五指毛桃雞 (外賣) ( 31-JAN-2026 )

其實我唔餓   所以食剩大半隻呀   又要留番聽晚 lu

叫里奧大人食啲飯   食唔哂就留番   但糖水就要今晚食哂去喇

( 31-JAN-2026  SAT )

尋晚去完廁所都好快瞓得番   今朝瞓到 7 點 25 分都醒咗   咁都起身 lu ~

同里奧大人出去食早餐   諗住食完去佢公司坐下   點知食完已經夠鐘搭車番工   哈哈 ~

菇場唔忙又做自己嘢   里奧大人話媚媚留咗好多 Sleepwear 比我呀   所以勁想快啲放工 ~

放工即走   今日搭到快車就同里奧大人一齊去搵媚媚喇 ~

我話自己揀呀   所以里奧大人同媚媚就坐低傾偈   大家各有各忙   哈哈 ~

揀咗個半鐘呀   買咗 2 袋   之後發覺已經 3 點   咁菜菜仔又差唔多到   所以食完再買嚟買過呀 ~

今日同埋姊妹 S 一齊食午餐   佢都買咗好多嘢   最搞笑我初初以為佢係客   仲同佢傾話邊啲好靚   但我着唔到叫佢買呀   哈哈 ~

椒麻雞套餐 ($48)

口水雞套餐 ($48)

酸菜生魚片套餐 ($58)

回鍋肉套餐 ($48)

咕嚕肉套餐 ($55)

食下傾下又已經 4 點   又一齊再上去買嘢喇   里奧大人都忍唔住再買件外套同 Tee   我就再買件 Cashmere   質料真係好好   價錢就更加好   所以唔買唔得呀   咁香港着唔到嘅   去旅行就一定着到呢 ~

買完就番屋企   本身諗住同菜菜仔去黃埔   不過拎住 3 袋衫就要番屋企 lu ~

番到屋企放低啲衫就去剪頭髮   里奧大人就瞓陣晏覺喇 ~

今次我剪前面啲頭髮   後面就修一修就可以   寧願之後剪密啲好過   我同髮型師講話我以前頭髮好厚㗎   真係講都無人信   佢好認真話佢信呀   我覺得好搞笑 ~

剪完髮就去 7-11 買雪糕比里奧大人   因為買滿 $100 有 8 折呀   我記得隻雪糕喺日本食過   里奧大人同 CC 都話好味呀 ~

MOW Matcha ($30/2 杯) & Creamy Carmel Latte ($17/杯)   7 杯總共 $107   折咗就 $85.6   咁真係好抵喇

番到屋企見到里奧大人已經熨緊衫   仲要熨 2 機   咁我都開機洗衫喇 ~

我哋總共買咗 25 件   所以洗衫嘅時候   我覺得好似去完旅行咁呀

里奧大人送比家姐嘅   咁我拎起件紫色   佢就即刻話啱哂妳家姐   哈哈

搞掂就去大家樂買五指毛桃雞   因為我想整手撕雞   所以 6 點半先開飯 ~

食完抖陣就去做機   可能睇住 Youtube 做   好快就做到 30 分鐘   我做完就多數番屋企先   里奧大人就會繼續做喇 ~

沖完涼就見到里奧大人   所以一前一後番屋企真係好好   哈哈 ~

今晚一齊睇 "歡樂茶飯"   睇咗 2 集都幾好笑喎   里奧大人之前睇片頭話覺得幾好笑   所以就錄低去慢慢睇喇 ~

睇完再睇陣 Youtube   睇到 11 點先瞓 ~

雜丸雞絲味河粉 + 紅油拍青瓜皮蛋 ( 30-JAN-2026 )

尋晚剩咗半隻糯米雞   今晚要食埋去喇

將 3 塊牛油方包切到一粒粒   當甜品咁食都唔錯   哈哈

( 30-JAN-2026  FRI )

感恩一覺瞓到 7 點 23 分   仲要係熟睡狀態無發夢呀 ~

今朝同里奧大人出去食早餐   其實仲有排包㗎   咁留番今晚食啦   因為想星期五 Relax 啲呀   哈哈 ~

食完就去里奧大人公司坐陣先番工   難得仲係 3D 嘛 ~

里奧大人話 MM 話個 Cushion 得意   所以洗乾淨就送比佢喇

菇場忙到 10 點半就搞掂   仲有個幾鐘就放飯   所以有嘢做啲時間真係過得好快呢 ~

我斟完水番埋位   聽到小說好大聲叫阿怪咪嘈呀   拍咩呀   仲要喺 Auditor 面前講喎   之後 Auditor 走咗就再講咁大個人要人話就唔好意思啦   阿怪又係抵死嘅   唔鍾意咪遲職囉   唔好成日做埋啲嘢影響人哋嘛 ~

Lunch Time 蒸好飯就去 iEAT 買 1 包水果青瓜   之後去一田買福袋比黑珍珠   買完都已經 12 點 20 分   要快啲番菇場開餐喇   因為我驚煲乾水呀 ~

官燕棧 X LINE FD 刺繡福袋 (特價 $268) - 我覺得抵呀   同埋個袋又可以用得番就更加抵

唔忙又做自己嘢喇   放工即走   比埋個福袋比黑珍珠先番屋企 ~

里奧大人已經喺屋企   之後佢話今日好攰唔做運動   咁我都可以慢慢煮 lu ~

是日晚餐 - 雜丸雞絲味河粉 + 紅油拍青瓜皮蛋

雜丸雞絲味河粉 - 終於清哂啲魚腐同獅子狗卷   之後應該唔會買㗎喇   成日食極唔完嘅感覺真係好鬼驚   哈哈 ~

紅油拍青瓜皮蛋 - 無菜就食青瓜   唔想咁悶就加埋皮蛋喇 ~

洗埋碗就同里奧大人染髮   之後到我沖涼同染髮   搞掂就一齊睇 "非常檢察官" ~

睇下 Youtube   今晚 11 點先瞓覺 ~

遇見小麵 @ 紅磡 ( 29-JAN-2026 )

豬骨丸子小鍋冒菜 ($48) - 份量當然無深圳咁多   同埋係無飯跟嘅   我覺得無飯都無問題   因為就咁食都夠飽   我問里奧大人會唔會翻單 ?!   佢話會呀   果然鍾意食喎

醬香鹵牛肉小鍋冒菜 ($55) - 鹵牛肉都幾好味   里奧大人話個湯底好辣   我又唔覺喎

爆漿豆腐串 (+$15) - 里奧大人話記得我鍾意食呢個小食   實在難得啦   新鮮炸起要灘一陣先食得

蜂蜜芥末原切豬排 (+$13) - 味道都唔錯   啲肉唔 "鞋"

我一定加菜脯

( 29-JAN-2026  THU )

尋晚半夜去完廁所   因為起身之前係咁發夢   我又想記住個夢   所以好難瞓得番呀   但感恩今朝起身都精神呢 ~

我記得個夢係講緊有連續 3 日假期   第日係星期五   因為星期六要番工   咁諗緊星期五請唔請假好   之後 BG 話 5 月 29 日星期五有 Annual Dinner   所以我唔請 lu ~

之後去到另一個場景   就係同班同事打邊爐   我哋 10 個人坐一張長枱   阿怪坐最埋   佢係自己一個鍋   仲要係好多餸都埋無咩湯 ~

臨醒個夢就係糟糟去家姐屋企   佢工人拻開張保鮮紙又唔掉   同埋又唔執碗   所以改咗佢個名叫做打風   咁因為已經 9 點 05 分   我叫糟糟車我番工   但係張枱係有份早餐   我見到阿大喺房   我仲好快手咁拎份早餐去另一間房食   所以好奇怪自己係咪已經番咗公司 ~

我一起身就同里奧大人講話發咗好多夢   之後即刻睇月曆   5 月 29 日真係星期五呀   呢個夢真係好特別呀   哈哈 ~

沖埋涼就再翻焗麵包 3 分鐘   奇怪叮完無聲嘅   原來我無開焗爐呀   真係太論盡喇 ~

早餐食美心至尊排包   因為有鴻福堂飲品送就買嚟食啦   我覺得搽咗花生醬仲好食 ~

食完去里奧大人公司坐下   見到阿妹又一齊傾下偈啦   傾到唔想番工   哈哈 ~

今朝架巴士好耐都未到   我仲以為掛住睇手機唔知班車走咗   但我見到平時坐呢班車嘅人仲喺度等   咁都無咁驚   哈哈 ~

9 點 15 分先番到菇場   不過我都唔算遲   有幾個同事成日番 9 點半   但佢哋係施施然咁行入嚟   我就係急急腳咁行入嚟   雖然公司唔會話妳   但始終真係遲到有啲唔好意思囉 ~

Lunch Time 蒸完飯就去 Mikiki 行陣   之後就去買衫比家姐   買咗 3 件加埋係 $497   當做新年禮物送比佢   哈哈 ~

諗住 Hea 過   點知 3 點半忙到 5 點 10 分   不過咁都好㗎   執埋嘢就啱啱好放工 ~

放工去睇中醫   差唔多到我嘅時候   里奧大人就到了 ~

醫師話我血氣唔夠   要睇到新年之前呀 ~

睇完就去食晚餐   今次我話去遇見小麵食晚餐呢 ~

食完去唐記買 2 隻糯米雞做午餐   之後買埋糖水就番屋企喇 ~

媚媚今日做出口貨開倉   所以帶埋黑珍珠同阿妹一齊去買衫   估唔到連 MM 都去埋   如果我去到就好啦 ~

里奧大人買咗 3 條睡裙比我   話啲質料真係好靚   原價要 3 百幾蚊㗎   依家全部 2 折起發售   最搞笑里奧大人拎件碎花嘅   之後媚媚再拎多件   仲話我鍾意碎花呀   可能有次見面係着碎花裙啦   如果係咁佢都好有記性呀   哈哈 ~

開埋機洗衫就沖涼   依家同里奧大人睇 "非常檢控觀"   好似幾好睇咁 ~

今次一碗 Share 食   我只係食芋園珍珠同粉粿

睇完再睇 Youtube   我覺得今晚又凍咗   所以 10 點半都瞓覺 lu ~

奧爾良雞下髀 ( 28-JAN-2026 )

( 28-JAN-2026  WED )

尋晚 2 點幾起身去廁所   感恩好快瞓得番呢 ~

今朝同里奧大人一齊去買早餐   買完就去佢公司食喇 ~

菇場唔忙   可以做自己嘢 ~

Lunch Time 蒸完飯就去 Mikiki 行下   之後買埋蕃薯同排包就番菇場開餐 lu ~

唔忙就繼續做自己嘢   所以好快就放工 ~

放工即走   番到屋企已經見到里奧大人   不過今晚起碼 6 點半先食得 ~

焗嘢嘅時候就煮蕃薯糖水   今晚都唔煮菜   因為要留肚食蕃薯糖水 ~

是日晚餐 - 奧爾良雞下髀

奧爾良雞下髀 - 用牛角燒肉醬汁炒香啲本菇再墊底都唔錯   我鍾意煮雞下髀   因為我會將啲肉剪到一嚿嚿咁食   同埋咁樣帶飯都易啲啦 ~

洗埋碗就抖下先   之後同里奧大人去做機   依家多數做 30 分鐘就夠   我唔敢做太耐   一陣整傷咗膝頭哥又要抖一排先做   真係得不償失了 ~

沖完涼再煮熱蕃薯糖水   里奧大人就啱啱番到嚟   等埋佢沖涼就可以食㗎喇 ~

睇下 Youtube 又已經 10 點 45 分   係時候瞓覺 lu ~

豆腐肉碎蒸水蛋 +滷水豆卜燜節瓜 ( 27-JAN-2026 )

終於飲哂啲湯   今晚食湯渣都夠哂飽 lu

( 27-JAN-2026  TUE )

尋晚去完廁所   感恩之後瞓得都唔錯   但臨醒之前發咗好多夢   好在個個夢都係開心嘅   不過起身就諗唔到係咩嘢夢囉 ~

早餐都係食原味吐司   食完就去里奧大人公司坐下先番工   難得 3D ~

里奧大人話尋日焗到塊吐司脆卜卜   所以覺得好食   但我又焗唔到佢咁脆噃

菇場忙咗一陣就可以抖下   咁當然做自己嘢啦 ~

Lunch Time 蒸完飯就去銀行入錢   之後行多陣就番菇場開餐 lu ~

唔忙又做自己嘢   其實 5 點之後啲時間就會過得好快   洗杯去廁所再執嘢   整呢樣嗰樣又已經 5 點半了 ~

放工即走   番到屋企已經見到里奧大人   我話我依家煮嘢慢   未咁快食得   所以佢就熨衫先喇 ~

最搞笑佢頭先笑住話好少人話自己煮嘢快   我話邊個講 ?!   佢話我講呀   我話我自己煮嘢慢呀   可能我講得太細聲   快同慢個音又差唔多   哈哈 ~

今晚煮完都接近 7 點   我覺得好晏呀   依家手腳真係好慢呢 ~

是日晚餐 - 豆腐肉碎蒸水蛋 + 滷水豆卜燜節瓜

豆腐肉碎蒸水蛋 - 第一次煮呢個餸   里奧大人話好食呀   但問我做咩落指天椒 ?!   我話無蔥花點綴   所以咪加指天椒囉   哈哈 ~

滷水豆卜燜節瓜 - 尋晚剩咗啲滷水汁   咁可以加埋 2 包豆卜同節瓜一齊燜   最鍾意一鑊熟   唔駛洗咁多嘢呀 ~

洗埋碗抖陣就同里奧大人去做機   做 30 分鐘就走喇 ~

沖埋涼就休息   里奧大人就開機洗公仔同 Cushion   雖然放喺公司   但都要洗下   因為點都會有塵   同埋唔係咁鍾意啲公仔用膠袋包住   感覺好似好侷促咁 ~

睇陣 Youtube   今晚又開始凍凍哋   個人就特別想瞓覺   所以 10 點半都瞓 lu ~

滷水燜冬菇雞下髀 + 蒜蓉蒸脆肉瓜粒 + 炸魚皮 (外賣) ( 26-JAN-2026 )

同里奧大人每人 1 碗

( 26-JAN-2026  MON )

感恩一覺瞓天光呀   星期一真係需要特別精神   哈哈 ~

早餐食原味吐司   尋日特登行去買㗎   仲要係啱啱焗起添 ~

菇場忙咗 1 個鐘又可以做自己嘢   仍然 3D 要好好珍惜呀 ~

Lunch Time 蒸完飯就出去買菜同炸魚皮   最後買埋雞骨草就番菇場開餐 lu ~

4 點 45 分先嚟忙   做到 5 點 45 分先放工呀   本來可以準時走   但我好想將啲嘢 Completed 囉   咁就唔駛心掛掛嘛 ~

番到屋企即預備晚餐   好在尋晚整咗個燜餸   如果唔係就會出去食 lu   因為我唔想咁趕   但其實唔趕   不過我想快啲去做機啫   哈哈 ~

是日晚餐 - 滷水燜冬菇雞下髀 + 蒜蓉蒸脆肉瓜粒 + 炸魚皮 (外賣)

滷水燜冬菇雞下髀 - 我要清埋包冬菇   所以今次係冬菇多過雞下髀呀 ~

蒜蓉蒸脆肉瓜粒 - 煮呢個瓜又係好方便   因為唔駛浸   哈哈 ~

炸魚皮 (外賣) - 經過見到就買喇   今次都好食 ~

我叫里奧大人中午去做機   所以今晚我自己去做喇   做 25 分鐘就夠 lu ~

開埋機洗衫就沖涼   之後休息休息 ~

今晚有啲攰   其實 9 點 50 分已經想瞓   但實在太早   我半夜實會起身   所以最後都係 10 點半先瞓覺喇 ~

麻婆豆腐 + 乾燒伊麵 + 雪梨沙參肉竹螺頭湯 ( 25-JAN-2026 )

( 25-JAN-2026  SUN )

今朝同里奧大人一齊食早餐   我食完就番屋企喇 ~

我食剩 1 隻蛋同餐包   所以留番一陣做午餐   里奧大人就即刻話食唔哂件牛油多士   因為平時食埋多士真係超級飽   咁我今次有拎食物盒就可以拎走囉

里奧大人話佢重點係要影隻戰鬥碗

下個月就新年   咁見有時間就清潔廚房   抹下執下又已經 9 點半   咁要出去買餸喇   因為無咁曬   哈哈 ~

買完麵包就去買煲湯料   最後買埋香蕉就番屋企喇 ~

番到屋企又要再沖多次涼   因為行下行下有啲出汗   仲諗住唔着外套就無咁易出汗添 ~

沖埋涼就煲湯   搞掂咁又已經 12 點   但突然有啲暈   要坐喺梳化抖半個鐘先無咁暈   所以叫里奧大人今日放工準時走   佢話要唔要依家番嚟 ?!   我話又唔駛   我坐喺度唔郁就得㗎喇 ~

我 12 點 45 分都食午餐   食完又好啲喎   唔通血糖低 ?!   但我今朝食到好飽㗎喎   不過我覺得依家血氣唔夠   所以下星期都會睇中醫呢 ~

里奧大人 1 點半放工   我就煮河粉比佢食   佢話呢個河粉好食   我話咁就好喇   之前買咗包 MAMA 河粉   咁可以幫手食   哈哈 ~

我就睇 Youtube   里奧大人就瞓晏覺   佢瞓到 3 點半都起身   其實我想瞓但又瞓唔到   所以抖到 4 點就一齊去做機喇   今日可以做半個鐘 ~

番到屋企就燜餸   里奧大人就熨衫   依家佢負責熨衫嘛   所以有時我熨呢   佢就話啲衫熨得唔直   咁我都認㗎 ~

5 點半就預備晚餐   差唔多 6 點半先食得 ~

是日晚餐 - 麻婆豆腐 + 乾燒伊麵 + 雪梨沙參肉竹螺頭湯

麻婆豆腐 - 之前喺一田買咗 3 包工滕舍日本豆卜   因為月尾到期   今晚清咗 1 包先   同埋想清包麻婆豆腐醬料   所以就整呢個餸喇 ~

乾燒伊麵 - 今次都整得好食呀   我仲特登去買罐切片草菇   但我想食哂碟麻婆豆腐   所以唔加草菇喇   里奧大人話好食呀   話如果多啲韭黃就好   我話仲驚你唔鍾意食添   其實我買咗 1 束㗎   因為沉咗喺底   所以我將啲韭黃放喺聽日嘅 Lunch Box 呢 ~

雪梨沙參肉竹螺頭湯 - 第一次煲呢個湯   材料仲有 $45 西施骨同埋幾片雪梨乾   再加 4 個乾螺頭   煲出嚟真係好好飲呀   所以好開心呀 ~

洗埋碗就開機洗衫   之後沖涼休息喇 ~

同里奧大人一路食提子一路睇 "中年好聲音 4"   所以呢個半鐘係好快過   哈哈 ~

韓國香印青提子都甜   一盒 $35 都算平喇   原價要 $59 呢

睇多陣 Youtube   今晚 10 點半都瞓覺 lu ~

黃金脆薯牛堡套餐 (外賣) ( 24-JAN-2026 )

+$9.5 大大啖組合 (增量裝扭扭薯條 & 草莓乳酸味特飲)

( 24-JAN-2026  SAT )

今朝 6 點 40 分都醒醒哋   不過都諗住繼續瞓到 8 點㗎喇   但里奧大人 7 點半鬧鐘響咗   咁我都起身 lu   因為都有啲肚餓呀 ~

早餐食麥西哥叉燒包   其實同食無餡嘅包無分別   哈哈 ~

食完就靈修半個鐘先番工   星期六一定唔會咁早番公司   我唔想無門口入呀 ~

菇場唔忙   終於的起心肝執番好櫃桶啲嘢   始終平時阿爽喺度   我一拎嘢佢實望住   難得佢 Off 就即刻執 lu ~

今朝肥仔豪好忙   佢有個新客係超級煩   佢話呢生人第一次遇到呢啲客   不過前日聽佢同船務同會計部傾嘅時候   都覺得係超級煩㗎喇 ~

放工買埋午餐就去里奧大人公司   上次食完諗住停一停   但今日好餓   所以好想食米線呀 ~

我食豬耳+魚皮餃酸辣米線

里奧大人食豬軟骨+腩肉酸辣米線

食完抖下就同黑珍珠傾啲嘢   之後再去 LA 活動 ~

4 點 40 分活動完畢   我就去樓上買嘢喇 ~

精選白合 8 兩 ($56) / 白蓮子 8 兩 ($49) / 精選玉竹 8 兩 ($46) / 原色沙參 8 兩 ($50)

西班牙天然豬肉碎 ($39) / 急凍泰國天然雞下髀 ($46)

買完就番屋企放低哂嘢   搞掂就番崇拜 lu ~

崇拜完畢就番屋企   今晚里奧大人放工買晚餐番屋企食呀   所以我番到屋企就沖涼先喇~

食完就開機洗衫   今朝里奧大人已經熨衫   我就可以休息喇~

睇下 Youtuber   里奧大人 10 點就瞓   我就睇到 10 點 40 分先瞓呢 ~