煎蝦卷 + 蛋絲蔥粒炒飯 + 菜心苗 ( 7-MAY-2018 )

( 7-MAY-2018  MON )

呢排真係瞓得唔係咁好   今朝雖然起到身   但好攰呀 ~

染完頭髮之後   啲頭髮黑到呢   咁我啲頭髮又薄   我覺得好似笠咗個假髮咁   哈哈   太黑喇 ~

早餐食吞拿魚治   好味道 ~



菇場個 System 仲未搞掂   真係黐鬼線   成個星期喇   忍唔住問 A/C Dept    佢答希望今個星期搞掂啦   因為公司 Server 之前死咗   搞到 System 都死埋   之後 8 卦同我講話老闆屋企 Server 好勁㗎   反而公司嗰個唔掂囉   我聽完之後都呆咗   屋企有 Wifi 唔出奇   但我真係第一次聽屋企有 Server 咋 ~

雖然 System 死咗   但要做其他 Manual 嘢囉   所以肥仔豪最開心啦   可以好快比到佢嘛   哈哈 ~

好快又 Lunch Time   今朝買定麵包   因為話間中有雨嘛   不過我都好攰   唔想落街 ~

仍然 Hea 過   但 5 點 05 分先嚟忙   搞掂哂聽日先再 Check   今日唔在狀態   唔想越做越錯 ~

放工即走   坐巴士諗住瞓下   點知個女人超級勁勞氣留言比對方   話佢成日唔聽電話   但搵人幫嘅時候就會打幾十次比人   無事就唔會聽電話   嘩   勁似水姑呀   佢搵妳易   妳搵佢就難過登天   永遠話忙   但忙又可以約人飲茶 ?!   喺屋企敷 Mask ?!   呢啲人最不知所謂   好在佢唔係我屋企人咋   唔係比佢影衰哂 ~

番到屋企坐咗 15 分鐘   真係好攰呀   之後就即拖地   搞掂哂都已經 7 點   咁我預備晚餐喇   今晚自己食先   再食完快啲沖涼呀 ~

里奧大人 9 點放工   我又要服侍佢喇 ~

是日晚餐 - 煎蝦卷 + 蛋絲蔥粒炒飯 + 菜心  

煎蝦卷 - 星期六買定㗎   阿 mi 成日會叫我買定啲方便餸   上次啲肉好散   今次唔知係咪雪咗一日關係   好似無咁散   但里奧大人食嘅時候話其實都散㗎   咁下次唔買 lu ~   

蛋絲蔥粒炒飯 - 今晚上身呀   好有心機炒飯   最開心係無黐底   因為落多咗油去炒   里奧大人話好好味呀   仲話有蛋添   佢應該睇得出我今次好有心機炒啦   平時點會有蛋絲出現   哈哈 ~

菜心苗 - 清埋半包   我呢期覺得食深色菜比較飽   食西生菜呢啲無咁飽㗎 ~

洗埋碗就沖涼   之後熨 2 機衫喇   里奧大人就做公司嘢 ~

咁我拻龍眼比里奧大人食   索性拻埋粒核   佢覺得我好辛苦咁呀   係都要我食番幾粒   但我刷咗牙啦   唔會食㗎喇   同埋因為好鬼飽   哈哈 ~

熨完就抖喇   11 點都自己瞓先   里奧大人沖完涼出嚟   就話你自己瞓先 ?!   佢都覺得奇怪   我平時瞓先會講   但今晚無同佢講    因為我真係好攰呀 ~