1 人蜂盛套餐 + 五色握壽司盛盒 + 炸豚肉餃子 (外賣) ( 31-DEC-2025 )

其實一定食唔哂㗎喇   不過好想買囉   但壽司同糖水就一定要今晚食哂呢

1 人蜂盛套餐 (樂脆雞 (辣) / 蘑菇飯 / 香芒蜜桃批) ($59/份) X 2 - 每人食咗 1 件炸雞   其他留番聽日食

薯條就食哂   蘑菇飯又要留番喇

五色握壽司盛盒 ($69.9) - 帆立貝同吞拿魚比里奧大人食嘅   其他就我食哂

炸豚肉餃子 - 我食咗 1 隻咋   同埋里奧大人食完炸雞都飽   所以留番聽日食 lu

豆沙燒餅 ($25/5 個) - 預咗聽晚食嘅   因為今晚已經有糖水呢

( 31-DEC-2025  WED )

感恩瞓得都唔錯   不過瞓瞓下又有啲熱   但唔蓋被又凍   但之後蓋番張被又覺得好舒服喎 ~

早餐食 Flakes + 朱古力奶   食完個人有啲凍呀   哈哈 ~

菇場唔忙   又做下自己嘢 ~

2025 年完美結束

Lunch Time 蒸完飯就去 Mikiki 行半個鐘   行完就番菇場開餐喇 ~

唔忙又繼續做自己嘢啦   今日又係 1 點 20 分收到公司群組通知放 4 點   所以好開心呀   因為以為無得放早嘛 ~

4 點即走   里奧大人今日要開 2 個會   由 4 點開到 7 點半   所以我出旺角行下呢 ~

諗住見下家姐   但佢啱啱覆完診就無咁快到旺角   咁我唔約佢一齊行 lu ~

去營多買完醬料就去花園街睇衫   但 One Piece 又無咩款   最後買咗條半截裙   五十蚊雞好抵呀   同埋啲質料唔錯呢 ~

bamboe 炒麵醬料 ($12.5/2 包) / bamboe 蒜蓉辣椒醬 ($15.5) / Indofood 炒飯料 & 炸雞料 ($10/4 包) / 蒜粉 & 紅椒粉 ($6.5/包)

行哂成條花園街就去奇趣買豆沙燒餅 ($25/5 個)   最後去八珍甜醋買豬腳薑就走喇 ~

今晚好想食炸雞   咁去大力水手睇下啲炸雞套餐   不過唔係咁啱食都搭車番屋企喇   感恩 3 分鐘後就有巴士 ~

番到屋企都 6 點幾   放低哂嘢就去 AEON 買壽司   之後見到好多人   先醒起今日係星期三   真係同平日嘅情況差好遠呀 ~

炸豚肉餃子 - 平時好似 $20 㗎   所以見咁抵就買夠 10 隻

買完即刻去 Jolibee 買炸雞   最後買埋糖水就番屋企喇 ~

番到屋企已經 7 點 45 分   但里奧大人又未開完會   所以我都沖涼先 lu ~

八珍豬腳薑 ($78) - 間唔中就想食豬腳薑   難得去旺角就買埋喇

等到 9 點半都未開完會   我真係有啲餓喇   所以食 3 件壽司先   之後 10 點再食多 3 件同 1 件炸雞 ~

里奧大人終於 10 點 15 分番到屋企喇   佢話好在我之前買咗盒朱古力曲奇比佢   佢即刻拎出嚟一齊食呀   因為個個都未食飯   但又無諗過開 4 個鐘咁耐呢 ~

里奧大人都只係食咗 1 件雞同 4 件壽司同薯條就夠   因為佢要食糖水呀 ~

10 點 45 分先食糖水   對我嚟講真係算宵夜呀   估唔到今次仲好多料添   所以食到好飽呢

傾下偈又睇下 Youtube   原來已經 11 點 55 分   咁等埋 12 點啦   一夠鐘就即刻 Whatsapp 所有朋友同群組講新年快樂   搞到 12 點 10 分先瞓覺   好在聽日放假咋 ~

茄子燜免治牛肉 ( 30-DEC-2025 )

尋晚食剩   我話拎走呀   因為里奧大人鍾意食呢

我鍾意飲湯   但依家好懶煲湯囉

( 30-DEC-2025  TUE )

感恩又一覺瞓天光呀   天氣涼涼哋係瞓得好啲呢 ~

早餐仍然食千層吐司   仍然覺得好味道 ~

今朝我出門口搭車先喇   等車嘅時候感覺到有人摸我件衫   原來係里奧大人幫我整好頂帽   真係嚇死我呀 ~

菇場唔忙   又做自己嘢喇 ~

Lunch Time 出去買茄子   之後去食牛筋上海麵 ~

食完又去一田買蛋糕   再行到 12 點 45 分就番菇場喇 ~

幸堂牛奶蛋糕 / 幸堂香橙蛋糕好似幾好味   所以每樣買包做早餐

忙咗 1 個鐘就可以抖下   因為每次做完 Report   對眼都特別攰 ~

家姐請糟糟食生日飯   佢哋食松葉蟹配海膽飛魚子飯 ($710)   最平嘅北海道海鮮丼都要 $660   我覺得好貴呀   所以叫佢影比我睇下   哈哈

呢個餐具好靚

放工即走   里奧大人已經番咗屋企   我都要快啲煮晚餐喇 ~

是日晚餐 - 茄子燜免治牛肉

茄子燜免治牛肉 - 仍然係用泰式聖羅勒辣椒醬燜嘅   呢個醬料嘅味道真係唔錯㗎   之前買咗幾樽都差唔多用哂呢 ~

洗埋碗就開機洗衫   之後沖涼休息   里奧大人就熨衫   我呢排膝頭哥痛呀   都唔知係咪發炎   但行下又唔痛   不過如果再痛都會睇醫生囉 ~

今晚要食埋啲紅豆砵仔糕

同里奧大人睇咗 2 集 "青年旅舍"   睇完又睇下 Youtube   今晚 10 點 40 分都瞓覺 lu ~

住家飯 @ 姑奶屋企 ( 29-DEC-2025 )

煎餃子 - V 姐包㗎   味道唔錯但凍冰冰囉

豉油雞 - 又係凍嘅   仲有碗豉油汁未倒落去嘅   但碗汁係凍㗎喎   唔明點解唔整熱先倒   所以我無食到   我腸胃敏感   咁食法唔掂呀   哈哈

滷水豆腐 - Y 姑整㗎   不過我無食呀

萵筍炒牛肉 - 我鍾意食萵筍㗎   下次試下整嚟食先

老虎斑 - Y 姑話 $50 咋   我話係咪死咗嗰啲 ?!   佢話係新鮮㗎   但我話咁平嘅   家姐買比我食嘅斑無咁平㗎喎

姑奶加餸   話啲小菜只係 $50 好抵   所以買咗梅菜扣肉   我話里奧大人最鍾意食呢

黑椒牛仔骨 - 個汁好味   但啲肉質好腍

蓮藕鱆魚紅蘿蔔粟米豬骨湯 - 我話想飲蓮藕豬骨湯   所以 Y 姑就煲呢個湯喇

Y 姑叫我拎定個樽拎湯   我真係唔客氣㗎   因為我真係好想飲湯

一嚟到已經見到呢碟橙   真心唔明點解要咁早切定囉   我哋 8 點先食完飯喎

( 29-DEC-2025  MON )

感恩一覺瞓天光呀   話哂星期一嘛   都想精精神神番工呢 ~

早餐食千層吐司   好味道呀 ~

家姐問我尋晚煮咁多嘢   今朝起身攰唔攰 ?!   我話尋晚都唔駛煮   同埋雖然碟多但唔油   咁可以好快洗哂

菇場忙咗 1 個鐘就可以抖下   今日仍然 3D   實在太開心了 ~

Lunch Time 出去 DAISO 睇下嘢   估唔到今日 8 折   所以又買咗啲嘢 ~

真係忍唔住買咗呢個小新袋呀

之後再買咗本細嘅記事薄同埋 2 個調味樽

買完又再行下   行到 12 點 20 分都番菇場開餐 lu   今日諗唔到食咩   咁就食杯麵喇 ~

唔忙又做自己嘢喇   放工要即走   我 5 點 20 分睇個巴士 Apps 係 5 點 37 分有車   點知搭 Lift 再睇係 5 點 33 分有車呀   真係要開行 Turbo 跑去巴士站呀   因為約咗里奧大人一齊搭嗰班車   好在都趕得切咋 ~

今晚去 Y 姑屋企食飯   估唔到 6 點左右就到   原來姑奶同 CM 都一齊嚟埋   所以 7 點先開餐呢 ~

食下傾下又 8 點半   我哋都要番屋企喇   因為里奧大人要番公司整啲嘢 ~

番到屋企即沖涼   好在里奧大人 9 點 45 分都番到屋企 ~

睇陣 Youtube   今晚 11 點先瞓 ~

打邊爐 ( 28-DEC-2025 )

開餐

特選急凍日本蠔肉 ($59) - 1 包大約有 10 隻   同埋都幾大隻㗎

日本珍寶仿皇帝蟹捧 ($49) - 家姐見到好開心呀   佢同里奧大人都鍾意食㗎

水魷+牛柏葉 ($76) - 我話呢兩樣一定要食哂   因為我聽晚唔駛煮飯

本地墨魚丸 ($41) / 振興黑椒牛丸 ($33) - 兩樣都好味呀   不過每人只係食咗 2 粒牛丸同 1 粒墨丸

蝦滑 ($50) - 呢樣又係要今晚食哂

美國特選級牛梅花肉 ($43) - 家姐都鍾意食牛肉   所以買 2 份喇   但估唔到 1 份都食唔哂

鳳城水餃 ($70) - 家姐記得我成日講話大大粒水餃   今晚食剩 9 隻   我問家姐要唔要 ?!   估唔到佢眼仔碌碌   即係好想要呀   所以佢話要 3 隻做聽晚晚餐   我話 5 隻啦   里奧大人就 4 隻做午餐

家姐食咗 1 件先   之後食其他嘢   食食下又再食多件   我話好唔好食 ?!   佢話好食   但如果再熱啲就更好食   咁我話我再去焗熱啦   好方便之嘛

紅豆砵仔糕 ($18) - 家姐話煙煙韌韌好味呀

( 28-DEC-2025  SUN )

今朝同里奧大人一齊起身   但我就同家姐食早餐嘅   因為姐夫去咗旅行呢 ~

我 8 點 15 分就到餐廳   家姐話無諗過我行得咁快   佢同里奧大人都成日講呢句   無計啦   以前行路真係慢吞吞 ~

冬蔭香茅豬扒拚扎肉媽媽麵 ($41)

吉列魚柳餐 ($45)

食下傾下又 9 點   我話要去 360 買啲嘢   但就唔同家姐講買咩   唔想佢又特登去搵   之後佢見到 After Eight 朱古力   即好開心問我係咪買呢樣 ?!   我話唔係喎 ~

諗住無㗎喇   但走嘅時候比我望到收銀機附近有小新   嗰下勁開心呀   家姐問個樽入面係咩嘢嚟 ?!   我話唔知喎   佢話唔知都買嘅   我話我只係想要小新同小白咋   哈哈 ~

家姐話送比我   我話唔駛   之後職員話我有 $10 年底到期   咁我即刻用啦   好在唔要家姐送比我咋   唔係就嘥咗 $10   因為我唔係成日去 360 嘛 ~

上次同里奧大人去睇小新   里奧大人話 $38/2 件都算平   所以諗住星期一買   但驚比人買咗   所以今朝去買   估唔到仲平咗十蚊雞   好感恩呀

買完就去 A1 買千層吐司   之後去家姐屋企喇 ~

Berry 係咁吠我同撲我   但就無理到家姐   真係好搞笑   但出街就黐實家姐㗎   仲好似好聽話咁添 ~

乖女

之後就唔比我影   所以影親都係側臉

家姐話隻狗仔好得意   諗住買 2 盒做聖誕禮物   點知又送咗其他嘢   咁呢盒餅係 1 月尾到期   我話幫手食 1 盒啦

貓貓夫人送比家姐嘅聖誕禮物

我哋坐梳化傾偈   但 Berry 女入咗家姐房呀   所以我哋要轉場喇   哈哈 ~

家姐好笑   話發夢無哂麥當勞啲積分呀   因為我成日講快啲用哂啲積分   唔係間舖執咗就無哂㗎喇   我係講真喎   我以前就係積分換現金   我死都唔換   點知間舖執咗呀   大拿拿三百蚊呀   自此之後我一有積分就用   同埋有時驚到期無用嘥哂   所以係咪都用咗先囉 ~

傾傾下偈聽到 Berry 鼻鼾聲   家姐話佢好嘈   其實最勁係我哋講嘢咁大聲   Berry 都瞓得着先勁呀 ~

又瞓下醒下

家姐要去何文田   咁11 點半都走喇   同埋家姐一齊搭地鐵   雖然我唔鍾意搭地鐵   但因為可以傾偈就搭啦   女人實在太多嘢講   哈哈 ~

我去成興隆買完嘢就去買水餃   買完就買紅豆砵仔糕同百香果   最後買埋白蘿蔔同粟米就走喇   因為今日無戰車   所以都唔敢買咁多嘢 ~

依家多數去成興隆買牛肉

我話買急凍蟹鉗   估唔到家姐話想食大條嘅蟹捧   咁實買比佢食啦

番屋企放低嘢就再去樓上買嘢   之後再去買蝦滑 水魷同牛柏葉   最後等紅綠燈嘅時候又忍唔住買份林柿   因為好想食呀 ~

我好鍾意行樓上   因為啲嘢唔貴同埋質素唔錯

以為買咗水魷無拎出嚟   點知其實我係呢轉先買

番到屋企已經 2 點   本來諗住同里奧大人去大家樂食下午茶抖下   但冰格無位放嘢   所以我話轉陣喺屋企食呀   哈哈 ~

里奧大人公司嘅聖誕禮物   有得食有得用真係好喇

樓上買嘅馬鮫魚肉燒賣都唔錯喎   下次會入貨

上次食剩嘅香炸雞翼   同埋尋晚食剩 3 件麥樂雞   今日要食埋去喇

里奧大人食完就抖陣   之後瞓晏覺   我就整個白蘿蔔粟米湯底   搞掂就做小清潔 ~

1 條香蘿蔔+1 條粟米

5 點左右整鬼馬油炸鬼   估唔到家姐 5 點半嚟到   不過里奧大人要幫家姐整手機啲相   家姐話我個 Whatsapp 接近 9,000 張相   因為日日都有傾偈同埋幾乎次次都有相   但佢又唔 Delete   所以我之前都幫佢 Delete 咗啲㗎喇   但仍然咁多囉 ~

上次買定梳打水   因為記得家姐鍾意飲   咁我覺得家姐都應該鍾意飲百香果梳打嘅   咁我都買定百香果先啦   雖然佢上次話好酸   之後家姐話唔會就咁齋飲梳打水㗎   好在我真係買咗咋   咁我屋企又無檸檬呢啲嘛   同埋難得今次又唔酸   所以我比哂啲百香果比佢呀 ~

差唔多 6 點 20 分開餐   咁我哋一齊謝飯祈禱   之後家姐好大聲話 "阿們"   因為我哋好細聲講 "阿們"   家姐可能聽唔到   哈哈 ~

同家姐食嘢最開心   因為佢咩都食   之後我話用咗 10 隻指天椒整辣椒豉油   家姐碌大對眼話唔係蘸芝麻醬咩 ?!   我先醒起之前係叫家姐蘸芝麻醬   咁佢試咗話辣椒豉油好辣   驚我食唔到   不過我話 OK 呀   最搞笑頭先里奧大人咳咗幾聲   家姐以為係太辣   但其實佢係喉嚨痕囉 ~

家姐食完係咁話好飽   仲話以後唔敢講好餓   哈哈哈哈   咁家姐話要牙簽嘛   里奧大人好大反應話牙膏 ?!   笑死我哋呀   我哋話無啦啦做咩要牙膏呀 ~

咁我一路食一路洗嘢   家姐見里奧大人隻碟有水魷   家姐食埋去呀   所以家姐真係唔會嘥嘢㗎   口水尾都照食㗎 ~

我哋一路食豆腐花一路睇 "中年好聲音 4"   之後唔記得講開咩   家姐話似 30 歲   里奧大人話 70 歲 ?!   家姐差啲噴嘢呀   里奧大人今晚成日聽錯嘢   哈哈 ~

9 點半送家姐搭車   番到屋企都可以即沖涼   因為頭先邊食邊洗   所以打邊爐其實真係好方便   哈哈 ~

睇下 Youtube   今晚 11 點 45 分先瞓呀 ~