翠河餐廳 @ 官塘 ( 19-DEC-2019 )

涼瓜味菜燜斑腩 ($69) - 好味呀   因為我無哂味覺   想食啲酸嘢   哈哈



菠蘿咕嚕肉 ($59) - 啲肉都無炸過咁嘅

( 19-DEC-2019  THU )

今朝天氣灰灰暗暗   加埋落毛毛雨   真係無哂 Mood   哈哈 ~

里奧大人落到樓下先話無拎電話   我就一定會將電話放入手袋   因為我習慣等車先開手機   如果知道無帶手機嘅話就要即飛番屋企   來回都唔見 20 分鐘了 ~

今朝同溫總食早餐   佢以為我幫埋 8 卦攞位   我話唔係喎   之後一齊坐   一路傾一路食都好開心   以前唔係咁鍾意佢   因為覺得佢好 A 字膊   依家合作過   反而覺得佢做嘢係快手快腳   真係估唔到呢 ~



唉   應該感冒呀   可能星期六按摩時攝親   因為之後我個人都開始覺得有啲唔舒服咁 ~

菇場忙呀   真係做到頭暈   阿蟲同我講啲嘢點做   我都叫佢講多次   我有啲頭暈 ~

成個身好鬼凍呀   所以要食熱嘢   Lunch Time 一到即出去買牛筋丸河   再買埋木瓜就番菇場喇  ~

河粉要扣底   阿姐問我中午唔駛食飯㗎 ?!   我話食呢碗嘢都好飽   同埋我 8 點幾先食完早餐   中午食飯會太飽呀

仍然忙   臨放工又有嘢做   不過唔做住喇   留番聽日先做 lu ~

放工即走   一出到街   個人無咁唔舒服   阿花都係咁講   如果唔舒服   喺菇場會更唔舒服   我話可能多菌呀 ~

番到屋企又精神喎   所以即刻抹哂所有櫃   呢排好懶   好似好耐無抹嘢咁   真係唔舒服反而想做家務   怪人也 ~

里奧大人 7 點唔夠放工   但無車又塞車   差唔多 8 點半先番到嚟   諗住去大家樂食牛扒   咩都售罄了   咁轉場去翠河食喇 ~

之前喺台北買嘅白柚果   尋晚拎粒嚟食   喉嚨舒服好多   咁家姐又成日咳   問佢要唔要 ?!   佢話唔要   我話食完喉嚨好舒服   佢叫我自己食   咁我就知道佢想要   因為正路佢點都話唔要囉   之後我呃佢話我有好多   佢話要少少得喇   哈哈

食完都番屋企   開埋機洗衫   沖埋涼都差唔多 10 點 ~

睇下 Youtube   差唔多 12 點先瞓 ~