利佳舫避風塘 @ 荃灣 ( 4-NOV-2018 )

菠蘿咕嚕肉 (唔記得幾錢) - 好味呀   我呢排鍾意食咕嚕嘢



菠蘿好甜



紅燒鮮菌蝦乾豆腐 ($88) - 都 OK 呀   但豆腐好鹹呀

荷香窟窰雞 ($138) - 我覺得無咩特別噃 



我最鍾意食花生   哈哈



( 4-NOV-2018  SUN )

今朝 8 點 40 分起身   係鬧鐘未響都起身   所以里奧大人沖完涼之後都裝下我   睇下係咪見到鬼   哈哈   因為我多數鬧鐘響先起身   哈哈 ~

今日崇拜之後要開會   所以我話要食勁量早餐   講真   食完真係超級勁飽   但見里奧大人好多時都係咁食   佢又無話超級勁飽喎   比佢呃咗添 ~  

食完早餐就番學   今日有事奉   但要做 2 個崗位嘅嘢   勁開心   每個崗位都做下真係唔錯   咁樣人哋唔番嘅   我可以即刻補上 ~

我今日嘅身體同精神狀況都好呀   所以里奧大人即約阿 mi 佢哋   但我地哋碼要 3 點先入到荃灣呢 ~

里奧大人堅持今朝先好約阿 mi 佢哋   因為真係好怕我身體突然又唔舒服   唔想約人又取消   咁又係   之前就係成日朝早無嘢㗎喎   但突然中午或者夜晚就好唔舒服   所以呢兩個幾月   直頭飯都少煮   唔想買完餸又煮唔到   因為真係唔知佢幾時無啦啦又扯住痛囉   呢下先煩 ~

佢地覆我地話一齊行街之後食飯   咁無問題啦   最緊要佢地唔駛就我地   我地都係周圍行之嘛 ~

勁開心呀   終於都可以見面喇 ~     

崇拜完畢就開會   1 點 45 分散會   去牛下食啲嘢就入荃灣喇 ~



今日仲係小童價搭地鐵   勁抵囉   入荃灣只係 $4.4   不過喺九龍灣都係多數搭地鐵㗎喇   因為無小巴入去   哈哈 ~

今日阿 mi 喂陪我哋行街   佢哋帶我哋周圍行   行嘅地方係熟   但真係完全唔記得係咩名   哈哈 ~

同阿 mi 真係太耐無見啦   好多嘢未傾完咁   但有樣我好感動   佢話: 如果同一個人呻   會將啲負能量比咗嗰個人   所以佢唔敢成日同我呻   我聽完覺得個心好唔舒服   咁即係呢兩個幾月佢有嘢唔敢同我講囉   驚我吸哂佢啲負能量   咁我話無問題喎   大家傾下又可以放鬆番啲嘛 ~

不過老實講   我唔舒服嗰排   我真係靜哂   里奧大人以為發生乜事添呀   見完大家 Say Hello 就靜哂   哈哈   無計啦   個肚成日扯住唔舒服   真係乜 Mood 都無哂㗎 ~

阿 mi 仍然記得我要買陳皮   哈哈   不過唔想行咁遠 ~

差唔多 5 點半到食店   不過冷氣唔夠   所以個人有啲眼瞓   之後開咗冷氣   但都唔係咁冷氣咁   雖然啲風吹住我個位 ~

阿喂好攰咁呀   可能間食店焗得滯   好似食到差唔多 7 點就走人喇   大家聽日都要番工   所以都唔會晏走   之後一出食店   真係涼過喺入面 ~

呢餐一定要請   因為係阿喂嘅生日飯   佢 9 月尾生日   但因為我身體唔好   所以依家先請食   真係唔好意思 ~

我地搭地鐵去 APM   里奧大人去 Playlord 買咗件褸 $990 (原價 $1,980)   原來佢頭先喺荃灣已經睇中咗   不過再諗一諗先買喎 ~

買完都即番屋企喇   沖埋涼又睇多陣電視   11 點都瞓覺喇 ~

阿 mi 送比我地嘅手信   同埋自家製潤唇膏