黑椒豬扒炒扁意粉 + 菜心苗 ( 8-SEP-2024 )

( 8-SEP-2024  SUN )

里奧大人今朝 6 點 40 分要起身番公司整啲嘢   我就可以瞓到 7 點   但其實佢鬧鐘響   我都醒咗㗎喇 ~

尋晚瞓得勁差   真係加加埋埋都唔知有無瞓得 4 個鐘   感恩沖完涼都精神呢 ~

我去餐廳食早餐先   之後里奧大人都到喇 ~

我叫少通粉   咁我食咗兩啖之後   里奧大人睇食咩早餐   佢想揀米線   我話不如比通粉佢食   因為我食唔落咁多嘢

最後我食奶油脆豬   唔想兩個人食一份早餐咁肉酸呀   哈哈

今日有大 Project   所以都掛住做嘢   都陪唔到阿妹食早餐 lu ~

叻叻對我好好呀   我諗住斟杯暖水   點知佢唔比我拎紙杯   原來佢拎隻膠杯沖熱鹹檸檬比我呀   佢知我咳到死死下   本來佢唔知我病   但佢話上次唔見我兩日   所以即問里奧大人點解唔見我呀   咁上次見到佢   佢都即問我好番未 ?!   里奧大人同事同我啲同事又係成日咁問   好搞笑   可能好少見我病咁耐呢 ~

飲完杯鹹檸檬   喉嚨真係舒服好多㗎

之後又比喉糖   里奧大人話佢唔舒服   叻叻都唔會咁關心佢呀   哈哈

做完嘢就去萬寧買和田竹健貼   咁我多數會睇下其他嘢先買嘅   有個職員無啦啦走埋嚟同我講   我皮膚好靚   真係都唔知比咩反應好囉   其實因為我好熱   行到塊臉紅卜卜囉 ~

買完就拎番屋企先   之後出發番崇拜喇   完畢就去里奧大人公司幫手   差唔多 2 點搞掂   諗住走啦   榴槤就約里奧大人 勁哥同阿妹下星期食韓燒   仲叫埋我去   但我要番工啦   叫佢食埋我嗰份   之後一齊又傾呀傾   又傾咗 15 分鐘先走呀 ~

同里奧大人去食午餐   之後佢又要番工做嘢喇   我就唔陪佢喇 ~

酸青瓜好味   婆婆以前成日整㗎   所以都算係兒時回憶之一呢

番到屋企即沖涼   做陣小清潔都休息下喇   尋晚瞓得唔好   個人勁攰呀 ~

和田竹健貼 ($262.80 買 6 送 1)

諗住瞓覺   但小羊打嚟傾偈   傾完都唔眼瞓   咁睇 Youtube 啦 ~

里奧大人 5 點幾放工   叫佢即沖涼休息   我差唔多 6 點幾先預備晚餐 ~ 

是日晚餐 - 黑椒豬扒炒扁意粉 + 菜心苗 

黑椒豬扒炒扁意粉 - 頭先太晏食午餐   所以煮咗好少咋   我同里奧大人食咗少少   剩番就做大家嘅 Lunch Box ~ 

菜心苗 - 又係煮少少   因為我想食啲菜 ~

洗埋碗就即沖涼   之後睇 Youtube   睇睇下都開始眼瞓   但 9 點幾太早唔瞓住啦 ~

咁睇到 10 點   最後都頂唔順要瞓覺喇 ~