蕃茄煙肉意粉 + 油麥菜苗 ( 14-DEC-2025 )

( 14-DEC-2025  SUN )

今朝同里奧大人一齊食早餐   我食完就去家姐屋企喇 ~

8 點 35 分就到家姐屋企   Berry 女又大叫歡迎我   但我袋都未放低   佢係都要我摸佢喎   真係好鬼得意 ~

精神翼翼歡迎我

打完喊露   之後合唔埋個口   哈哈

之後就呆呆滯滯咁款

我想摸 Berry 嘛   U 姐同我講咗好多次 "的 Can"   我點諗都諗唔到佢講咩   之後佢就話 Berry "的 Can"   咁我知佢係講滴頸了 ~

咁 Berry 坐我隔離   U 姐就好高音咁 "吓吓吓"   真係勁似家姐囉   所以我話佢哋搞到 Berry 黐黐哋係有原因㗎   哈哈 ~

等緊家姐番嚟   所以唔會望我

好在點摸佢都得咋   起碼唔會喺梳化底   哈哈

家姐姐夫 9 點鬆啲番到嚟   見到袋手信話咁多嘢嘅   我話因為樣樣都好 "牙咋" 呀 ~

睇番個牌先知道價錢係 RMB119 同 RMB138   買 2 件有 8 折真係好抵   家姐好鍾意呢啲滑嘟嘟質料   香港買起碼要二百尾㗎

家姐公司送嘅餅

家姐比 Coupon 我嘛   佢話睇咗唔駛加錢就可以食㗎喇   真係笑鬼死   好耐之前話佢比 Coupon 要加錢就唔好比我啦   之後佢同同事講話阿妹鬧佢呀   哈哈

家姐又要趕出貨呀   但又可以一齊傾偈嘅   我話阿怪上次串我呀   之後佢話佢有同事都係咁   成日話無人教點做就唔做   但其實個個都無人教   係自己慢慢摸   情況就等如我咁   好多嘢有時唔係要等人教   有時間咪自己慢慢摸囉   等得人嚟教其實都已經做完 ~

之後家姐同糟糟傾電話   佢細細聲同糟糟講話唔可以咁大聲講嘢   會比阿妹鬧   哈哈   因為我話佢大聲叫 Berry 好嘈呀 ~

想瞓覺

我一郁佢就醒

好 BB 樣

正想同家姐講嘢嘅時候   我聽到有兩聲好細聲又好近嘅砵砵聲   之後聞下 Berry 個身   成陣紅蘿蔔湯味呀   好在唔係向住我放咋   哈哈 ~

家姐話 Berry 依家 44 磅呀   真係要減肥啦   其實依家都無比咁多零食佢食㗎喇   希望慢慢瘦番落嚟啦 ~

差唔多 1 點就走喇   家姐同 Berry 陪我搭車   我上車無耐之後   家姐話 Berry 要番巴士站搵我   仲喺度周圍聞   我話頭先我上車又唔望我喎 ~

番到屋企抖陣就食午餐   因為家姐姐夫 2 點幾先食嘢   所以唔等佢哋喇   我想快啲番屋企做嘢呀 ~

魚肉燒賣 + 熱豆漿   家姐以為我杯豆漿係買   不過我話上次 360 買兩包特價就買嚟沖囉

好感恩呀   因為我正想買梅菜   家姐話喺中環買   買咗 3 斤   每人分啲咁呢

食完就抖下先   諗住 2 點半熨 2 機衫   但抖到 2 點 45 分先熨呀 ~

里奧大人 3 點半番到屋企   今次開會開得幾開心咁噃   之後同佢傾咗一陣偈就叫佢沖涼瞓晏覺喇 ~

我其實都攰   但又瞓唔着   所以 5 點 10 分都預備晚餐   里奧大人 5 點半起身   但我話要 6 點半先食得 ~

是日晚餐 - 蕃茄煙肉意粉 + 油麥菜苗

蕃茄煙肉意粉 - 係聽日嘅 Lunch   不過仲剩半碟   又要食多餐 lu ~

油麥菜苗 - 終於清哂喇   但呢排突然唔係咁想食菜添 ~

洗埋碗就即沖涼   之後同里奧大人一路食甜品一路睇 "中年好聲音 4" ~

家姐比我嘅黑芝麻糕   幾好味喎

睇完再睇多陣 Youtube   今晚 10 點 45 分都瞓覺 lu ~