星悅鮮廚 @ 官塘 ( 30-JUN-2010 )

菠蘿生炒骨 / 蜆芥鯪魚球 / 豉椒味菜炒鵝腸 / 南乳花生豬腳

( 30-JUN-2010  WED )

諗起聽日放假心情都特別興奮呀   早餐食乜都覺得好味咁 ~

番到菇場就預備心情   等晏晝 Off 陪媽咪覆診 lu ~

媽咪 1 點 45 分要到醫院覆診   所以我放工要飛奔去媽咪屋企附近食 Lunch   再同媽咪去醫院覆診喇 ~

咖哩雞扒飯 - 塊雞扒係炸過  好好味呀

感恩 1 點 50 分可以入去睇醫生   傷口又埋得唔錯   今次睇埋大脾傷口   之前果位醫生話千其唔可以搞呢個傷口   如果唔係會生肉牙   所以復康姑娘都唔敢搞呢個傷口   但成 3 星期咁耐   啲紗有黐住哂啲肉喎   我見到有血添呀   嚇到我腳軟   之後醫生建議喺傷口黐塊 "龍蝦皮"   係用啲蝦殼蟹殼提煉嘅   只係舖喺傷口面   傷口埋哂呢   塊 "龍蝦皮" 自然會脫落   同埋如果下下洗傷口會好痛   最大好處就係唔駛任何麻醉藥   只係要上病房做嘅   咁當然好啦    反正媽咪屋企有嘢維修   根本唔番得屋企抖   同埋個傷口真係好痛   喺醫院休息半日好過呢 ~

陪完媽咪上病房我就自己出九龍城行陣   熱到呢   好在有嘢買到咋   仲可以同埋家姐媽咪分享   我就最開心呢   差唔多 5 點媽咪打嚟話可以院   好感恩呀   因為我差唔多到醫院嘛   同埋媽咪話整完個傷口無咁痛   唔駛包紮咁大塊紗布舒服好多咁呢   今次真係好感恩   個醫生非常非常之好   又細心   如果個個醫生咁嘅態度對病人就好啦   唔駛食藥都好番呀   最憎啲醫生成日下下嚇人   想唔驚到病都幾難喇 ~

呢日里奧大人又上咗大陸   所以得我同媽咪 家姐同姐夫一齊食飯   食完再上媽咪屋企坐陣就走 lu ~ 

芝士焗肉醬意粉 + 蕃茄薯仔排骨湯 ( 29-JUN-2010 )

( 29-JUN-2010  TUE )

今朝遲咗出門口同少少塞車喎   真係邪呀   唔遲唔塞咁嘅   好在今日天氣好好   終於有陽光   唔係落雨仲塞得犀利呀 ~

我好鍾意食粉果   不過唔鍾意有豬肉碎   如果就咁係菜甫 + 沙葛就好啦   加埋豉油辣椒油一齊食   超滿足呀 ~

喺菇場無嘢做就諗下嘢咁啦   諗下唔駛做嘢又幾好   可以幾時起身就起身   但係覺得唔做嘢又好似無細藝喎   朋友又番工   我又唔會喺屋企上網嘅   最多陪里奧大人或者屋企人食 Lunch   成日一個人行街又唔想喎   諗諗下都係番工好   可以賺錢   可以消磨時間   又識到啲 Blogger   真係唔錯喎   最感恩係我上司非常非常非常之好人囉   我以前公司無咁㗎   所以同朋友講起都覺得自己好幸運好感恩遇到個好上司   所以我要努力工作呀 ~ 

發完夢要回歸現實諗下晏晝食乜 lu   勁想食南瓜   所以食兩餸飯   就係南瓜 + 炒青瓜   味道唔錯喎   如果配埋糙米就更健康   不過果度得白飯供應呢 ~

成個星期無煮飯啦   係時候要煮喇   煮飯對我黎講唔係一個責任   只係想自己同里奧大人有餐健康啲嘅晚餐   餐餐出街食嘢實在太無益喇 ~

是日晚餐 - 芝士焗肉醬意粉 + 蕃茄薯仔排骨湯

芝士焗肉醬意粉 - 材料 $5 瘦肉 + 1 個大紫洋蔥 + 1 個小蕃茄 + 芝士碎 + 調味料   今次里奧大人話好味喎   仲話下次要多啲芝士仲好味   點解咁㗎   之前又話太多好漏   依家又嫌唔夠   不過唔理啦   最緊要佢覺得好食   其實我覺得係今次整得比平時細咗一半   佢覺得唔駛格硬食哂   所以咪好食囉   因為佢次次一見我整一大盤佢就驚定先   驚要食哂嘛   哈哈 ~

蕃茄薯仔排骨湯 - 材料 3 個大蕃茄 + 1 個中薯仔 + $10 排骨   今次時間關係   所以煲咗半個鐘   但都好好味呀 ~

雲桂香米線專門店 @ 大埔 ( 28-JUN-2010 )

重慶酸辣粉 (小辣) / 豬腩肉小鍋米線 (小辣) / 蒜泥白肉

( 28-JUN-2010  MON )

尋晚睇完波興奮得滯瞓唔着呀   德國 VS 英格蘭 4:1   真係令我非常超級振奮呢 ~

由呢日開始   我決定唔飲奶茶   同里奧大人講如果我兩個月唔飲奶茶   佢要有實際獎賞比我   佢應承就得啦   我會下定決心的   如果想飲點算好呢   但又唔可以犯規   就係叫佢飲   黐佢兩啖   佢話都得嘅   咁就皆大歡喜啦 ~ 

早餐食炒米粉 + 熱檸茶   飲檸茶感覺好似好消滯咁   唔錯 ~

阿 Head 就好啦   放假放到 7 月中先番   我都好㗎   無人管   不過我好自律呢 ~

差唔多 Lunch Time 嘅時候又倒水咁   好在今朝帶定福麵   反正無乜胃口   求其算喇   最緊要方便 ~

終於放工喇   要同家姐去超市睇嘢   所以順便去超市買餸   行下行下   行到無 Mood 煮喎   所以番屋企等里奧大人放工再去街食算 lu ~

番到屋企無乜細藝   咁就熨衫啦   熨完時間啱啱好   同里奧大人去食酸辣米線喇 ~

今晚睇荷蘭 VS 斯洛伐克   悶到呢   未完場要瞓喇 ~

炒飯 + 粟米蛋花湯 ( 27-JUN-2010 )

( 27-JUN-2010  SUN )

今朝瞓到 11 點半呀   里奧大人仲入嚟揭開我張被   以為我乜事瞓咁耐喎   如果唔係佢入嚟    我都仲可以瞓呀    因為我唔知原來已經咁晏 ~

唔知點解   假期要同里奧大人食早餐先覺得係假期嘅感覺   一個星期一日咋   所以我好期待   所以叫佢快啲去餐廳攞位   感恩我哋係 Last Two ~

食完番屋企又 Hea 喇   個人真係好鬼攰   攰到真係有錢都唔願執嗰隻喎 ~  

落好大雨呀   唔想出街   叫外賣 Tea 啦   如果好人好者叫 Tea 好似好懶咁   但今次唔多舒服叫 Tea 又覺得好應份咁喎   飯來張將口正呀   哈哈 ~

夜晚有番啲精神   所以煮飯啦   將尋晚食剩嗰啲餸同白飯炒埋一堆   唔錯㗎 ~ 

是日懶餐 - 炒飯 + 粟米蛋花湯

炒飯 - 將啲椒鹽豬扒切粒再加白飯去炒   加啲乾蔥碎   話咁快就有一碟好好味嘅炒飯呢 ~ 

粟米蛋花湯 - 菜都懶買呀   所以整粟米湯算喇 ~ 

我煮完就話 "好喇   食久違了嘅住家飯喇"   點知里奧大人係度大笑喎   話呢啲叫住家飯 ?!   係得我先嗡得出口喎   我覺得喺開火煮嘢就叫住家飯㗎喇   同埋我真係煲咗罐頭粟米湯喎   唔係外賣喎   真係吖 ~

明新焗飯小廚 (外賣) ( 26-JUN-2010 )

( 26-JUN-2010  SAT )

今朝要番工   瞓晏少少起身   估唔到無遲到喎   又無胃口食早餐 ~

大粒全部唔喺度   不過我好攰   都無 Mood 上網呀   只想快啲番屋企 ~ 

放工即走啦   番到屋企有胃口喇   叫里奧大人買麥樂雞番屋企食   熱辣辣脆卜卜好正呀 ~

今晚唔煮啦   真係要休息呀   叫外賣算喇   3 餸 1 湯 2 白飯   夠哂皮啦   本來好想食嘢    臨食之前大食表妹打嚟勞勞嘈嘈咁講嘢   搞到我無哂 Mood 無哂胃口   雞同豬扒剩番哂喺度   之得唔聽佢電話好過啦   激鬼氣 ~ 

脆肉瓜炒魚片 + 芫茜皮蛋魚片湯 ( 23-JUN-2010 ) + ( 24-JUN-2010 ) + ( 25-JUN-2010 )

( 23-JUN-2010  WED )

早餐又食吞拿魚烘底    喺呢間茶餐廳度食早餐   唔知點解無人叫扒類嘅呢    食下好嘛    等我睇下個賣相掂唔掂   好唔好食都好吖   喺度成日食包同粉麵真係有啲悶 ~

晏晝又同 8 卦出去食 Lunch   今次試間新開張嘅餐廳 點知一致通過係唔會再翻單   啲飯超腍呀   仲話炒飯添   我平時炒得都唔乾身啦   不過都無佢咁難食囉 ~

落雨絲濕去街市真係好煩   應該唔係我一個咁樣諗啩 ~  

是日晚餐 - 脆肉瓜炒魚片 + 芫茜皮蛋魚片湯

脆肉瓜炒魚片 - 唔知煮乜好   又唔想又洗又浸   呢個餸真係唔錯   有瓜有肉   一碟上枱   可以洗少隻碟 ~   

芫茜皮蛋魚片湯 - 呢排睇波   比平時遲瞓咗個幾鐘   對我嚟講十二點先瞓係好遲囉   煲啲下火湯   希望降下火啦 ~ 

( 24-JUN-2010  THU )

呢日每月一到喎   痛就唔係好痛   不過周身唔舒服囉   成日中中中   好在中到放工知醒啫   番到屋企即沖熱水涼   舒服好多呢   但無胃口食嘢   全日無食嘢呀   好在無胃痛咋   暗喜啦 ~ 

( 25-JUN-2010  FRI )

尋晚瞓得唔好喎   又赤赤痛   買咗杯熱菜蜜飲   平時可以飲哂成杯   因為熱熱哋好舒服   點知今次飲到一半超想反胃呀   好甜呀 ~

 
今次衰喇   終於胃痛喇   不過好在老闆 Off   我又可以瞓足一日   又係瞓到放工啱啱醒    勁呀 ~ 

今晚有胃口喇   叫里奧大人買淨酸辣米線比我食   酸酸辣辣好開胃呢 ~ 

住家飯 @ 媽咪屋企 ( 22-JUN-2010 )

薯仔餅 / 煎紅衫魚 / 白切雞 / 叉燒 (外賣) / 炒芽菜 / 冬瓜薏米瑤柱湯 / 西瓜 / 荔枝

( 22-JUN-2010  TUE )

今朝超熱呀   就算呢排好焗   我行去巴士站都唔會出汗   個身仲爽架   點知今朝一去到巴士站呢   不斷咁流汗   幾想再番屋企沖多次涼呀 ~

熱呀熱   本來想飲凍嘢㗎   不過忍下口   飲番熱嘢   最多慢慢灘凍啲飲呢 ~

菇場凍到震呀   見到 Partner 係咁中   中到我都想瞓埋一份呀 ~ 

Lunch Time 同 8 卦出去美心快餐食   今次好想食六寶   平時好少自己食一碟呢啲飯   覺得啖啖肉   但唔知點解今次好想食囉 ~

里奧大人呢日上咗大陸   我又想見下媽咪   所以自己番媽咪屋企食飯   叫里奧大人自己食   比啲時間佢 free 下咁啦 ~  

隻肥寶瞓到合實對眼   瞓得好林咁呢

雲吞蟹籽丸米線 + 唐生菜 ( 21-JUN-2010 )

( 21-JUN-2010  MON )

今朝有啲攰   不過好在飲鴛鴦都可以提神   唔係都幾難捱到今日咯 ~

依家細老闆喺度個個都照上網 lu   精神食糧嚟家嘛   唔係個個中眼瞓仲慘呢 ~ 

晏晝有 Lunch Box   我會幫人整埋保鮮紙   一開飯盒就知道邊個係男同事   邊個係女同事   因為女同事嗰啲比較整齊   男同事嗰啲好似打完風咁   好似一大堆唔同嘅食物炒埋一齊   真係睇見唔想食囉 ~

終於等到放工   好鬼攰呀一樣   所以煮米線算喇   最緊要快   唔好阻住睇波 ~

是日懶餐 - 雲吞蟹籽丸米線 + 唐生菜

雲吞蟹籽丸米線 - 雲吞買比里奧大人食咋   我就食蟹籽丸   因為我好想打邊爐   我覺得食蟹籽丸好有打邊爐感覺呢 ~  

唐生菜 - $5/2 棵   又幾靚仔   浸兩浸就淥得 ~

難以置信葡萄牙大勝北韓   7 比 0 呀   不過我睇波唔係睇腳法   最緊要有靚仔   同埋係我識嘅球員   唔係睇得唔過癮呢 ~

茄汁洋蔥豬扒 + 節瓜淮山螺頭豬展湯 ( 20-JUN-2010 )

( 20-JUN-2010  UN )

今朝瞓到 9 點半醒 lu   勁想食糯米雞   所以就去大家樂喇   如果 10 點起身就唔得㗎喇   好多時去到都係得番魚柳   唔係自己想食嗰啲囉 ~

食完番屋企抖陣又跑步   今日唔知係乜誕    又見到好多龍頭龍尾    睇見佢哋成頭汗都替佢哋辛苦呀 ~

同里奧大人食完 Tea 就要番屋企煲湯喇   搞掂再睇碟   里奧大人一路睇碟又一路食 Cake   好有食力咁噃   不過無計啦   我又唔食嘅   隔日食唔好食嘛 ~

今晚 6 點開始煮飯   6 點 45 分開飯   唔駛一個鐘我已經覺得好快喇 ~

  
是日晚餐 - 茄汁洋蔥豬扒 + 節瓜淮山螺頭豬展湯

茄汁洋蔥豬扒 - 酸酸甜甜都幾醒胃   又可以帶飯喎   幾好 ~  

節瓜淮山螺頭豬展湯 - 3 個大節瓜 + 12 粒淮山 + 2 個螺頭 + $15 豬展 + 3 粒蜜棗   呢個湯係睇 Blog 學番嚟   我覺得唔錯   因為有瓜有湯   唔駛特登再煮碟菜呢 ~ 

食飽就坐梳化睇下波啦   里奧大人就睇報紙   睇今屆世界盃都幾辛苦   因為比當地人用傳統樂器唔知乜乜   嘈到成日都聽唔清楚旁述講乜   睇睇下我聽到旁述講呢個球員幾廿年嚟都踢得幾好   佢個樣又老老哋   我又諗緊最多咪踢廿幾年   已經好勁啦   但如果踢幾廿年又覺得無乜可能喎   無耐又講多次個名   我無留意   因為仲諗緊呢個問題   里奧大人大笑話唔係幾廿年嚟   係" 基也年尼" 呀   哈哈   聽完之後我都笑呀   發音咁鬼似嘅 ~  

咖哩至尊 @ 大埔 ( 19-JUN-2010 )

( 19-JUN-2010  SAT )

呢朝要番工喎   老闆 Off   但細老闆喺度   不過就要見客   我哋又可以繼續愉快地上網呀 ~

終於等到放工喇   番到屋企坐陣先   再同里奧大人出去食 Tea ~ 

又熱又焗   真係街都唔想行   只係想番屋企嘆冷氣   唔係人會顛 ~

抖夠就番教會 lu   今日林以諾牧師黎講道   加上聽日父親節   所以今堂好多人   信息分享 "不要為明天憂慮, 因為明天自有明天的憂慮; 一天的難處一天當就夠了< 太 6:34 >"   希望自己都能做到呢 ~

今晚唔煮飯喇   去咗里奧大人成日想去嘅咖哩至尊   雖然地方迫啲   但咖哩有驚喜喎   下次會再去食   好過自己煮呀 ~

食完抖陣又跑步   之後番屋企睇碟   咁好快就過咗一日 lu ~   

Jusco 壽司 (外賣) ( 18-JUN-2010 )

( 18-JUN-2010  FRI )

Happy Friday 喇   真係好鬼令人開心嘅啫 ~

終於到 Lunch Time   今日有 Lunch Box 唔駛煩食乜   最好㗎喇 ~ 

放工喇   今晚唔煮飯   因為要睇波   有我至愛德國隊呢 ~

去 Jusco 買壽司 + 煙三文魚   再買其他立立雜雜嘢   番到屋企對手好似斷咗咁呀   又好鬼熱喎   所以即刻沖個靚涼   再開行冷氣嘆下先 ~

開波喇   Klose 紅牌被趕出場都無哂心機睇啦   之後 Podolski 踢12 碼又唔中喎   Lahm 同  Schweinsteiger 又有黃牌   真係要小心啲踢好喎   同埋我覺得今屆世界盃啲球証唔多掂囉   應比唔比   唔應比反而又比喎 ~

酸梅麵豉蒸排骨 + 蒜泥油麥菜 + 粟米蛋花湯 ( 17-JUN-2010 )

( 17-JUN-2010  THU )

假期後第一日番工最攰   即使之前瞓夠都係咁話呀 ~

攰到無乜胃口   食件奶油多算喇   無咁膩呢 ~

番到菇場忙忙哋   做下嘢精神啲嘅 ~ 

晏晝有 Lunch Box   唔駛落街買嘢最好   出面太焗喇 ~

里奧大人今日上咗大陸   所以有多啲時間預備晚飯   我就可以買完餸去睇中醫   等佢番嚟嘅時候幫我拎埋藥   我就唔駛特登再去落藥呢 ~ 

是日懶餐 - 酸梅麵豉蒸排骨 + 蒜泥油麥菜 + 粟米蛋花湯

酸梅麵豉蒸排骨 - 其實因為想食個汁先整呢個排骨   加埋指天椒就最正添呀 ~

蒜泥油麥菜 - 呢個又好味又方便   懶人首選呢 ~

粟米蛋花湯 - 好耐無飲粟米湯   覺得好甜好好味呀 ~ 

今晚 7 點半阿根廷 VS 南韓   所以一路食飯一路睇波   刺激到呢   出哂汗呀   我捧阿根廷㗎   因為有 Messi 仔   同埋佢哋好有團隊精神   咁先係嘛   最怕啲人獨食   表現自己 ~

呢晚里奧大人又買咗砵仔糕比我食   我拎嘅時候以為得一個   幾咁感動呀   以為特登買比我嘛   點知一開見到係 4 支簽   原來佢自己食咗個   仲好意思話特登買比我食   真係呢 ~

呢幾晚睇波睇到 12 點先瞓   對我黎講係超級夜架   捱咗幾晚頂唔順喇   所以呢晚 10 點半已經要瞓 lu ~ 

端午做節 @ 姑奶屋企 (大埔) ( 16-JUN-2010 )

Pizza Box 嘅厚批 x 2 / Pizza Box 嘅薄批 / KFC 上層辣雞 / 下層燒雞 / KFC 辣雞粒 /薯格 / 蘑菇飯 /手撕麻醬雞 / 海蜇 (外賣) / 焗長通粉 / 楊洲炒飯 / 肉片炒河 (外賣) / 德國鹹豬手 (外賣) / 燜豬手 / 燒排骨 (外賣) / 灼生菜 / 炒三色椒 / 椰菜

( 16-JUN-2010  WED )

呢日係端午節假期   爽啦   瞓到 10 點半先起身食早餐   一星期有三四日係咁就好喇 ~ 

食完去街市買生果   我買大蕉   咁我揀嘅時候有個女人話拎落嚟比我揀   佢剪比我   咁我話要 3 隻   平排位置呀  佢話唔知點切叫我切   我話我都唔識切喎   但我自己想食   所以慢慢切   切咗一隻出嚟   之後有個應該係老闆娘嘅物體話幫我切   我話我要呢 3 隻   佢話無得咁   我話次次都咁啦   佢話邊個咁比我   我話鬼認得妳邊啲人呀   之後我話唔要喇   黐線   又話比人揀   揀完又話唔得咁   佢居然仲話要我比番頭先切咗果隻蕉錢   我唔理佢走啦   里奧大人買完花問我乜事   我同佢講咁咁咁   因為我好火叫佢走   行咗半條街仲聽到個女人把聲喺度嘈   不過我無聽到佢講乜 ~

里奧大人話我走得啱   唔係鬧交仲煩   我點會大街大巷為咗隻蕉嚟鬧交喎   真係吖 ~

坐陣又要跑步喇   因為 1 點 Close   呢日又係好焗好熱   番到屋企沖完涼已經唔想再出街   加上要睇碟   所以索性外賣 Tea 算喇 ~

諗住一路食一路睇 "搞乜鬼終極奪命雜作"   點知呢   成日屎尿屁   我叫里奧大人即刻 Stop   食完先睇   唔係真係食唔落囉   美國文化真係唔識欣賞 ~ 

喺屋企食完 Tea 無耐仲瞓咗 45 分鐘   之後超過精神呀   呢排啲天氣真係好以攰呢   有得瞓好瞓喇 ~ 

今晚去姑奶屋企做節   我仲可以帶埋聽日 Lunch Box   爽呀 ~

  
番到屋企又睇波啦   西班牙 VS 瑞士   呢場好睇呀   有靚仔睇   場波又刺激   但 12 點先瞓對我嚟講好辛苦囉   除非唔好睇   如果唔係無理由睇上半場唔睇下半場家嘛   係咪先 ~ 

節瓜魚滑湯 + 糭 ( 15-JUN-2010 )

( 15-JUN-2010  TUE )

呢朝番工十級興奮啦   聽日放假喎 ~   

早餐食五香肉丁 + 芝士腸米線   食咗兩粒五香肉丁咋   因為我麻麻哋   貪佢有唔多辣嘅竦油   米線得果幾撮   食完好似無嘢落肚咁喎 ~

番到菇場有嘢做   拿拿聲做哂去先   費時假期之後先做   因為假期之後番工係攰啲家嘛   要抖呀 ~

好餓呀   Lunch Time 即落街買嘢食喇   食完都好似唔夠飽咁   今日好怪   食乜都唔夠飽咁呀 ~

放工去街市買餸就即番屋企 Ready 喇   今晚要睇靚仔 C 朗呀 ~  

是日懶餐 - 節瓜魚滑 + 糭

節瓜魚滑 - 2 個大節瓜 + $8 鯪魚肉   我鍾意飲㗎   啲鯪魚肉蘸豉油胡椒粉好好味呢 ~ 

糭- 老闆派㗎   每人兩隻   一鹹一甜   但好鬼細隻    呢餐同里奧大人要 Share 一個杯麵先夠飽呀 ~

抖陣又去跑步 lu   依家啲天氣好多強哥   里奧大人衰到呢   行行下指住地下   我即刻捉佢隻手   停低問佢係咪有強哥   喺邊度   條友笑哂話無嘢呀   我指下地下之嘛   大驚小怪   真係咁嘅人都有嘅 ~  

跑完步即沖涼啦   坐定定睇靚仔呀   但呢場有啲悶   有啲失望呀 ~ 

星悅鮮廚 @ 官塘 ( 14-JUN-2010 )

( 14-JUN-2010  MON )

呢日 Off   因為陪媽咪覆診   瞓到 8 點 45 分要起身喇   不過仲係好眼瞓咁 ~ 

喺媽咪屋企附近食完早餐就上媽咪屋企 lu   約咗一線通師傅拎平安手機上媽咪屋企 (機價 $1,380)   好在部機嘅樣唔係話太肉酸啫   不過咁   最緊要係有用嘛   咁出街嘅時候都唔駛我咁擔心啦 ~

之後買麥當勞番屋企食   抖陣就出發去醫院覆診 lu ~

2 點半到   4 點半先有得睇   等等下我都瞓着咗   瞓醒無耐就到媽咪 lu ~

感謝神   醫生話媽咪傷口嘅植皮好靚   再過一星期可以拆線   但大脾嘅傷口就會痛同痕   千其唔好搞佢   如果唔係生肉芽仲煩喎   食止痛藥同止痕藥就得㗎喇 ~

之後洗傷口 + 拎藥   5 點 45 分先搞掂   今日又熱又焗   又周圍滕   真係仲攰過番工呀 ~

同媽咪 家姐一齊食飯   但里奧大人 8 點先放工   所以我食完再陪里奧大人   咁唔駛佢一個人食嘢咁悶呢 ~

怪味肉青 + 菜心 + 自家糭 ( 13-JUN-2010 )

( 13-JUN-2010  SUN )

呢朝瞓到 10 點半自然醒   真係好呢   有足夠精神呀   食早餐都食得開心呢 ~  

食完番屋企抖陣   再去跑步   好耐無跑咁 lu   又要慢慢習慣番喇 ~   

又焗又熱真係超辛苦呀   食完 Tea   再買埋糖水番屋企   咩都唔做   要嘆冷氣睇碟呀 ~ 

是日懶餐 - 怪味肉青 + 菜心 + 自家糭

怪味肉青 - $10 梅頭   豬肉佬仲好好人   話無人買嘢所以幫我切埋   咁我唔駛拎菜刀慢慢切就最好啦   呢個怪味汁只係用咗鎮江醋 + 豉油 + 豆辦醬 + 薑蔥蓉 + 蒜蓉   其實有啲食譜用埋花椒油 + 麻油同埋其他嘢   不過屋企無   所以求其啦   唔想整一次又要買一樽嘢番廚房擺呀 ~

菜心 - $8/斤   不過唔係咁甜囉 ~  

自家糭 - 隔離阿婆朝早比里奧大人   我好感恩   因為呢排勁想食糭   但又懶得買   估唔到有得食呢   仲要係自家糭   好開心呀 ~ 

叉燒炒麵 + 絲瓜魚湯 ( 12-JUN-2010 )

( 12-JUN-2010  SAT )

今朝要番工   車程都好暢順   梗係啦   無乜人番工嘛   所以好多時星期六都有充裕嘅時間食早餐呢 ~ 

估唔到今朝會有嘢做   不過咁都好   好快就放工咁 ~  

天氣又焗又熱   同里奧大人食 Tea   熱辣辣天氣食啲熱辣辣粉麵   熱到呢   食完唔理三七廿一要即番屋企沖涼呀 ~

同里奧大人番完教會就去街市買餸   突然有隻小強   我唔敢向前行   點知有個女仔大腳一伸踩爆阿強   英到爆呀 ~   

是日晚餐 - 叉燒炒麵 + 絲瓜魚湯

叉燒炒麵 - $10 叉燒 + 2 個麵餅 + 2 扎韭菜   今次整得又係好好味   我覺得炒麵易炒過米粉好多咁呀   不過我就鍾意食米粉多啲   無咁滯 ~

絲瓜魚湯 - 2 大條絲瓜 ($16) + 2 條細紅衫魚 ($10)   大大碗瓜湯超正呀   感覺好健康咁呢 ~ 

呢排實在太太太太太太熱喇   食雪凍咗嘅哈密瓜就最好啦   又甜又多汁   正呀 ~

蘭香園 @ 牛頭角 ( 11-JUN-2010 )

( 11-JUN-2010  FRI )

早餐食 炒米粉 + 燒賣   加埋適量辣椒油勁好味呀 ~ 

10 點幾媽咪打嚟話出得院   當堂開心哂呀   番屋企心情好好多家嘛 ~

晏晝食芝士糙米包   食完有啲驚呀 ~

放工幫家姐拎鞋   再去超市然後上媽咪屋企    諗住等埋里奧大人就一齊出去食   但佢話會好遲收工   我又未餓   所以買嘢食比媽咪先   費事佢行咁多啦   咁媽咪屋企電話無電   個個又打嚟   我又左一袋又一袋   又熱喎   問題係我又未見到媽咪   點知乜情況啫   都話打比媽咪手提啦   又唔打   整到我都煩哂呀   雖然佢哋係關心媽咪   但我都話未見到媽咪   見到打比佢哋咯   佢哋又唔知點解心急到咁 ~

坐到 8 點就走啦   其實里奧大人仲未放工   不過費事媽咪又擔心我哋夜食飯   所以走啦   諗住比個驚喜里奧大人   就係接佢放工   點知呢   佢原來開會   我周圍行咗 40 分鐘   熱到呢   有啲暈咁呀   但我又唔想去餐廳一路坐一路等喎   因為話明接佢放工嘛   等佢開心啲 ~

同里奧大人去牛頭角食嘢   因為我實在太攰太熱喇   呢間茶餐廳都唔錯   仲有波睇添   不過我哋 10 點就食完走喇   開到電視太大聲   最慘係個喇叭喺我哋後面   嘈到頭痛   反正自己屋企有得睇   同埋呢場南非對墨西哥都無乜興趣   快啲番屋企沖涼瞓覺好過呀 ~   

甘味讚岐手打烏冬 @ 官塘 ( 10-JUN-2010 )

七味粉魷魚鬚 - $12/4 條   得嗰少少七味粉
雞軟骨餃子捧 - 個皮脆卜卜   不過好少料囉

鐵板牛柳粒蕃茄湯底烏冬 - 估唔到有十幾粒牛柳咁多   好似食極都有咁   但個湯底唔熱喎   上次食又係咁   但最奇怪的事就係里奧大人碗蕃茄湯底係熱喎
照燒雞扒 - 個皮燒到脆卜卜   超好味呀 
椰汁涼粉冰 - 我無飲呀

( 10-JUN-2010  THU )

呢朝心情好好啦   食早餐都食得開心過人呀 ~

我連續 3 日見到 Partner 都係瞓醒頭   即係有頭髮後面豎起咗咁呀   核突到呢   好心啦   雖則結咗婚生埋仔   但都唔可以唔理儀容家嘛   里奧大人頭髮好硬   起身啲頭髮實會彈出蹳   所以實會沖濕個頭   再整番好去   落一陣街都會咁做   何況係番工呢   大佬   好鬼失禮人囉   上次仲核突   記得嗰日係落雨   佢着對粉藍色大碼膠拖鞋出街食飯   好似着咗佢老公對拖鞋咁   嗰對真係屋企拖鞋   我望完都呆咗啦   仲要得兩隻腳指公搽咗棗紅色甲油   點搞呀   買對涼鞋嘛   真係好鬼肉酸囉 ~

呢日又落毛毛雨呀   本來想出街食   不過都係唔好喇   一陣落大雨仲煩   所以買車仔麵番菇場食算 lu ~

今晚又探媽咪   買埋飯比佢食   見佢好開胃   我都好開心呢   因為之前做完手術之後個心口唔多舒服   條氣又唔多好   但今次好好多呀   做完無咁辛苦   同埋第日已經有胃口   感謝神保守帶領呢 ~

唔好講笑   呢一個多月真係超攰   一星期探媽咪  一星期每月一到   一星期煮飯   一星期又再探媽咪   我覺得真係未停過咁   晚晚一覺瞓天光添喎   但都係唔夠精神囉   擔心一個人真係好攰   同埋擔心到有啲燥   好在我都忍到   無乜點發脾氣   算係咁啦 ~ 

其實我探媽咪好趕囉   因為我驚媽咪餓呀   佢唔鍾意食醫院嘅飯   所以我放工買完再打的   啲時間都係啱啱好咋   可以 6 點開飯   如果坐地鐵又小巴   會遲 15-20 分鐘   我想媽咪可以快啲食飯   又想多啲時間陪媽咪   始終一個人喺醫院真係好悶好驚   自己趕少少就算啦 ~

里奧大人同姐夫成日叫我同家姐隔晚探媽咪   但我哋又唔想喎   可能習慣做乜都一齊   同埋媽咪見到我哋會開心啲同定啲   咁自己辛苦啲都無所謂   媽咪湊到我哋咁大   真係唔想媽咪有事瞓醫院唔晚晚睇佢囉   除非自己真係超唔舒服   唔係都會心掛掛   但話比媽咪聽唔舒服呢   佢又心掛掛番妳喎   上次頭暈無睇佢真係覺得自己好衰咁   個心好唔安樂   所以盡量都會去睇佢呢 ~

同里奧大人 7 點 50 分走   咁就唔駛一堆人喺哂 8 點走   搭 Lift 同坐車無咁多人   如果 8 點走呢   等 Lift 又耐   等車又耐呢   真係唔好睇少呢 10 分鐘呀 ~

諗住去沙爹王   點知超多人等位   即閃啦   再諗住去 APM 嘅赤丸   點知又執埋   最後去甘味讚岐手打烏冬食蕃茄烏冬   里奧大人未食過   等佢可以試下   最感恩係等咗 7 分鐘就有位呢   快過等 Food Court 呀 ~

京都高級宴會廳 @ 大埔 ( 9-JUN-2010 )

蝦 - 送㗎

生蠔 - 今次都幾大隻   食到最後先醒起最想食係生蠔   不過太飽無再叫 lu
黑椒牛肉丸 - 呢個麻麻哋
手打蝦膠 - 好滑   好味呀   今次好大碟   遠睇好似雪糕咁呀
四寶丸 - 無特別
肥牛肉 - 個樣超衰
豬潤 - 好想食   但淥完之後無食   覺得好恐怖

鯇魚腩骨 - 好味過鯇魚片   因為無咁多細骨
牛柏葉 - 我鍾意食㗎   爽爽哋正呀
娃娃菜 / 金菇 / 公仔麵 - 打邊爐一定要有金菇   索煮哂啲湯超好味呀
油麥菜 /生菜 - 一定要有菜啦   又係索哂啲湯好正呀
竹蔗水 - 有生以嚟飲到最甜嘅竹蔗水   可能又唔凍   所以仲更加甜   最後忍唔住飲咗半罐汽水
送片皮鴨 1 片   但就要排隊   每人只可以拎 1 份   我叫里奧大人出去拎   佢幾唔想呀   話叫佢做埋呢啲嘢喎   就係明知核突先叫你攞   唔係咁唔知嘛
片皮鴨 - 但無薄餅喎   不過就咁食都好味喎   可能肚餓啦

( 9-JUN-2010  WED )

呢朝勁想食出前一丁   所謂嘅出前一丁   其實只係比包出前一丁味粉   我覺得口感唔似丁囉   雖然我喺屋企食開唔係日本丁   但都覺得同屋企食開嘅唔同   下次都係唔加 $2 食丁喇 ~

番到菇場無搞作喎   所以成日諗媽咪做咗手術未   點知媽咪 11 點幾打嚟話又比人插隊   又要再等   聽完無哂心機   個人有啲掹好想喊   里奧大人又上咗大陸喎   費事打比佢啦   好在比自己冷靜一下就無事   唔係點喎 ~

晏晝買三餸飯   2 菜 1 肉真係唔錯   最緊要啲飯唔好腍   我依家咁有牙力   軟飯呢啲留番我老咗先食啦 ~

今晚又打的探媽咪   無啦啦塞車喎   幾驚呀   見到個咪錶係咁跳   我心跳都加速埋呀 ~ 

入到病房見到媽咪又係好攰咁   心諗又未做啦   再行近望到啲儀器唔同咗   即問媽咪做咗手術未   原來 1 點 30 分開始做啦   感謝神   手術都好順利   之後姑娘話媽咪試飲一啖水   如果無作嘔就可以食嘢   感恩媽咪無嘢   仲想食提子添 ~ 

之後家姐同姐夫又嚟埋   見到媽咪做完手術就開心啦   唔駛日日心掛掛嘛 ~

媽咪好攰   所以比佢休息   我地 7 點半走 lu ~ 

今晚非常之開心   所以同里奧大人打邊爐   因為我好想食呀   8 點半又平啲   所以更加要去啦   不過唔知點解要叫高級宴會廳囉   又唔見得豪華喎   酒樓就酒樓啦 ~ 

元綠壽司 @ 大埔 ( 8-JUN-2010 )

( 8-JUN-2010  TUE )

今朝超勁口渴呀   一起身已經諗定好要飲凍鴛鴦   雖然係唔解渴   但飲凍嘢真係好爽囉 ~ 

等到 Lunch Time 喇   今日有 Lunch Box   因為尋晚買嘢食比媽咪   但媽咪食唔哂   所以同我 Share   唔浪費之餘   我又慳番飯錢   不過叮飯嘅時候突然間醒起係鹹魚豆腐雞粒飯    鹹魚呀   幾驚一大陣味呀   好在無味喎   唔係比人打鑊金咯 ~

 
今晚打的探媽咪喇又   因為又驚媽咪會一陣做手術   見唔到佢呢   去到醫院媽咪話排緊隊   希望今晚有得做   無耐家姐又嚟埋   想買嘢食比媽咪   所以出去問姑娘做唔做到手術    話媽咪之之前嘅病人已經 Send 咗去手術室   應該無問題   點知我哋走咗 15 分鐘後收到媽咪電話   話有個人難產   所以比佢做先   即係又唔做得住   又要再排期   咁等到人都顛呀   之前有得做又驚   依家咁等咪仲驚 ~

無哂心機呀   同埋開始 Feel 到自己攰到有啲火喇   所以食壽司   我覺得開心啲 ~  

雲桂香米線專門店 @ 大埔 ( 7-JUN-2010 )

( 7-JUN-2010  MON )

又到星期一喇   今朝飲鴛鴦   所以都幾精神   唔錯唔錯 ~


菇場靜英英   靜到耳鳴呀又   真係講都無人信呀 ~ 

晏晝有 Lunch Box   食完抖下   唔想落街   呢排頻頻樸樸好攰 ~ 

放工打的探媽咪喇   因為唔知媽咪會唔會隨時做手術嘛   去到先知原來尋晚已經禁食   同埋朝早 9 點已經換好哂手術衫   點知 7 點幾姑娘話急症室有好多外科手術要做   醫生話今晚應該做唔到   今晚 12 點再禁食   又要等添   咁啱家姐黎到   所以落 Canteen 買嘢食比媽咪呢   等埋媽咪食完就走 lu   遲咗10 分鐘都無人趕   感恩感恩 ~ 

家姐番屋企食飯   我就番大埔同里奧大人食嘢   番到去 9 點半喇   我覺得好夜食飯呀   所以都唔想食太飽   食米線算喇 ~   

燒排骨 + 蔥油餅 + 絲瓜紅衫魚湯 ( 6-JUN-2010 )

( 6-JUN-2010  SUN )

呢朝 9 點幾醒咗喇   不過碌下碌下又 10 點幾   諗住食完早餐番教會   點知個頭好暈同埋耳塞   應該係作感冒   所以走去睇中醫   之後就番屋企休息喇 ~

今次真係無 Mood 做嘢喇   坐喺梳化睇電視   諗住一路睇一路瞓   點知瞓唔到喎   所以沖涼   之後醒哂 lu ~ 

小病是福呢句話真係無錯   點里奧大人做乜就做乜   佢仲自動自覺拻橙比我食   算佢啦 ~

食完 Tea 就租碟再去買餸   今晚唔探媽咪喇   里奧大人又叫我唔好煮   但我話唔駛探媽咪就煮啦   好耐無飲湯咁   反正又唔係難整   好過成日出街食啦 ~

是日懶餐 - 燒排骨 + 蔥油餅 + 絲瓜紅衫魚湯

燒排骨 - 今次用海鮮醬醃   因為又要清埋啲醬料   焗嘢真係好方便   呢期好鍾意呢 ~

蔥油餅 - 想整好耐喇   順便清咁啲麵粉   不過搓完先諗起低粉同食譜嘅麵粉係咪一樣   但唔理啦   都搓咗   最多口感唔一樣啫   煎完嘅時侯   個餅好似塊鐵牌咁   硬到呢   預咗唔食得   但原來又食得喎   下次再整   但就要薄身少少   口感應該會好啲   我覺得算成功咗㗎喇 ~ 

絲瓜紅衫魚湯 - 有瓜有魚有湯   方便簡單又健康 ~ 

食完飯   搞掂哂所有嘢就睇碟 lu ~

上海一品香 @ 官塘 ( 5-JUN-2010 )

( 5-JUN-2010  SAT )

終於到每月一次 Off 呀   真係等到頸都長呢   同里奧大人瞓到 10 點自然醒   今次去另一間食早餐   無咁悶嘛   雖然都係 A 餐 B 餐 ~

番到屋企就好有衝勁熨衫   兩機衫話咁快熨完   之後比自己抖下   本來諗住拖地同抹櫃   但都係留番聽日做   好好享受下呢個難得每月一次嘅 Off ~

抖到 2 點半就食 Tea 喇   因為一陣要去買嘢同探媽咪   唔想咁趕 ~

食完 Tea 就陪里奧大人去買 Iphone   依家真係除咗 Iphone 之外   好似無其他電話咁   入親 Smartone 梗有人買   去到邊梗有一個人用   真係 Hit 爆   不過電話有問題一定要買   如果唔係都唔會買佢呢 ~

買完就出去探媽咪 lu   之後買埋嘢食比媽咪   去到醫院啱啱好開門   感恩感恩 ~

同里奧大人去官塘廣場食上海嘢   真係好耐好耐無幫襯喇   見個招牌仲喺度   應該未執啩   去到好彩仲喺到   仲超級多人   好彩好快有位   仲唔駛塔枱   爽呀 ~ 

新之食 @ 官塘 ( 4-JUN-2010 )

( 4-JUN-2010  FRI )

終於 Happy Friday 喇   諗起假期可以抖下就好開心呢 ~

呢排探媽咪好攰   所以 Lunch 又係焗福麵   包麵今日到期   食埋去就一了百了 ~  

今日唔駛買嘢食比媽咪   咁就搭地鐵轉小巴   平好多嘛   去到以為媽咪做咗手術   因為佢氣促要聞氣   點知原來未做   驚得滯   心跳太快   醫生話危險唔做   又唔係話緊急   所以再排過   我真係好激氣   不過忍住唔話佢   大佬   等咗一晚終於有得做   依家話驚   又唔知要等幾時   醫院又多菌喎   做完拿拿聲出院好過啦   咁下次一入手術室又驚又唔做咩   咁樣等   個傷口自己都可能有機會埋口啦   我真係無咁好氣   只係話我無咁嘅精神晚晚探妳   我真係好攰囉 ~

雖則小手術   但佢一日未做我都會擔心家嘛 ~

今晚里奧大人同姑奶都黎探媽咪   之後一齊食飯   我一早諗咗食刀削麵   因為好想食辣菜甫呢 ~

明新焗飯小廚@ 大埔 ( 3-JUN-2010 )

腰果宮保雞丁 - 睇個樣嚇一跳   無啦啦有脆肉瓜嘅   同埋人哋好似好深色家嘛   佢仲強調話辣   辣鬼咩   片薑就辣喇   下次等我自己整先   應該好味同靚仔過佢呀
蒜蓉通菜炒牛肉 - 牛肉好韌   不過我又鍾意食喎   最怕食腍哂嘅牛肉

( 3-JUN-2010  THU )

次次媽咪一入院我就無哂心機   求其有嘢落口就算喇   又攰喎   都無乜胃口 ~

番到菇場都無乜 Mood   好在細老闆唔喺度   上網都無問題呢 ~

晏晝喺菇場焗福麵   之後買嘢比媽咪   諗住去惠康用 Enjoy 信用卡有 95 折   不過成日諗媽咪幾時做手術   諗到乜都唔記得   居然比咗 Coupon 喎   咁咪無折囉   蝕哂呀 ~

放工打的去探媽咪   都係想早啲到   雖然坐地鐵轉小巴都係相差 15 分鐘   但唔知會唔會我坐一陣媽咪就做手術   所以都係早啲到好過   陪佢等佢無咁驚 ~ 

同家姐正想走嘅時候   咁啱媽咪要去手術室   咁我哋等埋佢轉床入 Lift 就走喇 ~ 

家姐約咗姐夫同朋友喺 APM 食嘢   我就番去同里奧大人食飯 lu ~

一落車接到家姐打嚟   話媽咪打比佢   我心諗麻醉藥咁快過嘅   原來媽咪打比家姐話驚得滯   心跳太快   所以唔做得住喎   家姐就話驚咩喎   都等咗成日啦   妳又話餓喎   做完咪可以食嘢囉   不過家姐話講完都驚媽咪唔開心   但入親去都驚㗎啦   咁唔通下次入唔驚咩   咁咪等如唔駛做   我都想媽咪快啲做手術   唔駛我心掛掛嘛 ~

呢晚唔知做乜   無啦啦勁想食中菜同飯   但今次整得麻麻哋囉   又少個選擇 lu ~  

車仔麵 (外賣) ( 2-JUN-2010 )

( 2-JUN-2010  WED )

呢日 Off   因為陪媽咪去覆診   所以朝早陪埋里奧大人食早餐再上媽咪屋企呢 ~

坐小巴嘅時候   坐隔離單邊位嘅阿叔真係衰到無人有   點解咁講呢   佢無啦啦望一望我    我咪望一望番佢囉   之後見佢睇報紙   原來睇風月版   好心啦   都唔爭在果幾分鐘啦   不知所謂   同里奧大人講呢啲人真係衰   點知佢話佢見過一個仲變態   話說佢有日同同事過馬路   見到有個的士司機   喺等客期間半個身伸咗出車嚟睇本鹹書   里奧大人同同事同另一個過路男人都比佢嚇到目瞪口呆呀   真係乜人都有呀 ~

同媽咪 10 點半出門口覆診   見醫生嘅時候係會睇到媽咪嘅傷口   醫生同護士問我驚唔驚   我話妳咁問係咪好恐怖㗎   佢話有啲人會驚唔睇   所以同妳講聲   唔係一陣妳同媽咪一齊暈咗都唔知救邊過好喎   不過我都立咗一立啦   真係好恐怖呀   手掌咁大嘅 size 無咗塊皮喎   所以醫生都建議植皮手術喇 ~

後尾打埋比家姐同里奧大人   我哋一致都認為植皮好啲   因為醫生話如果要等自己埋傷口    起碼個幾月   仲要日日洗傷口   兩星期覆診一次   同埋驚中途細菌感染   仲有就係傷口嘅皮會拉薄咗   郁嘅時候可能會痛   但做植皮都有風險   就係麻醉藥令到塊皮可能唔會再生   要再做   媽咪多病痛   所以上次做完個心口唔舒服   所以有啲驚   但兩位醫生都不約而同話上次妳都做咗全身麻醉啦   同埋麻醉師會衡量過   如果唔得就肯定唔會做   所以唔駛驚   之後媽咪都決定做啦   洗傷口好痛   要食止痛藥㗎 ~

之後我就陪媽咪上病房   好感恩見到醫生   佢一見到媽咪就話妳做唔做呀   媽咪好驚   醫生話比妳諗一晚啦   最緊要妳意願   之後佢再解釋做手術嘅好處同風險   媽咪最後都決定做手術   始終紮住隻腳都好辛苦   同埋傷口仲痛嘛 ~

我買埋 Lunch 比媽咪   靜靜雞陪埋佢食就走喇   費事比人趕啦   之後去買衫   再食埋麥記就番媽咪屋企休息 lu ~

家姐姐夫一齊探媽咪   之後里奧大人都嚟埋   好在媽咪有胃口食嘢   咁即係佢唔係咁驚囉   凡事要向好嗰邊諗嘛   做完之後可以周圍去玩   幾咁好呢 ~

落雨濕濕費事塞車趕唔到拎中藥   所以 7 點 45 分走喇   無乜胃口   所以買車仔麵番屋企食   食完沖涼   無耐就瞓喇   今日頻頻樸樸都好攰下呀 ~  

鹽酥雞 + 蒜泥油麥菜 + 福麵 ( 1-JUN-2010 )

( 1-JUN-2010  TUE ) 

早餐又係扒芝腿治   因為要食飽啲   晏晝可以唔駛食咁多呀 ~

細老闆 11 點出 Trip   超級開心呀   因為唔駛就住就住上網   感覺好好多㗎 ~  

天氣唔錯   決定 Lunch Time 出去食麵再行陣 ~

里奧大人今日上咗大陸   所以我睇埋中醫仲有充足嘅時間比我預備晚餐呢 ~   

是日晚餐 - 鹽酥雞 + 蒜泥油麥菜 + 福麵

鹽酥雞 - 又係衰心急   如果唔係唔會咁囉   無哂心機呀   好在咁樣都好好食   係唔脆啫   下次再整   一定更好呀 ~

蒜泥油麥菜 - 加蒜泥同煲仔飯豉油   第 1 次咁整咋   又幾好味喎   甜甜哋咁 ~ 

福麵 - 里奧大人話好餓要食一個半喎   仲好啦   就嚟到期   想快快清哂佢呀 ~