脆味批 CHUBBY'S PIZZA (外賣) ( 30-APR-2020 )

大胃A餐 ($175) - 環球世界普通批 (薄批) & 香辣海鮮意粉 & 炸雞 3 件 & 蒜蓉包
今次好多蒜蓉包呀   所以留番聽日食   意粉都係聽日食   一餐價錢兩餐食   真係好抵   哈哈

( 30-APR-2020  THU )

今朝 9 點幾醒咗   但最後都係瞓番   同里奧大人一齊 10 點幾起身 ~

食埋早餐就番屋企抖陣   12 點先出門口 ~

去一田睇濾水器   再行陣 APM   又買咗 4 對鞋呀   因為買 1 送 1   買咗差唔多 $1,100   所以送一個袋   不過啲鞋無貨   要下星期先攞得 ~

搭車去 Megabox   去到已經差唔多 2 點半   我超級餓呀   所以食埋 Lunch 先再行 ~

雞絲扎肉撈檬粉 ($58) - 都幾好味呀

印尼炒飯 ($76) - 味道唔錯   但好油   底部全部係油   根本食唔到呢

諗住買濾水器   Sales 話星期六有九五折   咁我哋星期六再嚟買啦 ~

再周圍行陣   又買咗條裙   買完都走人喇 ~

5 點半搭車番屋企   番到屋企即開機洗衫   之後沖涼休息 ~ 

7 點叫外賣   8 點唔夠就到   好開心沖完涼食晚餐 ~

食完抖陣又睇 "慶餘年"   所以今晚又 12 點先瞓 ~

韓式辣醬雞 + 農心魷魚辛辣海鮮味拉麵 + 日式田園雜菜湯 ( 29-APR-2020 )

里奧大人之前見我睇韓國食播   佢話韓國食物嘅特色   就係全部係紅色   哈哈

( 29-APR-2020  WED )

番埋今日就連放 4 日假勁開心   因為可以休息下 ~

今朝 7 點 20 分都醒咗   懶下床先刷牙 ~

早餐食吞拿魚治烘底   想食啲酸嘢 ~

菇場唔忙   咁都好 ~

Lunch Time 出去行陣   買埋墨丸米就番菇場喇 ~

仍然唔忙   放工即走喇 ~

去超市買完罐頭湯同炸雞就番屋企   抖多陣就拖地 ~

里奧大人 6 點幾放工   我都要預備喇 ~

家姐話見到兩串魚糕好似好好味咁   所以買比我食

是日懶餐 - 韓式辣醬雞 + 農心魷魚辛辣海鮮味拉麵 + 日式田園雜菜湯 

韓式辣醬雞 - $37.9一包都貴   但明明睇價錢係 $27.9 㗎喎   今次用光波爐焗咗 20 分鐘   但個皮都唔脆嘅   但個汁辣辣哋真係唔錯 ~

農心魷魚辛辣海鮮味拉麵 - 家姐比我㗎   強調話唔辣   只係海鮮味   我同里奧大人覺得好辣呀   之後要加水沖淡去囉 ~

日式田園雜菜湯 - 無買菜就開罐雜菜湯   呢罐都要 $11   其實真係食菜仲平   哈哈 ~

食完都 7 點半喇   叫里奧大人抖陣好沖涼   因為佢 8 點開會 ~

里奧大人話 8 點又未齊人   原來佢又係記錯時間    係下星期三先開會   玩嘢咩   搞到我趕頭趕命 ~

沖埋涼就睇 "慶餘年"   呢排都係咁追住咁睇   我睇無心都唔會咁追呀 ~

里奧大人 11 點瞓   我就 11 點半先瞓 ~

雪菜肉絲燜米粉 + 金銀蛋菠菜 ( 28-APR-2020 )

( 28-APR-2020  TUE )

感恩一覺瞓天光   仲要瞓得好淋添呀   反而里奧大人話尋晚食咗黑椒   半夜好熱喎 ~

早餐食奶醬多   食到一半已經唔想食   但點都食埋去啦 ~

菇場唔太忙   做下自己嘢 ~

無啦啦勁餓   可能 load 食物相呀   但仲有半個鐘先 Lunch Time   真係等得好痛苦 ~

12 點 20 分沖定麥皮   咁 Lunch Time 一到   杯麥皮仍然好鬼熱   差唔多 12 點 45 分先食   可能等得太耐   到食嘅時候又唔餓 lu ~

頭先餓嘛   沖麥皮沖到粥咁杰   諗住飽啲   食完抖陣再食個芝麻餐包   兩樣都無味   唉 ~

4 點即走喇   番到屋企就抖下 ~

里奧大人 6 點放工   咁我都預備晚餐喇 ~

是日晚餐 - 雪菜肉絲燜米粉 + 金銀蛋菠菜

雪菜肉絲燜米粉 - 想清埋 2 包雪菜   所以諗起呢個米粉喇 ~

金銀蛋菠菜 - 之前剩咗半斤就食埋去啦   順便清埋隻鹹蛋同皮蛋 ~

洗埋碗就沖涼   之後休息 lu ~

繼續睇 "慶餘年"   不過 11 點唔夠都瞓喇   無啦啦好攰咁 ~

翠河餐廳 @ 官塘 ( 27-APR-2020 )

黑椒德國豬手煲 ($70)

XO醬乾炒海鮮河 ($56)

( 27-APR-2020  MON )

尋晚瞓得勁差呀   成日去廁所   之後又好難先瞓得着   所以今朝起身有啲難度 ~

我起身如果唔精神   會整呢樣整果樣先刷牙   但精神嘅話就會即刻刷牙   好奇怪   哈哈 ~

早餐食芝蛋治烘底   因為 Lunch 食 Flakes   朝早要飽啲 ~

菇場忙咗陣就 Hea   但個人好攰   唔係咁想郁 ~

Lunch time 出去買生果   再買盒朱古力奶就番菇場喇 ~

差唔多 1 點先食 flakes   其實唔餓   但點都食少少囉 ~

無啦啦勁唔舒服   即飲 Hot Lemon ~

4 點即走   番到屋企同里奧大人講話唔多舒服   今晚唔煮 ~

依家一講唔舒服   佢就好鬼驚   我話我抖下就可以 ~

喺梳化瞓覺   5 點半瞓到 6 點   因為里奧大人幫我蓋被   一蓋即醒   雖然佢怕我凍親   但真係唔好幫我蓋被   咁樣我明明想繼續瞓   都比你整醒囉   咁樣我仲慘 ~

咁都醒咗喇   佢話買外賣等我唔駛出去   我話唔駛啦   一齊出去食啦 ~

食完去買嘢   之後番屋企喇 ~

沖埋涼就休息   叫里奧大人切木瓜比我食   今日真係勁攰唔想郁 ~

點知比里奧大人激死   我放工番到屋企   拎咗一個好似熟熟哋嘅出來   我話今晚食嘅   之後佢洗完就切啦   話生嘅唔食得喎   之後就話我又話食得嘅 ?!   我都慶慶哋話   咁你睇到個樣係唔食得   你就唔好切啦   係咪呀 ?!?!   我講嘅都唔一定啱家嘛   佢話洗咗就要切囉   我話洗咗可以抹乾家嘛   無人話洗咗要切㗎喎   真係頂你唔順   之後佢成個木瓜掉咗啦   唉   嘥鬼哂啲嘢 ~

今晚 10 點 15 分都自己瞓先喇   無啦啦咁早瞓   真係唔多舒服咯   希望瞓醒就 OK 啦 ~

蒜蓉蜜汁烤雞扒 + 忘不了菠菜 ( 26-APR-2020 )

( 26-APR-2020  SUN )

里奧大人今朝起身番工   之後我都瞓得麻麻哋   9 點半都醒咗 ~

即起身刷牙   之後醃雞扒   搞掂哂就整早餐 ~

食完即刻熨衫   抹櫃再執衫   實在太攰   望下個鐘原本已經 1 點半   唔經唔覺做咗 3 個半鐘家務 ~

好想休息喇   所以即刻沖涼 ~

等里奧大人買下午茶番嚟   原來都已經 3 點幾 lu   所以我都開始餓   哈哈 ~

食完就休息喇   個人都攰攰哋 ~

里奧大人 5 點瞓到 6 點半   到佢醒時我又想瞓   但唔瞓得啦   要煮飯喇 ~

7 點幾開飯   我其實都唔係咁餓   所以要慢慢食 ~

是日晚餐 - 蒜蓉蜜汁烤雞扒 + 忘不了菠菜

蒜蓉蜜汁烤雞扒 - 上網睇到呢個食譜   咁啱我解凍咗雞扒   所以試下煮   但我用咗芥辣蜜糖醃   諗住都係甜甜哋   但其實好重芥辣味   哈哈   所以里奧大人話味道好怪   我又 OK 㗎   因為我食麥樂雞都係蘸芥辣醬呢 ~

忘不了菠菜 - 依家麻麻哋鍾意食菠菜   但就唔想成日食白菜同菜心   所以買嚟食下呢 ~

洗埋碗就沖涼   之後睇慶餘年 ~

睇到 11 點幾都要瞓   但其實又唔太眼瞓 ~

台灣黑椒腸炒意粉 + 燒汁煮帆立貝 + 粉葛土茯苓豬骨湯 ( 25-APR-2020 )

( 25-APR-2020  SAT )

7 點 45 分起身   即刷牙沖涼   8 點左右去買早餐   之後等家姐車我去佢屋企 ~

我拎 4 Pack 印尼麵同 1 包米比家姐   我同家姐講話包米就來漏氣咁   所以想比佢   因為我仲有半包米喺雪柜   擺唔到咁多呀 ~

Berry 見到我就即刻縮入梳化底    但我入廁所洗手   佢又跟住我   但一路撲我又一路怪叫   唔知以為我虐待佢   哈哈 ~

好好味呢   Berry 姐

係咁望住

無啦啦又呢埋喺梳化底

對衰眼好得意

第一次咁早去家姐屋企食早餐   但咁又唔錯喎   呵呵 ~

Berry 痴住我瞓呀   勁開心   好耐好耐無試過咁喇   証明佢都唔驚我   哈哈   始終差唔多 2 個月無見嘛 ~

令我諗起泰國四手按摩   哈哈

嗲到呢

咁早眼瞓 ?!   係又好喎   可以任我摸   哈哈哈哈

家姐成日話 Berry 眼瞓就最乖

快啲瞓啦

好耐無試過咁喇   所以我真係好開心

超級樣衰呀   哈哈哈哈

佢真係瞓咗幾分鐘架   所以我唔敢郁   同埋唔講嘢   驚嘈住佢瞓

12 點 20 分走人   家姐車我去街市   因為我想買湯料呀 ~

里奧大人 12 點 45 分放工   但佢居然上錯巴士   所以差唔多 2 點先番到屋企 ~

今日我有啲攰   所以出去食下午茶 ~

食完都 3 點   要即番屋企煲湯喇 ~

6 點左右飲湯   抖多陣就煮晚餐   7 點半可以開餐 ~ 

是日晚餐 - 台灣黑椒腸炒意粉 + 燒汁煮帆立貝 + 粉葛土茯苓豬骨湯

台灣黑椒腸炒意粉 - 懶呀   所以煎台灣腸   但我又唔想食飯   所以炒意粉就算喇 ~

燒汁煮帆立貝 - 今次記得加燒汁   真係好味好多 ~   

粉葛土茯苓豬骨湯 - 本來諗住粉葛牛蒡   但菜檔老闆話土茯苓好啲喎   所以就聽佢講啦   反正真空包裝唔駛煩嘛   哈哈 ~

大清潔廁所就沖涼   之後休息喇 ~

睇多陣電視   今晚 11 點都自己瞓先喇   可能今朝早起呀   哈哈 ~

煙肉煎雙蛋配牛油多士 + 雪菜肉絲出前一丁 ( 24-APR-2020 )

( 24-APR-2020  FRI )

今朝 7 點 25 分都醒咗   咁都起身沖涼喇 ~

早餐食吞拿魚治烘底   好味道 ~

菇場忙呀   話咁快 12 點半 ~

Lunch 食魚片頭河粉   食飽咗真舒服   個人好實在呀   哈哈 ~

無啦啦忙爆   好在 3 點半搞掂   聽日唔駛番工嘛   唔想留番星期一搞呢 ~

放工去買方包   之後都即番屋企喇 ~

抖多陣就煮嘢   今晚個特餐 A 都幾多嘢搞   哈哈 ~

今晚 6 點半開餐   我覺得算早   我同里奧大人講話可能今日忙   所以特別快餓   佢話佢唔會喎   係都話我為食就為食啦 ~

是日晚餐 - 煙肉煎雙蛋配牛油多士  + 雪菜肉絲出前一丁

煙肉煎雙蛋配牛油多士 - 里奧大人最鍾意食脆卜卜嘅煙肉   所以我好有心機煎   但雙蛋就真係極度樣衰   下次都係用五層鑊煎好啲   咁我可以有空間反轉隻蛋   里奧大人好好奇點解得 1 塊多士 ?!?!   因為樣樣都兩份嘛   之後話唔駛多士都得啦 ?!   我話頭先特登買方包架   因為有多士先似特餐嘛   佢喺度笑   笑我低能   哈哈 ~

雪菜肉絲出前一丁 - 用豚肉整用絲都唔錯   依家多數買豚肉做儲備   因為豚肉快熟   哈哈 ~

洗埋碗又大清潔廚房   之後沖涼喇 ~

睇下 Youtube 再睇埋肥媽   話咁快又 11 點   係時候瞓喇 ~