泰開心。 最谷。美好回憶記錄 ( DEC 2012 )

今次去旅行係因為里奧大人要喺 12 月底前清假   唔清就無㗎喇   佢有同事好慘呀   申請咗 12 月放兩星期假   點知公司唔批無得放之餘   仲唔補番比佢   幾衰呀 ~   

得 6 日假   真係只能局限東南亞   其實想去德國   因為好想睇落雪呀   不過無可能啦   又唔想跟團   所以最終都揀泰國自由行   因為我都想去 Shopping 買平嘢呢 ~

記得去泰國之前一星期   媽咪話我知泰國有示威   其實嗰刻真係有啲擔心   如果真係無得去   要突然間諗另一度地方   真係唔知邊度好   好感恩之後泰國再無示威行動   所以可以如期出發喇 ~

呢次嘅行程係我 Plan 㗎   沿住 BTS 條線咁去囉   上網睇下啲人嘅行程   又睇下天書   求求其其都 Plan 到嘅   最緊要係比我買到嘢   同埋食到自己想食嘅嘢就得㗎喇 ~

胡慧沖本天書真係唔錯   我要嘅資料都有   又有 Coupon   初初覺得無咩用   但真係用到嘅時候又覺得慳番好多   哈哈


天氣方面: 去泰國之前一星期   我先開始留意當地天氣   星期初仲係雷暴   好似星期三打後就係明朗   好感恩呀   因為我印象中泰國成日落雨呢   但其實當中 3 日都有落雨   只不過我哋喺室內呢 ~  

每日都有好天氣   感恩感恩


住宿方面: 今次住 Marriott Executive Apartments Sukhumvit Park   真係非常之唔錯呀   光猛又乾淨   唯一要夾硬挑剔嘅就係行去 BTS 站遠少少囉   不過酒店有免費 Tuk Tuk 去 Emporium Suite  喺 Phrom Phong BTS 站隔離   坐 3-5 分鐘左右就到   所以都算方便 ~ 

我非常鍾意呢間酒店   下次再去   仍都會加錢住 Suite 



交通方面: 今次主要坐 BTS   因為實在太方便   同埋曼谷超塞車   所以最穩陣係坐 BTS   指示都清晰   同埋好乾淨   話時話   泰國無咩垃圾桶   但又無垃圾喺地㗎噃   洗手間又係好乾淨   不論係舊商場定係新商場   都一樣咁乾淨   超讚呀 ~     

BTS 真係好方便   同埋車廂冷氣夠凍呀   哈哈


食物方面: 我一向都鍾意食泰國菜   夠濃味嘛   今次食得唔算好多   但都令我好滿足㗎喇   次次食完都同里奧大人講   計番香港價錢真係好抵   同埋又好味先緊要嘛   今次飲食由我全權負責   里奧大人每餐都話唔錯   算係咁啦   口味好主觀嘛   我只係食大路嘢咋 ~

每日都食一份芒果糯米飯   滿足到呢

令我覺得好驚喜嘅香茅茶   飲完個喉嚨真係好舒服呢


呢次旅行好開心呀   因為真係盡情係咁買   里奧大人成日唱定錢比我買嘢   幾咁好呀   佢又可以放鬆一下   好難得架   話哂唔駛掛住做公司嘢嘛   同佢日對夜對   同埋最鍾意佢去邊度   食啲咩都無所謂   最緊要夠地道夠正宗呢 ~

其實去泰國真係唔錯   機程唔耐   最緊要啲嘢唔貴嘛   食物又好味   不過就唔鍾意啲的士司機唔老實   令遊客無乜安全感   有機會會再去泰國   想住番同一間酒店   實在令人好 Relax 呀   但一定唔會買咁多嘢   要影多啲生活寫照   哈哈 ~

行李超重要罰錢 1200Baht   都係一個深刻嘅體驗