住家飯 @ 媽咪屋企 ( 31-MAY-2012 )

蒜蓉蒸蝦

蒸青斑

黑椒牛仔骨

炒通菜

青紅蘿蔔粟米江瑤柱蠔豉瘦肉湯

妃子笑 / 皇帝蕉 / 芒果

( 31-MAY-2012  THU )

之前喺巴士站識到位阿姐   咁佢話養魚無用泵   所以我又學下養魚   不過原來都係有泵好啲   我尋日等車又見到佢   傾開養魚啲嘢   佢話要有水草㗎   咁我話下次去買   佢話比啲我   佢有好多   我話唔駛啦   星期六會出去買   點知今朝佢比咗啲水草我呀   我好開心呀   佢咁有我心 ~

今朝食麵餐   超級飽呀   無啦啦覺得好脹胃咁 ~ 

晏晝食穀麥片 + 麥精   因為早餐食得太勁呀 ~

里奧大人今日唔駛上大陸   不過我都會去媽咪屋企食飯呢 ~

唔知點解   次次一番媽咪屋企   就會覺得特別快肚餓   可能知道有自己鍾意嘅餸菜啦 ~

番到媽咪屋企第一件事多數飲一大碗湯   食埋湯渣已經飽咗 7 成   所以次次都係食兩啖飯   最主要食餸呢 ~

今晚同家姐坐到 8 點半就走人 lu   因為佢次次係都要等埋我上車先走   咁我都唔太夜走喇   有時要等 10 分鐘先有車   但有時又好快有車 ~

咁啱里奧大人又到咗九龍灣   所以陪佢坐啦   難得茶餐廳有卡位坐 ~

金拇指米線 @ 九龍灣 ( 30-MAY-2012 )

我嘅豬潤麻辣米線 (2 辣) - OK 喎   味道比我想像中好   咁第時唔駛特登去譚仔食 lu   不過下次會要 4 辣   都係辣啲過癮啲

里奧大人嘅牛肉 / 豬軟骨酸辣米線 (1 辣) - 我發覺佢自己去完馬來西亞之後   食辣勁咗咁呀   佢話下次會叫 2 辣都應該無問題   以前佢咩都話咗驚辣先架   依家佢有時食得仲辣過我呢   正呀 

炸餃子 - 超想食囉   講咗 4 次   不過里奧大人話驚食唔哂   所以唔敢叫   但佢話知我真係好想食   因為講咗好多次   哈哈   味道就無咩特別   因為我純粹係超想食炸嘢嘅啫

菜心 - 今次好好多喇   因為係熟   上次真係好似無淥過咁

( 30-MAY-2012  WED )

星期三喇   天氣唔錯   心情都好好 ~

無啦啦好想食麥記呀   所以行番轉頭食 ~

菇場靜   所以依家訓練自己打 Keyboard 細聲啲   不過都幾難   好記得舊同事話見工時   好似要睇一分鐘可以打幾多字   佢話入到房聽到啲打字聲好似槍林彈雨咁樣   我覺得佢形容得好搞笑   之後我就開始留意人打 Keyboard   里奧大人又係打得好鬼大聲   仲好大力咁打   不過我發覺自己都打得好大聲   因為菇場實在太靜嘛    同埋如果同CC MSN   簡直忘我境界好投入咁打   都無留意原來打得好大聲咁呢 ~

好快到 Lunch Time 喇   今次都係帶 Lunch Box   不過食完好滯   食飯真係好滯   下次都係多少少飯算喇 ~

飯氣攻心   要飲咖啡添呀 ~

放工即走喇   因為趕住睇中醫   好感恩今次好快睇完   同埋好感恩里奧大人又差唔多喺大陸番到嚟   佢話想食米線   不過驚我唔想食   因為我話呢間酸辣唔好食   但我話會試麻辣米線嘛   估唔到真係有驚喜呢 ~

魚香茄子 ( 29-MAY-2012 )

( 29-MAY-2012  TUE )

又係天陰陰   真係好想瞓耐啲呀 ~

無咩胃口   食奶醬多算喇 ~

好彩都忙忙哋   Hea 多陣就 12 點   可以叮飯   行下無咁悶 ~

依家帶 Lunch Box 喇   無計啦   懶得出去食   同埋好怕食茶餐廳啲餐   太大份喇   同埋我唔想飲杯嘢   我覺得一日一杯已經好足夠   食唔哂又浪費   但格硬食又辛苦   但叮叮又唔可以成日食   炒米粉又驚食到厭   所以都係帶 Lunch Box 算喇 ~

終於放工   感恩菇場附近有新開線嘅小巴線可以番到屋企   同埋又可以到街市門口   咁就最好啦   車費又平過巴士   其實時間就同搭地鐵差唔多   地鐵最平   不過我唔鍾意搭地鐵感覺   行上行落   同埋又要行一段路先到   唔買餸都 OK   買餸就唔好喇   因為我鍾意快買快啲番屋企預備 ~  

里奧大人上咗大陸開會   差唔多 9 點半先番   所以我又食先   之後沖涼再熨兩機衫   超攰呀 ~   

是日懶餐 - 魚香茄子

魚香茄子 - 買 2 條大茄子   啱啱好 $10   又可以搭多條蔥   依家真係唔係度度有得搭蔥   今次醬汁又係自己調   只係用甜醬 + 辣豆辦醬   估唔到里奧大人話好好味   但就甜咗噂   辣番少少仲正喎   不過我話驚佢太夜食   唔想食得太刺激   等下次早啲食嘅時候就可以加埋指天椒   應該更惹味 ~

黑椒雞絲意粉 + 粟米蛋花湯 ( 28-MAY-2012 )

( 28-MAY-2012  MON )

星期一喇   個天灰灰暗暗   又毛毛雨   不過唔緊要啦   最緊要唔好橫風橫雨就得㗎喇 ~

今朝食餐蛋治   懶得用湯匙同叉食嘢呀 ~

菇場都忙咗陣咁啦   之後又等 Lunch Time 喇 ~

本來諗住食穀麥片   不過又好似好餓咁   所以行一陣再買炒米粉番菇場食 ~

放工即走喇   去完超市就番屋企執嘢   開機洗衫   預備晚餐   搞掂哂都已經 7 點半   今晚自己食先   因為想快啲食完再執下嘢   8 點里奧大人打嚟話放工   咁我仲更加要加快步伐   因為我想拖地   如果佢喺度比較煩   因為佢唔會自動自覺行開比我拖地 ~

是日懶餐 - 黑椒雞絲意粉 + 粟米蛋花湯

黑椒雞絲意粉 - 好耐無煮啦   感覺好似煮新餸咁呀 ~

粟米蛋花湯 - 無買菜就係飲粟米湯   同埋我真係好鍾意飲囉 ~

Riso Café @ 九龍灣 ( 27-MAY-2012 )

( 28-MAY-2012  SUN )

今朝 9 點 15 分起身   食完早餐就番主日學之後再崇拜   今次媚媚又嚟咗   好在唔駛一齊食 Lunch   因為實在大把嘢未做呀   食一食又無咗兩個鐘   我情願快快手執好哂嘢好過 ~ 

去完百佳買生果就番屋企陣 Hea 陣就去食 Tea   食完就即番屋熨兩機衫先   之後又執執執   估唔到又執好埋個廚柜   呢下最開心   執呀執   好似執一世都未執完咁   里奧大人又無幫手   掛住睇之前買落嘅書   因為我話你唔睇就即掉   所以佢拿拿聲睇完即掉   所以佢係無幫手執嘢 ~ 

終於執到我有啲火喇   我話放棄唔執喇   就算有人嚟都由得啲嘢周圍放算數喇 ~ 

呢兩日執嘢好攰   又唔多舒服   都係出去食飯好 d   唔夠精神好鬼易病 ~

食完番屋企又執啦   里奧大人知驚主動執喇   不過執佢自己嗰啲   因為我話我次次一執好有空位   佢就會即刻擺嘢   明明唔係擺嗰度都擺   我話我真係無心機執   執完又擺   執完又擺   之後見到仲有件抓毛同厚褸未洗   我發火啦   我話呢啲咁厚衫都唔係依家着啦   佢就話之前着   咁我仲火   依家仲掛喺度   天氣唔好先嚟洗   一世都未乾啦   同埋問題係洗一件厚褸會佔咗半機位家嘛   咁又要將本應洗嘅衫遲啲洗   沒完沒了啦   其實我執嘢洗衫真係完全無問題   但你唔好咁吖嘛   以為執嘢好簡單   雖則我係亂中有序   但大佬呀   我執嘢都要用時間囉 ~

大快活 @ 九龍灣 ( 26-MAY-2012 )

呢個叉燒拉麵係最後食嘅   加麵加黑蒜汁一齊落鍋   焗 10 秒就可以食  

( 26-MAY-2012  SAT )

今朝 7 點 45 分起身   其實可以 8 點先起身嘅   不過會成日發夢無車同埋遲大到   仲瞓得衰   所以都係早啲起身算   反正都已經比平時瞓多 20 分鐘已經好好多啦 ~

早餐食吞拿魚火腿三文治 + 咖啡   嘆下報紙   真係好享受   但其實平時都係咁   但覺得星期六係特別唔同   特別 Relax 咁呢 ~

番工等放工   番到屋企 Hea 陣   等埋家姐一齊去食車仔麵   之後送埋佢搭車   我就番屋企喇 ~

上星期六喺 Ikea 買咗個零食櫃同掛衣架   今日準時 3 點送到   好在叫佢哋安裝   唔係有排搞 ~

擺好位置又出發去中旅社睇資料   之後再陪里奧大人去 Unilqo   佢無啦啦又買咗 3 件 Tee 同太陽眼鏡   咁搞到我又去第度買咗副太陽眼鏡   唔知點解   佢買嘢我又想買咁   之後我買埋個袋就去大快活食嘢喇   因為好想打邊爐   不過里奧大人話唔食   咁大快活囉   各有各食 ~

食完有氣有力啦   執咗兩個幾鐘頭   好似新居入伙咁執   攰到痴呀   頂唔順呀   都係沖涼   留番聽日再執 ~

蜜糖焗雞翼 + 司華力腸 + 出前一丁 ( 25-MAY-2012 )

( 25-MAY-2012  FRI )

Happy Friday 喇   好似眨眼就到星期五咁   唔錯唔錯 ~

菇場靜啦   靜到我都想瞓 ~

晏晝去萬寧買嘢   之後再買冷麵番菇場食   咁就已經 1 點幾 lu ~

今晚煮飯喇   好似好耐無煮咁   里奧大人又上咗大陸   我可以多啲時間預備 ~

抖咗幾日   N 樣嘢未做過呀   所以番到屋企解凍雞翼就即開機洗衫   熨衫再抹嘢   搞掂哂就等埋里奧大人番嚟先開餐   今晚算好啦   9 點幾有得食 ~

是日懶餐 - 蜜糖焗雞翼 + 司華力腸 + 出前一丁

蜜糖焗雞翼 - 超方便又好味   里奧大人問點解唔似出面街食咁樣一絲絲蜜糖喎   我話無心機睇會好易燶   所以我唔會整到咁   食就食   唔好咁煩 ~

司華力腸 - 家姐訂比我㗎   我超鍾意食腸   不過唔可以食咁多呢啲加工嘢 ~ 

出前一丁 - 里奧大人話食麵喎   我話其實煮麵煩過煮飯   不過都會煮嘅   唔好晚晚食就得㗎喇 ~

之前覺得手機上網真係無咩用   因為我番工可以上網嘛   依家覺得手機可以上網係非常之有用   因為想同老友幾時傾計都得   或者就咁 Send 個 Icon 就知我做緊咩   超方便 ~  

住家飯 @ 媽咪屋企 ( 24-MAY-2012 )

韭菜花炒鮮魷

蒸煙鯧魚

白切雞

蒜蓉辣椒豉油 

炒生菜

苦瓜黃豆蠔豉雞腳排骨湯

芒果

( 24-MAY-2012  THU )

個肚赤赤肚添   但都 OK 嘅   唔好抽住抽住痛就得㗎喇 ~

早餐其實唔想食   不過又係驚餓啦   所以叫咗份奶醬多   食得半件咋   留番半件做 Lunch ~

菇場忙啦   無計啦   唔在狀態下我唔會做嘢   好易出錯嘛   今日身體 OK 就要即做啦 ~

Lunch 食埋件奶醬多   其實都唔想食   不過費事浪費嘛 ~

放工去媽咪屋企食飯   都無咩胃口   今晚都係早啲番屋企休息   所以同家姐差唔多 8 點半就一齊走 lu ~

番到屋企見到里奧大人買咖哩牛腩飯番嚟食   食得幾滋味   佢真係食街嘢零舍滋味咁喎 ~

大快活 @ 九龍灣 ( 23-MAY-2012 )

( 23-MAY-2012  WED )

今朝 8 點半先起身   豪啲打的番菇場   因為實在好唔想行路呀 ~

其實仲係無咩胃口   但驚唔食一陣又餓喎   所以早餐食燒賣 + 菜蜜   飲杯熱嘢暖肚最好呢 ~ 

好景不常   個肚有啲痛   但就唔係劇痛   都接受到   不過個人好攰   係咁中係咁中   中到 Lunch Time 再瞓 ~

衰啦   忍唔住飲凍嘢   個肚又抽住痛添 ~

好在有熱水袋   敷住舒服好多   差唔多 4 點半先好 OK   咁開始要做嘢喇   做到放工   時間啱啱好 ~

超餓呀   所以去大快活食 Tea   超勁呀   趕到食 Tea   打比家姐同里奧大人話我食到 Tea   佢哋都話勁呀   咁快可以番到屋企 ~

番到屋企就開機洗衫   本來想拖地   但都係唔好喇   都係沖個熱水涼   抖多晚先 ~

里奧大人 8 點番到屋企   買咗五寶飯   個飯盒好盆滿砵滿好吸引呀   忍唔住又食咗幾啖 ~

蒜頭豆豉蒸排骨 + 菠菜 ( 21-MAY-2012 ) + ( 22-MAY-2012 )

( 21-MAY-2012  MON )

尋日忙足成日   攰到隻積咁   勁想唔番工呀 ~ 

早餐要食飽啲   因為想精神啲 ~

好攰呀   Lunch Time 第一時間瞓覺   瞓到 1 點起身   食完拿破崙又再瞓   瞓到 1 點 40 分   個肚谷住谷住好辛苦   原來真係每月一到   唔怪得咁攰啦 ~

個肚有少少唔舒服   不過都應該有胃口食飯   最緊要係尋晚買咗啲餸   無理由唔煮咁浪費嘛   所以番到屋企即煮   食完就沖個超熱水涼   好舒服呀 ~ 

是日懶餐 - 蒜頭豆豉蒸排骨 + 菠菜

蒜頭豆豉蒸排骨 - 無難度嘅餸   個人唔多想煮同埋唔多舒服   最好就整呢個餸喇 ~  

菠菜 - 之前諗住整金銀蛋菠菜   依家唔駛諗啦   最緊要快呀 ~

里奧大人差唔多 8 點就番到屋企   佢好驚訝我煮到又食到呢   不過我好攰喇   9 點幾就入房瞓 lu ~

( 22-MAY-2012  TUE )

個肚都痛痛哋   不過又無之前咁痛   但瞓得勁差啦   所以請病假 ~

Book 咗10 點 15 分睇醫生   但 10 點 45 分先有得睇   睇完又番屋企沖個熱水涼就瞓 lu ~

本來里奧大人今朝都想請假陪我   不過無帶電腦火牛   所以都要番工   之後 1 點幾打嚟問我食咩   原來佢請假番嚟陪我   買嘢比我食   不過我都無胃口食嘢啦   一路瞓到 4 點幾就醒 lu   好感恩個肚都 OK 啦 ~  

今日好涼呀   唔駛開冷氣都好舒服   呢日天氣真係超級正 ~ 

我都係無胃口食嘢   所以里奧大人買車仔麵番屋企食   我又係瞓下睇下電視咁呢 ~

大快活 @ 九龍灣 ( 20-MAY-2012 )

( 20-MAY-2012  SUN )

今朝起身見到缸魚啲水好濁   有條魚仔仲升咗仙添   好驚呀   所以決定食完早餐   番完主日學就即飛出旺角買過濾器喇 ~

我哋格價先買嘛   間嘢啲人又係無禮貌   問佢點用   佢好惡咁話 "咩呀 ?!   就係咁咁咁咁用囉"   之後我哋放低即走   都黐鬼線   幾平都唔會幫襯佢呀   之後去到另一間   招呼幾好呀   主動問妳要啲咩   又教我哋用   所以喺佢度買咗過濾器   硝化細菌水同網   之後再周圍行下   又買咗啲石春同水種植物就番屋企喇 ~

前晚發現不織布衣柜爛咗條通   所以又要去買個新嘅   里奧大人就番屋企先   我就去超市買餸   好鬼忙呀 ~

里奧大人番到屋企好細心整缸魚   之後再去買泵   我就整其他嘢啦   咁佢整完就要幫手整個衣柜   依家啲嘢真係差哂   個柜整完入房   擺好番哂啲衫   以為了咗一件心事   點知我坐喺床尾同家姐傾電話   聽到後面勒勒勒聲   一望原來成個櫃塌落嚟呀   嚇到我叫啦   里奧大人反而唔驚我叫   話我日日亂叫喎   反而家姐就驚喇   因為唔知發生咩事嘛 ~

唔理喇   食完 Tea 先   要比自己冷靜一下呀   食完就等家姐車我哋去舖頭   之後就各自番屋企喇 ~

要收拾殘局喇   之後即打去退貨呀   好感恩有得退呢   順便睇埋衣櫃   不過唔啱心水 ~

番到屋企望一望鐘   原來已經 6 點半啦   我話煮飯喇   但里奧大人想去 Ikea 睇柜   所以叫我唔好煮   快快食完去 Ikea 呢 ~

又去大快活食算喇   最緊要夠快   食完再搭小巴去 Mega Box ~

好感恩買到個掛衣架同埋一個柜   為咗缸魚而買一個柜   妹仔大過主人婆 ~

買哂要買嘅嘢   個人都安樂哂啦   里奧大人又去睇 Backpack   又買到個合心水喎   我又買到泳衣   仲要原來今日係感謝日有 95 折   好開心呀 ~

今次坐小巴番屋企   番到屋企即執嘢啦   之後沖涼   食埋榴槤就熨衫   又 11 點幾瞓 ~

板長壽司 @ 九龍灣 ( 19-MAY-2012 )

( 19-MAY-2012  SAT )

超級開心呀   終於 Off   我最鍾意就係同里奧大人一齊起身   一齊食早餐 ~

9 點半起咗身   梳洗之後要同里奧大人去郵局寄嘢   之後食早餐   再去銀行整嘢   搞掂哂已經 12 點幾 lu   話咁快就無咗半日 ~

番到屋企沖涼就 Hea 陣   里奧大人諗住同我行 Mega Box 之後再去尖沙咀 BLT 食漢堡包   不過我其實唔係話好鍾意食 BLT   所以我話唔去尖沙咀   之後我話有啲魚係唔駛氧氣   可以買𠼦嚟   所以就出閏角金魚街睇魚喇 ~

出到去到 2 點幾   去埋雲桂香食米線就再去金魚街 ~

金魚街有一個特點   就係好多間都好無禮貌   超討厭   好感恩我哋買魚嗰間嘅阿姐好好人   教埋我哋點養   我買咗紅米奇   貪佢地夠細條嘛   初初養唔會買咁大嘅魚   依家算係試養性質咋 ~

買完金魚再去買椰撻同拿破崙   再拎埋龜苓膏就搭小巴番屋企 lu   時間過得好快   已經 5 點   問里奧大人食唔食壽司   估唔到佢話尋晚已經想食   咁好啦   順便叫埋家姐嚟食   估唔到佢又買咗金枕頭比我呢 ~   

今朝洗手間抽氣扇燒咗   所以叫里奧大人快啲搵師傅嚟整抽氣扇   我唔陪佢啦   因為好鬼熱呀   又攰 ~

我就差唔多 6 點半就去板長   人齊再一齊點嘢食   終於儲齊積分可以做會員喇   家姐最開心   之後佢上嚟睇下魚仔   坐多陣就揸車走 lu ~   

叉燒炒麵 + 炒菜心 ( 18-MAY-2012 )

( 18-MAY-2012  FRI )

每逢第 3 個星期五就最超級振奮   因為聽日 Off ~  

好餓呀   又要食麵餐 ~

菇場靜到呢   食完藥又眼瞓添 ~

Lunch 食谷麥片 + 維他奶   今次醒喇   咬一啖飲一啖   我真係好怕食浸到好腍嘅嘢囉 ~

眼 Dup Dup 呀   好想快啲番屋企瞓呀 ~

放工去超市買 2 Pack 菜   依家 $12 呀   之前仲係 $10   加咗 $2 我就未必會喺度買喇   之後再去太興買叉燒就番屋企 lu ~

是日懶餐 - 叉燒炒麵 + 炒菜心

叉燒炒麵 - 呢兩次打麵都加印尼甜豉油   應該 6 月底到期前會用得哂   咁樣炒麵都幾好味㗎   啲麵甜甜哋 ~

炒菜心 - 炒開有條路   順便炒埋菜啦   最鍾意將啲菜倒入鑊   "Bi Li Ba La "聲好似好有鑊氣咁   同埋覺得好似煮到好勁咁呀 ~

好開心里奧大人 9 點番到屋企   我同佢一齊食啦   反正聽日 Off   夜啲食無所謂   最多夜啲瞓 ~ 

住家飯 @ 媽咪屋企 ( 17-MAY-2012 )

白灼蝦 

黑椒牛仔骨

蒸馬友

炒菜心

當參紅棗瘦肉生魚湯

芒果 / 橙

( 17-MAY-2012  THU )

尋晚瞓到半夜   喉嚨勁痛呀   諗住唔番工   不過 8 點醒咗又覺得喺屋企都應該唔會瞓覺嗰隻   所以食完早餐就去睇醫生喇 ~

好感恩我等咗 4 個就到我呢   一入醫生房   醫生用好奇怪嘅眼光望咗我好耐   之後又問我每月一到幾號   我答完佢之後   佢話我面青青   塊臉好青   我估佢以為我每月一到失血過多   哈哈   今次又係淋巴腫咗   次次都係咁嘅 ~ 

睇完醫生番菇場 lu   好在無嘢做   因為食完藥   無耐覺得好眼瞓   可能有咳藥水啦   但又無寫明此藥可使人昏昏欲睡噃 ~ 

買定麵包做 Lunch   懶得行呀 ~   

好鬼眼瞓呀真係   今晚去媽咪屋企食飯   咁都好   唔駛煮有啖住家飯食下 ~

同家姐 8 點半一齊走啦   咁啱里奧大人又放工走人   叫佢食埋嘢先番嚟香港   唔係又 10 點食   真係餓壞呢 ~

蜜糖焗雞翼 + 蓮子陳皮紅豆沙 ( 16-MAY-2012 )

( 16-MAY-2012  WED )

喉嚨仲痛添   所以食熱嘢都好辛苦下 ~

好攰呀   無咩心機   好在無嘢做 ~

又有 Lunch Box 喇   依家盡量都帶番 Lunch Box   里奧大人唔比我再食叮叮嘢呀   我又唔想出街食   唯有帶 Lunch Box 最方便啦 ~

無啦啦又作發燒   諗住夜晚睇醫生   點知星期三下午休息   咁好啦   番屋企休息算喇 ~

煲滾紅豆沙就開機洗衫   今晚真係咩都唔做喇   好鬼攰 ~

里奧大人打嚟話夜晚千其唔好煮飯同煮麵   因為晏晝盒星洲米食唔哂喎   又要我炒番熱   即係唔可以沖涼啦   佢 8 點半番到嚟   好開心又可以一齊晚飯喇 ~

是日懶餐 - 蜜糖焗雞翼 + 蓮子陳皮紅豆沙

蜜糖焗雞翼 - 超勁方便又好味道   真係可以食唔停口 ~

蓮子陳皮紅豆沙 - 又係好味道   間唔中食糖水真係唔錯   好似好潤咁   我自己覺得 ~

蕃茄蜆肉腸仔意粉 ( 15-MAY-2012 )

( 15-MAY-2012  TUE )

尋晚半夜焗醒添   之後鼻哥窿塞哂   起身又喉嚨痛 ~

好餓呀   今朝要食麵餐 ~ 

菇場又忙啦   所以覺得好快 Lunch Time   不過未餓   所以 1 點先食   今次食谷麥片 + 麥精維他奶   掛住同同事傾偈   之後變咗麥皮咁款 ~

好似作燒咁   好在個人無發冷   本來想睇中醫都唔睇喇   番屋企休息算數 ~ 

放工買車厘茄   $12 磅都照買啦   好想整呀 ~

是日懶餐 - 蕃茄蜆肉腸仔意粉

蕃茄蜆肉腸仔意粉 - 今次煮少咗意粉   所以覺得太多料喇   同埋今次要加埋大半樽蕃茄醬先夠汁   控制份量呢家嘢真係成日比佢考起 ~

好感恩今晚里奧大人 7 點幾放工   因為佢知道我唔舒服嘛   仲以為我唔煮飯添   不過我又唔太攰   煮到就煮啦 ~  

之後佢又 Relax 啦   佢之前錄咗 "三國"   我叫佢睇啦   難得你唔駛做公司嘢   但佢次次都會講係咪真㗎 ?!   咁我唔客氣喇   咁我真係無咩所謂   當學下國語之嘛   最緊要佢鍾意就得啦 ~

馬拉盞叉燒炒飯 + 節瓜紅衫魚湯 ( 14-MAY-2012 )

( 14-MAY-2012  MON )

星期一喇   又新開始   今朝食吞拿魚火腿三文治   好味呀 ~

菇場忙到呢   鬼咩   星期六唔願做嘛   不過都好丫   眨下眼又 Lunch 喇   今日出去食手打牛丸米粉   又係好味呀 ~

菇場繼續忙   之後又濕濕碎碎有嘢做   咁樣個人反而唔攰   仲精神添   唔錯唔錯 ~

今晚諗住買燒腩肉炒飯   不過太興最少買 $50   咁貴唔制   我用嚟調味咋   所以最後都買叉燒喇 ~

番到屋企超強勁呀   搞掂哂啲餸就拖地   開機洗衫   抹櫃抹書房   之後 7 點半諗住開鑊炒飯   估唔到里奧大人打嚟話放工   咁我等埋佢差唔多番到屋企先炒呢   好感恩呀   咁早放工   好耐無試過平日一齊食晚餐 lu ~

是日懶餐 - 馬拉盞叉燒炒飯 + 節瓜紅衫魚湯

馬拉盞叉燒炒飯 - 尋晚食剩一盒半飯   用嚟炒飯最好啦   唔好浪費   今次用馬來西亞買嘅馬拉盞醬料嚟炒   見咁淺色就聞下香唔香   一大力索   原來都好濃味   搞到我即刻打噴嚏添 ~

節瓜紅衫魚湯 - 好似 N 年無滾魚湯   都差啲唔記得點滾喇   諗咗好耐先諗到應該唔駛落鹹蛋   如果節瓜肉片先要落鹹蛋呢 ~

洗完碗就熨衫   之後沖涼   再次估唔到里奧大人無帶電腦番嚟覆 Email   只係帶文件番嚟睇   睇完就話想 Relax   即係食薯片飲啤酒   難得佢咁 Relax   我都好開心呢   陪佢食啦   哈哈 ~

日月星 (外賣) ( 13-MAY-2012 )

菠蘿咕嚕肉

椒鹽炸鮮魷 / 沙爹金菇肥牛 / 蒜蓉炒菜心

( 13-MAY-2012  SUN )

里奧大人尋晚瞓覺前都講話呢排好攰   可能番唔到教會   如果唔係我肚餓   11 點叫醒佢   佢應該起碼瞓到 12 點幾呀下   不過都唔可以瞓咁晏啦   媽咪同家姐一陣上嚟打牌嘛 ~  

快速梳洗就去大家樂食早餐   食下傾下   佢話佢廠啲女同事好嗲   有次佢隔離個男同事用Speaker 同廠嘅女同事講公事   但個女同事嗲度呢  個男同事叫 Eric   個女同事就會 "Eric 哥" 個哥字拉長講起碼 2 秒   Eric 又好輕挑咁應佢   里奧大人話聽到無管動   我覺得係姣婆遇着脂粉客咁囉 ~

食完里奧大人就去買 Iphone Card   我就去惠康掃貨   見到個麻甩佬揀香蕉   每梳拻最靚嗰 2 隻   呢啲人自私衰格到無朋友   企喺佢隔離個女人都望一望佢  我覺得呢啲多數發生喺啲阿婆身上   估唔到發生喺男人身上   有個女仔都見到   好鄙視佢呀   我今次買下買下又好多嘢   之後都係叫里奧大人幫手拎   因為真係好鬼重呀 ~  

番到屋企即沖涼   抖陣都已經 12 點 45 分喇   媽咪上嚟先   之後家姐又上埋嚟   即開枱啦 ~  

其實今日我好開心呀   因為係里奧大人主動提出同媽咪家姐打牌慶祝母親節   仲比咗利是比媽咪   本來佢星期四約朋友今日探 BB   不過我話晏晝同媽咪飲茶慶祝母親節   但媽咪居然話人多唔飲   我都諗住去探 BB 啦   但里奧大人就話約媽咪嚟屋企打牌慶祝   我就更係完全無問題啦   我最開心就係見到屋企人嘛 ~

差唔多 3 點就食 Tea   食完又打 ~  

吉列豬扒 / 薯條 / 沙爹牛肉包 / 干炒三絲意粉

打到 7 點就叫外賣   8 點有得食   好快喎   但點解我上次叫一個炒米要半個鐘嘅   唔通今晚母親節   所有人都出街食唔叫外賣 ~

 
食完都 9 點喇   我同家姐送埋媽咪搭車就去超市買嘢喇   家姐見到我買咗沙甸魚都幾平   所以佢又買   有 95 折嘛   不過家姐一入超市第一句就話如果我哋一齊住就好唔掂   咁買法真係有錢買都無地方擺呀 ~

海港酒家 @ 將軍澳中心 ( 12-MAY-2012 )

野菌千層酥皮

蒜蓉粉絲蒸紐西蘭大聖子 / 燒雞 (半隻) / 福綠扒鮑螺片 / 四川口水雞 / 馬拉盞蝦乾油麥菜 / 金菇瑤柱扒時蔬 / 別不同果醋骨 / 芒果糯米糍 / 西瓜

( 12-MAY-2012  SAT )

今朝去超市 Shopping   之後去 KFC 食早餐   如果里奧大人可以陪我食早餐就好啦   不過我都係比佢瞓嘅   難得可以瞓咁晏嘛 ~

落雨真係好煩   特別係企喺巴士站度等車   因為好驚啲水濺埋嚟呀   所以我多數有車先埋去排隊 ~

番到菇場居然無停手   應該係叫多嘢做添呀   不過我唔做住   Holiday Mood 呀 ~

放工約里奧大人去馬莎買裇衫西褲   啲料好舒服㗎   最緊要 Easy Iron   因為我好憎熨西褲   成日會熨咗孖骨   超肉酸呢 ~

買完又去 Ppiago Food Court 食嘢   我超級鍾意去 Food Court 㗎   因為好多選擇   好有旅行 Feel   我真係次次去 Food Court 都好開心   不過 Piago Food Court 就無咩選擇囉 ~

里奧大人就番屋企先   我就去買餸   點知番到屋企無耐   收到水姑電話   叫我咃一齊去海港食飯   因為其他姑奶都一齊去   其實我真係唔想去   買好哂餸又好鬼攰   不過里奧大人話去就去啦 ~  

買咗盒叉燒又唔想留到星期一晚先食   所以即打比家姐   好彩佢肯要咋   太興呀   好味先比佢食呢   之後佢坐咗陣就走喇 ~ 

我睇睇下電視瞓咗   里奧大人唔知   問我點出門口未   比佢嚇醒呀   所以 7 點先出門口 ~  

差唔多 8 點就開始食   啲餸嚟得幾咁快呀   一次過 8 碟嚟哂呀   好在用里奧大人 Iphone 影   完全無對焦添㗎   求其影咋   平時邊會咁快上菜   今晚梗想做多轉啦   母親節呀   啲人好似湧哂出嚟食飯咁   恐怖 ~

晴晴好乖呀   每個女人都有盒呢   哈哈 

食完再去水姑屋企坐下   傾下侒   10 點半走喇   好攰呀   番到屋企整呢樣嗰樣   都成 12 點幾先瞓呀 ~

住家飯 @ 媽咪屋企 ( 11-MAY-2012 )

茄汁煎立魚

勝瓜鮮魷

苦瓜燜排骨


蓮藕豬肚蠔豉湯

蜜汁櫻花蝦

士多啤梨蛋糕 @ Panash

( 11-MAY-2012  FRI )

Happy Friday 喇   超開心   所以食麵餐   爆肚感覺真係唔錯   好滿足 ~

菇場有啲嘢做   所以啲時間過得都幾快 ~

好快 Lunch Time   今次食埋最後一個日清叮意   又係超開心   因為唔會再買呢個牌字嘅叮意 ~

忙下又到放工喇   今晚里奧大人本來要聽講座   後尾太忙唔去聽   但我應承咗媽咪番屋企食飯   所以我都照去   反正次次我食完番到屋企   佢都係啱啱放工 ~

星期日就係母親節   我唔會正日食飯   搶錢嘅   又多人   我地多數之後先食   不過咁   我放工都去咗 Panash 買個蛋糕仔作為母親節禮物   個個都有得食最好啦 ~  

家姐訂咗日本嘢食   咁啱我今晚又番媽咪屋企   咁我可以自己拎走   家姐又笑口噬噬講   次次啲同事見佢急急腳走就話今晚係咪 "貴賓" 嚟食飯   做咩尋晚番完今晚又番   不過有啲又會跟家姐咁叫我   都幾得意   好似識得咁 ~  

今晚同家姐坐到 9 點先走   我番到屋企即開機   沖埋涼   里奧大人就番喇   又買 KFC   食得好滋味呀下   食完就 Share 食家姐買比我嘅紅豆芝士餅   好新鮮㗎   家姐話上年買 $10   之後無開好耐   依家開番已經加到 $15   佢啲同事搶住買添呀   誇張到呢 ~

住家飯 @ 媽咪屋企 ( 10-MAY-2012 )

黑椒牛仔骨

白切雞

蒸立魚

炒通菜

炒紅蘿蔔絲

蓮藕豬肚蠔豉湯

山竹 / 蘆菇 / 龍眼

( 10-MAY-2012  THU )

星期四 lu   都係嗰句   星期尾就最開心 ~  

今朝好感恩   因為去到巴士站啱啱有車   所以 8 點 10 分就到菇場附近 lu   早餐食奶醬多   唔知點解   呢排食完每餐個胃都唔舒服   好驚食嘢   但唔食又無可能   食完差唔多 8 點 40 分   8 卦就打黎話黎食早餐   佢食得超快   所以唔駛驚遲到 ~

做完又停   停完又做   咁樣都唔錯   望下個鐘都 Lunch Time lu  ~

今日有 Lunch Box   係食番前晚嘅蕃茄意   真係唔識預份量   不過咁   預多好過預少嘅 ~

里奧大人上大陸   我又番媽咪屋企食飯 lu   坐到 8 點半就走喇   因為阿信屋會員買滿 $300 有 75 折   要去阿信屋掃貨   同家姐一齊都好開心   因為佢咩都笑咗先   其實有時啲嘢真係唔好笑   不過佢笑得好衰   所以先覺得好好笑   好似今晚走嘅時候   無啦啦落好大雨   我話好大粒   佢無啦啦已經笑   我以為係因為我拖住佢行去避雨   點知原來係無瓦遮頭   之後我又話啲雨好大粒好密   佢又喺度笑   我終於忍唔住問佢笑咩   佢話我用 "大粒" 形容啲雨好搞笑   哈哈 ~

買完都差唔多 9 點幾喇   一齊搭車走人 ~ 

今晚好嘆   因為啲衫未乾所以唔駛熨   沖完涼就睇電視   里奧大人就差唔多 10 點先番到   陪佢睇下電視又 12 點先瞓 ~

梅菜蒸鯇魚 + Sambal Belacan 炒通菜 + 徑步 ( 9-MAY-2012 )

( 9-MAY-2012  WED )

無啦啦個胃隱隱作痛添   好在沖過涼都精神啲   唔係又痛又攰都幾慘 ~

食早餐嘅地方   次次都覺得好似無開冷氣咁   之前涼涼地無咩所謂   但依家就唔得啦   好在後尾有客人問有無開冷氣   佢地先開多一部   其實咁熱   加上又 Open Kitchen   仲唔開行冷氣   簡直係趕客囉   食完身水身汗   應該唔會有客人鍾意咁囉 ~ 

菇場忙忙地   忙完之後就覺得菇場非常之靜   好似打坐嘅地方咁 ~ 

終於 Lunch Time 喇   Lunch Box 又重生喇 ~ 

又係忙咗陣就等放工啦   今晚放工去 H & M 買褲   之後再去街市買餸   番到屋企即刻浸菜   搞掂哂就去徑步喇   今晚其實有啲攰   所以行咗 3 個圈就番屋企喇  ~

是日懶餐 - 梅菜蒸鯇魚 + Sambal Belacan 炒通菜

梅菜蒸鯇魚 - $15 夠哂兩個人食   咁都幾抵 ~

Sambal Belacan 炒通菜 - $5 份咋   又係夠哂兩個人食   今次又用 Sambal Belacan 炒   終於有味道啦   正呀 ~

好開心今餐只係用咗 $20 買餸   健康又飽肚   如果晚晚都係用 $20 買到餸就好啦   依家咩都貴哂   比我感覺係搶錢囉 ~

食飽又熨衫啦   熨完有啲虛脫 ~ 

里奧大人差唔多 10 點先番到屋企   所以我話煮蝦子麵佢食   點知又話要食出前一丁   口口聲聲話咩麵都鍾意食   但好多時都唔想食蝦子麵喎   知佢唔鍾意清淡嘢   所以淥通菜時候   又整多件腐乳比佢點   唔係就話好飽喇   食唔哂啲菜   不過今晚佢只係食剩 4-5 條菜   所以我幫手食埋啦   不過唔知點解   食完個胃痛喎   所以鬧佢   令到我胃痛   人家明明好好哋家嘛 ~

蕃茄海鮮扁意粉 + 蒜蓉豬仔包 ( 8-MAY-2012 )

( 8-MAY-2012  TUE )

唔知會唔會有一日   每日番工心嘅情同星期五番工嘅心情一樣咁振奮呢 ~

早餐食奶醬多   甜甜哋嘛 ~

菇場忙喎   所以唔覺眼瞓   又覺得好快 Lunch Time 添呢   今日食 7-11 叮叮星洲炒米   乾到呢   超級難食   咁啱另一個同事食波仔星洲炒米   8 卦話成個 Pantry 都係星洲炒米味喎   食完個口好苦   好在我有里奧大人食剩嘅蛋糕   當飯後甜品 ~  

又忙忙哋喎   總知隻手無停過咁啦   所以好似好快放工咁喇 ~

今晚放工坐熱九   Send SMS 比家姐話坐熱狗   又平 5 毫   點知家姐睇完電視話我知   熱九聽日退役喇   咁我咪好好彩囉 ~

去完超市買嘢就番屋企   拎哂材料解凍就即拖地   唔知點解今晚好想拖地   拖完就煮晚餐喇 ~ 

是日懶餐 - 蕃茄海鮮扁意粉 + 蒜蓉豬仔包

蕃茄海鮮扁意粉 - 清埋半包扁意粉   再清埋冰格半包嘅青口同蝦   之前喺菇場附近有間生果檔賣百合茄好甜   不過無得賣   所以買罐罐頭蕃茄嚟煮   一罐都要 $17.8   之得買磅半車厘茄好過   都係 $18   我仲加多半樽蕃茄醬架   不過我都係鍾意新鮮茄多啲 ~  

蒜蓉豬仔包 - 星期六買咗個大豬仔包   不過無時間焗嚟食   所以今晚一定要清埋佢   不過蒜蓉豬麻麻哋   個包唔得乾呀   定係因為太耐唔新鮮呢 ~

里奧大人差唔多 9 點番到屋企   佢覺得我煮咗晚餐好奇怪咁   我係唔得閒同埋好攰好攰好攰先唔煮啫   唔係嘅話   我可以晚晚煮嘅   問佢好唔好味   佢話無咩味   咁又係嘅   我都無咩點過調味   又無新鮮茄不過就鍾意食扁意粉   真係吖   記得第一次煮話唔鍾意食   但呢兩次又話鍾意食   想點呀 ~