源記粉麵茶餐廳 @ 荃灣 ( 19-JAN-2017 )

牛什米 - 家姐叫多蔥   我覺得有啲怪   但太攰諗唔起點怪   之後家姐話因為我鍾意多蔥   哈哈  

魚片頭粗麵 - 魚片頭比較硬身   口感有啲怪   好在辣椒油夠香辣   呵呵      



( 19-JAN-2017  THU )

今日暖好多喎   但聽日又急凍   呢啲天氣真係玩死人咯 ~

早餐食熱狗   好想食酸咪咪嘅嘢呀 ~



菇場忙呀   11 點幾先搞掂 ~

Lunch Time 去買酸辣米線   酸酸辣辣真係好開胃   正呀 ~

放工搭小巴去荃灣   一上車合埋眼   點知一開眼就到咗九龍塘   仲以為自己無轉車呀   原來呢架係直通車   所以 6 點就已經到荃灣喇   勁快 ~

去到仲要等   差唔多 7 點半先開始呀   卷好哂都 8 點   家姐啱啱嚟到   佢仲慘   要等   哈哈哈哈 ~

到我 8 點半洗頭   咁家姐仍然齋坐   咁都好喎   可以一齊傾下偈   哈哈 ~               

差唔多 9 點幾   表妹 Partner 無啦啦番嚟   嚇到家姐以為邊個   之後即刻話佢 "你番嚟做咩呀 ?!"   我聽到 Partner 話番自己舖頭都比客鬧   哈哈哈哈   我估家姐嗰下真係好驚呢   因為 Partner 明明走咗成個鐘頭嘛   無諗過佢番嚟囉 ~

咁表妹幫家姐洗頭   我又一齊去啦   傾下偈嘛   雖然開住水龍頭好嘈   但唔理喇   哈哈   佢話有時幫人吹頭   一吹就成陣臭味   但洗頭又聞唔到臭味   佢咁講   嚇到我即刻問咁我有無臭味   好在佢話無   仲話我黐線   哈哈 ~

我話我個女同事又係成日有陣味咁㗎   佢長頭髮   但見佢隔日個頭就好 "立"   所以佢一定扎馬尾   但我成日都聞到佢身上有陣味   我唔識點形容   唔係酸叔   我覺得好似係一陣油煙味同汗味咁   咁我聽到家姐話係 "牛油" 味   我好奇怪   就算食牛油多士   都唔會大陣味到成身都係牛油味家嘛   同埋我話佢買早餐番嚟食㗎   之後又再講講講   仍然聽到家姐話係 "牛油" 味   我仍然都話點會有牛油味㗎   佢都無喺出面食早餐   之後家姐大笑話 "頭油味" 呀   哈哈哈哈   無計啦   水龍頭好嘈   又差唔多音   聽錯唔出奇囉   哈哈哈哈 ~

10 點先電完   但仲未剪   好在過多 15 分鐘就到我剪喇   之後到家姐剪   家姐話想剪到咁咁咁   但表妹叫家姐唔好搞咁多嘢   哈哈哈哈   又係佢問人哋想點剪嘅   衰到死   成日蝦家姐   佢話咁樣表姐先會嚟多啲剪喎   哈哈 ~              

搞掂哂都 11 點 10 分   估唔到仲有 2 個客整緊   但其實表妹仲有個客未嚟翻染   所以本來約咗今晚等佢收工一齊食   最後都唔得 lu   好在我買咗包芝士餅   佢可以食幾塊頂住   見佢真係未停過手呢 ~

好餓呀   但又要趕搭車   所以家姐話食碗粉算喇   呵呵 ~

家姐搭巴士直接番屋企   我就坐小巴   勁眼瞓呀   但唔敢瞓   因為架小巴好 Chok ~

番到去都 12 點幾   估唔到同家姐同步   佢架巴士真係好快呢   知佢番到屋企就即刻沖涼喇   好在電咗髮   今晚唔可以洗頭   唔駛吹頭   慳番好多時間㗎 ~