元氣壽司 @ 九龍灣 ( 30-SEP-2014 )

( 30-SEP-2014  TUE )

今朝早餐唔食咁飽   好在唔餓   哈哈 ~

菇場唔太忙   所以 Hea 到 12 點半就即走喇 ~

約咗媽咪飲茶   飲到差唔多 2 點半   我上媽咪屋企休息   媽咪就去做運動 ~

Book 咗 5 點   咁我都係諗住 3 點 45 分出門口㗎喇   上到媽咪屋企又瞓唔到   點知 3 點半先嚟瞓着   好在 3 點 45 分都自己醒咗   不過我係咪都會 Set Alarm   咁樣有啲安全感   哈哈 ~

依家唔敢坐巴士啦   所以我要搭地鐵   差唔多 5 點 45 分先到我   講解手術過程   簽埋手術同意書就搞掂㗎喇 ~

煮唔到飯 lu   本來諗住坐巴士   不過里奧大人話可能準時放工   咁我搭地鐵番屋企啦   咁一定唔會塞車嘛 ~

又元氣壽司啦   今晚都好快有位   感恩 ~

落雨呀   所以食完就番屋企喇 ~ 

抖陣就沖涼休息   實在太振奮喇   因為聽日連放 2 日假   不過呢排都好鬼攰   11 點幾都瞓鬼咗 lu ~

榨菜木耳肉鬆擔擔麵 + 菜心苗 ( 29-SEP-2014 )

( 29-SEP-2014  MON )

尋晚瞓得好好   即係無半夜起身去廁所   哈哈 ~   

心大心細尋住食早餐之前去買生果   點知 8 卦 Whatspp 我喺邊度食早餐   咁我都唔買生果喇   因為行嚟行去好鬼熱   寧願食完 Lunch 之後去買   當散步 ~

菇場唔忙   因為依家唔駛我做嘢嘛   不過如果有嘢要佢哋做   就要等下午先教哋   佢哋一定要喺朝早清哂自己嘅嘢先 ~

Lunch 食出前一丁 + 燻蹄   勁好味   不過係時候要停一停燻蹄   我唔想咁快食到驚呢 ~

好喇   2 點半教佢哋做 Report   之後 4 點半再教佢哋新嘢   教完之後原來已經 5 點半   要放工啦 ~

今晚去百佳買鯖魚   $7.9/Pack 咋   買咗 6 Pack   咁休養期間焗嚟食都好   唔駛出街   呵呵 ~

買完番屋企   洗埋菜就煲菊花茶   之後開機洗衫喇   又抖陣就煮嘢喇 ~

里奧大人 7 點半放工   咁我都等埋佢一齊食 lu ~

是日懶餐 - 榨菜木耳肉鬆擔擔麵 + 菜心苗 

榨菜木耳肉鬆擔擔麵 - 差啲唔記得佢哋嘅存在   所以快快趣食埋佢哋先 ~

菜心苗 - 百佳買㗎   $10/Pack   真係好少   但我又唔會買 2 Pack   唔抵囉   哈哈 ~

搞掂哂    沖埋涼都已經 10 點 lu   勁攰   所以睇多陣電視   11 點即瞓喇 ~

鵝掌翼 (外賣) + 燻蹄 (外賣) + 粟米蛋花湯 ( 28-SEP-2014 )

( 28-SEP-2014  SUN )

今朝 8 點 45 分起身 lu   食埋早餐   番上屋企沖埋涼就要番主日學喇 ~

草莓果醬

崇拜完畢就行去價真棧睇嘢   依家多數買啲黑芝麻食品飲品   都無買薯片好耐 lu   依家真係要錫身喇   哈哈   買埋燻蹄同掌翼就番屋企   諗住去 Happy Lemon 買珍珠奶茶   點知執咗   天呀   我最鍾意嘅 Happy Lemon 同別府都執咗   勁傷心呀   因為我覺得佢地水準穩定   同埋之前嘅鐵匠又係好食   不過又係執咗 ~

番到屋企抖陣   因為我要比封超級大利是比家姐做生日禮物   所以約佢 2 點幾喺停車場交收   之後就同里奧大人食 Tea 喇   勁想飲凍咖啡   所以一定去大快活 ~

食完要即番屋企喇   里奧大人要做 Forcast Report  等佢個勢應該有排做 lu ~

今晚諗住徑步   所以 6 點半開餐喇 ~

是日懶餐 - 燻蹄 (外賣) + 鵝掌翼 (外賣) + 粟米蛋花湯  

燻蹄 (外賣) + 鵝掌翼 (外賣) - 懶呀   唔想出街食   所以買燻蹄   買多 2 隻鵝掌翼比自己   咁都要 $30   都貴呀   因為之前買過係 $12/隻咋 ~

粟米蛋花湯 - 仍都係懶去街市買菜   所以飲粟米湯   哈哈 ~ 

諗住 8 點徑步嘛   咁 7 點幾喺梳化睇電視   睇睇下都瞓咗   不過都係瞓咗 15 分鐘   8 點啱啱醒   但里奧大人話徑唔到步喇   個 Forecast Report 仲未搞掂   咁我即沖涼喇 ~

今晚 11 點要瞓喇   星期一番工要好有精神呢   哈哈 ~

金麥泰泰國菜館 @ 九龍城 ( 27-SEP-2014 )

拚盤

串燒半打 (牛 / 豬)

冬蔭功湯

芒果糯米飯

椰青

( 27-SEP-2014  SAT )

今朝 8 點起身   但整呢樣嗰樣   8 點半先出門口   勁趕呀 ~

食埋早餐都好在遲咗 5 分鐘番到菇場咋   食完再趕番菇場真係勁熱 ~

菇場唔忙   不過有嘢都唔願做啦   Holiday Mood 嘛 ~

放工即走   去埋萬寧買嘢就番屋企喇 ~

同里奧大人 2 點幾去譚仔食嘢   行陣就番屋企 lu ~

里奧大人做公司嘢   做到 5 點   佢之後就瞓咗半個鐘   起身就出發去九龍城喇 ~

今次去金麥泰   以前間唔中會去食   不過依家應該唔會再食啦   因為食完好口渴囉 ~

好鬼飽   所以行下 KCP   去埋 AEON 超市買嘢飲   好感恩買到有家姐個名嘅可口可樂呀 ~

坐巴士番屋企   抖 10 分鐘就出去徑步喇 ~

我徑咗 4 個圈就番屋企沖涼先   之後里奧大人都番埋嚟喇 ~

今晚 12 點先瞓   咁真係太夜咯   因為聽朝要 8 點幾起身嘛 ~

雙丸出前一丁 ( 26-SEP-2014 )

( 26-SEP-2014  FRI )

終於又星期尾喇   呢排成日都好攰咁   所以好期間星期六日可以休息呢 ~

早餐食奄列餐   勁飽 ~

真係好奇怪   依家所有嘢都交比同事做   佢地做完之後我就 Check   所以老實講   我真係幾得閒   所以呢排喺菇場都好鬼眼瞓   哈哈  因為本來係我忙家嘛   但依家唔駛我忙囉 ~

Lunch Time 出去買咖哩魚蛋 + 炒米粉   好耐無食喇   覺得勁好味   食完就同 8 卦去一田買餃子   之後再去 759 買乳酪啫喱   本來仲諗住去零食店買零食   不過頭先買餃子等咗好耐   唔係就可以買埋零食囉 ~

今晚里奧大人唔知同唔同到水姑食晚飯   所以我唔煮喇   唔係煮咗無人食 ~

放工番屋企   依家真係涼咗   我開咗 1 個鐘頭冷氣就覺得勁凍   之後開窗開風扇就算 ~

差唔多 7 點幾就煮麵食   食完抖陣就沖涼   好感恩里奧大人 8 點放工   咁佢就買 Subway 番屋企食呢 ~

我同里奧大人講   真係好想見佢  同佢傾計啦   佢呢排做好多 Proposal   所以佢一番到屋企就入房做嘢   之後佢話我成日要黐住佢   我話呀   你係我個頭嚟家嘛   咁等如青蛙比人切咗個頭   咁青蛙身會點吖 ?!   會越走越遠囉   你係咪想我唔黐你   越走越遠吖   其實我覺得自己講嘢真係九唔搭八   哈哈 ~

今晚里奧大人沖咗杯黑芝麻比我飲   佢話飲咗 2 晚   好似好瞓咗   咁我又飲啦   我覺得好怪呀   哈   因為好似飲緊唔溶嘅芝麻糊咁   即係最尾先飲到芝麻粉咁呢 ~

我堅攰嘛   所以 11 點要瞓先喇   希望今晚好瞓啦 ~

嘉華大酒樓 @ 官塘 ( 25-SEP-2014 )

八珍豆腐煲

金銀蛋莧菜

蒸魚

叉燒 / 燒鴨

西洋菜生魚豬骨湯

( 25-SEP-2014  THU )

里奧大人今朝上大陸   我就瞓到 7 點 45 分   不過成日發夢啦   因為驚鬧鐘唔響   所以有壓力呀   但我又無可能同里奧大人一樣咁早起身家嘛 ~

無咩胃口   早餐食奶油多 ~

菇場唔忙   所以做番之前未有時間做嘅嘢啦   唔想成日坐喺度無嘢做嘛 ~

Lunch 食酸辣米線   唔知係咪食得密得滯   食完有唔想再食嘅感覺   哈哈 ~

依家阿花同阿齋做完啲嘢   我就要 Double Check   其實我覺得壓力仲大   反而自己一手一腳做    再自己 Check 番都無咁大壓力囉 ~

今晚同媽咪 家姐食飯   真係整定   本身係聽晚食嘅   因為姐夫放假   點知姐夫最後唔放假   所以家姐就話今晚食   我話仲好啦   因為里奧大人上咗大陸   我都係自己食   同埋我最想係佢喺香港   我可以煮飯比佢食嘛   所以我覺得星期四同媽咪食飯最好 ~

食完都差唔多 8 點   又同家姐行 759   我以前叫阿信屋   依家聽家姐講得多 759   我都叫埋 759 添 ~

家姐啦   講嘢一舊舊   仲話我聽嘢一舊舊   幾咁衰呀   事緣我食開嘅乳酪啫喱 (包裝面有椰子 / 燈同唔記得咩) 做特價 $7.8   咁我食開係有埋生果嘅   但呢間 759 就無哂貨   得椰果乳酪啫喱 (包裝面係 1 個大椰子)   咁家姐指住個椰果乳酪啫喱面   同我講話唔好以為得椰果呀   其實仲有燈同提子㗎   咁我即刻倒轉睇啦   但真係見唔到燈同提子囉   咁我問佢   咁同我買開嘅有咩分別 ?!   如果大家都係椰子 + 生果   點解用 2 個唔同包裝 ?!   我真係諗住買個椰子乳酪啫喱試下㗎   之後家姐話叫工人 Whatsapp 屋企果個乳酪啫喱比我睇   之後我咪話佢囉   妳食開嗰隻咪同我果隻一樣囉   咁妳唔好指住椰果乳酪啫喱話有生果嘛   真係呢 ~    

同家姐 9 點鐘走人喇   我番到屋企無耐   里奧大人都番埋嚟 lu   咁我可以安心沖涼 ~

依家開始已經諗定入院前同出院後嘅嘢   咁我知道我真係要做手術嘅時候   叫里奧大人幫我 Download 愛情公寓比我睇   佢幫我整咗好耐好耐   要整到最好嘅比我睇   其實真係好感動   因為佢點攰點忙都會抽時間整   咁尋晚我上網 Check 醫院有 Wifi   佢即刻話買部 Ipad 比我   等我無咁悶   其實佢之前都話買比我   但我話唔要啦   因為做完手術之後嗰 3 日真係好攰   食嘢都唔想   仲邊有心情上網睇戲吖   但我知佢仍然想買比我   不過我嚇佢   我話一陣拎 Ipad 唔小心跌落傷口嘅位置就慘喇   佢嗰下真係驚   哈哈 ~

今晚勁呀   差唔多 12 點先瞓   聽朝就知死   哈哈 ~

齋滷味 + 燻蹄 (外賣) ( 24-SEP-2014 )

( 24-SEP-2014  WED )

成日仲以為今日係星期二添   之後里奧大人話係星期三   感覺即刻唔同咗   因為好快又星期六咁呢  ~

經過別府   見到裝修   咁即係又摺埋啦   無咗飯堂喇   喺淘大嚟講   水準最穩定就係佢   同埋坐得又舒服   點解咁呀   嗚嗚 ~

食芝腿治烘底   依家覺得食烘底好乾咁   哈哈 ~

依家開始由阿齋同阿花主力做我啲嘢   所以就要教佢哋點點點   不過實在太多濕碎嘢   所以真係記得要咩就寫低   唔係肯定我唔記得講   始終人哋係 Part Time 幫我   我唔想甩甩漏漏   總知寫得幾多得幾多啦   同埋最緊要比我手機號碼佢哋   有咩可以搵到我   我直接話佢哋知   不過佢哋對我好好   係都話唔打比我   叫我休息  有咩事會搵船頭幫拖   叫我放心 ~

Lunch Time 喺菇場淥超力米粉   加埋尋晚啲雞翼   咁一路食一路 Load 相   手快快 Delete 哂前兩日嘅相添 ~

又開始教佢哋做嘢喇   佢哋終於知道我做嘅嘢係幾咁煩   其實係幾咁多餘   不過無計啦   我提出過修改㗎啦   不過最後都話要依舊做法   是鬼但啦 ~

放工走人   今晚去幾度地方買嘢   首先幫里奧大人買麵包啦   之後去百佳買齋滷味   最後去太興買燻蹄   點知太興得番 1 隻唔靚嘅燻蹄   師傅叫我唔好要   咁我問佢仲有無  佢話無   我話 Oh My God   佢喺度笑   可能佢心諗   無燻蹄駛唔駛咁大反應呀   哈哈 ~

又要行埋轉頭去燒味店買燻蹄   好鬼攰呀 ~

番到屋企灘陣先   差唔多 7 點幾先食   因為食出前一丁   所以要食完先沖涼   唔想食到成身汗 ~

里奧大人 8 點半先放工   又係煮丁佢食啦   佢最開心 ~

黐線佬佢食食下麵   好開心咁行埋去開背囊   笑哂口拎個 Iphone 6 盒出嚟   再遞比我   同我講話 : 唔好話我對妳唔好喇   咁我其實開心係因為可以比我自己用開嘅 Note 2 比家姐嘛   之後條友笑哂話係個盒嚟㗎咋   幫同事拎上廠咋   真係黐黐咃線   不過見佢整鬼到我   佢笑得咁開心   我都開心嘅   但點都要鬧佢賤人囉   哈哈 ~    

今晚我 11 點瞓先喇   因為里奧大人仲做緊公司嘢   所以唔等佢 lu ~

蠔油燜雞翼 + 菜心 ( 23-SEP-2014 )

( 23-SEP-2014  TUE )

雖然尋晚 10 點半瞓   但半夜去咗 2 次廁所   唔通紅豆沙真係咁利尿   哈哈   所以今朝都係攰囉 ~   

早餐唔食咁飽   因為晏晝出去食 ~

菇場唔太忙   所以拿拿聲 Pack 箱   咁就了咗心事啦   依家同事開始做我嘅嘢喇   不過佢哋做完都要幫佢哋對一次 ~

8 卦叫我陪佢行一田   所以我 Lunch Time 都出去食牛腩米   1 點 15 分先喺一田等呢 ~

4 點又要教同事嘢喇   差唔多 5 點幾先教完   聽日就等佢哋實習下喇 ~

放工遲咗 10 分鐘   不過又唔趕嘅   因為依家有多 1 架巴士選擇 ~

去百佳買菜   順便買啲參蜜就番屋企喇 ~

番到屋企即開機洗衫   之後抖陣又預備晚餐喇 ~

是日懶餐 - 蠔油燜雞翼 + 菜心 

蠔油燜雞翼 - 水姑星期日比我㗎   所以今晚煮翻熱就得   勁方便 ~ 

菜心 - 1 Pack 要 $10   真係好少囉 ~

里奧大人 7 點 45 分先放工   咁我都食住等喇   之後再一齊食紅豆沙   把口好似無停過咁 ~

搞掂哂就沖涼喇   食埋生果就休息喇 ~

今晚 11 點瞓   希望唔好半夜又去廁所啦 ~

水餃 + 陳皮蓮子紅豆沙 ( 22-SEP-2014 )

( 22-SEP-2014  MON )

好攰呀   呢排真係超級攰   好在就唔會話唔想番工咁囉   唔係就慘 lu   呵呵 ~

我深信早餐食飽啲會精神啲   所以星期一真係更加要食飽啲添呢 ~

番到菇場即做 Report   之後 Pack 箱喇   勁攰   不過只係搞掂一間公司   仲有另一間就聽日先 Pack ~

Lunch Time 出去行陣先食嘢   食完又行陣就番菇場喇 ~

因為我放假嘅時候由 Shipping 同事幫手做我啲嘢   所以 2 點半就同佢哋齊開會   最搞笑係傾到渠王   原來佢哋個個都好憎佢㗎   因為成日問人嘢就咁問   唔會 Call 咩客呀咩 PO Number   大佬   人哋唔係做妳一個客家嘛   講嘢唔清唔楚   又無 Email   鬼知妳同客講嗰啲咩鬼咩   咁都好   原來佢哋同我諗法一樣   因為我驚係自己唔鍾意佢   所以先咁諗   原來佢做嘢唔掂係事實   呵呵 ~

傾到差唔多 5 點   不過其實仲有濕濕碎碎嘅嘢   但唔再講喇   等我番嚟自己做都得呢 ~

真係超級勁攰   所以唔買菜喇   直接番屋企   開機洗衫之後就煲糖水   之後就即沖涼喇 ~   

我食咗糖水先   咁里奧大人 8 點放工先等埋佢一齊食水餃 ~

是日懶餐 - 水餃 + 陳皮蓮子紅豆沙 

水餃 - 媽咪星期四食飯果晚話想食餃子   咁家姐一聽到媽咪話想食就會叫工人整比媽咪食   好鬼錫佢㗎   反正整開嘛   又順便整埋比我囉   有鮮蝦水餃同韭菜餃   勁好味呀 ~   

陳皮蓮子紅豆沙 - 補血嘛   如果唔係唔煲呀   哈哈   今次用半斤紅豆   都幾多咁 ~

搞掂哂就食生果啦   依家無菜食就會食生果 ~

今日 Pack 箱用錯力   我手腳好酸痛呀   想喊呢   即刻叫里奧大人幫我搽 Cool   不過好似無咩料到咁   哈哈 ~

今晚勁喇   10 點半即瞓   因為我唔知做咩鬼好凍呀   堅凍喎   我瞓覺要用厚被   平時係薄切切冷氣被咋   里奧大人話我手臂同豬肶都好凍   話我因為着得少衫   之後我話背脊都好凍呀   佢就驚啦   驚我唔舒服呀 ~   

翠河餐廳 @ 九龍灣 ( 21-SEP-2014 )

XO 醬魚鬆腰果炒韭菜花

西檸雞

豉汁蒸鯧魚

腰乳通菜炒牛肉

( 21-SEP-2014  SUN )

今朝 8 點 45 分起身   食完早餐就留屋企沖涼   之後就番主日學喇   感恩有精神呢 ~

依家星期日多數食呢個輕盈米粉   唔駛咁飽   

糯米雞細隻咗好多呀

崇拜完畢就番屋企   之後里奧大人去剪髮   差唔多 3 點就出去食 Tea   行陣又番屋企 lu ~

香茅豬扒撈檬

豬頸肉湯檬

今晚要拎嘢去舖頭   又要拎埋啲嘢比水姑寄去澳洲   所以又約埋水姑食飯喇 ~   

咁我唔駛煮飯就當然休息啦    之後睇睇下雜誌就勁想瞓   5 點瞓到 5 點 45 分呀   呢排唔知做咩   星期六日假期好多時都會瞓晏覺   以前唔會咁 ~

6 點出發   搞掂就去食晚飯   之後上水姑屋企   咁佢就番舖頭整嘢   我哋就喺佢屋企坐陣先 ~

差唔多 8 點就洗好哂   即番屋企喇 ~   

一入屋呢   我就問里奧大人有無比番屋企鎖匙比水姑 ?!   佢 O 哂咀   咁知咩事啦   又要拎番去比水姑   咁佢順便幫水姑買埋電話   一次過比哂佢啦   哈哈 ~

咁我唔陪佢喇   掛窗簾都用咗半個鐘   之後即沖涼喇   抖陣就食芝麻糊   里奧大人 9 點半就番到屋企   頻頻樸樸真慘 ~

今晚 11 點要瞓啦   勁攰呀 ~