住家飯 @ 姑奶屋企 (大埔) ( 30-SEP-2024 )

海底椰豬骨湯好好味呀   我實在太想飲湯   里奧大人話姑奶知道今晚有湯飲   所以叫我哋嚟食飯呀    

兒甥女知道我同里奧大人留低食飯   所以特登去買豆腐花比我哋食   感動感動

飯後果完全食唔落

( 30-SEP-2024  MON )

尋晚半夜去完廁所   感恩好快瞓得番呢 ~

早餐食法國丹麥酥方包   6 塊要 $22   我以前就成日買比家姐   因為每星期去媽咪屋企一次   咁啱又星期三做特價   家姐好鍾意食㗎   不過都唔記得嗰時係幾錢 lu ~

菇場忙下停下   好快就到 11 點 45 分   想出去嘅時候就唔會覺得太早放飯時間   哈哈 ~

工廠同事屋企種嘅香蕉

Lunch Time 出去行一陣   行到 12 點 10 分就番菇場開飯喇 ~

仍然忙下停下   又係好快就放工咁呢 ~

放工去大埔搞啲嘢   咁里奧大人就入咗大埔先   一陣姑奶會同佢一齊出嚟接我   佢好緊張話喺巴士站接我   我話唔駛咁緊張   教我點行就得㗎喇   雖然離開大埔好耐   但間唔中都會入去   我真係唔想里奧大人搞到咁緊張囉   我又唔係細路仔 ~

估唔到 6 點 15 分就到   佢叫我去冷氣地方涼下   我話唔駛啦   行嚟行去一陣到咗唔見人仲煩 ~  

我行去停車場等佢哋   之後等埋兒甥女就去搞啲嘢   搞掂就去姑奶屋企食飯喇 ~

兒甥女個仔食唔哂啲飯   姑奶話啲飯凍哂唔好食   兒甥女話快啲食咪得囉   估唔到佢會咁講   咁佢又教得好喎   仲諗住佢寵個仔任佢點添 ~

食完飯一齊傾偈   我講開鼻鼾聲   兒甥女話佢無   但佢老公半夜會鍊下佢個鼻   我話咪即係有鼻鼾聲囉   笑鬼死   之後真係覺得里奧大人真係好好   因為我鼻鼾聲超大   佢係帶住耳塞瞓   所以佢話有時半夜聽到獅子咆哮   以為發緊夢   但其實係佢耳塞甩咗   哈哈 ~

其實好飽   但點都要食埋碗豆腐花先走啦   我話同里奧大人 Share   但佢哋唔比呀   哈哈 ~

差唔多 8 點半就走喇   里奧大人姐夫車我哋去大埔市中心巴士站   咁樣慳番唔少時間呢 ~

番到屋企已經 10 點 25 分   我同里奧大人講話我平時 10 點半瞓覺   佢笑住話番到屋企可以即瞓   哈哈 ~

沖埋涼就睇下 Youtube   差唔多 11 點 40 分先瞓呀 ~

粟子燜雞 + 沙爹串燒 + 辣椒蒜蓉蒸節瓜 ( 29-SEP-2024 )

( 29-SEP-2024  SUN )

今朝 7 點起身   里奧大人問做咩咁早起身 ?!   我話去家姐屋企嘛   但今朝班車無咗   所以要車轉車去家姐屋企 ~

香煎韭菜角 - 新嘢呀   哈哈   我鍾意食但無講   唔係下次又叫㗎喇

陳皮牛肉腸粉 

迷你珍珠雞

鴛鴦燒賣皇 - 我食 1 粒牛肉就夠

醬皇蒸鳳爪 - 我食 1 隻咋   家姐問係咪唔鍾意食 ?!   我話尋晚食咗個 Mcgriddle 仲好滯   哈哈

食完去超市買料整沙律   行下買下又半個鐘   明明講好話買完就走嘛   哈哈 ~

Berry 女今朝超級熱情啦   我入屋已經樸到顛咗   之後我去到飯枱   佢直頭企身咁撲我同怪叫   係咪真係見到我就咁肉緊呀   所以真係比佢冧死呢 ~

我迫佢跳上梳化   等我可以影張相   哈哈

抖陣就整沙律   家姐叫工人將 5 個蘋果切粒   我話又好喎   切粒最花時間嘛   我話其實係工人整沙律唔係我整   哈哈 ~

之後加罐頭菠蘿同粟米   最後加埋蟹柳就搞掂   最搞笑家姐係咁叫工人睇住我點整   我話簡單到不得了啦   平時我會加埋椰果紅腰豆雜果   不過家姐話唔鍾意食   所以唔加咁多嘢 lu ~

家姐個玻璃盒好大   所以好似整咗好少咁   哈哈

工人話見有啲人會整沙律去 "教 will"   我聽咗 3 次都聽唔明   之後叫家姐翻譯   家姐話係教會呀   因為工人講得好快   如果佢慢慢講   佢係講到教會個音囉   比佢笑死 ~

家姐同工人一齊拎嘢   工人扮打家姐   Berry 即刻吠同埋 "胡胡" 聲呀   但家姐打工人又無咁喎   之後我打家姐   佢都吠我呀   咁我叫工人打我吖   Berry 都有吠工人呀   我話乖女喇   家姐同工人真係慘   一個無啦啦比人打   一個無啦啦比狗吠 ~

我坐低梳化抖下啦   家姐又話比呢樣嗰樣比我   今朝我特登拎番個月餅冰袋比佢   但最後又係我拎番走   因為佢比咗好多嘢比我   仲要有啲要下次先拎到添呀 ~

差唔多 12 點就叫家姐陪我去速剪   但我夾咗前面啲頭髮   所以髮型師要我番番屋企洗頭再剪喎   乜咁高要求嘅   哈哈   我平時都係咁嘛   之後先醒起我喺髮型屋係會洗埋頭先剪囉 ~

洗完頭吹乾埋就即走喇   髮型師叫我剷咗後面再做層次   家姐話試下啦   又話想要剪到咁咁咁   好似當我係細路仔去剪頭髮咁呀   好搞笑   哈哈 ~

髮型師問我有無扎頭髮 ?!   我話無喎   佢話我啲頭髮本身係攣   真係依家先知   其實應該係無啲人咁直   因為我識啲人   佢哋攣到好似電咗髮咁㗎 ~

髮型師又講咗關於護髮嘅常識比我哋知   估唔到速剪都可以長知識   哈哈 ~

今次效果非常滿意呀   不過下次唔知係咪佢 lu ~

同家姐去買午餐    因為要等 20 分鐘   所以又去 Living Plaza 睇下   之後又買咗一堆零食   今次到家姐忍唔住話如果一齊住附近   肯定會買好多嘢   哈哈 ~

去埋拎午餐就即番屋企   工人話我剪得好靚呀   之後家姐又話之前太太啲頭髮好碎濕濕   剪咗好睇好多喎 ~

亞參去骨海南雞飯 ($89) - 啲雞都好滑

巴東牛肉飯 ($76) - 工人唔食豬   所以叫個牛就可以大家食喇

鳳尾蝦春卷 ($29) - 叫工人食 2 件   佢好鍾意食炸嘢㗎

班蘭咖央多士 ($25) - 家姐食 2 件   仲話好鍾意食麵包   哈哈   佢次次都會叫呢個多士

家姐見到牛油會發狂

姐夫話啲提子好貴㗎   家姐笑住話   佢買嘢比平時貴少少就話好貴   好搞笑   不過我話要食   姐夫貴貴都會買嘅   不過我唔想佢拎呢

我食食下嘢周圍望唔見 Berry   原來佢喺枱底陪住我哋呀   真乖女   家姐隻腳好似踩喺 Berry 背脊咁   哈哈

我叫家姐醒啲啦   縮開隻腳等我同 Berry 影相

家姐入咗房啦   之後高 8 度話做咩妳喺度嘅 ?!   我問邊個呀 ?!   咁問佢其實都好低能   嗰個肯定係 Berry 女啦   哈哈 ~

工人喺家姐房拖地   Berry 就會吠佢   仲話 Berry 間中會咁   我話妳好叻呀   識得點樣用間中呢兩個字   家姐大笑話佢係講 "緊張" 呀   哈哈哈哈 ~

以前姐夫絕對唔比啲狗上梳化同床㗎   所以佢其實都錫 Berry 呢

我同家姐準備走人   佢都唔出房呀   工人都話家姐每次出門口   佢唔夠 5 秒就跳上床

差唔多 2 點就同家姐一齊搭地鐵   佢去整嘢   我就去買菜同金沙骨先番屋企 ~

番到屋企都 4 點半   里奧大人就啱啱開完會   無諗過開咁耐 ~

JAZZ 蘋果 ($38) - 家姐試過話真係好爽脆   所以又買埋比我

家姐又特登買 Tempo 濕紙巾比我   之前我話去旅行用   但我已經話我自己買   點知佢點都要買   激死我   又唔係特價就唔好買嘛

抖陣就燜雞   其實有啲攰   不過解凍咗就要煮啦 ~

是日晚餐 - 粟子燜雞 + 沙爹串燒 + 辣椒蒜蓉蒸節瓜

粟子燜雞 - 第一次整咋   原來咁易整   間唔中食栗子都好㗎 ~

沙爹串燒 - 糟糟整比家姐   但佢今晚食生日飯   所以叫我今晚食埋去   咁當然無問題啦   哈哈   味道好似出面泰國餐廳嗰啲咁呀   糟糟真係好勁 ~

辣椒蒜蓉蒸節瓜 - 煮 1 個就算   因為唔係咁餓 ~

洗埋碗就沖涼休息   里奧大人做運動 ~

打陣機又睇下 Youtube   今晚好攰呀   所以10 點 20 分都瞓覺 ~

楓糖鬆餅漢堡 (McGriddles) (外賣) ( 28-SEP-2024 )

CC 頭先話呢個 McGriddles 幾好味   所以今晚買嚟試下   家姐好搞笑囉   係咪問點解有薯餅 ?!   我話依家全日供應呢個早餐嘛   家姐再問夜晚食都係薯餅 ?!   佢同 CC 同里奧大人都鍾意食薯餅

( 28-SEP-2024  SAT )

今朝 9 點都自然醒   咁叫里奧大人買份三文治外賣   我怕頂唔到到 11 點呀 ~

我影完同里奧大人講   話好似以前番菇場食早餐咁呀   哈哈

食完抖陣就沖涼   之後出發去 megaBOX 喇 ~

今日約咗 CC 去飲茶   但兔兔要番工就嚟唔到   本來話一齊去旺角食   不過兔兔走唔開   所以 CC 話我哋 3 個食得啦 ~

我哋 10 點 50 分到   CC 就 10 點 45 分到   其實如果無走咗班車   咁應該同步到添呀 ~

我話依家放星期六   如果里奧大人都放假   寧願中午出來食飯   始終夜晚個個都攰又要 Book 位   依家里奧大人放工時間又唔穩定   一陣限時就成餐飯食唔到仲慘 ~

依家少咗好多酒樓   所以我話去煌府一號   其實我唔記得之前有無去過   但原來 CC 間唔中都會同屋企人嚟呢間   咁就好喇 ~

一坐低就傾偈   同埋依家 CC 乜都食   所以叫里奧大人負責點點心   哈哈 ~

黑松露燒賣皇 (大) - 我無食呀

紅油抄手 (大) - 我都估里奧大人實叫   個汁好味呀 

煌府蝦餃皇 (大) - 都幾多蝦肉

祝壽紅桃仔 (中) - 我話點解叫壽包咁搞笑嘅 ?!   里奧大人話因為 CC 生日   估唔到佢真係記得呢餐係請 CC 食嘅生日飯呀

魚肚棉花雞 (頂) - 我食咗嚿雞

高湯小籠包 (大) - 好奇怪嘅食法   但又幾 OK 喎   哈哈   今次里奧大人叫啲點心都唔錯呀

懷舊芝麻卷 (大) - 我叫㗎   因為里奧大人鍾意食

手拍青瓜海蜇 ($48) - 食到飽飽哋   我話要叫呢個小食消滯呀

椰香手抓餅 (頂) - 都係我叫   佢哋兩個牌話呢個甜品好味

CC 無啦啦話我同佢兩個傾偈   傾個幾鐘邊夠   今次傾咗超級多話題呀   連里奧大人都好多嘢講添呀   開心開心 ~

我叫 CC 講富士山鬼故同午夜兇鈴單嘢比里奧大人聽   雖然我都親耳聽過   但再聽都係毛骨悚然囉 ~

講開按摩   CC 話兔兔好想去深圳按摩   我話正有此意呀   不過我話只得星期六先得閒去咋 ~

之後里奧大人講米奇老鼠   CC 話佢公司天花板以前有老鼠行添呀   佢同同事係聽到成隊兵咁行   嚇到佢哋即刻拎袋走呀   但依家無喇   可能疫情之後無煮飯呢 ~

又唔知講開咩   CC 話附近一起樓就最慘   仲話好多烏鴉飛咗出嚟   平時係唔覺   里奧大人話烏鴉咪好囉   有啲係巨強老鼠出唒嚟呀   咁我話比佢哋知   我公司附近無起樓   都好多小強巨強出現喺公司囉   之後就一齊研究點解會走出嚟   我話好在差唔多食哂嘢先講   哈哈 ~

CC 同我一樣   每星期大清潔屋企一次   之後問我係咪仲係乜鬼都熨   呢句好笑囉   我話熨埋底衫褲毛巾都比人話   因為佢到呢刻都仲講㗎   笑死 ~

我哋由 10 點 50 分傾到 2 點 30 分   如果唔係酒樓要 Set 場   可以仲耐   哈哈 ~

呢間酒樓都唔錯   由 11 點至 2 點所有點心有 8 折   但有價錢就無 8 折   呢餐接近 $400 都抵呀 ~

咁同 CC 去洗手間   又講下秘密   之後里奧大人打比 CC   好在我哋正想出去咋   之後里奧大人話好驚我肚痛暈咗呀   咁我又無拎手機   話 CC 唔聽電話就會直接去女廁搵我哋呢   因為去咗 10 分鐘咁耐真係好驚喎 ~

我頭先話依家開咗好多間 7/24   里奧大人同 CC 話酒樓隔離咪有囉   我話無留意到嘛   咁我哋又一齊去睇下   因為商場應該唔會 24 小時營業嘛 ~

同 CC 再行 megaBOX 之後坐 Shuttle Bus 去德福再行過   佢行到 4 點半就番屋企   我哋就繼續行下   最後去埋 Panash 買法國丹麥酥方包就走喇 ~

諗住去麥當勞食晚餐   不過好多人   咁打包番屋企慢慢嘆 lu ~

里奧大人唔知拎啲咩   好大力咁放低   我話細力啲唔得嘅 ?!   佢話自己斯文但動作粗魯   講完自己喺度大笑   我話得你先講得出口囉 ~

CC 又送日本手信比我   我話下次真係唔駛送嘢比我啦   咁多年老友真係唔駛客氣囉

我喺馬莎買嘅薄荷糖   之前 1 筒要 $13   仲要唔係間間都有   依家 4 筒只係 $28 咋   唔買唔得啦

食完抖陣就開機洗衫   之後沖涼休息 ~

睇陣福寶   今晚 10 點 45 分先瞓 ~

貓廬 @ 紅磡 ( 27-SEP-2024 )

日式咖哩吉列豬扒飯 ($83) - 我突然間好想食吉豬同飲味噌湯   全場得我一個飲湯咋   哈哈

香煎鯖魚柳 ($83) - 里奧大人食薯條就加 $5   今次啲薯條外脆入軟好好味呀

貓腳造型嘅杯好得意呀   唔係里奧大人講   我都無留意

( 27-SEP-2024  FRI )

感恩一覺瞓天光呀   6 點 53 分醒醒哋   不過我繼續瞓到 7 點 15 分先起身呢 ~

早餐食千層吐司搽花生醬   食完有啲漏添 ~

食完諗住靈修   但里奧大人起咗身   咁同佢傾陣偈啦 ~

菇場忙呀   好在 11 點搞掂 ~

Lunch Time 去 DAISO 買醬料   再去一田買嘢比 CC   買完再行陣先番菇場 ~

兔兔鍾意食銅鑼燒   CC 鍾意食新鮮無花果   但我唔買唔到呀   所以買無花果乾比佢喇

諗唔到食咩   所以食泡菜杯麵算喇 ~

忙下停下   好快放工 ~

今晚想出去食   里奧大人問想食豬豬定貓貓 ?!   咁即係佢想去貓貓啦 ~

里奧大人 6 點幾先放工   所以我去餐廳等佢喇 ~

貓貓牆紙

貓貓文字夾

呢張就無貓貓喇

食完就同里奧大人番公司整嘢   整到接近 8 點先走 ~ 

番到屋企即開機洗衫   沖埋涼就休息   里奧大人就熨 2 機衫 ~

終於開呢包零食   其實再唔開就唔想食   所以里奧大人成日話我買完又唔食囉

睇陣 Youtube   今晚 10 點半都瞓覺 lu ~