福花炒肉碎 + 煎黑椒牛丸 ( 23-APR-2020 )

我將菜莖切粒再加冬蔭功醬炒意粉   咁都唔錯

里奧大人就食尋晚食剩咗嘅雜豆+丸同飯   一齊炒埋又係唔錯

( 23-APR-2020  THU )

今朝落毛毛雨   又凍凍地   呢啲天氣就最易令人攝親呢 ~

早餐食芝蛋治烘底   因為 Lunch 要輕食 ~

菇場超級忙   好快就 Lunch Time ~

出去買嘢   但又買唔到   其實一落樓都開始有啲餓   不過都係想行下囉 ~

咁我食 Flakes + 乳酪   唔知邊個同事嘅 Lunch 好鬼香   我突然覺得食 Flakes 無味   哈哈 ~

今日唔知咩事   家姐同里奧大人同朋友們輪住 Send 食物相來   真係早餐午餐下午茶呢啲時間喎   睇完真係餓到我不得可了   已經食麻糬曲奇餅   但我好想食鹹嘢囉 ~

放工即走   同里奧大人一齊去萬寧買嘢   今日 4-7 點限時 9 折   所以我買咗好多清熱酷呀   再買埋其他嘢   埋單接近 $500   依家啲嘢真係好貴   特別係藥物呢啲   但唔買定看門口又唔得喎 ~

買完即番屋企   浸埋菜就休息   我係咁講話好肚餓好肚餓   要食包點心麵   比一半里奧大人   但我仍然餓   食埋大半條蕉   叫做隻手無咁震   年紀大真係唔餓得   哈哈 ~

我同里奧大人講話次次喺公司一忙到顛呢   就會好快餓   佢話佢唔會喎 ~

5 點幾預備煮晚餐   6 點 10 分可以開餐   我真係好餓呀   所以要食早飯   但呢   里奧大人唔知係咪頭先食咗半隻蕉   晚餐唔係咁食咁   不過我唔話佢呀   係我比佢食家嘛 ~

開飯時沖杯黑茶   之後里奧大人叫我睇清楚啲係咩茶 ?!?!   原來係紅茶呀   我好驚話會瞓唔着呀   佢話唔驚啦   上次妳飲完都瞓得着   哈哈   真係輪盡   紅茶當黑茶 @@

是日晚餐 - 福花炒肉碎 + 煎黑椒牛丸

福花炒肉碎 - 第一次煮呢個餸   只係炒比較辛苦   可能我成日用錯力   次次炒完嘢   我隻右手會好痛呢   好在味道 OK   下次可以再煮   唔駛成日淥菜咁悶嘛 ~

煎黑椒牛丸 - 好想食濃味食物   醒起冰格有牛丸   但食剩一半   又要留番聽晚 lu ~

洗埋碗就開機洗衫   之後沖涼   抖陣就熨 2 機衫 ~

里奧大人接力熨褲   咁我可以抖抖 lu ~

今晚 11 點都瞓喇   頭先飲咗茶嘛   好在都有睡意咋   哈哈 ~