譚仔三哥米線 @ 九龍灣 ( 28-FEB-2018 )

墨魚丸麻辣米線 (中辣) - 阿姐話中辣好辣   我覺得都辣   但唔係話好辣

( 28-FEB-2018  WED )

今朝啲天氣又係潮潮濕濕   但就回暖了 ~

早餐食芝腿治   雖然唔餓   但食飽咗又真係精神啲咁喎 ~

菇場唔太忙   最開心係無哂大粒喺度   呵呵 ~

Lunch Time 同 8 卦出去食   因為佢下午 Off   食完陪佢買埋咖啡就走人   我就去買朱古力脆脆   番到菇場啱啱好 1 點半 ~

栥飯好味呀   熱辣辣

唔記得係咪豬肋骨   只記得佢啲肉質鞋到好似食瘦肉咁囉

牛展 OK   我同 8 卦都覺得啲麵腍囉   如果唔係更好食

食完即買朱古力脆脆   之後阿 mi 話買嘢食真係唔夠我快   衰   我為妳哋咋   哈哈

仍然 Hea 過   所以就 Load 旅行相   唔係唔想整㗎喇   哈哈 ~

放工去九龍灣   行咗陣 Piago 再去食嘢 ~

雖然唔餓   但行下行下都係唔想特登行到 6 點半先食嘢   所以 6 點都去譚仔食喇啦   好在等咗 10 分鐘先上枱   因為真係覺得 6 點食晚餐太早喇   哈哈 ~

食完就去 Piago 買嘢   之前姑奶比咗 $400 cash coupon   今日到期   咁里奧大人又上廠過夜   我可以有多啲時間   可以慢慢行慢慢睇 ~

睇連買都 1 個鐘   如果同里奧大人一齊行   一定無可能   同家姐就無問題   哈哈 ~

買咗一大袋   多數係麵類   無諗過咁重囉 ~

再去生果店買埋 3 個就番屋企喇   番到屋企即拖地   之後就去徑步   話咁快就徑咗半個鐘   夠哂皮喇 ~

沖埋涼就開機洗衫   真係要休息喇 ~

睇 Youtube 睇到差唔多 12 點   唔怪得咁攰啦   呢排真係太夜瞓了 ~

蒜汁豬扒 + 蒜蓉包 + 蠔油白菜仔 ( 27-FEB-2018 )

特登再整意粉比里奧大人 

( 27-FEB-2018  TUE )

今朝好凍咁喎   又要着番厚褸添 ~

尋晚嗰餐仲未落格   早餐食奶醬多算喇 ~

菇場忙呀   不過呢啲天氣真係令人無咩 Mood 做嘢   哈哈 ~

無啦啦勁餓   所以一到 Lunch Time 即去買嘢食   再買埋麵包比里奧大人就即番菇場開餐喇 ~

忙下停下   好快又放工 ~

番到屋企都抖陣先   真係好攰呀 ~

里奧大人好夜放工   咁我 7 點幾都食嘢啲隔夜嘢先喇   之後再等佢番嚟再食啲餸 ~

尋晚食剩嘅闊條麵真係得個色   完全係無味道可言

我 8 點都煮定嘢先喇   真係唔想咁夜煮   好似無哂私人時間咁   煎完又要大清潔   真係好唔鍾意煎嘢   哈哈 ~

里奧大人 8 點半放工   我沖埋涼   佢就番到屋企 lu ~    

是日懶餐 - 蒜汁豬扒 + 蒜蓉包 + 蠔油白菜仔

蒜汁豬扒 - 唔想成日整茄汁   咁里奧大人都鍾意食蒜汁   咁一於蒜汁   我覺得今次啲豬扒唔 "鞋" 喎   下次去番呢檔買先 ~   

蒜蓉包 - 勁呢   條法包係星期五買架   食到依家   哈哈   不過山崎嘅法包真係好味道   我光波咗 8 分鐘都唔會乾   仲有啲煙煙韌韌嘅感覺 ~

蠔油白菜仔 - 星期日買㗎   好在買咗半斤咋   所以今晚都好容易清埋佢呢 ~

洗埋碗都 9 點幾   係時候休息喇 ~

里奧大人 11 點就瞓   我睇 Youtube 睇到 12 點先瞓   其實真係唔可以咁夜瞓   太唔健康了 ~

PizzaExpress @ 官塘 ( 26-FEB-2018 )

二人套餐 ($418)
焗芝士沾醬 - 有意大利藍芝士 / 煙燻芝士 / 水牛芝士 / 烤焗嘅芝士醬汁   加埋招牌麵包球   樣樣都勁好味呀



+28 升級 卡拉布雷斯薄餅 - 主要有意式辣肉腸 拿坡里辣肉腸 青椒椒醃 辣紅椒等等

好味道  



香辣煙肉寬條麵 - 唔覺有煙肉   我同家姐都覺得無咩味添呀   可能 Pizza 啲辣椒太辣   但里奧大人話呢個麵好辣

芒薑冰涼特飲 (芒果蓉 / 乾薑水 / 薄荷) - 呢杯好飲喎   有好濃嘅芒果味同薑味



滋味布朗尼 - 寫明有意式杏仁碎開心果碎 蛋卷   但真係少到呢   哈哈 





( 26-FEB-2018  MON )

又大一歲喇   祝自己生日快樂   身體健康   生活愉快   哈哈 ~

里奧大人夜晚又成日發出勁大怪聲   嚇到我醒咗   佢應該鼻塞得好緊要   佢快啲好番啦   我都有覺好瞓嘛 ~

春天到喇   即係又大回南啦   個人真係勁眼瞓囉 ~

今朝 8 卦話可以早喎   咁去麥記食早餐啦 ~



菇場勁忙呀   不過咁眼瞓嘅情況下   有嘢做都好   起碼唔會中眼瞓   同埋老闆娘無啦啦坐咗喺我後面間房   我都唔方便上網啦 ~

Lunch Time 出去買酸辣米線   其實唔餓   但今日生日   要比自己食鍾意食嘅嘢   哈哈哈哈 ~

真係次次食完米線都好眼瞓   但佢嘅份量都無水餃米咁多   我估真係好重味精定喇   我有時都會夜晚食酸辣米線   但唔會食完好眼瞓㗎喎 ~

又繼續忙啦   忙到放工   今日真係好充實呀 ~

放工即走   里奧大人話今晚夜放工   所以我都番屋企等佢 lu ~

我同家姐講話今晚起碼 8 點幾先食飯   咁家姐都嚟埋食呀   其實佢好想嚟   不過驚太夜放工   咁依家啱哂啦   大家都咁夜放工 ~

里奧大人走咗班車   所以佢做到 7 點 50 分先放工   佢話唔好意思喎   我話無所謂   之後佢話想早啲見到我嘛   好搞笑囉   好少聽佢咁講   我就講得多 ~

咁我 7 點半都出門口喇   諗住去 Italian Tomato   不過要等位   同埋限時 60 分鐘   咁呢樣就唔鍾意喇   我覺得起碼要 90 分鐘啦   食晚餐唔同食午餐   放工咁攰   真係唔想咁趕囉 ~

里奧大人又到咗 APM   叫佢睇下 Pizza Express 有無位   有就即轉場   感恩有好多位   哈哈 ~

家姐 8 點半放工   9 點先到   我哋一早睇定食咩㗎喇   咁等佢落車就即落 Order   始終 Pizza 要時間焗嘛 ~

佢一見到我就話生日快樂   之後佢話差啲講咗新年快樂身體健康   哈哈 ~

食下傾下  好快又 10 點幾    家姐係都要請食生日飯   咁好啦   下次我請番佢食其他嘢啦 ~

起身走人   咁我好自然放個手機入手袋   家姐話個手機係佢㗎喎   笑死我   衰奧話我特登整鬼家姐喎   但我真係以為係我㗎 ~

之後同家姐去 Quicksliver 睇風褸   佢成日話 2 件 85 折好抵   係都要話送比我生日禮物   但我話真係唔駛囉   屋企好多褸   再買比人殺㗎喇 ~

一齊行去搭車   最搞笑里奧大人以為家姐同一方向等車   但其實佢喺隔離條街等車   我話我哋係咁㗎   鍾意送人送到上車先走   哈哈 ~

番到屋企即沖涼喇   呢啲天氣真係令人超級攰 ~

睇多陣電視   11 點 15 分都即瞓喇 ~

芋頭糕 + 馬蹄糕 + 蕃茄薯仔瘦肉湯 ( 25-FEB-2018 )

( 25-FEB-2018  SUN )

里奧大人仍然唔舒服   所以都無番教會   咁可以自然醒了 ~

我瞓到 11 點 20 分   諗住買包食   點知里奧大人都起身   咁出去食早餐喇 ~

食完就去買蕃茄薯仔   順便搵人換沖涼嘅水龍頭   之後即番屋企   抹完嘢就即沖涼喇 ~

師傅 2 點嚟到   搞掂哂都 2 點半   要出去食下午茶喇 ~

食完就去姑奶屋企整嘢   之後又拎番幾件厚衫番屋企   咁我問佢哋仲會唔會凍 ?!  姑奶同里奧大人一齊好大聲話仲會凍㗎   里奧大人話未食五月糭呀   姑奶就話我唔好成日咁着咁少衫   愛靚唔愛命先得㗎 ~

搞掂哂都 4 點   里奧大人話食完檬粉唔舒服   所以都係打的番屋企   番到屋企即叫里奧大人快啲瞓下   之後佢都瞓咗個幾鐘 ~

我就熨衫   搞掂哂就滾湯 ~

6 點半飲湯   7 點 15 分開始煎糕   已經落好多油   但都有啲燶   之後真係要慢慢煎喇   咁就靚仔好多呢 ~

是日懶餐 - 芋頭糕 + 馬蹄糕 + 蕃茄薯仔瘦肉湯  

芋頭糕 + 馬蹄糕 - 我覺得美心禮盒裝啲糕好味喎   但就咁獨立買一個嗰啲就好難食   因為上年姑奶比咗個蘿蔔糕   我話好似食麵粉咁   又無料又好多水份   勁難煎   但今次禮盒裝就好足料喎 ~   

蕃茄薯仔瘦肉湯 - 我同里奧大人講話: 你飲到好好味   好似好鍾意飲咁嘅 ?!   估唔到佢話佢不嬲都鍾意飲蕃茄湯   因為我次次滾湯   佢第一句就會話乜咁多湯   之後都唔鬼理佢家嘛   哈哈 ~

洗埋碗仲要大清潔   因為頭先煎糕   啲油彈到周圍都係   好在一年煎一次糕咋 ~

搞掂哂即沖涼   之後即開機洗衫   好攰呀 ~

又繼續睇農夫   咁望下個鐘   原來已經 11 點半喇   要即瞓啦 ~

翠韻軒 @ 尖沙咀 ( 24-FEB-2018 )

好耐無見有紅燈仔眼睛嘅乳豬喇   因為多數都係車厘子呢

薄薄嘅皮   又無肥膏   勁好味   不過再脆啲就更好啦 

咁樣影到啲帶子好假咁   哈哈



炸蝦棗好味呀  



柚子沙律都好味



呢個超好味   因為我好鍾意食翡翠苗 瑤柱同炸蒜



食極都仲有   食到好滿足呀



原鼎火瞳燉土雞 - 個名幾有氣勢   雲腿燉湯都幾好味   但佢哋就咁食啲雲腿   我覺得好鹹囉 



勁多湯渣   其實仲有一舊雲腿   不過佢哋好快食哂   



我鍾意食鮑汁生菜 



原隻鮑魚   但冬菇更好味   因為好入味呀

脆燒雞 - 我已經好飽   所以無食喇   



鮭魚鴛鴦紅米飯就好味道喇   加埋鴨胸肉一齊粉   鹹鹹香香   最緊要啲飯係粒粒分明   同埋係無咩油先勁呀   好考功力㗎   伊麵就唔得喇   咁里奧大人話食   我一夾就已經覺得係腍 Pat Pat   但食落真係腍 Pat Pat   哈哈

因為芝麻湯丸好甜   所以變咗紅豆沙無味   哈哈   同埋紅豆沙都唔熱嘅

最期待就係呢個 : 雙喜臨門甜美點"   第一次係食老婆餅同笑口棗咋

       


( 24-FEB-2018  SAT )

今朝同家姐食早餐   今晚又見到佢   實在太開心了   呵呵 ~

差唔多 8 點 50 分先走   好在番到菇場   老闆都仲未番到咋 ~

菇場忙啦   但心情好呀   唔想做公司嘢   哈哈 ~

放工即走   番到屋企都抖陣先 ~

咁里奧大人話瞓覺   我 2 點幾就去買麥樂雞餐   再買方包比里奧大人   佢話之前買咗啲果占同花生醬   要食埋去喎   咁又係呀   我朝早成日食醬占多   番到屋企真係唔想又食囉   哈哈 ~

食飽又熨衫   唔係驚瞓着 ~

之後又睇 Youtube   呢排成日睇農夫   笑下都唔錯㗎 ~

今晚攝影表弟結婚   我地 6 點都出門口   約咗家姐 姐夫同剪髮表妹 7 點喺文化中心等 ~

家姐 6 點幾都到咗   但姐夫話餓所以去食啲嘢先   我到咗嘅時候   佢地就啱啱到文化中心   咁等埋表妹就去酒樓喇 ~

剪髮表妹搭地鐵   但打嚟話唔識點去文化中心   我即比里奧大人聽啦   咁叫佢尖東站落車   之後無耐家姐打嚟   我順便問佢邊個出口出 ?!   佢話 E 出口 ~

咁即同表妹講啦   隔咗陣   佢話細表妳係咪老點 ?!   尖東無 E 出口喎   我話大表啱啱喺 E 出口出喎   之後我問番家姐   原來家姐係尖沙咀站   哈哈 ~

其實我同家姐 7 點前已經到文化中心   但等埋表妹等到 7 點 20 分   佢又係都要同埋一齊上去   唔係都想上去等囉 ~

終於人齊  仲要見到大食同阿姨 姨丈添   咁一齊去酒樓 lu ~

我成日話係女家嘅家人   但其實我應該係男家啦   表弟結婚嘛 ~

阿姨同姨丈由朝到晚都笑到合唔埋咀   真係替佢哋開心呢 ~

好在我哋同表妹佢哋一枱   咁再加婆婆同工人   同埋表弟契爺契媽   都係得 11 個人   里奧大人話大食一見到得 11 個人就好開心   話可以食多啲喎   笑死我   哈哈 ~

8 點半終於開席喇   食下傾下   咁我睇到表弟契媽問阿姨   係咪仲有個家姐 ?!   阿姨個樣即好傷感話唔喺度喇   之後契媽隔咗無耐仲話   係啦   以前見妳哋係幾兄妹家嘛   頭先數下少咗個咁   聽佢講完   我嗰下都即刻 Down 哂 ~

差唔多 10 點先影大合照咋   無計啦   個個唔同時間來   到齊嘅時候都差唔多開席了 ~

10 點幾   契爺契媽都走先   之後個個講嘢都大聲哂   始終大家都好耐無見   真係唔知傾咩好   但我哋同阿姨姨丈就好開心傾偈   所以變咗佢哋比較靜   好似外人咁囉 ~

接近尾聲   估唔到表弟行去每一枱派利是   感覺真係大個仔喇   哈哈 ~

11 點散席   我地搭巴士番屋企   11 點 40 分番到屋企   拿拿聲沖涼瞓覺喇 ~

韓式辣醬焗豬肶 + 蒜蓉包 + 蠔油唐生菜 ( 23-FEB-2018 )

( 23-FEB-2018  FRI )

今朝要着厚褸 + 大披肩呀   諗番起年三十就超級熱   依家就超級凍   反差好大 ~

其實唔餓   但唔知做咩鬼咗米粉餐 ~

菇場唔忙呀   所有大粒都唔喺度   勁無 Mood 做嘢   哈哈 ~

Lunch Time 食健康餐   不過我成 1 點 15 分先食   因為朝早果餐真係好鬼飽下 ~

仍然 Hea 過   之後 8 卦話一陣全車人番公司   佢哋今朝上工廠拜神   之後食 Lunch    我已經問係咪要番公司 ?!   佢話未知   點知轉頭話全車人番公司 ~

4 點 55 分見到佢哋番來   真係完全浪費時間   咁變相你一定要開 OT 啦   成日無做過嘢   依家番嚟就要做番   真係慘 ~

我放工都即走喇   番到屋企即拖地   之前成日潮潮濕濕   所以都就咁抹地   都係覺得拖地乾淨啲咁   哈哈 ~

今日姑奶跌親   所以里奧大人送埋佢去大埔姑奶屋企先番來   好在 8 點番到屋企   唔駛咁晏食 ~

是日懶餐 - 韓式辣醬焗豬肶 + 蒜蓉包 + 蠔油唐生菜  

韓式辣醬焗豬肶 - 今次焗起上嚟   有好濃烈嘅豬味   所以唔會再整㗎喇 ~

蒜蓉包 - 牛油過咗期 1 個月   但唔理喇   照食   不過我就無比里奧大人食囉   一個屙好過兩個屙   哈哈 ~

蠔油唐生菜 - 前晚食剩 2 棵   今晚食埋去   但要加啲蠔油   依家鍾意食蠔油   又改哂啲口味咁 ~

洗埋碗就沖涼   之後開機洗衫 ~

諗住休息   點知唔記得仲有 2 機衫要熨   咁要熨衫 lu ~

熨完都成 10 點   里奧大人都差唔多瞓覺   咁我又睇 Youtube 啦   成 12 點先瞓 ~