蜜糖雞翼 + 蒜芹炒米粉 + 芥蘭 ( 31-MAR-2014 )

( 31-MAR-2014  MON )

呢個星期都係落雨   真係聽見到令人無咩 Mood 咁呢   我覺得呢啲天氣令人眼瞓先最慘   哈哈 ~

天黑黑   所以早餐食自己想食嘅嘢   就係吞拿魚碎蛋飛碟   感恩去到無人   可以坐自己鍾意嘅位呢 ~

菇場又忙啦   都係 11 點搞掂   之後 Hea 過喇 ~

差唔多 1 點先食辛辣杯麵   所以好似食完好快就要開工咁   哈哈 ~

無啦啦超勁眼瞓呀   勁食話梅薑止眼瞓   我好鍾意食㗎 ~        

好在今晚唔駛去買餸   咁啲時間好用好多呢 ~

好鬼餓呀   所以快煮快食   咁里奧大人又話差話唔多 8 點半先番到屋企   咁我就即沖涼   之後再煮出前一丁比佢開心下呢 ~   

是日懶餐 - 蜜糖雞翼 + 蒜芹炒米粉 + 芥蘭 

蜜糖雞翼 - 好有心機焗㗎   我自己覺得非常靚仔   Whatsapp 比家姐   佢都話好靚仔   我話無咩幾何咁靚   要落足心機欣賞呢   哈哈 ~ 

蒜芹炒米粉 - 勁想食蒜芥炒米粉好耐㗎喇   不過里奧大人唔鍾意食炒米粉   仲要係齋添   咁所以呢個米粉係我自己獨享   就咁撈豆板醬已經好好味   之後家姐又話好正喎   幾咁俾面呀 ~  

芥蘭 - $8/斤   又大大棵   方便洗呀 ~

等埋里奧大人沖完涼就睇 "心計" 喇   今晚我睇睇下都瞓着咗   因為真係好鬼攰   所以 10 點幾都入房瞓 lu ~

梅菜蒸鯇魚 + 菠菜 + 芫茜皮蛋魚片湯 ( 30-MAR-2014 )

( 31-MAR-2014  SUN )

今朝 10 點起身   梳洗之後就去食早餐 lu ~

沖埋涼就番教會   之後就番屋企休息休息 ~

里奧大人做公司嘢   差唔多 3 點先食 Tea   我要清咖啡 Coupon   所以一定要去麥當勞喇 ~

我同里奧大人講話去麥當勞唔食薯條   唔似去麥當勞   佢話唔覺   話我自己想食就真啦   哈哈  

食完就去買餸   番到屋企都 4 點半   即刻燉肉汁再預備晚餐呢 ~

7 點 15 分有得食   算係快喇   不過其實都應該快啦   就咁灼同蒸之嘛   超勁方便 ~   

是日懶餐 - 梅菜蒸鯇魚 + 菠菜 + 芫茜皮蛋魚片湯  

梅菜蒸鯇魚 - 唔係里奧大人少食魚   我都唔想整魚   因為我知道我實食唔落   同埋買大魚肉嘅時候   我真係勁想走   因為左邊魚佬劏緊條大鯇魚   勁驚啦   咁諗住叫右邊魚佬比 $15 大魚肉   點知佢又拎咗條大鯇魚出嚟劏   咁我真係要走喇   勁驚囉   之後我行去隔離檔買啦   點知仲恐怖   份份鯇魚都郁嘅   超勁驚啦又   之後去番第 1 檔買份唔郁嘅鯇魚   最搞笑係我拎錢嘅時候   跌咗個十蚊喺碟魚度   我叫咗一聲   個魚佬嚇到彈一彈呀   話比我嚇親喎   大佬   我好驚碟魚會郁嘛   好自然嘅反應囉 ~      

菠菜 - $8/斤好抵   所以買嚟食 ~  

芫茜皮蛋魚片湯 - 里奧大人生痱滋   所以煲比佢飲   今次買 2 札芫茜   同埋只係煲 2 碗水   但係白雪雪都唔似芫茜湯嘅 ~ 

搞掂哂就沖涼   食埋生果就睇 "心計" ~

無啦啦落超勁大雨   睇住電視喺好短時間之內由黃雨變紅雨再變黑雨   啲雨聲仲好大聲   遮蓋電視聲   但無理由開到電視機咁大聲家嘛   所以最後要開冷氣呢 ~ 

今晚 11 點瞓喇   呢排勁潮濕   都係早啲瞓好啲~ 

壽司 (外賣) ( 29-MAR-2014 )

( 29-MAR-2014  SAT )

今日係補番 2 月嘅 Off   咁諗住去長洲㗎喇   不過依家唔駛諗啦   天黑黑 ~

瞓到 10 點先自然醒   好在食得切早餐咋   哈哈 ~

食完就番上屋企沖涼   之後行雷閃電落勁大雨   所以要等一陣先出去 ~

里奧大人就去銀行整嘢   我就去 Mega Box 買戲飛先 ~

買完戲飛都係 12 點幾   里奧大人坐 Shuttle Bus 又塞車   所以我去 H & M 行陣先   今次勁開心   因為買咗 1 件外套 1 件 1 衫同 2 條 Legging   全部都好鍾意呢 ~

原來都已經 1 點半   所以我去搵食先   之後無耐里奧大人都到 lu ~    

今次試食嘢   就係去 "喇沙大少" 食 Lunch   我覺得 OK 啦   因為我其實唔餓   但又想試下   哈 ~

馬來海鮮喇沙 (大蝦, 蜆肉, 蟹柳, 魚蛋, 豆卜, 雞蛋)

馬來魚蛋濃蝦湯麵

馬來拉茶 / 馬來拉咖啡

食完去 AEON 買嘢飲   之後就去戲院喇   今次睇 "Noah"   由 3 點 10 分睇到好似 5 點幾   今次買埋副 3D 鏡   $6 對又抵喎   最正係下次可以用得番   如果記得帶嘅話 ~

諗住約水姑食飯   不過佢好忙   所以我哋自己食算喇   但我哋又未餓   咁就去大眾睇書   都睇咗 1 個鐘咯 ~

去完 Ikea 買香草三文魚就去 AEON 買壽司番屋企食   今晚唔坐 Shuttle Bus 喇   所以打的番屋企   爽 ~

番到屋企都已經 8 點   咁就要開餐喇   早食早消化 ~

沖埋涼就睇 "心計"   今晚 11 點幾都有啲眼瞓   都好   我都唔想太夜瞓呢 ~

Istanbul Express @ 尖沙咀 ( 28-MAR-2014 )

Authentic Turkish style salad 土耳其特色沙律 (蕃茄 / 青椒 / 洋蔥及洋芫   配以橄欖油及檸檬碟) - 衰 mi 啦   話好似碟血淋淋生肉咁   搞到我唔想食   不過我覺得有陣 "隔肋底" 味 

Lavas Bread 土耳其式薄包餅 - 正宗食法係細細塊包住 Salad 食   包到好似雪糕筒咁形狀呢

Turkish Ezme Salad 土耳其依絲美沙律 (青瓜片 / 洋蔥 / 蕃茄 / 羊乳酪及香草   配以橄欖油及檸檬葉)  - 好酸   不過又幾醒胃   但食唔哂   我打包番屋企食   惜食也

Sigara Boregi 土耳其式春卷 - 其實即係炸芝士春卷   味道好似油炸鬼

Chicken Shish Roll 土耳其式烤雞肉粒卷 - 我覺得無特別   因為我仍然覺得喺泰國食嘅 Kebab 係最好味呢      

Apple Tea 蘋果茶 - Menu 個杯好靚   所以叫嚟飲   點知原來係白色杯碟   勁失望

Turkish Lemonade Drink 土耳其式粒粒檸檬特飲 - 阿 mi 飲嘅  佢最鍾意酸咪咪嘅嘢

Turkish Tea 土耳其拉茶 - 問咗係咪 Menu 隻杯先叫嚟飲   我好鍾意佢哋啲杯   細細隻好得意   同埋 阿 mi 話 8 折就飲多杯啦

Ashure - 我哋想諗下食咩甜品之際   Waiter 突然拎碗甜品比我哋   話無花果咩咩   雖然甜   但又幾好味   同埋都有好多料   不過最驚係有提子

( 28-MAR-2014  FRI )

Happy Friday 喇又   仲係勁潮濕天氣 ~

早餐食吉列魚柳餐   因為突然好想食炸嘢呀 ~

菇場忙呀   所以好快又到 Lunch Time 喇 ~

Lunch 食酸辣米線   又係突然好想食酸辣嘢   但食完真係好飽好飽 ~

又繼續忙啦   好在 5 點就忙完   可以抖陣   因為真係好攰呢 ~

今晚約咗阿 mi 去尖沙咀食飯   所以放工就搭地鐵   Join 埋阿 mi 一齊喺尖沙咀地鐵站等呢 ~

約咗 6 點 15 分   不過我遲咗 10 分鐘先到   好在之前針灸都係喺 P 出口   如果唔係會更遲   哈哈 ~

今餐食土耳其菜   當然由阿 mi 帶路啦   今晚有啲風   但啲風吹埋嚟係好立黐黐咁   非常之唔舒服呀 ~

Book 咗 6 點半   去到都無咩人   但我又覺得 OK 喎   起碼唔嘈嘛   我哋仲坐窗邊位   咁就更好添 ~

我好鍾意佢哋啲燈

第一次食土耳其菜咋   所以無頭緒食咩   個 Waiter 比完餐牌我哋   我哋研究完一輪又傾下偈   唔記得要 Order 食物   之後 Waiter 問我哋食咩   我哋又再睇下食咩好   哈哈   咁問佢有咩好介紹囉   佢話食咩就食咩 ~   

阿 mi 買咗 2 個糯米糍比我同里奧大人   實在太客氣喇 ~

今晚真係傾傾傾   傾傾傾   個口好攰呀   因為個口唔係食嘢就係講嘢   無停過   今晚好開心呀   因為阿 mi 講咗好多嘢呀   平時我係口水婆嘛 ~

間餐廳好靜   所以傾得非常之舒服   完全忘我境界   之後我望望下得番我哋同另一枱咋   咁即望下幾點   原來已經 10 點 18 分喇   坐咗差唔多 4 個鐘   呵呵   咁之後我地快快趣玩埋自拍   影咗好多都唔得咁   阿 mi 又要影角度   笑死咗   笑到有啲熱添呀 ~

呢餐抵呀   因為 Ppenrice 有 8 折   真係全靠阿 mi 上網 Check 咋   其實次次同佢食飯   我都無嘢要搞   因為佢會問我想食咩同埋邊區   我講完之後佢就即刻做嘢   超級快手   如果靠我就真係邊到都唔駛去 lu ~

又係由阿 mi 帶路去地鐵站   佢話我真係完全唔記得點行番出去   我唔認路嘛   試過里奧大人接我放學   之後我懶醒帶佢行條 Short Cut 去巴士站   點知原來學校隔離係有個巴士站   行咗好多冤枉路呀   自此里奧大人唔再相信我所以嘅 Short Cut 呢   哈哈 ~

差唔多 11 點幾就番到屋企   我即沖涼啦   頭先地鐵車廂勁焗呀   再加埋行番屋企   真係出汗呀 ~

雖然我同里奧大人都飽   同埋好少咁夜食嘢   不過都要食埋個糯米糍   襯新鮮食先好味嘛 ~

又 12 點幾先瞓   好在聽日 Off 可以自然醒咋 ~       

嘉華大酒樓 @ 官塘 ( 27-MAR-2014 )

金腿麒麟蒸花尾躉球

鎮江焗肉排 - 初初以為比咗京都骨   因為鎮江骨顏色唔係咁家嘛  

豉油雞 (半隻)

沙薑雞腳 - 上次見到人食   所以勁想食   估唔到好味喎   開心開心

( 27-MAR-2014  THU )

今日雖然潮濕   但有太陽咁都唔錯   但如果有啲風就更好啦 ~

早餐食芝腿治烘底   今次烘得好靚仔喎   所以啲芝士係半溶狀態   好好味呀 ~

菇場忙咗陣   諗住 Hea   點知勁忙添 ~

又未餓   又係行到 1 點先買嘢食番菇場   出面勁熱呀   最慘係無風 ~

忙多個幾鐘就搞掂   唔知頭先係咪熱得滯   所以有啲眼瞓 ~

放工即走喇   今晚同埋媽咪 家姐去嘉華食飯   媽咪又拎咗啲淮山合桃豬展湯比我飲   唔怪得我咁飽咁啦 ~

媽咪同工人上屋企先   我就同家姐去阿信屋睇零食   今次勁呀   忍到手唔買韓國辣椒醬   雖然想買好耐   但再諗下又唔知幾時先整   所以都係唔買喇   我想清哂屋企啲醬呀 ~

差唔多 8 點就走喇   里奧大人都已經番到屋企   仲食完飯添喇   如果尋晚佢咁早放工就好啦   邪 ~

又睇 "心計"   不過我 10 點 15 分都瞓喇   超級勁攰   今晚里奧大人話要開冷氣瞓喇   無風好難頂呢 ~

別府 @ 九龍灣 ( 26-MAR-2014 )

燒麵豉飯團

炒野菜

鬼石坊主地獄拉麵 ( 1 辣 )

三文魚壽司 / 山葵八爪魚軍艦 - 我覺得 d 三文魚壽司   好似好多條肥虫一齊爬上碟到咁   嘻嘻

( 26-MAR-2014  WED )

今日無風   又 up up 濕濕   呢 d 天氣真係好難頂 ~

無啦啦想食出前一丁   雖然食唔哂   但都覺得好滯咁   下次都係食米粉算喇 ~

老闆又喺隔離房開會   好在我都有嘢做啫 ~

Lunch time 又未餓   所以周圍行下   行到 1 點就買麵包番菇場食 ~

吞拿魚包超好味   又多餡   菠蘿包就麻麻地

又忙啦   差唔多 3 點就搞掂   可以 hea 過   不過個頭有 d 痛   慘 ~

放工即番屋企   今晚唔煮飯喇   想去稻香食麻辣雞煲   不過里奧大人話喉嚨有 d 唔舒服   所以唔食喎 ~

佢 8 點先放工   等到悶   之得求其食個麵就算   不過好在 Pokopang 有 free 道具   咁我可以狂玩   玩到眼都濛埋   慘 ~

最後去別府開餐   食完就即番屋企沖涼喇   之後一路睇心計一路打機   眼都濛埋   玩到差唔多 12 點先瞓呀 ~