焗豬扒飯 (外賣) ( 31-JAN-2017 年初四 )

( 31-JAN-2017  TUE )

尋晚瞓覺嘅時候   個肚唔多舒服   但好過以前好多   起碼唔會劇痛同嘔   感恩感恩 ~

里奧大人 10 點唔夠都起身   不過我唔陪佢食早餐喇   繼續瞓瞓瞓 ~

個肚有啲啲痛嘛   所以都係瞓下醒下   但 5 點幾都真係要醒喇   聽日要番工   驚今晚瞓唔着呀 ~

7 點開始有啲餓   諗住食楊洲炒飯   不過無哂   咁豬扒飯啦   酸酸咪咪開胃啲 ~

食完就抖陣   之後沖涼喇   次次每月一真係攰到唔想沖涼   但無可能   哈哈 ~

10 點幾都瞓喇   但個肚有啲啲痛   我估緊張啦   聽日要番工 ~

油雞飯 + 叉燒飯 (外賣) ( 30-JAN-2017 年初三 )

( 30-JAN-2017  MON )

今朝每月一到   感恩個肚都 OK   所以可以去食早餐呢 ~

睇張單要加 15% Service Charge   我以為睇錯   原來真係初一至初三加 15% 呀   但尋朝早比錢又唔覺喎   加 10% 已經多啦   估唔到加 15% 咁誇張 ~





食完就番屋企抖喇   沖埋涼就休息 ~

個肚有啲啲唔舒服   所以無咩胃口食嘢   咁我話好攰   想瞓下覺   咁差唔多 3 點左右佢就去 Circle-K 買雜誌   之後又買埋麥記番屋企食   話驚我餓   係咪精神分裂呀佢 ?!   好嗰陣時就非常好   不過我係女人   記仇係可以記好耐嘅   呵呵 ~



               

食完又 Hea 過   好在呢兩日唔駛番工咋   可以盡情休息 ~

6 點半有啲餓喇   所以里奧大人即刻去買飯   好感恩有胃口食嘢呀 ~

勁攰呀   抖到 9 點先沖涼 ~

個肚有啲唔舒服   感恩唔係劇痛呀   所以我 10 點幾都瞓覺先喇 ~

住家飯 @ 姑奶屋企 ( 29-JAN-2017 年初二 )

茄汁蝦 - 次次啲蝦肉都好霉   唔知點解   



羅漢齋 - 佢哋契媽整㗎   不過我無食

糖醋骨 - 都好味道呀   



白切雞



豉油雞 



南乳燜豬肉 - 姑奶話啲腐竹好鹹   我第一樣就諗   唔知係咪隔咗幾夜   所以我無食呀   



蒸魚 - 今次條魚都幾大條   唔知叫九咩喎   



生菜 -  姑奶本來仲有碟油麥菜比我㗎   不過叮翻熱咗 2 次   真係黃咁咁到好得人驚   最後掉咗 lu



( 29-JAN-2017  SUN )

爽呀   今朝瞓到 11 點半先醒   補足眠呀 ~

拿拿聲梳洗就去食早餐   食完就番屋企抖 lu ~



開埋機洗衫又睇下電視   我唔餓呀   所以唔食下午茶   里奧大人就自己食包薯圈當下午茶 ~

好攰咁   又瞓咗一個鐘   差唔多 5 點先醒 ~

本來約咗水姑 6 點一齊去姑奶屋企   之後又話有 Urgent 嘢   差唔多 6 點 45 分先去   其實勁想串里奧大人   咁呢啲係咪叫等呀 ?!   尋日佢好口響話只有佢等我屋企人吖嘛   所以佢成日講完啲嘢都會受番 ~

食到 8 點幾就走人   番到屋企都即沖涼休息 lu ~

今晚又係 12 點先瞓   難得幾日假期   真係唔想咁早瞓   哈哈 ~

煎蘿蔔糕 + 煎芋頭糕 ( 28-JAN-2017 年初一 )

我覺得自己煎得好靚   表面煎到脆脆哋就最好味呢   哈哈



煎哂所有糕   啱啱好放哂 2 隻碟  



( 28-JAN-2017  SAT )

今朝 11 點先起身   因為約咗婆婆同大舅父一定 12 點半同婆婆飲茶 ~

咁里奧大人問飲到幾點   我話家姐唔飲茶   所以去婆婆屋企等埋家姐先走 ~

佢無啦啦話咁咪要好耐 ?!   佢話要買嘢   我話不嬲都係咁㗎啦   實係去婆婆屋企坐   好記得有次坐到 5 點添   再問佢係咪要做公司嘢同淘寶買嘢 ?!   如果係就佢自己走先囉 ~

之後佢無啦啦發狗瘟話去我屋企嗰邊就坐到幾點都得   我去佢屋企嗰邊又嘈 ~

咁好喇   鍾意計吖嘛   我話去你屋企嗰邊   我都等唔少啦   我次次等妳水姑食飯㗎   之後佢話咁佢去我家姐屋企都係等   咁我就話我同水姑食飯幾多次 ?!   妳同我家姐姐夫食飯有幾多次呀 ?!

又話我個人點點點   話我好假   我話我都知自己衰格㗎   但我會同朋友講囉   之後又話我成日錯咗唔認   講講下又講到上年去 Fat Fat 屋企拜年   佢係都話我亂過馬路   之後嬲我唔去同 Fat Fat 屋企   咁我話你依家想去都無得去啦   佢話呢個係我做成嘅   唔係今日初一   我會直接鬧佢正 PK ~

因為我最憎作為一個男人成日比較真係好很小家種   一係你當時就講出嚟   唔好成日事後講   我覺得好很煩 ~

之後仲話係分就出聲   我其實一路 Whatsapp 問表妹喺邊   所以佢無啦啦講分   我問佢分咩嘢呀 ?!   佢答我好似話離婚定分開   仲話唔好激到佢唔去婆婆度拜年   我咪話你唔想去就唔去啦   我無所謂 ~

最後佢都去   但我已經決定   佢再講分開嘅話   我就一定會分開   今次已經係第 2 次講   唔好成日以為我唔記得   而佢仍都要將自己所講嘅嘢要負責任囉 ~

諗住換衫   家姐工人喺印尼打嚟同我講新年快樂   咁同佢傾下偈啦   傾咗 10 分鐘左右都收線喇   我要預備出門口 ~

我約埋大食同剪髮表妹 12 點半左右喺酒樓附近等   咁先一齊上酒樓   無諗過今次最遲係我哋添 

今年婆婆又玩嘢   年三十先話 12 點半邊度飲茶   其實佢咁樣   真係搞到人哋唔想同佢飲茶   好似家姐咁   本來可以一齊嚟飲茶   但妳就係太遲講   家姐唯有去姐夫嗰邊飲茶   因為人哋一早約實時間 ~

剪髮表妹次次都係叫炸嘢食   佢話有次同攝影表弟一齊同公公婆婆飲茶   啲點心擺咗上枱   先知全部係炸嘢   佢話好記得叫咗 10 樣點心   原來 9 樣係炸嘢   得 1 份係蒸腸粉   哈哈 



里奧大人見到臘腸卷   就話一定係我叫喎   不過呢間唔好食囉   臘腸又肥   同埋居然無味啊  
 


鵝腸好爽呀   所以又叫多 1 碟呢   



其實仲有其他點心   同埋仲有 2 碟炒飯   不過我無再影 lu   

飲到 2 點幾   大舅父佢哋就番屋企   剪髮表妹要我陪佢去買衫   咁我問里奧大人去唔去囉   唔去就叫佢自己番屋企   因為頭先佢話有嘢買同做公司嘢   不過佢又話去睇喎 ~

行到 3 點幾   去埋麥記買奶茶就去婆婆屋企喇 ~

估唔到大表妹同細表妹一家已經到咗   之後家姐都嚟埋   我大表妹個女唔多跟人   但就教我哋一嚟就抱佢個女   唔好問好唔好   佢喊一兩聲就唔喊   我覺得咁樣好格硬嚟啦   哈哈 ~

同埋表妹話佢認得我哋   因為每星期會比個女睇一次我哋啲樣   又幾搞笑喎 ~

咁剪髮表妹次次抱佢都喊   所以大表妹話佢會記得啲相係喊   咁見到面又會喊   要佢比啲自拍照比佢個女睇   咁就唔記得抱佢嘅時候   佢係喊緊喎 ~

我終於抱到手啦   不過唔會比佢望到我   呵呵   佢其實都唔係咁想坐我大脾   哈哈   可能佢眼瞓呀   雙眼好呆咁   所以無力反抗 ~

我表妹話 "頭先個女都唔喺同啲細路仔玩   佢哋都係廿幾歲嗰啲玩"   我同剪髮表妹聽完就笑爆咀啦   因為我哋以為係講緊幾歲嗰啲細路仔呀   笑死我   哈哈 ~         

呢個係細表妹個女   無咩頭髮呀   剪髮表妹話佢個頭好似奇異果咁   所以我即刻黐個 Label 落佢頭仔度喇   咁先似嘛   哈哈



差唔多 5 點走人喇   婆婆話我哋一齊嚟好熱鬧   之後一齊走   成間屋靜哂   但我要煎糕   所以陪唔到佢囉   好在大食陪佢   同埋剪髮表妹最後都陪婆婆   本來佢去大舅父屋企食飯㗎   佢話婆婆一個好悶   大舅父屋企咁多人   都係陪婆婆好啲   好感激佢哋陪婆婆呢 ~

坐地鐵番官塘真係超級方便   番到屋企抖陣先 ~

大食表妹買比我㗎   真係好邪   尋日阿 mi 先叫我買盒有辣椒嘅零食比家姐   點知我同家姐就收到辣椒蝦餅   哈哈



糟糟嘅英國手信   佢比家姐   但家姐知我勁愛食薄荷朱古力   仲要係 After Eight   所以佢係都要比我食呢  

                         

7 點煎糕食   啲糕係阿 mi 比我㗎   之前佢已經問我地要唔要   但我地有美心蘿蔔糕   又加上唔知有無時間食   所以唔要自家糕喇   真係唔想嘥咗人地一番心機   估唔到今晚又突然食到阿 mi 整嘅糕   勁開心 ~



美心嘅糕好多水份   阿 mi 整嘅就實的的   我好輕易都煎得好靚   因為唔會散修修呢   呵呵 ~

食完抖陣就沖涼   再開機洗衫   睇埋花車節目   里奧大人就熨 2 機衫   以前我實叫佢休息等我熨   經過今朝嘅事   我以後唔會幫佢熨   哼 ~

我 10 點半都自己瞓先喇   好攰呀 ~

團年飯 @ 阿 Mi 屋企 ( 27-JAN-2017 年三十晚 )

今次算係最少食物嘅一次   哈哈哈哈



壽司拚盤 - 好似 $148/盒   今日勁開心   因為想食壽司同泰菜好耐喇   



咖哩雞 - 阿 Mi 喺 AEON 買咗 1 份貴妃雞   咁樣整又唔錯喎   好快搞掂咁

法包 - 我都完全唔記得係咪阿 Mi 切出嚟   咁好肯定佢整麵包嘅時候   我無幫手呢   



凱撒沙律 - 1 包沙律菜   之後阿 Mi 再加蕃茄   呢個沙律又係夠哂方便   又好味道                  



薯格 - 里奧大人話想食薯格   咁一定買啦   難得主動話食熱氣嘢   佢問我阿 Mi 屋企有無茄汁   我話點知喎   之後佢話我無理由唔知喎   話我咁 8   衰得佢吖      



如果喺阿 Mi 屋企見唔到酒嘅話   我會以為自己入錯屋   哈哈         

                                 

( 27-JAN-2017  FRI )

今朝好寒呀   可能無咩太陽 ~

勁想食薯餅   所以去麥記食早餐   咁啱家姐打嚟問我食咩   我話好想食薯餅   佢聽錯咗話唔想食薯餅   我話係勁想食呀   佢話估唔到喎   以前就留番比佢食   依家勁想食   哈哈 ~



番到菇場   一開電腦就收到 Email 話放 12 點   第一次咁早咋   我同里奧大人仲話今日放 1 點添   不過里奧大人都放 2 點啦   又係第一次放咁早呢 ~

里奧大人今日本來要去上環見客   見我放 12 點   諗住約個客早啲啦   咁早啲去行維園   不過個客唔舒服   所以無得早走   要喺公司做到 2 點先走   哈 ~

咁里奧大人話唔好行年宵   話去搵阿 Mi   咁我勁開心啦   哈哈   佢仲話依家等佢即刻打比阿喂   無諗過佢咁主動㗎   之後佢哋約好就再話我知   我就再問阿 Mi 得唔得閒先   因為佢之前大掃除又蒸糕已經好攰   如果佢要休息   我哋就唔阻住哋 lu ~

我 FB 問阿 Mi   佢話無問題呀   咁啱佢約咗朋友食 Lunch 食到 1 點   我又要 1 點先到荃灣   時間啱啱好   哈哈 ~

最搞笑佢話比驚喜阿喂   我話佢係最後知嗰個囉   哈哈   聽里奧大人講話   佢問阿喂嘅時候   阿喂已經講咗會幾點番到屋企   今晚會食咖哩   叫佢約埋我哋呢 ~

一放工即走   搭小巴真係好快   我好似 1 點 35 分已經到荃灣   但我唔打比 Mi 住   因為我要去千色店買嘢比佢呀   買完都差唔多一點   我都唔敢亂行    1 點阿 Mi 打嚟問我喺邊   我話喺飯堂條街   所以就喺千色店等喇 ~

已經左望右望等佢   因為有兩邊入口   同埋感覺佢會嚇我   點知真係一野拍落我膊頭度   真係點避都避唔過添   哈哈 ~

咁我諗住同佢邊食邊等里奧大人   點知阿 Mi 話頭先特登唔食嘢   等埋里奧大人一齊食   搞到我都唔好意思啦   好在佢都餓得下   同埋我朝早又食得飽   所以等埋里奧大人一齊食都 OK 嘅 ~

周圍行下   又去 SASA 睇下   總知跟阿 Mi 行啦   原來咁多嘢行   我最鍾意行啲商場仔    之後行到 Panda 酒店   我話想去廁所   之後見到有張梳化就一齊坐   又傾下偈   完全唔記得去廁所   傾下傾下就過咗半個鐘   里奧大人應該差唔多到   我哋去完廁所就去番地鐵站接里奧大人喇 ~

去埋機樓拎超市 Coupon 就去金坊食下午茶   原來已經 3 點半喇   大家都應該餓咯   呵呵 ~

阿 mi 問里奧大人今晚想食咩   里奧大人實會話無所謂   之後阿 Mi 話雞腳   里奧大人即刻話玩嘢呀 ?!   佢好少咁樣答阿 Mi 㗎   哈哈 ~

鴨肉湯河 (細)



海南雞飯



泰式鳳爪配春卷



食完就去食糖水   勁飽囉   諗住買滷水鵝同鵝掌翼   但無哂鵝掌翼   阿 Mi 話下次先買   咁即去蘭苑食糖水 lu ~

紅豆沙 (熱) - 呢碗我嘅   無咩味同埋好少紅豆囉    



綠豆沙 - 里奧大人要凍嘅   阿 Mi 要熱嘅   又係無咩料咁



之後一齊去 AEON 買晚餐   因為要用 Coupon   所以要計得準啲   咁買下計下   又要有啲唔買住   所以里奧大人負責放番原位   我哋繼續計   不過最後張 Coupon 原來係聽日開始   笑死 ~

買完就行番屋企   今日我好似荃灣一日遊   不過下次都應該唔會記得點行   哈哈 ~

阿 mi 番到屋企就預備咖哩   之後我話想睇佢細個嘅相   我超級鍾意睇人哋細個啲相㗎   好得意呢 ~

估唔到阿喂 6 點就番到屋企   佢明明話 6 點 45 分家嘛   不過咁都好   可以 6 點開局   哈哈 ~

我地 3 個真係堅飽囉   阿喂好似唔多信咁   見佢咁餓   開包蛋散比佢食啦   我頭先喺大同買㗎   我都係覺得 4 個人食開心啲   兩個人食真係覺得好多呢 ~



真係唔餓   所以開局先   玩到 7 點半左右就預備晚餐喇   阿喂都應該餓㗎喇 ~ 

  

阿喂坐我右邊   勁驚佢偷我啲錢囉   所以我就擺哂 4 個十蚊雞喺右手邊   最多都係偷到 $40   呵呵

食下傾下   時間過得好快   都唔知幾點食完   洗埋碗又話開局喇   哈哈 ~

明明好多棟籌碼喺自己臉前   點知輸下輸下得番好少   咁里奧大人話灘長嚟擺   咁咪好似多啲囉   咁我聽佢講啦   但每棟得個 2 個   有鬼用咩   哈哈

11 點 40 分食甜品   阿 Mi 自家制龍眼南棗糕   好味呀   唔太甜同埋夠煙韌   不過我真係好飽   只能食 1 件咋   里奧大人就食咗 2 件 ~

 
玩到 1 點半呀   今次阿喂係大贏家   我係輸家   好似輸咗 5 千幾 ~

擺番好籌碼就即 Call 的士走喇   番到屋企沖埋涼都 2 點幾   即瞓喇   哈哈 ~

煎瑤柱蘿蔔糕 + 粟米蛋花湯 ( 26-JAN-2017 )

( 26-JAN-2017  THU )

今朝仍然係陰陰寒咁喎   之前話上星期六好凍   今星期回暖   但我覺得今星期仲凍過星期六呀 ~

早餐食芝腿治   茶餐廳聽日都收爐 lu   好在侍應講咋   咁可以諗定其他地方食早餐   呵呵 ~



菇場唔忙呀   今日勁有 Holiday Mood 呀 ~

今日有 Farewell Lunch    所以去酒樓飲茶   多人到呢   人哋以為我哋食團年飯都未定 ~

食完就番菇場   無耐又話叫下午茶   今日最正係西瓜同老闆都唔喺度   真係超級勁 Free ~



食埋下午茶   抖多陣又放工   全日食食食咁   哈哈 ~

番到屋企就開機洗衫   入埋利是就抹其他嘢   之後再拖地   咁里奧大人 7 點 40 分打嚟話到屋企附近   嚇得我吖   我話做咩唔話我知放工   佢話 Line 咗我   我咪話囉   我做緊嘢唔睇電話家嘛   好在今晚煎糕   唔係 8 點幾先有得食 ~

是日懶餐 - 煎瑤柱蘿蔔糕 + 粟米蛋花湯 

煎瑤柱蘿蔔糕 - 美心換㗎   我已經落咗好多油   但一放落去煎已經比油彈到   啲糕太多水份喇   同埋好散   我好有心機煎㗎   但真係盡哂力都係白雪雪   我話之得蒸好過   哈哈 ~

喺大孖買嘅辣椒醬都唔錯喎   好似 $28/支   都幾辣

                      

粟米蛋花湯 - 原來啲粟米湯 5 月就到期   依家真係清得就清喇   哈哈 ~

搞掂哂就沖涼   等埋里奧大人沖涼就開局   屋企有副陳年啤牌無開過   咁就開嚟玩啦   再拎埋廿年無用過嘅籌碼出嚟玩 ~

今次賭本每人 $5,000   突然間覺好少錢   哈哈   玩咗幾局話事啤   每人 $10 注   細牌唔跟   每次真係執十蚊雞   唔對路   因為好悶   哈哈   之後我話玩鋤大 D   因為想用下個腦嘛   里奧大人話兩個人玩   有靚牌就一定贏 (算唔算廢話 ?!)   佢又係好驚驚青青   成日驚炒 ~

一路食零食一路玩啤牌   衰奧即刻話我似啲阿伯   又話我輸咗又唔比錢   無句好 ~





玩到 10 點半就收局   佢只係贏咗 $190   咁細數目   下次齋玩算喇   懶得執番好啲籌碼   哈哈 ~

睇多陣電視就瞓喇   應該 11 點唔夠   所以無電視劇好睇都好㗎   可以早啲瞓呢 ~