住家飯 @ 媽咪屋企 ( 30-NOV-2012 )

蒜蓉蝦 - 媽咪用咗 4 個蒜頭黎蒸   超勁多呀 ^^


果皮蒸泥鯭

冬菇栗子燜雞

炒菠菜

蓮藕蠔豉鴨腎豬骨湯

( 30-NOV-2012  FRI )

又到 Happy Friday 喇   超開心   不過啲天氣就好唔得喇   回南天咁   好似好攰 ~

今朝坐埋最後一次小巴喇   有啲失落   因為好難得遇到一個咁好人嘅司機叔叔呢 ~

早餐食餐蛋治   飽到呢 ~

菇場靜呀   真係要靜呀   勁唔想做嘢囉 ~

晏晝食麥皮沖好立克   懶得出去食嘢 ~

又咳又流鼻水   不過唔睇醫生住喇   聽日盡情瞓先   最搞笑 8 卦經過我位   M 我問我咩事   可唔可以講出嚟   我唔知佢講咩   仲以為佢 M 錯我   原來佢以為我喊呀   其實係我啱啱打完噴嚏   所以眼濕濕同埋鼻紅紅囉 ~

里奧大人又上大陸   我就去媽咪屋企食飯喇   其實我感冒唔想同媽咪講   唔係佢又好擔心   不過見佢話整蒜蓉蝦   所以我話我感冒   想要食多啲生蒜   之後講完比佢聽唔夠 1 分鐘   媽咪又打嚟叫我睇醫生   之後番到屋企又叫我睇醫生   但我唔想食西藥   情願盡情瞓好過   感冒唔需要睇醫生   最緊要係瞓呢 ~

同家姐 8 點 45 分一齊走喇   我番到屋企即開機洗衫再拖地   其實潮濕天氣唔想拖地   地板好煩   好似好耐都唔乾咁呢 ~

里奧大人 10 點幾先放工   番到嚟 12 點   不過我唔瞓住   想陪下佢呀   大佬   真係幾日無見佢咁呀 ~

雲南小鍋米線 @ 荃灣 ( 29-NOV-2012 )

豬腩肉蘿蔔小鍋米線 ( 小辣 ) $28 - 腩肉好入味   初初睇個湯底顏色以為無味   點知越食越辣   同埋都唔小配料   我覺得好味過雲桂香同星林居添呀

( 29-NOV-2012  THU )

今朝唔係好凍咁噃   但勁有回南天 Feel 囉   加埋毛毛雨   勁唔鍾意呀 ~

早餐食扒芝腿治   實在太好味喇   呢排都勁鍾意食呢 ~

菇場今日靜呀   仲好   唔舒服唔想做嘢 ~ 

8 卦今朝喺深圳聽嘢   咁我正想出去 Lunch 佢就打嚟   同佢一齊出去食粉   之後我去買念慈菴   佢就番菇場先 ~

次次一番到菇場又係咁打乞痴同流鼻水   但出街同喺屋企又無事架喎   可能坐正風口位啦 ~

里奧大人上咗大陸又會夜番   所以我搵表妹剪髮   放工坐小巴去荃灣   去到唔知邊度要轉車   我問司機係咪要轉車   佢居然話 "咪話要轉車囉"   都黐線嘅   咁我問佢架車係咪去荃灣佢話係   我以為直去嘛   之後我話點知啫   黐線   真係忍唔住呀   之後上車坐低   我係 Last 4   無耐聽見司機話個個坐低唔比錢   開唔到車呀   好在我一早拎定錢   所以即彈起身比   但又無寫明話上車比錢喎   又係黐線   上次同里奧大人坐小巴番屋企   好多人一上車比錢   司機話落車先比   里奧大人好奇怪點解啲人會比錢先   我即刻同佢講有啲小巴真係要比錢先㗎   如果唔係唔開車   因為我試過話落車比   佢話唔得呀   嗰時我三袋嘢喺手   幾咁狼狽呀 ~

去到千色店都係 6 點   真係好快   所以就算佢哋態度衰都會坐囉   因為坐地鐵真係好耐   同埋我超唔鍾意坐地鐵   感覺好趕好趕咁   但人地明明係唔趕家嘛   行慢啲都唔得咁 ~

等咗一陣就到我啦   同表妹傾開啲推銷電話   最憎啲人一聽到話唔要就 "Cup" 線   佢話佢個客好驚聽到呢啲電話   我話驚咩喎   唔聽咪得囉   佢話佢個客上次話唔要喇唔該   對方叫佢去死啦   我我笑爆咀呀   駛唔駛呀   不過如果發生喺我身上   我嗰刻真係會激到顛咗   就係呢啲咁嘅人   搞到人哋見到陌生電話就唔聽囉 ~

6 點 45 分剪完   又未餓   周圍行下   去完正隆行買完嘢都差唔多 7 點 45 分喇   去小巴站附近搵食   去到兆和街   覺得開始遠喇   所以唔敢再行   一陣認唔到路出去就慘   見到有間食米線就入去食啦   估唔到好味道呀   再去隔離買杞子桂花糕同椰汁紅豆糕就走人喇 ~

食到好飽   又周圍行下   比我見到 Boutique 有長 Tee   又比我買咗 10 件衫同褲   爽呀   最鍾意一個地方買哂我要嘅嘢 ~

8 點半走人   滿載而歸番屋企喇   打比里奧大人   居然話要開會   8 點半都應該走人啦   喺大陸喎   仲要開會   真係人都顛 ~

番到屋企即沖涼呀   之後就灘喺梳化等里奧大人番嚟喇   差唔多 11 點先番到屋企   第一時間叫佢食桂花糕   佢話好好食呀   不過我無試呀   差唔多 12 點先瞓   好在依家天氣凍凍哋   都易啲入睡咁囉 ~

$10/3 件 (我買咗 4 件杞子桂花糕 / 2 件紅豆椰汁糕)
鹽焗夏威夷果仁 ($130) / 黑椒豬肉條 ($58) / 開心果 ($23) / 紫菜豬肉鬆 ($20)

雜丸極辛豬骨出前一丁 ( 28-NOV-2012 )

( 28-NOV-2012  TUE )

又落毛毛雨   已經落咗一星期雨   下星期繼續落   唔好喇啩 ~  

以前非常之唔鍾意抽濕機   覺得其實無咩用   開冷氣仲好   依家唔同講法喇   無抽濕機唔掂呀   如果唔開   一機衫真係成星期都唔乾   最慘有裇衫西褲   同埋有啲衫係唔焗得   一焗就縮水仲得了   所以依家一出門就開抽濕機   夜晚番到屋企成機衫都乾哂   可以繼續洗 ~

早餐食菠蘿包餐   之後 8 卦又嚟埋   佢食茄牛治   真係一分鐘可以食哂   超勁 ~ 

今朝開始飲中藥   好在係藥粉   咁唔駛特登朝早煲熱   但又要食完早餐之後一個鐘飲   實凍哂啦   仲難飲 ~

尋朝特登飲杯薑茶暖身   放工覺得喉嚨有啲唔舒服   點知依家發哂出嚟啦   好日唔飲   一飲就唔舒服   食榴槤都燥啦   但又無問題喎 ~

菇場超凍呀   本來想食麥皮架   不過都係出去行下好啲   食完去買嘢   真係無事出街少破財呢 ~

放工即走喇   番到屋企附近都係 5 點 45 分   想唔煮   但咁早又食唔落   上番屋企又唔願再落街   所以屋企煮麵食算喇   反正里奧大人今日上大陸又會夜番   我自己食先   之後熨衫同抹櫃   本來想拖地   但真係唔想再做喇   好攰 ~ 

是日懶餐 - 雜丸極辛豬骨出前一丁

雜丸極辛豬骨出前一丁 - 好在記得之前剩咗啲丸   終於清哂 ~  

食完就休息喇   睇下電視   玩下 Ipad   里奧大人 10 點 45 分先番到屋企   陪下佢睇電視   差唔多 11 點半就瞓呢 ~ 

金姆指米線 @ 九龍灣 ( 27-NOV-2012 )

泰式豬頸肉

七味雞軟骨

我嘅墨魚丸麻辣米線 (小辣)

家姐嘅豬大腸酸辣米線 (5 辣)

里奧大人嘅豬潤片酸辣米線 (1 辣)

( 27-NOV-2012  TUE )

今朝落毛毛雨   所以非常之凍呀   真係要長袖衫同長褸呢   尋晚凍到滕滕震   呢啲感覺真係好鬼辛苦   所以今日點都要好好保暖個身體呢 ~

早餐食雪菜肉絲鴨胸米粉   但其實想食   不過唔餓   所以食到有啲驚 ~

菇場凍到震   凍過出面   所以沖杯黑糖薑茶暖暖身   但飲完都仲凍喎   係我本身勁寒   定係菇場勁寒呢 ~

食番尋日嘅 Lunch Box   食到 1 點 15 分   實在早餐仲未落格   真係要細細啖慢慢食   唔係食唔落 ~

放工約家姐去荃灣睇中醫   其實家姐尋日睇咗   不過驚我唔識去   所以帶我去   咁一齊喺太子站 Join 埋一齊去荃灣   醫師又係話我係超寒底   好在係食藥粉   唔係真係好煩   煲中藥真係要好多時間   又要睇火先煩嘛   睇完醫師執藥嘅時候   家姐同事兩公婆都到咗   一齊傾咗 15 分鐘先走   女人真係特別多嘢講呢 ~

實在有啲餓   去陳記買 2 串大辣魚蛋同牛柏葉   之後就坐小巴番九龍灣喇 ~

一上車即打比里奧大人叫佢放工   我哋到咗金姆指先   20 分鐘後里奧大人都到埋   可以開餐 lu ~

食到 9 點半就各自歸家喇   番到屋企食埋碗芝麻糊   真係夠哂飽呢 ~ 

叉鴨飯 (外賣) ( 26-NOV-2012 )

( 26-NOV-2012  MON )

起身有啲太陽噃   但又話今晚會勁凍   所以着短袖加風褸就算   但出到街又唔係咁凍噃 ~

今朝好感恩   因為之前司機叔叔話 Cut 咗 2 班車   我諗住唔等喇   但又想睇下會遲幾耐   反正我預咗多時間食早餐   就算等到 8 點半都無咩問題   但估唔到今朝 8 點 10 分又可以見到佢   原來佢話後尾佢阿頭叫佢做到月尾   咁就好喇   我可以坐到月尾呢 ~

早餐食扒芝腿治   芝蛋治其實都好好味   如果芝士係半溶狀態嘅話   但食完就真係超級超級飽囉 ~

菇場靜呀   星期一特別多朋友搵我 MSN   因為個個知我得閒   同埋星期一個個都無 Mood 做嘢就係真嘅   同埋個天又黑哂   仲更加無 Mood 啦 ~

家姐今日 Off   所以約我食 Lunch   其實我有帶飯   不過難得佢 Off 同我食   我就帶佢食魚生飯   因為佢鍾意食呢 ~

食到 1 點 20 分就走喇   之後去埋銀行就番菇場 lu ~

今晚去旺角拎嘢   好在菇場長期有披肩同厚褸   晏晝出去已經覺得凍   夜晚落雨更凍   所以唔理三七廿一拎條披肩包住條頸   真係暖好多㗎   風褸薄切切   着咗等如無着咁 ~

拎完嘢就走   見時間都早   所以買埋半打拿破崙同椰撻比家姐   再買埋兩碗芝麻糊比里奧大人就搭巴士番屋企   好在有位坐咋   一袋二袋真係好辛苦   但我堅持要搭巴士   平小巴一半呀   我覺得搭平車好開心 ~

約咗家姐喺停車場交收   里奧大人原來都已經喺九龍灣 lu   叫佢買飯盒番屋企食   我就食埋尋晚食剩嘅飯餸   其實難得里奧大人咁早放工   真係超勁想同佢出街食   不過尋晚食剩差唔多成個餐   要掉咗去真係好鬼折墮   又唔想留到星期三做 Lunch   所以我話食埋去喇 ~

食完抖陣就熨兩機衫   好在開咗抽濕機   唔係啲衫有排都唔乾呀 ~

日月星茶餐廳 (外賣) ( 25-NOV-2012 )

( 25-NOV-2012  SUN )

今朝勁喇   8 點起身   因為加拿大嘅堂細佬番嚟香港   所以一齊去媽咪屋企附近酒樓飲早茶呢 ~

其實都未瞓醒   行到巴士站先見到原來表哥表嫂排緊隊等車   又會咁啱嘅   佢唔叫我我都唔知呀 ~

約咗 9 點   我哋 8 點 45 分到喇   洗下杯碗   啲人都陸陸續續咁嚟   今次總共 23 個人飲茶呀   第一次咋   兩張大枱   最搞笑係堂表弟啲朋友一齊嚟飲嘛   佢哋計埋都 7 個人   不過啲  ABC 對飲茶又好有興趣呢 ~

飲到 10 點半   送埋佢地去巴士站都差唔多 11 點幾 lu   之後我哋同埋家姐就上媽咪屋企坐下   拎埋家姐啲手信   1 點走人喇 ~

里奧大人番到屋企即瞓呀   我都瞓咗半個鐘   真係好眼瞓呀 ~

頭先無咩點食嘢咋   所以 2 點即出去大快活食 Tea    又落緊毛毛雨又大風   今朝着得少衫   個人好似有啲唔舒服   食完即番屋企休息喇 ~

又煲 "美食法庭"   好快又到 6 點咁   我就食番尋晚食剩嘅牛扒   所以叫外賣比里奧大人食喇   懶得出去買呀 ~

Cafe Lagoon @ 九龍灣 ( 24-NOV-2012 )

美國西冷牛扒配薯菜 

澳洲 T 骨牛扒配薯菜

羅宋湯 / 餐包 / 曲奇奶油朱古力咖啡

( 24-NOV-2012  SAT )

今朝 8 點起身   8 點半 8 卦就打嚟問我喺邊   我喺屋企樓下咋   不過搭快小巴   所以都好快到菇場附近茶餐廳食早餐呢 ~

諗住 Hea 過   點知有嘢做   所以好快就放工咁喇 ~

個肚仲有啲唔舒服   但就唔係超辛苦嗰隻囉   同埋感恩係有胃口食嘢   所以我沖個熱水涼先   之後再叫里奧大人買點心番嚟一齊食 ~

雞球大包 / 生煎包 / 炸魚餅 / 炸雲吞

食完十級飽   又瞓唔到   所以煲番之前錄咗嘅 "美食法庭"   睇到 6 點幾就出去食嘢   頭暈暈唔想行咁遠   所以去 Cafe Lagoon 喇 ~

米粉 ( 23-NOV-2012 )

( 23-NOV-2012  FRI )

今朝瞓到 8 點半   去 KFC 買完早餐之後搭貴小巴番工   番到菇場已經 9 點 20 分 lu   好在唔算最遲 ~

忙咗成朝   Lunch 食糙米芝士包   叮番熱好味好多   無咁乾 ~

2 點幾無啦啦個肚痛喎   今朝仲諗好開心個肚唔痛添   不過呢次痛又接受到   唔駛典嚟典去   但就嘔囉   勁想番屋企   忍到 5 點半即打的番屋企 ~

抖陣無咁痛就沖個勁熱水涼   舒服好多呢   之後瞓咗 1 個鐘   覺得肚餓   飲包蜜瓜豆奶   再焗個米粉   飽哂 ~

里奧大人 9 點半先喺大陸放工   番到嚟都成 11 點   傾咗陣偈   我都入房瞓 lu ~

海皇粥店 @ 九龍灣 ( 22-NOV-2012 )

( 22-NOV-2012  THU )

潮潮濕濕嘅天氣   真係令人好唔舒服呀 ~

今朝坐小巴   司機叔叔話佢做埋今日   咁成架車得我同另一位小姐   另一位小姐聽到咁情況   就教佢應該點點點咁做   呢個司機叔叔真係超級好人   成日會等埋人先開車   好似我喺德福站係我同其他兩位小姐   如果佢見仲有一位未嚟到   就會等多 1 分鐘   無就開車   之後去到另一個站就會等埋兩母子先開車   有時已經開咗車   但佢見到兩母子喺對面馬路   叫我哋等埋佢哋   幾咁好人呀   同埋我落車嘅位唔係站嚟   係佢知道我哋呢度落車方便番工   所以特登比我哋落   妳話呢啲咁好人嘅司機邊度搵喎   但可惜呢條線唔做啦   佢仲話啲車已經 Cut  咗兩架   所以我哋都話朝早唔搭喇   唔知等幾耐 ~

早餐食腿蛋治   媽咪同家姐鍾意食火腿同雞蛋   我就唔係喇   因為茶餐廳多數都係有餐腿蛋呢 ~

菇場忙呀   好開心   因為做完已經 Lunch Time 喇   個肚谷住谷住   所以都係食麥皮算喇 ~

終於每月一到   感恩唔太痛   只係有啲扯住扯住   對我嚟講已經係好好好好   因為我好多時第一日已經想嘔   今次 Everything OK   感謝主 ~

今日見自己唔舒服   所以好怕凍   咁去停車場等小巴   唔駛食風   咁差唔多 5 點 50 分有架小巴埋站   佢開門我以為開得車   點知佢話 6 點 10 分先開   好在真係心血來潮去停車場等   唔係吹風吹到病都似   咁佢叫我可以坐喺車度等   不過我費事啦   因為佢開住冷氣   我覺得好凍呀   所以去一田行下先   夠鐘就上車喇 ~

難得有胃口食嘢   所以去海皇食艇仔粥   最緊要暖下個胃呢   番到屋企又即沖個超熱水涼   正到呢 ~

里奧大人 7 點半放工   佢去大快活買飯番嚟食   佢話大家樂四寶飯唔包飲品要 $39   去大快活買只係 $32 仲包飲品   仲話有次見到有個男人喺大家樂度嘈   話 $35 買咖哩牛腩飯得 2 嚿仔牛腩   之後經理比多幾舊佢喎   呢啲咁嘅大集團真係好唔掂   錢又識加   量又係咁減   唔成正比   難為我哋啲小市民呀 ~

驚自己會嘔   所以食止暈止嘔藥   但呢隻藥會令人昏昏欲睡   我真係食咗藥半個鐘之後已經想瞓   之後 8 點 15 分已經喺梳化瞓咗   里奧大人 8 點 45 分叫我入房瞓   嗰時我已經溫溫燉燉喇   啲藥真係勁 ~

叉燒 (外賣) + 清炒菜心苗 ( 21-NOV-2012 )

 ( 21-NOV-2012  WED )

今朝 8 點 45 分起身   去 KFC 食早餐   之後就番屋企沖涼出發去將軍澳醫院小禮堂向叔叔鞠躬 ~

真係好感恩   尋日家姐打長途比我   傾到最後我問佢坐咩車去將軍澳醫院   好在問咗佢咋   唔係我以為屋企附近有 98C 呀   係就慘喇   因為根本係無 ~

坐小巴去牛頭角地鐵站   再轉 98A 就直接到醫院門口   架車慢到呢   差唔多 40 分鐘   我 10 點 55 分去到   話就話 11 點開始   好在 11 點 15 分先開始咋   唔係我尷尬到暈呢 ~

今日得我去咋   家姐去咗旅行   里奧大人要見客   媽咪條氣有啲促同埋又咳   好在我所有表哥都有到   咁可以傾下偈   其實都幾年無見   但一傾又可以好投契   細細個成日一齊玩㗎   大個之後無聯絡 lu   不過佢哋個個都一樣   同以前一樣咁和藹可親 ~

11 點 45 分完畢   我無跟大隊上山呀   因為已經約咗媽咪飲茶   如果上山要食纓紅飯   咁要媽咪等好耐   所以唔去喇 ~  

坐番 98A 番官塘   25 分鐘咋   唔坐呢架車都唔覺頭先嗰架咁鬼慢 ~

同媽咪飲到 2 點就走人喇   媽咪仲咳   天氣又凍   所以同媽咪即刻番屋企喇 ~

番到媽咪屋企灘喺梳化度唔願郁呀   之後媽咪叫工人沖咗杯檸檬薑茶我飲   飲完火燒喉嚨咁呀   但個身都暖咗啲   但又無發滾嗰隻喎   媽咪話我係咪寒底到咁犀利呀 ~  

4 點幾走喇   去太興買完叉燒就番屋企   天氣勁潮濕   要喺房開抽濕機   好怕呢啲天氣呀 ~

本來諗住瞓陣   不過又瞓唔到   所以就抹書房   終於了咗件心事   舒服哂 ~

好餓呀   所以 7 點炒菜   食埋尋晚嘅意粉   之後就等里奧大人番黎喇 ~

是日懶餐 - 叉燒 (外賣) + 清炒菜心苗

叉燒 (外賣) - 最低消費 $20   呢個師傅超勁呀   一切就 $18   之後再切就 $19   幾驚之後佢一切就切到 $21 呀   估唔到切到啱啱好 $20   因為之前有個幾咁衰呀   一切就切咗 $27 比我   我一定唔要   最後好似 $23   咁我自己都預係 $21-$23   其實我都唔鍾意食叉燒嘅   只係用黎炒麵時吊味之嘛   不過我估真係次次買叉燒都係整叉燒炒麵   因為我同佢講話今晚食叉燒   佢第一句就問係咪叉燒炒麵 ~

清炒菜心苗 - 喺媽咪屋企拎㗎   媽咪又食唔哂   我又唔想買   咁媽咪就比咗一半我呀 ~  

里奧大人差唔多 9 點半先番到屋企   我煮辛辣麵佢食   之後佢見到 d 菜同叉燒就話咁多餸食唔哂   我發火話唔好成日咩都話食唔哂   好煩   尋晚又係   煮一餐飯唔係好難   但都唔易   買浸切洗煮   呢啲都用唔少時間   成日一見到啲餸就話飽   真係聽到我好煩   半碟叉燒 10 條菜唔係好多咋嘛 ~

肉醬意粉 ( 20-NOV-2012 )

( 20-NOV-2012  TUE )

今朝天陰陰   希望唔好落雨啦 ~

早餐食奶油多   其實超想食燒賣粉果   不過果間餐廳好迫   坐得勁唔舒服   所以星期六去食就最好   無咁多人 ~

菇場忙呀   真係開心   因為好快就到 Lunch Time 呢   食完 Lunch Box 都已經點幾   好快又要開工 lu ~

晏晝一樣咁忙   不過今次一定要做哂啲嘢先放工   因為我聽日 Off   唔想 Hold 住啲嘢 ~

放工去超市買餸   行下諗下買咩   番到屋企已經 6 點半   要即刻開始預備晚餐喇   搞掂哂又拖下地   今晚我自己食先喇   里奧大人差唔多 8 點幾先放工   我唔等喇   因為我真係唔想咁夜食飯呢 ~

是日晚餐 - 肉醬意粉

肉醬意粉 - 今次用咗 2 磅車厘茄  再加埋煙肉去整   味道正好多   其實想焗   不過屋企無圓形焗盆   如果光波爐唔係圓形就好啦   我覺得圓形啲位無咁好用囉 ~

臘鴨臘腸 + 瑤柱節瓜甫 ( 19-NOV-2012 )

( 19-NOV-2012  MON )

凍咗好多喇   之後星期中會落雨   應該更凍呢   好期間冬天來臨呀 ~ 

唔太餓就會食奶油多   我一定要食早餐   唔係會覺得好無精神咁 ~

菇場超勁忙呀   一做就做到 Lunch Time   食完 Lunch Box 就出去買嘢   再去銀行入票   番到菇場又要即開工喇 ~

今日忙足全日   勁充實   所以啲時間過得非常之快   話咁快又放工 lu ~

放工即走   小巴做到今個月尾咋   可惜可惜   咁第時都可以同里奧大人一齊搭地鐵番工   咁樣諗開心啲呢 ~

番到屋企飲碗湯先   唔駛夜晚成日去廁所   之後就拖地   7 點半開始煮飯   里奧大人 8 點番到嚟就可以開飯喇 ~

是日懶餐 - 臘鴨臘腸 + 瑤柱節瓜甫

臘鴨臘腸 - 真係好多年無食臘鴨   上次喺媽咪屋企食覺得好好味   所以媽咪就買比我喇   臘腸又係媽咪買嘅   榮華真係唔錯呢 ~  

瑤柱節瓜甫 - 懶人之選呀   懶到茨汁都唔落   因為我話臘腸鹹   就咁食瓜清清地就最好 ~

咕嚕雞球 + 青紅蘿蔔粟米豬骨湯 ( 18-NOV-2012 )

( 18-NOV-2012  SUN )

10 點 20 分起身   里奧大人話 7 點幾個肚已經打豉   所以我都快手快腳梳洗   拿拿聲落去食早餐呀 ~

食完早餐就番屋企沖涼   抖陣就番教會喇 ~

崇拜完畢之後就去整里奧大人對皮鞋   要等 30 分鐘   所以又喺德福周圍行 ~

拎完鞋就分道揚鑣   里奧大人番屋企做公司嘢   我就去買餸   樣樣都好重   番到屋企隻手好似斷咗咁   再磅下買嘅嘢   有 16 磅呀   唔怪得咁動啦   再加埋我個袋   總共差唔多 20 磅   真係擔泥咁   次次一放低啲餸就有解脫嘅感覺呢 ~

2 點半去大家樂食 Tea   因為家姐比咗 2 張 $3 Coupon 我呀   唔好浪費   都係錢嘛 ~  

食完我就去買衫   諗住買件薄外套   估唔到買到外套之餘都買到 2 件長 Tee   喺時間番屋企喇 ~

番到屋企即煲湯   之後就熨衫   搞掂完就睇下雜誌   差唔多 6 點 15 分就開始煮飯   7 點有得食 ~

是日懶餐 - 咕嚕雞球 + 青紅蘿蔔粟米豬骨湯

咕嚕雞球 - 之前想整   不過又唔想整完之後擺入飯壺等里奧大人放工食   所以今晚整就最好啦   不過今次落多咗白醋   有啲搶喉 ~  

青紅蘿蔔粟米豬骨湯 - 今次多咗水  唔係太有味   不過又未至於無味   里奧大人話清啲都唔錯   幾識安慰我呢   因為佢都知我煮飯辛苦   但無味真係要開門見山講   唔係我會唔知呢 ~

King Ludwig Beerhall @ 赤柱 ( 17-NOV-2012 )

( 17-NOV-2012  SAT )

終於又到自己真正嘅 Off 喇   10 點 15 分醒咗   懶下床   之後 8 卦打嚟話有筍嘢買   不過無我哋要嘅 Model 呢 ~

梳洗後就去 KFC 食早餐   食完就番屋企抖陣   一早諗好去赤柱   雖然天陰陰   同埋知道會落雨   但里奧大人話照去喎   即沖涼就出發喇 ~  

搭地鐵去金鐘再轉 6X   去到都點幾 lu   一落車無耐就落雨   大粒但唔密   里奧大人又話帶咗遮   點知換咗袋無放番落去   信錯人啦 ~   

好感恩買到腳架   不過間嘢態度唔好   所以買一個算   之後再入去行下   又見到腳架   再買多一個   因為之前搵極都搵唔到   估唔到赤柱有呢 ~

一出大街又落雨   係咪咁邪   急步行番去美利樓   去食 Tea Buffet   點知原來 3 點開始嘅 Tea Buffet 係無鹹豬手   好奇怪   我一心嚟食鹹豬手   點知無得食又唔會話好失望   同埋我又覺得下次叫埋家姐一齊食仲好   唔駛食哂隻豬手已經食唔落嘢嘛 ~

本來坐室外   不過落雨驚凍   同埋落哂膠幕即係無得望海景   所以坐室內 lu ~

環境真係好舒服   同埋無得食豬手喎   咁當然無咩人啦   好似得 4 張枱有人咋   室外就多啲人囉   不過我覺得最正係間餐廳得香港人同外國人呀 ~

凍螺 / 凍蝦 / 牛肉 / 牛肉夾住酸瓜   我覺得好好食呀 / 烤雞膇 / 烤腸 / 蝴蝶包 / 烤腸 / 牛肉腸 /煙三文魚 / 生果沙律 / 咖哩牛腩 / 印度薄餅 / 春卷 / 煙鴨胸 / 烤豬肉 (好似)

意粉 - 每位可以無限次 Refill   配料自選   我哋食咗一碟   無厘味道

周打海鮮湯 - 好好飲呀   唔係水汪汪咁呢   飲完成身暖哂
心太軟 - 我話里奧大人做咩咁快拎甜品   同埋呢 Pat 係咩嚟   佢話襯仲未比人整到爛哂就拎咗先喎   因為個甜品已經開始比人整到溶溶爛爛咁喎   雖然樣衰   不過都好濃朱古力味

朱古力 Mousse / 杏仁條 - 我一向都對餅乾無咩興趣   不過佢真係好好食   勁香杏仁味

牛奶公司雪糕 (黑芝麻 / 紅豆) - 硬到呢

凍檸檬茶

坐到 5 點就走人喇   因為約咗菜菜仔   所以里奧大人去 G.O.D. 買咗個袋   之後就即坐小巴出柴灣地鐵站喇 ~

去到北角周圍行下   估唔到買到筍嘢   差唔多 7 點菜菜仔打嚟話已經到咗   咁我哋都過去喇   幫襯完諗住走   點知菜菜仔係都話要飲杯嘢   所以去麥記   佢飲咖啡食 Tea   我同里奧大人 Share 杯汽水就夠喇   差唔多 8 點半就一齊搭地鐵   今日好開心呀   兩程地鐵都係 Free   兩個人真係慳到幾十蚊㗎   唔錯唔錯 ~

我同里奧大人實在太飽   都唔需要食晚餐喇   晏晝食咗 3 百幾都好抵玩啦   兩餐喎 ~

星洲炒米 (外賣) @ 媽咪屋企 ( 16-NOV-2012 )

( 16-NOV-2012  FRI )

Happy Friday 喇   今朝食麵餐   如果唔太餓食麵餐   真係飽到上腦呀 ~

菇場忙咗陣   但今日啲時間過得好快咁   好快又到 Lunch Time   不過我未餓   所以 1 點先食麥皮   啲同事見到我食麥皮就覺得我好健康   真係呃到人喇   其實我係最唔健康呢 ~

媽咪感冒同咳   所以我放工去睇下佢   去完超市買寶礦力   再去買星洲炒米就番媽咪屋企 lu ~

感恩媽咪啱啱起身   仲有胃口食嘢   工人煮咗粥   又煎咗荷包蛋同魚仔比媽咪   自動自覺都唔錯 ~

里奧大人 7 點半喺大陸放工   咁我坐到 8 點 45 分就走 lu   陪佢食米線啦   本來佢話買文記再煮個麵   但我話我唔會幫佢煮   轉頭就改話食米線   不過我其實都覺得自己好衰咁   但真係唔想搞到自己好趕要番屋企煮麵咁囉 ~

番到屋企即沖涼   之後休息   今晚又 12 點幾先瞓   好在聽日 Off 可以自然醒呢 ~    

雜丸米粉 ( 15-NOV-2012 )

( 15-NOV-2012  THU )

越嚟越有冬天 Feel 喇    但我仲未着長袖   因為我都好怕熱呢 ~

早餐食雪菜肉絲鴨胸米粉   最驚食肉絲   所以次次都撩走哂先食 ~  

今朝老闆喺我隔離房開會   搞到我都唔太敢上網   好在有嘢做   好快又 Lunch Time   今日食 Lunch Box   食完出去一田行下   買咗個手抽膠桶就走人 lu ~

放工先嚟落毛毛雨   又大風   我覺得勁凍呀 ~

里奧大人上咗大陸   家姐今晚又嚟拎靴   所以我都唔番媽咪屋企食飯   喺屋企等家姐呢 ~

家姐差唔多 6 點半就上到嚟   試完哂嘢又傾下偈   7 點半走人   佢趕住番屋企食飯呀   之後我都預備晚餐 lu ~  

是日懶餐 - 雜丸米粉

雜丸米粉 - 唔知食咩好   求求其其食算喇 ~

食完就熨衫   沖完涼抖陣再食紅豆沙   里奧大人 9 點先放工   喺埋大陸食嘢先番嚟   番到屋企都 10 點幾   陪多佢一陣我都瞓覺喇 ~

住家飯 @ 媽咪屋企 ( 14-NOV-2012 )

蓮藕餅

茄汁洋蔥牛扒

酸梅酸薑蒸黃立鯧

豬踭肉

菜干白菜鹹鴨腎豬骨湯

( 14-NOV-2012  WED )

星期中喇   今星期 Off   所以覺得好快 Off 咁好開心呢 ~

天氣涼涼哋又有陽光   呢啲天氣真係超勁舒服呀   日日係咁心情都會好好多 ~

早餐又食扒芝腿治   我好鍾意食溶哂牛油嘅多士㗎   但又唔鍾意食鮮油多同菠蘿油   成塊厚牛油好漏咁呢 ~

菇場忙下 Hea 下   食完 Lunch Box 之後即去買嘢比家姐   佢去韓國好凍呀   -2 至 -8度   所以買啲暖包比佢   同埋買啲零食一齊試   好味就叫佢喺韓國買   平好多嘛 ~

其實需然菇場好靜   因為全部人都用 MSN 聯絡   但咁其實都好   我都可以同朋友 MSN   唔係真係悶到發顛呀 ~

放工去媽咪屋企食飯   食完飯一齊試零食   實在太開心喇   我同家姐最鍾意食零食   樣樣食啲最開心 ~

呢隻 Baked Potato 超好味道呀   好香芝士味   又脆   真係一食就不能自拔呀 

同家姐講話我今星期一開始飲檸檬茶   戒飲咖啡   點知家姐話佢同事先講   飲檸檬茶會引發女人病出嚟   不過好記得如果每月一到飲檸檬茶   諗住酸酸哋無咁反胃   但飲完真係超級痛   咁我都飲番咖啡啦   反正我一日真係飲 1/3 至半杯   唔算多囉   咁諗好啲 ~

差唔多 8 點 45 分就走喇   里奧大人原來已經番咗屋企   仲食埋 KFC   連食 2 次   但成日又食唔哂啲薯格嘥鬼哂   我又唔鍾意食   如果唔係我會食埋囉 ~  

今晚又食紅豆沙   不過里奧大人問點解無起沙   問我有無浸一晚   我話有喎   再問番佢點解我浸咗一晚都無起沙嘅   佢又答唔到我 ~

柱候焗雞翼 + 金銀蛋菠菜 + 雜丸 + 泡菜炒飯 + 陳皮紅豆沙 ( 13-NOV-2012 )

( 13-NOV-2012  TUE )

天氣清清涼涼真係唔錯   人都開心啲   可能我實在唔鍾意夏天啦 ~

今朝食扒芝腿治   真係好味道   就咁芝腿治其實都好味   但麵包一定要好軟熟   如果唔係好似好乾咁呢 ~

菇場忙呀   咁都好   好快又 Lunch Time   食完 Lunch Box 就出去行下 ~

放工去大成街街市買餸   依家知道邊檔平   咁就用少好多時間呢 ~   

番到屋企先醃雞翼同浸菜   之後開機洗衫   里奧大人 9 點先放工   所以今晚自己食先   食完再熨衫同拖地   沖埋個涼就等里奧大人番屋企 lu ~ 

是日懶餐 - 柱候焗雞翼 + 金銀蛋菠菜 + 雜丸 + 泡菜炒飯 + 陳皮紅豆沙

柱候焗雞翼 - 本來想用叉燒醬焗   不過未開   所以轉用柱候醬   里奧大人話好味   咁都好   因為仲剩番少少柱候醬   可以焗多次   如果佢唔鍾意食就唔知點整好 lu ~

金銀蛋菠菜 - 超勁想食金銀蛋   菠菜 $6 斤   2 隻皮蛋 + 1 隻鹹蛋都係 $6   其實想整埋上湯   不過都懶得整 ~  

雜丸 - 超勁想打邊爐   同埋勁想食蔥蒜   所以買啲丸嚟食下喇   今次用錯豉油嚟蘸   所以好鹹   之後沖涼先醒起   應該用甜豉油   無咁口喝   太耐無喺屋企整打邊爐   所以唔記得哂 lu ~

泡菜炒飯 - 終於清哂樽泡菜喇   超勁開心 ~

陳皮紅豆沙 - 乾燥天氣   煲啲糖水飲真係好滋潤咁呢 ~

午餐肉 + 椰菜花 ( 12-NOV-2012 )

( 12-NOV-2012  MON )

尋晚瞓得勁唔好   加上今日星期一   又天陰陰   真係勁想唔番工呀 ~

今朝又開始轉飲檸茶   唔想飲咁多咖啡   但星期六日就會飲咖啡   好 Relax 咁㗎   其實我飲得唔多   有時飲半杯   有時飲 3-4 啖就唔飲   因為我覺得飲咗幾啖已經好精神   都唔會再飲喇 ~

真係好感恩   無飲咖啡都唔太眼瞓   唔係都好難頂 ~

好快到 Lunch Time   又有 Lunch Box   本來想食完出去行   不過見到出面灰灰暗暗好似好凍咁   都係唔出喇 ~

放工走人   本來出旺角拎嘢   不過未有貨   所以番屋企煮飯喇 ~

番到屋企食包粟米片   抖陣再拖地   里奧大人喺大陸   估唔到 7 點可以放工   所以我都等埋佢先食飯喇   因為我好飽 ~

是日懶餐 - 午餐肉 + 椰菜花

午餐肉 - 我好小煎午餐肉   覺得食罐頊好無益咁   同埋我間唔中又食餐蛋治   所以唔想夜晚又食午餐肉咁囉   但里奧大人好鍾意食   食飯都食得快啲咁呀 ~ 

椰菜花 - 尋晚食唔哂   今晚再食過 ~

黑椒牛仔骨 + 椰菜花 + 蕃茄薯仔大眼雞湯 ( 11-NOV-2012 )

( 11-NOV-2012  SUN )

今朝 10 點半起身   沖完涼就去大家樂食早餐喇 ~

番屋企抖陣就去教會   1 點完畢   又番屋企 lu ~

2 點半去食米線   之後里奧大人番屋企做公司嘢   我就去買餸喇 ~

好感恩呀   里奧大人喺 OK 買雜誌   有張 UNO 卡   抽中呢包珍寶珠呀   我其實想買好耐   但又驚買咗食唔哂   咁依家好啦   可以食   哈哈

天氣乾燥   煲雪梨水潤一潤先   再預備晚餐   差唔多 6 點就開始煮飯   煮煮下家姐打嚟話叔叔尋晚已經走咗   雖然預咗   但都有啲唔開心囉 ~

因為有湯飲   唔想太夜食飯   驚半夜成日去廁所呀   好在 7 點可以開飯   算快喇 ~

是日懶餐 - 黑椒牛仔骨 + 椰菜花 + 蕃茄薯仔大眼雞湯

黑椒牛仔骨 - 整咗 4 條牛仔骨   黑椒真係好惹味   食得好滿足呀 ~ 

椰菜花 - $7/斤   買咗 $15   諗住食得哂   不過最後都係分 2 餐食   就咁烚   清到呢   但喺媽咪屋企食又好甜㗎喎 ~ 

蕃茄薯仔大眼雞湯 - 超耐無滾呢個湯   今次買 $20 份   都有 4 條嘅大眼雞   估唔到又幫我切內臟喎   上次又話唔得嘅 ~ 

永珍越南菜館 @ 九龍城 ( 10-NOV-2012 )

炸春卷 - 2 大條   里奧大人知我鍾意食   所以佢食咗一條就唔食

越式鑊仔炒蜆 - 無咩味   可能對佢期望太高

越式炒飯 - 上次里奧大人話食金邊粉好滯   所以堅持唔食   叫個炒飯   但無咩味

冰凍馬啼沙 @ 合成糖水 - 8 卦成日話好食   所以我都帶里奧大人試碗   咁真係 OK   食完身心舒暢   可惜啲冰粒太大   唔係更好呢

原來係"冰"凍 - 米凍喎   心諗都好特別下   果凍就見得多   米凍真係未見過   以為玩花臣用米嚟整嘅甜品   哈哈

( 10-NOV-2012  SAT )

今朝 8 點起身   下次都係 7 點 45 分起身   因為我覺得咁瞓好有壓力   驚遲到呀 ~

菇場靜到呢   好在都有啲嘢做下   所以做下 Jea 下都好快放工 ~

諗住買埋餸先番屋企   不過里奧大人係都叫我唔好買   今晚出去食喎 ~

差唔多 2 點幾先食 Tea   今次去鴻點堂食呀   食完唔駛執嘅感覺實在太好喇 ~

叉燒酥 / 炸雲吞 / 鹹水角 / 回味銀針粉 / 山竹牛肉球

里奧大人繼續做公司嘢   所以話陪唔到我   就同我去九龍城食越南菜   因為我話間越南菜以前食都幾好味   同埋上次喺旺角食嗰間唔好食   佢想去試下呢 ~

無啦啦超勁眼瞓   咁里奧大人又話瞓陣晏覺   所以一齊瞓   3 點半瞓到 5 點半   我覺得好勁㗎喇   我真係無試過咁瞓晏覺   仲要瞓咁耐   不過瞓完真係好精神 ~  

6 點 15 分出門口   好感恩去到巴士站即刻有車   去到永珍得一枱客   其實預咗無咩人   因為好多人去九龍城多數係食泰菜嘛 ~

食完再同里奧大人去合成食糖水   之後行個圈就番屋企喇 ~

住家飯 @ 媽咪屋企 ( 9-NOV-2012 )

酸梅麵豉蒸鯧魚

冬菇粟子燜雞

皮蛋酸薑

薑汁炒芥蘭

紅腰豆合桃齋湯

超勁想食黃蘿蔔壽司   所以買嚟食

( 9-NOV-2012  FRI )

又 Happy Friday 喇   開心開心 ~

今朝食食下早餐   之後 8 卦又嚟埋   好彩睇下個電話   因為依家我將電話鈴聲分咗 2 類人   一個係自己屋企人   即係里奧大人 媽咪 家姐 姐夫   另一個就係其他人   咁樣就知道邊個搵我喇   但其他人嘅鈴聲就比較細聲   所以有幾次都聽唔到 8 卦打嚟 ~  

菇場忙忙哋呀   所以一望鐘原來已經差唔多 12 點   今日 Lunch 食麥皮同沖好立克   都 OK 好味同 OK 飽咁啦 ~

真係靜到呢   真係除咗 Keyboard 聲同 Printer 聲之外   真係咩聲都無 ~

今日里奧大人又見客   唔知見到幾時   叫我唔好煮飯   所以我又去媽咪屋企食飯喇 ~

同家姐差唔多 8 點 45 分就走喇   感恩好快有車   去埋惠康買廁紙就番屋企   好感恩廁紙又平   不過我得一對手   拎 6 條已經係極限呢 ~

正想去沖涼嘅時侯   里奧大人話已經喺九龍灣   咁我等埋佢啦   順便陪下佢食嘢 ~

星期五真係唔想咁早瞓   不過呢排瞓得麻麻   11 點半已經要入房瞓 lu   里奧大人就好 Relax 咁睇電視   佢最鍾意睇明珠台啲戲   錄咗嚟慢慢睇   所以次次一睇就會追住嚟睇呢 ~

黑白胡椒鹹菜豬肚湯 + 蘋果粟米沙律 ( 8-NOV-2012 )

( 8-NOV-2012  THU )

平時慣咗星期四番媽咪屋企食飯   所以成日以為今日係星期五添 ~

今朝坐小巴聽到好消息   因為仲有得坐呀   之前話做到今個月 15 號咋   好感恩好感恩 ~

早餐食多士   咁就真係好多時間睇報紙   爽呀 ~

菇場忙   好快 Lunch Time   又 Lunch Box 喇   食完就出去行下   呢個天時涼涼咃   又有太陽   真係好舒服呢 ~

放工即走   好鬼餓呀   勁想食黃蘿蔔壽司   不過居然無得買   之後再去阿信屋買薯片   超勁開心呀 ~

番到屋企即洗衫同熨衫   里奧大人喺大陸又未番   所以我自己食嘢先 lu ~   

是日懶餐 - 黑白胡椒鹹菜豬肚湯 + 蘋果粟米沙律

黑白胡椒鹹菜豬肚湯 - 尋晚喺媽咪屋企拎架   飲完一碗食哂豬肚真係好飽 ~

蘋果粟米沙律 - 當生果蔬菜咁食咋   我鍾意食自己整嘅沙律   因為好多時出去食啲沙律啲薯仔同紅蘿蔔係生咁嘅   好難食呀 ~

里奧大人 9 點幾先喺大陸走   差唔多 10 點半番到屋企   之前同佢講話淥麵佢食   但無諗過 10 點幾咁夜番嘛   我已經想瞓覺   不過佢打嚟問係咪淥麵比佢食   咁我淥啦   唔係好似講完又唔做   好衰咁 ~

住家飯 @ 媽咪屋企 ( 7-NOV-2012 )

荷蘭豆芹菜炒臘肉


茄汁煎白鯧


粟米蟹柳蝦仁炒蛋

白切雞

黑白胡椒鹹菜豬肚湯

我覺得最上嘅奇異果好好味   Orange Soda 同 Mango 就買比家姐嘅

( 7-NOV-2012  WED )

今朝食早餐時   8 卦打嚟話過嚟食   好多時同佢一齊就會 9 點前番到菇場   因為佢阿 Head 比我老闆更早番呢   所以可能準時   喺佢心目中算係遲㗎喇 ~

菇場忙咗一陣   好快又係 Free Time   今日食完 Lunch Box 就出去一田超市行下   越行越凍   好在都睇哂要睇嘅嘢   同埋係時候番菇場開工 lu ~

里奧大人今日全天侯見客   所以我都番媽咪屋企食飯喇 ~

今晚 8 點走喇   家姐一齊番我屋企   因為我整咗 2 盒沙律比佢   佢一嚟到就食零食   真係無停過口   我就真係超飽食唔落喇   佢差唔多 9 點半就走喇   我都去沖涼 lu ~

里奧大人 10 點先番到嚟   同客又食印度嘢   仲飲埋白酒   佢話覺得眼皮係攰塌落嚟   鬼咩   已經攰再飲埋酒   唔瞓着已經偷笑啦 ~  

蘋果粟米沙律 ( 6-NOV-2012 )

( 6-NOV-2012  TUE )

又好似無咁凍   同無咁乾燥咁噃   快啲 冬天啦   因為想一次過拎哂冬天啲衫出嚟呀 ~

早餐食奶油多   餓都唔咁食咁飽   因為晏晝同 8 卦出去食 ~

菇場忙   快快手搞掂就做私人嘢喇   所以好快又到 Lunch Time   今日同 8 卦行遠啲食   因為呢間茶餐廳食物都唔錯呀 ~

食完超級滯   番到菇場即沖茶包飲呀   望到張紙巾濕咗好多   我仲以為自己無抹乾淨隻杯   點知再認真望   原來啲茶喺係我隻杯入面滲出嚟   再認真望   原來隻杯有條裂痕   清潔呀姐真係勁   可以整到咁 ~

放工去超市買紅腰豆同沙律醬就番屋企   整完沙律就熨衫再抹櫃   之後即沖涼休息喇   仲係好飽   但又驚半夜餓醒   所以就咁食碗沙律就算喇 ~

里奧大人差唔多 9 點幾先喺大陸放工   番到嚟都差唔多 11 點   我都差唔多瞓 lu ~

是日懶餐 - 蘋果粟米沙律

蘋果粟米沙律 - 今次材料有 4 個蘋果 + 2 罐粟米 + 1 罐紅腰豆 + 1 罐大樹菠蘿 + 1 罐椰果   家姐嗰份就加埋蟹柳   佢勁鍾意食蟹柳   實會好開心呢 ~

黑椒蜜糖雞柳 + 清炒菜心 ( 5-NOV-2012 )

( 5-NOV-2012  MON )

尋晚成日發夢   仲好肯定係彩色添呀   同埋又係嗰間超市   次次發夢買嘢都係去嗰間超市   奇怪 ~

早餐食三文治   其實想食濕嘢   不過驚太飽呀 ~

菇場忙忙地   不過都係無 Mood 做嘢 ~

Lunch Time 都係出去食   趕走悶氣   又未餓   所以周圍行下先   差唔多 1 點先食 ~

放工即走喇   去超市買 2 Pack 菜就番屋企   本來唔想做家務   不過又想郁下   所以拖地算喇   之後再預備晚餐   諗住食先   點知里奧大人 8 點打黎話放工   咁我都等埋一齊食飯 lu ~

是日懶餐 - 黑椒蜜糖雞柳 + 清炒菜心

黑椒蜜糖雞柳 - 其實想整泡菜雞柳   不過里奧大人喉嚨唔多舒服   所以用蜜糖焗算喇 ~ 

清炒菜心 - 反正開咗鑊   所以炒埋菜啦   炒嘅菜係好味好多 ~

真係好鬼攰   其實真係好想熨衫   不過超勁唔願郁   所以沖完涼之後真係灘喺梳化睇 Ipad   再睇下電視就瞓覺喇 ~

焗野生三文魚塊 + 美極煎蝦碌 + 酸齋 + 粉葛齋湯 ( 4-NOV-2012 )

( 4-NOV-2012  SUN )

今朝 10 點 40 分起身   趕唔切番教會   其實里奧大人好早醒咗   不過見我瞓得咁淋   唔想叫醒我喎 ~

食完早餐就去買餸   里奧大人就做公司嘢 ~

番到屋企開機洗衫同熨衫   再煲埋湯   都已經差唔多 2 點喇 ~

2 點幾去 Piago Food Court 食嘢   坐我隔離幾個男仔   十幾歲讀緊書嗰啲   係咁講粗口  係咪都加個助語詞   以為自己好型   其實真係知唔知係好無家教呢   可悲 ~

食完就去拎嘢    番到屋企都 4 點   抖陣又預備晚餐   早啲食早啲休息 ~

是日懶餐 - 焗野生三文魚塊 + 美極煎蝦碌 + 酸齋 + 粉葛齋湯

焗野生三文魚塊 - 之前喺一田買   1 包 7 件仔   差唔多 $70   我覺得幾貴呀   不過好好食   因為唔腥 ~

美極煎蝦碌 - 媽咪比咗啲蝦碌   所以又用美極煎香   超惹味 ~ 

酸齋 - 想整好耐   所以的起心肝整   不過我覺得味道可以再濃啲   同埋色水唔夠   下次再整好啲先 ~ 

粉葛齋湯 - 媽咪睇電視學煲㗎   所以我又煲   材料有粉葛 1 斤 + 3 條粟米 + 1 條紅蘿蔔 + 紅腰豆 + 合桃 + 蜜棗 + 陳皮   煲 2 個鐘   不過我又衰咗   煲出嚟得 3 碗   嘥煤氣添   下次都係落多啲水 ~

食完飯   洗埋碗   沖埋涼都係 8 點幾   實在太好喇   可以舒舒服服咁睇電視呢 ~

越興苑越南美食菜館 @ 旺角 ( 3-NOV-2012 )

越式拚盤 - 除咗春卷好味啲之外   其他真係唔多掂   完全係無味

越式炒金邊粉 - 難得里奧大人食金邊粉   我超勁開心啦   可惜係無味道

馬拉盞炒通菜 - 算 OK 啦

椰汁珍多冰 - 呢個 OK 呀  話哂有椰味

椰汁石榴子冰 - 好難有得食石榴子 lu

( 3-NOV-2012  SAT )

今朝同 8 卦一齊食早餐   唔夠 9 點番到菇場   同佢食嘢真係好鬼趕   但叫佢走先   佢又唔制   要等埋我 ~

菇場忙呀   差唔多 12 點幾先忙完   好在都可以準時走啫 ~

去完惠康買嘢先番屋企   買咗 1 Pack 梨   16 包出前一丁   4 支茄汁   但無帶環保袋    係咁質落手袋   幾驚爛埋個袋呀 ~

3 點先去食米線   之後番屋企 Hea    差唔多 6 點就出旺角睇相機   不過無得買 lu ~

去埋信和買色粉   之後周圍行   好感恩買到毛毛靴   因為冬天嘅菇場實在太凍喇   其實里奧大人次次同我出街   見到鞋舖都會入去望   想我快啲買到對毛毛靴   驚我冬天無得着   又問買唔買多對   我話唔駛住   雖然好暖   但差唔多款就唔喇   咁我鞋都未除   佢已經企咗喺 Cashier 度等比錢   快到呢 ~

行到 7 點幾就去食嘢   我帶佢去越興苑    不過我覺得越興園好味好多呢 ~

諗住坐巴士   但里奧大人話食飽唔想企巴士   唔係好易嘔   所以去搭小巴喇 ~

經過商場   又買咗個袋   女人真係好容易買到嘢 ~

住家飯 @ 媽咪屋企 ( 2-NOV-2012 )

美極蝦碌


咖哩炒蟹

滷水乳鴿

滷水鴨翼

炒椰菜花

五指毛桃粟米雞腳豬骨湯

( 2-NOV-2012  FRI )

星期五喇   真開心 ~

菇場超忙呀   做到 11 點半先做完   Hea 咗陣又到 Lunch Time   今日食番尋日嘅 Lunch Box   好在無壞啫 ~

飯氣攻心   超級眼瞓   好在有嘢做   唔係瞓得着呢 ~

里奧大人又上咗大陸   我放工就番屋企拎 Macaroon 先   之後再去媽咪屋企食飯 ~

平時 6 點左右就會打比家姐   問佢喺邊   一係佢就會打嚟話喺邊   點知我 5 點 45 分打比佢   之後打到 6 點半都無人聽   SMS 又無覆   糟糟打去又無人聽   SMS 又係無覆   真係擔心到我顛   後尾佢差唔多 7 點打嚟   原來開會   所以聽唔到電話   要差唔多 8 點先走得   咁我同媽咪食飯先 lu ~

家姐差唔多 8 點幾先番到嚟   我一定要等埋佢   因為佢有雪糕比我嘛   不過我其實點都等埋佢嘅   反正番到屋企都係一個人 ~

9 點半走喇   里奧大人遲我少少就番到屋企   之後一齊睇下電視   整呢樣嗰樣又 12 點幾先瞓   好在聽日番半日咋 ~