Babymama: 12月 2012

2012年12月31日星期一

活力餐廳 @ 九龍灣 ( 31-DEC-2012 )

蜜桃京都骨 - 個汁超勁甜

豉椒涼瓜炒牛肉 - 涼瓜唔熟

油菜

( 31-DEC-2012 MON )

2012 年最後一日喇話咁快就一年過咗 ~

今朝又瞓到 8 點依家多數搭快小巴番工朝早起身真係唔想咁趕呢 ~

早餐食麵餐好似好耐無食咁呀 ~

菇場無咁忙喇   食完藥眼光光   到 Lunch Time 食咗幾啖麥皮   諗住瞓   又瞓唔到添 ~

放工即走喇   番到屋企睇下電視   之後瞓咗 15 分鐘   精神好多呀 ~

里奧大人 7 點放工   又出去食喇   真係無心機煮呢 ~

如果大家唔係病   本來諗住出去食飯行街   不過依家大家食完藥都攰   咁就咁近近哋食飯算喇 ~

番到屋企抖喇我瞓到 11 點 50 分   之後同里奧大人一齊倒數   迎接美好 2013 年呢 ~

2012年12月30日星期日

活力餐廳 @ 九龍灣 ( 30-DEC-2012 )

南乳羅漢齋 - 好鹹 30-12a8a

鹹魚豆腐雞球煲 - 我覺得勁多茨汁好恐怖
油菜

( 30-DEC-2012 SUN )

咁咳法唔掂里奧大人都病埋所以食完早餐一齊去睇醫生呢 ~

番到屋企開機洗衫執下嘢又 2 點里奧大人話餓又要去去食 Tea 今日真係凍咗好多寒風刺骨感覺呀 ~

食完番屋企煲好羅漢果茶就抖陣   里奧大人又瞓   我諗住睇下電視   不過最後都瞓埋   瞓咗 1 個鐘 ~

今次醫生開重藥   所以個人特別呆滯   本來想煮飯都唔煮喇 ~

執埋雜物櫃就搞掂哂   之前買埋買埋就咁放入櫃亂哂籠咁真係頂唔順   依家整整齊齊就最開心   拎嘢都方便啲啦 ~

7 點出去食飯   諗住過德福行   不過太凍喇   都係番屋企休息好啲 ~

2012年12月29日星期六

別府 @ 九龍灣 ( 29-DEC-2012 )

胡麻地雞大根沙律 29-12a14a

九洲拉麵

吞拿魚壽司 / 三文魚壽司

燒麵豉飯團

( 29-DEC-2012 SAT )

又咳到瞓唔到   好在今日番半日啫 ~

食完早餐   飲埋咖啡都覺得好攰 ~

菇場忙到 10 點幾   之後就 Hea 過   仲更加眼瞓 ~

1 點即走   同里奧大人一齊坐小巴去 Mega Box   又去肇順河鮮飲茶   本來想試另一間   不過我好餓   唔想搵呀 ~

紅油抄手 / 綠茶芋蓉餅 / 雪山叉燒餐包 / 蜜汁叉燒腸 / 陳皮牛肉球 / 薑蔥牛柏葉

差唔多 3 點走人   行下 Jusco   買咗個 Thermos 真空杯 Gift Set 比媽咪   之後拎埋 Creait Card 就坐 Shuttle Nus 去德福行咗陣就番屋企 lu ~

里奧大人番屋企瞓陣先   我就去街市買生果喇 ~

真係好慶幸去完旅行之後果幾日洗哂啲衫   執好哂嘢   唔係啲嘢仲會喺廳到周圍擺   之前想換季好耐   不過又好似唔太凍咁   所以唔換住   點知里奧大人瞓醒之後話難得佢有時間   所以換季喇   雖然好似就咁 Pack 入櫃但我會再摺多次   放得整整齊齊咁先得㗎 ~

搞掂咗一大半都 7 點   要去開餐喇   想食熱嘢   又去番別府呢 ~

行一陣商場就番屋企   差唔多 9 點幾終於搞掂哂   即沖涼休息喇 ~

2012年12月28日星期五

新斗記 @ 佐敦 ( 28-DEC-2012 )

乳豬 (半隻) - 本來想叫 1 隻諗諗下都係唔好太多喇塊皮脆卜卜超好味佢哋話啲肉都好味添呀不過我無食到呢

生炒骨 - 好乾身超正

啫啫生菜煲 - 個煲就大加埋都唔知有無 1 個唐生菜添呀

冬菇燜鵝掌 - 冬菇好厚身鵝掌好大隻但我好驚食太大隻嘅鵝掌呢

炒麵 - 無咩特別

海蜇 (免費) - 一般咁啦

花生 / 蕎頭 - 呢兩樣好味呀

( 28-DEC-2012 FRI )

真係咳到無命   咳到自己無覺好瞓   里奧大人就更慘啦   今朝仲要早起身上大陸添 ~

今朝搭地鐵   好在上到 Shuttle Bus   坐多兩個人就 Full 哂   即開車   正呀 ~

早餐終於可以食扒芝腿治喇   超開心 ~

菇場超忙呀   所以好快到 Lunch Time   拿拿聲食完 Lunch Box 就要去過入數呀   病咗成個星期   居然唔記得交租   好在遲咗 2 日咋 ~

過完數再入票   去埋萬寧買埋洗頭水就番菇場喇 ~

忙到 4 點幾終於搞掂   上下網都好快放工 lu ~

今晚約咗家姐同糟糟兩姐妹去新斗記食飯   不過得 6 點同 8 點   所以就 Book 6 點喇 ~

諗住請糟糟食生日飯   點知變咗家姐請添   我哋食完都差唔多 8 點   再去永安買嘢   之後糟糟車我哋番屋企   快好多呢 ~

番到屋企即開機洗衫   抹櫃再拖地   做到成身汗   本來應承里奧大人煮麵佢食   不過最後太攰   佢話自己食埋嘢先番屋企   番到嚟都 10 點幾   我又未眼瞓   到 12 點幾都未眼瞓   先醒起頭先食飯飲咗幾杯茶 ~

糟糟送比我嘅朱古力

2012年12月27日星期四

住家飯 @ 媽咪屋企 ( 27-DEC-2012 )

節瓜燜豆卜

蒸龍躉仔

糖醋骨

豉油雞 / 叉燒 (外賣)

炒白菜

百合生魚湯

( 27-DEC-2012 THU )

又要番工喇   連放幾日假   起身番工有難度呢 ~

今朝都係瞓到 8 點   沖哂涼都仲係眼光光咁   食完藥個人真係呆滯啲咁真係行步路都慢過人咁囉 ~

坐快小巴番工   短短車程都好想瞓呀 ~

想食扒芝腿治   阿姐又唔比   所以食奶醬多囉   不過食咗半件覺得無胃口   留番一半做 Lunch 呢 ~

菇場忙   所以好快就 12 點 Lunch Time 抖陣食埋半件奶醬多   諗住瞓又瞓唔到   咁 Load 相就最好喇 ~

里奧大人唔駛上大陸   不過會夜番   我又番媽咪屋企食飯 lu ~

8 點半同家姐一齊走   里奧大人都同我差唔多時間番到屋企   咁都好   唔算太夜 ~

開機洗衫就沖涼   之後再熨一機衫   雖然攰   但又覺得郁下舒服啲咁囉 ~

2012年12月26日星期三

牛肉飯 + 鳳爪排骨飯 ( 外賣 ) ( 26-DEC-2012 )

( 26-DEC-2012 WED )

尋晚我咳到呢   嘈到里奧大人瞓唔着   佢喺廳睇電視到 3 點幾先瞓呀   之後我都係咁咳   我去完廁所   佢瞓到剧剧聲   之後我喺廳瞓   唔想嘈住佢呀 ~

瞓到好似 5 點幾   里奧大人醒咗   叫我入番房瞓呢 ~

我瞓到 12 點呀   唔係家姐打嚟我仲繼續瞓   不過醒咗就唔瞓喇   陪里奧大人食嘢   佢 10 點半已經醒咗   見我瞓得咁淋就唔叫醒我喎   所以佢應該好餓定啦 ~

食完去德福行陣就番屋企喇   個肚有少少唔舒服   所以灘喺梳化睇電視就最舒服 ~

懶到唔想出去食嘢呀   叫里奧大人去鴻點買點心   不過無嘢啱食   又去番大家樂買 Tea 喇 ~

瞓下又 8 點幾   勁想食牛肉飯   所以叫里奧大人去叙苑買外賣呢呢幾日真係食外賣食到驚   但又真係無辦法   真係好唔想出街   2 日假期咁就過完 lu ~

2012年12月25日星期二

Delifrance @ 九龍灣 ( 25-DEC-2012 )

Caesar Salad w/Salmon Set - 得 2 片薄切切嘅煙三文魚其他全部都係生菜

Beef Bolo Ling with Egg Set - 無咩特別不過超勁想食意粉啫

Fresh Mushroom Cream Soup / Mixed Vegatable Soup - 蘑菇湯好濃味又熱雜菜湯就唔得唔熱嘅

( 25-DEC-2012 TUE )

今日連續兩日都係聖誕假期可惜唔舒服唔想出街呢 ~

10 點起咗身去大快活食早餐個個去哂旅行無咩人咁呢真舒服喇之後里奧大人自己去睇醫生尋晚食完炸兩無飲啤酒所以熱氣喎好在我之前睇咗醫生知道會開診咋唔係又要周圍搵真係好煩呢 ~

其實里奧大人之前已經諗好今日去街嘅   不過見我唔舒服   所以都係唔出   想我休息多啲咁呢 ~

我今次真係休息喇咩都唔想做   真係攰到連涼都唔想沖嗰隻呀 ~

食完又抖   抖完又食   里奧大人喉嚨唔舒服   所以想食通粉   又喺街撞到 Ivy 兩公婆 ~

雖然攰但又唔想屈喺屋企同里奧大人落街睇下食咩好其實都無咩嘢想食我超勁想食意粉所以去 Delifrance 喇 ~

2012年12月23日星期日

艇仔粥 + 炸兩 + 炒麵 (外賣) + ( 23-DEC-2012 ) + ( 24-DEC-2012 )

( 23-DEC-2012 SUN )

今朝唔番教會喇瞓到 11 點梳洗之後就去金姆指食早餐 ~

食完即番屋企抖陣    開咗機洗衫   諗住熨衫   不過真係好攰   里奧大人話佢熨   要我入房休息   咁我唔客氣喇 ~

瞓到差唔多 3 點幾   同里奧大人落去食 Tea ~

番到屋企呆呆滯滯   不過唔想瞓   所以睇下電視 Hea 過啲時間過得都好快   話咁快又 8 點   無咩想食   只係想食粥暖暖身   其實海皇啲粥係唔好食   不過突然想食先買咋 ~

次次唔舒服   里奧大人就會去買嘢番屋企食   假期都無得抖   希望我快啲好番啦   可以煮餐飯仔   話哂住家飯 ~

超眼瞓   所以 10 點幾就入房訓喇 ~

( 24-DEC-2012 MON )

每月一到呀   個肚有少少唔舒服   加上又瞓得唔好   所以請病假喇 ~

瞓到差唔多 12 點就睇醫生   之後飲杯中藥再瞓過   但飲完反而痛噃 ~

無胃口啦   所以瞓到 8 點先醒   本來今晚教會有節目   里奧大人見我唔舒服   所以同朋友都無參加喇 ~

佢買外賣番屋企食   我食咗藥又好番好多   不過真係好攰   只係想瞓瞓瞓呢 ~

2012年12月22日星期六

做冬 @ 姑奶屋企 (大埔) ( 22-DEC-2012 )

火雞 @ 大家樂

焗薯仔 / 法包 / 自家制餃子 / 沙律 / 一口芝士 @ 大家樂 / 千層闊條麵 / 炒飯

( 22-DEC-2012 SAT )

今朝 8 點 40 分收到 8 卦電話   又一齊食早餐喇 ~

菇場靜喇   真係無 Mood 做嘢   又咳到頭都痛   勁想番屋企呀 ~

放工個個即走啦   番到屋企抖陣   2 點幾就去大快活食 Tea   之後又即番屋企抖 ~

番到屋企瞓陣   但 4 點幾要起身   因為今晚去大埔姑奶屋企做冬   順便去埋大埔睇醫生   依家變咗扁桃線發炎   睇完之後就坐小巴去姑奶屋企喇 ~

差唔多 7 點幾開餐   見到沙律勁想食   見到汽水勁想飲   可惜里奧大人呢樣唔準嗰樣唔準   仲要坐正隔離   想偷雞飲啖都唔得   之後姑奶話我好番再整沙律比我食   又叫我拎汽水番屋企   好番先飲   太感動喇 ~

今年聖誕好開心   所以我買咗禮物比所有兒甥仔女同姑奶   其實媽咪家姐工人都有   反而得里奧大人無添   真係慘   錢又要出   但禮物又無   好在佢又無咩所謂啫 ~

太好喇   2 姐夫車我哋同姑奶番屋企   我喺車度瞓咗添呀   無計啦   一食傷風咳藥就會令人昏昏欲睡嘛 ~

番到屋企即沖涼諗住精神啲點知都係吽下吽下咁唔知發生咩事咁所以都係即刻上床瞓覺喇 ~

2012年12月21日星期五

別府 @ 九龍灣 ( 21-DEC-2012 )

九洲拉麵

雞胸軟骨餃子捧

炒野菜

燒麵豉飯團

( 21-DEC-2012 FRI )

尋晚一瞓落床即咳到差啲連命都無呀   起身飲杯暖水   再食粒喉糖先舒服啲咋 ~

今朝搭地鐵   真係好唔慣   雖然都好快   不過要等 Shuttle Bus 番菇場   今次耐咗   等咗 10 分鐘   所以又少咗時間食早餐喇 ~

超勁想食扒芝腿治   點知阿姐話師傅放咗假   今日替工會整好耐   叫我食第啲咁我改食餐蛋治囉 ~

番到菇場唔太忙   咁都好   好鬼攰呀   11 點收到 Email 話收 4 點   發達喇 ~

晏晝唔餓   所以出去行   順便買勁巾比啲姑奶做聖誕禮物   之後買腸粉番菇場食   我話要埋辣醬嘛   佢無落   我甜醬   好甜呀   所以好漏 ~

食完仲有 Mood 做嘢問下媽咪 4 點去唔去大家樂食 Tea 估唔到佢又話去咁就去啦其實我想番屋企休息不過冰姑話陪媽媽嘛咁好啦陪就陪啦反正真係好難得放 4 點嘛 ~

我 4 點半先到呀同媽咪工人 Share 食兩個餐之後傾下偈都已經差唔多 6 點 lu 要走喇 ~

陪媽咪去買衫   感恩啱哂媽咪心水呀   所以即買 3 件衫同 1 條褲比佢   當做聖誕禮物 ~

之後去媽咪屋企坐一陣   7 點走人   里奧大人 7 點 15 分打嚟話放工   咁我話想去椰林閣   咁我去攞位先 ~

望入去係得 4 張枱有人食嘢   但淘大間間食店都要等位   連太興都要等   之後聽到有個人好愕然話點解椰林閣無人嘅   搞到我心大心細唔想入   不過後尾都入咗去   因為我未試過呢度嘅晚餐   佢比我坐對住門口嘅二人枱   其實我如果無唔舒服   我都無問題   但唔舒服就唔想對住門口   好凍家嘛 ~

咁我話可唔可以轉卡位   佢叫我出去等拎飛喎   心諗都黐線   又無咩人食   我坐喺度等都無問題啦 ~

咁我出到去順便去別府睇下有無位要等 4 張枱咁兩邊等囉點知別府有位先就去別府食喇 ~

食完番屋企飲湯之後開機洗衫又熨衫做完就即沖涼休息喇 ~

2012年12月20日星期四

做冬 @ 嘉華大酒樓 (官塘) ( 20-DEC-2012 )

籠仔蒜香糯米蟹

椒鹽鮮魷

生炒上肉排

燒鴨 (半隻)
20-12a6a

芝麻糊 / 紅豆沙 / 生果拚盤

媽咪煲嘅西洋菜生魚湯
20-12a4a

( 20-DEC-2012 THU )

星期四喇   好想快啲放假休息   呢朝又係 8 點起身   食咗藥頭暈暈   都係瞓多啲好 ~

早餐食腿蛋治   本身已經無咩蛋味   加埋自己又口淡淡   直頭好似無味咁   最慘係塊面包超級唔新鮮   擺咗 9 年咁   喉嚨已經痛   所以仲更加難啃呀 ~

番到菇場都無咩嘢忙   所以超勁想瞓   真係好怕食咳藥   次次都好眼瞓 ~

Lunch Time 同 8 卦出去食   真係超勁想食酸辣米線不過 8 卦話唔好   我又覺得唔舒服仲食酸辣   好似好過份咁   所以最後食廈門炒米喇 ~

里奧大人上廠   我又同媽咪食啦   咁凍都唔煮喇   出街食飯當做冬呢 ~

家姐差唔多 6 點 40 分到   都算快   但佢話公司超多嘢做   不過見我番黎食   所以都係早啲走情願聽日要早啲番公司開工   實在太好喇 ~

食到 8 點半就上媽咪屋企拎湯就走喇   番到屋企即沖涼   之後又熨衫   差唔多 9 點半里奧大人就番到屋企 lu   真係好   唔駛又要等到好夜 ~

2012年12月19日星期三

明輝茶餐廳 @ 九龍灣 ( 19-DEC-2012 )

( 19-DEC-2012 WED )

食咗藥真係幾好瞓 8 點起身 8 點半落樓就收到 8 卦電話不過我話起碼 15 分鐘後先到囉 ~

佢都等埋我所以一齊遲到好在阿 Head 同老闆都無番咋 ~

真係最驚飲咳藥水食藥丸都 OK 但唔好咁大粒唔係好想嘔咁本來唔想食抗生素不過喉嚨真係好鬼痛所以都係食埋喇同埋係狂食喉糖咁樣喉嚨舒服啲呢 ~

有嘢做反而唔眼瞓點知做完之後個人開始呆呆滯滯但又唔係好眼瞓咁囉 ~

諗住食完 Lunch Box 就瞓我明明預自己半盒因而想快食完快瞓嘛點知里奧大人食唔哂佢好到呀親手幫我將個 Lunch Box 排到滿滿呀我又無咩胃口要慢慢食終於食完都已經 1 點 10 分都唔瞓啦 ~

呆呆滯滯最辛苦最慘瞓唔到好似夜晚飲完咖啡個心好想瞓又瞓唔到啲感覺 ~

放工即走喇   本來想熨衫同開機洗衫   不過又好似好攰咁   之後睇睇下新聞都瞓着   6 點半瞓到 7 點 15 分   如果唔係朋友打嚟我都繼續瞓 ~

反正醒咗   打比里奧大人問佢幾時走   佢話唔知幾時   我話我自己食嘢先   收線唔夠 1 分鐘佢又打黎問我落樓未   叫我等佢半個鐘   陪我食喎 ~

可能佢覺得我一個人食好慘都未定   咁我都無咩所謂   我預咗一個人食嘛   咁當然佢陪我就更好啦 ~

想食麻辣米線   佢又唔比   所以去食粉麵喇   行無耐有人企喺我面前   我啱啱瞓醒都唔知咩事   原來係 8 卦   佢啱啱食完拉麵出嚟真係佢唔叫我   我都唔知係佢呢 ~

食飽好精神   所以開機洗衫   之後睇下電視   11 點就瞓喇 ~

2012年12月18日星期二

肉醬扁意粉 + 粟米蛋花湯 ( 18-DEC-2012 )

( 18-DEC-2012 TUE )

尋晚半夜喉嚨超痛痛到醒咗幾難先再瞓得番呀所以今朝又 8 點先起身 ~

如果 8 點起身就只有 20 分鐘時間食早餐不過都好好喇 ~

番到菇場無啦啦咳得好犀利   都唔方好嘢   係咁食使立消   喉嚨都舒服好多 ~

Lunch 又食番冬菇栗子燜雞飯   食咗 2 餐好驚   下次都係唔整喇 ~

放工都係去睇醫生好啲好感恩真係有睇咋   醫生聽日開始放假呢   今次係淋巴腺發炎   呢年成日都係扁桃腺同淋巴腺發炎   我成日以為同一樣嘢嚟添 ~

睇完去超市買豬肉同生果就走 lu   番到屋企即預備晚餐   自己食先   想快啲食藥休息呀 ~

是日懶餐 - 肉醬扁意粉 + 粟米蛋花湯

肉醬扁意粉 - 唔整蕃茄蓉喇   諗住屋企有意粉醬   點知係無   所以就咁用茄汁喼汁整算數   加埋香草   但原來里奧大人唔多鍾意香草   下次落少少算喇 ~

粟米蛋花湯 - 好耐無飲呀   所以一定要開黎飲呢 ~

里奧大人差唔多 8 點半先喺大陸走   番到嚟都 10 點   等佢食埋嘢   幫佢洗埋碗   陪多佢一陣   我都瞓喇 ~

2012年12月17日星期一

蕃茄煙肉扁意粉 ( 17-DEC-2012 )

( 17-DEC-2012 MON )

尋晚半夜三更發惡夢呀大叫咗兩下嚇醒里奧大人但其實我喺夢中係大叫咗好耐呢最怕發呢啲鬼怪夢明明 7 點半起身不過想瞓多陣所以瞓到 8 點先起身瞓多半個鐘真係精神好多呢 ~

今朝坐快小巴其實真係好快 5 分鐘到菇場附近不過我覺得貴所以無咩必要都係搭番地鐵慳得一蚊得一蚊最緊要係比到我有時間食早餐呢 ~

番到菇場忙忙哋搞掂又 Hea 過 ~

今日有 Lunch Box 因為之前食剩咗好多黑椒汁所以唔好嘥尋日用黎煮扁意粉咁就成為今日嘅黑椒腸仔扁意粉喇 ~

食完去 Bank 整嘢同入票   感恩無咩人   好快就搞掂   不過都唔周圍行喇   好驚自己又亂咁買嘢 ~

里奧大人今日上咗大陸   不過我話煮飯   佢又話可以番到嚟食   實在太好呢   所以我放工即番屋企做嘢喇  ~

番到屋企即開機洗衫同拖地之後食埋尋晚嘅飯同餸   抖陣就煮埋晚餐   今晚自己食先   食完之後又要熨兩機衫喇   里奧大人差唔多 9 點就番到屋企   我都啱啱熨完衫呢   好鬼攰呀 ~

是日懶餐 - 蕃茄煙肉扁意粉

蕃茄煙肉扁意粉 - 唔想里奧大人成日出街食我又想清埋包煙肉所以就整蕃茄煙肉扁意粉不過今次無用蕃茄蓉懶到就咁用茄汁整咋我都無食到但見里奧大人食得都幾滋味應該唔差啩 ~

2012年12月16日星期日

冬菇栗子燜雞肶 + 菜心炒臘腸 + 蕃茄薯仔大眼雞湯 ( 16-DEC-2012 )

( 16-DEC-2012 SUN )

校咗鬧鐘 10 點起身   點知里奧大人話尋晚瞓唔着   出咗廳睇書   睇到好晏先瞓到   所以好攰   今朝唔番教會   我都繼續瞓   瞓到 11 點半呀   係時間起身 lu   出去咩早餐都無得食   所以我話蒸魚肉燒賣呢 ~

好熱呀   要開冷氣添呀   12 月中開冷氣真係無人信啦 ~

食完就開機洗衫   之後又熨衫   呢幾日都一日洗兩機衫   好在有抽濕機咋   唔係真係唔知點算好呢 ~

差唔多 2 點半就食 Tea   不過我未餓   但里奧大人就餓喇   我食半份三文治就算   其實就里奧大人食哂   佢假期食得好多嘢   但番工就食好少嘢 ~

煲埋菊花茶抖陣又預備晚餐 ~

是日晚餐 - 冬菇栗子燜雞肶 + 菜心炒臘腸 + 蕃茄薯仔大眼雞湯

冬菇栗子燜雞肶 - 里奧大人瞓緊覺   所以教靜音   但唔記得 Reminder 都唔會響   自己又掛住打機   好在家姐打嚟我先睇睇鐘   原來已經 5 點半   我校咗 5 點 10 分去熄細火家嘛   依家遲咗 20 分鐘   收完線即飛入廚房睇煲雞呀   真係煲乾哂呀   再過 2 分鐘入去就一定燶添呀  ~

菜心炒臘腸 - 食 2 晚灼菜心好似好悶咁   所以加臘腸炒喇   扮新餸 ~

蕃茄薯仔大眼雞湯 - 再嚟滾湯   今晚呢兩隻蕃茄超有茄味噃   飲得好滿足 ~

沖涼完就真係要抖下喇   睇下電視打下機   望下鐘已經 11 點半   要瞓喇 ~

2012年12月15日星期六

黑椒牛仔骨 + 菜心 + 蕃茄薯仔大眼雞湯 ( 15-DEC-2012 )

( 15-DEC-2012 SAT )

今朝 9 點 10 分電話響   原來係家姐打嚟佢唔記得我 Off 呀   諗住同我傾下偈點知原來我 Off   之後佢就驚喇   因為我唔鍾意人喺假期嘈醒我呢 ~

尋日里奧大人 Line 我   話 Sorry 星期六要做公司嘢   陪唔到我   家姐今朝又 Send SMS 比我   話對唔住   今朝嘈醒我   我覺得好搞笑   駛唔駛 Sorry 對唔住咁嚴重呀   9 點打嚟都 OK 啦 7 點就真係唔好喇 ~

差唔多 10 點半起身   里奧大人話想去 Delifrance 食早餐 Relax 啲咁喎 ~

之後我去買餸   里奧大人就去剪髮   我番到屋企又開機洗衫   之後熨衫   再抹柜   搞掂哂就沖涼抖下喇 ~

2 點半出去食 Tea   勁想食牛什米   所以去明輝   因為都好多牛什   食完唔會好口渴   侍應姐姐又好人   雖然迫啲不過都會嚟食囉 ~

差唔多 5 點半就預備滾湯煮飯   太耐無煮   要啲時間 Warm Up ~

是日懶餐 -黑椒牛仔骨 + 菜心 + 蕃茄薯仔大眼雞湯

黑椒牛仔骨 - 想清哂冰格啲食物呀   所以又整黑椒牛仔骨喇 ~

菜心 - 好耐無食菜   見 $22 有 2 斤即買   留番 1 斤聽晚食 ~

蕃茄薯仔大眼雞湯 - 里奧大人好耐無湯水飲   所以我點都要滾湯   呢檔蕃茄係 $10 / 斤   其他都係 $6 同 $8 斤   但我覺得呢檔蕃茄好有茄味   所以多數買呢檔   買咗 4 個都 $17   不過我分 2 餐煲依家拎 $100 去街市買餸真係唔夠   如果買豬骨煲湯   已經無咗一半啲嘢貴到離哂大譜呢 ~

今晚特登唔食飯留肚食零食呀食零食真係停唔到口爽呀 ~

2012年12月14日星期五

雲南小鍋米線 @ 荃灣 ( 14-dec-2012 )

腩肉豬大腸酸辣米線 (小辣)

( 14-DEC-2012 FRI )

又星期五喇   聽日堅 Off   其實想請埋今日   不過里奧大人無假   所以我都番喇   我依家要儲假呀 ~

早餐食腿蛋治   突然好掛住泰國添   我次次去完旅行之後   最唔慣係自己一個人   話哂呢幾日日對夜對里奧大人嘛 ~

以前去親旅行都會買好多手信比公司同事   依家唔駛真係好   除咗 8 卦同 Rreceptionist 之外   無人會問我幾日 Off 去邊㗎 ~

菇場忙呀   咁都好   時間過得好快 Lunch Time 又未餓   等到 1 點先食麥皮 ~

放工去荃灣睇中醫   6 點半到   點知醫師出咗去同朋友傾偈傾到唔記得咗   好在打比佢   佢話 5 分鐘後到咋   差唔多 7 點睇完   之後又去番雲南小鍋米線   食完又買糕點   今次買埋比媽咪同家姐   總共買咗 15 件   重到爆呀 ~

坐小巴番屋企   之後家姐就嚟車手信走喇   清咗唔少位呢   實在太好 ~

又開機洗衫喇   沖完涼之後就熨衫   睇嚟呢幾日都係重覆開機洗衫   熨衫摺衫呢個動作喇 ~

里奧大人差唔多 9 點先喺大陸放工   食埋嘢先番香港   番到嚟都 10 點幾   沖埋涼再睇陣電視就瞓 lu ~

2012年12月13日星期四

金姆指米線 @ 九龍灣 ( 13-DEC-2012 )

墨魚丸麻辣米線 (小辣)

豬潤片酸辣米線 (1 辣) / 菜心

( 13-DEC-2012 THU )

今日 Off 呀之前試過去完台灣第 2 日即番工點知原來係攰到爆炸所以依家去完旅行都會休息一日先番工呢 ~

9 點醒咗即開機洗衫先呀之後再瞓番 10 點幾先起身喇去金姆指食早餐估唔到平日都唔小人噃 ~

見有太陽   所以番到屋企又即開機洗衫   次次旅行之後都好多衫要洗   今次仲多   因為我哋買咗差唔多 40 件衫   好在係短 Tee 唔趕住着   洗完就入櫃喇 ~

再熨埋一機衫就影手信   影完再 Pack 埋   都用咗差唔多 2 個鐘   不過今次好在買嘅種類唔太多   唔駛分嚟分去   慳唔少時間呢 ~

差唔多 3 點就行去九龍灣工廠區附近緬懷一下   食個 Tea   順便去 Bank 整嘢   搞掂完都差唔多 4 點幾 lu ~

里奧大人做公司嘢   咁我就拎手信比媽咪   之後坐到 7 點諗住走   家姐都番埋嚟所以我差唔多 8 點先走   因為里奧大人餓呀 ~

本來想去源發食蝴蝶腩   仲以為行多咗個街口   所以搵唔到   點知原來執咗   又少個選擇 lu ~

無計啦   想食熱嘢   所以又去番金姆指喇   原來今日兩餐都喺金姆指添 ~

襯自己仲記得許留山張龜苓膏 Coupon 12月底到期   所以叫里奧大人食埋去喇 ~