豆卜釀墨魚滑 + 芹菜炒銀針粉 + 翡翠苗 ( 8-APR-2020 )

( 8-APR-2020  WED )

尋晚 4 點幾起身去咗一次廁所   之後都好快瞓得番 ~

今朝 7 點半起身都精神   唔知係咪尋晚早瞓呢 ?!   如果係就好啦   有時夜瞓係因為無睡意   勉強去瞓反而瞓得好差   唉 ~

早餐食芝蛋治烘底   好耐無食   覺得好好味呀 ~

菇場忙呀   好在今日夠精神   哈哈 ~     

Lunch time 去萬寧買 Cream   之後再行多陣就番菇喇 ~

今日食 Flakes + 朱古力奶   唔想成日記住有盒朱古力奶 ~

忙下停下好快放工   今晚去街市買兩晚餸   估唔到有西瓜   前日問里奧大人想食咩生果 ?!   佢話想食西瓜   所以即買   雖然 1/4 個   但其實都好重 ~

買下買下變咗左一袋右一袋   揹到膊頭好痛呀   好在依家天氣涼   咁都無咁辛苦 ~

里奧大人 6 點放工   咁我要煮晚餐喇 ~

依家食飯多數睇新聞   以前唔睇架   一定要食完飯先睇   因為我唔想睇到啲核突嘢 ~

咁講開依家好多人會留喺屋企   佢同事今日問佢假期幾日去邊 ?!   佢話老婆話要留喺屋企   佢同事話你眼望我眼 ?!   成日喺屋企行來行去 ?!   我覺得佢講得好搞笑 ~

但我又唔會覺得一齊喺屋企悶喎   大家做唔同嘅嘢   最緊要喺埋一齊之嘛   其實一日見面時間唔多   所以有時佢 Off   我唔想煮飯   咁多啲時間見面傾下偈呢   嘻嘻 ~

之前政見問題   都知有唔少夫妻離婚   依家疲情問題   同一屋簷下變咗困獸鬥   突然間覺得對方做嘢唔順眼   仍有唔少夫妻離婚 ~

其實可以比自己冷靜一下   搵朋友傾訴一下   再等自己真係心平氣和嘅時候同對方講出感受   加上依家有 Whatsapp 就最好   透過文字表達再加幾個 Emoji 來表達自己感受   我相信對方都會感受到呢 ~

我曾經係過來人啦   其實憎一個人都好辛苦   仲要係憎一個自己好愛嘅人喎   依家雨過天晴   但間唔中都會表達我自己嘅感受   等佢知道比人傷害過嘅痛苦   我知佢係知道嘅   但好多男人係唔會開聲講係知道呢 ~

是日晚餐 - 豆卜釀墨魚滑 + 芹菜炒銀針粉 + 翡翠苗  

豆卜釀墨魚滑 - 好有心機煎   因為我驚煎到燶哂呀   里奧大人最搞笑   以為係油炸鬼   我叫佢再認真食下啦   佢話係咪有塊皮包住墨魚滑 ?!   我話咩皮呀大佬   之後佢話好似豆腐果啲   我話係豆卜呀   佢真係自己食咗啲咩都唔知   哈哈 ~

芹菜炒銀針粉 - 3 棵芹菜都要 $7   但真係好鍾意食佢   今晚只係買咗半斤銀針粉   原來份量都幾多   我落沙嗲醬炒   又唔記得落其他調味   所以無咩味囉   激死我 ~  

翡翠苗 - $10/2盒   但食一盒算喇   因為留肚食湯丸 ~

7 點幾食完   洗埋碗就再整咖哩魚蛋   咁聽晚就唔駛煮   呵呵 ~

搞掂哂即開機洗衫   大清潔廁所就沖涼   之後抖下一陣再煮湯丸 ~

里奧大人 8 點開會   我就睇 youtube ~

佢 9 點開完會   咁我都煮湯丸喇   尋晚煮好咗個糖水   唔好浪費嘛   但今晚啲蕃薯又唔靚   所以即去超市買利川芝麻湯丸   平時廿幾蚊 3 包   依家特價都要 $13.9   但好想食利川湯丸呀   所以都係買佢喇 ~

洗埋碗就一齊睇 "無心法師 3"   今晚 11 點半先瞓呀 ~