大澳半天遊 + Delifrance @ 東涌 ( 29-JUN-2013 ) + ( 30-JUN-2013 ) + ( 1-JUL-2013 ) + ( 2-JUL-2013 )

芝士蒜蓉包


南瓜湯 / 雜菜湯

凱撒沙律

特級煙三文魚露筍蘑菇天使麵 (配蘑菇汁) - 無味   同埋啲天使麵好乾 

大蝦帶子露筍扁意粉 (配龍蝦汁) - 材料都幾多   可惜又係無味道嘅


抹茶特飲 / 朱古力雪糕 - 溶哂咁嘅 

( 29-JUN-2013  SAT )

今朝約咗 8 卦食早餐   佢居然早過我到餐廳   佢三扒兩撥就食哂碗雞扒腸仔麵   但我果碗麵仲未嚟㗎喎   不過咁都好   我食唔哂餐肉同麵   可以比埋佢   佢一定食   因為佢唔會嘥嘢   如果里奧大人呢方面似佢就好喇 ~

菇場靜啦   無啦啦心情勁低落   見到同事啲衰樣就得我憎   都唔明點解佢可以成日黑口黑面   樣已經衰㗎啦   加埋黑口黑面個樣仲衰 ~

放工即走啦   見到里奧大人就最開心㗎喇 ~

佢話好天想入大澳   所以坐 E22 去東涌   咁都差唔多 1 個鐘先入到東涌   都已經 2 點半   所以食埋 Lunch 先入去   呢間好似叫聚龍燒味餐廳   諗住叫燒味無蝕底啦   點知原來唔好食嘅 ~

食完就去 Outlet 嗰邊洗手間   經過噴水池   里奧大人就話自己影下相等我   咁我去埋 Taste 買糖   因為勁想食甜嘢呀   之後佢打嚟問我喺邊   以為我蕩失路   唔係呀嘛   我自己一個人行多數會認路㗎噃 ~

去坐 11 號巴士入大澳   曝曬之下等咗 20 分鐘   幾驚中暑呀 ~

架車 Chok 到呢   最慘係落斜嘛   Chok 到好似就嚟炒車咁   搞到我有啲頭暈作嘔 ~

入到大澳已經 4 點幾   好少咁晏入到去   不過好多小食都無咗   真係好在無留肚食嘢咋   唔係餓暈都似 ~

太熱喇   第一時間買咗支冰涷山楂茶嚟飲   我真係無咩心機行   里奧大人見我件衫濕哂   所以叫我去公園坐咗陣   咁真係舒服咗啲咁啦 ~

行呀行   但無乜點影   因為真係好熱好熱好熱 ~

講完頭暈之後   嚇到里奧大人即刻搵地方坐   最慘好多食店都無冷氣   無風又焗喎   感恩記得之前一落車有間食豆腐花嘅舖頭啲冷氣係最夠凍   所以即訂去喇 ~

食完抖多陣就出市區喇   坐 6 點半班車   出到東涌都差唔多 7 點半   去咗 Taste 買嘢飲   諗住去 Pizza Hut   不過要等好多張枱   所以即轉場去 Delifrance   大把位呀 ~

呢間 Delifrance 真係好大   坐位好闊落   同德福差好遠   同埋最正係好靜   真係食得舒服又開心呢   可惜食物方面就唔得   無厘味道咁呢 ~

食完又坐 E22 番九龍灣   番到屋企都成 10 點半   我同里奧大人講今日坐車坐咗差唔多 4 個鐘   真係好驚   我話呢 10 年唔想再入大澳呀   哈哈 ~

( 30-JUN-2013  SUN )

終於每月一到   今次遲咗好多   我都預咗會超唔舒服㗎喇 ~

但其實又唔係話好痛   不過就冤住冤住咁痛   最煩係嘔   我一嘔又會沖熱水涼   里奧大人都話我沖咗好多次涼   真係無 10 次都有 8 次   但次次沖完熱水涼真係舒服好多架喎 ~

今日好好天   可惜我陪唔到里奧大人出街啦   我叫佢自己出   佢又擔心我   其實都唔駛擔心  因為我都係瞓嘅啫 ~

全日無胃口  真係瞓足全日   條腰都硬哂喇 ~

( 1-JUL-2013  MON )

今日七一回歸   又放假一天   我瞓到 1 點添呀 ~

3 號風球   又間唔中落大雨   留喺屋企最好   里奧大人做公司嘢   之後我都叫佢唔好落街食   叫外賣番屋企食好過 ~

我無胃口   所以睇下電視又瞓下   好快又到 7 點幾   我都仲未有胃口   里奧大人就去大快活買焗豬扒飯番屋企食   平時話唔鍾意食飯   但依家又買飯   玩嘢 ~

個肚仲有啲唔舒服   沖個熱水涼   9 點瞓喇 ~

( 2-JUL-2013  TUE )

今朝 8 點 15 分起身   坐的到菇場附近食早餐先番工呀 ~

好在無嘢做咋   個人仲係好攰 ~

Lunch 食尋日里奧大人買嘅咸卷   再加包朱古力奶   超級飽呀 ~

無啦啦個肚扯住痛   幾經辛苦先等到放工   又要坐的士番屋企喇   唔想等巴士 ~

番到屋企即沖涼   之後灘抖等里奧大人放工   佢 7 點放工   買埋牛肉飯番嚟食   我就食咗少少牛肉同飯   難得有少少胃口呢 ~

睇下電視   之後又瞓咗半個鐘   醒咗又睇陣電視   所以 10 點半都入房瞓喇 ~   

住家飯 @ 媽咪屋企 ( 28-JUN-2013 )

虎皮椒炒牛肉 

燜鴨掌 - 勁入味 


蒸花蟹

陳皮蒸鮑魚仔

黑醋伴木耳 / 青瓜 / 腰果 - 唔知想點咁   哈哈

老黃瓜豬橫脷豬骨湯

( 28-JUN-2013  FRI )

星期五喇   真係零舍開心咁㗎 ~

早餐食麵餐   飽到爆肚咁呀 ~

菇場唔忙   Hea 住過   今日係隔離位同事 Last Day   有啲唔捨得佢㗎   因為好少有同事啱傾呢 ~

Lunch 食 Pizza 包   食完就同 8 卦出去買餅   佢好女人   尋日已經同我講今日要陪佢落街買餅   今朝又講   話咗陪就陪嘛 ~

放工即走 lu   里奧大人上咗大陸   我又番媽咪屋企食飯 lu   家姐又係差唔多 7 點番到屋企   即開餐喇 ~

食埋生果   抖陣又傾下偈   咁我買咗包果汁糖比媽咪   所以我話大家估下幾多粒   每人可以講 2 個 Number   媽咪最勁   話 20 至 24   我話 20 至 24 係 5 個 Number 喎   真係呢   奸商過我呀   哈哈 ~

今晚 9 點先同家姐走呀   我一上車   里奧大人話已經喺上水   要我雪定枝啤酒   因為要留番啲薯條番屋企食喎 ~

我都唔跑步喇   沖完涼就睇電視   里奧大人就差唔多 10 點半番到屋企   又要我幫手食薯條   真係慘 ~ 

蒸鯪魚球 + 蒜蓉豆豉炒青豆角 + 蒜芹炒米粉 ( 27-JUN-2013 )

( 27-JUN-2013  THU )

雖然有太陽   但又見到鳥雲   真係唔想帶縮骨遮都唔得   同埋好邪囉   唔帶就落雨   帶咗就唔落雨咁囉 ~

早餐食奄列餐   真係幾好味   我鍾意呢間茶餐廳真材實料   唔會求求其其咁呢 ~

番到菇場   隔離同事同我講話做埋聽日   因為佢係 Part Time 嘅   間唔中都會抖一個星期   但今次真係唔做喇   話爸爸身體唔係咁好   所以想多啲時間照顧佢   好孝順呀   我就慘啲啦   又無咗個啱傾嘅同事 ~

今朝好飽   所以 1 點先食個丹麥奶油酥   終於覺得食到有啲驚喇 ~ 

放工去街市買餸   好似好耐無試過連煮 4 日   勁想唔煮   不過我又覺得自己好衰啦   又無咩唔舒服   無理由又唔煮家嘛 ~

番到屋企即預備晚餐   再開機洗衫   抖咗半個鐘就開始煮喇 ~

我自己食先喇   因為里奧大人成 8 點幾先放工   我唔想 9 點先食飯囉 ~

是日晚餐 - 蒸鯪魚球 + 蒜蓉豆豉炒青豆角 + 蒜芹炒米粉

蒸鯪魚球 - 想整好耐架喇   買咗半斤鯪魚肉   今次加埋蝦米黎釀   學人用豆角綑住   不過我無咩心機整   因為我好餓   想快啲整快啲食   哈哈 ~

蒜蓉豆豉炒青豆角 - $5 有 2 扎   但 1 扎就要 $4   咁我當然買 $5 啦   因為之前成 $20 斤   我依家用 $5 買到 $20 嘅嘢喎   係咪好抵先 ~

蒜芹炒米粉 - 芹菜可以補血   所以買咗 $ 9 蒜芹炒米粉   今次煮 1 個米粉   估唔到原來係夠 2 個人食   實在太好喇 ~

里奧大人差唔多 9 點番到屋企   我今晚有啲攰都唔出去散步喇   休息下好過呢 ~

青 BB 晚餐   里奧大人食剩半碗豆角   話好油   咁其實真係好油   因為我自己都覺今次好油呢   鯪魚球食剩 1 粒   呢下我衰啦   因為唔想影出嚟白雪雪   所以落豉油   但一倒就倒咗好多出嚟   所以真係好鹹   米粉最正常  但又剩番 1/3   好煩啦   我成日話㗎   你食嘅嘢全部係熱辣辣   我就次次洗埋碗先食   出嚟食已經唔熱   我又要分開裝比你   又要洗多 3 個兜   仲要成日依樣嗰樣   又食唔哂   真係好煩囉

叉燒炒麵 + 唐生菜 + 炸魚皮 (外賣) ( 26-JUN-2013 )

( 26-JUN-2013  WED )

今朝坐小巴   坐喺司機位後面   司機用藍牙教對方點樣 Download 歌   上車已經開始教㗎喇   之後差唔多到總站前   聽到司機好尷尬話依家好多客喺度   唔方便講   之後我聽到佢教對方搵 "成人網"   之後話今晚再打比佢再講   所以我成日覺得用藍牙傾偈   係所有人都聽到   不過揸車就無計啦 ~

早餐食米粉餐   食完有啲熱添 ~

菇場靜   不過依家好好多啦   可以同隔離同事傾偈 ~

Lunch Time 要出去行下   難得好天氣嘛   本來想食炸魚皮同魚蛋米   不過間舖頭休息   所以去食粥啦   里奧大人聽見我話食粥   佢覺得好難以想像   咁熱食粥   同埋我係一個怕熱嘅人添   但其實粥舖嘅冷氣好夠   食完碗粥都唔會覺得熱㗎噃 ~

食完就去入票   再行一陣就番菇場喇 ~

今日 d 時間都過得幾快咁   放工去街市買麵餅   再去太興買叉燒就番屋企 lu ~

番到屋企即浸菜   差唔多 6 點半開始煮   7 點前已經煮好   我自己食先   因為我要去散步呀 ~

是日懶餐 - 叉燒炒麵 + 唐生菜 + 炸魚皮 (外賣)

叉燒炒麵 - 今次個麵餅同之前有啲唔同   但都係同一間舖買同一個全蛋麵餅   但有時麵質係完全唔同   好奇怪   不過今次我買一個麵餅   同埋特登唔煮咁腍   我真係好怕食腍嘢   口感好怪   好在里奧大人都接受到今次嘅口感   不過佢話食完好口渴   唔知係因為叉燒鹹   定係啲麵鹹呢 ~  

唐生菜 - $7 斤   估唔到有 3 棵咁多   真係好抵食 ~    

炸魚皮 (外賣) - 尋日食唔到   所以一定要買到嚟食   唔係成日會籮籮攣想食呢 ~

8 點開始出去散步   里奧大人就啱啱放工   本來諗住等埋佢一齊番屋企   不過我行咗 6 個圈   都有半個鐘㗎   見有啲攰   所以都係番屋企等佢算喇 ~

茄汁洋蔥豬扒 + 瑤柱燜節瓜 + 皮蛋酸薑 ( 25-JUN-2013 )

( 25-JUN-2013  TUE )

今日熱呀   不過好在無雨   咁都好啲 ~

想食甜嘢   所以早餐食奶油脆豬仔包 ~

菇場無嘢做   可以抖下 ~ 

里奧大人唔舒服   11 點半就放工去睇醫生喇   原來又係感冒   快啲好番呀   唔好惹我   哈哈 ~  

又有同事走啦   晏晝有 Farewell Lunch   去酒樓飲茶   有 Free Lunch 就最開心呢 ~

放工去街市買節瓜同洋蔥   番到屋企即入廚房打仗   6 點 10 分開始預備   7 點 10 分開餐   估唔到咁簡單嘅餸都要 1 個鐘 ~

里奧大人話喉嚨唔舒服要食麵   麻煩啦   咁我話唔可以出前一丁   因為佢尋晚食咗   所以特登煮蝦子麵比佢   而我其實唔餓   但都要特登煮個極辛出前一丁引佢   佢睇到眼凸凸啦   我碗正好多嘛   佢話我就好啦   可以食出前一丁   呵呵 ~

是日晚餐 - 茄汁洋蔥豬扒 + 瑤柱燜節瓜 + 皮蛋酸薑

茄汁洋蔥豬扒 - 見里奧大人感冒   所以整洋蔥豬扒   今次啲汁好好味呀   同埋今次只係整 1 塊豬扒   如果帶埋飯就啱啱好   咁下次唔駛整 2 塊豬扒   因為我真係覺得超多   夾硬食好辛苦囉 ~  

瑤柱燜節瓜 - 以為屋企有鹹蛋   諗住滾鹹蛋瑤柱節瓜湯   點知原來係皮蛋   但我記得上次係買咗鹹蛋家嘛   個人有啲亂   居然諗緊啡色皮係鹹蛋定皮蛋添呀   都買咗節瓜   即刻改煮瑤柱燜節瓜啦   因為我唔識用節瓜煮其他餸 ~

皮蛋酸薑 - 尋晚已經想食   好在無買皮蛋咋   唔係 4 隻皮蛋有排食咯 ~

搞掂哂即沖涼   之後熨衫   再睇陣電視   10 點半都瞓 lu   呢排有啲攰咁 ~ 

Green Monday 魚香茄子 + 薑蔥撈麵 ( 24-JUN-2013 )

( 24-JUN-2013  MON )

今朝黃雨   所以都係帶直身遮好啲   唔帶縮骨遮   個袋真係輕好多 ~

Green Monday 嘅早餐又係芝蛋治烘底喇   其實想食鮑片米粉   不過驚係螺片   如果係素鮑魚就好喇   可以多個選擇呢 ~

番到菇場實在太開心喇   因為 Partner 調咗去我後面   同我好傾嘅會偈同事坐 Parnter 個位   咁可以一齊傾偈   唔駛咁悶 ~

Lunch 食麥片   2 點幾再食埋個菠蘿包   次次買咗包反而唔想食   但唔買果次就會好餓喎 ~

放工去街市買薑蔥同茄子   之後再去超市買浙醋   無耐家姐打嚟問我借開紅酒器   所以買完要即刻番屋企喇   放低啲餸就接到家姐電話   又要落停車場交收 ~

番到屋企預備晚餐   再開機洗衫同拖地   搞掂即煮晚餐   7 點半正想開餐   里奧大人打嚟話放工   不過我都照食先喇 ~  

是日懶餐 - 魚香茄子 + 薑蔥撈麵

魚香茄子 - 買 2 條大茄子   煮埋好鬼少   但驚買 3 條又好似好多咁   今次用魚香茄子醬   真係好似街食咁 ~

薑蔥撈麵 - 買咗 4 條蔥   諗住煮茄子用 2 條   點知唔記得加蔥黎粉   所以食麵用咗 4 條蔥   但其實啲蔥都係食唔哂   我用蝦子麵點醋   不過我覺得蝦子麵同醋唔夾咁   都係銀絲麵好食啲   所以下次都唔咁煮喇 ~

里奧大人唔會同我一齊 Green Monday   所以我煮個水餃一丁比佢   佢見到碗茄子就話下次唔駛要茄子都得   但我覺得佢話唔要餃子就更加好啦   之後食茄子嘅時候又話好油好油   麻麻煩煩   我落 1 湯匙油之嘛   出街食嗰啲茄子咪仲多油   茄子仲炸埋添啦   之後呃佢話啲茄子無落油㗎喎   要佢食哂去 ~

沖完涼都只係 9 點 15 分   實在太好喇   里奧大人唔駛做公司嘢   自己睇戲   我就睇 Just  for Laughs   佢之後話好攰   10 點15 分就瞓   不過其實我都好攰   所以我 10 點半都瞓啦 ~

黑椒炒雞絲 + 椰菜 ( 23-JUN-2013 )

( 23-JUN-2013  SUN )

今朝 8 點幾起身去廁所   之後里奧大人出咗去   但又無番入房   不過我無理佢做咩   我自己繼續瞓   瞓到 10 點先醒呢 ~

之後里奧大人話睇錯鐘   話 6 點去廁所   因為個天好光   以為 8 點   所以開機洗衫   咁起身可以浪衫   之後 8 點幾醒咗又瞓唔番   所以又換埋魚缸水   再睇聖經咁等我起身囉 ~

去金姆指食早餐   食完就番屋企沖涼   抖陣就番教會 lu ~

崇拜完畢就叫里奧大人陪我去百住買菜   之後去買鞋   今次買咗 3 對鞋   真係睇啱就要即買喇   因為之前搵咗好耐都唔啱心水呀 ~

買完番屋企抖陣   差唔多 2 點半又去 Cafe Lagoon 食 Tea   今次無咁嘈   但甩甩漏漏呢 ~

里奧大人做公司嘢   我就睇下雜誌   抖抖咁啦   6 點半就開始煮飯喇 ~

是日懶餐 - 黑椒炒雞絲 + 椰菜

黑椒炒雞絲 - 今次用雞肶拆絲   我又用光波爐焗熟佢喇   咁我聞到好香嘛   就問里奧大人聞唔聞到   佢話聞到呀   以為係隔離屋煮到咁香   同埋佢估唔到係我焗緊雞肶   因為見我坐喺梳化度喎   大佬   唔通企喺度望住個光波爐咩   有時間制家嘛   同埋開住個爐係好鬼熱 ~   

椰菜 - 黑椒熱氣   所以淥菜算喇   其實係我唔想炒   淥菜方便嘛 ~

食完抖陣   我同里奧大人講   一陣行德福當散步   咁差唔多 8 點出發   順便拎對皮鞋去補   不過收咗舖 lu ~

里奧大人又話唔準一路行一路睇   點知佢自己睇中咗對鞋   咪又要入去睇   樣衰啦   自己打自己咀巴   差唔多行咗半個鐘就番屋企喇   但我發覺呢 2 晚喺商場散步   無喺街度散步咁精神咁 ~

蜜糖黑椒焗雞全翼 + 炒菜心 ( 22-JUN-2013 )

( 22-JUN-2013  SAT )

今朝又同 8 卦一齊食早餐   呢間餐廳無去一排   又加咗 $4   食完又係勁口渴   所以應該唔會再去食㗎喇 ~

星期六好多時都係同 8 卦 Skype 過日   所以好快就放工咁 ~

放工去藥房買 $20 祛濕料   再去街市買冬瓜同菜   之後就番屋企 lu ~

今日唔出街喇   個天氣唔係咁好   又唔想特登出去行商場喎 ~

去 Cafe Lagoon 食 Tea   嘈到呢   可能樓底唔高呀 ~

食完就行一陣   之後我去買外套   里奧大人就去睇書   咁最好啦   佢喺度我要好快手揀衫   佢唔喺度我可以慢慢揀嘛   買咗 2 條裙 3 件外套   好開心呀 ~

番到屋企   煲埋冬瓜去祛濕水   就執自己嘅夏天衫   之前只係執咗里奧大人嘅夏天衫   幫佢執完好攰   所以勁唔想再執   拖成個月先執自己衫   今日終於搞掂   好在執咗咋   因為真係完全唔記得自己買過啲咩嘢衫咩嘢裙呀 ~

執完櫃又抹下櫃   執下其他嘢   真係越執越起勁呀   不過後尾要煮飯   我都要停一停喇 ~

是日懶餐 - 蜜糖黑椒焗雞全翼 + 炒菜心

蜜糖黑椒焗雞全翼 - 媽咪幫我買咗雞全翼   咁今次又試下焗啦   焗嘅時候好鬼香呀   勁似 BBQ 味道   今次又焗得好成功呀 ~ 

炒菜心 - $7 斤好抵呀   都幾甜 ~

食完抖一個鐘就同里奧大人去散步   不過驚落雨   所以去商場散步   每層行 2 個圈   但佢唔準我停低睇嘢喎   但最後都只係行咗 1 個圈咋   佢話咁樣行好肉酸喎   我都唔明有咩肉酸   有時我自己行   認唔到路都係行幾次同一個地方啦   怕咩喎 ~

Ikea Cafe @ Mega Box (九龍灣) ( 21-JUN-2013 )

( 21-JUN-2013  FRI )

好焗熱呀   好似話想打風   唔好喎   唔係咁想假期先黎打風囉 ~

今朝坐小巴只係 6 分鐘就到餐廳   真係大把時間食早餐呀   仲可以睇哂報紙   爽呀 ~

無嘢做   Hea 住等 Lunch Time   又同 8 卦出去食五寶飯   條友仔唔肯陪我食麥記   又要迫我食五寶飯   不過呢間啲燒味好味呀   所以我先會再食呢 ~

里奧大人今日上咗大陸   但 4 點半左右就要走喇   因為要送辦去 Mega Box   所以又叫我唔好煮飯   去 Mega Box 行下喎 ~  

4 點半先開始忙   好在放工前做哂啫 ~

去到地鐵站   諗住拎蜜糖   點知去到見到掛住 "稍後片刻"   咁我唔等喇   因為里奧大人已經搞掂哂   等緊我咋 ~

今次坐 Shuttle Bus 去 Meag Box   估唔到咁多人坐   等咗 15 分鐘先上車   我仲要係第 2 架先上到   所以叫里奧大人去 Ikea 攞位先   之後差唔多 15 分鐘先去到 Mega Box   去到已經 6 點 45 分   即買嘢食喇   好鬼餓 ~

食完就周圍行下   再坐番 Shuttle Bus 番屋企   去到商場見到 3 號風球個牌   終於 3 號   不過應該就唔會改發 8 號㗎喇 ~

番到屋企開機洗衫   睇下雜誌   好快又到 11 點   又要瞓 lu ~

別府 @ 九龍灣 ( 20-JUN-2013 )

山葵八爪魚軍艦 - 我好鍾意食  又辣又爽口嘅感覺   非常之正呢

松葉蟹蟹麵豉軍艦

酒煮帆立貝壽司 / 三文魚壽司 / 天婦羅蝦壽司

雞軟骨餃子捧

巨蜂提子梳打 - 我話要少冰   侍應話份量會少啲   當時我唔明   依家見到杯飲品就知點解 lu   駛唔駛咁計較呀

( 20-JUN-2013  THU )

又好熱喇   里奧大人仲慘   着長袖裇衫   仲要揹住部電腦   大熱天時真係好慘   熱上加熱 ~

早餐食奄列餐   無咁悶呢 ~

出面熱到爆   但菇場又凍到爆喎   溫差太大喇 ~

今日出去食酸辣米線   一入到去即刻打冷震   仲凍過菇場呀   食完碗熱辣辣米線都覺得凍   不過又係嘅   咁熱好少人食酸辣米線   食完熱上加熱   所以我估佢先開咁大冷氣 ~

食完又行陣超市先番菇場   之後就等放工喇 ~

里奧大人今日喺九龍灣見客   見完客就唔駛番公司   佢阿 Head 叫佢番屋企做嘢好過   唔駛滕嚟滕去   實在太好喇 ~

我放工去拎中藥   今次喺埋藥房度飲添呀   懶得拎 ~

里奧大人叫我唔好煮   想出街食   不過要等到 7 點幾   因為有嘢要等覆   咁我無咩所謂   咁仲好   飲埋湯   唔駛食到飽先飲湯 ~

差唔多 7 點半就去食嘢喇   勁想食壽司   所以又去別府喇 ~

食完行陣商場就番屋企   今晚好焗呀   無去散步 lu ~

住家飯 @ 媽咪屋企 ( 19-JUN-2013 )

花蟹蒸蛋

鹹酸菜炒牛柳

陳皮絲蒸鮑魚

瑤柱燜節瓜

黑豆眉豆豬腰豬骨湯

芒果 / 西瓜

糯米糍 - 好甜   同埋超細粒核

( 19-JUL-2013  WED )

里奧大人今朝落到樓下先知道無帶銀包同電話   又要番上屋企攞啦   咁我幫佢買麵包先   反正我唔趕住番工   如果唔係就唔會理佢㗎喇 ~

又唔係好餓   所以食奶油豬仔包   呢期真係勁想食燒賣粉果   真係搵日食番夠本先 ~

番到菇場無耐   聞到陣燶味   原來係司機叮糭   叮到個微波爐出哂煙呀   之後成個 Pantry 都係煙   好在無爆炸咋   如果觸動咗灑水系統就麻煩喇   所有文件同電腦一定報銷   都時陪條命都唔掂呀   之後去洗手間見到隔離公司阿姐   佢話佢哋聞到好大陣燶味   幾驚係火燭呀 ~

之後我哋開行冷氣   開哂門   管理處嚟埋開天窗   前後門走火通道都打開哂   但都仲係聞到好大陣膠味 ~

我同幾個同事都帶咗飯   我就一定唔叮㗎喇   佢哋都唔叮   梗唔叮啦   成個微波爐薰到黃哂   仲有成大陣膠味   搵妳叮咯真係 ~

咁我即約 8 卦食 Lunch 喇   食完行陣就番菇場   因為見到好大舊烏雲呢 ~ 

飯氣攻心   個人唔係眼瞓   不過係呆呆滯滯咁囉 ~

今晚番媽咪屋企食飯   放工要帶埋飯盒番媽咪屋企食添呀   家姐仲話想試我啲洋蔥豬扒   我話試咩鬼   又唔係好味   食新鮮餸好過啦 ~

同家姐 8 點半一齊走   我番到屋企即開機洗衫   再換埋波鞋就去散步喇   今次勁呀   不經不覺就行咗 20 分鐘   好似行咗 7 個圈 ~

番到屋企已經見到里奧大人啦   仲以為我唔記得熄冷氣   我話特登開定比佢   之後同佢傾陣偈   我就沖涼喇 ~

依家出去散步   番到屋企就沖涼   睇陣電視就瞓   啲時間過得好快咁呀 ~ 

洋蔥豬扒 + 瑤柱節瓜 ( 18-JUN-2013 )

( 18-JUN-2013  TUE )

里奧大人今朝去見客   所以陪我去大家樂食早餐   好開心呀 ~

菇場靜英英    好在有 Skype   唔係真係唔知點算 ~

今日有 Lunch Box   食完就聽歌   真係聽到唔想開工呀 ~

我同事又鍾意煮嘢食   我話今晚煎豬扒   佢話夠時間醃咩 ?!   問我係咪買醃好咗嗰啲   我話醃半個鐘咪夠囉   佢話佢求其醃都會醃 2 個鐘啦   咁又係嘅   醃耐啲會入味啲   我以前醃成晚添呀   不過依家好少會咁做 lu ~

放工去超市買洋蔥同豬扒   番到屋企就即刻醃豬扒   再預備好哂所有嘢    之後飲埋中藥   6 點 45 分要煮喇   因為今晚想去散步呀 ~

里奧大人又晏放工   咁我都食先   因為要飲埋湯   同埋又要抖一個鐘先可以徑步   時間緊迫呀 ~ 

是日晚餐 - 洋蔥豬扒 + 瑤柱節瓜

洋蔥豬扒 - 去超市買 3 塊 Pack 好嘅 "新鮮有骨豬扒"   $10.9 咋   但 4 塊嘅梅頸豬扒又要 $21.9   差咁遠嘅   不過煮落我手都係 "鞋" 啦   買份平嘅算數   之後家姐打嚟問我煮咩   我話番比佢聽呢單嘢   家姐問我做咩買豬扒   我話想食咪買囉   佢話呀   做咩唔食上次媽咪比我嗰啲喎   我真係完全唔記得呀   搵日真係要好有心機寫哂雪櫃入面嘅食物   貼喺雪櫃面先   唔駛成日買重覆嘢 ~

瑤柱節瓜 - 之前買㗎   $6 一份有 3 個   真係好抵 ~

里奧大人 8 點 15 分放工   咁我等埋佢番嚟   食埋飯   幫佢洗埋碗就出發去散步喇 ~

行咗 20 分鐘   都有 2,500 步   最緊要有汗出   真係好鬼正   番到屋企同里奧大人講我行咗 2,500 步   條友話一日最少行 1 萬步呀   妳行得 2,500   之後佢話不過我肯做運動已經好好呢   咁又係   好過成日坐喺度嘆冷氣 ~

沖埋涼   再睇陣電視都瞓喇 ~

Green Monday 炒粒粒 ( 17-JUN-2013 )

( 17-JUN-2013  MON )

尋晚飲咗四寶茶   所以好難先瞓到呢   今日仲係星期一添 ~

早餐食芝蛋治烘底   不過其實無咩胃口   但唔食又驚餓喎 ~

菇場真係靜到以為得自己一個人喺度   如果得一個人都幾好   我一定聽歌呀 ~

晏晝去買炒米粉番菇場食   諗住行遠啲買其他嘢食   不過落雨無帶遮   咁近近哋買嘢食算喇 ~

終於等到放工   去完牛頭角拎藥就落勁大雨   真係好在有遮跟身咋 ~

去埋街市買菜就番屋企喇   浸菜煲菊花茶   之後拖地 ~

媽咪又煲咗湯   所以家姐又楂車拎埋比我   仲有啲生果   拎完就番屋企即煮飯喇 ~

今晚自己食先喇   沖完涼先慢慢食   煮完飯真係無咁快想食嘢咁呢 ~

是日懶餐 - 炒粒粒

 炒粒粒 - 就咁青豆 + 粟米 + 菜甫咋   因為我唔鍾意食豆腐干 ~ 

里奧大人 8 點半先放工   所以煮個出前一丁比佢   再加埋尋晚啲鴨肉   不過佢生痱滋   食得好鬼慢   阻住哂 ~   

端午做節 @ 家喻滬曉 APM (官塘) ( 16-JUN-2013 )

風鵝粉皮 - 粉皮好煙韌   正呀

樟茶鴨 (半隻) - OK 喎   又唔肥   不過食唔哂   要打包呢

上海小籠包 - 有湯汁   正呀

京式蔥油餅 - 好有蔥味   同埋其實好油   食幾件已經好漏

排骨炒粗麵 - OK 啦   里奧大人想食先叫咋

高力芒果奶黃 - 食完鹹嘢要食甜嘢

( 15-JUN-2013  SUN )

今朝同里奧大人居然瞓到 11 點 45 分   原來里奧大人唔記得唔怪得醒嗰下係感覺瞓咗好耐咁啦   同平時起身感覺係唔同呢 ~

番唔到教會  仲要早餐已經無得食   所以去名點食點心喇 ~

鳳凰珍珠雞 / 潮州粉果 / 魚肚滑雞扎 / 蠔皇叉燒包

食完都差唔多 1 點   今晚又唔駛煮飯   番到屋企就即刻睇 "中國好聲音"   睇完就煲中藥   里奧大人就入房瞓覺 ~

今晚同媽咪家姐去 APM 食飯   尋晚約咋   訂唔到枱   所以家姐 5 點半接我哋   去到 APM 6 點   我去家喻滬曉等位   里奧大人去御泰坊等位   我好感恩   之前 3 張枱無人到   我就可以好快有位   喺父親節無訂枱情況下   等半個鐘就有位   真係好感恩㗎喇 ~

食到 8 點幾   家姐車我哋屋企   沖完涼就熨 2 機衫   咁就已經 10 點   再睇陣電視   成 11 點半先瞓呢 ~

端午做節 @ 姑奶屋企 (大埔) ( 15-JUN-2013 )

蕃茄碎蛋 - 終於有新嘢
 

春卷 / 滷水牛展 / 炸雞翼 / 滷水雞翼 / 焗金沙骨 / 炒什菜 / 炒飯 / 沙律 / 芒果布甸

( 15-JUN-2013  SAT )

今朝同 8 卦食早餐   本來想去遠啲食   不過落超大雨   所以又去番菇場附近食算喇 ~

菇場無嘢做   真係等放工   好在唔眼瞓啫 ~

放工即走   去完牛頭角睇中醫就番屋企 lu ~

同里奧大人去食麵   之後又番屋企抖陣   里奧大人做公司嘢   我就煲中藥   又睇下雜誌咁啦 ~ 

約咗水姑一家喺地鐵站等   一齊出發去大埔食飯呢 ~

差唔多 8 點開始   食到 9 點半   番到屋企 10 點半   頻頻樸樸好攰呀 ~

打邊爐 @ 家姐屋企 ( 14-JUN-2013 )

墨魚卷


手切牛肉

牛柏葉 / 豬皮 / 魷魚 / 魚蛋 / 魚腐 / 墨魚丸 / 牛丸 / 芝士丸 / 龍蝦丸 / 龍蝦丸 / 蟹粉丸 / 蟹柳

炸魚皮

芫茜皮蛋豆腐馬蹄湯底

( 14-JUN-2013  FRI )

呢兩晚發夢   都有斬人畫面   好恐怖呢   我又無睇恐怖戲   壓力又唔係大喎   奇怪   總之無覺好瞓就最慘啦   發埋呢啲夢   醒咗好難瞓番㗎 ~

今朝唔太餓又唔太飽   所以食熱狗餐   最鍾意食腸呢 ~

菇場唔忙   所以又靜到耳鳴啦   勁想篤穿隻耳仔   哈哈 ~

今日有 Lunch Box   同事見到我有薯仔餅   問我係咪出街食   因為我唔似會煮呢啲餸喎   因為做法比較麻煩   呵呵 ~

里奧大人今日又見客   所以唔駛上大陸   咁我就去媽咪屋企拎嘢    之後就等家姐車我去佢屋企打邊爐   點知勁勁勁勁塞車   個半鐘先去到媽咪屋企   坐到人都顛呀 ~

去到媽咪屋企坐唔夠 10 分鐘   家姐打嚟話佢已經喺樓下   我又即落樓喇 ~

家姐之前話番佢屋企嘅方向超勁塞車   感恩我地番去嘅時候無塞車呀   唔係又唔知等幾耐呢 ~

8 點開餐   打邊爐有樣好   係可以淥定啲丸先   咁一埋位就食得   爽呀 ~

今晚勁呀   唔駛開冷氣打邊爐   因為家姐屋企好大風   真係好似打到嚟咁   如果我屋企係咁就好啦   嘥番冷氣錢 ~  

食完抖陣都 9 點半   家姐車我番屋企   之後里奧大人又差唔多番到屋企   今朝同佢講   睇下我幾點番到屋企   如果早就煮麵比佢食   估唔到佢又記得   話係咪煮麵比佢食喎   好啦   咁我煮個水餃出前一丁比佢啦   唔想無口齒   哈 ~
  
搞掂哂就沖涼   我唔係咁鍾意臨瞓前先沖涼   我會覺得成身熱辣辣   加上又吹埋頭   成日慶合合   好難入睡咁囉 ~

陪里奧大人睇陣電視   我 11 點 15 分就入房瞓喇   聽朝要番工嘛 ~

住家飯 @ 媽咪屋企 ( 13-JUN-2013 )

炒粒粒 - 有冬菇 / 粟米 / 馬蹄 / 瑤柱 / 豆腐乾    

唐生菜

煎薯仔餅

蒸盲鰽

白灼蝦

勝瓜

髮菜冬菇眉豆雞腳湯

大樹菠蘿 / 泰國龍眼

( 13-JUN-2013  THU )

如果逢星期三都放假就好喇   番 2 日放 1 日 又番 2 日   好似番 Part Time 咁   哈哈 ~

今朝幫菇場掃貨   之後食埋早餐    9 點 45 分就番菇場開工   所以咁快就半日 lu ~

Lunch Box 係前晚嘅叉燒飯   啲叉燒勁入味呀   不過我鍾意食燒排骨多啲   真係唔太鍾意啖啖肉咁呢 ~

無啦啦又忙   之後又停下做下   又係話咁快就放工喇 ~

里奧大人要見客   又要夜放工   咁我都番媽咪屋企食飯   次次係媽咪屋企食飯   我同家姐都話食到好飽   好似食咗一星期嘅份量咁   依家媽咪又會買生果比我哋拎番屋企   拎湯拎生果   差唔多 4 Kgs   真係拎到嗌救命   所以如果有晚唔駛拎嘢走   個人會覺得好輕鬆咁呢 ~

同家姐 8 點半走喇   番到屋企即開機洗衫   之後沖涼   Hea 住等里奧大人番屋企   佢 10 點先番到屋企   買埋盅頭牛肉飯番嚟食   咁都好   咁夜都有飯癮   好過成日食麥記啦 ~

手撕雞 + 美心裹蒸糭 + 生菜 + Brownies + 杏仁牛油曲奇 ( 12-JUN-2013 )

( 12-JUN-2013  WED )

今日係端午節假期   又有放假   實在太好喇 ~

里奧大人今朝 8 點幾起咗身   不過我就瞓到 10 點   但係咁發夢 ~

梳洗之後就去大快活食早餐   食完就番屋企 lu   里奧大人做公司嘢   我煲埋中藥就專心睇飲食男女喇 ~

2 點半去食 Tea   今日試新嘢   不過呢間食店好鬼凍   但又唔可以叫佢哋開細啲冷氣   因為如果開細啲   近門口位係好焗   所以食完出嚟   我同里奧大人隻手係凍冰冰呢 ~

蜂巢芋角酥 / 潮州粉果 / 魚肚滑雞扎 / 什菌上素鮮竹卷 / 香茜牛肉腸 / 流沙奶皇包 / 冰花脆糖蛋散

里奧大人番到屋企就瞓覺   而我今日就勁有 Mood 開焗爐嘢呀   同埋想清哂啲朱古力   但如果就咁焗 Brownies   咁會剩番好多牛油   已經係用細罐   所以要焗埋曲奇   清哂啲牛油   不過我焗完 Brownies   之後再預備曲奇材料   整好放入雪櫃   留番今晚先焗 ~

今次又失敗   好硬呀   但有啲又有蛋糕口感喎   跟足食譜㗎啦   唔通用錯焗盤   所有 Brownies 太薄   無哂口感 ?!   我真係好怕焗嘢   唔通真係要比錢上堂學 ?!

焗完到差唔多 5 點   又要準備晚餐喇   忙過番工 ~   

是日晚餐 - 手撕雞 + 美心裹蒸糭 + 生菜

手撕雞 - 今次用雞肶   蒸完再用光波爐   雞皮脆卜卜好正呀   配埋醬汁   超好味   最緊要夠簡單   下次可以再整 ~

美心裹蒸糭 - 家姐比㗎   蒸咗 40 分鐘先全隻熱哂   不過真係好巨   同里奧大人 Share 食都食唔哂   要做 Lunch Box   我覺得美心麻麻哋   啲糯米唔煙韌   同埋啲豬肉超級 "鞋"   真係得個巨字   無咩特別 ~

生菜 - 今次唔腐乳喇   點雞嘅醬汁   一樣好味道   不過其實就咁食生菜都好好食 ~

食完洗哂碗又開始焗曲奇   好有心機用花花模印曲奇   不過貪心得滯   一次過焗得太多   所以變哂形   里奧大人仲以為我特登焗到咁添   之後試味   都 OK 啦   不過里奧大人話唔鍾意杏仁味   衰得佢試完半塊即刻話反胃   係咪咁快有反應呀   好在我有家姐幫我清咋   唔係應該掉嘅多   因為我對曲奇同蛋糕真係無咩興趣   其實家姐真係超級慘   成日迫佢食我焗嘅嘢 ~

蜜汁焗叉燒 + 腐乳西生菜 ( 11-JUN-2013 )

( 11-JUN-2013  TUE )

今朝涼涼哋好舒服呀   不過如果唔係灰灰的天就更加好呢 ~

早餐食芝腿治烘底   但依家覺得茶餐廳嘅芝士好似無咩芝士味咁   以前食芝士真係有鹹味嘅感覺架 ~

菇場唔忙就最好啦   因為今日勁有 Holiday Mood 呀 ~

Lunch Box 係肉醬意粉   唔加 Tabasco 真係無咁好味   不過算啦   清清哋嘛 ~

放工去牛頭角拎藥   番到屋企又唔想做家務   口痕痕又食碗豬腳薑   之後抖到 7 點半先煮飯呀 ~

是日懶餐 - 蜜汁焗叉燒 + 腐乳西生菜

蜜汁焗叉燒 - 諗住半個鐘搞掂   點知焗咗成個鐘   不過今次超有心機焗㗎   最後仲加埋叉燒汁   真係正好多   里奧大人話今次好味   可能今次落咗生抽老抽同柱候醬調味   之後好懶   就咁叉燒醬就算   下次都係唔好咁懶喇 ~

腐乳西生菜 - 街市買 $13/2個   都幾大個   仲有一個留番聽晚食 ~

估唔到煮到 8 點   咁里奧大人打嚟話放工   咁我都等埋佢食啦   之後再淥冬蔭功麵   我覺得呢隻冬蔭功麵幾酸辣   真係好似喺泰國菜館食嘅冬蔭功味道   下次有機會去泰國   一定買 2 箱番嚟看門口呀 ~

Green Monday 蕃茄什豆扁意粉 ( 10-JUN-2013 )

( 10-JUN-2013  MON )

尋晚半夜條腰好痛呀   唔知係咪又按摩又扭腰又 Sit Up 激得滯呢   好在後尾都瞓到咋   唔係就慘咯 ~

沖完涼都覺攰   咁今日都應該係好攰㗎喇 ~

天氣又好焗熱喇   企喺度等車都流汗呀 ~

今日 Green Monday   所以早餐食芝蛋治烘底   要飽啲 ~

真係飲咗咖啡都好眼瞓   晏晝真係要出去行下喇   食白粥 + 炸兩   里奧大人同 8 卦一聽見我話食白粥   佢就覺得我好勁   因為咁熱走去食粥   但其實如果慢慢食   真係唔係太熱囉   同埋粥店冷氣都夠   真係唔熱噃 ~

我 Whatsapp 比家姐睇   我話我 Green Monday 食白粥 + 炸兩   家姐即問同事   油炸鬼係齋嚟咩 ?!   我話油炸鬼係麵粉嚟之嘛   好在我唔係食牛脷酥啫   唔係真係以為我食牛脷呀   哈哈 ~

食完行陣   去咗超市買 2 Pack 上海麵就番菇場開工 lu ~

終於等到放工   去完牛頭角拎藥   再去街市買菜同豬肉就番屋企喇 ~ 

里奧大人話生痱滋   所以我煲菊花茶比佢啦   再醃肉同埋浸啲什豆   之後家姐打嚟   問我食咗隻糭未 ?!   之後傾下傾下   傾咗 40 分鐘   其實我今晚諗住快啲煮快啲食快啲沖涼   諗住 7 點半前搞掂   點知 7 點 15 分先開始煮   煮到差唔多 8 點   好在我自己食先   唔係又要等等等 ~  

是日懶餐 - 蕃茄什豆扁意粉

蕃茄什豆扁意粉 - 就咁蕃茄醬 + 什豆咋   我覺得清清地唔錯   唔駛醃肉   整蒜蓉乾蔥蓉同炒   真係慳番好多時間呢 ~  

里奧大人番到屋企 9 點幾喇   雖然我今日 Green Monday   但我都分開煮肉醬意粉比里奧大人   佢口話食清啲無問題   但其實佢根本鍾意食濃味嘢   蕃茄什豆無咩味   更何況我煮   更加無味   所以費事佢咁慘   煮啲肉碎比佢啦 ~


佢食完要做公司嘢喇   我幫佢洗埋碗   睇咗陣雜誌   10 點半就瞓喇   真係好眼瞓呢 ~