照燒雞肉薄餅 + 蕃茄南瓜三文魚湯 ( 31-JUL-2021 )

( 31-JUL-2021  SAT )

里奧大人今朝起身同我講話見到 Sanha   我話我都係喎   我仲捉住佢手一齊行添呀   之後話佢手瓜都已經係大人咁實淨   哈哈 ~

咁就 7 月最後一日   時間過得勁勁勁快 ~

其實我想星期六食啲早餐同平時唔同   不過又唔餓   所以最後都係買麵包算喇 ~

菇場又忙   好在 11 點幾搞掂 ~

放工即走   估唔到又可以同里奧大人一班車去 Megabox ~

今次主要去 AEON 買濾水器   但店員話可能未必壞   叫我哋番屋企再清洗下先再買 ~

去 COCO 食咖哩飯   里奧大人次次都話想食   今日一定要滿足一下佢呢 ~

吉列豬扒咖哩飯 ($74) - 我要 2 分辣   最開心係可以揀飯量 200g (-$5)   因為我唔想食咁多飯呀

照燒雞扒咖哩飯 ($71) - 里奧大人要 1 分辣   飯量就 300g (標準價格) 

(+$21 飲品+雪糕)

食完去超市買嘢   之後儲埋分就番屋企 ~

番到屋企即大清潔廁所   之後沖涼休息 ~ 

原來已經接近 5 點   抖多陣又要預備滾湯喇 ~

是日懶餐 - 照燒雞肉薄餅 + 蕃茄南瓜三文魚湯

照燒雞肉薄餅 - 喺 AEON 買嘅急凍薄餅   好似 $40.9   但我覺得呢個 Size 嘅份量係啱啱好   有機會去開再買   做儲備都好吖 ~

蕃茄南瓜三文魚湯 - 蕃茄 $20   南瓜 $10   但三文魚骨只係 $24.9   真係妹仔大過主人婆喇 ~

洗埋碗就自己去徑步   里奧大人飲咗啤酒   我叫佢唔好去喇   今晚都係徑半個鐘   因為今日都行咗好耐   有少少攰   哈哈 ~

沖埋涼就睇 Youtube   睇到 11 點都瞓 lu ~

燒汁焗雞翼 + 辣菜甫菜心苗 + 自家制麵包 ( 30-JUL-2021 )

( 30-JUL-2021  FRI )

今朝早咗一班車   時間真係好用好多 ~

早餐食腿蛋包   好好味呀 ~

頭先一番到菇場就接到家姐電話   嚇死我以為乜事   因為我哋多數 Whatsapp 嘛   之後佢問我喺邊 ?!    我話啱啱番到公司   佢都覺得好驚訝   因為只係 8 點 20 分   咁到我問番佢咩事啦 ?!   原來佢話去麥記食早餐   不過佢都好早番到公司   所以其實佢咁早打得嚟   都係話食咗啲咩    一係就問有咩要買咁呢 ~

菇場忙呀   所以一望個鐘就 11 點 40 分呢 ~

見無落雨就出去行   順便幫阿花搵韓國燒酒   我話如果我買到   Lunch Time 一齊飲   可惜無得買   哈哈 ~

終於唔忙喇   安安樂樂等放工 ~

放工去超市買嘢   之後番屋企 lu ~

6 點幾預備晚餐   今晚可以 7 點半開餐 ~

是日懶餐 - 燒汁焗雞翼 + 辣菜甫菜心苗 + 自家制麵包 

燒汁焗雞翼 - 又係用迷你杏鮑菇墊底   但今次越食越辣呀 ~

辣菜甫菜心苗 - 連食 3 晚   咁唔蘸甜豉油喇   哈哈 ~

自家制麵包 - 朱古力包好味呀   可以當甜品 ~

洗埋碗就即沖涼   之後睇奧運 ~

今晚又係 11 點瞓   但其實自己衰   係都要聽埋歌先瞓   如果唔係 10 點 45 分已經瞓覺呢 ~ 

豉油雞 (外賣) + 拍青瓜 + 菜心苗 ( 29-JUL-2021 )

( 29-JUL-2021  THU )

今朝里奧大人起身   我都起身做伸展 lu ~

早餐食吞拿魚包   仍然覺得好味呀   不過其實我都係來來去去食嗰啲包   哈哈 ~

菇場唔太忙呀   又做下自己嘢 ~

終於每月一到   之前個肚成日半夜先扯住扯住痛   感恩係好快瞓得番   唔係就慘了 ~

Lunch Time 落雨呀   不過都出去行陣   之後再買墨魚丸米   今日仍然無魚片頭囉   唉 ~

唔忙就好喇   咁可以專心做 Email Filing ~

放工即走   買埋豉油雞就番屋企 lu ~

里奧大人差唔多 7 點就番到屋企   等佢沖埋涼就可以開餐   今晚煮個拉麵比佢   我就唔食喇   無做運動唔想食咁多 ~

是日懶餐 - 豉油雞 (外賣) + 拍青瓜 + 菜心苗

豉油雞 (外賣) - 好想食豉油雞   但真係越來越細隻   呢度係半隻份量   本身里奧大人想食叉燒   但我真係唔鍾意食   不過下次都會買叉燒   比里奧大人開心下 ~

拍青瓜 - 之前買咗 12 條小青瓜   係時候逐啲逐啲食埋去喇   哈哈哈哈 ~

菜心苗 - 買咗 3 Pack   食埋聽晚就可以停   哈哈 ~

洗埋碗就沖涼   里奧大人就熨 2 機衫   等佢搞掂就睇 ASTRO Zone ~

今晚 10 點半都瞓覺   呢幾晚都好攰咁呢 ~

燒汁焗鯖魚 + 菜心苗 + 自家制麵包 ( 28-JUL-2021 )

( 28-JUL-2021  WED )

今朝里奧大人起身   我都起身做伸展喇   做到 7 點半就沖涼 ~

早餐食吞拿魚包   幾日無食   又覺得特別好味道   哈哈 ~

菇場唔忙呀   可以休息下 ~

Lunch Time 出去買菜   再行多陣就買墨魚丸米   因為好想食熱嘢呀 ~

仍然唔忙啦   放工準時走 ~

番到屋企抖陣就預備   里奧大人 7 點幾先番到屋企   不過今晚唔徑步   所以都 OK 啦 ~

是日懶餐 - 燒汁焗鯖魚 + 菜心苗 + 自家制麵包

燒汁焗鯖魚 - 想清下冰格食物   所以又焗鯖魚喇 ~

菜心苗 - 呢間買嘅菜心苗好甜   所以買咗 3 Pack   咁唔駛日日買菜   哈哈 ~

自家制麵包 - 頂爺叫我蒸熱食   估唔到原來口感仲正   煙煙韌韌咁架 ~

洗埋碗就沖涼   仍然睇奧運 ~

但睇到 11 點都瞓喇   呢排都係想早啲瞓呀 ~

黑椒菠蘿鳳翼球 + 菠蘿咕嚕肉 + 叉燒拚油雞 (外賣) ( 27-JUL-2021 )

( 27-JUL-2021  TUE )

尋晚瞓得唔係咁好   個肚扯住痛同埋隻手有啲痛   感恩起身都精神   同埋無哂任何痛 ~

今朝無去徑步   沖完涼都唔覺熱   如果徑步之後沖涼   沖完涼都好快出汗咁㗎 ~

早餐食奶醬多   食一半已經唔想食   睇嚟我開始好唔鍾意食喇   哈哈 ~

菇場忙呀   都預咗呢 ~

Lunch Time 出去行 20 分鐘   之後再買橙同波子提子   買完就去買炒麵番菇場食喇 ~

忙下停下   放工都番屋企 lu ~

番到屋企就沖涼   之後等里奧大人買外賣番屋企食 ~

今晚 7 點開餐   突然覺得好早   哈哈哈哈 ~

食完又睇奧運   睇到 9 點瞓着咗   一起身係 9 點半   仲要好精神   呢下勁驚 ~

之後睇 Youtube   睇到 11 點都瞓喇   難得想瞓   哈哈 ~

腸仔出前一丁 ( 26-JUL-2021 )

( 26-JUL-2021  MON )

今朝 9 點唔夠都醒咗   咁里奧大人都去買早餐了 ~

食完抖陣   沖埋涼又抖下   差唔多 11 點 45 分就出發去銅鑼灣 lu ~

感恩今次一個鐘就搞掂   又去食午餐喇 ~

諗定好食韓國菜   但要等位就唔食喇   所以又去番食泰國菜   哈哈 ~

居然有我鍾意嘅木瓜沙律同炸雲吞   我食咗 5 隻呀   本身再想食   但里奧大人話熱氣唔好再食呢

泰式燒豬頸肉飯 ($62) - 已經少飯   我同里奧大人講話下次小食啱自己食   我就半飯   咁樣可以食多啲小食   哈哈

香草胡椒肉碎炒飯 ($62) - 里奧大人話都係想食呢個飯   我話鍾意食咪食囉   無咩所謂

食咗咁多炸雲吞   真係點都要行下消化下   所以去 DONKI 喇   又買咗 1 袋嘢   勁開心 ~

經過 DONKI 見到有呢啲擺設   所以即影相喇   難得無咩人啊

TOY STORY   呢套卡通片真係一個回憶   當時覺得好好睇㗎

STAR WARS   好型呀

AVENGERS   迷你版好得意呀

VENOM   呢對公仔得我同里奧大人影咋   哈哈   個小朋友見到話公仔好肉酸呀   確實係呢  

今日非常焗熱   所以買完都即搭車番屋企喇 ~

開埋機洗衫就沖涼   之後休息 lu ~

Passion Fruit Kit Kat ($15) / 日版 Kit Kat ($45/2包) /  童星點心麵 ($5)

有機甘栗 ($29.80) / 綠茶蛋糕 ($39.8)

珍味牛肉粒 ($46/2盒) / 日版甘大支 ($26)

麥茶 ($33.8) / 豚骨拉麵 ($29.8)

本身里奧大人想買外賣   但我又話唔想食   最後都係煮麵 ~ 

是日懶餐 - 腸仔出前一丁

腸仔出前一丁 - 將腸仔切粒   賣相好睇啲   哈哈哈哈 ~

洗埋碗就再沖多次涼   之後就睇奧運同 ASTRO Zone ~

勁攰呀   今晚 10 點 15 分都瞓覺喇 ~

菜肉餃 & 水餃拚蝦滑 (外賣) ( 25-JUL-2021 )

( 25-JUL-2021  SUN )

今朝 8 點 15 分起身去徑步   之後沖埋涼就出發去報名喇 ~

差唔多 1 個鐘就搞掂   算快㗎喇 ~

因為已經 11 點幾   所以已經無得食早餐   所以即刻買個包同咖啡   食完即刻番崇拜喇 ~

破戒喇   終於飲凍咖啡   但其實因為包裝檸檬茶好甜   我又唔想飲茶   所以先買囉    但呢樽咖啡好好飲呀   夠哂香滑   但就超級肥啦   所以留半樽比里奧大人飲   哈哈哈哈

其實我唔餓又唔眼瞓   不過我驚 12 點幾餓   到時出去買嘢食就煩呢   始終崇拜未完   唔想離開囉 ~

崇拜完就同阿妹傾偈   之後加埋 B San   話我哋一齊傾計好似鬧交   哈哈   因為佢把聲又特別高音呢   同埋女人傾偈係越傾越興奮   真係完全無控制聲量 ~

同佢又係咩都傾一餐   知道佢煮嘢食又係好有心機   但我話如果教我煮嗰啲呢   簡簡單單就可以咯   呵呵 ~

里奧大 1 點幾放工搵我哋   佢見我笑到流哂眼水鼻水   佢同頂爺又走嚟傾   仲話我哋嘈   之後頂爺話開心就嘈㗎啦 ~

我唔餓呀   所以話買嘢番屋企食算喇 ~

今次買一個飯 Share 食   因為其實咁都夠飽   話哂我 11 點幾食咗個包   其實都唔餓 ~

里奧大人 4 點左右瞓覺   我就 5 點幾先眼瞓   一瞓瞓到 6 點   之後里奧大人都起身 ~

抖到 6 點半先預備晚餐   所以今晚 7 點半先開餐呢 ~

是日懶餐 - 菜肉餃 & 水餃拚蝦滑 (外賣)

菜肉餃 & 水餃拚蝦滑 (外賣) - 又嚟水餃餐喇   今晚大家食到好鬼飽   下次唔會再買蝦滑喇   同埋真係豬咗   將尋晚嘅墨魚滑分兩餐咪得囉   又唔駛食得咁辛苦   唉 ~

洗埋碗就去徑步   番到屋企都 9 點幾 lu ~

今晚專注投票   好開心 MJ 贏咗第一呀   真係勁緊張   係臨尾 15 分鐘先反敗為勝咋 ~

其實都好感激里奧大人有幫手投票㗎   話哂佢無我咁顛嘛   我喺 FB 出 PO 嘅時候   我同 AROHA 都有哂策略點投票㗎   我哋個個都好想 MJ 贏呢   所以我幫里奧大人裝 Apps 喇   哈哈 ~

實在太興奮   今晚差唔多 12 點先瞓呀 ~

韭菜餃 & 鮮蝦雲吞拚墨魚滑 & 炸魚皮 (外賣) + 自家制麵包 ( 24-JUL-2021 )

( 24-JUL-2021  SAT )

今朝 6 點半醒醒地   諗住瞓番啦   點知都係瞓唔到   終於 6 點 40 分都起身 ~

又落雨   不過都照去徑步   反正已經起咗身嘛 ~

里奧大人見我拎住把遮番嚟   話好佩服我嘅堅持呀   哈哈   之後話食都好緊要㗎   尋晚食得太多   我話知啦   最衰你話唔比我呢幾日煮飯   否則可以留番半隻雞今晚食   不過我話呢幾晚都係煮呀   只係焗嘢或者淥麵咁   唔駛開鑊炒嘢就無問題㗎喇 ~

早餐食丁米餐   太耐無叫外賣   完全唔記得走包   咁唯有留番今晚食啦   本身我想食麵   但真係食唔哂一個   下次問可唔可以半個   如果可以就叫嚟食先 ~

菇場個個都唔忙啦   除咗西瓜 ~

放工一齊準時走   星期六大家都好齊心呢   哈哈 ~

尋晚格硬食到好飽真係好驚   所以我話今晚都係煮喇   最多簡單啲   所以去 Taste 買酸齋腐皮卷啦   點知原來裝修   咁就即轉場去街市買水餃雲吞   最後買埋西瓜就走喇 ~

同里奧大人一齊食下午茶   之後番屋企 lu ~

沖埋涼就休息   又可以睇奧運 ~

今晚 7 點幾開餐   本來想再晏啲食   不過要去徑步就唔想咁晏囉 ~

是日懶餐 - 韭菜餃 & 鮮蝦雲吞拚墨魚滑 & 炸魚皮 (外賣) + 自家制麵包

韭菜餃 & 鮮蝦雲吞拚墨魚滑 & 炸魚皮 (外賣) - 今次只用旺菜做湯底   因為加埋白蘿蔔真係食唔哂   所以一個菜就算喇 ~

自家制麵包 - 今次有 Blue Cheese 包   陣味唔係個個食到㗎   哈哈 ~

洗埋碗就同里奧大人一齊去徑步   又係好焗熱   不過點都要徑半個鐘 ~

真係滴住汗番屋企   快快開機洗衫就沖涼   之後又睇奧運 ~ 

今晚 11 點幾都要瞓   因為聽朝要早啲起身 ~