藍山咖啡專門店 @ 大埔 ( 30-APR-2010 )

肉眼扒意粉 (黑椒汁) / 獅子頭意粉

( 30-APR-2010  FRI )

Happy Friday 喇   加上聽日又係放假   所以心情特別好呢 ~ 

今朝食燒賣粉果 + 奶茶   但食完就好滯咁囉 ~

番到菇場忙到震   差唔多做到 Lunch Time 先做完呀   今日無帶 Lunch Box   所以出去食麵   食完又行陣就番去 lu ~

里奧大人公司附近開咗間 Jusco $10 店   買完順便接佢放工   其實本來今晚係去教會聽嘢   但里奧大人太遲放工   保守估計至少開場遲半個鐘先到   咁樣好似好唔尊重人咁   所以最後決定唔去 lu ~ 

諗住去元綠   但又要等位唔去喇   里奧大人肚餓嘛   所以去咗藍山咖啡專門店   去到得番最後一張枱無人坐咋   感恩呢 ~ 

覺得晚餐無蔬菜好似好唔健康   番到屋企就食蘋果沙律呢 ~  

越棧 @ 大埔 ( 29-APR-2010 )

( 29-APR-2010  THU )

呢朝又食芝腿治   其實呢間餐廳嘅奶茶唔太好飲   不過勝在近菇場   卡位坐得幾舒服   我鍾意坐卡位㗎   可以擺袋   唔駛攬住咁辛苦呢 ~

番到菇場好忙呀   不過時間過得好快呢   好過吽下吽下咁過 ~ 

本來 Lunch Time 出去食   點知個天黑哂   大風又大雨   我都唔想出 lu   食埋最後嘅即食粉絲   加埋里奧大人食唔哂嘅芝士糙米包   夠哂飽啦 ~ 

放工超大風呀   簡直係有凍嘅感覺   落車又超大雨   其實已經諗好煮乜   但去到街市無心機買餸   即打比里奧大人話唔煮飯   無 Mood 煮呀 ~

里奧大人上咗大陸   所以要 8 點幾先番到香港   我就可以好輕鬆咁熨兩機衫   再洗一機衫   等里奧大人知道我唔煮飯   都一樣好忙呢 ~

本來想同去元氣食壽司   但 8 點幾都要等位   所以唔等   即去隔離嘅越棧食算 lu ~  

住家飯 @ 媽咪屋企 ( 28-APR-2010 )

煎鯧魚 / 蒸石蚌 / 豉椒炒蜆  / 黑椒牛扒  / 炒菜心 / 乳鴿 & 豬肚 (外賣)  / 雪耳粟米瑤柱清補涼豬展湯

( 28-APR-2010  WED )

今朝食扒芝腿治   麵包煙煙韌韌   好好味呀   次次食完都覺得好開心 ~

番多兩日就放假   真係諗起都開心呀   勁有 Holiday Mood 呢 ~

晏晝有 Lunch Box   天氣唔錯   所以食完出去行下 ~ 

里奧大人上咗大陸   所以今晚去媽咪屋企食飯   懶得煮呀   叫里奧大人自己出去食算喇 ~ 

酸梅麵豉蒸排骨 + 蒜蓉炒脆肉瓜 + 蘋果沙律 ( 27-APR-2010 )

( 27-APR-2010  TUE )

早餐食咗奶醬多   呢間茶餐廳都唔錯   因為真係好多醬呢   依家我飲燕麥糠   感覺好似健康好多咁呀 ~

晏晝有 Lunch Box   尋晚無乜點食到魚餅   今日食好似有食新餸嘅感覺呀 ~  

放工等車   等咗 3 架都 Full   終於等到 6 點先上車   好在有位坐咋   因為我好想瞓覺呢 ~   

是日懶餐 - 酸梅麵豉蒸排骨 + 蒜蓉炒脆肉瓜 + 蘋果沙律

酸梅麵豉蒸排骨 - 唔知整乜就會出現呢碟排骨㗎喇   今次里奧大人無啦啦撈勻啲汁   再 "北" 落自己碗飯度   又唔睇嘢   佢一 "北" 就 "北" 埋啲指天椒   我睇到嘅時候已經太遲   因為佢已經食咗少少   係咁話辣   我即刻話妳睇清楚先 "北" 就無問題啦   嘈嘈閉 ~

蒜蓉炒脆肉瓜 - 尋晚煮剩 1 條   清清哋用蒜蓉炒算喇   費事用特辣 XO 醬黎炒   一陣又話辣唔食呀 ~
蘋果沙律 - 間唔中就好想食沙律   因為我鍾意食紅腰豆   粟米同椰果   配埋蘋果真係 Very Good 呢 ~ 

同里奧大人去跑步再拎中藥   依排開始跑步   所以啲時間真係要好好運用   同里奧大人講覺得放工買餸   煮飯   食飯   洗碗啲時間好緊迫咁   好似有壓力咁   佢即話幫我洗碗   但我覺得佢洗完要我執手尾我仲火滾   即時拒絕咗佢   佢都好無奈但帶點興奮   話哂唔駛佢做嘛   真係要諗諗點安排先 ~

泰式魚餅 + 金銀蒜脆肉瓜 + 豉油王炒飯 ( 26-APR-2010 )

( 26-APR-2010  MON )

第朝要番工嘅話   都係唔好煲粥食   食完成晚去廁所   瞓得好差呀   加上星期一添    好在唔係潮濕天氣   唔係仲慘 ~

真係攰到上網都無乜心機   走肉行屍咁   諗住食完 Lunch 就瞓陣    點知又瞓唔到喎    幾咁辛苦先等到放工   上車無耐就瞓着喇   Chok 下 Chok 下真係好易瞓呢 ~

一早諗好哂要買嘅餸   所以好快搞掂就再去睇中醫喇 ~ 

是日晚餐 - 泰式魚餅 + 金銀蒜脆肉瓜 + 豉油王炒飯

泰式魚餅 - $15 鯪魚肉 + 4 條青豆 + 6 塊檸檬葉 + 1 湯匙紅咖哩醬   第 1 次整   但無乜心機整喎   如果薄少少會好啲   同埋覺得唔夠色呀   下次再努力過 ~   

金銀蒜脆肉瓜 - 今次切片再加蒜蓉蒸   最後淋豉油熟油 + 炸蒜蓉   第 1 次咁整又唔錯喎 ~  

豉油王炒飯 - 本來想就咁蒸番熱   但切咗蔥粒   所以炒飯算喇 ~ 

今晚又同里奧大人跑步再拎中藥   我飲中藥係唔駛飲完食山楂餅   因為更苦嘅中藥都飲過   黃蓮又飲過   所以唔怕苦   但里奧大人就好怕苦   一定要食山楂餅   仲越食越好味咁款 ~

叉燒炒麵 + 雙蛋粥 + 菜心 ( 25-APR-2010 )

( 25-APR-2010  SUN )

呢朝里奧大人 9 點起咗身   我都差唔多醒   但又唔想起身住喎   喺張床碌黎碌去都瞓唔着   碌到 10 點起身梳洗去食早餐   之後番教會喇 ~

同里奧大人去街市買餸   第 1 次買麵餅   問佢買幾多   佢話我煮得好食咪食得多囉   買麵餅個男仔喺度笑呀   之後去買鹹蛋皮蛋   $5 有 3 隻   我買 3 隻皮蛋   之後想買鹹蛋   問鹹蛋佬啲鹹蛋可以擺幾耐   佢話最多一個星期   不過我照買 3 隻   驚最小買 3 隻嘛   但里奧大人話唔駛買咁多   點知個鹹蛋佬話買 2 隻皮蛋 1 隻鹹蛋咪得囉   仲笑哂口話 一睇就知妳係無飯煮婦啦   我真係估唔到可以 $5 買兩樣蛋嘛   因為好多街市人都會叫妳買多啲    呢間嘢都幾好   又 Nice   如果我屋企附近嘅街市啲人係咁好就好啦   買都買得開心啲呀 ~

同里奧大人 3 點先去食 Tea   買埋生果就番屋企 lu   因為我有 3 機衫要熨呢 ~

是日晚餐 - 叉燒炒麵 + 雙蛋粥 + 菜心

叉燒炒麵 - $20 叉燒 + 3 個麵餅 + 1扎 韭菜 + 1 扎韭黃   第 1 次整咋   覺得唔錯呀   里奧大人夾咗幾次呀   佢食得好滿足咁呀   非常開心呢 ~

雙蛋粥 - 我好怕煲粥   之前兩次煲到好杰   本來想用電飯煲煲粥功能   但要 3 個鐘   所以再膽粗粗煲多次   預咗食唔到   不過點都想試下囉   但今次 OK 呀   好綿喎   不過如果再多少少水就更好啦   無咁飽肚嘛 ~

菜心 - $10 斤   但都唔係好甜咋 ~

之前買咗乳酪   今晚終於開嚟食喇   酸酸咪咪好正呀 ~

BBQ @ 姑奶屋企 (大埔) ( 24-APR-2010 )

雜丸 / 蝦 / 芝士腸 / 香腸 / 多春魚 / 墨魚卷 / 蒜蓉包 / 魚柳 / 大眼雞 / 豬扒 / 雞翼 / 乳鴿 / 魷魚 /  腎

( 24-APR-2010  SAT )

今朝食咗好好味嘅扒芝腿治   好滿足呀   所以雖然要番工   但都覺得好開心呢 ~

其實星期六番工真係無乜嘢做   就算有嘢都唔願做囉   唔想破壞 Holiday Mood 呀 ~ 

晏晝同里奧大人 媽咪 婆婆同工人一齊去鴻星飲茶   不過里奧大人要考試   所以 3 點走先   我哋就坐到 3 點半就走   再行陣就各自番屋企 lu ~ 

炸雲吞 - 熱辣辣脆卜卜   好味呀

鹹水角 - 又係熱辣辣   同埋無肥豬肉   正呀

海蜇拚烤麩 - 好耐無食海蜇   所以又係覺得好好味

點心拚盤 - 蝦餃 / 燒賣 / 素粉果 / 竹笙餃 - 懶得諗食乜點心   食拚盤最好

古法馬拉糕 - 一般

斑腩炒麵 - 個麵唔掂呀   底部份好似生咁嘅

甜薄撐 - 係花生椰絲芝麻餡   麻麻哋   啲皮都唔煙韌嘅

芒果糯米糍 - 好心啦   一係比 4 個   一係用另外嘅碟裝啦   我覺得好核突囉   好似比人偷食咁   最慘又唔好味喎   啲皮唔煙韌   又無芒果味   超級極度失望呀 ~

呢日十分之充實   番到屋企即睇中醫   再番屋企換衫去跑步   出一身汗好舒服呀 ~

之後同里奧大人一齊去姑奶屋企 BBQ   之前好想 BBQ   估唔到隔幾日就可以 BBQ   好感恩呢 ~ 

粟米雞柳 + 焗雞翼 + 焗薯條 + 馬蹄糕 ( 23-APR-2010 )

( 23-APR-2010  FRI )

今日天氣非常之好呀   有太陽又有風又爽   個人都開心好多呀   如果日日咁好天氣就好喇 ~

我覺得呢間餐廳嘅麵真係好大個   次次食完都好飽咁   但係其他餐廳又唔會有呢啲感覺㗎喎   定係食麵所以好脹胃呢 ~

喺菇場 Hea 下 Hea 下又到 Lunch Time   今日好天氣   所以出去食同行下   不過行到有啲熱 ~

好耐無煮飯啦   所以係時候要煮飯 lu   鍾意食乜就煮乜 ~

是日懶餐 - 粟米雞柳 + 焗雞翼 + 焗薯條 + 馬蹄糕

粟米雞柳 - 無菜就整粟米蓉啦   諗住 1 罐粟米蓉 + 1 罐粟米粒   點知記錯自己之前買嘅係粟米蓉   自己又無睇清楚就開嚟用   點知諗住隔水嘅時候先知係粟米蓉   本來想整粟米湯   但又驚飲完食唔落飯   所以最後兩罐一齊做汁   用汁撈飯都飽咯 ~

焗雞翼 - 醃咗兩晚架喇   焗雞翼個賣相真係好靚仔   肉眼睇好靚   睇相硬係爭啲   應該係我影相技術有問題 ~ 

焗薯條 - 反正開咗焗爐   又反正好想食薯條   所以一齊焗   不過唔多夠脆   因為時間唔夠呀   但我又唔想再等   照食可也   下次整瘋薯先 ~

馬蹄糕 - 隔離阿婆知我鍾意食馬蹄糕   所以佢有親戚比佢馬蹄糕   佢就會比我㗎喇   好多馬蹄粒同埋好煙韌   自家制嘅真係好味好多呢 ~

食完飯抖一個鐘就同里奧大人去跑步   再去飲中藥   番到屋企沖涼抖陣就瞓覺   話咁快就過咗一日   夜晚啲時間真係過得好快呢 ~

學利魚蛋 @ 大埔 ( 22-APR-2010 )

我嘅魚蛋粗麵 - 魚蛋最出名   但唔好食囉   唔彈牙   同埋有 d 腥

加咗醋同辣椒油就唔同哂 ( 以為 )   但 d 醋唔掂 ( 唔識講點唔掂 )   辣椒油就識得形容點樣唔掂喇   就係又唔香又唔辣 

里奧大人嘅水餃粗麵 - 佢比咗一粒我食   但 d 皮仲未熟得哂喎   噢

鮑片生菜 - 里奧大人好鍾意食飽片   呢碟好似係加錢就當一個餐  

( 22-APR-2010  THU )

差唔多星期尾喇   番工都番得開心過人呀   但唔知係咪每個打工都恨放假呢   不過我相信唔係   因為我以前公司個阿 Head 係變態嘅   無親人同無女朋友   所以晚晚唔走喺公司打機   得閒無事扮勁話其他同事點點點   之後陰陰咀笑   有次佢屈我   我唔認㗎   仲話番佢轉頭   之後佢由我離開佢坐位 "啤" 到我番埋位   黐黐哋   做錯會認   但最憎人屈我囉   我唔會屈服㗎 ~

無啦啦講埋呢啲嘢嘅   打到成身慶哂添   都好吖   反正菇場凍到震   哈哈 ~

今朝好想食餐蛋治呀   估唔到塊麵包好軟熟   好好味   好味過烘底呀   食到好滿足呢 ~


Lunch Time 本來 8 卦約我食   但佢同阿 Head 開會   我 12 點半等到 1 點   之後佢話仲未得   叫我自己食   落鬼咁太雨   好在之前拎咗幾個杯麵啫   食咗佢算喇 ~

 
呢排飲咗兩次即沖三合一好立克   係買支裝利賓納送嘅   但飲完個肚都好唔舒服   搞搞下咁   好恐怖呀 ~

今晚去睇中醫   好在喺屋企附近咋   唔駛咁趕 ~

醫師話我唔可以食榴槤   簡直晴天霹靂呀   話我個人太虛   唔適合食咁燥嘅嘢   即係虛不受補喎 ~

好在里奧大人今晚好早喺大陸開完會   可以睇到中醫   睇完去食嘢 ~

今次再試下學利魚蛋   上次好餓覺得好味   今次認真咁食就覺得不外如是囉 ~ 

呢幾日掙扎咗好耐   就係諗續唔續會跑步   不過今晚終於的起心肝續會喇   唔比錢係唔會有恆心做一樣嘢   同埋當陪里奧大人一齊做   等佢開心下啦   哈哈 ~  

太興燒味餐廳 @ 大埔 ( 21-APR-2010 )

大砂煲蝦乾醬啫啫北京芥蘭苗 - 好搞笑囉   駛唔駛咁大個砂煲呀   咁樣咪顯得啲菜仲更加少囉
三拚燒味飯套餐 - 有例湯同菜   同埋我揀咗最鍾意食嘅乳豬 / 燻蹄 / 燒鵝

( 21-APR-2010  WED )

呢朝好早番到菇場附近   所以行遠少少食早餐 ~

呢日晏晝好想出去食 Lunch   食完行陣番菇場   精神好多咁呀 ~

呢晚諗住我先睇中醫   點知原來 Off   里奧大人仲驚趕唔切   喺大陸仲特登搭的士過關添   佢之前拎咗張醫師卡片   原來有寫星期三 Off   做做乜唔睇清楚㗎   做事唔夠細心啦   我一心諗住煮唔到飯   但依家可以煮都唔煮 lu   因為我鍾意依計劃做嘢   哈哈 ~

呢餐唔食咁飽   因為留肚食媽咪之前特登煲比我嘅紅豆沙呀 ~

和民居食屋 @ APM ( 20-APR-2010 )

豪華壽司盛盒 (灸燒帶子 / 鮭魚海鮮 / 鰻魚) - 我覺得佢哋嘅壽司都唔錯   唔會話多飯少料咁

天婦羅盛合 - 因為勁想食炸嘢

和民沙律 - 必叫嘅   哈哈

海鮮忌廉比薩 - 媽咪話想食呢個   因為見到張相好多芝士   點知一上枱就嚇到震   先勾起和民啲 Pizza 係好唔掂   個樣又衰   又白雪雪   好嚇人囉   如果唔係加 Tabasco   根本係無味   不過最後都食剩 1/3   實在太難食喇 ~

巨蜂提子梳打 / 柚子蜜梳打 - $16 買一送一抵啦   所以叫嚟飲   但無汽嘅

( 20-APR-2010  TUE )

呢朝都幾精神   唔錯喎   不過如果天氣唔係咁潮濕就更好   硬係覺得潮濕好多菌咁 ~

早餐食腸蛋麵   可能好耐無食麵   覺得個麵好大個咁呀 ~

Lunch Time 都仲未餓   直頭係無意識去諗食乜   個麵真係好勁呀   飽到咁耐   差唔多 1 點先求其食杯麥片   晏少少再飲杯好立克就算 lu ~

今晚里奧大人去醫院探媚媚爸爸   所以我約媽咪去 APM 食嘢   諗住去意粉屋   估唔到執咗    咁即轉軚去食日本菜   點知又執埋   半年無去啫   執咗咁多咁嘅   啲租肯定好貴   最後同媽咪和民算喇   反正媽咪都鍾意食 ~

其實唔鍾意兩個人去和民食嘢   因為啲二人枱好細   又擺調味架又水杯   擺多兩樣食物就已經擺唔落其他嘢食   咁即係要食快啲先可以上其他食物   我又唔鍾意邊食邊叫喎   等得嚟都無 Mood 食啦 ~  

住家飯 @ 媽咪屋企 ( 19-APR-2010 )

豉油王蝦碌 / 蒸桂花魚 / 黑椒牛柳 / 炒菜心 / 炒芽菜 / 淮山蓮子魚唇豬展湯

( 19-APR-2010  MON )

星期一 lu   要提起精神番工 lu   今朝食燒賣粉果做早餐   估唔到啲燒賣同粉果皮都好煙韌    所以好開心   感覺有好嘅開始咁呀 ~

菇場唔駛講一片寂靜啦 不過咁都好嘅   無咁嘈  咁無咁易頭痛嘛   因為我好怕人好大聲講嘢 ~

今朝食完早餐好滯    所以 Lunch 即食粉絲算喇   唔駛出街   食完上網睇嘢唔錯 ~

呢晚同里奧大人去媽咪屋企食飯   因為我要比印花比家姐   依家我都好少儲印花㗎喇   日用品多數去藥房買   有啲平幾蚊嘛   咁有啲罐頭又會去凍肉舖買喎   又係平幾蚊   慳唔少   好似我去超市買椰果同紅腰豆   超市好似要 $16   但凍肉舖 $11 咋   依家去超市多數係買乾糧同零食   但買得幾多喎   有時 Jusco 仲平   所以真係好少去惠康同百佳 lu ~

Jusco 壽司 (外賣) ( 18-APR-2010 )

( 18-APR-2010  SUN )

呢朝瞓到 11 點先起身   好在依家 11 點半前仲有早餐食   如果唔係就應該要自己煮 lu ~

個肚仲硬係谷住痛咁   但又唔係每月一到   總之辛苦啦   又係只想食完番屋企休息 ~  

最慘係坐又痛   郁下又好啲   郁得耐又痛   坐下又好啲   所以我做少少家務又抖下   再等食 Tea ~

里奧大人又食迷你叉燒飯   我第一個反應係 O 咀呀   問佢好耐無食飯咩   之後諗諗下我話又真係幾耐無煮飯嘅   但平時我煮飯佢又話想食麵   咁點先   真係吖 ~

難得假期   咁啱 Jusco 又做 9 折   所以去買梳化   折完再折平咗差唔多 $600   真係好抵   唔好講笑   買嘢嗰陣真係乜痛都唔覺咁㗎喎   同埋里奧大人唔知係咪知我唔舒服   我買乜都話好喎   平時我買薄荷朱古力雪糕   佢會話想增肥呀   但今次買兩盒雪糕平好多   所以我叫佢買自己鍾意嗰啲   佢話不如買薄荷朱古力啦   妳鍾意食嘛   我都食嘅   平時佢唔食㗎   所以有時自己病下都唔錯   可以對佢任魚任肉   平時咁樣好難喇 ~

咁樣痛唔係辦法   所以去睇中醫   順便調理個身體   醫師話唔好睇我身體咁咩呀   即係肥呀   大食夾無力嗰隻呀   但佢唔好意思講   其實個身體係好弱又貧血喎   開咗兩劑藥   順便叫埋里奧大人又睇   又係開兩劑   最正係幫妳煎藥   仲唔收錢喎   好多都收 $10 㗎   我好怕煲中藥   又要睇火   又成屋都中藥味   最慘係好貴煤氣費嘛   希望醫師有料到啦 ~

呢晚唔煮啦   企都辛苦呀   所以買 Jusco 嘅壽司算喇   食完再叫里奧大人去攞中藥番嚟飲   唔駛出街最好啦 ~ 

銀咖哩 @ 大埔 ( 17-APR-2010 )

( 17-APR-2010  SAT )

呢朝都精神番少少   胃口好番少少   叫做想食嘢咁囉   好在番半日   加上老闆 Off   所以我都無做嘢   坐喺到休息算喇   星期一再努力過啦 ~

半日好快過啫   但無乜胃口   所以番屋企休息到 3 點先食 Tea ~

食完都無 Mood 行   只係想番屋企靜靜咁過 ~ 

7 點出去食飯   本來想去元氣壽司   但已經十幾人排隊就唔等 lu   所以去對面新開無耐嘅銀咖哩試下喇   感恩去到等咗 10 分鐘就有位喇 ~

咖哩魚蛋 + 午餐肉 + 焗粟米薯蓉 + 超力米粉 ( 13-APR-2010 ) + (14-APR-2010 ) + ( 15-APR-2010 ) + ( 16-APR-2010 )

( 13-APR-2010  TUE )

今朝坐車凍到震呀   所以早餐要食熱嘢   個身暖哂   舒服好多 ~

番到菇場又凍到震   已經着哂冷衫都覺得好凍   下次真係要帶埋大披肩包住條頸先   咁樣應該暖好多   雖然誇張 ~  

我以前有甲狀腺問題係永遠唔會有凍嘅感覺   成日都好熱   個個話凍我都仲係好熱   後尾先知甲狀腺其中一樣病徵係好熱   好感恩   食咗 8 個月中藥就完全好番哂   當中仍感謝神嘅保守帶領醫治呢   因為我次次一停西藥就翻發   一個療程食 1 年半   翻發咗 3 次   所以我好唔相信西藥   只係控制   唔係完全醫治好囉 ~

今日諗住食完 Lunch Box 就出街行   但無搽到防曬   所以最後唔出 lu ~

呢晚好有煮嘢 Mood   可能樣樣都係自己想食啦   哈哈 ~

是日晚餐 - 咖哩魚蛋 + 午餐肉 + 焗粟米薯蓉 + 超力米粉

咖哩魚蛋 - 好想食呀   所以整喇   反正雪柜仲有 1 磅魚蛋   唔好浪費嘛 ~

午餐肉 - 懶呀   又唔想齋食魚蛋咁悶   所以就煎午餐肉   里奧大人又鍾意食喎 ~

焗粟米薯蓉 - 無啦啦好想食   不過啲薯仔整得唔夠腍   如果唔係更加好呢 ~

超力米粉 - 我覺得呢個牌子嘅米粉最好味   其實百佳牌隻牛肉味米粉都唔錯   但食完好口渴  超多味精呀 ~

( 14-APR-2010  WED )

呢朝無啦啦又凍到震   好在有件內置羽絨    唔係真係好易病呢 ~

今朝又食得健康啲   但其實我都係鍾意食啲熱嘅嘢   真係矛盾喇 ~  

菇場又凍到震   本來諗住買嘢番菇場食   但都係食完行陣好啲   無咁悶   當散下步都唔錯 ~

每月一到喇   有啲唔舒服同埋無啦啦勁眼瞓   無胃口   只想瞓覺   所以叫里奧大人自己買車仔麵番屋企食算喇 ~

  
( 15-APR-2010  THU )

呢日請病假喇   好感恩   其實個肚唔係劇痛   只係成日陰啲陰啲痛   同埋個人好攰同勁反胃   所以喺屋企休息喇   費事個衰樣嚇壞人啦   呢日又係無食嘢   又叫里奧大人自己買外賣番屋企食   佢仲食得津津有味添 ~

( 16-APR-2010 FRI )

要番工喇   個肚有少少痛   不過都 OK   但個人真係好攰   着埋冷衫帶頸巾都覺得仲係好凍   只係好想快啲放工   番屋企沖個熱水涼呢 ~

番到屋企個人真係舒服好多   開始有啲胃口   不過只可以食好少嘢   咁啱記得之前 8 卦去日本買咗個杯麵比我   咁就食埋啦   唔係又過期 lu   我仲驚食唔哂   點知一開就 O 哂咀   細到呢   一啖已經可以食哂 lu   好在今次我都係諗住食好少嘢   唔係真係唔拖唔水咯 ~

甜豆炒蝦仁 + 咖哩燒肉粒炒飯 + 芫茜皮蛋魚片湯 ( 12-APR-2010 )

( 12-APR-2010  MON )

星期一喇   一如以往   星期一起身係比較有困難呢 ~

呢朝好想飲奶茶   所以去間奶茶唔錯嘅飯堂食早餐   轉下口味食炒麵   因為呢間炒米粉唔好食   又硬又乾身   但其實我麻麻哋早餐食炒麵   好似好油咁 ~

抖下又 Lunch Tme   雖然帶 Lunch Box   但其實唔係樣樣都可以帶   好似蝦醬同鹹魚咁   一叮就久久不散   實比人話啦   魚又唔想帶   我覺得好腥   來來去去都係菜同肉   所以有時都特登唔帶飯   食其他嘢無咁悶   雖然我食嚟去都係嗰啲   但唔駛洗 Lunch Box 真係好鬼開心㗎 ~

諗定好今晚食乜餸   一去到街市就買   快手好多呢 ~ 

是日晚餐 - 甜豆炒蝦仁 + 咖哩燒肉粒炒飯 + 芫茜皮蛋魚片湯

甜豆炒蝦仁 - 呢個餸參考 毛豆小姐 嘅   我用甜麵醬 + 辣豆辣醬調味   已經好好味喇   煮呢個餸真係好方便呀 ~

咖哩燒肉粒炒飯 - 將尋晚食剩嘅燒肉切粒   加啲咖哩醬炒香   又變咗一個新嘅炒飯   無咁悶嘛 ~

芫茜皮蛋魚片湯 - 呢個湯又係超方便   不過我好唔鍾意用刀切嘢   其實係好驚揸刀先真   所以啲魚片係用細鉸剪剪   剪兩條剪到手都軟呀 ~

蝦醬豆腐火腩煲 + 芥蘭炒臘腸 ( 11-APR-2010 )

( 11-APR-2010  SUN )
呢朝 10 點 15分就起身 lu   今次去椰林閣食早餐   用埋張 Cash Coupon   如果無 Coupon 好少會去呢間   雖然坐得舒服   早餐嘅水準都唔錯   但啲服務態度好差   唔鍾意貼錢買難受囉 ~

食完早餐去藥房買嘢就番屋企   唔知點解好鬼眼瞓   居然可以瞓半個鐘   瞓到差唔多 1 點就醒咗   快快趣沖涼   要番教會呀 ~

去教會附近茶餐廳食 Tea   里奧大人想食盅頭飯   所以去新明發   但我就覺得唔好食   啲飯太腍喇   好怕咁嘅口感   但里奧大人又唔鍾意食太乾身嘅飯   所以我好多時煮飯都要煮腍少少   費事一陣又話頂胃又呢樣嗰樣呀 ~

我好鍾意同里奧大人去街市買餸   因為覺得佢格外細心   行到濕嘅地方就會叫我捉實佢嘅手臂   又會慢慢行咁   但如果平時做每一樣嘢都咁細心就好咯 ~

依家里奧大人都幾好   好主動話會熨衫   其實早就應該啦   樣樣要我做咩 ~

是日懶餐 - 蝦醬豆腐火腩煲 + 芥蘭炒臘腸

蝦醬豆腐火腩煲 - 用剩啲韭菜   所以整呢個煲   燒肉實食唔哂   食剩就用嚟切粒粒炒飯    唔會浪費呢 ~

芥蘭炒臘腸 - 加啲臘腸片無咁寡   又可以帶 Lunch Box   唔錯 ~

今日見到有大樹菠蘿   個樣唔錯   所以就買嚟食   今次好甜好多汁喎   好味道呀 ~

韭菜豬肉拚雞肉雲吞 ( 10-APR-2010 )

( 10-APR-2010  SAT )

呢朝又要番工   其實好羨慕人家 Off   不過我又會用 "只喺番半日" 嘅心情嚟番工   咁會開心好多   因為有啲人要番全日嘛   我番半日已經好好呢 ~

放工嘅時候好在里奧大人打電話比我   話屋企樓下又爆水管   無可能喺屋企對面巴士站落車   要早一個站落車   咁就可以唔駛對鞋浸水喇 ~

 
同里奧大人家姐同兒甥仔食 Tea   食完就買餸番屋企   呢日租咗隻 "檔案 39"   所以留喺屋企睇碟   唔出街 lu ~

今次又買咗花生糯米糍   10 蚊 4 個   同上次一樣咁好味   一路睇碟一路食   但唔知點解今次好滯   食完有啲唔舒服   之後里奧大人話其實係咪可以買 5 蚊 2 個喎   哎呀   早講嘛 ~

是日懶餐 - 韭菜豬肉拚雞肉雲吞

韭菜豬肉拚雞肉雲吞 - 今次買錯咗雲吞皮   我係想買餃子皮㗎   易包啲嘛   不過雲吞皮都唔錯   比我想像中易包   本來想豬肉係比里奧大人食   我就食雞肉嘅   但淥完都唔知乜肉打乜肉   味道又差唔多咁   下次都係全部用雞肉   感覺健康啲~

住家飯 @ 媽咪屋企 ( 9-APR-2010 )

( 9-APR-2010  FRI )

番咗 3 日工就到 Happy Friday 真係好開心呀   今朝食早餐   坐喺我對面嘅女仔   一路食通粉   一路流鼻水   好心拎張紙巾出嚟啦   女仔人家好核突呀 ~

本來諗住朝早食飽啲   晏晝食麥片   點知 8 掛同事約我出去食   我就出啦   推咗幾次費事啦    橫掂咁好天   出去走走都唔錯嘅 ~

夜晚同里奧大人番媽咪屋企食飯   星期五番媽咪屋企食飯最好   夜啲走都得   因為星期六番半日   無咁辛苦呀 ~

呢晚留肚番屋企食榴槤   今次無上次咁濃榴槤味呀 ~

焗叉燒醬雞翼 + 生菜海鮑片 ( 8-APR-2010 )

( 8-APR-2010  THU )

呢朝無啦啦好凍   又要着番厚褸   呢啲天氣真係玩到人謝呀   兩日熱兩日凍日咁 ~

一早諗好食吞拿魚治   點知無喎   仲以為自己聽錯添   因為吞拿魚係普通嘢   無諗過無   咁就轉食米線啦   咁凍食完都唔會出汗   爽呀 ~

菇場呀菇場   點解一樣係咁靜   點解個個人都好似做咗無幾耐咁   其實個個都做咗十年八年   但點解唔傾偈㗎 ~

晏晝又係 Lunch Box   但我唔可以一路上網一路食   但屋企又可以一路睇電視一路食飯㗎喎   可能成日上網上到對眼好攰要抖抖都未定 ~

里奧大人上咗大陸開會   所以差唔多 8 點先番到屋企   我就可以多啲時間預備喇 ~

是日懶餐 - 焗叉燒醬雞翼 + 生菜海鮑片

焗叉燒醬雞翼 - 用叉燒醬醃咗一晚入哂味   有焗爐真係好方便   又唔駛彈到啲油周圍都係喎   又可以焗蛋糕同曲奇   一物幾用   幾咁好呀 ~

生菜海鮑片 - 唔想又食生菜咁悶   所以整罐海鮑片   當一樣新嘢都唔錯 ~  

里奧大人喺火車站附近買咗砵仔糕比我食   呢檔砵仔糕唔係成日見到   所以買到真係好感恩   我覺得個砵仔糕好好味㗎   又多豆又唔太甜又煙韌   總之正啦 ~ 

雪菜火鴨絲燜米 + 腐乳西生菜 ( 7-APR-2010 )

( 7-APR-2010  WED )

話咁快就放完 5 日假   不過今日都好開心   第 1 日番工係星期三   咁啲時間快過好多呢 ~  

番工喇   所以 7 點 25 分起身   瞓小 2 個鐘   真係幾攰下   又要適應番一個人食早餐 lu ~

天氣唔好   落毛毛雨又凍   我又懶得帶遮喎   所以去菇場對面小食店買 Lunch 算喇   咁啱我又想食黑椒汁   感恩呢 ~

放工呢   大風到呢   又走咗架車   真係凍到震   好在件衫有帽   頂得住少少咁啦   呢啲天時真係唔帶外套都要帶披肩呀 ~   

是日晚餐 - 雪菜火鴨絲燜米 + 腐乳西生菜

雪菜火鴨絲燜米 - 呢晚突然勁想食燜米   所以有 一 Mood 即煮   唔再等喇   材料有 1/4 隻燒鴨 + 1 份尖椒 + $ 5 韭黃 + 1 大包米粉   不過整呢個米粉真係要用唔少時間   樣樣要切絲   今次用 MuiMuimui 整燜米嘅方法   一路煮一路加湯   咁啲米粉唔會咁乾   里奧大人鍾意咁㗎   我對佢幾好呢   講起燒鴨就火滾喇   今次第一次喺街市買 1/4 燒鴨   去到得 2 件   我咪問仲有無其他睇呀   條友笑笑口又串串共話: 仲想睇咩呀   知唔知今日係咩嘢日子呀   我咪好惡串番佢話   鬼知妳咩嘢日子呀   之後佢 Partner 就打圓場   話呢位姐姐斯斯文文都應該唔識賭馬啦   真係吖   最憎啲人講嘢用呢啲態度㗎喇 ~

腐乳西生菜- 唔想再花時間浸菜切菜   西生菜就最方便   一淥就搞掂 ~ 

呢晚都幾有 Mood 整嘢   加上牛油就到期   所以就焗 朱古力曲奇 喇 ~

自家焗朱古力曲奇 ( 7-APR-2010 )

( 7-APR-2010  THU )

又係因為牛油 11 號到期   所以非整不可   里奧大人係都要問點解會整   我話因為牛油就到期   其實好想氹佢話知佢鍾意食朱古力曲奇   所以幾攰都整   但諗諗下都係唔好   我答完佢之後   佢懶醒話都估到   無理由假期後第一日又煮飯又焗餅喎   又幾了解我喎   呵呵 ~

材料有麵粉 + 朱古力粉 + 朱古力粒 + 無鹽牛油 + 杏仁片
一盤深色 - 脆啲好味啲   再焗應該又會燶

一盤淺色 - 呢盤腍啲   味道都 OK 啦

稻香 @ 大埔 ( 6-APR-2010 )

一蚊一隻雞 - 無乜肉而無雞味  不過一蚊唔可以有要求囉   但食完呢次唔會再食 lu   

薑蓉 - 勁多油   

豆豉鯪魚炒油麥菜 - 估唔到份量都幾多   仲諗住會細碟啲添 

紅豆桂花糕 - 10 蚊咋   味道都唔錯  

( 6-APR-2010  TUE )

呢日要 8 點 45 分起身    因為要去拜奶奶   仲諗住最後一日假期盡情瞓添   話明下個星期六先去嘛   無啦啦又改今日   煩死   我屋企人絕對唔會咁做    知我平時番工早起身  假期實比我瞓晏啲㗎 ~

同里奧大人去麥當勞食早餐    好耐無食喇   食完成份早餐真係好滯 ~

差唔多 12 點半就搞掂    同里奧大人落銅鑼灣南記食 Lunch   再順便行下 Time Square    今次又係好好彩    可以揀到一個非常啱心水嘅銀包送比里奧大人姐夫   買完就諗住行 Sogo     但不停咁行咗兩個半鐘真係好攰    所以要搵地方歇腳 ~

唔想去大家樂   所以試呢間上海香港麵家   點知呢    好揀唔揀   難食到呢    好在係諗住搵個地方坐下  唔係主要食嘢   唔係真係慘咯 ~

我實在太攰喇    都係唔想行 Sogo   想直接番屋企呀 ~   

攰到咁真係無 Mood 煮嘢     之前成日想試稻香一蚊雞   里奧大人話去試下喇 ~

稻香一蚊一隻雞 $0.5 就半隻雞  咁當然要一隻啦   再加個小菜   因為唔想咁核突就咁一隻雞   叫個白飯   一個甜品加埋只係 $80   喺酒樓食晚飯唔過一百真係平囉    但呢隻雞都唔好食嘅    算啦   一蚊仲想點喎   不過下次我都唔會食   好似食肉獸咁   我好怕呢啲啖啖肉嘅感覺呀 ~

住家飯 @ 家姐屋企 ( 5-APR-2010 )

( 5-APR-2010  MON )

呢日最開心   因為去家姐屋企玩呀   同里奧大人早啲起身食早餐   再番屋企梳洗就出發 lu ~

同埋媽咪   家姐同姐夫一齊到好彩飲茶   估唔到好多點心都好味喎   起碼好過美心   坐得都幾舒服   唔太迫   唔錯唔錯 ~

素粉果 - 皮薄又煙韌   又多料   超正呀

蒜蓉春卷 - 熱辣辣脆卜卜   好似唔覺有豬肉碎   正呀

牛肉腸 - 都幾滑   唔錯

蒜蓉蒸鮮魷 - 超惹味   食完又唔係好口渴喎

古法馬拉糕 - 正啦   好耐未食過咁深色嘅馬拉糕喇

煎蘿蔔糕 - 有蘿蔔絲   有驚喜   最怕係得粉呢

叉燒包 - 無食到   不過佢哋話唔錯

潮州粉果 - 又係皮薄餡靚呀

豉汁蒸鳳爪 - 好惹味   不過我開始怕食鳳爪喇 

山竹牛肉球 - 無乜肥豬肉   正呀

灌湯包 - 食咗呢個包   簡直係呢嘅污點呀   個皮厚到呢   個餡得豬肉   又無味   唔掂呀

花生糖不甩 - 煙煙韌韌超好味呀   如果唔係飽會再食多一碟   煙韌最啱我呢 

食完就去家姐屋企 lu   今次要求里奧大人帶大機幫啲狗影相   因為我部機好難影   連環快拍又慢   啲狗又成日郁   影到無心機   唯有叫里奧大人幫手   大狗真係好乖   不過就成日比佢哋體形嚇親   其實我依家都唔係咁怕佢哋   但最緊要唔好撲埋嚟   佢哋好鬼大力㗎 ~

玩完影完就開枱喇   上次贏嘅今次輸番哂   難道真係財散人安樂 ~

食埋晚飯   再玩多陣狗狗就搭車番屋企 lu ~

香煎鲶魚柳 + 甜酸齋 (外賣) + 粟米蛋花湯 ( 4-APR-2010 )

( 4-APR-2010  SUN )

呢朝瞓到自然醒先去食早餐   個人唔多舒服   天陰陰又作落雨咁   所以都無乜 Mood 出街 ~

晏晝番完教會就同里奧大人食 Lunch   食完又想出去行街   但又覺得特登搵嘢行好辛苦   都係番屋企算喇 ~

呢晚唔想出街食   去 Jusco 睇下有乜餸   見到甜酸齋好好味咁   所以就買嚟做餸喇   可以煮少一樣都唔錯呀 ~

是日懶餐 - 香煎鲶魚柳 + 甜酸齋 ( 外賣 ) + 粟米蛋花湯

香煎鲶魚柳 - 就咁用蒜鹽 + 黑椒 + 香草醃咗一陣   雖然無汁   但又唔錯喎 ~

甜酸齋 (外賣  - Jusco 買嘅   始終都係齋舖好食啲 ~  

粟米蛋花湯 - 1 罐粟米湯 + 1 罐粟米粒   超多粟米呀   飲完個湯都飽喇 ~  

Jusco 壽司 (外賣) ( 3-APR-2010 )

( 3-APR-2010  SAT )

呢日無諗住出街   所以瞓到自然醒就食早餐   再番屋企做家務   做完睇下電視   話咁快就過咗半日 lu ~

同里奧大人去食米線   食完再行一陣就去威爾斯探里奧大人家姐   本來探完想行陣沙田先番屋企   但諗起上次太焗就已經驚咗   所以番屋企算喇 ~

唔想煮呀   去 Jusco 買壽司番屋企食   喺屋企食嘢真係最舒服呢 ~  

海港酒家 @ 將軍澳 ( 2-APR-2010 )

( 2-APR-2010  FRI )

今朝要早啲起身食早餐   因為約咗里奧大人姐夫打牌呀 ~


經過官塘   順便去 APM 睇下有無銀包送比水姑   估唔到又有啱心水銀包喎   成日都係咁   特登去買反而無   平常心去買就有喎   買完就同哋地飲茶   之後就打牌 lu ~

打到 9 點就去海港酒樓食晚飯   因為佢哋話 9 點平好多呢 ~  

一樂燒臘飯店 @ 大埔 ( 1-APR-2010 )

京都豬扒 - 人哋明明叫粟米斑塊家嘛   第一次比咗碟唔記得係乜   第二次又嚟錯椒鹽骨    咁呢碟已經係第三次錯㗎喇   但等咗 25 分鐘唔想再等喇   同埋京都豬扒都 OK 嘅 ~

羅漢豆腐- 味道唔錯   其實我都幾鍾意食羅漢齋呢
燒鵝拚盤- 又係等咗好耐先有    呢間嘢真係好唔掂   大佬  又唔係即叫即燒   駛唔駛等咁耐呀

例湯一窩- 粉葛雞腳湯   估唔到係一窩囉   二人套餐咋

( 1-APR-2010  THU )

番埋今日就連放 5 日真係好鬼開心   真係早餐食乜都開心呀 ~

老闆 11 點幾走咗   呢一日真係好 Free   加埋 Holiday Mood   點會有心情做嘢喎 ~ 

晏晝去菇場對面快餐店買廈門炒米 + 例湯   $ 20 咋   真係好抵   但個米粉味道就唔似廈門米囉   都唔酸酸咪咪嘅   不過份量同材料都幾多   仲諗住 $20 唔會好多添 ~

呢兩日右小腹有啲痛   都係拿拿臨放工睇醫生   驚假期啲診所唔開呀   雖然掛號   但都要等 2 個鐘   真係好鬼多人病   好感恩   原來今次腹痛係 "腸風"   咁都無咁驚 ~   

里奧大人呢日上咗大陸開會   所以佢就接我   再去大埔墟食飯喇 ~ 

今晚試下呢間一樂燒臘飯店   聽聞燒鵝好出名   但我又想要試埋其他燒味   所以就叫一個套餐   有燒鵝拚盤 + 2 個小菜 + 1 窩例湯 + 2 碗白飯   只係 $178   不過呢間嘢出菜好慢   又連錯兩次單   同埋唔係想像中咁好味   應該未必再去食 lu ~