芝士安格斯套餐 (麥當勞) (外賣) ( 30-JUN-2026 )

漢堡又細塊咗呀   依家麥記啲包越來越縮水   薯條又得半包   我係倒出啲薯條   咁先覺得好似 1 包滿哂咁咋

( 30-JUN-2026  TUE )

感恩一覺瞓天光呀   瞓到 7 點 15 分   之後再懶床到鬧鐘響先起身 ~

早餐食黑芝麻糯米小食   今次口感好煙韌同埋唔係食空氣   所以最後都係食 1 個就算 lu ~

見到一條根張相   嚇到我以為家姐隻手痛到要貼呀   原來係佢想幫我買   因為之前有次唔知咩做特價   佢無幫我買   咁啱我之後又買咗   佢勁唔開心呀   之後每次有咩我買過嘅嘢會做特價   佢就會問我要唔要喇

差唔多出門口嘅時候   里奧大人就出嚟話醒咗   之後就焗麵包食喇 ~

菇場唔忙   可以抖下 ~

Lunch Time 蒸完飯就出去一田行下   因為天氣好熱   我要行有冷氣嘅地方 ~

匙扣 / 日本製豌豆芽播種盤 / 收納籃都係均一價 $8 真係超吸引   我買咗個毛公仔鎖匙扣比 MM   因為啲質地係好滑呀   希望佢鍾意啦

唔忙又做下自己嘢   里奧大人今晚要開夜   所以唔駛煮飯喇 ~

今晚坐架巴士真係超級嘈   同埋平時唔會坐滿   同埋差唔多全部係長者   佢哋又幾乎個個都傾偈   老人家講嘢又比較大聲   所以真係嘈到暈呀   好記得家姐曾經形容過搭架巴士嘈過酒樓   我依家終於明白喇   好在我短程   唔係肯定頭痛呀 ~

落車即去惠康買西瓜   因為里奧大人話好甜呀   難得佢鍾意食就一定要買啦 ~

8424 西瓜 ($36) / MELONA 雪條 (換購價 $40/2 盒)

番屋企放低就去里奧大人公司   佢差唔多 7 點去麥當勞買晚餐   我就坐喺度等食喇 ~

   

食完都番屋企   開埋機洗衫就沖涼   吸夠冷氣先熨 2 機衫 ~

9 點先開始熨   9 點 45 分就熨完   真係超級快   平時里奧大人熨 1 機都要 45 分鐘   所以佢成日話我熨得核突   哈哈 ~

里奧大人 10 點 15 分番到屋企   叫佢沖完涼食支雪條   因為佢好鍾意食呢隻韓國雪條㗎 ~

睇多陣 Youtube   今晚 11 點 10 分先瞓覺 ~

茄汁洋蔥豬扒 + 芥蘭苗 ( 29-JUN-2026 )

 

( 29-JUN-2026  MON )

感恩一覺瞓天光呀   瞓到 7 點 10 分都醒咗   里奧大人原來已經出咗廳   不過我繼續懶床到鬧鐘響先起身 ~

早餐食法國丹麥酥方包   里奧大人就食完再瞓陣先番工 ~

我由細到大都鍾意飲朱古力奶㗎   估唔到里奧大人都鍾意   咁我好少買嚟飲嘛   所以係好後期先知囉   尋晚開咗盒朱古力奶   佢今朝就話要飲   如果飲剩就比佢拎番公司飲   真係好鍾意咁喎   哈哈

菇場忙呀   星期一忙就最好   咁樣個人會精神好多㗎 ~

Lunch Time 蒸完飯就出去買菜同蕃薯   呢期真係好想食蕃薯糖水呀   最後買埋雞骨草比里奧大人就番菇場開餐喇 ~

阿齋話我一定係會買嘢番嚟   我話去買菜呀   之後船頭話我就算唔買菜   都會買啲嘢番嚟   呢樣又真呀   我多數會買啲零食一齊食嘛 ~

阿齋請食花生糖   佢鍾意食   所以叫船頭幫佢買喇

西瓜比咗 3 隻好大隻嘅蕃薯比船頭   但船頭唔係咁鍾意食   所以比 2 隻比我   因為我同佢講過間唔中整蕃薯糖水   哈哈

忙下停下   好快放工 ~

今晚里奧大人 6 點半先放工   所以我可以唔駛咁趕呢 ~

是日晚餐 - 茄汁洋蔥豬扒 + 芥蘭苗

茄汁洋蔥豬扒 - 要清樽茄汁   所以就整豬扒喇   以前會整蕃茄蓉   依家真係懶咗好多呀   好在今次都煮得好食咋   里奧大人話酸酸甜甜好啱佢食呀 ~

芥蘭苗 - 因為聽晚唔煮飯   所以唔想買 1 斤菜   所以去錢大媽買 1 Pack 只係 $3.5 咋 ~

洗埋碗就開機洗衫   今晚有啲攰都唔去做機喇 ~

睇下 Youtube   里奧大人 9 點瞓覺添呀 ~

今晚睇咗好耐 Ball Kids   覺得佢哋真係好勁呀   烈日當空咁曬真係唔係個個頂到㗎   之後又睇到有啲球星真係超級無品   所以睇下睇下   睇到 11 點 10 分先瞓覺呀 ~

原隻鮑魚瑤柱豚肉裹蒸糭 + 洋蔥炒牛肉 + 油麥菜 ( 28-JUN-2026 )

( 28-JUN-2026  SUN )

今朝同里奧大人一齊起身   不過我沖埋涼就去家姐屋企喇 ~

我話好重呀   里奧大人以為我拎比家姐啲嘢好重   話送我去巴士站啦   之後我話係抽濕機入面無倒水   但因為好重   我尋日無力倒呀   哈哈 ~

一落車就見到 Berry 女係咁望   原來家姐話只係星期日先會行我嗰邊   所以知道我會出現   哈哈 ~

佢扯住工人搵我呀   之後撲我同怪叫一輪就唔理我 lu ~

送埋佢哋番屋企就同家姐去食早餐   糟糟上星期去 7 日旅行   咁家姐要去幫手   所以如果家姐話攰   我就唔過嚟㗎   感恩家姐話唔攰   所以要見佢哋啦 ~

台式肉燥湯米粉+脆皮腸+雞胸柳+英式多士 ($35)

原條炸魚柳+阿活脆邊煎雙蛋+英式多士 ($42)

講開貓貓夫人   真係又令我大開眼界   佢有 3 個車位但得 2 張泊車卡   所以佢為咗個車位而買架車   但佢成日又唔喺香港先搞笑嘛   佢真係買車買樓仲豪過我哋買菜呀   我話我買菜都會去格價啦 ~

之後家姐話佢都有做好多善事   咁都好呀   因為有啲人真係有錢得嚟係好姑寒呢 ~

[山食完就去 Panash 買麵包   咁我夾緊包嘅時候   有個阿婆係咁睇住我夾嘅包   之後問我啲包幾錢 ?!   我話七蚊 1 個   但 3 個就十九蚊   佢碌大對眼話一個七蚊好貴呀   我覺得佢應該以為七蚊係 3 個呀 ~

其實我覺得啲字體好細粒

阿婆再周圍睇啲麵包   之後就慢慢行出去麵包店   家姐係咁話阿婆好慘   咁我拎住盤麵包   所以叫家姐快啲行出去問阿婆要唔要吖 ?!   阿婆好開心話唔要呀   要買就要自己比錢   真係好多謝哂妳哋呀   我嗰下真係蠢咗   我應該話我兩個人食唔哂   多咗一個好嘥   咁不如比妳食啦   我覺得咁樣可能好啲囉 ~

Berry 女一見我入屋又大叫   家姐話佢同工人入屋都會咁   但姐夫入屋就唔會叫佢   真係好搞笑 ~

法國丹麥酥方包 ($40) - 同家姐 Share   我覺得咁樣最好   唔駛一次過食太多   哈哈

我話依家買麵包都唔平喇   家姐話記得佢初初出嚟做嘢   用咗 $600 買護膚品   之後要好慳每日食麵包做早餐   我問咁有無搽哂啲護膚品呀 ?!   佢好激動話梗係有啦   我即刻話點解妳依家買嘅護膚品仲貴啦   但過哂期都唔搽呢 ?!   佢尷尷尬尬咁笑呀   哈哈 ~

之後話我細個成日呃佢錢   但就真係好闊佬成日買嘢比佢食喎   仲強調話同同事都咁講㗎   我話係咪呃咗錢之後先咁豪呀 ?!   佢話唔係喎   話每次去零食部睇零食   我會即刻話買啦   我請妳食   估唔到都有番啲人性   哈哈 ~

成日想瞓覺   但我唔比佢瞓㗎   難得我嚟探佢嘛

家姐同事話 Berry 女啲毛 "令立立"   咁我問家姐妳有無食魚油丸 ?!   家姐話佢 ?!   我話係妳唔係 Berry 呀   哈哈   我又係嘅   明明講緊 Berry 家嘛

傾下傾下又已經 12 點 45 分   咁我都要走喇   家姐送我去搭車   感恩 5 分鐘後有車呀   咁佢可以唔駛陪我等咁耐嘛   同埋落好大雨   想佢快啲番屋企呢 ~

番到屋企都即刻預備午餐   因為我要清埋啲燒鴨同埋越南河粉呀  ~

每次好想食燒鴨   但每次都要食幾餐   食到有啲驚   哈哈

尋晚唔記得食呀   所以今日點都要食喇

家姐比嘅薯片同薯圈   呢排想飲紅棗   咁啱姐夫又買咗   佢係都話要比哂我   不過我真係要半包就夠   之後又問我想買啲咩   我話要番屋企睇下先可以答你   哈哈

里奧大人 2 點半番到屋企   但食完就再番公司做嘢   我就做小清潔   做完就去做機喇 ~

開埋機洗衫又再做多陣小清潔   里奧大人 5 點半番到屋企   我叫佢可以去做機先呀   因為起碼 6 點半先食得呢 ~

因為要帶飯   所以我就要煮個好簡單嘅餸喇   所以 7 點先開餐呀 ~

是日晚餐 - 原隻鮑魚瑤柱豚肉裹蒸糭 + 洋蔥炒牛肉 + 油麥菜

原隻鮑魚瑤柱豚肉裹蒸糭 - 要清冰格食物   所以今晚都要食喇   但食咗一半咋   又要留番聽晚食 lu ~

洋蔥炒牛肉 - 用牛角汁炒   真係方便又好味呀 ~

油麥菜 - 終於食哂   好在真係買咗一棵大咋   如果買半斤就肯定食唔哂㗎喇 ~

洗埋碗就沖涼休息   之後同里奧大人一齊睇 "中年好聲音 4" ~

睇多陣 Youtube   今晚 10 點 45 分都瞓覺了 ~

鴨絲炒油麥菜 ( 27-JUN-2026 )

尋晚食剩嘅鹽酥雞同甜不辣

( 27-JUN-2026  SAT )

尋晚瞓得麻麻哋呀   次次興奮狀態下入睡就係咁   哈哈 ~

今朝里奧大人去買早餐   買完就去佢公司食 lu ~

傾傾下偈突然見到阿妹   佢同里奧大人都以為自己番錯時間呀   但傾多一陣都要走喇 ~

我搭班車係 9 點 18 分   點知 9 點 13 分就到   我過馬路嘅時候見到架巴士   要即跑過去呀   因為個站無人等車   好肯定佢會飛站囉 ~

車程只係用咗 12 分鐘   我真係覺得快過的士   因為的士要兜嚟兜去先去到公司樓下呢 ~

菇場唔忙   西瓜又出咗去   咁就爽喇 ~

放工即走   今日同里奧大人出去食午餐   因為我驚落雨拎外賣麻煩呀 ~

前菜+海帶湯

砂鍋牛肉飯+湯 ($58) - 我食㗎   因為好想食飯焦

韓兄弟半半 (豬肉飯) ($65) - 里奧大人食剩半份豬肉飯   咁啱我今日拎咗飯盒

里奧大人食完就要番公司做嘢   我就去惠康買嘢喇 ~

今日一心係去買鈣思寶   但得 2 排就唔買   咁再周圍望下有無啦   但又唔見就諗住走   點知原來係擺咗係入口前少少   因為平時我一入去係直望   唔會轉個頭望嘢嘛   所以見到即刻買   最後買埋包菜就走喇 ~

鈣思寶植物固醇 6 包 ($20/排) - 買滿 $50 送 1 排維他蘋果綠茶 6 包   所以我買 13 排鈣思寶   送咗 5 排蘋果綠茶   最感恩係買滿 $128 減 $12 呀

其實可以拖上樓梯   但個環保又裝咗 6 排   我真係拖唔到   所以即行去另一邊搭扶手電梯呀

買完就拎番屋企先   搞掂就去參加 LA 活動 ~

散會再去惠康買生果   我一個人行超市就會慢慢睇 ~

出前一丁北海道蝦麵 ($40/2 包) / 太平奶鹽梳打餅 (第2件半價 $12) 

8424 西瓜 ($29) - 職員問我西瓜邊度攞 ?!   我話頭先喺前面攞   佢即刻叫我放低   拎開箱嗰個呀   我問有無核 ?!   佢話有無核都買啦   廿九蚊咁抵   哈哈

DODOME 護鼻紙 4 PK ($37 買一送一) - 呢排朝早成日流鼻水   上網見啲評論話唔錯   所以買嚟試下

買完真係要即刻番屋企   捧住個西瓜都好重呢 ~

管理員行過嚟同我講我今日好忙   又話已經好好   我正想答話無落雨真係好好嘅時候   佢話我頭

先塊臉係好哂呀   依家無咁紅   又話依家可以送貨到門口   我話咁啱想買咪買囉   哈哈 ~

望個鐘都已經 5 點 50 分   我真係要抖下先預備晚餐呀 ~

里奧大人 6 點 50 分番到屋企   不過仲未食得   哈哈 ~

是日晚餐 - 鴨絲炒油麥菜

鴨絲炒油麥菜 - 前晚食剩半隻燒鴨   所以就煮埋去啦   但其實仲剩好多   咁要留番聽日先再食喇 ~

洗埋碗就開機洗衫   之後沖涼休息喇   里奧大人就去做機 ~

之前船頭比嘅朱古力棉花糖   諗住同家姐 Share   估唔到有 2 排   咁樣仲好   唔駛轉用盒裝住

同里奧大人一齊玩智力遊戲   我特登話個人咁低能咁都唔識   里奧大人大笑話妳話人低能   但妳都過唔到關啦   估唔到佢有認真聽我講嘢   哈哈 ~

唔做機但想郁下   所以 9 點 20 分開始熨 2 機衫   但熨到 9 點 40 分開始冒汗喇   熨剩 5 件要留番聽日熨 ~

睇多陣 Youtube   今晚 11 點都要瞓覺 lu ~

大食會 @ 教會 ( 26-JUN-2026 )

我買咗梅甘地瓜仔條 ($48) / 炸澎湖花枝丸 ($54) / 夜市甜不辣 ($50) / 一口鹽酥雞 ($66)

其他弟兄姊妹就買薄餅 / 滷水豆腐拚鴨腎 / 蠔餅 / 炒粉麵飯 / 壽司 / 生果盆

姊妹 R 自家製黑芝麻布丁   我食唔落呀   所以拎番屋企

1月-6月份生日嘅生日蛋糕

( 26-JUN-2026  FRI )

尋晚半夜去完廁所   之後好難先瞓得番呀   但感恩起身都精神 ~

今朝同里奧大人出去食早餐   食完就去佢公司坐陣先番工 ~

菇場唔忙   咁就好喇 ~

船頭個仔去完波蘭旅行   買咗 5 盒朱古力綿花糖   所以船頭比 1 盒我同埋阿齋   我就揀咗香草味道喇

Lunch Time 蒸完飯一坐低拎手袋   船頭話同我一齊出去   原來已經 12 點 47 分   佢去買 KFC   我就去大生幫家姐買咖啡奶   家姐好搞笑囉   問我星期日可唔可以陪佢買咖啡奶 ?!   我話肯定可以啦   但我最後都忍唔住買比佢   因為驚佢嗰間無就慘啦 ~

佢同里奧大人都鍾意用 "可唔可以" 呢啲字眼   有時屋企有零食   里奧大人就問 "可唔可以食 ?!"   我話屋企所有嘢都食得   如果真係買比家姐嘅   我會放埋另一邊呢 ~

日本守山咖啡奶 40P ($24) / RitterSport 薄荷朱古力 ($24/2 件)

韓國農心蝦條辣味 ($18/2 件) - 買番去菇場一齊食   好在大家都鍾意食零食咋

唔忙就做自己嘢   今晚放工要去里奧大公司   因為佢有 Urgent 嘢要處理 ~

一上到去就見到阿妹   之後又同埋細細聲 Mini 一齊傾偈   成個 Office 當堂好嘈呀   哈哈 ~

里奧大人驚我餓   所以買咗啲小食   佢本身話買肉絲炒麵㗎   我話太飽啦   一陣仲要食嘢嘛

我哋 7 點 10 分先走   要即刻搭的士去舖頭放搞啲嘢   之後再車去買嘢食   買完即急步行去教會   但都要 8 點 05 分先到呀 ~

之後原來係寫咗 7 點 30 分開始   我哋同姊妹 AL 都無留意呀   以為 8 點開始   真係超級勁唔好意思呀 ~

新一班嘅弟兄姊妹其實都好搞笑   感恩大家都啱傾   因為真係好怕對住無嘢講嘅感覺   哈哈 ~

弟兄 ML 7 月會去旅行   姊妹 J 啱啱去完   話嚟緊天氣係 46 度   我話體感咪 56 度 ?!   我叫佢依家唔開冷氣   去到會覺得無咁熱   哈哈 ~

弟兄 J 個老闆又係好衰   姊妹 G 叫佢拍片比老闆睇   等佢知你做緊嘢   之後弟兄 F 話可能覺得係 AI 片   當下覺得我老闆真係非常之好呀 ~

里奧大人加埋阿 Jack 嘅銀碼係 $200   之後再比番 $100 阿 Jack   咁我拎咗 $200 即放入銀包   之後里奧大人好緊張話 $100 係阿 Jack 㗎   哈哈   阿 Jack 望住我放入銀包但又唔講話係佢   所以我真係唔可以做比錢同拎錢嗰個   唔係肯定搞亂哂啲數呀 ~

搞掂哂就切蛋糕   只係 1 月至 6 月   每年有 2 次生日會真係唔錯   哈哈 ~

今晚我靈修分享   只係用咗 30 秒   真係超級懶   佢哋話好簡而清   哈哈   之後到姊妹 M 嘅靈修分享   內容係同里奧大人一樣呀   估唔到我哋 3 個分享都係講喜樂   弟兄 ML 話簡直係前後呼應咁呀   開心開心 ~

10 點鬆啲就散會   番到屋企即沖涼休息喇 ~

諗住睇陣電視就會眼瞓   但我實在興奮心情   所以 12 點半先瞓呀 ~

燒鴨 (外賣) + 辣子雞拚雞翼 (外賣) + 金銀蛋白菜仔 ( 25-JUN-2026 )

( 25-JUN-2026  THU )

臨醒前係咁發夢   因為我想去廁所但忍住唔去   好記得有個夢係我喺尖沙咀搭車番工   但經過屋企個站就落咗車   我仲呆咗   之後想追架車都追唔到啦 ~

一起身就 7 點 25 分啱啱鬧鐘響   起身嗰下係好攰   因為起身前係不停發夢 ~

早餐食粟米火腿包   里奧大人就食丹麥條 ~

菇場唔忙   咁就做 Filing 啦   之後阿齋問我做咩 Filing ?!   船頭即刻話因為核突咪 Filing 囉   哈哈   因為我放哂喺隔離張枱   真係好阻礙眼呢 ~

之後我話我好忙㗎   阿齋同船頭即刻和應   其實大家都係講比溫總同阿爽聽囉   船頭仲好大聲話尋日上網睇到段嘢好搞笑   話突然間要幫人做嘢   就好似有人話呢個係妳嘅私生子   妳要負責任咁   真係形容得好好呀   哈哈 ~

阿齋去 city'super 買環保大袋   我本身都話買   之後船頭話等阿齋買完番嚟   睇下個色啱唔啱先買啦   又話我呢方面會忍到唔買   零食就忍唔到   哈哈 ~

同埋我話我已經有個衰仔樂園大袋   家姐又比咗個 Porter 大袋   加上我本身又好多袋   再買大袋會比老公鬧囉 ~

Lunch Time 同船頭去一田買嘢   今次我話要推車   船頭話都要呀   今日買啲嘢係濕濕碎碎好難拎呀 ~

佢又講咗西瓜啲嘢比我聽   咁之前阿怪同溫總鬧交   最後嘅處理方法先頂癮囉 ~

買完都已經 12 點 25 分   要急步番菇場開餐喇 ~

我哋 12 點 45 分先開餐呀   食完就同阿齋一齊去洗碗

船頭整嘅酸梅排骨同炒四季豆真係超級好味   阿齋話尋晚買外賣都係食四季豆   依家覺得原來出面嘅係咁難食   我話我今日食咖哩都覺得完全無味咁呀   哈哈

船頭話新聞見到有人屋企有鱷魚   我話係咪用嚟煲湯呀   佢話識劏先得㗎   呢句好笑   哈哈 ~

仍然要 Filing   感恩 4 點半先搞掂呀   如果再繼續做   我應該會手痛呢 ~

放工去大家樂買醬香雞   點知賣哂呀   所以要去買燒鴨喇 ~

雖然買咗外賣餸   但今晚要浸菜同煮鹹蛋都要啲時間 ~

燒鴨 (半隻) ($70)

淨兩餸 ($45)

依家真係好無記性   我唔記得仲有咖哩雞   但今晚真係要食埋去呢   之得唔買淨餸啦 ~

里奧大人 6 點 45 分番到屋企   咁煮出前一丁比佢食   等佢開心下   哈哈 ~

是日晚餐 - 燒鴨 (外賣) + 辣子雞拚雞翼 (外賣) + 金銀蛋白菜仔

燒鴨 (外賣) - 完全無食過呀   要留番星期六先食 lu ~

辣子雞拚雞翼 (外賣) - 辣子雞好味道呀   雞翼就留番做 Lunch Box ~

金銀蛋白菜仔 - 想食鹹蛋皮蛋   所以煮白菜仔喇 ~

洗埋碗就開機洗衫   之後染完髮就沖涼喇 ~

里奧大人 9 點開 Zoom Meeting   估唔到 10 點開完   之後里奧大人話原來要再開   但再入去嘅時候又無人   所以佢都瞓覺喇 ~

頭先食剩咗啲皮蛋同菜   咁我晾埋衫就食埋去啦   原來都已經 9 點半   感覺好似食宵夜咁   哈哈 ~

我就再睇多陣 Youtube   差唔多 10 點 45 分先瞓覺 ~