黑椒雞柳炒意粉 + 菜心 ( 1-MAY-2018 )

( 1-MAY-2018  TUE )

一覺瞓到 9 點半自然醒   真係好開心呢 ~

食埋早餐就番屋企執嘢   預咗今日執個櫃   但唔知點解突然好眼瞓   里奧大人叫我瞓啦   我話唔會囉 ~



好喇   認真地執櫃   其實因為我唔想成日買買埋埋唔知買咗咩   之後啲嘢又過期   好煩囉 ~

一執   就發現原來有 40 隻牙刷   再蹳 8 支大牙膏加 9 盒 Face Lotion   真係好在執一執啫   唔係我又會繼續買   因為成日無數   只係印象中就嚟無喇   要買咁囉 ~

執好哂個櫃都 1 點半   要沖涼喇   同埋唔知點解好餓咁   所以一到 2 點就去食下午茶啦 ~

食完就去買排骨   之後就番屋企抖下 lu ~

難得好陽光   又開機洗厚褸   一機只洗到 3 件   所以冬天開機次數係比夏天多好多呢 ~

里奧大人今日好 Relax   可以睇哂佢啲財經雜誌   我就睇 Youtube   不過睇睇下都瞓咗   4 點半瞓到 5 點左右   起身又一條好漢啦   所以即去整新嘢   哈哈 ~

全麥麵粉已經到期   係時候清埋啦   1 Kg 唔嘢少啦   起碼整 4 次   依家好後悔買 1 Kg ~

我揸住嚿麵團   對住佢大叫 "不成功便成仁"   之後里奧大人問咩事   哈哈 ~

之後我話試整新嘢   希望成功啦   之後佢話我呢排煮好多新嘢都好好食喎   咁比面呀 ~

等待發酵



出動木棍碌碌碌



碌完出來   我忍唔住大叫: 乜 Q 來㗎   哈哈哈哈   仲有 3 個麵圈   留番聽晚蒸來食先   希望入到口啦

6 點半預備   7 點幾開得餐喇 ~

是日懶餐 - 黑椒雞柳炒意粉 + 菜心 

黑椒雞柳炒意粉 - 原來無哂黑椒汁   咁求其生抽老抽黑椒粉撈埋做汁就算 lu ~

菜心 - 清埋半斤菜同埋之前嘅韭菜同蔥   清嘢真係好開心   哈哈 ~

搞掂哂就沖涼   再開機洗衫   今晚攰呀   所以唔熨衫喇 ~

咁里奧大人食條香蕉   我話要唔要食香蕉船呀 ?!   佢話都好喎   之後我 "北" 好雪糕   就拎埋佢半隻香蕉   將香蕉放喺我隻左手手心上   再用匙更切開一片片   佢碌大對眼望住我咁整   好驚咁喎   但佢係驚我隻手污糟呀   哈哈哈哈哈哈   我話隻手乾淨㗎   放心啦 ~

睇多陣電視   11 點 15 分都瞓喇   勁開心囉   因為有睡意呀   哈哈 ~