焗叉燒醬雞翼 + 生菜海鮑片 ( 8-APR-2010 )

( 8-APR-2010  THU )

呢朝無啦啦好凍   又要着番厚褸   呢啲天氣真係玩到人謝呀   兩日熱兩日凍日咁 ~

一早諗好食吞拿魚治   點知無喎   仲以為自己聽錯添   因為吞拿魚係普通嘢   無諗過無   咁就轉食米線啦   咁凍食完都唔會出汗   爽呀 ~

菇場呀菇場   點解一樣係咁靜   點解個個人都好似做咗無幾耐咁   其實個個都做咗十年八年   但點解唔傾偈㗎 ~

晏晝又係 Lunch Box   但我唔可以一路上網一路食   但屋企又可以一路睇電視一路食飯㗎喎   可能成日上網上到對眼好攰要抖抖都未定 ~

里奧大人上咗大陸開會   所以差唔多 8 點先番到屋企   我就可以多啲時間預備喇 ~

是日懶餐 - 焗叉燒醬雞翼 + 生菜海鮑片

焗叉燒醬雞翼 - 用叉燒醬醃咗一晚入哂味   有焗爐真係好方便   又唔駛彈到啲油周圍都係喎   又可以焗蛋糕同曲奇   一物幾用   幾咁好呀 ~

生菜海鮑片 - 唔想又食生菜咁悶   所以整罐海鮑片   當一樣新嘢都唔錯 ~  

里奧大人喺火車站附近買咗砵仔糕比我食   呢檔砵仔糕唔係成日見到   所以買到真係好感恩   我覺得個砵仔糕好好味㗎   又多豆又唔太甜又煙韌   總之正啦 ~