長洲半天遊 + 南記 @ 銅鑼灣 ( 1-JUN-2013 )

( 1-JUN-2013  SAT )

今朝 8 點先起身   慢吞吞去刷牙沖涼   但又唔係唔願番工喎   只係想他他條條   因為星期六車程暢順   唔駛咁趕 ~

8 點 25 分出門口   已經開咗對門   點知電話響   原來係 8 卦打嚟約食早餐   不過我話要 20 分鐘後先到   佢照等我呢 ~

8 點 45 分到餐廳喇   今日試新嘅餐廳   不過食完好口渴   勁多味精呀 ~

發達喇   後面同事 Off   所以我做哂啲嘢就即刻上網喇 ~

今日實在太好好好好天氣喇   里奧大人話去長洲   咁我放工即走   坐巴士去九龍灣   再 Join 埋里奧大人一齊搭 619 呢 ~

依家啲人真係好自私   我同里奧大人坐 619 上層   前一排個後生女用手袋霸位   有個阿婆想坐   佢話有人   阿婆話人呢  佢話下一站上車   我見阿婆都有位坐   所以我唔出聲   之後下一個站   有個男仔想坐   個女仔又話有人   下一站上車   個男仔話無位喎   同埋巴士係無留位   所以個女仔死死氣慢慢拎開個袋   呢個女仔真係不知所謂   里奧大人原來唔知佢話留位   唔係會話佢   點解唔比阿婆坐   因為里奧大人最憎人蝦啲老人家 ~

 一落車就有 603   非常感恩呀   2 點 10 分去到碼頭   又見架船埋緊岸   係慢船   但 2 點 15 分就會開船   如果要快船   就要等到 2 點 45 分   咁我坐慢船喇   唔係唔知喺碼頭做咩好呢 ~  

好在有海風吹住又唔覺熱噃   去到長洲已經 3 點 15 分   嘩哈   真係好慢下 ~

影下相再去蘇波記食嘢   依家如果去長洲   都係去蘇波記   因為唔敢試其他舖呀   上次試另一間覺得麻麻   所以唔博喇   如果個個星期嚟長洲就話間間試下   但一年嚟兩三次就唔好喇 ~

豉椒炒蟶子 - 唔記得叫加辣   如果唔係更好食   里奧大人話要食白飯   平時又叫我唔好煮飯   唔鍾意食飯

椒鹽鮮魷 - 其實想食椒鹽瀨尿蝦   不過無   所以食鮮魷
重慶辣子雞 - 里奧大人食埋啲花椒   所以話好辣   花生最好味

水煮牛肉 - 其實想食炸大腸   但居然無   所以食水煮牛肉囉

$198 / 4 款抵食呀  

食完都差唔多 4 點幾   又出去行下影下相呢   里奧大人買咗新機   所以好想影相   想快啲摸熟部機   同埋今日實在太好天氣   真係可以盡情咁影呢   不過就真係超級熱囉   呵呵 ~

5 點幾有快船   咁都走喇   曬到有啲攰   喺船度睇 Ipad    聚精會神睇咗 20 分鐘   之後出事啦   勁想嘔呀   即搽平安膏   我好少坐船會咁   下次都係瞓下好過 ~

差唔多日落喇   又去影下相   之後里奧大人話想去南記   所以就坐 780 去銅鑼灣呢 ~

里奧大人記錯咗落車位置呀   以為灣仔演藝係佢以前交功課附近嘅位置   所以我哋行去南記都行咗差唔多要 30 分鐘   好在去到 COCO 買嘢飲時   問佢哋去銅鑼灣係咩方向咋   原來我哋行錯方向 ~

攰鬼到我呢   差唔多 8 點半先去到南記   感恩有位呀   同埋冷氣夠凍   過下冷河真係舒服好多 ~

坐 619 番屋企   番到屋企即沖涼啦   之後睇下電視   差唔多 12 點先瞓   星期六真係唔想咁早瞓架 ~