薑蔥生蠔 + 泰式酸辣鳳爪 (外賣) ( 13-APR-2020 )

( 13-APR-2020  MON )

今朝 10 點幾都醒醒哋   但都唔再瞓喇   咁沖埋涼就等里奧大人起身 ~

家姐好搞笑   問我做咩咁早起身 ?!   我話聽日要番工   唔想瞓咁晏呢 ~

里奧大人 11 點起身   等佢沖埋涼就去食早餐 ~

我同里奧大人講話尋晚喺咁發夢呀   仲要同回魂夜劇情差唔多添   好記得個老師用飛標殺學生   之後有兩個人拎電鋸入課室   鋸老師個頭落嚟   之後個老師拎住個頭走出課室呀   勁驚 ~

今日天氣好清涼   所以同里奧大人講話想出去行下   依家去長州同西貢都好多人   里奧大人話行山仲多人呀   咁佢話不如去 APM 行下   順便睇風扇 ~

差唔多 12 點幾先出發   去完淘大德福再去 APM ~

我同里奧大人講   其實依家反而商場少人行   因為一係想出郊外透透氣   一係就會留喺屋企咁囉 ~

行到 2 點左右就搭地鐵去官塘   咁去埋南記食嘢   之後就行 APM 喇 ~

春卷墨魚丸河粉 ($26)

春卷魚片酸辣小鍋米線 ($36)

里奧大人喺 Chevignon 買咗 1 件褸同 2 件 Tee   因為買 3 件半價   咁就抵喇   因為件褸原價係要$1,199   其餘兩件 tee 原價係 $399 & $449   咁半價之後   依家只係 $1,023   呢個牌子好少半價   所以市道真係好差呢 ~

買完就到我去 H & M 買條 Legging 同 1 Pack 船襪   最後去埋一田超市買急凍食物同泰式鳳爪就番屋企喇 ~

番到屋企一望個鐘   原來都 5 點   時間過得勁快 ~

$40/2盒   可以同家姐 Share

開機洗衫就休息   6 點左右煮飯 ~

是日晚餐 ~薑蔥生蠔 + 泰式酸辣鳳爪 (外賣) 

薑蔥生蠔 - 第 1 次煮   比我想像中易   我只係用蠔油生抽調味   估唔到都好好味道   但啲廣島蠔縮到好細隻囉   里奧大人話好少蠔   哈哈 ~

泰式酸辣鳳爪 (外賣) - 喺一田買架   今次無咁辣   但係我就係想食辣嘛   嗚嗚嗚嗚 ~

大清潔廚房就沖涼   休息到 9 點幾就同里奧大人一齊靈修   之後我 10 點半就睇肥媽 ~
  
今晚 11 點幾都瞓喇   聽日要番工呢 ~