上海姥姥 @ 九龍灣 ( 31-MAY-2018 )

醋拌香辣海蜇 ($44/輕盈) - 真係好輕盈 Size 喎   由細到大   我都好鍾意食海蜇呢



招牌小籠包 ($40) - 呢個好味喎   熱辣辣同埋有肉汁



回鍋肉 ($77) - 里奧大人反而話唔好味道   話個汁好甜



排骨炒粗麵 ($68) - 無鑊氣   又唔夠熱



( 31-MAY-2018  THU )

尋晚個人又無話熱喎   咁都好   真係好怕成身好慶嘅感覺   唔知點咁 ~

早餐食餐蛋治   好味道 ~



菇場勁忙呀   樣樣 Urgent   諗住抖下都唔得了 ~

個阿叔終於無做啦   我覺得唔多唔少係阿怪啲態度差   同埋妳真係唔好 Expect 人哋做兩日就識哂啲嘢先得㗎   依家阿怪自己做番   真係抵死   但反而佢依家日日都 9 點 20 分先番到   有時 9 點半先見人   講真   我唔覺佢忙囉   之前我行去佢位問嘢   佢直頭睇聽住 Headphone 睇緊 TBB 劇   真係仲離譜過我   我上網都唔好啦   妳仲睇劇 ~

Lunch Time 出去行陣再買飯   呢排超級勁熱   食完粉麵好鬼熱   所以又要食下啲乾嘢   哈哈 ~

仍然忙下停下   勁攰呀   勁想快啲放工 ~

放工去淘大行陣   順便去泰昌買特價包   明明買咗 3 個 ($14)   但 Cashier 話 4 個就十七蚊   咁我買 4 個囉   買完又有啲後悔   哈哈   因為好似太多咁 ~

唔想周圍行  咁又去書局睇書   睇咗一頁   里奧大人打嚟話放工   之後話想食上海粗炒   去德福食喎   又要行番過去 ~

咁我去上海姥姥拎位先   去到要我坐門口張 4 人枱   係 L 型梳化   但好迫囉   同埋已經有人坐一邊   我覺得係搭枱咁   所以我唔想坐 ~

之後我話想坐入面 4 人枱   因為我見到只係 2 張 2 人枱拍埋一齊之嘛   咁佢又唔比   叫我坐吧枱   頂佢吖   我唔理佢   之後佢叫我長枱   但要對住坐   咁我無問題   我反而唔鍾意里奧大人坐我隔離   對住佢好過對住陌生人食嘢嘛 ~

講真   唔係里奧大人話好想食排骨粗炒   我想走添呀   黐鬼線   叫我坐吧枱   明明有枱唔比我坐 ~

食到咁上下   比我見到有男經理定咩   帶個女人坐張 4 人枱   佢都係 2 個人   所以就將 4 人枱分開   點解頭先個女侍應係都唔比我坐呢   離哂大譜 ~

最鬼衰里奧大人   唔係佢話好想食   我唔駛咁激氣 ~

我同里奧大人食完又勁口渴   我話可能豆板醬   里奧大人話佢食咗好少豆板醬咋喎   咁佢話太多味精 ~

其實呢間上海姥姥同阿 mi 喺荃灣食過   我好肯定當時我無咩飲水   好似飲咗 2 啖咋   但都唔口渴   同埋我係唔想去德福呢間㗎   因為水姑話呢間好好食   講到全世界最好食咁   我已經知一定唔方好食   因為佢一食開就話好食   即係好似金滿庭   明明水準已經差哂   佢都話好好食   救命 ~

咁我哋見有時間就去食雪糕啦   估唔到手作執咗   咁去老麥食啦 ~

食完就番教會   今晚無遲到呀   勁開心 ~

9 點半完畢就即番屋企喇   條街咁熱真係不宜久留呢   哈哈 ~

頭先我買咗 2 個芝士包同 2 個麥包   里奧大人之前話喺公司食芝士包好大陣味喎   話有無第啲包 ?!   咁我咪買麥包比佢囉   之後見到麥包又話大個   要番芝士包   你話係咪煩吖你 ~

沖埋涼就休息   里奧大人 10 點半瞓   我就 11 點先瞓 ~

京饌 @ 官塘 ( 30-MAY-2018 )

香醋汁海蜇頭 ($98) - 第一次食   口感爽脆   味道又酸酸哋   我覺得勁好味呀   哈哈

南翔小籠包 ($48) - 都幾多肉汁呀



雪菜肉絲炒年糕 ($88) - 實在太好   又可以食年糕   因為里奧大人唔多鍾意食年糕呢

花素蒸餃 ($55) - 呢個漏單囉   成個鐘先來   我諗住取消   但 CC 話唔好喎   因為話唔係食咗好多嘢喎  

( 30-MAY-2018  WED )

尋晚瞓得都 OK   但瞓瞓下又熱咁   之後又凍喎   煩 ~

早餐食腿蛋治   今次唔烘底喇   熱鬼辣辣唔想食啲太乾嘅嘢   哈哈 ~

菇場忙下停下   之前請咗個阿叔做 Junior Clerk   目測都有 50 歲   我唔明點解請呢啲年紀   貪人地夠穩定 ?!   好喇   我尋日聽阿怪對佢態度都好衰   好悔氣話我已經教咗你兩次   又咁咁咁   人哋嚟咗 2 日咋   好似想要人哋識哂所有嘢咁 ~

佢阿 Head 一唔喺位就對人態度差   但喺度就懶 Nice 咁教人   呢點最黑人憎   所以我又好自然咁啤啤佢   我呢啲真係厚多士   哈哈哈哈 ~

Lunch Time 出去食   咁啱溫總同車神又係食粉麵   咁一齊坐啦 ~



番到菇場抖陣又開工   但依家天氣熱   晏晝出一出去熱一熱   番到菇場就好想瞓   但其實我食飽又瞓唔到   頂住個胃好辛苦呢 ~

放工搭地鐵去 APM   今晚約咗 CC 食飯呢   開心開心 ~

我 6 點左右都到喇   CC 無耐都到啦   依家佢放 6 點   咁就好喇   唔駛等咁耐   哈哈 ~

咁佢打比我問我喺邊   佢喺咁喂喂喂   我又係咁講我喺度   之後佢把聲突然好驚咁再叫我名   無人應佢就收線   咁我打番比佢啦   佢話頭先聽到把男人聲   話有咩藍色貨辦喎 ~

終於同佢見面   真係好喇   咁我地不嬲用 Skype 聯絡   咁前排想同佢 Say Hi   又佢成日唔見人   對上一次佢話公司生意唔好   我心諗唔係比人炒咗呀嘛 ?!   所以忍唔住 Whatsapp 佢 ~

條友又無尾音又無 Icon 喎   就咁寫 : "我正想約妳星期三食飯。" ~

咁我就講地方啦   之後佢話無開 Skype   咁佢又唔方便喺公司 Whatsapp   所以講完地點時間就算喇 ~

今晚見面就問佢咩料啦   我直頭話驚佢比人炒咗添呀   之後佢話工廠都已經唔用 Skype 問嘢   所以佢都唔用喇   原來如此 ~

有時我講唔開心嘢   講得好激動   佢個樣又顯得好嬲   因為佢都覺得離譜嘛   我話人哋唔知   以為我鬧緊佢呀   哈哈哈哈 ~

今晚里奧大人都喺米線陣食晚餐   佢 Send 相比我都唔知添   因為我手機放咗喺手袋入面 ~

食下傾下又 9 點   今餐 CC 請我食飯   話係我嘅生日飯   我話唔駛啦   都過咗咁耐   我完全唔記得呢回事添呀   但佢喺都要比   咁下次到我請佢食生日飯啦 ~   

之後一齊行去 MUJI 睇防曬   點知話全線無哂貨   唉 ~

無得買就走人啦   無啦啦又企喺度傾多幾句先行去搭車 ~

番到屋企都 9 點 45 分   我沖埋涼就開機洗衫 ~

里奧大人 10 點幾都瞓先喇   我就 11 點 40 分先瞓   今晚夜瞓咗好多啦 ~

腸仔蕃茄通粉 ( 29-MAY-2018 )

( 29-MAY-2018  TUE )

嘩   一覺瞓到鬧鐘響呀   我覺得自己係昏迷咁呀   即係好深層熟睡咁   真係好少有囉 ~

朝早沖個熱水涼都唔會話熱   再行去搭車都唔覺熱   妳話係咪怪   哈哈 ~

早餐食奶醬多   好味好味 ~



菇場唔太忙   可以做自己嘢 ~

Lunch Time 出去買包里奧大人做早餐   之後再去超市買通粉   再買埋 Lunch 就番菇場喇 ~

食唔落塊豬扒   留番今晚   所以呢一餐超抵   可以分兩餐食   哈哈



仍然唔太忙   所以放工即走 ~

番到屋企就即預備晚餐   之後拖地   里奧大人 7 點 15 分放工   咁就好喇   早食我可以多啲時間用嘛 ~   

是日懶餐 - 腸仔蕃茄通粉

腸仔蕃茄通粉 - 今次好有心機煮蕃茄湯底 (其實我要清埋 8 個蕃茄   已經爛咗 2 個喇)   用乾蔥頭開鑊   又加茄膏同濃湯寶   味道真係同齋煲蕃茄有分別 (在於有味精)   不過唔理喇   最緊要好味道   哈哈   里奧大人不知幾鍾意食 (我覺得) ~      

本來諗住焗熱啲腸同豬扒   但預熱焗爐再焗都要廿分鐘   所以開炒啦   不過落得太少油   黐鬼哂底   又要洗餐死   哈哈   下次都係焗喇 ~

洗埋碗就去徑步   徑半個鐘就夠喇   今晚好鬼攰呢 ~

沖埋涼就休息   睇多陣電視   今晚我個身又唔熱喎   因為今日我特登唔食黑杞子   唔通黑杞子真係咁燥 ?! 

里奧大人 10 點半瞓   我就 10 點 50 分都瞓喇   其實 11 點前瞓係最好   希望之後都係咁啦 ~

茜廊餐廳 @ 九龍灣 ( 28-MAY-2018 )

個忌廣湯完全無料   我仲諗住有啲蘑菇粒咬下添   又勁難飲喎

香烤燒春雞 (免費但要收加一) - 里奧大人以為好大隻雞   我話燒春雞呀   唔係燒雞   佢話有咩分別 ?!   我話有個春字囉   同埋鵪春蛋都係細細隻啦   講完我都喺度笑   9 唔搭 8   哈哈   之後好認真講多次   燒春雞一定係細隻嘅

三文魚什菌刁草薄餅 (9吋) ($143) - 三文魚好腥   食完成個口都係苦囉   慘

Terms 啲字就整到細細粒

( 28-MAY-2018  MON )

尋晚瞓得唔錯喎   感恩感恩 ~

早餐食吞拿魚治   天氣熱又唔想食濕嘢   但食三文治又好乾咁   煩 ~



菇場忙呀   但要慢慢清囉 ~

今日真係忍唔住鬧阿怪   因為有嘢要溫總改   咁我叫啦   我跟開嘛   之後溫總星期五放完假番來   佢就即叫我比溫總   咁我比啦   佢星期六又問我得未   我話佢未比我   咁今朝又打電話來問   我好大聲話妳咁心急妳自己直接搵佢改啦   妳催我無用   之後佢笑笑口話唔好呀 ~

佢唔鍾意溫總   溫總又唔鍾意佢   妳地黐係妳嘅事   咪搵我做中間人   我彩妳都傻   有次怪叫我問溫總   問完話番佢知   我仍都好大聲同佢講 (唔係態度差   只係比埋溫總聽)   我話妳問我   我問佢  佢答我   我又答番妳   點解妳唔自己搵佢呢下 ?!   之後佢都直接搵溫總啦   問題係佢哋嘅對話   我唔需要知   我只要條數啱就可以   大佬   已經大把嘢做   仲做埋呢啲無謂嘢   我彩妳都傻呀 ~

Lunch Time 出去買水餃米   唔知點解突然好肚餓 ~

仍然忙下停下   好快就放工 ~

去一田行陣   但又無嘢想買 ~

里奧大人話今晚 7 點可以放工   咁我都去九龍灣等佢喇 ~

估唔到佢 6 點 20 分就放工   我去 Sidewalk 等佢 lu ~

咁又會有張擦擦卡   我同里奧大人一齊表示   再有免費春雞嘅話   我哋嘅反應係: 唔好喇啩   哈哈   不過我話中乜都唔會來食   根本唔好食   唔想嘥錢嘥時間 ~

中咗 20 蚊現金劵   但要食夠一百蚊先用到   即係 8 折   但我唔會再來食囉 ~

食完諗住去 MP 買馬來西亞西瓜   居然無哂   咁番屋企喇   條街好鬼熱 ~

今晚唔徑步   所以即沖涼再開機洗衫 ~

睇多陣電視   再食支雪條降溫   我覺得自己個身體入面   好似個火爐咁   但食完支雪條   成日人又無咁慶喎   仲覺得凍   大嫂   究竟我咩事呀   哈哈 ~

里奧大人 11 點唔夠都瞓   佢以為我夜啲瞓   我話我都瞓啦   呢排好鬼攰咁 ~

麻辣牛肚絲 (外賣) + 滷水鴨腎 (外賣) + 絲瓜瑤柱湯 ( 27-MAY-2018 )

( 27-MAY-2018  SUN )

今朝我 9 點半已經醒咗   又見好精神   所以都起身沖涼 ~

之後鬧鐘響   里奧大人以為我啱啱起身   我話我已經搞掂哂啦 ~

食完早餐就番教會   次次都有充裕嘅時間食早餐   所以我地寧願早少少起身   里奧大人知我鍾意嘆早餐   唔鍾意咁急趕 ~





崇拜完畢就番屋企   家姐無啦啦 Whatspp 問我食唔食下午茶 ?!   我又好自然咁問番佢係咪同我食 ?!   因為佢好多時星期日都會問我做緊啲咩   咁佢居然話同我食   我勁開心 ~

咁尋日我又買咗薯片同龍角散糖比佢   又可以順便比埋佢 ~

2 點半就出發   去到見到有 2 條廁紙   真係比佢激死   我星期五見到廁紙特價就話佢知   因為之前佢成日話想買廁紙嘛   之後佢話佢喺 HKTV Mall 買仲平   又問我要唔要 ?!   我話唔要啦   屋企仲有 2 條   但佢仍然比我   我下次都唔敢再問咁多嘢 ~







我話唔要   但家姐係都要買比我   下次我唔敢問咁多嘢喇 

家姐話頭先拎住 2 條廁紙   咁同個男人一齊入餐廳嘅方向   之後家姐話突然有人好大聲同佢講: 我幫妳開門   家姐話比佢嚇咗一跳呀   話以為搶嘢   笑鬼死我啦   黐線   搶妳條廁紙咩 ?!   哈哈哈哈   之後佢話喎   頭先對望嘅時候   要是開門   應該個男人早行過佢   開門比佢   所以家姐咪無諗過佢開門囉 ~

我送埋家姐搭巴士就番屋企   又上 Youtube 睇下嘢   咁正想瞓着嘅時候   有電話打來搵我   原來係啲銀行電話   激鬼死   難得瞓着嘛   哈哈 ~

咁醒哂啦   又口痕食魚片   食下食下   食咗好多塊

今晚 6 點半開飯   早食早休息 ~

食飯前覺得唔係咁舒服咁   但無理由係熱   之後諗諗下   可能食得太多魚片呀   慘 ~

是日懶餐 - 麻辣牛肚絲 (外賣) + 滷水鴨腎 (外賣) + 絲瓜瑤柱湯

麻辣牛肚絲 (外賣) / 滷水鴨腎 (外賣) - 本來唔想翻熱牛肚絲   但原來唔得架   有好多膏咁   所以兩樣都要翻熱   本來方便餸都變咗唔方便   哈哈哈哈 ~

絲瓜瑤柱湯 - 星期五買嘅絲瓜   今晚點都要滾湯   唔係條絲瓜會縮哂水   變壞咁㗎喇 ~

洗埋碗就去徑步   其實我好攰   但又想郁下 ~

徑半個鐘   夠哂皮喇   因為好熱呀   哈哈 ~

沖埋涼就休息   11 點都自己瞓喇 ~

銀咖哩 @ 九龍灣 ( 26-MAY-2018 )

食食下同里奧大人講   依家銀咖哩咁衰㗎   越來越少飯   之後佢話佢叫少飯㗎   哈哈   鬼知咩   你又無同我講

條友第一時間分開啲飯同餸   咁我食嘅時候   我習慣將啲飯撥向入面嘅   咁唔駛論論盡盡跌落張枱度   衰奧話我呀   啲飯推哂落佢嗰邊   所以佢啲餸跌哂出來咁滯   話我個人好自私呀   我笑到噴飯呀   個衰佬又講得無錯喎   哈哈 

( 26-MAY-2018  SAT )

今朝同家姐食早餐   佢尋晚先約我   因為佢尋日先知今日要番工 ~

Toast Box 嘅凍咖啡   唔會因為加咗冰而味道淡哂   值得一讚







8 點 45 分走人   家姐係咁話熱   但我話我 OK 喎   我仲飲熱啡   所以佢覺得好出奇   哈哈 ~

菇場唔忙   拿拿聲寫埋旅遊 Blog   再拖呢   真係咩都唔記得哂 lu   依家真係無咩記性呢 ~

放工即走   去買麻辣牛肚絲同鴨腎番屋企   之後再去圖書館借咗本旅遊書   咁里奧大人剪完髮   佢啲家姐無啦啦叫佢飲茶   飲完又要幫姑奶整嘢   所以我今日午好 Free   咁就行下一田血拚啦 ~

今日仍然係一田特價日   所以買嘢有 95 折   行下買下都成個鐘   我買嘅樣樣都做緊特價   勁開心呀 ~

番到屋企都 2 點半   放低哂啲嘢就去食下午茶喇 ~

唔知係咪餓過籠   食咗一半已經好鬼飽   不過點都要食埋去啦   食完即周圍行陣消化下呀 ~

條街熱到爆炸   番到屋企真係要開冷氣   之後又熨 2 機衫 ~

里奧大人 4 點 15 分左右番到屋企   又係咁話今日好熱   啲陽光曬落嚟係辣肉 ~

整過西瓜涼粉比里奧大人食   佢幾鬼開心   之後我話要淘寶買嘢去旅行着   一淘就淘咗 8 條裙   勁開心呀   都只係接近四百港幣咋 ~

咁我買咗餸嘛   但里奧大人又想用埋張 Sidewalk 嘅 Coupon   咁今晚去啦   聽日留番喺屋企休息 ~

6 點出發   成日仲以為係 4 點幾   因為個天仲好光呢 ~

去到 Sidewalk 好在問一問   原來張 Coupon 係星期一至四   6 點後先用到囉 ~

我承機話佢啦   妳兩姐弟對眼都唔知睇乜   好在唔遠啫   唔係真係浪費時間   因為我已經買咗餸嘛 ~

我話要食飯   里奧大人話去美心食豬扒飯   我話唔好喇啩   唔想食快餐囉   之後我話去銀咖哩   因為佢哋係珍珠米   好味道   哈哈 ~

食完就要行下啦   本來想徑步   但里奧大人話天氣好焗   唔好徑喎 ~

差唔多 8 點就番到屋企   即沖涼啦 ~

個人真係好熱咁   我估將來真係有潮熱   真係幾辛苦   哈哈 ~

食咗西瓜又舒服好多   以前點熱都唔會話想食西瓜   但呢排真係唔食唔得咁呀 ~

我 11 點幾都自己瞓先喇   勁攰呀 ~

豉汁蒸鯧魚 + 菜心苗 + 芫茜皮蛋魚片湯 ( 25-MAY-2018 )

( 25-MAY-2018  FRI )

感恩一覺瞓天光   但就一直發夢囉   好記得見到媽咪   同埋見到有芒果   哈哈 ~

今朝想飽啲   所以食米粉餐 ~



我同 8 卦邊個到先就會幫對方叫埋早餐   咁可以慳番等嘅時間   咁今朝佢遲咗   我又幫佢叫早餐啦   佢居然食三文治   因為佢多數打包先食嘛   但我無為意   因為我掛住睇資料   好喇   都差唔多 9 點都未到   咁 Whatsapp 佢   之後佢話搭緊 Lift   但成 5 分鐘都未到   驚佢暈呀   因為佢間唔中就話血糖低有啲暈嘛   所以即打比佢喇   原來佢已經番到菇場   佢打漏咗 "打包" 呢兩個字 ~

咁番到菇場   佢 Skype 我   話頭先我做咗一樣嘢令佢好滾動   仍都覺得我係咩人喎   佢話佢打比我嘅時候   佢話係要打包呀   咁我話死啦   佢話以為我會講話搞到我遲到   但我係話: "死啦   啲嘢凍哂"   佢話無諗過我係咁講囉 ~

所以我成日話要里奧大人番來食熱嘅飯餸囉   雖然我都會怨太遲開飯   但凍冰冰真係接受唔到囉   諗番起我之前成日食凍菜   我真係鍾意食菜都唔會食   暖都算   凍喎   仲要無嘢蓋住   堅係食緊塵咁囉 ~

菇場唔太忙   咁就好喇   好想抖下呀 ~

Lunch Time 未餓   咁就周圍行啦   行下行下就行咗 40 分鐘   去超市買咗梳香蕉同 8 個奇異果   之後就買嘢食番菇場喇   行到勁熱添 ~



放工去街市買餸   又忍唔住買 1/4 個西瓜同 4 個大蘋果   之後再買 1 斤菜 + 1 條魚肉 + 10 個蕃茄  + 2 條勝瓜   再加埋晏晝買嘅生果   好重呀   成日買下買下   買完先覺得重 ~

番到屋企即預備   咁我整嘢嘅時候   隻手係咁震又無力   我心諗死啦   今次震得咁犀利嘅   之後再望到啲生果   先醒起拎得太重啦   哈哈 ~

我平時將魚肉剪到一塊塊   上次見阿 mi 係一條唔切斷㗎   但我煲完出嚟   都係散哂嘅   嗚嗚

里奧大人 7 點放工   去埋淘寶拎嘢就番屋企喇   今晚想煮飯   但真係熱到食唔落飯   所以最後都係煮上海麵比里奧大人   我食餸算喇 ~

是日懶餐 - 豉汁蒸鯧魚 + 菜心苗 + 芫茜皮蛋魚片湯

豉汁蒸鯧魚 - 好耐無食魚   係時間蒸來食啦   呢條 $30   都幾厚肉 ~   

菜心苗 - 食剩半斤   今晚食埋佢 ~

芫茜皮蛋魚片湯 - 上次見阿 mi 整呢個湯   我又學到嘢   好在我心血來潮 Send 張相比佢咋   之後佢再提我要醃鯇魚肉呢   今次個湯好甜   但里奧大人話好甜好滯   我話係清甜喎   可能佢果碗比較多渣   所以有咁嘅感覺 ~

咁我講番今朝 8 卦單嘢比里奧大人聽   之後我話所以我都想你每餐食嘢都熱辣辣囉   條友串串共笑笑口話唔係喎   有啲嘢係凍   頂佢吖   我有啲火   叫佢講咩嘢係凍呀 ?!   (我其實有時都會早啲煮定菜  好似今晚咁   一邊爐頭蒸魚   另一邊爐頭淥菜   淥完菜就淥麵 ) ~

之後佢話啲麵包係凍   我話麵包我整㗎 ?!   佢居然笑笑口話係   呢下火來喇   我話你自己放工買包都唔係熱啦   就算熱呀   你第朝食都係凍啦   之後佢話可以係熱   我即講話我可以每朝早蒸熱啲麵包你食   下次我買個菠蘿包番嚟 (我特登講蒸菠蘿包    因為啲皮濕哂無可能食啦)   朝早你一定要食   唔食就禿頭   佢當堂收聲   呵呵 ~

洗埋碗諗住去徑步   但真係好攰   所以最後都係沖涼休息呢 ~

咁叫里奧大人開機洗衫   洗咗 15 分鐘   我無啦啦問佢有無落洗衣液 ?!   真係好奇怪唔知點解我會咁問   但好在問一問   佢居然答話無   仲話我開咗機   所以佢以為我落咗   我即鬧佢啦   係你自己叫我幫你開機   咁如果我落埋洗衣液   即係我開機洗埋啦   駛咩叫妳幫手開機洗衫呀 ?!   依家居然將問題瀨落我身上   唉   點解佢同佢屋企人咁似㗎   一有問題就賴人   不知所謂囉 ~

佢 11 點都瞓   我 11 點 15 分都瞓喇   勁攰呀 ~

牛下新城 @ 九龍灣 ( 24-MAY-2018 )

今次我要小辣



夾起啲餸   咁樣食就方便啲   同埋我唔食得白蘿蔔   又食唔到咁多丸   所以留比里奧大人食   佢嚟到啲嘢都凍哂   真陰功   好在佢食凍嘢無問題咋



我好想食煎釀三寶呀   隻尖椒好大隻   又辣喎

里奧大人食腸粉

( 24-MAY-2018  THU )

尋晚係咁同里奧大人講   話我個身體好熱咁   熱到好攰   我好少有咁嘅情況嘛   咁瞓瞓下覺嘅時候   佢無啦啦話我尋日食咗爆谷呀   好熱氣㗎   估唔到佢又會諗喎   因為我都無再諗點解咁熱囉   算佢啦 ~

今朝佢好早起身上大陸   我去埋個廁所都即刻瞓得番喇 ~

咁我個鬧鐘顯示無咗幾棟   所以成日睇錯啲數字   即係 4 字無咗 2 棟就變咗個 1 字咁呢   但我又唔想買個鬧鐘囉   我好鍾意呢個鬧鐘嘅音樂聲   同埋呢個鬧鐘成百幾蚊   所以點都唔會掉囉   呵呵 ~

所以今朝又嚇死咗   以為鬧鐘唔響 7 點 44 分起身   但其實係 7 點 34 分   我仲有 1 分鐘我可以懶床添   哈哈 ~   

早餐食芝腿治   今日又突然想食乾嘢 ~

菇場忙呀   樣樣都急   不過搞掂哂又好開心嘅 ~

Lunch Time 出去行陣   諗住食水餃米   但又好似好熱咁   咁個天又有黑雲喎   所以最後買個豬頸肉飯套餐番菇場慢慢食喇 ~

我覺得外賣份量多過堂食呀   所以盒拍青瓜同百香薄荷茶   留到 3 點幾先食到呀   幾咁抵食   哈哈

仍然忙下停下   好快就放工 lu ~

去淘大行一陣   再喺商場坐一陣   快手做埋功課就再行下   又忍唔住去泰昌買 $14/3 個嘅芝士包   2 個比里奧大人   1 個比自己   呵呵 ~

6 點 45 分行去食嘢   里奧大人 7 點 40 分都到喇   食埋嘢就番教會呢 ~

9 點半散會   番到屋企都即沖涼   之後即食 2 嚿西瓜   唔知係咪食咗中藥   呢幾晚個人好熱呀   平時唔會咁㗎 ~

今晚 11 點 15 分都瞓喇   都唔知係咪個身太熱   所以令到個人好攰呢   但係夜晚先係咁熱㗎喎   奇怪   下次問下中醫先 ~