京蔥炒豬扒 ( 31-OCT-2014 )

( 31-OCT-2014  FRI )

尋晚成身痕呀   個肚又谷住   所以瞓得勁差   10 點先醒呀 ~

終於每月一到喇   好攰呀   食完早餐都唔周圍行 lu ~

沖完涼發覺皮膚敏感喇   又即刻落去去睇醫生啦   雖然醫生講明會停下發下   但都唔想咁快囉   食藥又眼瞓   想出去行下都唔得 ~

去萬寧買埋嘢就番屋企喇   睇下電視 ~ 

買 4 枝指定牙膏送 4 Pack 鈣思寶豆奶 + 1 支蠔油 + 1 支潔廁劑   勁抵呀 

抖抖下都已經 1 點幾   又食嘢 lu   今日蒸蕃薯食呀   食食下覺得自己真係唔鍾意食啲林 Pat Pat 口感嘅嘢   之後勁想落去食嘢㗎   不過好鬼攰   唔願郁囉 ~   

又係 3 點幾睇聖經   之後 4 點幾都瞓咗   好在瞓半個鐘啫   唔想瞓太耐 ~

7 點煮飯喇   今晚自己食先   因為勁餓呀   哈哈 ~        

是日懶餐 - 京蔥炒豬扒

京蔥炒豬扒 - 今次好有心機煎香啲豬扒   因為有時間嘛 ~

里奧大人成 9 點先番到屋企呀   今晚煮麵佢食   佢食得勁滋味 ~

搞掂哂就休息喇   勁攰   今晚11 點自己瞓先添呀 ~  

越棧 @ 九龍灣 ( 30-OCT-2014 )

牛腩咖哩紅米飯 - 咖哩無咩味

香茅雞翼撈檬

雜錦拚盤

( 30-OCT-2014  THU )

里奧大人今朝上大陸   所以 6 點 15 分要起身喇   我都醒醒哋   但唔會起身住啦   太早喇   哈哈 ~ 

9 點 15 分醒喇   去 KFC 食早餐   呢個時候去 KFC 係最舒服   因為無咩人   好靜呢 ~

食完就去百佳買嘢   之後番屋企就燉肉汁 lu ~

沖完涼就寫 Blog   2 點先食 Lunch   抖陣又落商場行下 ~

3 點幾番到屋企   睇下聖經   之後又執 file ~

家姐今日無番工   咁媽咪 6 點又到淘大   所以行去食嘢 lu ~

8 點幾走喇   同家姐送埋媽咪搭車   我又送家姐搭車   順便去地鐵站接埋里奧大人呢 ~

抖陣就沖涼   睇下電視   11 點幾就瞓喇 ~

蔥粒叉燒炒飯 + 西蘭花 ( 29-OCT-2014 )

( 29-OCT-2014  WED )

又係 9 點 45 分起身   不過其實里奧大人起身之後   我都唔會瞓得好林咁呢 ~

去 KFC 食早餐   再去百佳買豬肉   行下買下   番到屋企都 12 點 lu   咁就無咗半日   時間過得勁快 ~

多蜜糖先好味道   唔係會乾爭爭

沖涼睇報紙   1 點食埋個鬆餅   睇下電視   3 點再食嘢食藥 ~

終於清哂啲鏝頭同黑椒牛丸

1 點半瞓   4 點半醒咗   落去買麵包比里奧大人   同埋買叉燒番屋企 ~

今日自己開機洗衫   里奧大人唔比㗎   驚我整親傷口   不過就真係唔熨衫喇   驚用錯力 ~ 

7 點煮飯   7 點半有得食   今晚自己食先喇   里奧大人 9 點先放工呢 ~ 

是日晚餐 - 蔥粒叉燒炒飯 + 西蘭花

蔥粒叉燒炒飯 - 要清埋啲冷飯   唔想留咁耐 ~ 

西蘭花 - 唔知買咩好   但又唔想食菜心   所以食西蘭花   估唔到 1 個都咁多 ~   

里奧大人食完飯就即做公司嘢喇   好在 10 點幾搞掂   沖埋涼   睇埋新聞都瞓喇   咁我都瞓喇 ~  

唐記點心 (外賣) ( 28-OCT-2014 )

北菇蒸雞飯

鹹魚肉餅飯

雞扎

( 28-OCT-2014  TUE )

尋晚成身痕呀   完全好似無瞓過咁   之後一起身   對腳好多撻紅色呀   塊臉又開始有紅點咁呀   所以即刷牙洗臉去睇醫生喇 ~

醫生話咩過濾性病毒   屬於第 4 類敏感   有排搞喎   勁驚啦我   不過好在唔係出疹 ~

10 點半睇完就即去食早餐 lu   之後買埋麵包就番屋企喇 ~

用醫生開嘅沖涼液沖涼   再搽藥膏   食埋藥   今次有類固醇藥   所以個幾鐘之後好似無咁紅喇   感恩感恩 ~

最驚食敏感藥   因為食完就超勁眼瞓   上下網   對眼皮都開始 Dup 落嚟   所以 1 點瞓到 3 點幾   咁又唔錯喎   啱啱好起食包再食藥 ~

食完又上下網   5 點幾又瞓咗   瞓到 6 點幾   咁啱里奧大人喺石門見完客   可以早啲番屋企呢 ~

頭暈暈咁   所以都係唔落街食嘢喇   叫里奧大人買蒸飯   因為我勁餓呀 ~

抖陣就沖涼   10 點幾食埋藥就即瞓喇   有 3 隻藥係令人昏昏欲睡   所以好好瞓   哈哈 ~ 

金加利餐廳 @ 九龍灣 ( 27-OCT-2014 )

水姑嘅榨菜肉絲雞腿鮑片紅薯粉

( 27-OCT-2014  MON )

今朝要 9 點半起身喇   最緊要鬧鐘響之前   我同里奧大人講話要瞓多陣   講完之後個鬧鐘就即響 ~

里奧大人請假陪我去覆診   佢今年嘅大假都係用嚟咁用㗎喇   無計啦   去唔到旅行嘛 ~

去太興食早餐   里奧大人又話要買多 $1,000 Cash Coupon   之前其實買咗 $500 㗎喇   不過佢話抵買   所以買喎 ~

果幾粒白色   我以為係小貝元   里奧大人話係馬蹄   好少見糯米雞有馬蹄

無啦啦皮膚出點點   唔知比嘢咬定皮膚敏感呢   煩呀   不過都係喺屋企噴殺虱水先   反正屋企無人   哈哈 ~ 

番到屋企即沖涼喇   10 點 50 分出門口   咁打的去覆診啦   點知塞車呀   去到啱啱好 11 點半   雖然我 Book 咗 11 點半   但差唔多 12 點 45 分先有得睇呢 ~

醫生見到我就話我都仲係面青青   哈哈   之後拆膠布   換塊細啲嘅膠布就舒服好多喇   因為黐膠布令到我皮膚好痕呀 ~

今次傷口都好靚   不過真係唔係醫生自己讚自己   上次喺醫院幫我洗傷口嘅姑娘   都話傷口好靚   得一條好淺色嘅白線   不過我話靚唔靚唔緊要啦   我都唔會着三點式嘅   衰里奧大人話我着泳衣已經係罪過呀 ~

醫生比咗張瘤嘅相我哋睇   因為分開咗 1 大 2 細   醫生話咁樣切   個傷口無咁大   如果 10cm 嘅瘤   個傷口要 12 吋長   真係勁過生仔 ~

終於可以食海鮮同蛋喇   牛都食得   但就未可以補身   所以石唇魚都唔飲得   食魚只可以石斑仔   我話唔識蒸   咁問可唔可以食吞拿魚同沙甸   好在醫生話可以呢 ~

搞掂哂都 1 點 lu   搭地鐘去佐敦拎超市 Coupon   之後去食嘢 ~

食完再去裕華買芝麻糕   之後搭地鐵番九龍灣 lu ~

去咗 Smartone 轉 Plan   再去 MP 買生果就番屋企喇 ~ 

差唔多 5 點就去金加利   因為約咗水姑食嘢呢   但咁早食唔落啦   所以叫里奧大人食 Tea Set 算喇 ~

坐到 6 點半就番屋企 lu   沖完涼睇電視   差唔多 8 點就好鬼餓   所以蒸嘢食喇 ~

9 點再食生果   睇埋電視   11 點都瞓喇   今晚有啲攰 ~      

豉汁蒸排骨 + 蕃茄粟米排骨湯 ( 26-OCT-2014 )

依家每晚都食一碗飯

( 26-OCT-2014  SUN )

今朝 9 點半醒咗   之後懶下床   等埋里奧大人一齊 9 點 45 分先起身 ~

去大快活 Share 食一個早餐   因為 12 點約咗媽咪同家姐去鴻星飲茶呀 ~

食完早餐都 10 點 45 分   咁我話去鴻星拎位先   因為預咗要等位   但估唔到有位   家姐過 11 點前離座係當早茶   唔怪得我有位啦 ~

叫里奧大人落嚟陪我呀   順便拎件厚褸同大披肩   酒樓勁凍呀   不過好似得我着冬天褸咁   哈哈 ~

比我早咗就叫埋家姐同媽咪早啲到啦   不過佢哋都差唔多 12 點先到 ~

我睇錯咗   以為咩叫 "舅" 母大壽包   哈哈

XO 醬好味   不過我唔食 lu

懷舊千層糕

鮮蝦炸雲吞

煎韭菜棵

醬汁花生蒸鳳爪

脆皮牛肉腸粉

燒肉雞飯

細碟到呢   份量同匙更差唔多 Size

食下傾下都 1 點半   咁家姐車完媽咪番屋企就車我哋去舖頭喇 ~

見到水姑   所以又陪佢食下午茶啦   今次叫 1 個 Tea Set   但 3 個人食   因為我哋真係好飽 ~

番到屋企都 3 點半喇   睇下雜誌   勁眼瞓   4 點半瞓着咗   好在 5 點幾起身   因為咁晏先瞓   驚夜晚瞓唔到呀 ~

起身即煲湯   6 點開始煮飯   6 點半食得 ~

時日懶餐 - 豉汁蒸排骨 + 蕃茄粟米排骨湯

豉汁蒸排骨 - 里奧大人話個汁好味道   我話無難度啦   因為用同珍嘅蒜蓉豆豉醬整之嘛   哈哈 ~

蕃茄粟米排骨湯 - 個薯仔起芽   所以唔要得   唔緊要   咁就加 2 條粟米同 2 條甘荀   但今次落多咗水   所以無咩味 ~

搞掂哂就抖陣   8 點同里奧大人一齊去商場行下   之後佢送完我番屋企   話都係想出去徑步   咁之得頭先一齊去徑步啦   不過佢話驚我出汗   所以唔想我去徑步囉 ~  

等埋佢番嚟  沖埋涼就一齊食生果   再睇陣電視   11 點幾瞓 lu ~

翠河餐廳 @ 九龍灣 ( 25-OCT-2014 )

京都豬扒

50 年不變嘅豉汁蒸鯧魚

鹹魚茸炒什菜   都無鹹魚茸嘅

( 25-OCT-2014  SAT )

今朝 10 點醒咗喇   勁開心呀   終於可以同里奧大人一齊食早餐   諗住去太興   點知米粉同糯米雞無哂   咁又唔想食通粉   諗咗唔夠 30 秒我話食雞扒啦   Order 時又話無   所以走人喇 ~ 

最後去麻酸樂食啦   坐得舒服啲   同埋無咁嘈 ~

我真係好勁呀  居然唔落辣椒油   以前一定要落   不過依家唔想食咁刺激嘢 lu

食完就番屋企   因為里奧大人要去銀行搞嘢   咁我喺屋企 Hea 啦   因為同佢一齊去   我要慢慢行   咁佢自己快手快腳搞掂仲好 ~

差唔多 2 點去食嘢   之後喺商場行下先番屋企   因為我想食完郁下呀 ~

里奧大人做公司嘢   我就睇電視囉   睇睇下都瞓埋   好在瞓咗半個鐘咋   啱啱瞓到 5 點 45 分   梳洗下就打的去舖頭喇 ~

咁啱姑奶又喺度   所以一齊食晚飯   之後諗住落去茶餐廳叫定條魚啦   點知打比水姑   佢又話唔嚟   但明明頭先話同我哋食飯家嘛   又唔早啲講   唔係唔叫條魚啦   食唔哂嘛 ~

食完又要行陣   好感恩差唔多 7 點半就搞掂   可以打的番屋企喇 ~

抖多陣就沖涼   之後睇電視   9 點就食生果   因為媽咪話要快啲食咗去   唔係好快爛喎 ~

里奧大人 10 點幾做哂公司嘢   之後沖涼  咁我陪佢睇電視啦   佢之前錄咗好多嘢都未睇呢 ~