節瓜甫 + 蒜芹肉碎炒銀針粉 + 青紅蘿蔔豬骨湯 ( 12-SEP-2014 )

( 12-SEP-2014  FRI )

今朝食芝腿治   其實想食多士   不過覺得奶油多好似仲肥咁   所以唔食喇   哈哈 ~

今個星期老闆同阿 Head 都出 Trip   仲諗住可以 Hea 過   點知忙足一星期   抖下都唔得 ~

本來想食 Flakes   但想比自己開心下   所以都係食酸辣米線   今次小辣又好辣喎   水準真係好唔穩定喇   好在我多數食小辣   唔係辣死我 ~

一早已經入定去 Apple Store Website   諗住睇下訂唔訂到 Iphone 6 啦   點知 2 點 59 分個 Mon 無啦啦閃閃下   咁要熄機啦   係咪咁邪呀   早唔閃遲唔閃   偏偏 2 點 59 分先閃   好在手機可以上網   不過都入唔到去 lu   同埋已經好快比人買哂   最搞笑我叫男同事幫我換 Mon   佢話比佢 10 分鐘   因為 3 點   哈哈   不過佢都入唔到去   但佢朋友就買到囉 ~

忙呀忙   聽日 Off   點都要做哂啲嘢啦 ~

放工番屋企   7 點再打比里奧大人   問佢幾時可以番到香港   咁我先決定煮唔煮 ~

感恩里奧大人 7 點打嚟話應該 9 點前可以番到屋企   咁我都等埋佢先食   因為晏晝食咗碗米線仲係好鬼飽 ~

是日懶餐 - 節瓜甫 + 蒜芹肉碎炒銀針粉 + 青紅蘿蔔豬骨湯  

節瓜甫 - 唔想成日齋煮節瓜   所以煮節瓜甫   其實買咗 2 個節瓜   不過今晚唔太餓   所以煮一個算喇 ~    

蒜芹肉碎炒銀針粉 - 我好鍾意食蒜芹   但里奧大人話用嚟炒銀針粉唔夾喎   韭菜又話唔夾   自己唔鍾意食就話唔夾   不過我唔理啦   蒜芹韭菜都有益   樣樣都要食啲咁先得家嘛 ~

青紅蘿蔔豬骨湯 - 媽咪煲㗎   但唔知點解硬要加陳皮   所以個湯都唔清甜囉 ~

喉嚨有啲唔舒服   勁驚囉   呢排食辣嘢都係咁   唔通要我戒   哈哈哈哈 ~

搞掂哂都 10 點   即沖涼喇   都係 11 點幾瞓   呢排瞓得唔太好   所以一到 11 點幾就好想瞓   但半夜又會醒咗 ~