XO 醬煎墨魚餅 + 煎鯪魚餅 + 鵝掌翼 (外賣) + 煎絲瓜鯪魚肉湯 ( 4-MAY-2018 )

( 4-MAY-2018  FRI )

聽日 Off   所以今日就特別開心興奮   呵呵 ~

早餐食吞拿魚治   唔知幾時會食厭呢 ?!

真搞笑   今朝同 8 卦食早餐   佢無啦啦講現今首富話 Work Life Balance   即係放工之後   番到屋企唔做公司嘢   你要帶住開心嘅心情番屋企   咁好自然就會帶住開心嘅心情番工   而唔係你自己所 Set 定嘅朝 9 晚 5 唔開 OT   呢啲唔係叫做 Wok Life Balance ~

咁我都好認同佢嘅講法嘅   不過佢係老闆我係員工囉   心態係有唔同啦   佢大把人幫佢 Follow-up 嘛   不過點講都好   工作態度先最緊要   我尋晚都同里奧大人講   我好感恩我做每一份工都好開心 ~

我真係覺得番工好開心㗎   我好少話有唔想做嘅感覺   咁當然做到激氣就會啦   但都係嗰下發洩囉 ~

同埋呀   做咗咁多年嘢   仍都做咗咁多年人   得出結論係改變唔到人哋   唯有改變自己心態   凡事唔係要向好方面諗就等如無事發生   而係每件事都要兩方面諗囉 ~   

等如我成日都話里奧大人   佢話要星期六日都要開工   我聽到都覺得好煩   我依家會直接話做就唔好怨   怨就唔好做   一路做一路怨   你工作效率都低哂啦   仲更加易出錯   因為我試過一路做一路掹   所以越做越錯囉 ~

菇場個 System 仲係搶救緊   所以我繼續清番之前嘅嘢 ~

希望下星期個 system 好番啦   依家已經堆咗好多嘢未做呀   煩 ~

Lunch 出去食   因為想食完行下呀 ~

做電腦 Filing 其實真係好鬼傷神   但又覺得 Filing 完真係好妥當   所以唔想做啲唔做啲   一次過搞掂哂就最好呢 ~

放工去街市買餸買生果   買完即番屋企喇 ~

醃好哂嘢   抖多陣就滾湯   飲完再抖陣就徑步   原來咁又 8 點幾 ~

出面其實落毛毛雨   但都係想徑步囉   徑 25 分鐘就要番屋企   因為里奧大人 9 點放工   我 8 點 50 分番到屋企最好   咁可以即刻煎嘢   里奧大人就可以食到熱辣辣嘅餸 ~

里奧大人一望到啲餸就話好多   我堅覺得好煩   早餐食丁麵腸仔蛋麵包份量夠多啦   又唔見次次都講好多 ?!   我真係唔知點解   佢每次話咁多我就當堂想鬧鑊佢 ~

同埋點解唔可以用感恩嘅心   覺得我係想你食飽啲   因為你做嘢辛苦呢 ?!

是日晚餐 - XO 醬煎墨魚餅 + 煎鯪魚餅 + 鵝掌翼 (外賣) + 煎絲瓜鯪魚肉湯 

XO 醬煎墨魚餅 - 買咗 $20   今次加咗 XO 醬   咁樣惹味啲 ~

煎鯪魚餅 - 好有心機煎架   表皮脆卜卜咁   好味道 ~

鵝掌翼 (外賣) - 呢度 $35   但只係我自己食架咋   里奧大人唔鍾意食呢啲 ~ 

煎絲瓜鯪魚肉湯 - 好想飲湯同食瓜菜   咁啱見到 2 條絲瓜只係 $8/份   所以即買囉   飲嘅時候加大量胡椒粉   好味道呀又   哈哈 ~

搞掂哂就即沖涼   之後休息喇   勁攰 ~

今晚差唔多 12 點先瞓   因為我覺得自己好似做到夜晚 10 點咁   無哂私人時間   所以我想打機 Relax 呀 ~