Delifrance @ 九龍灣 ( 30-NOV-2018 )

肉醬千層麵配薯蓉 (3 併 $87) - 幾好味喎   但非常之飽肚呢   





夏威夷大蝦燴飯 (3 併 $95) - 味道唔錯喎   酸酸咪咪基本上唔會點衰   哈哈







( 30-NOV-2018  FRI )

尋晚醒咗 2 次   呢幾晚都係接近 1 點就起身去廁所   真係好準時囉 ~   

喺屋企真係唔會話咳同流鼻水㗎喎   但一出門口就即嚟料 ~

早餐食芝腿治烘底   食咩都無味 ~



菇場超級勁忙   但一定要搞掂哂去   因為我下午 A/L ~

做到 12 點 45 分走人   其實未做完   但要做哂嘅話   我要 3 點走   咁無可能啦   又唔可以做住一半先喎   但我 3 點半覆診嘛 ~

坐巴士出去旺角   本來想食 Lunch Set   咁可以坐耐啲   但份量又咁多   我心情又緊張   一定食唔哂   最後都係食魚蛋粉   不過呢間唔好味道 ~

食完就行花園街   其實勁攰   不過又唔想搵地方坐呢 ~

3 點 15 分到診所   登記完就量血壓   146 / 89   第一次咁高咋   平時我只係 126 左右㗎咋   我估我真係勁緊張   哈哈 ~

之後耳探   姑娘碌大對眼好驚咁同我講: 妳發燒呀   我話我咳咋喎   之後佢話我右耳 37.8 左耳 37.6   我其實想話   發燒駛咩咁驚呀   我戴哂口罩嘛 ~

3 點 40 分見醫生   一坐低就講我依家咁咁咁   佢叫我唔駛驚喎   係正常反應   仲拎住本小冊子同我細心解釋   咁我話駛唔駛做啲 Test ?!   佢話最好半年先做啦   之後我話我貧血   佢問點解咁講 ?!   我話中西醫個個都咁講我呀   話睇我眼底無血色喎   咁佢就話最好驗血   呢樣我又係成日唔記得做   咁佢話幫我驗血   都好喎   我唔駛特登出去驗同拎報告   呵呵 ~

差唔多接近 4 點先出來   我個心真係定哂呀   好感激教友介紹呢個醫生比我   佢之前介紹咗 3 個   但 1 個唔收新症   2 個就排期都 2月   我真係唔等得囉 ~

勁開心呀   爭啲連假紙都唔記得攞   好在臨走前睇電話嘅日暦提示咋 ~

搞掂哂就再去尖沙咀拎藥   之後搭巴士去九龍灣喇   感恩有得坐呀   因為我條腰斷咁滯 ~

佢點樣掉對皮鞋喺度嘅呢 ?!   巴士站附近無住宅㗎喎



今晚一定要去 Delifrance 食晚餐   因為今日係 Last Day 用埋啲 Coupon   所以超級勁多人呀   我排隊都成 25 分鐘呀 ~

我食完就番屋企   里奧大人就去拎淘寶 ~

成日想轉洗衣液   好感恩萬寧買滿 $99 個人物品就有 1 支洗衣液   我咁啱又有嘢買   可以換到 2 支   我之前喺百佳睇要 $44.9 㗎   今次賺哂   哈哈 ~

同家姐交收   之前幫佢買咗啲牙膏   送埋一大袋嘢   佢仲以為我特登買比佢添   之後佢又買咗啲脆脆比我食   但比佢知道咗我感冒咳囉 ~

呢度 $40    



沖埋涼就開機洗衫   之後休息喇   今日都好頻樸下   不過聽日 Off   所以睇下電視   都成 12 點先瞓呢 ~

鹹蛋肉餅飯 & 豉椒排骨飯 & 雞扎 (外賣) + 節瓜鹹蛋瑤柱湯 ( 29-NOV-2018 )

鹹蛋肉餅飯 - 呢個味道 OK 呀



豉椒排骨飯 - 啲飯超級腍   所以里奧大人話比佢食



腐皮卷 - 突然好想食咋   味道都 OK

( 29-NOV-2018  THU )

唉   超級極度唔舒服呀   喉嚨無咩痛   但變咗咳   咁樣仲煩 ~

早餐食腿蛋治   其實食咩都無味 ~



菇場勁忙   做到有啲頭暈暈 ~

Lunch Time 出去買水餃米   食啲熱嘢係好啲 ~



已經忙   仲要 3 點開會   之後又要改好多嘢   好在放工前做哂重要果 Part ~

放工即走喇   今晚真係唔煮喇   就咁滾個湯就算   因為想清埋 3 個節瓜仔 ~

我叫里奧大人去巧手包點買飯番嚟   所以佢 7 點幾番到屋企   食完執埋嘢都 8 點幾   沖埋涼都休息喇 ~

今晚 10 點唔夠都瞓喇   不過咳就最煩   一瞓就會係咁咳咁   最鬼驚囉 ~

榮基打冷小菜 @ 官塘 ( 28-NOV-2018 )

都有唔少馬蹄粒   同埋好香陳皮味



菠蘿咕嚕肉   完全唔脆喎   唉   





( 28-NOV-2018  WED )

尋晚瞓得唔好   起咗 2 次身   最慘係好難先瞓得番囉   唉 ~

喉嚨痛呀真係   仲有咳先煩   不過唔想睇醫生   所以狂食喉糖同飲以羅   點都要過埋今個星期六先睇   因為難得有聚會   我一定要參加呢 ~

買埋郁包就去食早餐   今朝食沙爹牛肉米   唔敢食多士呀   驚熱氣 ~



菇場忙呀   但好攰   要慢慢做   又要同 8 卦 Skype 傾下偈提提神   唔知講開咩   我話佢 "聲衰樣又賤"   打完我都笑出來   原來自己把口真係衰成咁   之後佢話又學到 "金句" 喎   真係唔鬧唔安樂   哈哈 ~

Lunch Time 食麵包   咁都幾好   唔駛落街買嘢食 ~

仍然忙下停下   今晚唔想煮飯呀   個人唔係咁舒服 ~

放工去養和堂買雞骨草比里奧大人   過緊馬路見到船頭   佢同我傾咗陣公司嘢   好在我唔趕住走咋   哈哈 ~

番到屋企真係要抖下喇   喉嚨仍然好鬼痛呀 ~

里奧大人差唔多 7 點幾嚟到   一嚟到有得食了 ~

食完即番屋企   抖陣先沖涼   之後就開機洗衫   呢排天氣潮濕   啲衫要兩日先乾   好在有抽濕機呢個偉大發明   哈哈 ~

里奧大人知我喉嚨唔舒服   話係咪開風扇   所以吹親個喉嚨   我話應該唔關事呀嘛   我又無吖大個口瞓 ~

我 10 點半都自己瞓先喇   里奧大人就繼續睇 Youtube ~ 

XO 醬炒茄子雞柳 + 辣菜甫芥蘭 + 梭羅魚湯 ( 27-NOV-2018 )

第 1 次見咁長嘅炸魚皮   卷到成條蛇咁   哈哈



( 27-NOV-2018  TUE )

感恩尋晚都瞓得唔錯   可能天氣涼涼哋有關呢 ~

早餐食奶醬多   突然想食啲甜嘢 ~



菇場忙下停下   但喉嚨有啲痛   希望快啲好番啦   唔想睇醫生 ~

Lunch Time 出去買酸辣米線   其實唔想食   但口淡淡想食啲酸辣嘢 ~

無啦啦勁忙   差唔多放工先搞掂   但繼續做其他嘢   做到 5 點 40 分   咁又同 8 卦傾陣先走   佢依家要跟新客   老闆會無時無刻無間斷咁搵佢㗎   所以佢勁唔開心囉   仲要係講緊嘅係放工時間   所以佢話想我快啲放工   唔好再講埋呢啲嘢   一陣真係叫佢就慘   哈哈 ~

番到屋企原來已經 6 點 15 分   完全唔記得自己要滾魚湯   之得準時走啦 ~

搞掂哂都已經 7 點 15 分   里奧大人啱啱番到屋企   可以開餐了 ~

是日晚餐 - XO 醬炒茄子雞柳 + 辣菜甫芥蘭 + 梭羅魚湯

XO 醬炒茄子雞柳 - 姑奶自家制   但唔辣嘅   不過咁都好   今晚里奧大人都話唔食辣同炸嘢   佢都好似作病咁呀 ~

辣菜甫芥蘭 - 我都係覺得芥蘭幾頂胃   下次都係唔買喇 ~

梭羅魚湯 - 就咁 $20 梭羅魚都好好飲喎   又唔腥   下次再齋滾魚湯先 ~

洗埋碗就大清潔廚房   之後開機洗衫   再大清潔廁所就沖涼 lu ~

勁攰呀   上 Youtube 睇陣嘢   10 點半都瞓覺喇 ~

鳳城水餃上海麵 + 蠔油芥蘭 ( 26-NOV-2018 )

( 26-NOV-2018  MON )

今朝起身嘅時候喉嚨好痛   仲諗緊尋日係咪食咗包薯圈   之後里奧大人問我尋晚係咪發惡夢 ?!   我話係呀   佢話我大叫咗一聲   拍一拍我之後就無再叫喇 ~

我記得個夢係同媽咪一齊瞓   我瞓出面   但無啦啦有個汽球喺我隔離   仲好大力壓住我   咁我都知有嘢啦   之後唔記得點樣   將個汽球壓扁再掉入膠袋放喺地下   點知個膠袋又喺度郁   嚇到我拉住張被   但就係咁裝囉   之後唔記得點喇 ~

之後再發另一個夢   我同家姐喺大陸嘅   佢未食早餐   咁我就上架車度 "北" 啲芋圓比佢   但無哂細粒   咁我 "北" 大粒嗰啲啦   但係一 Pat 嘢咁   所以我又再睇有係其他芋丸   點知突然間架車開呀   嚇鬼死   但最後又唔記得點囉   其實發咗幾個夢   個個結尾都係好緊張刺激咁 ~

今朝里奧大人 9 點要去到沙田見客   所以我陪佢食早餐啦 ~

食完早餐就番屋企抖陣   里奧大人 8 點唔夠就出門口   我就差唔多 8 點半先出門口呢 ~

菇場忙呀   好在 11 點幾搞掂哂 ~

Lunch Time 出去行陣   之後再去食粥   今日涼涼地食粥就最好   哈哈 ~

喉嚨仍然好痛喎   煩死 ~

8 卦話食朱古力   如果一日一粒都已經覺得好罪惡感   我咪話佢囉   覺得有就唔好食   食就唔好覺得有   之後個死嘢話金句呀   長智識了   咁係吖嘛   食嘢係開心家嘛   做咩要又要食又要驚喎   不過我話我係反面教材   佢話佢知我係勁反添   因為我最鍾意話以毒攻毒   哈哈 ~ 

放工即去買餸   之後番屋企   諗住拖地   但真係有啲唔舒服   唔想做家務都呀 ~

里奧大人 7 點 20 分番到屋企   但佢無打比我   我又無打比佢   所以要等多陣先有得食囉 ~

是日懶餐 - 鳳城水餃上海麵 + 蠔油芥蘭  

鳳城水餃上海麵 - 加埋急凍嘅廣島蠔同蟹捧   真係餸多過麵   哈哈 ~

蠔油芥蘭 - 好耐無食   買咗 $12   留番一半聽晚食 ~

洗埋碗就沖涼   都已經 9 點 lu ~

睇多陣電視   10 點半都即刻瞓覺喇 ~

皇后餃子 @ 官塘 ( 25-NOV-2018 )

糯米飯



鮮肉泡菜餃



隻隻都脹卜卜



炒麵



( 25-NOV-2018  SUN )

今朝里奧大人鬧鐘響   但佢居然唔知   仲瞓到 Gur Gur 聲   咁我起身啦   感恩我都一覺瞓到 8 點半   可以早啲起身沖涼   之後我沖完涼佢先醒   因為另一個鬧鐘響 ~

我叫佢快啲轉番鬧鐘鈴聲   唔好要啲咁柔和嘅前奏聲   唔係我平日又聽唔到   到我鬧鐘響   佢一定遲大到啦 ~

搞掂哂就出發去食早餐   之後番學喇 ~





崇拜完之後就開會   咁見仲有 45 分先開會   所以諗住同 Ivy 一齊食啲嘢   點知我哋又同另一 Pair 教友傾偈   又傾咗半個鐘   咁唔去食嘢 lu ~

開完會都 2 點半   同里奧大人去食下午茶   之後去舖頭拎嘢 ~

今日落足全日雨   凍咗好多呢   所以打的番屋企 ~

抹埋嘢就休息   本來想瞓陣   但原來都 5 點喇   所以都唔瞓 lu ~

6 點幾出去食嘢   行陣就番屋企了 ~

里奧大人就熨衫   咁我都沖涼休息喇 ~

家姐依家養緊 2 隻等人領養嘅狗仔   養 3 個星期咋   呢 2 隻好細隻㗎咋   好鬼得意

11 點幾都瞓   依家天氣涼咗好多   應該唔駛再開冷氣喇啩 ~

海逸皇宮大酒樓 @ 紅磡 ( 24-NOV-2018 )

( 24-NOV-2018  SAT )

今朝同家姐食早餐   本來佢唔同我食   後尾又同番我食   最搞笑問我嬲唔嬲 ?!   我話唔食早餐駛咩嬲呀 ?!   堅搞笑 ~





有時我覺得自己煮得幾好味   又會同家姐講   咁我比咗張煎餃子佢睇   佢話好靚呀   問我咩餡 ?!   我話屋企有咩咪煮咩囉   呢個餡係龍蝦   之後好慢先講個 "丸" 字   佢笑到差啲噴咖啡呀   佢正想話我好勁   屋企居然有龍蝦   哈哈 ~

食到 8 點 50 分就走人   開開心心去番工 ~

菇場居然忙   真係次次係咁嘅 ~

放工即同里奧大人食 Lunch 喇   因為今晚早食飯呢 ~





食完即番屋企   今次到我要淘寶喇   依家我都好少買嘢   唔買開就唔想買   但一買開就會大件事   好在依家成日忙   只想喺屋企休息  哈哈 ~

大食今日收 3 點   之前已經約我出嚟飲嘢   不過我話唔喇   想喺屋企休息   同埋今日 7 點起身有啲攰呀   唔係咁想傾偈囉   里奧大人都話估唔到我 Say No   咁我都話之前其實都預咗約大食   但真係要睇下身體狀況先囉 ~

天氣又涼涼哋   真係不知不覺瞓咗呀   里奧大人話我瞓到 Gur Gur 聲添   原來我都瞓咗半個鐘   感恩之後好精神呀   哈哈 ~

5 點出門口   去到紅磡都好早   所以去麥記食杯雪糕   順便等埋家姐同大食 ~



叫咗家姐落車前打比我   咁佢唔駛特登行過嚟   之後佢無啦啦喺我耳邊細細聲叫我   嚇死我呀真係   好在我無大叫咋   上次死 8 卦喺公司入面 Pantry 呢埋嚇我   嚇到我大叫呀   之後到嚇鬼死佢   因為個個望住佢  抵死 ~

今晚婆婆生日飯   話 6 點食   因為另外一個表妹番夜   不過等呀等   都等到 6 點 45 分   咁反而我無所謂   因為 6 點真係太早食   哈哈 ~

咁差唔多 9 點食完啦   到夾錢嘅時候   我細舅母簽卡嘛   之後就比番錢佢   佢搞咗好耐   成日好驚收大舅父錢咁   佢一圍 10 個人呀   好心佢自己主動啲比一圍啦   又要叫個女問幾錢   無厘大方   之後細舅父話如果以 Family 計   我姨 2 個收 $1,000   大舅父 10 個又收 $1,000   堅唔公平囉   之後話計人頭   其實我一早想話計人頭咪得囉 ~

之後家姐講開   原來家姐上年都係比 $1,000 一家   但家姐無收番我咋   我仲以為唔駛比添   咁怪不得大舅父今年收佢 $2,000 覺得多啦   正 Cheap 精 ~

同埋家姐一齊搭巴士   咁家姐落車先   里奧大人即叫我坐上前   知我會繼續望住家姐同佢 Bye Bye   今次里奧大人抵讚喇   哈哈 ~

番到屋企即沖涼   但睇戲睇到 12 點先瞓   今晚開風扇都覺得凍呀   真係開心   終於唔駛開冷氣了 ~