叉燒炒麵 + 菜心 ( 30-JUL-2013 ) + ( 31-JUL-2013 )

( 30-JUL-2013  TUE )

今朝精神唔錯   仲好有胃口   所以食奄列餐喇 ~

菇場靜   不過唔緊要   我有自己天地   哈哈 ~

想出去行下   所以出去食雲吞米   之後入埋票再行個圈就番菇場喇   好鬼熱呀 ~

放工去街市買麵餅同韭菜   之後再去太興買叉燒就番屋企 lu ~  

里奧大人 7 點放工   又可以一齊食飯喇   勁開心 ~

是日懶餐 - 叉燒炒麵 + 菜心

叉燒炒麵 - 今次買咗 $27 叉燒同 2 個麵餅   不過煮埋真係好多   下次都係 $20 叉燒 + 1 個麵餅算喇 ~ 

菜心 - $10 斤   估唔到今次啲菜心都幾甜   因為之前喺超市買果啲係帶苦咁 ~

其實好鬼攰   不過都同里奧大人一齊去徑步呢   依家最少行 5 個圈   其實都係 20 分鐘左右   我覺得都 ok 架   話哂真係出一身汁呢 ~

( 31-JUL-2013  WED )

今朝個肚谷住谷住   9 點打番菇場請病假   之後就每月一到咯   瞓多半個鐘就去睇醫生喇 ~

今次個肚唔太痛   有時仲唔痛添   不過又硬係勁想嘔   最搞笑係食止嘔丸反而好反胃   令我作嘔呢 ~

好鬼攰   所以瞓到 6 點先捨得起身沖涼   又無咩胃口   咁里奧大人差唔多 8 點幾番到屋企   買咗牛肉盅頭飯番嚟   估唔到我又食到幾啖飯喎   算好喇   話哂叫食到嘢嘛 ~

10 點又瞓喇   真係好鬼攰呢 ~ 

金姆指米線 @ 九龍灣 ( 29-JUL-2013 )

( 29-JUL-2013  MON )

里奧大人一早起身就話尋晚飲得太多湯   瞓得唔好   得不償失喎   喺度嘈嘈嘈   我話得喇   我呢世都唔煲湯㗎喇   其實尋晚我都去咗 2 次廁所   都麻麻哋瞓得好   不過唔同佢講   費事等佢再講多幾講呀 ~

今日超勁好天呀   不過就熱到爆囉   但都好過成日落雨嘅 ~

早餐食芝蛋治烘底   其實好想食麵餐   但麵餐實在太飽   我唔想鍾意食嘅嘢變咗做夾硬食嘅嘢呀 ~

菇場靜   家姐打嚟話眼瞓   8 卦又話眼瞓   我都眼瞓啦   所以叫佢哋講神   唔準再講眼瞓呀 ~

晏晝有 Lunch Box   出面實在爆熱   都係唔出去入票喇   真係唔想立立黐黐開工呢 ~

里奧大人 4 點半喺官塘見完客   又走去食 Tea   之後先番屋企   咁佢實早番過我啦   咁我放工都即番屋企 lu ~

6 點 45 分出發食飯   我超勁想食口水雞   所以去金姆指喇 ~

食完去德福行下   都行咗 45 分鐘   番到屋企抖半個鐘就一齊去徑步   今晚有啲風都幾舒服   不過都流咗好多汗呀   舒服到呢 ~

番到屋企即沖涼   之後食車厘子   終於食哂喇   襯依家自己鍾意食就要快啲食   唔係就會唔想食   嘥哂啲嘢囉 ~

雖然今日好攰   但都 11 點先瞓   仲諗住自己 10 點半就要瞓添 ~   

豉椒排骨 + 豉油王炒麵 + 節瓜鹹蛋排骨湯 ( 28-JUL-2013 )

( 28-JUL-2013  SUN )

今朝瞓到 10 點半呀   里奧大人 10 點已經醒咗   佢咁啱開房門見我醒咗   如果見我仲未醒就由得我瞓   不過就一定番唔到教會囉 ~

我起身即沖涼喇   之後食早餐就番教會喇 ~

崇拜完畢之後我就去街市買餸   里奧大人就番屋企換魚缸水   咁我番到屋企抖陣就一齊出旺角買魚仔喇 ~

坐巴士出旺角   食埋 Lunch 就行女人街   因為里奧大人想買番支去污膏呀 ~

豬油渣刀削麵 - 之前喺另一間分店食好煙韌   呢間唔煙韌嘅

豬油渣酸辣米線 - 湯底好味 

韭菜餃 (5 隻) - 好味呀  

之前買咗枝 Tide 都無料到   啲漬仲喺度   所以我突然諗起不如去埋花園街   真係好感恩喺花園街有得買呀   最搞笑我買 2 支大   再送多 1 支細 ($100) 同埋萬用抹布 ($100/7 條)   隔離阿姐問我係咪好好用   我話用開真係去到漬   我話我唔係 "媒" 嚟㗎   佢話我個樣都唔似 "媒" 樣   話啲 "媒" 唔係咁   我覺得佢講得好搞笑   不過我真係親眼見到啲 "媒"   特別係買啲乾貨嗰啲   個 "媒" 企喺度慢慢執   但對眼係周圍望㗎   咁家姐見過就係個 "媒" 扮買   買完又比番檔主   一日來來回回咁囉   不過乾貨食物就真係唔會喺街邊買   真係來歷不明   好驚囉 ~

買完就去買飯盒袋   之後去買魚仔同水草   今次買咗包 "金十字"   阿姐話係中性魚   因為我依家條 "克四間" 太大食喇   蝦到我果 3 條紅米奇無啖好食   但魚缸得 4 條魚真係好空蕩蕩   所以先買多幾條魚仔囉 ~

買埋拿玻崙同椰撻就坐小巴番屋企喇   都已經 4 點半喇   我要即刻煲香茅茶   煲完就預備晚餐喇 ~  
是日晚餐 - 豉椒排骨 + 豉油王炒麵 + 節瓜鹹蛋排骨湯

豉椒排骨 - 今日啲餸係滕 Lung 瓜   瓜 Lung 滕   呢碟排骨係滾完湯嘅排骨嚟㗎   加埋三色椒同蒜蓉豆豉一齊炒   當一碟餸都唔錯 ~

豉油王炒麵 - 懶得煮飯   所以炒麵 ~   

節瓜鹹蛋排骨湯 - 家姐上次論論盡盡整跌哂我盒湯   所以里奧大人無得飲   咁唯有我煲啦   自從媽咪成日煲埋湯比我   我真係好耐無喺屋企煲湯喇 ~

諗住徑步   點知落大雨   又無得徑步咯 ~

里奧大人呢兩日每餐都食到好飽   真係睇住佢個肚凸咗出嚟   佢嗌哂救命   不過我其實見佢肥番都開心㗎   話哂佢工作壓力大   平日唔係食好多嘢   只係星期六日或者假期先有胃口咋 ~ 

家姐 8 點幾上嚟拎拿破崙   傾咗陣就走喇   襯無雨好走   落雨濕濕真係好煩呢 ~

里奧大人餵魚   話紅米奇唔食呀   唔知係咪驚得滯   又話我係都要買金十字   咁問佢買唔買   佢又話好   真係好憎佢成日都係咁   買咗有事就賴人   咁當初你唔想買   我都唔買夾硬買啦   之後我即刻話將啲金十字比姑奶   不過原來姑奶已經無養魚   咁即打比水草阿姐   佢叫我唔駛驚   因為佢哋未適應   起碼要 2-3 日先適應   我聽完都安樂啲   希望佢哋和睦共存啦 ~

好想食甜嘢   所以食之前買嘅 Cheese Cake   之後再食車厘子   係姑奶尋日買比我㗎   媽咪又買咗比我   呢期唔駛買生果都得咯   呵呵 ~

富田和食亭 @ 佐敦 ( 27-JUL-2013 )

芥辣八爪魚軍艦 / 芝麻八爪魚沙律軍艦 / 蟹籽沙律軍艦 / 螺肉軍艦 / 三文魚壽司 / 吞拿魚壽司 / 中華沙律

( 27-JUL-2013  SAT )

今朝 8 點起身   之後 8 卦又約我食早餐   今次去試新嘢   但佢應該唔再去啦   食一份早餐要 $40   我都好啲   都係 $30   佢要食通粉餐   因為要飽   如果唔係佢可以平啲呢   呵呵 ~

本來要去執倉   不過阿 Head 無番   咁又唔駛執 lu ~

今日啲時間都好快過   依家清潔阿姐成日眼超超我咁呀   我都唔會理佢啦   佢咁做咪自己唔開心   同埋佢自己衰咗仲咁樣   真係好不知所謂 ~

放工同埋里奧大人同姑奶一齊去飲茶   之後就同里奧大人去馬莎買褲   再去埋 Laneige 買 Day Cream 同 Night Cream   最後去埋惠康買汽水就番屋企 lu ~

里奧大人做公司嘢   我就熨衫   今次要熨 3 機衫   所以一路聽歌一路熨衫   用咗 2 個鐘熨衫   但又唔覺得好攰咁喎 ~

見無落雨   所以里奧大人提議去廟街行下   咁 6 點幾出發   坐小巴出佐敦   本來想食打冷   但我濕疹隻手好痕   唔食得鵝片   但打冷唔食鵝片又無咩意思咁   所以我話食壽司   去番富田   之前去過都唔錯呢 ~

真係好感恩   食嘢其間落雨   我哋食完就停雨   咁即去廟街行下喇   其實無咩特別   不過里奧大人話想行下 ~

坐番小巴番九龍灣   真係好耐好耐無坐官塘小巴   但依稀仲記得總站喺邊度   咁里奧大人又唔信我喎   所以番轉頭問其他小巴司機   原來我指嘅方向係啱   信我就唔駛行嚟行去啦 ~

一落車就落勁大雨   今日啲雨都係一落就落好鬼大   之後就好快落完 ~

番到屋企沖涼再食生果   之後同里奧大人睇錄咗嘅電影   又 12 點幾先瞓 ~

大家樂 @ 官塘 ( 26-JUL-2013 )

海味雞粒荷葉飯 - 都好多材料同埋好香荷葉味   好味道呀


順德欖角醬燒肉丸 - 呢個無味嘅

冬瓜盅 - 雖然細細個   但都幾多材料  

( 26-JUL-2013  FRI )

又到 Happy Friday 喇   今朝勁大雨   咁去地鐵站嘅時候開始無咩雨   點知一落車又勁大雨   睇新聞話 "黃雨" 添呀   睇嚟又有排落呢 ~

早餐食奶油士   因為有 Lunch Box   情願餓住嚟食都好過唔飽嚟食呢 ~

大粒全部唔喺度   真係好鬼 Free   如果後面同事無番仲正   我會 Full Screen 上網 ~

今日有 Lunch Box   諗住一路食一路上網   點知無啦啦 Server 壞咗   個個同事叫救命   好壞唔壞   要喺 Lunch Time 先嚟壞 ~

好在依家手機可以上網   可以 Whatsapp 同 WeChat   如果唔係真係悶到瞓着呀 ~

差唔多 4 點半先搞掂   咁都好   用手機打字好攰呀   哈哈 ~

里奧大人上咗大陸   咁我又陪媽咪食飯喇   家姐就要食埋尋晚媽咪比佢嘅餸   所以唔嚟喇~

食完上媽咪屋企坐到 8 點就走喇   番到屋企即煲中藥之後拖地   沖完涼再開機洗衫   本來想熨衫   不過好攰   留番聽日先熨 ~

里奧大人 9 點幾番到屋企   佢話唔做公司嘢住喇   所以又一齊睇電視 lu ~

住家飯 @ 媽咪屋 企 ( 25-JUL-2013 )

煎鮫魚 - 勁好味呀   最鍾意食啲脆邊  


好多魚春   正呀

白切雞 - 真係好感恩   星期二已經勁想食雞   不過無同媽咪講   估唔到今餐有得食   次次佢哋都會比哂啲雞潤我食   話補血喎  

虎皮椒炒鮮魷 - 用蝦醬炒其實好惹味   不過真係麻麻哋鍾意食鮮魷呢   所以叫家姐食哂去   哈哈

燒肉 / 叉燒 (外賣) - 媽咪驚唔夠餸所以買   不過最後都只係食咗少少

腐乳炒通菜

蓮藕冬菇豬肚蠔豉湯

車厘子 - 家姐話好甜喎

( 25-JUL-2013  THU )

今朝里奧大人好早起身   因為要上廠   咁之後我又瞓番   但臨起身前發惡夢見到有人打交   打到流哂血    同我尋晚睇 Youtube 嘅畫面係一樣   夜晚真係唔好睇埋啲暴力同恐怖嘢   唔係一定發惡夢 ~

尋晚特登搽按摩膏再按摩   諗住好啲   點知瞓矮頸 ~  

實在太大雨喇   真係要帶直身遮   睇嚟今日係落長命雨㗎喇 ~

早餐食芝腿治烘底   但佢比錯芝蛋治   今次比錯就一定唔要喇   因為 Lunch Box 又有飯   唔想咁滯呀 ~   

菇場又係忙咗陣又 Hea 過喇   不過整呢樣嗰樣又好快到 Lunch Time 咁喎 ~

今日有啲攰   食完 Lunch Box 更加覺得飯氣攻心   所以沖咗半杯白咖啡   飲咗又真係精神啲噃 ~

放工即走啦   今晚去媽咪屋企食飯   家姐就要幫我買盒裝紙巾先番得媽咪屋企   我話買 2 條   咁我屋企已經有 2 條嘛   4 條夠哂啦   之後佢就話紙巾擺得耐會有蟲   咁我都知   所以咪買 2 條囉   之後佢又話夠唔夠   買 3 條啦   真係吖   買 2 條又話人哋多   但又迫我買夠 3 條驚我唔夠用喎 ~

佢好衰㗎   成日要人提呢樣提嗰樣   自己又唔 Set Reminder 喎   搞到又要我記埋一份   不過我都係 Set Reminder 嘅   大佬   我自己嘢又要記   又要記埋里奧大人啲嘢   邊記得咁多   同埋我覺得做咗手術之後   真係無咁好記性   成日有短暫失憶嘅感覺咁 ~

飲完湯就食飯   依家我將碗巨湯分 2 次飲   咁先可以食到餸   不過今晚樣樣餸都啱我食   所以食完飯都食唔落生果 lu ~

8 點半走人   估唔到里奧大人同我差唔多時間喺屋企附近   叫佢幫我買忽週再喺大堂等   咁我唔駛行嚟行去   呵呵 ~

雖然唔駛煮飯   但番到屋企都好攰   沖埋涼就睇電視喇   順便食埋里奧大食剩嘅薯條   成日食唔哂比人   大半包唔食又嘥喎 ~ 

節瓜冬菇燜排骨 + 皮蛋酸薑 ( 24-JUL-2013 )

( 24-JUL-2013  WED )

今朝都幾精神   不過唔係天陰陰就更加好呢   雖然夏天成日會落雨係事實   但我真係唔太鍾意落雨   無哂 Mood 咁 ~

早餐食奶油豬仔包   但比錯咗奶醬   所以超級甜呢 ~

菇場忙咗陣就 Hea 過   今日有 Lunch Box   唔落雨就好啦   食完可以出去行下嘛 ~

估唔到又加咗人工   好過無咁啦   哈哈 ~

放工去馬莎買 Cream 比里奧大人   之後再去 Lanegie 買防曬   去埋百佳換積分   順便買埋薯片就番屋企喇 ~

差唔多 6 點 45 分先番到屋企   所以尋晚特登燜定餸   咁就唔駛趕呢 ~

開機洗衫之後就預備晚餐喇   但又唔知里奧大人幾時放工   我又餓喎   所以 7 點半開餐   點知里奧大人打嚟話放工   不過我唔等啦   無理由蒸熱再蒸熱嘛   好煩啫 ~     

是日晚餐 - 節瓜冬菇燜排骨 + 皮蛋酸薑

節瓜冬菇燜排骨 - 第 1 次整咋   就咁用蠔油生柚老柚調味   估唔到又好味喎   我都忍唔住用啲汁用嚟送飯   不過 2 個節瓜煮埋真係好少咁   下次買 4 個先得 ~ 

皮蛋酸薑 - 之前買咗嘅皮蛋同酸薑   食埋今次就清哂喇   呢期都清咗唔少嘢   實在太好喇   唔想雪櫃成日爆哂呀 ~

今晚又食火龍果同藍莓   其實好想食橙   不過懶拻 ~

10 點半瞓覺   幾咁健康呀   哈哈 ~ 

黑椒蜆肉腸仔扁意粉 ( 23-JUL-2013 )

( 23-JUL-2013  TUE )

尋晚瞓得唔錯   鬼咩   前晚瞓得唔好   如果再瞓得唔好就慘咯 ~

今朝食熱狗餐   不過個包好難食   如果烘埋個包就好味好多呢 ~

菇場忙咗陣就 Hea 過喇   Lunch 同舊同事煩單飲茶   佢已經轉咗做 MPF 經紀   所以我話有興趣想聽一聽   因為我真係無理到 MPF 係賺定蝕囉 ~

老闆同大粒都唔喺度   我差唔多 2 點先番到菇場呀 ~  

今晚去街市買節瓜同什豆   再去超市買排骨同米粉   之後即番屋企煲中藥   抖陣再煮晚餐   今晚自己食先   因為趕住燜餸同徑步呀 ~

是日懶餐 - 黑椒蜆肉腸仔扁意粉

黑椒蜆肉腸仔扁意粉 - 想清埋包腸仔   用咗 6 條腸仔 + 半包急凍蜆肉 + 1 個洋蔥   都唔記得有個洋蔥喺度   所以見到即用喇   唔係又等到發霉   今次黑椒汁唔夠呀   所以無咩味   唯有勁落黑椒粉啦 ~

食完就去燜餸   里奧大人差唔多 8 點半先番到屋企   咁我燜好啲餸再洗埋碗   差唔多 9 點 10 分就出去徑步喇 ~

世界真係細   等過馬路時見到對夫婦好熟面口   原來係台中嘅團友   睇佢哋應該都係跑完步   因為佢哋係跑步裝束   同埋我見到有手巾仔   本來我想打個招呼   不過我望實佢哋   佢哋都無咩反應   咁應該都唔記得我㗎喇   所以我都走去徑步 lu   今次行咗 5 個圈   如果唔係想睇 "衝 2"   我會行耐啲呢 ~

煎餃子．專門店 @ 九龍灣 ( 22-JUL-2013 )

韭菜水餃 - 差唔多全部係韭菜   唔通韭菜豬肉餃先有豬肉 ?!

原味煎餃子 - 咁 1 客係有 10 隻家嘛   唔係我開聲話點解得 7 隻   佢都唔覺有問題  
滷水雞翼米線

( 22-JUL-2013  MON )

尋晚 11 點幾都眼瞓   點知入房又瞓唔着喎   之後又去幾次廁所   我諗應該係尋日晏晝飲凍奶茶   夜晚瞓唔到   因為好多時星期日都係眼瞓又瞓唔到囉 ~

早餐食芝腿治烘底 + 咖啡   飲完咖啡都唔多精神   預咗今日都係攰架喇 ~

做咗一陣嘢又等 Lunch Time   今日有 Lunch Box   本來食完想出去街   但個天又好似想落雨咁   都係唔行喇 ~

放工睇中醫   今次唔係等好耐咋   感恩感恩   醫師同我打完脈   話我好咗喎   又問我有無瘦到   我話無喎   點解會瘦嘅   佢話開咗啲藥等我無咩胃口   我話我仲好食得喎   都唔記得問點解要令我無胃口添   不過都估到㗎喇   我肥嘟嘟嘛   呵呵 ~

實在太感恩喇   拎埋藥   6 點 45 分搞掂   即打比里奧大人   佢見我咁早搞掂   佢話早啲放工拎嘢番屋企做呢 ~

今晚又坐巴士番屋企   唔塞車嘅話   20 分鐘已經番到九龍灣   好過搭地鐵   因為地鐵實在太多人喇   好有壓迫感   超唔鍾意囉 ~

超勁想食餃子   所以一定要食餃子喇 ~

家姐又拎咗冬瓜袪濕水同酸薑比我   不過今晚飲唔到啦   太夜嘛   同埋我又要飲中藥   唔飲咁多嘢喇   留比里奧大人聽日帶番公司飲呢 ~

太攰喇   都唔想徑步   咁開機洗衫   沖埋涼就即抖   10 點 45 分就瞓覺 lu ~

京蔥豬扒 + XO 醬菜心 + 齋滷味 (外賣) ( 21-JUL-2013 )

求其拎 4 隻筷子   可以抽到 4 隻唔同花嘅   幾咁勁呀   不過我無換番相同㗎   照用

( 21-JUL-2013  SUN )

今朝同里奧大人 9 點半醒咗 lu   梳洗之後就去食早餐呢 ~

番到屋企就沖涼   抖陣就番教會   崇拜完畢就去 Market Place 買生果   我覺得佢哋啲生果係好食啲   咁順便買埋盒齋滷味做餸喇 ~

經過德福   見到有 "型聚 Kidult 館"   又影下相   因為有黃金戰士呀 ~

差唔多 2 點 45 分就出去食 Tea   食完就番屋企煲中藥   里奧大人就做公司嘢   做到差唔多 6 點就瞓覺   我又睇埋啲飲食男女   之前買買埋埋好多書   其實真係無咩點睇   真係要認真安排下啲時間睇先得喇 ~

里奧大人 7 點醒咗   咁我都煮飯 lu ~

是日懶餐 - 京蔥豬扒 + XO 醬菜心 + 齋滷味 (外賣)

京蔥豬扒 - 媽咪之前比咗 2 條京蔥   所以就京蔥豬扒啦   用豆豉蒜蓉醬炒幾炒就搞掂 ~

XO 醬菜心 - 唔想樣樣都炒   所以就淥菜心喇   加埋媽咪整嘅 XO 醬   當堂惹味哂   正呀 ~

齋滷味 (外賣) - 想試下 Market Place 嘅齋滷味好唔好食咋   一般啦   個齋鴨腎無咩味 ~

食完抖一個鐘就一齊去徑步   行咗 5 個圈   出咗成身汗真係好鬼爽呀 ~

我發覺塊臉好似黑咗咁   所以即刻做 Mask 呀   之後睇陣電視   臨瞓前再睇聖經   太耐無睇聖經喇   實在太過份呢 ~

小曼谷泰國美食 @ 九龍城 ( 20-JUL-2013 )

拚盤 (細) - 我最鍾意食拚盤   樣樣有啲

馬拉盞炒通菜 - 超惹味   正呀

牛丸冬蔭功河粉 - 好淡味   不過我又 OK 喎   但里奧大人就鍾意食泰北同特旺多啲   

( 20-JUL-2013  SAT )

今朝 8 點起身   里奧大人就無啦啦去開機洗衫   之後我沖完涼   佢話佢醒咗   陪我食早餐   話食完之後再瞓過喎 ~

雖然星期六番半日好開心   但菇場氣氛仍然係超靜   真係怪 ~

尋晚放工   清潔阿姐放個桶喺我隔離   佢倒水時啲水花彈咗落我櫃桶度   之後我望一望佢啦   係好奇佢倒啲咩嘢水落桶   原來佢倒我 Partner 杯水落桶呀   之後再搓手巾   嚇到我即刻叫佢唔駛幫我抹枱   佢次次幫我抹枱之後   我張枱好似打風咁   同埋又唔係抹得乾淨喎   我聽過幾個同事講   啲杯嘅唇膏漬仲喺杯度   佢唔會幫人洗杯   但佢其實係需要洗囉   佢只係倒咗啲水出嚟   8 卦話有次佢個杯仲有啲茶渣喺度添呀   好離譜囉   之前啲阿姐唔係咁 ~

今朝我張倒水搓手巾呢件事同 Admin 同事講   因為實在太唔衛生喇   Admin 同事講話阿姐承認倒水   但唔承認搓手巾   根本唔到佢唔認   我親眼睇住   講真   佢唔搓手巾   我都唔會咁大反應啦   實在太嘔心喇 ~

話咁快就放工   今日喺地鐵站 Join 埋里奧大人一齊去佐敦拎超市 Cash Coupon   今次又差啲拎唔到喇   好在最後都拎到咋   只怪自己實在太大意啦 ~

拎完都 2 點幾   好餓呀   我只係勁想食餃子或者壽司   好感恩見到金田長壽司   因為呢間壽司   我想食好耐呢   但元朗太遠喇 ~

食完行去漫畫星光大道影下相   之後行隧道   經過地鐵站   所以去拎埋蜜糖   諗住黎到尖沙咀   所以順便叫里奧大人陪我睇中醫   去到見到得女醫師覺得唔對路   原來我睇嘅醫師係 6 點先有得睇   咁唔等啦   點等 2 個鐘呀   所以里奧大人話我頭先打嚟做咩唔問有無得睇   今次我又係大意嘅 ~

步驚雲 (作者: 馬榮成) / 南宮問天 (作者: 黃玉郎) / 王小虎 (作者: 黃玉郎) / 李小龍 (作者:上官小寶) / 海虎 (作者: 溫日良) / 郭靖 (作者: 李志清) / 老夫子 (作者: 王澤父子) / 牛仔 (作者: 王司馬) / 哨牙珍 (作者: 甘小文) / 壽星仔 (作者: 上官小寶) / 癲噹 (作者: 貓室) / 馬仔 (作者: 馬仔) / 麥兜 (作者: 麥家碧)

喺尖沙咀地鐵站西鐵入口附近拎嘅蜜糖   一來一回行到腳軟 ~

無得睇就即刻去 GAP 啦   想買襪比家姐呀   因為買 5 件以上有 7 折   平過上次   同埋家姐上次見到好鍾意   所以今次買 10 對比佢啦   里奧大人無啦啦又話買多 2 對比自己   咁一場嚟到   我都買咗 2 條 One Piece   今次買咗 $340 咋   超級抵呀 ~

里奧大人話攰呀   所以去埋 City'super 就諗住去 Food Court 買杯嘢飲抖下   點知裝修   咁所以直接坐巴士去九龍城食泰菜喇 ~

一心想去泰北美食   點知執咗   咁即係上次去已經都係執咗㗎喇   咁轉去隆姐   又要等位   6 點咋   估唔到咁爆   咁即去隔離小曼谷啦   好感恩有位呀   因為我想帶里奧大人食好耐啦 ~

冷氣唔夠呀   越食越熱   我飲咗 5 杯水呀   食完行個圈就坐巴士番屋企 lu ~

番到屋企   里奧大人第一件事係飲馬蹄爽   仲成罐飲哂   話好口渴   之後我都飲西柚汽水   因為真係超級口渴   小曼谷實在太多味精喇   唔怪之得頭先飲咁多水啦   仲以為自己熱添 ~

今晚同里奧大人好 Relax 呀   沖完涼就睇之前錄咗嘅電影   食完薯片再食爆谷   維格嘅焦糖爆谷   又幾好食   最緊要唔太甜呢 ~

Cafe Lagoon @ 九龍灣 ( 19-JUL-2013 )

板美國西冷牛扒配薯菜

鐵板美式廚師雜扒配薯菜 (雞扒 / 豬扒 / 漢堡 / 火腿 / 司華力腸)

曲奇奶油朱古力咖啡

( 19-JUL-2013  FRI )

Happy Friday 喇   心情真係好好   如果 5 Days 工作更好   哈哈 ~

早餐食芝腿治烘底   好在我都鍾意食芝士   唔係就少樣選擇 lu ~

菇場抖咗陣   之後就忙喇   所以勁快到 Lunch Time   今日 Lunch Box 係炒麵   食完無咁滯   食飯真係好滯咁   但我又唔鍾意飲茶消滯喎 ~

搞掂埋啲手尾就 Hea 過喇   真係好在 Lunch Ttime 之前整好哂   無啦啦開工先 Backup System   真係好阻人囉 ~

放工去街市買菜   番到屋企樓下接到自己屋企電話   原來里奧大人見完客番咗屋企   叫我唔好煮   想出去食   早講嘛   我唔駛射登去買菜   如果唔駛買菜   應該會同佢差唔多時間番到屋企添呀 ~

同里奧大人去 Cafe Lagoon   因為坐得比較舒服   同埋 6 點幾無咩人   無咁嘈嘛   可以傾下偈 ~

飽到反肚   又行一陣商場先番屋企   本來想徑步   不過地下好多熱氣   所以都係唔徑步喇 ~

番到屋企即煲中藥同埋開機洗衫   之後沖涼就抖 lu   里奧大人又做完嘢   咁就一齊睇電視喇 ~  

諗住飲咗咖啡會好遲瞓   估唔到 11 點都開始眼瞓   咁都好   話哂聽日要番工嘛 ~

住家飯 @ 媽咪屋企 ( 18-JUL-2013 )

蠔豉鹹蛋皮蛋鹹豬骨粥 - 好味呀   我同家姐最鍾意食鹹豬骨粥呢

炒麵 - 材料有蟹柳 / 芝士腸 / 韭菜 / 韭王   媽咪用咗 1 斤麵餅   所以剩番好多   呢個麵其實無咩味   好在媽咪之前自己整咗 XO 醬   用嚟送麵當堂好味哂

炸雞扒 - 完全唔掂   媽咪仲話凍咗之後會脆   我同媽咪講以後唔好再炸嘢   真係好難食   妳辛苦時我又辛苦


炒通菜 - 今次比工人炒啦   明明話要落腐乳   點知無落

油炸鬼 x 3 / 鹹煎餅 / 牛脷酥 - 食唔哂   之得唔買咁多啦

( 18-JUL-2013  THU )

今朝里奧大人喺九龍灣見客   所以佢又特登早啲起身陪我食早餐   好開心呢 ~

菇場忙咗陣呀   之後又開始 hea 過喇   正呀 ~

尋晚又特登整多個雞肉睇扁意粉做 Lunch Box   點知啲餸又食唔哂   之得唔煎條雞肉腸啦   咁樣唔駛咁飽嘛 ~

里奧大人 3 點幾見完客就番屋企做嘢   不過佢好多嘢做   所以唔陪我去媽咪屋企   但我都照番   應承咗媽咪嘛   同埋佢咁多嘢做都唔得閒理我   咁我陪媽咪好過呢 ~

媽咪今晚煲粥   所以我放工去買油炸鬼   家姐媽咪鍾意食   不過唔會特登買嚟食啦   所以媽咪一話煲粥   我就第一時間話買油炸鬼   佢哋幾鬼開心呀   哈哈 ~

今餐食粥炒麵都超級勁飽   我真係連生果都食唔落呀 ~

媽咪又買咗龍眼比我   好在今晚唔駛拎湯   唔係又好鬼重呢 ~

同家姐 8 點半走喇   我又勁飽   陪唔到里奧大人食嘢   所以去大家樂買叉燒四寶飯比佢   可以喺屋企舒舒服服咁食   最好不過啦 ~

飲埋中藥就即沖涼喇   今晚雖然無落雨   但好攰呀   都唔出去徑步 lu ~

魚露雞扒配茄汁豆 ( 17-JUL-2013 )

( 17-JUL-2013  WED )

尋晚早瞓   今朝起身真係精神好多   不過有時好鬼衰   唔係下下可以咁早瞓   如果夾硬早瞓   反而變咗瞓唔着   典嚟典去仲慘呢 ~

早餐食芝蛋治烘底   好耐無食 lu   覺得好漏添 ~

好在夠精神   所以靜英英都無問題   反正我成日都自得其樂   哈哈 ~

Lunch Time 去食粥   因為想食油炸鬼呀 ~

我條腸無啦啦扯住痛   所以放工都即走喇 ~

番到屋企即刻醃雞扒   煲中藥再開機洗衫   飲埋碗湯就抖陣   里奧大人 8 點先放工   咁我都食先 lu ~  

是日懶餐 - 魚露雞扒配茄汁豆

魚露雞扒配茄汁豆 - 有光波爐真係勁方便   煎嘢都懶呀   今晚懶到開茄汁豆做蔬菜   其實我唔鍾意食茄汁豆   但唔知點解當時買罐大囉   里奧大人都好奇怪點解我會咁樣配雞扒   因為我無整熱啲茄汁豆   但平時咩罐頭餸我都會整熱   不過無計啦   無心機整嘢呀 ~

等埋里奧大人食完就洗碗   之後即刻沖涼喇 ~

星林居雲南米線餐廳 @ 尖沙咀 ( 16-JUL-2013 )

( 16-JUL-2013  TUE )

尋晚早瞓   今朝真係精神好多呢   感恩感恩 ~

今朝等車無啦啦好鬼餓呀   所以早餐食芝腿治烘底   夠哂飽喇 ~

大粒全部上哂大陸   菇場更加 Free 到爆   呵呵 ~

尋晚特登煎條雞肉腸同整黑椒意粉做 Lunch Box   因為驚落雨   唔想出街食呢 ~

媽咪又煲咗魚湯比我   不過真係想睇中醫囉   所以家姐就負責拎湯同生果比我喇   因為我實會配定鎖匙比家姐同媽咪   咁我唔記得帶鎖匙都有人救我嘛   哈哈 ~    

放工即走喇   搭地鐵真係唔好諗嘢   明明記得旺角轉車去尖沙咀   點知諗嘢諗到入哂神   居然跟埋人哋上電梯   仲出埋閘添   出閘見到車程係 $6.1 仲覺得平   之後仲開心   因為一出閘就係 C 出口   不過我見到朗豪坊呢 3 個字覺得好奇怪   點解尖沙咀有朗豪坊嘅   之後再定一定神   原本發覺自己落錯車   又要即刻搭番地鐵去尖沙咀啦   嗚嗚 ~

感恩去到唔多人排隊   仲要前 2 個無啦啦話唔睇住   勁開心呀 ~

今晚醫師居然同我講笑同傾閒偈   又問我好多嘢   上次 Cool 到爆㗎 ~

里奧大人 6 點 45 分放工   我又啱睇完等緊拎藥   所以佢話去星林居食米線喎   難得咁早放工同埋唔駛拎電腦 ~

估唔到星林居都好多人   好在早啲嚟攞位   里奧大人 7 點半到   我落咗 Order 先㗎喇   不過都要等呢 ~

食完坐巴士番屋企   之後我換對波鞋就出去徑步喇   難得無落雨   同埋又唔焗嘛 ~

行咗 6 個圈   出咗唔少汗   勁爽呀   最正係番屋企可以即沖涼呀 ~

今晚 10 點半瞓啦   我要瞓番夠本呀 ~

黑椒野生三文魚柳 + 羅文生菜 ( 15-JUL-2013 )

( 15-JUL-2013  MON )

雖然瞓得幾好   但都好眼瞓咁添 ~

上星期五食唔到碎蛋吞拿魚飛碟   咁今朝一定要食呀   因為超勁想食   等咗咁耐嘛   點知佢話無碎蛋   我問佢幾時有   佢話等 15 分鐘   咁我都等啦   等到 8 點 35 分終於有得食   好開心呀   但係唔得慢慢嘆啦   要趕住番菇場嘛 ~

靜靜靜   所以我好眼瞓   勁食強勁薄荷糖   好在 8 卦多嘢講   唔係我瞓着都似 ~

終於 Lunch Time 喇   不過未餓   所以 1 點先食麥皮   終於清哂喇   超勁開心   之後再慢慢食埋個合桃蛋糕   咁就夠哂飽呢 ~

放工即走喇   去阿信屋買完薯片就番屋企喇 ~

真係好攰   灘咗一陣先浸菜呀   今晚里奧大人 7 點放工   所以我都等埋佢先一齊食飯 lu ~

今晚食辛辣麵   最衰家姐啦   無啦啦講辛辣麵   佢話工人上次同佢講話好想食辛辣麵   食完飯都好想食嗰隻   不過又驚食唔哂   所以家姐同佢 Share   話加咗 2 隻指天辣好辣   所以好好味   我覺得辛辣麵已經好辣啦   仲加指天椒   好難以想像呀 ~

是日懶餐 - 黑椒野生三文魚柳 + 羅文生菜

黑椒野生三文魚柳 - 又清哂啲魚柳   實在太開心喇 ~

羅文生菜 - 惠康買 $15/2 Pack   不過份量真係好多   如果唔係擺咗 1 晚   咁聽晚又唔煮   我會分開 2 次食囉 ~

今晚里奧大人唔駛做公司嘢   所以一齊睇下電視   又食下生果咁   第 1 集嘅 "衝上雲宵 2" 都幾好笑   打比上司用 "死亡直線" 嚟形容   我覺得好搞笑   係咪真係咁驚呀  哈哈 ~  

今晚 10 點 45 分瞓喇   實在太攰喇 ~  

星悅鮮廚 @ 官塘 ( 14-JUL-2013 )

馬拉盞炒鮮魷 - 好味呀   不過唔鍾意食鮮魷

京都香檳骨 - 份量好多   同樣都係好好味

炸雞 - 雖則雪雞   不過都幾入味呢

楊州炒飯 - 里奧大人又要食炒飯 

( 14-JUL-2013  SUN )

尋晚差唔多 2 點先瞓得着   但今朝 9 點半已經醒咗喎   咁就去食早餐啦 ~

食完早餐就去超市買菜   之後番屋企沖涼   抖陣番教會 ~

今日聽道   講 "舌頭" 嘅破壞力係好驚人   唔好睇少舌頭咁細   真係足以害死人㗎   我覺得講是非都算   無人會完美嘛   但真係唔好加鹽加醋囉   咁樣無咩意思   對人哋又唔公平   因為人哋真係無做過嘛 ~

好似菇場咁   啲人成日加埋自己啲情感上去講人是非   妳已經唔鍾意佢㗎啦   咁實講到佢有幾衰得幾衰   但其實人哋有眼見   所以我唔會埋佢哋堆   情願佢當我係怪人   但菇場雖然多怪人   不過都感恩除咗 8 卦之外   都有幾個都啱傾   但唔係講同事嘢   多數講下自己嘢呀  食啲咩買啲咩咁呢 ~

真係唔想出街   焗到抖唔到氣咁呀   行 5 分鐘路程已經好辛苦 ~

番到屋企抖陣   2 點半出去食 Tea   食完又要快快番屋企   條街實在太焗喇 ~

其實已經解凍咗三文魚   又買埋菜   咁里奧大人又好快做完公司嘢   但心血來潮好想同媽咪食飯嘛   打埋比家姐   估唔到姐夫都會去食飯   咁就更好啦   好耐無咁齊人 lu ~

坐坐下喺梳化都瞓着咗   不過瞓咗一陣就醒咗 lu   之後里奧大人入房瞓   我就去煲中藥   又睇下雜誌   差唔多 5 點半佢起身   咁就飲湯   抖陣就出發去食飯喇 ~

7 點開餐   食到 8 點幾   送埋媽咪番屋企   之後無啦啦勁大雨   諗住等啲雨細啲先揸車走   不過見到閃電   場雨都應該有排落   所以唔理喇   照走人   因為得家姐帶咗縮骨遮   所以家姐同里奧大人行去停車場先   我同工人殿後   之後里奧大人再遮我哋去停車場   咁家姐同里奧大人一出大堂   個雷超勁響呀   嚇到我同家姐大叫   里奧大人話個雷好似喺佢耳邊響咁呀   加埋家姐又大叫喎   嚇到佢呢   工人又唔驚   佢掃我背脊話唔駛驚唔駛驚   搞笑 ~

番到屋企即沖涼喇   食生果又睇下電視   11 點半先瞓   太夜喇 ~

壽司 (外賣) @ 家姐屋企 ( 13-JUL-2013 )

大機影真係靚好多呀

29 件壽司 ($198) - 第 1 次買咁大盤壽司   好似好豐富咁   多人食真係好啲   多啲選擇

黃蘿蔔壽司 - 依家好少地方有得買呀   唔知點解   呢盒係 Last One 呀 

齋鴨腎 / 酸齋 - 勁好味呀   估唔到百佳買嘅咁好味囉   有驚喜  

中華沙律 - OK 啦

B 仔 - 家姐話今朝帶佢去打針  比姑娘整鬼呀   話佢太肥   將佢啲肥肉推上喺頭度   好似獅子咁   呵呵

衰嘢又肥   灘咗喺凳度   成條海獅咁呀   所以家姐先記得講姑娘單嘢
好似好惡咁呀   不過佢根本一啲都唔惡嘅   肥肉任妳拻   勁正

B 頭 - 成日撩交嗌   所以要入房

麥包 - 我仲以為佢比人整鬼   擺咗塊布喺頭穀頂添   原來係張凳嚟㗎   哈哈

( 13-JUL-2013  SAT )

終於每月一 Off 喇   超勁開心呀 ~

同里奧大人 10 點自然醒   去太興食早餐   好耐無去喇   都幾有新鮮感呢 ~

反正要等早餐   所以我去惠康買嘢先   買完啱啱好早餐到 ~

食完番屋企沖涼   因為今日想去 GAP 買嘢   所以去銅鑼灣   順便拎埋超市 Coupon   點知上到巴士再睇清楚封換領信   原來 7 月15 日先開始換領   好在無約家姐咋   我實在太大意喇 ~

難得 12 點幾到銅鑼灣   所以行咗 GAP 先   今次買 5 件就 8 折   里奧大人買咗 12 對襪同 1 年 Tee   我買咗 1 件外套同 1 件 One Piece 同 2 對涼鞋   埋單 $908   真係好抵  因為我覺得 GAP 嘅料都唔錯 ~

買完都差唔多 2 點半   所以里奧大人又話要去南記   佢真係好鍾意食   不過唔夠家姐堅啦   嗰時佢喺銅鑼灣附近番工   有次媽咪去大陸玩   佢無帶飯   同同事去南記食午餐   家姐食足 5 日   佢同事食 3 日之後話唔再食   不過家姐就自己照去南記   我真係唔得囉   3 日已經係極限   家姐真係好堅 ~ 

買 JellyBelly 比家姐   原來係 $22/100g   因為我之前從來無問幾錢 g   家姐鍾意食   我都會豪少少買比佢嘅   呢包 $70   佢最鍾意食青檸   我同佢最驚係食雲石嗰啲   味道超怪   

真係諗唔到去邊   所以去家姐屋企   去番 Sogo 換嘢   之後行多陣先去家姐屋企   本來諗住坐巴士   不過等咗 5 分鐘就唔想再等   第一好鬼曬   第二吸哂啲廢氣   銅鑼灣真係人多車多   所以最後搭地鐵去寶林   順便行下新都城呢 ~

今日無諗過買嘢反而又買到嘢   去到 H&M 買咗 1 條牛仔褲同 2 件外套   里奧大人就買咗 1 條褲   實在太開心喇 ~

買完再去 1 期買馬仔同齋燒鵝就去百佳行下   家姐差唔多 7 點到   咁就一齊喺百佳買壽司喇 ~

去到家姐屋企就參觀下先   佢最鍾意人地參觀佢間屋架喇   之後同埋工人一齊開餐   4 個人食啱啱好   不過食到個個都好飽 ~ 

家姐又係好鍾意買買埋埋好多廁紙同紙巾呢

差唔多 9 點幾   家姐就揸車送我哋番屋企   但去咗媽咪屋企拎嘢先   我上之又擺得梘液無拎   咁姐夫又買咗 1 箱啤酒比里奧大人   咁依家里奧大人喺度就可以幫手拎呢   實在太好喇 ~

住家飯 @ 媽咪屋企 ( 12-JUL-2013 )

豉椒炒蜆

京蔥炒蝦

芋頭燜鴨

炒椰菜

牛大力土伏零豬骨湯

( 12-JUL-2013  FRI )

超勁 Happy 呀   因為聽日 Off   等咗好耐嘛 ~

諗住 Happy Friday 食碎蛋吞拿魚飛碟   點知間嘢無咩冷氣   有啲熱添呀   所以即轉場食奄列喇 ~

無嘢做   唯有上網等 Lunch Time 啦 ~

早餐仲未落格   所以 1 點先食 Lunch Box   飽到呢 ~

放工番媽咪屋企食飯   依家我唔會一次過飲一碗巨湯先   分 2 次飲   可能依家天氣熱   唔係咁想飲湯   同埋飲到肚脹脹   真係食唔到飯 ~  

家姐 7 點唔夠就番到嚟   即刻開飯喇   食完飯就食生果   個口不停食不停講   好攰呀 ~

同家姐 8 點半走喇   里奧大人又啱喺大陸放工   番到嚟都差唔多 10 點   佢喺 Burger King 食餐   食唔哂啲薯條又比我食   對我好到呢   好在我為食  唔係就嘥哂啲嘢啦   哈哈 ~ 

沙茶牛仔骨 + 炒菜心 ( 11-JUL-2013 )

( 11-JUL-2013  THU )

又到星期尾喇   最開心呢   不過成日以為今日係星期五呀 ~

今日都幾熱   但我着中袖裇衫又唔覺好熱喎   但有時着短袖 Tee 就覺得熱   可能裇衫質地薄啲   因為我真係好耐無着裇衫 lu ~

早餐食芝腿治烘底   如果家姐喺附近做嘢就好啦   可以一齊食早餐   Share 食唔同嘅嘢   好似好豐富咁呢 ~

菇場忙咗陣啦   之後就 Hea 等到 Lunch Time ~

叮飯嘅時候   8 卦叫我入 Pantry   原來尋晚同事喺中山食飯   叫咗碟燒鵝無人食   所以留比我哋加餸   真係好喇   呢期都好想食鵝 ~

放工去街市買菜   街市真係好熱   唔知係咪咁樣   所以賣嘢啲人特別燥呢   不過我都係去開嗰幾檔買嘢   佢哋比較老實同有禮貌   喺街市入面係好難得㗎喇 ~  

番到屋企上身喇   即預備晚餐   開機洗衫   抖陣就煮飯喇   里奧大人 8 點先放工   咁我食先喇   因為我想去散步呀 ~

是日晚餐 - 沙茶牛仔骨 + 炒菜心

沙茶牛仔骨 - 想整黑椒汁   不過又唔想咁刺激   又記得有罐沙茶醬   想快快趣清埋佢呀 ~

炒菜心 - 之前喺 Ikea 買咗個脫水膠盒   放啲菜入去   拎幾拎就 Fing 乾哂啲水   勁正呀   所以依家炒菜就會乾身好多呢 ~

里奧大人 8 點幾番到嚟   之後等埋佢食完   我想幫佢洗埋碗先出去散步   估唔到佢又話陪我   咁都好   一齊做下運動   出一身汗真係好正 ~

最鍾意番到屋企即沖熱水涼   熱水再凍水   正到爆   之後食蘋果   依家想每晚食啲生果   好似健康啲咁 ~

今晚又 11 點瞓喇   呢幾日飲咗中藥   條腰真係唔痛   但都係瞓得唔係咁好   所以想早啲瞓呢 ~