好味過我之前去食嗰間   價錢又一樣   同埋一樣係咁迫囉 ~

出去食嘢啲時間真係過得好快   食完行陣就番菇場喇 ~

放工唔駛去買餸   唔駛買餸 d 時間真係好用好多   所以去阿信屋買日丁同芝士麵   之後再買寧買嘢   點知 6 點半先番到屋企   比平時買完餸番屋企更遲   所以要拿拿聲摩打手浸菜整嘢 ~

今晚自己食先   本來想整炒飯   不過唔想食飯   食辛辣麵   其實辛辣麵好似有牛肉成份   都唔叫素   但無法啦   過咗期嘛   唔想掉   唯有食啦 ~

是日晚餐 - 尖椒炒雞肶菇 + 菠菜 + 芫茜皮蛋湯

尖椒炒雞肶菇 - 終於買到雞肶菇   諗住刨薄片   不過無咩心機刨   求其薄切算喇   我成日覺得菇類有陣味咁   所以今次用麻婆豆腐醬汁   再加埋 5 隻尖椒一齊炒   估唔到係辣   正呀   好難買到辣嘅尖椒呢 ~

菠菜  - 尋晚買㗎    終於清哂 lu ~

芫茜皮蛋湯 - $6/2 扎芫茜 + 2 隻皮蛋   不過今次滾得唔夠溶囉   唔好飲嘅   但就清熱氣囉   咁諗會好啲 ~

里奧大人 8 點 15 分先放工   煮個芝士拉麵佢食   佢好開心食麵   我話係因為個麵過期先煮麵咋   等佢食埋   幫佢洗埋碗都已經 9 點半   本來想熨衫   但都係唔熨喇   唔想搞到自己咁攰呢 ~

梅菜蒸鯇魚 + 蜜芽糖雞膇 + 菠菜 + 淮山當參水鴨湯 ( 10-MAR-2013 )

( 10-MAR-2013  SUN )

同里奧大人一齊 9 點半起身   梳洗之後就去金姆指食早餐喇 ~

今朝有鐘點嚟打掃   真係幫輕好多好多   加上呢排又好鬼攰   真係無咩點做家務咁呢 ~

好耐無番教會喇   里奧大人仲以為我去買嘢   唔會番教會添   除非時間唔許可啫   否則一定番教會   我唔想靈命無增長呀 ~

今次又有感動   "神眼目看顧困苦的人   聽到人無言的呼喚   給人解決困境的出路"   所以我哋要打開信心嘅眼睛   順服神嘅帶領   因為神嘅恩典足夠我用呢 ~

崇拜完畢就番屋企喇   去貢茶買嘢飲   里奧大人之前狂飲百香果寒天   終於比佢飲到 10 杯   依家齊哂 Coupon   買 1 送 1 杯啦 ~

我飲珍珠奶茶加咗彩色蒟蒻   味道完全唔夾   只怪自己貪心

2 點半出去食 Tea   食完就去買餸   里奧大人就番屋企瞓一陣   我其實都有少少眼瞓   但又瞓唔到   所以沖過熱水涼醒一醒 ~  

想早啲食飯早啲休息   6 點準備煮飯   6 點 45 分有得食   不過我又食唔落   食少少菜同魚算喇 ~

是日懶餐 - 梅菜蒸鯇魚 + 蜜芽糖雞膇 + 菠菜 + 淮山當參水鴨湯

梅菜蒸鯇魚 - 里奧大人無咩食魚   所以蒸比佢食   要佢食起碼 2/3 呢 ~

蜜芽糖雞膇 - 今次焗得都唔錯   不過唔夠入味   如果唔係更加好 ~ 

菠菜 - $5/扎咋   所以買 2 扎   留番 1 扎聽晚食 ~

淮山當參水鴨湯 - 媽咪星期五煲比我   話水鴨好滋陰好補呢 ~

搞掂哂都係 8 點咋   即刻沖涼又 Hea 過   里奧大人就做公司嘢   做到 10 點半就睇電視   我又陪下佢啦   所以又 11 點半先瞓 ~  

上海菜肉雲吞 + 韭菜餃子 (外賣) ( 9-MAR-2013 )

一隻碟都放唔哂所有嘅餃子同雲吞

( 9-MAR-2012  SAT )

終於 Off 喇   瞓到 10 點半自然醒   食完早餐就番屋企梳洗喇 ~  

我次次 Off 嘅前一個星期   里奧大人就會成日問星期六去邊去邊去邊   真係講親咩呢   最後嗰句實問星期六去邊㗎喎 ~

其實我想去流浮山食蠔   不過好似要坐好耐車之餘   又要轉車咁   我就唔係咁想啦   好似好頻樸咁   呢排好鬼攰   都係想他他條條咁過囉 ~

咁睇到上星期飲食男女介紹深水埗   我就話去深水埗啦   難得諗 ~ 

今日好熱咁呀   里奧大人原本着線衫 + 厚外套   不過我話唔駛厚外套啦   之後佢話換衫   換件無咁熱   但就換件抓毛有帽衛衣   我話黐啦   咁熱着抓毛   之後佢再換   又係換件厚身棉衛衣   越換越厚嘅   人家唔知以為你有病添呀   最後叫佢帶厚外套放 Backpack   驚冷氣地方凍嘛   最緊要係費事佢冷親又賴我呀 ~

佢喺屋企整啲嘢   咁我都唔嘥時間喇   去超市幫菇場買嘢   之後先 Join 埋佢去埋銀行搞嘢   搞掂哂都成 1 點 lu ~

去完 MCL 買飛就搭地鐵去深水埗   周圍行下先   不過里奧大人第一件事係搵買電話保護貼嘅舖頭   其實真係好感動   佢對我啲嘢真係好上心   因為我之前甩咗保護貼   同佢講咗一聲   之後我話去深水埗   佢第一句就話好呀   可以去買埋保護貼 ~ 

呢檔買保護貼嘅檔口   服務非常非常之好啦   買個 $20 保護貼   幫我貼埋   仲好有心機貼添呀

買完保護貼都 2 點   行去維記食豬潤麵   但超過 50 人排隊   即調頭走喇   餓暈都未排到入去食呢 ~

咁我即轉去食印尼菜   都要等   不過等 15 分鐘左右就有位   算快㗎喇 ~

間餐廳起碼 9 成係印尼人   有啲貌似香港人   皮膚白白㗎   但一開口就係講印尼話   我同里奧大人就好似外星人咁   哈哈 ~

加多加多飯團 (Gado-gado Lontong) - 勁想食加多加多好耐啦   呢間應該正宗啩   唔係唔會咁多印尼人食呢   不過我要小辣   但唔辣嘅   下次要大辣   惹味啲嘛   因為我覺得啲沙爹醬越食越甜咁呢
黃薑飯 - 巴東牛肉 / 青瓜 / 花生 / 魚乾仔 / 茄子 (Nasi Kuning - rendang / acar / kac / ikan teri / terong) - 里奧大人幾鍾意食噃   咁我可以買黃薑粉   用嚟炒飯真係唔錯

綠豆冰 - 都 OK 啦   因為無咩要求嘛

食完又周圍行   不過其實無咩好行   因為好鬼熱呀   所以買埋水餃雲吞   再買埋紅豆糕芝麻糕就坐小巴番屋企喇 ~

3 層高嘅好似係戰前樓宇   好有特色   同埋肯定好實用呀

番到屋企附近   途經商場見到同事   唔係佢打招呼   我都唔會叫佢   無咩嘢好講嘛   所以同呢間公司啲同事真係無咩緣份咁呢 ~

番到屋企即沖涼呀   之後里奧大人話瞓晏覺   咁我都瞓啦   4 點半瞓到 6 點半   咁都好   今晚夠精神睇戲 ~

買咗餃子雲吞   所以煮多 1 個辛辣麵 Share 食   咁就一定夠飽喇 ~

是日懶餐 - 上海菜肉雲吞 + 韭菜餃子

上海菜肉雲吞 + 韭菜餃子 - $20有一打   每樣買咗一打   食得好滿足呀   不過唔記得喺邊間買添 ~

食飽飽洗埋碗   又唔駛做家務   真係有啲眼瞓咁呀   今晚睇 9 點半 "林肯"   9 點出門口   慢慢行去戲院   買埋爆谷   時間啱啱好 ~

估唔到都有差唔多 40 個人睇   我買飛嘅時候得 6 個人睇咋   不過歷史片可能比較冷門   我睇到最後 20 分鐘都瞓着咗呀 ~

終於 12 點散場   即番屋企沖涼喇   但沖完涼又醒哂   所以又 1 點幾先瞓   好唔健康呀 ~ 

大家樂 @ 官塘 ( 8-MAR-2013 )

( 8-MAR-2013  FRI )

話咁快又星期尾 lu   聽日 Off   所以超級勁 Happy 呀 ~

早餐都係食奶油脆脆豬   唔想食咁飽   驚 Lunch Time 食唔落嘢 ~

菇場靜到爆   不過點都好過街市咁嘈嘅 ~

晏晝食 Lunch Box   諗住食完出去行   不過都已經點幾   咁唔出 lu ~

今日里奧大人上咗大陸   家姐又去飲   所以我同媽咪 工人去大家樂算喇   6 點開餐   太早喇   食唔落   但佢哋就食到囉   因為佢哋 12 點食 Lunch 嘛 ~

上媽咪屋企坐下   食下生果   8 點走人 ~

里奧大人 10 點番到屋企   等佢沖埋涼之後就陪佢睇下電視啦   差唔多 12 點先瞓 ~

肉醬扁意粉 + 蒸蘿蔔糕 ( 7-MAR-2013 )

( 7-MAR-2013  THU )

今朝勁想食飲凍咖啡   所以食米粉餐   食完熱米粉再飲凍咖啡   熱 + 凍 = 暖   唔算係一早起身就飲凍嘢呢 ~

阿姐拎完杯咖啡比我   就同我講話我皮膚好靚   之後佢又再講我皮膚真係好靚   問我係咪整容 ?!   我話更唔係整容啦   不過我覺得佢其實係想講 Facial   因為佢隻手係做搓臉手勢   我笑得好自然㗎   唔係膠臉㗎噃 ~

菇場靜英英   如果我坐最入就好啦   無人睇到我做咩嘛   真係番工都番得開心過人呀 ~

今日有 Lunch Box   唔係媽咪問我帶唔帶飯   我都唔醒起帶飯呢回事呀 ~

個頭有啲痛   即刻食粒 Panadol   之前試過忍痛唔食   點知到最後忍到夜晚 10 點幾   最終頂唔順要食 Panadol   自此之後唔會再咁笨啦   痛咗 2 個鐘仲痛就即食喇   食完真係唔痛㗎喎 ~

放工即走   去完超市買免治豬肉就番屋企喇 ~

媽咪整咗蘿蔔糕比我同家姐   所以我同工人喺屋企樓下交收   家姐就黎我屋企拎   佢差唔多 7 點幾到   里奧大人就啱啱打嚟話 9 點先可以放工   叫我食先   好在今晚有家姐陪啫 ~

是日晚餐 - 肉醬扁意粉 + 蒸蘿蔔糕

肉醬扁意粉 - 媽咪尋晚比咗啲車厘茄   所以整肉醬意粉   太耐無整意粉   衰心急   不嬲如果我自己整新鮮蕃茄蓉   我係唔會落茄汁同糖嘅   但今次同一時間落埋茄汁同糖   家姐食第一啖話好甜   我已經知出事   之後里奧大人食第一啖又係話好甜   咁真係好甜啦   仲話我煮意粉咁耐以嚟最難食嘅一次呀   不過佢哋都好比面喇   食哂成碗喎   反而我無食   因為我飲埋啲隔夜湯   食埋湯渣已經好飽   避過一劫   不過聽日 Lunch Box 就要食啦   有難同當   哈哈哈哈 ~

蒸蘿蔔糕 - 媽咪整㗎   一 Pat 糊咁   即打比媽咪話以後唔駛再整比我   之後兩晚又唔煮飯   所以今晚蒸埋嚟食   食食下又 OK 喎   可能狂點豉油辣椒醬啦   我其實覺得蒸蘿蔔糕都 OK   反而覺得煎係好油咁   媽咪叫我可以慢火煎   我話一 Pat 糊點煎呀   太難度高喇   同埋同媽咪講   唔識整真係唔好整   因為真係嘥錢嘥心機嘥時間   同埋要我地食真係好慘囉   好味就話啫 ~

之後忍唔住打比家姐   我話真係報應   因為頭先話媽咪整嘅蘿蔔糕係全世界最難食   點知里奧大人又講我煮意粉最難食係呢次   邪爆   所以我以後唔敢再話媽咪難食   只會話唔太啱我口味算喇 ~

今晚諗住再拖地同熨衫   不過見家姐嚟咗   陪佢打機啦   之後佢 9 點半走   我都即沖涼   里奧大人又啱啱番到屋企   我又陪下佢   又睇下電視   10 點半先沖涼   所以都唔熨衫喇   不過最後都成 11 點半先瞓   又夜瞓咗 lu ~

住家飯 @ 媽咪屋企 ( 6-MAR-2013 )

蒸撻沙 - 好厚肉呀

白切雞

荷蘭豆炒鮮魷土魷

炒菠菜

蓮藕豬肚豬骨湯

朱古力蝴蝶酥 @ 曲奇薈 - 上次我無去醫院探媽咪   咁家姐有蝴蝶酥   里奧大人就拎咗 2 塊孝敬我   因為我初一去契媽屋企拜年   話蝴蝶酥好好食   之後依家家姐一有蝴蝶酥就會拎比我食   我去旅行時   家姐仲放咗半盒蝴蝶酥比我添呀

( 6-MAR-2013  WED )

臨起身前發咗過令到自己非常之唔開心嘅夢   搞到我真係無哂心機   情緒好低落   里奧大人今朝又早起身上大陸喎   唔係我可以同佢講下   舒發一下呢 ~

早餐食碎蛋吞拿魚治   其實唔想食   不過難得無人   所以就食啦 ~

菇場靜呀   有啲想瞓添 ~

聽日開始飲中藥   都好嘅   飲完去洗杯   行下都唔錯   無咁悶 ~

晏晝去買酸辣米線番菇場食   因為我要食番一碗好味嘅酸辣米線呀   食咗 3 餐酸辣米線   夠哂喇 ~

2 點同 Partner 去隔離 Pack File   所以好快又過咗 1 個鐘啦   實在太好 ~

今晚去媽咪屋企食飯   家姐差唔多 6 點 45 分就番到黎   7 點開飯   呢啲開飯時間就最好   唔會太遲又唔會太早 ~  

之後比 Lucky Money 媽咪同家姐   家姐真係儲住㗎   媽咪就用埋啦 ~

今晚又拎湯又 Lunch Box   又雪糕批   又芒果同車厘茄   加埋都 8 磅   仲有鹹魚同豬扒無拎添咋   所以次次諗起臨走要拎嘢番屋企就好驚呢 ~ 

番到屋企即拖地   之後沖涼   里奧大人差唔多 9 點半就番到屋企   一齊睇下電視   之後佢繼續睇電視   但我 11 點就瞓喇   真係好攰 ~