米線陣 @ 官塘 ( 31-DEC-2019 )

香辣皮蛋拚手拍青瓜 ($17) - 好味呀



手打豬肉丸米線 (滇味酸辣湯-中辣) - 湯底唔酸又唔辣   好在小食嘅辣汁夠辣   加埋落湯底就變咗好辣呢   哈哈



雞脾肉 +  仿松葉蟹棒 + 鮮蝦雲吞米線 (獨家麻辣蕃茄湯) - 小辣完全唔辣



( 31-DEC-2019  TUE )

今日係 2019 年最後一日   呢年過得勁快   特別係由 5月開始超級忙   所以覺得時間過得勁快   有時直頭覺得一日嘅時間係唔夠用添呀 ~

早餐食吞拿魚治烘底   想食酸嘢 ~

菇場忙呀   真係估唔到    之後收到 Email 話今日放 4 點   勁開心呀 ~

再見 2019



又落毛毛雨   所以買牛腩河番菇場食算喇   阿齋問我做咩唔食酸辣米線 ?!   我話真係唔記得有酸辣米線呢回事   佢話點可能呀 ?!   妳咁鍾意食辣   不過酸辣米線少米線都好大碗   所以真係好餓好餓先食食囉 ~



話咁快就到 4 點   即放工番屋企 ~

番到屋企即抹嘢   乾乾淨淨迎接新嘅一年 ~

差唔多 6 點就同里奧大人去米線陣食嘢   之後就拎淘寶喇 ~

番到屋企都 8 點   即沖涼休息   本來想洗衫   但里奧大人叫我唔好洗   一齊睇戲喎 ~

我話點解無咗睇開嘅劇情 ?!   里奧大人話係另一套呀   之後佢話頭先睇睇下都瞓着咗   鬼咩   飲咗啤酒肯定會眼瞓啦 ~

11 點 45 分已經想瞓   但阿 mi 話一齊等到 12 點先瞓   我話夜瞓慘過早起   哈哈 ~

一到 12 點即狂 Send Whatsapp   之後再睇多陣電視   12 點幾先瞓 ~

IKEA Café @ 九龍灣 ( 30-DEC-2019 )

開餐   家姐仲咳   所以唔可以飲汽水

甜辣醬烤豬肋骨 ($63) - 洋蔥圈好味呀   可能好耐無食過   哈哈

小食拚盤 (煙燻蜜糖腸4件 + 脆炸黃金雞翼4件 + 香脆薯格及甜粟米) ($43) - 樣樣都鍾意食

意式肉丸配薯蓉 ($22)

( 30-DEC-2019  MON )

今朝大回南天氣   真係令人乜 Mood 都無   香港應該就嚟無冬天了 ~

早餐食芝腿治烘底   好想食米粉呀   但食唔哂就唯有叫三文治囉 ~

菇場忙下停下   好快到 Lunch Time ~

今日同里奧大人食 Lunch   食完都番菇場喇 ~

韭王叉燒炒蛋飯

艇仔粥

仍然忙下停下   但放工都要第一時間起身走人   因為今晚同埋家姐一齊食飯睇戲呀 ~

放工搭巴士去 mega BOX   去到即拎信用卡同杯   之後再同里奧大人去買衫   佢買咗 4 件衫   買完都要去食嘢喇 ~   

本身諗住同家姐去 CPK 食 Pizza   但買完嘢都 6 點 25 分   家姐又差唔多到   所以趕唔切喇   要轉場去 IKEA Café   最邪係家姐同事比熱狗 8 折劵比佢今晚用   我話唔駛   今晚同佢食好嘢   佢又直接同番同事講話阿妹今晚帶佢食好嘢   哈哈 ~

今晚睇 7 點 10 分嘅逃出魔幻紀 2 霸氣升呢 (Jumanji: The Next Time)   係家姐嘅免費戲飛   諗住淘大 UA 睇架   但時間一係5點   一係 9 點 50 分   我唔會睇囉   家姐話叫我 1 月 1 日睇   但我想同埋佢一齊睇呀   同埋我問佢睇唔睇嘅時候   佢話好呀   佢好少答好家嘛 ~

之後我再睇 mega BOX 時間   居然有 7 點 10 分   感恩感恩   所以話去呢間睇呢 ~

食完都 7 點 05 分   所以即走   再買埋爆谷   我哋 7 點 18 分先進場 ~

片長 123 分鐘   我覺得好笑喎   同埋都幾刺激又幾感人   哈哈 ~

睇完都 9 點幾   行路出番去九龍灣   因為陪家姐去搭車 ~

家姐話佢個 8 卦男同事好想見我   里奧大人好大反應問點解想見我 ?!   我話 8 囉   仲有咩原因呀   哈哈   不過家姐都成日喺佢同事面前提我   有時佢啲 同事有筍嘢   都會話同阿妹講咁呢 ~

感恩大家都好快有車   可以快啲番屋企   哈哈 ~

番到屋企都即沖涼   睇多陣電視   12 點先瞓 ~

打邊爐 @ 阿 Mi 屋企 ( 29-DEC-2019 )

已經有隻貓想偷食喇

今次湯底係鮮冬菇 + 魚頭 + 豆腐 + 鹹菜 + 薑片   我覺得好味道   我當湯飲添呀   嘻嘻

我食咗好多鮮冬菇



鮑魚 & 貴花蚌 - 阿 Mi 全程睇住時間淥㗎   所以口感一定唔會韌

脆肉鯇 - 本來 $90   魚佬放半條鯪魚落張枱嘅時候   啲魚血彈咗落我塊臉度呀   嚇死我呀   之後阿 Mi 勁快手拎咗張濕紙巾比我抹臉   所以魚佬話減 $10 比我呀   哈哈

蝦滑

水餃 & 雲吞 - 今次喺九龍城寨買   味道無牛丸哥哥咁鹹

冰菜

( 29-DEC-2019  SUN )

今朝里奧大人出完門口   我都瞓番   但 8 點又醒咗   咁試下再瞓   瞓到 9 點鬧鐘響 ~

起身即刷牙沖涼   搞掂哂就去 mega BOX 買戲飛 ~

買完都 10 點   食埋早餐就同里奧大人番崇拜喇 ~

明明湯底有好香薑味   點知一落辣椒油   味道變咗超級古怪   嗚嗚 

今日要等里奧大人放工   之後再入荃灣同阿 Mi 喂一齊血拚 ~

里奧大人同事又送咗本簿比我   我好鍾意呢個顏色

里奧大人話驚我餓   買定個椰撻比我食   但我話好飽呀   佢話今朝特登買定   驚我餓會發脾氣喎   唔通我真係試過咁 ?!   不過都應該係㗎喇   我都成日會發脾氣呢 ~

2 點 15 分放工就即搭車去荃灣   差唔多 3 點去到   即 Call 阿 Mi 喇 ~

一見到阿喂   就話等埋佢先食 Lunch   佢即話係佢等埋我先 Lunch 呀   哈哈   事實又係嘅 ~

阿喂送咗胎菊比里奧大人   真係好鬼客氣 ~

好少見阿 Mi 咁期待嘅樣   可能一齊試新嘢呀   哈哈   我哋嚟荃灣   真係靠佢哋帶路搵食㗎 ~

因為碟數多   所以里奧大人就喺張單度寫低記號   咁店員話佢哋唔會睇邊個打邊個   總之會一份份咁上枱   咁里奧大人話囉   你唔睇佢都要睇番自己食啲咩   哈哈 ~

阿 Mi 喂唔食牛   所以我話其中一個有牛就係我同里奧大人   但店員居然將我同阿 Mi 其中一碗對調咗   好在阿 Mi 記得自己食啲乜咋 ~

泰式滷水豬手 ($19) / 泰式酸辣無骨鳳爪 ($19) - 我覺得超級唔抵食喎   雖然知道 $19 唔會好多份量   但都無諗過咁少囉 

阿喂同里奧大人就每人 5 碗   我同阿 Mi 就每人 4 碗

2 啖就可以食哂了

我咃每人影嘅角度都唔同   都幾好玩

老實講   我覺得單碗 $13 係貴   因為真係 2 啖食完   Gimmick 嘢一次就夠   哈哈

食完就去買褲   里奧大人買咗 2 條長褲   阿喂都買咗件長袖裇衫   如果一齊去旅行   肯定買唔停   哈哈 ~

之後阿喂買背囊   阿 Mi 話又提起佢傷心事   阿喂仲串我搞搞震   但其實我真係完全唔記得發生咩事喎   後尾阿 Mi 同我講番   我就記得起喇   大佬   日日傾咁多偈   真係好難記得哂所有嘢   哈哈 ~

里奧大人同阿喂想買皮褸   但又唔啱心水   因為價錢啱但質料唔啱   質料啱時個款又唔啱喎   可惜可惜 ~

咁我同阿 Mi 去買餸   里奧大人同阿喂就搵地方坐陣   差唔多買完   就分頭行事   里奧大人同阿喂去買電陶爐   我同阿 Mi 再去另一度買菜   之後各自歸家 ~

去到阿 Mi 屋企   放低哂啲嘢再去買豆腐   本來買雪糕   又唔記得咗了 ~

入廚房預備無耐   兩個男人都番來喇 ~

阿 Mi 真係越來越似我家姐   買咩新嘢就一定預埋我   依家連杯麵都係咁   實在太有心了 ~

食下傾下   時間過得勁快   同埋成日以為聽日係星期日唔駛番工   哈哈 ~      

9 點幾 Call 的走人   番到屋企都即沖涼   之後再開機洗衫 ~

阿喂送比里奧大人嘅胎菊

里奧大人一見到個杯麵   就話要帶番公司食

家姐話 Berry 瞓得好淋   佢個頭仔係咪壓住張被呢 ?!

睇多陣電視   11 點半都瞓 lu ~

橋鍋居 @ 紅磡 ( 28-DEC-2019 )

豚肉雜菜湯鍋定食 ($45) - 真係好味道   唔知自己可唔可以煮到呢個飯呢 ?!

燒雞扒湯拉麵 ($45) - 我叫里奧大人食其他啦   佢話轉食拉麵   但湯底好淡   最衰我啦   我叫佢食其他   但我又唔食其他

( 28-DEC-2019  SAT )

今朝瞓到 9 點半都自然醒了   里奧大人原來已經沖埋涼搞掂哂   咁等埋我沖涼就去食早餐喇 ~

食完早餐就番屋企抖下   開埋機洗衫   之後就熨衫   因為好鬼飽   想郁下 ~

11 點幾出發去淘大 UA 買飛   但 System 有問題   買唔到飛   咁同里奧大人周圍行下咁啦 ~

差唔多 12 點就去食 Lunch   里奧大人食完就番工   我就去家姐屋企 ~

黑椒鰻魚炒飯 - 幾好味   份量超級多   我哋都食唔哂

叫多 1 個蛋撻   費事食 1 個餐咁肉酸  

約咗家姐喺新都城等   去到都 2 點 lu   同家姐 & 工人去百佳買嘢   家姐買親薯片都問我同工人要唔要 ?!  我話好飽   咩都唔想要唔想食   工人就要咗 2 包辣嘅粟一燒   咁佢聽日可以同朋友一齊食   家姐真係當佢好似係阿妹咁   食咩都會同佢 Share   但條友仔又係蝦家姐   不過算啦   最緊要錫 Berry 就可以   Berry 好聽工人話㗎   反而唔聽家姐話   哈哈 ~

去埋南記買 Lunch    再去埋廣良興買果汁豬肉條比里奧大人就番家姐屋企喇 ~

Berry 企喺我隻腳度睇風景   軟腍腍好舒服呀呢   但我就好痛囉   佢真係完全唔理人㗎   有時我坐喺梳化   佢都直接跳上嚟   一嘢壓落我大脾度   真係好鬼驚佢   哈哈

走肉碎嘅春卷小鍋米線 + Shake Shake 脆春卷

家姐同同事個女一齊整薑餅人   佢同事個女比哂啲肉酸樣嘅比佢   哈哈

其實 Berry 係想瞓   但一聽到有聲就飛走

我勁想抱 Berry   但我未埋身   衰女已經腳撐撐呀   家姐過手比工人又 OK 㗎喎   我話 Berry 應該好驚我抱佢走   所以點都唔肯比我抱呢   嗚嗚

個樣勁衰   哈哈

差唔多 6 點幾就走喇   家姐送我搭巴士   咁啱佢同事都坐呢架巴士   家姐 Whatsapp 佢同事話做咩坐樓下   嚇到佢同事以為家姐都喺巴士入面   仲話點解成日都撞到   哈哈 ~   

買埋生果就去接里奧大人放工   我又想食湯飯   所以又去橋鍋居 ~

食完就番屋企   估唔到只係 9 點 10 分   平時差唔多 10 點先番到屋企㗎 ~

沖埋涼就睇 Youtube   11 點幾先瞓 ~

芹菜蓮藕豬肉水餃 + 高麗菜豬肉水餃 + 白菜仔 ( 27-DEC-2019 )

( 27-DEC-2019  FRI )

今朝早餐食奶醬多   其實仲飽緊   不過費事空肚飲咖啡囉 ~



菇場忙呀   做到 12 點都比自己抖下 ~

Lunch Time 就拎 2 個袋去整番條拉鍊   加條拉鍊原來要 $60   不過加咗就安全啲嘅   但我諗住最多都係 $40 咋 ~

整完再去萬寧買 Body Cream   最後買埋朱古力奶就番菇場   今日 Lunch 就係朱古力奶 + Flakes 喇 ~

咁樣食 Flakes 真係超級方便   食完唔駛洗   呵呵   呢個懶人方法係我跟家姐學㗎   但就一定要買屋企盒先可以咁食囉

之前買 2 支折咗係 $114/支已經覺得好抵   點知今日係 $138/支有 75 折   即係$104/支   激死我   所以即刻買 2 支"鄧"番勻去呀 

忙到 4 點左右就搞掂   又做下自己嘢 ~

放工即走   買埋菜就番屋企喇 ~

諗住 7 點開餐   點知里奧大人塞車   成 8 點幾先番到屋企   等到我都無哂 Mood ~   

是日懶餐 - 芹菜蓮藕豬肉水餃 + 高麗菜豬肉水餃 + 白菜仔

芹菜蓮藕豬肉水餃 - 加咗辣拋豬肉醬汁真係好味好多喎   其實係要清埋呢包過期醬汁   嘻嘻 ~

高麗菜豬肉水餃 - 上次喺一田買興記呢個牌子嘅水餃   味道都 OK   但里奧大人依家食慣咗人手包嘅餃子皮   所以覺得興記啲餃子皮比較厚身   但點都要食埋去先囉 ~      

白菜仔 - 好耐無食菜咁   無計啦   我都好耐無煮飯了 ~

洗埋碗就開機洗衫   沖埋涼就休息喇 ~

今晚同里奧大人睇戲   睇到差唔多 12 點先瞓 ~