奧爾良焗雞翼 + 粟米豆腐蛋花湯 ( 31-JUL-2026 )

尋晚剩嘅秘製牛雜   我仲買咗韓國蜜糖芥辣   蘸嚟食真係超級好味呀

尋晚剩咗好多薯仔   今晚點都食埋去喇

( 31-JUL-2026  FRI )

感恩瞓得都唔錯   里奧大人話我去 Cafe 食係特別開心   不如一星期兩次啦   我話咁樣會好快厭喎   同埋要有期待先開心家嘛   哈哈 ~

食完都搭車番工   依家係戒備狀態呀 ~

菇場忙下停下   船頭買咗隻康寧杯   話聽日 1 號先用   我話同我一樣   用新嘢要等新一個月開始或者新一年咁   佢話 要有儀式感呀   哈哈 ~

Lunch Time 落大雨呀   又話可能會黑雨   咁我都唔出去喇 ~

因為我叮熱牛仔骨   船頭話我好似拎住滾水咁急急腳行出嚟   我話好熱呀   佢叫我帶隔熱手套番嚟啦   我話唔需要囉   又唔係成日叮嘢 ~

及時雨烏冬   依家一食呢個烏冬就會記得家姐㗎喇   哈哈

估唔到西瓜整嘅菜脯瑤柱   辣辣哋好味道喎

我真係覺得咁樣對摺係好用好多

唔忙又做自己嘢   所以好快又放工喇 ~

放工即走   番到屋企都預備晚餐 lu ~

里奧大人明明 6 點 45 分番到嚟   點知差唔多 7 點 10 分先番到   不過我都唔再整熱啲嘢喇   真係等到無心情呀 ~

是日晚餐 - 奧爾良焗雞翼 + 粟米豆腐蛋花湯

奧爾良焗雞翼 - 今次買咗香辣孜然味   不過我無食到呀   其實咁多雞翼係預埋帶飯嘅份量   但今晚先焗就一定食唔哂   咁剩番 14 隻都要留番 lu ~

粟米豆腐蛋花湯 - 之前買咗 3 盒絹豆腐到期喇   所以要煮埋去囉   清得 1 盒得 1 盒 ~

洗埋碗就沖涼   里奧大人就去做機 ~

可能食咗豆腐同薯仔   個胃好脹好唔舒服咁   感恩沖完涼抖陣就舒服番好多喇 ~

今晚都想熨衫   但熨剩 4 件開始冒汗就停陣先   之後覺得凍就再熨埋去 lu ~

睇下 Youtube   今晚 10 點 45 分都瞓覺 lu ~

阿哥家鄉粉仔 + 咖哩拚盤 + 秘制牛雜 (外賣) ( 30-JUL-2026 )

阿哥家鄉粉仔 X 2 ($25/大) - 好味道呀   今次要多辣   所以里奧大人話辣咗好多呀

咖哩拚盤 ($40) (魚蛋/豬皮/魚皮餃/牛柏葉/白蘿蔔/陳皮魚蛋) - 買比里奧大人做餸   樣樣有啲都唔錯

鬆化豬油渣 ($6) - 雖然同新加坡無得比   但都算係好食嘅

秘制牛雜 ($40) - 呢個就係我想要嘅味道   不過食完碗粉已經好飽   所以食咗少少咋   又要留番聽晚食了

黑椒牛仔骨 ($50) - 留番聽日帶飯   呢排成日落雨   咁唔駛里奧大人出去買嘢食呢

( 30-JUL-2026  THU )

尋晚瞓得都 OK   所以感恩今朝起身都精神呀 ~

早餐食甜餐包搽花生醬   里奧大人就食提子包 ~

菇場忙下停下   船頭成日淘完啲嘢又唔去攞   今朝咁啱有貨收   阿齋叫佢快啲去攞啦   船頭話點都要放工先攞得啦小姐   哈哈 ~

Lunch Time 蒸完飯去一田行下   諗住特價 $16 買包 1 Kg 金象米   但家姐話貴呀   佢買 8 Kgs 都好似係九十幾   叫我喺佢屋企拎啲   我話唔啦   依家成日帶飯   我自己買得喇   反正里奧大人有張 E-Coupon 未用   我星期六先再去買米 ~

唔忙又做自己嘢   所以好快放工 ~

呢排腰痛腳痛   有時又瞓得唔係咁好   所以去睇中醫   我同醫師講話腳痛係咪肥得滯 ?!   佢話天氣都有影響   之後話我氣虛濕重   今次要一日飲 2 次   下星期要再繼續睇呀 ~

睇完去買牛仔骨同牛雜   買完再去買狗仔粉同糖水   加加埋埋都幾重㗎   不過好想食就無計啦   同埋最緊要無落雨先可以買咁多咋 ~

番到屋企都 7 點   咁我開冷氣啦   之後覺得背脊凍冰冰   我先知原來背脊濕哂呀 ~

里奧大人 7 點 15 分番到屋企   佢話今日開咗兩個會好攰   之後見到啲晚餐話好開心呀   我話食出面嘢係開心啲嘅   哈哈 ~

沖埋涼就休息休息   差唔多 9 點先食糖水 ~

里奧大人鍾意食芋頭綜合凍

睇多陣 Youtube   今晚 10 點 45 分先瞓覺 ~

BBQ 醬焗排骨 + 椒鹽粟米 ( 29-JUL-2026 )

 

( 29-JUL-2026  WED )

尋晚瞓得麻麻哋呀   今朝起身有啲暈   所以我話唔整早餐喇 ~

可能呢排成日飲菊花呀   之前又係咁   連飲一排之後會暈暈哋同埋作嘔咁㗎 ~

里奧大人話一陣試埋個 Keyboard 好唔好用   佢真係好搞笑   我一話鍾意就成日記低要我去試 ~

今朝都係里奧大人買早餐   買完就去佢公司食喇 ~

菇場忙下停下   船頭話尋晚胃痛   之後我醒起佢尋日朝早沖咖啡   話好頂到齋啡   真係好邪   哈哈 ~

我買咗把小新遮   所以影比家姐睇   順便影埋我點樣放把遮   因為佢成日唔明點樣可以放到   哈哈

Lunch Time 蒸完飯就出去 Mikiki 行下   唔駛買菜就一定行冷氣地方   行夠半個鐘就番菇場開餐喇 ~

微波爐隻碟放唔好   搞到 Click 住咗   好在有用保鮮紙包住   但都搞到咁污糟囉

我叮完拎出嚟嘅時候   船頭話好香呀   之後話冬菇好食呀   排骨有軟骨又係好食   最緊要無羶味   不過今日阿齋無番工   所以都唔留比佢喇   始終咁多日嘛  ~

船頭整咗鴨舌   真係超級好味呀   我總共食咗 6 隻呀

就咁個汁已經可以送飯

洗完碗見到清潔阿姐   我抹完碗就一定抹乾張枱   佢捉實我隻手唔比我抹   仲話係一家人嚟家嘛   我覺得好搞笑   哈哈 ~

唔忙又做自己嘢   放工可以即走喇 ~

番到屋企都即預備晚餐   預咗里奧大人遲番   所以又整啲新嘢喇 ~

是日晚餐 - BBQ 醬焗排骨 + 椒鹽粟米

BBQ 醬焗排骨 - 焗完再加啲汁燜下   咁樣仲好味道 ~

椒鹽粟米 - 今晚整新嘢呀   唔想成日食烚粟米咁悶   反正之前買咗炸蒜就整啦   估唔到又幾好味 ~

洗埋碗就開機洗衫   搞掂就沖涼   里奧大人就去做機喇 ~

又係覺得好凍嘅時候就熨衫   但蒸氣真係好熱   熨到一大半有啲冒汗呀   哈哈 ~

睇下 Youtube 又打下機   今晚 10 點 45 分都瞓覺 lu ~

蠔油燜冬菇排骨 + 遲菜心 ( 28-JUL-2026 )

帶啲比船頭 阿齋試下   我同里奧大人講話可能佢哋覺得唔好味㗎   佢即刻話係佢哋唔識貨喎   笑死我   佢其實係好 Appreciate 我煮飯嘅   唔想我比人彈   哈哈

( 28-JUL-2026  TUE )

尋晚半夜去完廁所   感恩都好快瞓得番   今朝鬧鐘響仲想繼續瞓   可能鈴聲實在太柔和   同埋出面應該落緊雨   我覺得落雨係好瞓啲咁㗎 ~

早餐食朱古力迷你牛角酥   里奧大人就食 Flakes + 豆漿 ~

等車同家姐 Whatsapp   問佢星期幾係番公司 ?!   佢覆完之後我就 Send 咗 "好期待呀" 個公仔   之後我即刻刪除啦   因為我係比錯公仔   我係想比 "收到"   家姐話奇怪有咩好期待呢   哈哈   我話等車掛住望車嘛   所以成日手快快 Send 嘢囉 ~

菇場忙下停下   咁就最好啦 ~

船頭話呢隻廚房紙巾好用   所以比我同阿齋試下

Lunch Time 諗住去大生買嘢   但阿船阿齋話要去一田買嘢   咁我都唔蒸飯一齊行喇 ~

船頭話我好鍾意推車   阿齋話無咩所謂喎   唔駛拎住都好吖   哈哈 ~

我只係買 1 個日本製收納籃 ($8)   船頭就買雞蛋 洋蔥同旺菜   阿齋就買零食

之後我再買多個白色盒 ($8/個)   阿齋見我買佢又買   佢好鍾意食韓國嘢就買咗包拉麵   船頭又突然間買埋牛角汁 罐裝蕃茄同意粉醬   好在真係推車仔   唔係就要半路中途去拎車㗎喇

船頭去扭蛋   扭咗兩隻都鍾意嘅   但總共有 5 款   之後我叫佢再扭啦   點知嘟咗錢無蛋出呀   要去 Apps 登記資料   搞咗好耐呀   之得唔叫佢扭啦   哈哈 ~

番到去已經 12 點半   咁我哋輪住叮飯   同阿齋叮飯嘅時候   BG 走入嚟一齊傾   之後阿齋出咗去就船頭入嚟傾   BG 話每次 3 個人傾偈都有佢份   哈哈 ~

我哋差唔多 1 點先開餐呀   所以要快啲食喇 ~

阿齋炒粒粒又係好味道

成個零食籃裝滿哂   仲要擺到出嚟   我話真係唔好買住喇   真係食唔切呢

去 Pantry 洗碗   又同阿齋阿輸傾偈   喺 Pantry 傾偈係最好   因為無人會見到呀   哈哈 ~

船頭話比張單佢計啦   佢計計下就大笑話戇居   減番十六蚊咪得囉   駛咩逐件計呀   真係笑死我呀

唔忙又做自己嘢   諗住準時走   點知 BG 話大老闆請食蛋糕   叫我哋食完先走呢 ~

Tony Wong 嘅金壽桃蛋糕   好味喎   芒果清甜   最緊要啲 Cream 唔漏

食完都即刻走喇   好感恩趕到班車 ~

里奧大人 6 點 45 分番到屋企   我話晏咗食 Lunch 仲食埋蛋糕真係好飽   今晚食菜就搞掂 ~

是日晚餐 - 蠔油燜冬菇排骨 + 遲菜心

蠔油燜冬菇排骨 - 今次好味喎   可能擺咗幾晚好入味   哈哈 ~

遲菜心 - 菜檔阿姐話 $10 比我   話好甜喎   咁我就要啦 ~

洗埋碗就去大生買嘢   因為唔想成日記住 ~

可口可樂迷你罐裝 200ML ($40/2 件) / 冰糖 ($9)

太古黑糖 ($20) - 比半包比家姐   好在佢話要咋

開埋機洗衫就沖涼休息喇   今晚 10 點半都瞓覺 lu ~

紫蘇燜鴨拚蜜糖雞膇 + 魚香茄子拚生炒骨 (外賣) ( 27-JUL-2026 )

紫蘇燜鴨拚蜜糖雞膇

魚香茄子拚生炒骨

 

( 27-JUL-2026  MON )

感恩瞓得唔錯   里奧大人今朝 6 點半起身陪水姑去深圳   好在我都好快瞓得番 ~

早餐食煙肉芝士迷你酥   仍然覺得咁好味㗎 ~

菇場忙呀   咁就好喇   咁先似番工嘛   哈哈 ~

船頭比嘅咖啡   佢話好香烘焙味

Lunch Time 出去買菜買大蕉   去埋 360 買粉絲就去 7-11 買午餐喇 ~

Pine Brand 泰國綠豆粉絲 ($26) / 麥維他朱古力橙餅 (換購價 $24.9/2 件)

番到菇場就 12 點半   呢個時間開餐最好 ~

咖哩魚蛋烏冬 + 司華力腸 + 熱柚子蜜 ($37)

忙下停下   里奧大人 5 點番到屋企   佢同水姑下午茶   咁我都唔煮喇 ~

放工去買兩餸飯   之後有人叫我   原來係小米   傾咗幾句就走 lu ~

我唔肚餓   所以番到屋企沖埋涼先   反正里奧大人去做機   等佢番到嚟沖埋涼先一齊食仲好 ~

食完抖陣就熨衫   之後同里奧大人一齊睇 "中年好聲音 4" ~

阿齋加餸   我又係好鍾意食炒粒粒   不過就懶整囉

今晚 10 點半都瞓覺   里奧大人都想瞓   但媚媚打嚟同佢傾電話   所以無得瞓住 lu ~

友義氣．酸菜魚 @ 九龍灣 ( 26-JUL-2026 )

開餐

黃金火箭魷 ($118) - CC 食咗一啖已經話好食呀   不過呢個真係好好食呢

份量都唔少㗎

鮮果咕嚕肉 ($98) - 我話叫咕嚕肉   之後 CC 話一早睇咗都係叫呢個餸呀   如果脆皮就更加好味道

啫啫芥蘭煲 ($88) - 呢個都好食   同埋份量都唔少

揚州炒飯 ($88) - 里奧大人話要食炒飯   咁當然無問題   因為佢哋都想食炒飯

避風塘大虎蝦 ($115) - 蝦肉都彈牙   避風塘啲料又香香辣辣

大支藍妹啤酒 X 2 ($38/支) - 食熱氣嘢一定要飲啤酒

 未  ( 26-JUL-2026  SUN )

今朝 7 點起身   仍然 8 號風球就繼續瞓喇 ~

里奧大人起身嘅時候   我仲以為只係 8 點   但原來已經 9 點 45 分   咁我都瞓夠就起身煮早餐 lu ~

原來淩晨 1 點係 9 號風球   今朝 7 點 10 分先改發 8 號   無諗過會去到 9 號波呀 ~

早餐食燒烤豬肉腸出前一丁   我星期三已經買咗燒烤豬肉腸   但又唔想拎番屋企   但星期五突然又好想拎 1 Pack 番屋企先囉   真係好感恩   如果唔係今朝只係食煎蛋麵   哈哈 ~

洗埋碗就大清潔廚房   依家好懶   只係一個月一次   但平日都會抹下嘅   最緊要我好少煎嘢   所以基金上都係乾淨嘅 ~

12 點至 2 點改發 3 號風球   我同里奧大人講話一定係 12 點 40 分囉   之後真係 12 點 40 分改發 3 號風球   里奧大人話我好叻講中咗   我話天文台好多時都係 40 分 20 分咁   唔會係搭正同埋 15 分咁囉 ~

睇下 Youtube 又已經 1 點半   咁都要煮午餐喇   差唔多 2 點先食得 ~

鹵香炖肉麵   我叫呢碗做張淩赫杯麵   哈哈

刀削麵嘅口感都唔錯喎

再蒸埋蝦餃同馬鮫魚肉燒賣   終於清哂真係好開心

食完就同里奧大人一齊染髮   搞掂就沖涼喇 ~

里奧大人要番公司處理啲嘢   咁我都一齊番公司   所以差唔多 3 點就去發 lu   順便買埋蛋撻比叻叻佢哋食 ~

得番最後 6 個咋

4 點半搞掂就搭車去九龍灣   行下馬莎同 MUJI   最後去埋小米買風筒就去食店喇 ~

我哋差唔多 6 點到   坐低無耐就見到 CC 佢哋 lu ~

本來諗住叫 5 樣嘢   但 CC 話叫咗 4 樣先   之後先再叫呢 ~

隔離枱兩個人食兩碟炸嘢   CC 話自己屋企唔會炸嘢啦   我話我都係㗎   用成支油炸嘅成本太高喇   同埋炸完啲油又根本用唔到咁多   到最後都係要掉 ~

今晚我又有禮物   所以我依家一定會買嘢比 CC   就算係我生日飯都好囉 ~

里奧大人比咗自拍神棍比 CC   其實好在佢要咋   如果唔係就要睇下里奧大人啲同事要唔要 lu ~

講大灰熊嘅高度   里奧大人同 CC 話我高度係細熊喎   我話隻熊企高好似我咁做係細隻熊 ?!   佢哋話大灰熊係即刻諗起兔兔咁高嘅熊囉   唔係咁矮嘅熊喎   哈哈 ~

之後講刷牙   CC 話兔兔好大力   牙刷換咗無耐又要換   之後里奧大人即刻話我都好大力   所以兔兔同我係好似 ~

CC 話我哋新人帶貨   仲講到一齊住赤柱   真係笑到流眼淚呀 ~

依家 CC 都係用蒸飯盒   我話不知幾方便   特別係落雨嘅時候   哈哈 ~

好快又到 8 點半   係時候走喇 ~

里奧大人話 $583 好抵食   我話仲有樣樣都好食呀 ~

佢哋去 DONKI 買嘢   我哋就番屋企   感恩啱啱好有班車呢 ~

沖埋涼再睇陣 Youtube   今晚都唔睇中四住喇   唔想睇一半唔睇一半   哈哈 ~

CC 送比我嘅 Hand Cream 同埋 TWININGS 茶包   我鍾意 Lemon & Ginger   里奧大人就一定鍾意 Matcha Green Tea

小米負離子風筒 ($189)

MUJI 買嘅無漂染化妝棉 180 片 ($18)

話咁快已經 11 點   咁我都要瞓覺先喇 ~