叉燒 (外賣) + 清炒菜心苗 ( 21-NOV-2012 )

 ( 21-NOV-2012  WED )

今朝 8 點 45 分起身   去 KFC 食早餐   之後就番屋企沖涼出發去將軍澳醫院小禮堂向叔叔鞠躬 ~

真係好感恩   尋日家姐打長途比我   傾到最後我問佢坐咩車去將軍澳醫院   好在問咗佢咋   唔係我以為屋企附近有 98C 呀   係就慘喇   因為根本係無 ~

坐小巴去牛頭角地鐵站   再轉 98A 就直接到醫院門口   架車慢到呢   差唔多 40 分鐘   我 10 點 55 分去到   話就話 11 點開始   好在 11 點 15 分先開始咋   唔係我尷尬到暈呢 ~

今日得我去咋   家姐去咗旅行   里奧大人要見客   媽咪條氣有啲促同埋又咳   好在我所有表哥都有到   咁可以傾下偈   其實都幾年無見   但一傾又可以好投契   細細個成日一齊玩㗎   大個之後無聯絡 lu   不過佢哋個個都一樣   同以前一樣咁和藹可親 ~

11 點 45 分完畢   我無跟大隊上山呀   因為已經約咗媽咪飲茶   如果上山要食纓紅飯   咁要媽咪等好耐   所以唔去喇 ~  

坐番 98A 番官塘   25 分鐘咋   唔坐呢架車都唔覺頭先嗰架咁鬼慢 ~

同媽咪飲到 2 點就走人喇   媽咪仲咳   天氣又凍   所以同媽咪即刻番屋企喇 ~

番到媽咪屋企灘喺梳化度唔願郁呀   之後媽咪叫工人沖咗杯檸檬薑茶我飲   飲完火燒喉嚨咁呀   但個身都暖咗啲   但又無發滾嗰隻喎   媽咪話我係咪寒底到咁犀利呀 ~  

4 點幾走喇   去太興買完叉燒就番屋企   天氣勁潮濕   要喺房開抽濕機   好怕呢啲天氣呀 ~

本來諗住瞓陣   不過又瞓唔到   所以就抹書房   終於了咗件心事   舒服哂 ~

好餓呀   所以 7 點炒菜   食埋尋晚嘅意粉   之後就等里奧大人番黎喇 ~

是日懶餐 - 叉燒 (外賣) + 清炒菜心苗

叉燒 (外賣) - 最低消費 $20   呢個師傅超勁呀   一切就 $18   之後再切就 $19   幾驚之後佢一切就切到 $21 呀   估唔到切到啱啱好 $20   因為之前有個幾咁衰呀   一切就切咗 $27 比我   我一定唔要   最後好似 $23   咁我自己都預係 $21-$23   其實我都唔鍾意食叉燒嘅   只係用黎炒麵時吊味之嘛   不過我估真係次次買叉燒都係整叉燒炒麵   因為我同佢講話今晚食叉燒   佢第一句就問係咪叉燒炒麵 ~

清炒菜心苗 - 喺媽咪屋企拎㗎   媽咪又食唔哂   我又唔想買   咁媽咪就比咗一半我呀 ~  

里奧大人差唔多 9 點半先番到屋企   我煮辛辣麵佢食   之後佢見到 d 菜同叉燒就話咁多餸食唔哂   我發火話唔好成日咩都話食唔哂   好煩   尋晚又係   煮一餐飯唔係好難   但都唔易   買浸切洗煮   呢啲都用唔少時間   成日一見到啲餸就話飽   真係聽到我好煩   半碟叉燒 10 條菜唔係好多咋嘛 ~