京蔥炒燒鴨 + 黑椒牛扒 + 瑤柱燜節瓜 ( 13-MAR-2014 )

( 13-MAR-2014  THU )

尋晚 10 點半瞓喇   雖然都唔係超級精神   但起碼起身嗰下唔會懶床呢   同埋我覺得早啲瞓   發啲夢都好似開心啲咁   如果太夜先瞓覺   可能驚唔知醒   會有壓力   發啲夢係鬼怪啲咁呢 ~

今朝有啲餓   所以食餐蛋治 ~

菇場又忙   雖然比以前忙咗   但唔駛見到 Partner 真係好鬼開心   哈哈 ~

Lunch Time 未餓   所以出去行陣先再買燒賣粉果番菇場食   今次勁呀   食 4 隻粉果 + 燒賣   因為之前食 2 隻好似唔飽   但今次食完 2 隻已經好鬼飽   依家有啲驚粉果 ~

今日 CC 勁得閒   係咁同我 Skype   之前佢日日忙到爆   係完全係無 Skype 囉   所以我話今日同佢講足一年 Skype 講嘅嘢   之後佢又成日同我倒數放工時間   因為佢放 6 點 15 分嘛   所以好羨慕我放 5 點半   不過我話我放工之後係最忙喎   反而佢唔駛煮有得食   到我羨慕番佢啦 ~

放工去養和堂買枝雞骨草比里奧大人飲   最衰自己唔識煲啦   唔係間唔中可以煲比佢飲都好 ~

去惠康買京蔥   $15/2 Pack   咁我唔買哂 2 Pack 京蔥啦   太多喇   所以買多 Pack 青瓜   其實都唔知買嚟做咩   哈哈 ~   

今晚差唔多 7 點 45 分先食飯   又係自己食先啦   因為都唔知里奧大人放幾點   我都唔會打比佢   我唔想佢覺得我催佢咁呢   同埋佢喺公司做夜啲   咁就唔駛拎部電腦番屋企   個背囊輕好多 ~

是日晚餐 - 京蔥炒燒鴨 + 黑椒牛扒 + 瑤柱燜節瓜  

京蔥炒燒鴨 - 尋晚食唔哂啲燒鴨   咁就整埋佢啦   加埋啲四川擔擔麵醬一齊粉炒   諗住辣辣哋   點知食落好鬼鹹呀   救命 ~

黑椒牛扒 - 我覺得今次無咁 Overcook   算唔錯㗎喇 ~  

瑤柱燜節瓜 - 要清埋 2 樽瑤柱   所以又整呢個餸 ~

洗埋碗就諗住沖涼   咁啱家姐打嚟   把聲扮到好慘咁   嚇到我個心沉一沉   之後話聽晚唔番媽咪屋企食飯   因為姐夫其實已經入咗兩晚醫院   之後話佢因為痛到起唔到身   叫個工人即刻扶佢入醫院   但唔知係咪坐骨神經痛   因為仲等緊報告   咁我話梗係陪個老公啦   食飯幾時食都得 ~

里奧大人差唔多 9 點就番到屋企喇   不過都唔得閒陪佢食飯   因為我要熨 2 機衫呢 ~

今晚又睇心計   但我 10 點半就瞓先喇   真係好眼瞓呀   希望係潮濕天氣先咁早瞓啦   如果晚晚係咁   我覺得好似無哂私人時間咁   哈哈 ~