芝士焗排骨 + 油麥菜苗 ( 4-JAN-2026 )

( 4-JAN-2026  SUN )

尋晚瞓瞓下又有啲熱   所以瞓得唔係咁好   鬧鐘響唔係咁想起身住   諗住再瞓又瞓唔到   咁同里奧大人去食早餐啦   之後去佢公司坐陣就番崇拜喇 ~

今朝番自己教會事奉   咁早咗落車就周圍行下   感恩比我喺 bauhaus 見到個袋   因為我好想送份小禮物比小蘭呀   其實之前睇咗啲外型好靚嘅保溫杯   不過覺得佢都有   番工人士一定有家嘛   哈哈   所以唔買啦 ~

我只係想買啲實用嘅嘢   咁買個袋仔都好吖   用嚟去旅行都好嘛   哈哈 ~

我諗住買 $500 左右嘅禮物   所以好感恩買到呢個袋   我買黃色因為我鍾意呀   顏色夠 Sharp 個人都醒神啲㗎   哈哈

加 $2 買個紙袋   但佢哋無細嘅 Size 紙袋   我本身想低調啲送比小蘭都唔得添

崇拜完畢去買午餐同麵包   買完都搭車番屋企 lu ~

里奧大人 2 點番到屋企   可以即刻開餐   我就沙律喇 ~

燒肉叉燒飯

里奧大人食完抖陣就沖涼瞓覺   我就睇下 Youtube   又係想瞓又瞓唔到咁   不過睇到 4 點都瞓咗半個鐘   其實仲想瞓㗎   不過我驚夜晚瞓唔到都起身喇 ~

有時間就熨 2 機衫同燜餸   搞掂都差唔多 5 點半   里奧大人啱啱起身   佢抖咗半個鐘就去做機   咁我就預備晚餐喇 ~

里奧大人做咗半個鐘機   之後等埋佢沖涼先開餐 ~

是日晚餐 - 芝士焗排骨 + 油麥菜苗

芝士焗排骨 - 我喺焗盤夾落隻碟度   所以整到個賣相好核突   哈哈 ~

油麥菜苗 - 唔想食菜心就買 1 斤油麥菜苗   又可以分開 2 餐食喇 ~

洗埋碗就沖涼休息   之後同里奧大人要睇啲嘢   一睇就睇到 10 點半   咁再睇多陣 Youtube   今晚 11 點 10 分先瞓覺 ~